Wednesday, 1 April 2009

اتفرجوا على العلم الذي لا يكيل بالبتنجان

تحديث:
يا شباب ورقة البحث اهي لقيتها، وبعدين مين قال انهم ما جابوش سيرتنا، اقصد المصريين، قالوا اليهود والفلسطينيين والمصريين واللبنانيين والارمن والاناضول والايرانيين كلهم اصل جيني واحد
ههههههههههههههههه
مش قلت لكوا كل الناس ح تطلع يهود عشان اليهود بني ادمين وكل الناس بني ادمين، اما عجايب والله
اللي معاه قرش محيره يجيب حمام ويطيره، ما كل البني ادمين في الدنيا اصل جيني واحد يا ناس، انا بنظرية المؤامرة بتاعتي حاسة ان علم الجينات ده في طريقه الى انه يستغل عنصريا
هو المقال قديم قوي، من سنة 2001، بس هو كان مين اللي لما قلت العلم لا يكيل بالبتنجان قال لي لا يكيل والعلم ما بيغلطش؟ اه، افتكرت، مالك مصطفى، قال لي بالمفتشي كده وربنا: العلم ما بيغلطش
وكان باين عبده البرماوي كمان
طيب اتفرجوا على العلم اللي هو الحقيقة المطلقة واللي مش مبني على خرافات ولا خزعبلات ولا دياولو
اهو:
روبين ماكين
قامت احدى المجلات العلمية الكبرى بسحب بحث علمي هام، يظهر تطابقا جينيا بين يهود الشرق الأوسط والفلسطينيين، من إحدى نشراتها.

وقد طلب من الأكاديميين القائمين على النشرة العلمية "المناعة البشرية" الذين تسلموا البحث أن يقوموا بقطع الصفحات "المسيئة" وإلقائها في سلة المهملات (كدهو؟ شقى الناس وتعبهم يروح في الوبا؟ دي لو كانت طابونة ما كانوش اتصرفوا فيها كده(.

وقد أثارت الرقابة غير المسبوقة على البحث العلمي القلق والمخاوف من الحجر على الأبحاث العلمية التي قد تشكك في بعض المعتقدات المتعلقة بالكتاب المقدس (لا حول ولا قوة الا بالله، يعني هو ده اللي يهمهم؟ طب واستغلال الناس في البزنس، والابحاث العلمية اللي بتخدم تجارة الدواء؟ ده مصانع الشيكولاتة بتعمل بزنس من ورا الابحاث العلمية ما يشيلوا الكتب المقدسة من دماغهم شوية، مش هي اللي بتتاجر في دم الناس.

وقد صرح البروفيسير الإسباني أنتونيو أرنيز فيلينا، أحد المشاركين في البحث والمتخصص في علم الوراثة من جامعة كومبلوتينز بمدريد: "لقد ألفت مئات من الأوراق البحثية بعضها لمجلة الطبيعة والبعض الآخر لمجلة علوم، ولم يسبق أن حدث لي مثل هذا الموقف من قبل...إنني مندهش" لا ما تندهش يا حبيبي بتحصل في احسن العائلات.

وأضاف السير والتر بودمر، المتخصص في علم الوراثة من بريطانيا: "إذا لم يعجب البحث القائمين على النشرة فكان عليها ألا تقوم بنشره بتاتا، لكن لماذا تتصرف بهذا الشكل بعد ظهور البحث إلى النور".

وتدعي نيكول ساسيو فوكا محررة النشرة، من جامعة كولومبيا، نيويورك، بأن البحث قد أثار العديد من الشكاوى التي اعترضت على المنحى السياسي الذي يأخذه البحث مما دفع المحررة إلى رفض البحث. تم حذف المقال من موقع "المناعة البشرية" الإلكتروني، وانهالت الخطابات على المكتبات والجامعات في العالم أجمع لتجاهل أو "محو الصفحات المعنية". كما تمت إقالة نيكول ساسيو فوكا من هيئة تحرير النشرة العلمية.

