الخبر ده بيقول ان لقوا عناصر من فتح في خلية حزب الله، وناس من السودان وسوريا ولبنان وبلاد تركب الافيال، وعناصر فتح في حماس وحماس في حزب الله وغالبا ممكن يكون الخمير الحمر والحزب الشيوعي ضالعين في الموضوع، ويمكن النازيين الجدد والصهاينة كمان
---------
حسام الحملاوي بعد لي الخبر الاتي:
الامن يهدد اقتحام مصنع اسمنت حلوان لاحباط اعتصام العمال
اعتصام العمال بقاله تلات ايام عشان طالبين نسبة من الارباح، والجمعية العمومية عقدت النهاردة ورفضت طلبهم والامن بيهددهم انه يفض الاعتصام بالقوة
------------
ربنا يخلي لكوا حسني مبارك، الهي يفضل عايش ليوم القيامة عشان يحافظ لكوا على السيادة
ماهم العمال دول كمان راخرين غلطانين، هو عمل مشرف، بس خطأ وبيهدد سيادة مصنع الاسمنت، ولو لا قدر الله العمال انضربوا ح يطلع انهم هم البلطجية والغلطانين - زي عمال المحلة - وحراس الوطن معذورين
الهي يفضل راكب على نفسكوا ليوم القيامة مدام بتحبوه
20 comments:
نوارة فية فرق بين المؤامرات الخارجية ضد الوطن و بين الشأن الداخلي الشأن الداخلي
كمعارضين للحكومة بينا و بين الحكومة
يعني مينفعش ن صر الله يجي يحل مشاكلنا او يعمل واصي علينا و اذا كنتي شايفة كدة فلية تزعلي لما جمعيات من امريكبة تشتغل في مصر ؟؟؟؟؟؟؟؟
ربنا ينصر العال و ياخدو حقهم
يابني انت بتفهم ازاي؟
نصر الله جه يحل لنا مشاكلنا؟
هو جه يعمل لنا ثورة؟ وللا جه يغير نظام الحكم؟ وللا حتى يساعد فصيل معارض؟ وللا حتى يدفع لهم فلوس؟
احا
امال اللي بياخدوا المعونة الامريكاني والخارجية الامريكية بتدعمهم وعاملين فيها ابطال ومناضلين دول يبقوا ايه؟
انا زهقت على فكرة
يارب يخلي حسني مبارك لحد يوم القيامة
يااااااااااااااااااارب
واياك ثم اياك اسمع حد من بتوع السيادة دول بيتكلم عن حسني مبارك وللا بيشتمه
يااااااااااااااارب يفضل عايش لحد يوم القيامة يااااااااااااارب
ده شراني ويعملها
نوارة انتي بتعارضي الناس بتاخد المعونة و في نفس الوقت تسمحي من ناس تاخد تمويل من دول تانية سواء كان بهدف دعم المقاومة او اي هدف تاني
دي نقطة التانية
انا بتكلم فية فرق بين المؤامرة و بين المعارضة الداخلية ان بعارض الحكومة في حجات كتير بس مشمعنى اني معارض اروح اجيب دعم من دول معادية للنظام
ما هي هي نفس النقطة ارجو تكوني فهمتيني
يبقى في نفس الوقت منخدش فلوس من حد لا من امريكا ولا من دعم ايران
بيدي لا بيد امريكا او بيران
اه يا مواطن
المقاومة حاجة والتغيير الداخلي حاجة تانية
انا لما اكون باقاوم المحتل من حقي اخد دعم من اي مخلوق
زي ما كنا احنا في مصر بندعم الجزائر
زي ما كنا بندعم منظمة التحرير ايام ما كانت متبنية خط المقاومة زي ما احنا نفسنا كنا بناخد سلاح من الاتحاد السوفييتي
عشان نقاوم
اللي بيقاوم ده واحد بيحارب، واي حد عايز يساعده في قضيته ياخد منه
المقاومة شغلتها تقاوم
واللي عايز يدعمها مش ح تقول له لا
لو مصر دفعت للمقاومة المقاومة مش ح ترفض
لو الصين دفعت لهم مش ح يرفضوا
لانهم بيقاوموا محتل
بيقاوموا محتل
خارج البلد وجاي يحتل
فهمتها وللا اعيدها تاني؟
لكن لما احب اغير جوة بلدي ما ينفعش يبقى نظام الحكم بتاعي مصري (حتى لو خاين) وانا اروح اخد فلوس من مخلوق كائن من كان عشان اغير النظام ده
انا كده بلدي مستقلة وباروح اجيب لها احتلال
فهمت؟
انا ضد الاحتلال
