ح اموت... ح اتشل... ح يجرا لي حاجة

لقيت نمرة منى الشاذلي على البندينج لان تليفوني مش بيلقط في الشغل، اتصلت بيها على حوالي تمانية قالت لي انا كنت عايزاكي فيه نائب كان بيطالب باذاعة عقوبة الاعدام للمغتصبين على التلفزيون والاذاعة واتوافق عليه، قلت لها انا دلوقت في الشغل ممكن اشارك بمداخلة على التليفون، خلاص؟ خلاص

اتصلوا بيا الاعداد وقالوا لي ح نكلمك على حداشر حداشر ونص

هي الحقيقة منى في اخر الحلقة اعتذرت للناس اللي وعدتهم بالاتصال نظرا لكثرة الاتصالات وقالت لي كل ما كانوا يفتحوا خط عشان يتكلموا يلاقوا حد بيكلمهم، وياريتهم ما اتكلموا يا اخووووووووووييييييياااااااااا

البرنامج كان مستضيف محمد قويطة النائب صاحب الفكرة اللوذعية، وناصر امين اللي كانت ح تجيله ازمة قلبية، ومحمد طعيمة اللي بصراحة حاول يبين انه مش مصدوم في الناس بس كان باين عليه انه مصدوم

انا ما غاظنيش غير الناس، الناس تتصل وتقول ايون، اعدموهم على التلفزيون عشان الناس ترتجع

طب وده بالذمة شكل ناس ح ترتجع من منظر الاعدام؟ الناس اللي عايزة فيلم اعدام الساعة اتناشر بالليل في معاد ثابت (فيه ناس اتصلت قالت كده) وح تجيب لب وفشار وتقعد تتفرج على واحد بيتشنق، بقى دووووووووول ح يرتجعوا من منظر الاعدام؟ ده مش بعيد واحد من اللي اتصلوا في ما يطلبه السفاحون عشان يقول: الله يخليكوا الله يخليكوا غني لي اي حاجة لمحمود المليجي... مش بعيد بقى واحد فيهم يعجب ببطل احد افلام الاعدام ويروح يتقدم في مسابقة اغتصاب عشان يبقى بعد كده مغتصب مشهور يتشنق اليه بالبنان

ومنى تقول لواحدة: يعني انت ترضي ان حد من اولادك يشوف المنظر ده؟

يشوفوا عشان يعرفوا نتيجة حاجة زي دي ايه-

طيب العيال الصغيرة، والمراهقين، وبعض الشباب بيقلدوا التلفزيون، يا سلام بقى لو عيل بيلعب مع صاحبه "اغتصاباية"

وقرر يشنقه، مش كفاية الكرتون الياباني اللي مخلي العيال عمالة تشلت وتقول: النجم الصاااااااااععععععععععقققققققققق

اولا: اخشى ما اخشاه ان يكون فيه تعمد ترويع للمصريين وتضخيم لظاهرة ماهياش ظاهرة ابدا في المجتمع ولا حاجة

انا اقصد لما الجرنال يكتب، انشالله كل يوم، عن حداثة اغتصاب في بلد تعدادها تمانين مليون نسمة، دي ما اسمهاش ظاهرة

كل شيء نسبة وتناسب، فيه احصائية بتقول عشرين الف حالة اغتصاب سنويا في مصر معظمهم مش بيرضوا يبلغوا

طب احنا تمانين مليون، اقسم عشرين الف على تمانين مليون يطلع النسبة: 0.025 في المية

كده مش اسمها ظاهرة ناهيك عن انها تكون ظاهرة مرضية

واستكمالا لحالة الترويع عايزين يروعوا الناس مش بس بالايحاء ان اي واحدة ح تمشي في الشارع ح تغتصب، دول كمان عايزين يروعوهم في تنفيذ العقوبة على الجاني

مين من مصلحته يروع الناس بالطريقة المزدوجة دي؟ وايه الهدف؟

الناس كانت بتتصل وتقول: ايوة عايزينهم يعدموهم في ميدان عام وعلى شاشات التلفزيون وعلى الراديو وناصر امين عمال ينفخ وكان ح يقوم يقطع في هدومه وانا قاعدة اشد في شعري ومنى قاعدة تبرق عينيها من مكالمات الناس

طيب ده كلام ناس خايفة، وخايفة الحقيقة من ظاهرة ماهياش ظاهرة، النسبة لما تبقى 0.025 في المية ما تبقاش ظاهرة، الناس مش ماشية تغتصب في بعض في الشارع

دي حادثة

وعشان كده بتتنشر في الجرايد، عشان حادثة، من زمان وبياعين الجرايد بيقولوا: اقرا الحااااادثةةةةة اقرا الحااااااادثةةةةةةةةةة

ثانيا:

من امتى التنكيل بالناس بيردع الجرائم؟ الجرائم تحد بالعدل والرحمة والمساواة مش بالتنكيل وارهاب البشر

ثالثا بقى ودي اهم نقطة

قال ايه؟

قاااااااااااال اييييييييييييييه؟

قاااااااااااااااااااااااااااااال ايييييييييييييييييييييييييييييييه؟

سيادة النائب قويطة بيقول انه عايز يطبق الشريعة الاسلامية وزغرتي ياللي مش غرماااااااااااااااااااااااانة