كما صرحت دوللي تيان، رئيسة الجمعية الأمريكية لأنسجة الجسم والمناعة الوراثية، والتي ترأس النشرة، للمشتركين بأن الجمعية "مستاءة ومحرجة" مما حدث. اسم الله عليكي من الاحراج يا انسة، انشالله احنا واللي يتشدد لنا
ويتضمن البحث المعنون "أصل الفلسطينيين وصلاتهم الوراثية بشعوب البحر المتوسط" دراسة التنوعات الوراثية لجهاز المناعة والجينات لشعوب الشرق الأوسط. واحنا طلعنا ايه؟ وللا ماحدش درسنا؟ خلاص خلاص، مافيش داعي للغلط

ويثبت البحث، كما أثبتت الأبحاث السابقة، أنه لا يوجد أي دليل علمي على تميز اليهود عن بقية سكان المنطقة أو انهم "مختارون" أو أن اليهودية تورث (ههههه اصحاب العقول في راحة، بقى بيصرفوا فلوس عشان يعرفوا اليهود بني ادمين عاديين وللا جنس متميز؟ جنس متميز ازاي؟ ماعندهمش حد بيعيا؟ ماعندهمش حد بيسقط في المدرسة؟ ما عندهمش حد بيدمن مخدرات؟ ما عندهمش حد بيكتئب؟ ما عندهمش حد بيترفد من الشغل؟ ما عندهمش حد خايب في الحساب؟ ما عندهمش حد بيتهته؟ ما عندهمش حد سمعه تقيل وبيسمع الكلام غلط زيي؟ ماعندهمش حد عنده صناع نصفي زي اللي عندي دلوقت؟ ما عندهمش مصحات عقلية؟ ماعندهمش مصحات نفسية؟ متميزين يعني ازاي يعني؟).

ويقرر مؤلفو البحث أن اليهود والفلسطينيين يتشاركون في نفس الصفات الوراثية ويجب اعتبارهم متقاربين للغاية وغير منفصلين جينيا (يا ولاد اللذين... طلعتوا يهود بعد ده كله؟ صدقتوني بقى لما قلت لكوا احنا منطبق علينا كل صفات بني اسرائيل؟) وأن الصراع يقوم في أساسه على الاختلافات الثقافية والدينية لا على التمايز الوراثي.

لكن الصحيفة، والتي كانت قبلت البحث في بداية العام (يعني 2001) تدعي الآن أن البحث كان منحازا سياسيا واستخدم إشارات "غير لائقة" حول الصراع العربي الإسرائيلي. لكن محررة الجريدة كانت صرحت لمجلة نيتشر "الطبيعة" بأنها تلقت تهديدات كثيرة إن لم تتراجع عن نشر هذا البحث.

آرنيز فيلينا قال أنه لم ير اتهاما واحدا موجها إليه بالرغم من تلقيه وعدا بمطالعة الخطابات التي وصلت للمجلة.

ويقر فيلينا بأنه استخدم بعض المصطلحات التي يمكن أن تعرضه للنقد مثل الإشارة إلى "المستعمر" اليهودي المقيم في غزة ووصف الفلسطينيين بأنهم يقيمون في معسكرات اعتقال.

ويضيف: "ربما كان علي استخدام كلمة مستوطنين بدلا من مستعمرين... لكن، حقيقة، ما الفرق؟ ومن الواضح أنني كان يتوجب علي استخدام كلمة معسكرات اللاجئين بدلا من معسكرات الاعتقال، لكن الحقيقة أنني كنت أشير إلى المعسكرات خارج اسرائيل – في سوريا ولبنان – ولا أجد أنني بذلك أكون معاديا لليهود. أما بالنسبة للحقائق التاريخية، فالحقائق المذكورة والتي أثارت الغضب السياسي هي مأخوذة من الموسوعة البريطانية ومراجع أخرى".

كردة فعل لتصرف المجلة وادعاءاتها بتلقي تهديدات، قام مجموعة من العلماء بإرسال خطابات للمجلة تتضامن مع آرنيز فيلينا وتعترض على موقف المجلة المتشدد.