فهمت؟
اعيد؟
اعيد؟
انت كنت بتجيب كام في الرياضيات؟
يعني الطم على وشي؟
الطم؟
الطم يعني وللا اعمل ايه؟
هو حماس وللا حزب الله بياخدوا من ايران عشان يغيروا نظام الحكم؟ وللا عشان يقاوموا محتل؟
هي المقاومة الجزائرية كانت عميلة لمصر؟
لو امريكا دفعت فلوس للمقاومة المفروض تاخد منها
ولو ادتهم سلاح المفروض ياخدوا منها
زي ما كنا بناخد احنا من الاتحاد السوفييتي
لكن لو انا اخدت فلوس من ولي من اولياء الله برة بلدي عشان اغير نظام بلدي الداخلي زي سعد الدين ابراهيم يبقى انا باعرص
وباجيب لبلدي احتلال
فهمتني؟
يا مواطن استنى بس
هو ايه علشان هدف المقاومه او حاجه تانيه دي وبعدين انتم مالكوا حاطين المقاومه فوق روسكوا كده يعنى ما احنا كنا بنقاوم وكان بيطلع عين اللى خلفونا وكان فيه دول عربيه بتساعد هو فيه ايه بس انا عاوزه افهم يعنى بجد هما الناس دول عاملين ليكوا ايه هو حد داس لنا على طرف جلابيه حتى وبعدين بلاش مش هنساعدهم انتم بقى ساعدتوا المصريين بايه ما كله بيجاهد على الكيبور وخلاص حد عمل حاجه طيب يثبت ليه
وفى الاخر هتقولوا اللى بيساعدوهم خونه يعنى بجد ولا بنرحم ولا بنخلى رحمه ربنا تنزل يا اخي هو ربنا هيعمل فينا ايه اكتر من كده يا اخى دا ا حنا مسلمين يا اخي ده ربنا قال اننا نساعد بعض يا اخى هو حد عمل حاجه فى مصر يعنى هو انت بتحبها واحنا بنكره اللى جابوها
يا اخى انت رحت زرت الجرحي واتكلمت معاهم يا عمنا انت اتكلمت مع اللى اتقبض عليهم
يا عمنا قولنا ميتين مره اقسم بالله الامن عارف بوجود الناس دي فى مصر من سنين
بالعقل كده لو مش عارفين يبىق المخابرات وامن الدوله يروحوا يحبوا فى التليفونات ويرحوا اللى جابونا واحنا هنتصرف يا اخي بابا كان فى المخابرات 3 سنين بعد الحرب وقالى مفيش نمله جوه مصر المخابرات مش عارفاها
احنا اتقرصنا من اسرائيل علشان كده الامن بيلوش وهما بس بيحيوا ماء الوجه قدام اسرائيل
يا عم انا بجد هموت مشلوله من اللى بيحصل يا سيدي انا عندي اصحابى شيعه باعتين ليه على الفيس بوك يقولوا ليه ايه موقف شعب مصر المناضل فى اللى بيحصل ايه رايهم فى اللى الحكومه بتعمله علشان ناس بتدي ناس سلاح وغذاء يا اخى الراجل بيسالنى وهو بيقول انا عارف شعب مصر محترم ومناضل طول عمره بيقولى السيد حسن عمره ما يضر بمصر
يا عمنا انا اتكسفت من الراجل وبعت له اقوله احنا فاهمين المسلسل والحكومه بتلوش علشان معاهد كامب زفت واطران
يا اخى يا ريتنى ابويا ما خلفنى ولا جابنى هنا علشان مشوفش ان اللى عملوه هما فى سنين الاجيال اللى بعد كده بتهد
انا نفسي اقعدك مع بابا تسمع منه من 67 لغايه 76 عملوا ايه وتفهم الناس دي واحنا جيل عامل ازاي
بابا كان بيقلع هدومه للرتب الاعلى علشان ميتاسروش فى الحرب واه ابويا من البدو برضه اللى بتتهموهم بالعماله
ملعون ابو الزمن اللى يخلينا نعمل كده سياده مصر احنا ضيعناها يا اخى والله
يا نواره حرام عليكي منك يا رب للامم المنتحره يا رب
دة رائي الشخصي يمكن مش فهماني بس يوم من الايام هيثبت يا انا كنت صح او انتي الي صح و بيننا الايام
أنا شايفة أنه يبقى فيه إتنين من فتح
و بالتحديد من كتائب شهداء الأقصى
ده مش وحش
بالعكس ده بيأكد إنه مازال هناك شرفاء فى فتح
و إن مجموعة أوسلو عباس هما اللى مسوئيين صورة فتح
ياريت كمان يلقولهم عضوين من الحزن الوطنى و يا سلام بأه كمان لو طلعوا لجنة السياسات