وبيستشهد بايات بالقرآن مش ح اوردها عشان ما يصحش اني اعيد اساءته للقرآن تاني

بقى احنا بقى لو ح نطبق الشريعة الاسلامية صح يا سيادة النائب ماحدش ح يستحق تطبيق الحدود عليه غير السادة اعضاء المجلس الموقر اللي ما اقروش مشروع واحد لحماية الوطن من استغلال رجال الاعمال اللي بيفقروا الفقرا ويزيدوهم بؤس على بؤسهم ويحتكروا السلع ويشتغلوا سماسرة يبيعوا البلد حتة حتة، ما اقروش مشروع واحد لحماية الناس من اللي بيخصخصوا ويرموا العمال في الشارع بمكافئة تلات الاف جنيه ده ان اخدوها، ما اقروش مشروع واحد لحماية المواطن اللي ماشي في الشارع من انه يتوقف ويتقال له بطاقتك يلا ويسمع ما لا يرضه عن الست والدته والسيد والده واذا بمبك ينضرب ويلبس قضية

والسادة اعضاء الحكومة، مستوجبين الحدود بجد، ولو ان مش ح يهون عليا برضه اتفرج عليهم

والسادة المعززين للنظام المصري على كل شكل ولون

وغير كده فالحدود يجب تعطيلها على كل الناس، ح تطبق حد على واحد جعان؟ على واحد شايف حواليه في كل حاجة ان الشر هو اللي بينتصر في الاخر والحلال عمره ما بينفع والحرام عمره ما بيروح؟ ح تطبق الحدود على بلد بتنفق تمنتاشر مليار دولار على المخدرات سنويا عشان الناس لا عارفة تصدق اللي بيحصلها ولا قادرة تغيره فبتضرب دماغها بدل ما تنتحر وتموت كافرة؟

لما بلد واحد فيها يقتل نفسه وعياله بمكرونة مسممة عشان مش لاقي يصرف عليهم، وواحد يرمي نفسه في النيل عشان مش عارف يجيب مصاريف الدراسة والكتب واللبس لعياله، دي بلد تتكلم عن اسلام وللا مسيحية وللا يهودية وللا حلمبوحية؟

هو احنا ما بنفتكرش الاسلام غير عشان ننكل بالشعب؟

رابعا:

الناس ح تتعاطف اكيد مع المغتصب

لا مش الفكرة انه يصعب عليهم وبس

الفكرة انه ممكن يخلق حالة غضب داخل شباب كتير، وفجأة تحصل ثورة المغتصبين، يطلع عشرتلاف واحد، وللا ميت الف عيل يقولوا طب احنا بقى ح نغتصب كل الستات، ورونا بقى ح تموتونا كلنا ازاي

اه

ماهم ح يعملوا كده عشان هم بني ادمين مش كلاب، ماهي دي بقى صفات البني ادمين، البني ادم لما تنتهك انسانيته وتذله وتقهره بالشكل ده بيعمل ردود افعال كده عشان هو بني ادم، مش كلب

الكلب بس اللي لما تديله بالجزمة ما يردش

ثم ايه حكاية: ردع الناس ردع الناس

كأن الناس، اللي هم تمانين مليون دول، شوية بهايم لا تشتريهم الا والعصا معهم، ان المصريين لانجاس مناكيد

فين حل مشاكل الناس؟

فين تقويم المجرمين؟

هو اهم حاجة بيفكروا فيها ازاي يردعونا؟ ازاي يخوفونا من ظاهرة هم اللي مضخمينها وبعدين ازاي يخوفونا من عقوبة الظاهرة اللي مش ظاهرة؟ هو كده؟ كل همهم يخوفونا وبس؟

خامسا:

ح يبقى فيه جزء تاني من الناس اقذر من قادة ثورة المغتصبين، ثورة المغتصبين دي مش ح تيجي غير من ناس عندها دم واحساس وانسانية، زي ما باقول لكوا كده، ده رد الفعل الانساني المحترم الوحيد اللي ممكن يحصل لحاجة زي دي

لكن فيه ناس تانية مش محترمة، ح تعتاد منظر القتل، مش ح يبقى بالنسبة لها رادع ولا حاجة، ح يبقى حاجة مسلية وح يخلق منهم ناس دموية ومتعطشة للتشفي والتنكيل

ااااااااااااه

اليكم نظرية المؤامرة:

مين اللي من مصلحته يرهب الناس من ظواهر وهمية وزي ما قال محمد طعيمة يشغلهم بقضايا مش حقيقية ويديها اكبر من حجمها؟

مين من مصلحته يربي الرعب في الناس من بعض؟

ومين من مصلحته يكره الناس في بعض ويخليهم عندهم المشاعر العدوانية، الدموية، المتشفية دي تجاه بعض؟

مين من مصلحته يفرغ غضب الناس في بعض بدل ما يفرغوا غضبهم في اللي عمل فيهم كده؟

المصريين في ظل الظروف الجميلة الحلوة اللي انتوا شايفينها كلكوا فقدوا كتير من جمال شخصيتهم، واهم حاجة فقدوها في الحادث الاليم اللي حصل لهم: مخهم... طب والله كمان مرة الناس مخها طرقع

بس لسة فاضل لهم حاجتين: انهم مسالمين وبيكرهوا الدموية، وانهم ولاد نكتة ودمهم خفيف

وبالمناسبة لما يحولونا الى ناس دمويين ومرضى ومتشفيين دمنا ح يتقل قوي

ح يفضل لنا ايه؟ نعيش ليه تاني؟ طب ما تختصر وتقول شامبانزي؟
----
تكون المؤامرة عشان يلهونا عن تنظيم الشقق المفروشة وخلية الشاليهات؟