وكتب أحدهم: "لو كان آرنيز وجد دليلا على تميز العرق اليهودي لما أثارت مصطلحاته الغضب الذي تلقيتموه، إنها حقا تجارة مؤسفة
اهو، الراجل لا يعرفني ولا اعرفه وعالم وقال انه بزنس في بزنس
انا بعد كده اللي اقوله يتسمع، وح اعمل معاكوا زي ما باقول لامي وابويا: اللي انا عايزاه هو اللي ح يتعمل...هو كده غلاسة
طب حد سمع عن البحث ده؟ وقال عاملين تحليل دي ان ايه عشان يعرفوا مين اللي يهودي، طلعت الدنيا كلها يهود، عشان اليهود بني ادمين، وكل الناس بني ادمين
اففففف
انا مش عايزة اسرائيل دي تاني، مبوظة كل حاجة، كل حاجة، كل حاجة
كل حاجة باظت في الدنيا كلها
ايتس اه بيج مس

34 comments:

mido said...

بتقولى لأهلك اللى انت عايزاه هو اللى حيتعمل؟

:)))

جبهة التهييس الشعبية said...

:)
اه
من وانا صغيرة كمان

وانا عايزة اسرائيل تمشي
واللي انا عايزاه هو اللي ح يتعمل

mido said...

ايوه

عندك ميول ثفلاوية

:P

جبهة التهييس الشعبية said...

هههههههههههههههههههههه

صوت من مصر said...

اصحاب العقول فى رااااا؟؟؟حه
للاسف
كويس انى مجنون

مواطن مصري said...

لما مصر توصل لنهائي كاس العالم مش ليبر مان بقى وزير ربنا يستر بجد انا بكرة المتطرفين ايا كان دينهم اية


نعمل اية في ليبر مان نجبلة مهدي عاكف عشان يحولو الدنيا لجحيم

mido said...

@مواطن مصرى

فى بنى ادم معتدل يستشهد بمدحت قلادة فى مدونته ؟
!!!!

Ahmad said...

لا ابدا من غير متقوليلنا حاجة الي انتي عايزاه هيتعمل و خلاص
بس ريحي نفسك و خدي بنادول عشان الصداع

Anonymous said...

ممكن لنك للبحث العلمي الفذ اياه ده؟

Anonymous said...

مش الدين بيقول انكم ولاد عم يبقى جيناتكم واحدة بس هما اللى الرب خيارهم

مواطن مصري said...

شوفي اعمال الظلامين
مواطنون يحرقون منازل ٤ بهائيين فى سوهاج بعد ظهور أحدهم فى التليفزيون

http://www.almasry-alyoum.com/article2.aspx?ArticleID=205317#

جبهة التهييس الشعبية said...

الدين ما قالش اننا ولاد عم

اللي بيسأل على اللنك

اسم الله على مقامك

اللنك موجود في عنوان المقال

اهو

http://www.guardian.co.uk/world/2001/nov/25/medicalscience.genetics

ده مش لنك البحث ده لنك الخبر

والله فكرة ما الواحد يدور على البحث

يمكن يكون حد نزله

مواطن مصري

ربنا يخلي لك الظلاميين ويخليك للظلاميين

والنبي يا مواطن انت عثل

جبهة التهييس الشعبية said...

يا انونيمس

لقيت نص البحث اهو

http://www.rense.com/general48/Palestinians.pdf

مواطن مصري said...

أبراهيم عيسى يكتب : دينى و مذهبى
http://dostor.org/ar/content/view/18805/1/

جبهة التهييس الشعبية said...

اقروا البحث يا شباب

ولا يدخل ذمتي بتلاتة نكلة

فيه بحث في الدنيا يعتمد في تأريخه على كتب مقدسة؟

وكمان مش عاجب اليهود عشان بيقول ان جيناتهم عادية زيهم زي بقية البني ادمين؟

لكوا ان تتخيلوا بقية الابحاث اللي عاجبة اليهود عاملة ازاي؟

Ahmad said...