و لا جيل المستهبل
فالموضوع كله ليس تهمه و إنما شرف
يجتمع عليه كل الشرفاء
الشرفاء و بس
لإن دعم أهل غزة المُحاصرين أمنية أى حد عنده ذرة شرف
مواطن متزعلش منى بجد معلش يا نواره انتى عارفه انى على اخري مواطن بجد والله ما تزعل من نرفزنى بس مسيرك تقع تحت ايدي واقعدك مع بابا اسبوع تاخد دروس من الخمسينات لدلوقتى
ايران وامريكا In Horror we trust
http://malek-x.net/node/596
شوفي كلام مالك
نوارة
بحترم رايك جدا
بس مش عيب ان صحفية او بنت تقول كلمة احا
ارجو التوضيخ ولكى كل احترامى
حاضر مش ح اقولها تاني
معلش
لسان حال النظام
أنا عتريس
أنا بلوة سودة
أنا هاخد الاتاوة الطاج طاجين
انا مش عارف اقول
ايه
غير انه المفروض مصر
تقطع علاقاتها
مع العميل
الخائن
الذى لا يريد خيراً لمصر
محمود ابو مازن
المارق
حلو فتح فى حماس
و بكره تبقى الأخوان المسلمين
احفاد جيفارا
حسب الله و نعم الوكيل
فيك يا فخرى
---
على فكرة انا مؤيدك فى مناقشتك مع مواطن مصرى
بس عاوز اقول حاجة صغيرة
هو لما نصر الله
قال للجيش المصرى
و الشعب
يروحوا يكسروا الحدود
مش كان تدخل فى شئون مصر
اى ان كان نبل الغرض منها
هو مال اهله
نوارة
آآآآآآآآآه انتي بقي بتقولي يارب مبارك يعيش ليوم القيامة عشان العمال اللي رافعو يفط بيبايعوه
معلش يا نوارة
دول غلابه والله و ده اكبر دليل على غلبهم
هما مش فاهمين حاجه والله و بيوصلو نفسهم لانهم يبقوا شحاتين بيشحتوا علاوة 10% و شويه ملاليم من الملك عشان هما فعلا محتاجينها دووول مساكين المفروض تدعيلهم تقولي ربنا يرفع عنهم و عننا البلاء
مش تزعلي منهم
مينفعش ناس يبقي طالع دينها و كل مُناها في الدنيا انهم يأكلو عيالهم و يكسوهم و بعدين نيجي نحاسبهم
لا بيقعدو على نت و لا بيقرو جرايد و مش بيوصلهم غير الريس عمل الريس سوا الريس خايف كل ام امن مصر القومي الريس عفا الريس امر بعلاج على حساب الدولة و و و الخ الخ الخ
هما شايفيين ان ده الحل
تلوميهم على اي اساس بقي
نوارة هو "مواطن مصرى " ده شخصية حقيقية ولا ده شخصية وهمية انتى عملاها تشيلينى بيها !!!!!!!!!!! ده غريب
و الله مقصد حاجةو لا عايز ازعل حد بس مش كده
اتاري و انا مروحة لاقيه 50 عربية امن مركزى وافقين فى المحطة بس العمال لما بيقوموا محدش بيقدر عليهم زمااان كانت حلوان قلعة الصناعة - دلوقت بقت قالعة بس
انا من بلاد قريبة من الجليل وشاهدت بام العين رجل قتل اولاده الثلاثة في قصف المقاومة لشمال فلسطين في حرب 2006 ورأيته يحتسبهم عندالله شهداء للمقاومة ويرفض ان يتجاوز احد بكلمة على حزب الله ومقاومته الباسلة
واغلى امنية يحملها الواحد منا ان يتشرف بتقبيل يد الشيخ الذي اعادنا الى الحياة الكريمة والعزيزة بعد ان عانينا الامرين من تجبر اليهود واستخفافهم بنا وبكل عربي
على مستوى الحياة الدنيا يتقاضي الواحد منا مايقارب الثمانمائة دولار في الشهر عن اي وظيفة يشغلها ولدينا كل مايحتاجه الانسان للاستهلاك ممالذ وطاب ولكننا مستعدين ان نأكل التراب وان نشرب الميه الآسنة على ان تبقى كرامتنا محفوظة
وعفوا منكم يااهلي في مصر وقد تشرفت بضيافتكم طوال فترة دراستي انتم تأكلون التراب بالفعل وتشربون المياه الآسنة فماذا يبقى لكم اذا فقدتم الكرامة؟
يعنى كما نقول في فلسطين مثل الفواخرة لا دنيا ولا آخرة
Post a Comment