ح اضطر اعمل حاجة انا ما كنتش عايزة اعملها

سبق واشرت للتعليق ده وقلت ان طفاطيفو عاجبه التعليق وانا بصراحة ما رضتش ابروز التعليق... عشان... عشان بصراحة شوفونية مني، انا قلت عشان ح ندخل في جدل عقيم بس انا كدابة، انا ما بروزتوش عشان استكترت ان حد يجيب سيرة ابطال ايلات، عنصرية وشوفونية مني

هه

الصراحة مافيش احسن منها، يعني مش ح تيجي زي اعترافات سامي شهاب اللي قالوا له لماذا كل هذا الاعتراف قال لهم احنا مش بنكدب

بس بما ان الوساخة زادت قوي، وبما ان حتى اللي مش وسخ عايص نفسه في الكنيف: العمل مشرف لكن كان اصول ينسقوا مع السلطات المصرية

( السلطات اللي مفروض تتقدم للمحكمة الدولية نظرا لمخالفتها لاتفاقية جينيف اثناء حرب غزة)

يبقى انا مضطرة اقول الكلمتين دول وحق ابطال ايلات على راسي بس هم مش اول ولا اخر ابطال في الدنيا

مطلوب القبض على ابطال عملية ايلات اللي لسة عايشين وتسليمهم للاردن عشان تقدمهم لمحاكمة عسكرية

هي الاردن دي مش دولة؟ ولها سيادة؟ ولها كرامة؟ ولها كل التخريف اللي بيتقال في الجرايد وعلى المدونات وبيجيلي على الميل؟

(ناس بيقولوا انهم من فتح بيقولوا الكلام مقرف اوسخ من بيبي الفيران وانا ح افترض انهم مش من فتح عشان مش معقولة فتح تكون اتجننت كده)

طيب عملية ايلات دي اتخطط لها بعد الهزيمة على طول، والاردن ما كانتش عايزة تشارك في العملية، مش عايزة، هي حرة

كنا كلنا خارجين من هزيمة والناس لها حدود مع اسرائيل وخايفة، خايفة زي ما السلطات المصرية خايفة دلوقت بالظبط

ودي ارضهم، وحدودهم، وسيادتهم وهم احرار

صح؟

ولو ح نفكر بمنطق عوكل، يبقى الناس بصراحة معاها حق، يعني لو العملية دي فشلت، وللا نجحت واسرائيل عملت رد فعل مهبب ومنيل على راسهم وقصفتهم يبقى كويس؟ قالوا يا عم لا... احنا مش لاعبين، احنا ما نضمنش رد فعل اسرائيل، والعراق قالوا: على راسنا من فوق... البلد تحت امركوا، بس العراق تبقشش من جيبها بقى، هي مالهاش حدود مع اسرائيل، لكن الاردن لها حدود مع اسرائيل

كل واحد حر في بلده، صح؟

قام الفدائيين بتوعنا، اتخفوا ودخلوا الحدود الاردنية بشكل غير شرعي وخططوا لاعمال عدائية ضد اسرائيل من الاراضي الاردنية (كل حاجة بقى،تهريب بني ادمين ومتفجرات وخطط وكل اللي سامي عمله بالمللي واكتر) بدون علم السلطات الاردنية بالرغم من تحذير السلطات الاردنية: انا مش عايزة ادخل في الحدوتة دي

يبقى ده اسمه ايه؟

مدام الناس ح تتحول لمحاكمة عسكرية عشان بتخطط لاعمال عدائية ضد اسرائيل من بلد مش عايزة تلعب

يبقى ابطال ايلات يسري عليهم اللي يسري على الناس دي

وتبقى مصر مدينة للاردن باعتذار

اما عن الاساءات، فاحنا ما اعتذرناش للاردن عن "حسين ابن زين" ولا اعتذرنا للسعودية عن الملك فيصل اللي عبد الناصر كان عايز ينتف له دقنه ولا اعتذرنا للقذافي عشان كنا بنرسمه قاعد على القصرية

وبالنسبة للتدخلات

احنا ما اعتذرناش لليمن عن اننا تدخلنا في حرب اهلية لا ناقة لنا فيها ولا جمل وقتلنا مدنيين وابرياء، ولا عوضناهم عن الخسائر اللي لحقت بيهم من الطيران المصري اللي نزل هبد فيهم عشان يحررهم من الرجعية وبعد كده اسرائيل قصفته قبل مايطير

وللا احنا فاكرين نفسنا مين يعني؟ فاكرين نفسنا مين عشان نعمل في الناس كده؟ ونفرق ايه عن الغطرسة الامريكية؟ وليه بنطالب المواطن الامريكي انه يستنكر سياسات بلده المتغطرسة واحنا مش بنطبق الكلام على نفسنا؟ احنا مين عشان نستغل الناس لما نحب نحارب ونتنكر لهم لما نحب نسالم ونسلمهم لاسرائيل لما نحب نستخبى تحت السرير وممنوع حد يعقب ولا يتكلم ولا يعترض ولا حتى يساعد الناس اللي احنا موتناهم والا نشرشح له ونخلي اللي ما يشتري يتفرج عليه؟ ما نختشي على دمنا بقى ايه الرباية الوسخة دي؟ طب الامريكان ربنا مديهم وموسع عليهم وعندهم امارة للفتونة

احنا بقى اديني امارة للفتونة دي، ده احنا اخرنا مع اسرائيل نحط ايدينا في جيوبنا

وايه الكورال اللي بيغني ورا حسني مبارك ده؟

احنا في عيد الفصح بجد، بتاعنا احنا، مش بتاع اسرائيل، عشان اسرائيل دول مش قوم موسى ولا قوم اي حد دول شوية خواجات، وفرعون علا في الارض، واستخف قومه فأطاعوه وانتوا عارفين نهاية فرعون وقومه كانت ايه؟ وعارفين انه يقدم قومه فأوردهم النار، وعارفين ان ربنا بيمن على الذين استضعفوا في الأرض ويجعلهم أئمة ويجعلهم الوارثين

ألا هل ذكّرت؟ اللهم فاشهد