مواطن مصري: لو مصر تعلقو تتحفنا تستحمل الرد و لو نوارة مصممة تنزل تعليقاتك تتعهد انها تنزل الرد
عشان انا تعبت منك و اتخنقت و انشاءالله هشردلك و يلا ياله من هنا

Founoon said...

تميز اليهود في نظرهم منطلق اساسا من كونهم يهود

بغض النظر عن العرق والجين دا كله كلام عشان يبرر افكارهم ليس الا

بمعنى تاني
ماهو في يهودي اسود ويهودي اصفر ويهودي احمر ومش شبه بعض اساسا
وبالرغم من ان اليهودية ديانة مش تبشيرية الا انها مؤخرا بقى في ناس بتعتنقها وهما مالهمش فيها وبردو بيعتبروهم يهود

نقاء العرق دا جنون رسمي مش موجود ولا هيحصل

مش محتاجين اثباتات بصراحة ولا ابحاث

اليهود ديانتهم مش دين وبسد ديانتهم قوميتهم وجنسيتهم وكل حاجة

هديكي مثال بسيط من عندنا احنا

الاسلام اول ما انتشر كانت البلاد اللي بتدخل تحت الحكم الاسلامي بيبقى اسمها ايه ؟

بتبقى الدولة الاسلامية

يعني الاسلام بردو في بداياته كان قومية وجنسية

يعني مسلم من خراسان ومسلم من الاندلس ومسلم من بلا بلا

بس في الاخر تحت حكم الدولة الاسلامية تحت خلافة امير المؤمنين

فاهمه قصدي ؟

اثبات ان اليهود عندهم جينات واحدةشبه كدا اثبات ان المسلمين عندهم جينات واحدة

هطل رسمي يعني

جبهة التهييس الشعبية said...

لا يا فنون بس هم طول عمرهم عايزين يثبتوا انهم جينيا مختلفين عن الناس
وده اعتقاد عندهم انهم (بصرف النظر عن اختلاطهم بالاممين) بس هم عندهم جينات تميزهم عن بقية الناس

وعاملين في علم الجينات زي ما بيعملوا تحت المسجد الاقصى

عمالين يحفروا يحفروا يحفروا عشان يلاقوا ادلة على اللي هم اصلا مقتنعين بيه

طيب وده علم ده؟

المفروض العلم يتجرد من الاحكام المسبقة

وبعدين لما تقري البحث العلمي تلاقي عامل اشارة لان موسى (كما يذكر الكتاب المقدس) عدا بالناس البحر

طيب اصحاب الديانات الابراهيمية مؤمنين بده

طب والبوذيين؟
والهندوس
واللا ادريين؟
واللا دينيين؟
والملحدين؟
الزرادشت؟

اساسا كل دول مش مؤمنين ان فيه بني ادم كان اسمه موسى من اساسه

ازاي ابحاث علمية تاخد تأريخ من كتاب مقدس

والكلام ده برضه موجود في الموسوعة البريطانية

!!!!!!!!!!!!
طب ده ينفع ده؟

يعني دي مراجع علمية؟
وللا عشان انا بقى اللي معايا فلوس واسلحة نووية يبقى كل الناس تصدق اللي انا مصدقه وان كان عاجبكوا

ايه ده؟

دول عاملين زيي لما كنت صغيرة فعلا: اللي انا عايزاه هو اللي ح يتعمل

طب انا كنت بت مدلعة وامي وابويا مميصيني

هم ايه بقى؟

مهندس مصري said...

سبحان الله
إشي خيال يا ناس

هي الناس دي مش عارفة إننا كلنا ولاد آدم و حواء

كلنا بني آدم

فطبيعي تكون نسبة تشابه الدي إن إيه عالية

إذا كان نسبة تشابه الحمض النووي الوراثي للإنسان مع القرد فوق الـ 90 % يبقى البني آدميين مش حيتشابهوا مع بعض

:)

مواطن مصري said...

محسسيني يا احمد انك صاحب المدونة لو صاحبت المدونة مش عاوزيني اعلق عندها تاني مش هعلق عندها

جبهة التهييس الشعبية said...

اسم الله علييييييييييييك

بالذمة الفلوس اللي بتترمي في الابحاث دي حلال وللا حرام؟

مش اولى بيها الناس اللي مش لاقية تاكل؟

بدل ما يصرفوا فلوس عشان يثبتوا ان البني ادمين كلهم بني ادمين

وسبحان الله يا اخي

طلع ان البني ادم اليهودي بني ادم زي اللي بني ادم اللي مش يهودي

شوف الاعجاز العلمي يا اخي؟

ده علم نورون فعلا

طيب مش يصرفوا بقى الفلوس دي على البني ادمين اللي نايمة في الشارع وميتة من الجوع اولى؟


بما ان العلم اثبت انهم، وياللعجب، بني ادمين برضه

امخاخ قذرة فعلا

مش عارفين يتخلصوا من العنصرية اللي واكلاهم وعمالين يدوروا على اي طريقة يثبتوا بيها انهم معاهم حق يبقوا عنصريين

Founoon said...

هما بيتمايصوا بسيطرتهم على اقتصاد العالم

الحقيقة كل الناس عارفينها بما فيهم الكبار بتوعهم

ما تنسيش يا نوراة ان اسرائيل دولةقايمة في الاساس على معتقد ديني
يعني تغذية عقول اليهود بالافكار اللي واردة في كتبهم ومحاولةاثباتها علميا بيدعم وجود الكيان الصهيوني وبيخلي الناس دي تتمسك بأرض فلسطين اكتر واكتر عشان دا " الدين "
وبالتالي نجاح المخطط الصهيوني
يعني اليهودمضحوك عليهم من الكبار بتوعهم
او اللي ادرك الفكرة دي بردومش ممانع يبلعها عشان يبقى ليهم وطن
يعني العقيدة عندهم اساس الدولة
هدم العقيدة هدم للدولة
وهما عارفين دا كويس

العقيدة قالت اليهود شعب الله المختار يبقى يثبتولهم انهم مختارين

مع ان بمنتهى البساطةهما كانوا فعلا في حقبة زمنية معينة شعب الله المختار لأنهم كانوا الوحيدين الموحدين لما كان الباقي وثنيين

لحد ما ربنا غضب عليهم

ربنا بيميز ناس عن ناس بالتقوى

ولما ميزهم عن الكون كله عشان كان بني اسرائيل اللي هما اولاد يعقوب بيتقوا الله وبيوحدوه فربنا كان بيميزهم لحد ما افسدوا في الأرض فأصبحوا المغضوب عليهم

لُعِنَ الَّذِينَ كَفَرُوا مِنْ بَنِي إِسْرائيلَ عَلَى لِسَانِ دَاوُدَ وَعِيسَى ابْنِ مَرْيَمَ ذَلِكَ بِمَا عَصَوْا وَكَانُوا يَعْتَدُونَ


وربنا سبحانه وتعالى قال

كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ

خير أمة عند ربنا هي اللي بتأمر بالمعروف وتنهى عن المنكر وتؤمن بالله

منين ما تتوفر الصفات دي في ناس على مدار التاريخ هما بالنسبة لربنا خير أمة

لما يبطلوا يعملوا كدا ما بيبقوش خير امة ولا شعب الله المختار ولا اي حاجة

Founoon said...

على فكرةورقةالبحث مش بتفتح عندي لوينفع تديني اللينك اكون شاكرة

جبهة التهييس الشعبية said...

http://www.rense.com/general48/Palestinians.pdf

فهلاو said...

أنا قلت العلم ما بيغلطشى، الله يسامحك، ده لو ما بيغلطشى حضرتك، ما كانش تطور، التطور من خطأ أو لبس أو غموض أو تفسير خاطئ يؤدى لفتح علمى جديد، لازم تقرى بنية الثورات العلمية لتوماس كون، مترجم فى عالم المعرفه وهاتلاقيه ع النت ببلاش، وعلى فكره كتاب مافيش زيه وممتع

السمو العنصرى لليهود جزء من العقيدة الصهيوينية، والصهيوينية بالمناسبة لا تنتسب لليهود وحدهم، بل يؤمن بها مسيحيون وعلمانيون ولا أدريون وغيرهم، ومنهم كثيرون يمارسون ما يعرف بالتحيز المعرفى، هتسألى هى المعرفة بتتحيز أقولك طالما أنتجها البشر فهى عرضة لذلك

العلم رغم ذلك كله يبقى السبيل لمعرفة العالم المحسوس ولا سبيل سواه

بصى بقى، فيه كتاب هايل عن موضوع أصول اليهود للدكتور جمال حمدان إسمه اليهود، وهو دراسة أنثروبولجية كلاسيكية وجامدة، ينوبك ثواب نوهى عليه، ده مرجعى فى مسألة العلاقة بين إدعاءات القومية اليهودية والسمو العنصرى والصهيوينية والأصول العرقية للمهاجرين اليهود لفلسطين اللى بيسمو نفسهم شعب اسرائيل

Anonymous said...

في الكتب الطبية ، مكتوب انه في امراض بتصيب أو منتشرة في الأوساط اليهودية و كذلك مثلاً مرض الانيميا المنجلية اللي بتصيب الافارقة بشكل اكبر وبكون سببها تديل حمض اميني بحمض اميني آخر ، مما يؤدي إلى تغير في التشكيل الوراثي و هكذا يمكن أن تكون هذه صفة وراثية مميزة

جبهة التهييس الشعبية said...

يا عبده

الكتاب اللي بتقول عليه بيتباع فين
ونازل على النت وللا لا؟
وح ترد عليا وللا ح تتآلط كعادتك؟

شفت البحث؟

بيقول لك الفلسطينيين فيهم جينات ياباني
هيهيهيهيهيهيهييييييي

بس هم اقرب لليهود

طب ايه اللي جاب اليابان عندنا؟

جبهة التهييس الشعبية said...

بيقول لك بقى

الخط الجيني ماشي كده

يهود المغرب ويهود السفرديم واللبنانين
ارومة جينية واحدة

الفلسطينيين واللبنانين واليهود السفرديم والاشكيناز

ارومة جينية واحدة

يعني زي دوائر متادخلة كده

الكريت المقدونين السردينيين دايرة تالتة متداخلة مع الدايرتين اللي فاتوا

الجزائريين الاسبان الفرنسيين اسبان الباسك
دايرة رابعة متداخلة مع التلات دواير

البربر والمغاربة دايرة رابعة


اليابانيين دخلوا منين على الفلسطينيين بقى؟
عشان هم والسنغال ارومة جينية واحدة
هيهيهيهيهي
يا سبحان الله يا اخي

طب السنغال جم منين للفلسطينيين؟ من شمال افريقيا

الامهريين والاغريق دايرة سادسة
سادسة وللا سابعة؟ مش فاكرة

كل دول بقى متداخلين مع بعض

الاصل الجيني هي الارومة الجينية الاصلية اللي هي تعتبر حاجة واحدة: فلسطيني لبناني يهودي سفرديم


دول كده زي الشاي

والباقيين اللبن والسكر

فبقوا شاي بلبن

والله العظيم فلوس واقعة في الارض

طب والله العظيم فلوس واقعة في الارض

وبس ح يشككونا في الفلسطينيين واللبنانيين ويخلونا نفتكرهم يهود

ههههههههههههههههه

مواطن مصري said...

نوارة هو مش احنا ولاد حواء و ادم


ولا هما عاوزين يطلعونا ولاد البطة السودة
؟

مواطن مصري said...

انا مرة قريت ان هتلر كان عامل بحث عشن يعرف مين اليهودي و مين الالماني عشان يقتل في اليهودي بس مش متأكد من الكلام دة

جبهة التهييس الشعبية said...

لا الكلام ده مظبوط يا مواطن
هتلر كان بيدور على اليهود بمنكاش عشان كان بيقول وجودهم بيلوث الدم الاري

والله انا حاسة ان روح هتلر متلبساهم

وللا روح هتلر ليه؟
ما تشرشل وترومان ما يتخيروش يعني عنه

لا احنا مش ولاد حوا وادم

احنا ولاد البطة السودا
وهم ولاد البطة البيضا

قال ايه؟ فينا اصل ياباني
طب وايه اللي جاب اليابان عندنا
ماهو اللي خلف اليابانيين هو اللي خلف العرب هو اللي خلف الافارقة

مواطن مصري said...

استجواب وزير خارجية إسرائيل الجديد بشبهة الرشوة وغسل أموال
ليبرمان خضع لمساءلة طيلة 7 ساعات بعد يوم واحد من تسلّمه مهامه

http://www.alarabiya.net/articles/2009/04/02/69783.html

انا حاسس ان الموضوع دة وراةةة يد مصرية ههههههههه
بس الؤال عمرك شفتي وزير عربي او رئيس وزراء بيتحاكم و هو في المنصب؟؟؟

محمود سعيد said...

المسألة مش بالضبط كده
المسألة مسألة تلفيق علمى وربما غير علمى
أيا كان مرجعية بحثه الكتاب المقدس أو لأ

التلفيق اللى بيدعيه البحث هو صلة اليهود الأشكناز الغربيين بالسفارديم الشرقيين (حتى بيسميهم فى البحث الغير أشكناز ولهذا حكمة علشان يجمع كل ما عم غير أشكناز) وأيضاً بشعوب الشرق الأوسط والبحر المتوسط كله ومعاهم يهود المغرب

وطبعاً من السهل الربط ده لأن الدايرة واسعة أصلاً

يعنى المصريين والأرمن والأتراك والمقدونين بحسب البحث مرتبطين جينياً
وده شىء عادى لكونهم كلهم من شعوب البحر المتوسط أكيد لهم فى جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جد جدهم اشتراك

البحث بيحاول يلفق بشكل علمى كون اليهود وحدة واحدة لأ وأنهم كمان أصحاب حق فى الشرق الأوسط

مش شوية مرتزقة مستوطنين مختلفى الجنسيات والأصول وجايين محتلين من أوروبا وروسيا

مثلا من الويكبيديا العربى
اختبار الحمض النووي اثبتت ان غالبية يهود الأشكناز هم من المنحدرين من الشرق الأوسط

فهلاو said...

بنية الثورات العلمية لتوماس كون أهه
http://www.4shared.com/file/48484468/9d54db00/Issue-168____.html

كتاب اليهود آنثربولوجيا أظنه إصدار دار المعارف سلسلة إقرأ، تخيلتى ما لقتهوش شيرد ومتجاهلينه تماما

الكتاب ده دراسة فى علم الأجناس قبل الجينات، وبيقول نفس الكلام إن اليهود ليسوا عرق بل من مختلف الأعراق وأن الديانة اليهودية مثل أى ديانه يؤمن بها أناس من أعراق مختلفة، وده يضرب جذور فكرة الشعب الواحد والأرض الواحدة والعنصر النقى اللى بتشكل جذور الفكر اليهودى القومى العنصرى الصهيونى، وتؤكد كونهم مجرد مجموعة مهاجرين محتلين، لا يختلفون فى شئ عن المهاجرين المحتلين لبلدان مثل الولايات المتحدة وجنوب أفريقيا، الولايات المتحدة شطب البيض فيها على السكان الأصليين، لكن فى جنوب أفريقيا وفلسطين، الأمر كان صعب، اتحل فى جنوب أفريقيا بصيغة تعايش واحترام وانهاء للأبارتهيد، لكن المنطقة الوحيدة اللى فيها هذا اللون الاستعمارى الاحلالى الكلاسيكى فى العالم هى فلسطين عشان كده هى قضية متفردة وتختلط فيها دعاوى العلم والسياسة والدين بظاهرة الاستعمار