Wednesday 15 April 2009

ح اضطر اعمل حاجة انا ما كنتش عايزة اعملها

سبق واشرت للتعليق ده وقلت ان طفاطيفو عاجبه التعليق وانا بصراحة ما رضتش ابروز التعليق... عشان... عشان بصراحة شوفونية مني، انا قلت عشان ح ندخل في جدل عقيم بس انا كدابة، انا ما بروزتوش عشان استكترت ان حد يجيب سيرة ابطال ايلات، عنصرية وشوفونية مني
هه
الصراحة مافيش احسن منها، يعني مش ح تيجي زي اعترافات سامي شهاب اللي قالوا له لماذا كل هذا الاعتراف قال لهم احنا مش بنكدب
بس بما ان الوساخة زادت قوي، وبما ان حتى اللي مش وسخ عايص نفسه في الكنيف: العمل مشرف لكن كان اصول ينسقوا مع السلطات المصرية
( السلطات اللي مفروض تتقدم للمحكمة الدولية نظرا لمخالفتها لاتفاقية جينيف اثناء حرب غزة)
يبقى انا مضطرة اقول الكلمتين دول وحق ابطال ايلات على راسي بس هم مش اول ولا اخر ابطال في الدنيا
مطلوب القبض على ابطال عملية ايلات اللي لسة عايشين وتسليمهم للاردن عشان تقدمهم لمحاكمة عسكرية
هي الاردن دي مش دولة؟ ولها سيادة؟ ولها كرامة؟ ولها كل التخريف اللي بيتقال في الجرايد وعلى المدونات وبيجيلي على الميل؟
(ناس بيقولوا انهم من فتح بيقولوا الكلام مقرف اوسخ من بيبي الفيران وانا ح افترض انهم مش من فتح عشان مش معقولة فتح تكون اتجننت كده)
طيب عملية ايلات دي اتخطط لها بعد الهزيمة على طول، والاردن ما كانتش عايزة تشارك في العملية، مش عايزة، هي حرة
كنا كلنا خارجين من هزيمة والناس لها حدود مع اسرائيل وخايفة، خايفة زي ما السلطات المصرية خايفة دلوقت بالظبط
ودي ارضهم، وحدودهم، وسيادتهم وهم احرار
صح؟
ولو ح نفكر بمنطق عوكل، يبقى الناس بصراحة معاها حق، يعني لو العملية دي فشلت، وللا نجحت واسرائيل عملت رد فعل مهبب ومنيل على راسهم وقصفتهم يبقى كويس؟ قالوا يا عم لا... احنا مش لاعبين، احنا ما نضمنش رد فعل اسرائيل، والعراق قالوا: على راسنا من فوق... البلد تحت امركوا، بس العراق تبقشش من جيبها بقى، هي مالهاش حدود مع اسرائيل، لكن الاردن لها حدود مع اسرائيل
كل واحد حر في بلده، صح؟
قام الفدائيين بتوعنا، اتخفوا ودخلوا الحدود الاردنية بشكل غير شرعي وخططوا لاعمال عدائية ضد اسرائيل من الاراضي الاردنية (كل حاجة بقى،تهريب بني ادمين ومتفجرات وخطط وكل اللي سامي عمله بالمللي واكتر) بدون علم السلطات الاردنية بالرغم من تحذير السلطات الاردنية: انا مش عايزة ادخل في الحدوتة دي
يبقى ده اسمه ايه؟
مدام الناس ح تتحول لمحاكمة عسكرية عشان بتخطط لاعمال عدائية ضد اسرائيل من بلد مش عايزة تلعب
يبقى ابطال ايلات يسري عليهم اللي يسري على الناس دي
وتبقى مصر مدينة للاردن باعتذار
اما عن الاساءات، فاحنا ما اعتذرناش للاردن عن "حسين ابن زين" ولا اعتذرنا للسعودية عن الملك فيصل اللي عبد الناصر كان عايز ينتف له دقنه ولا اعتذرنا للقذافي عشان كنا بنرسمه قاعد على القصرية
وبالنسبة للتدخلات
احنا ما اعتذرناش لليمن عن اننا تدخلنا في حرب اهلية لا ناقة لنا فيها ولا جمل وقتلنا مدنيين وابرياء، ولا عوضناهم عن الخسائر اللي لحقت بيهم من الطيران المصري اللي نزل هبد فيهم عشان يحررهم من الرجعية وبعد كده اسرائيل قصفته قبل مايطير
وللا احنا فاكرين نفسنا مين يعني؟ فاكرين نفسنا مين عشان نعمل في الناس كده؟ ونفرق ايه عن الغطرسة الامريكية؟ وليه بنطالب المواطن الامريكي انه يستنكر سياسات بلده المتغطرسة واحنا مش بنطبق الكلام على نفسنا؟ احنا مين عشان نستغل الناس لما نحب نحارب ونتنكر لهم لما نحب نسالم ونسلمهم لاسرائيل لما نحب نستخبى تحت السرير وممنوع حد يعقب ولا يتكلم ولا يعترض ولا حتى يساعد الناس اللي احنا موتناهم والا نشرشح له ونخلي اللي ما يشتري يتفرج عليه؟ ما نختشي على دمنا بقى ايه الرباية الوسخة دي؟ طب الامريكان ربنا مديهم وموسع عليهم وعندهم امارة للفتونة
احنا بقى اديني امارة للفتونة دي، ده احنا اخرنا مع اسرائيل نحط ايدينا في جيوبنا
وايه الكورال اللي بيغني ورا حسني مبارك ده؟
احنا في عيد الفصح بجد، بتاعنا احنا، مش بتاع اسرائيل، عشان اسرائيل دول مش قوم موسى ولا قوم اي حد دول شوية خواجات، وفرعون علا في الارض، واستخف قومه فأطاعوه وانتوا عارفين نهاية فرعون وقومه كانت ايه؟ وعارفين انه يقدم قومه فأوردهم النار، وعارفين ان ربنا بيمن على الذين استضعفوا في الأرض ويجعلهم أئمة ويجعلهم الوارثين
ألا هل ذكّرت؟ اللهم فاشهد

34 comments:

مواطن مصري said...

اة بس اكيد المخبرات المصرية كانت مظبتة مع الاردن انا هسأل في الموضوع دة لان كان في تعاون عسكري ايام الحرب


و كانت دولة الي بتحارب مش تنظيم حزبي


تحياتي

Unknown said...

لا يا مواطن
واكتر من كده

المخابرات الاردنية حذرت مصر من اقحامها في العملية

وش كده

باقول لك بدون علم السلطات الاردنية تقول لي اكيد كانت منسقة مع المخابرات الاردنية؟

انت يا عم بتفهم الكلام ازاي؟

ولما بتقى دولة يبقى اوسخ من لما يبقى حزب

لان الحزب عمره ما يحتل دولة

لكن الدولة ممكن تحتل دولة
وكان ممكن الاردن تعتبر ان ده شكل من اشكال الاحتلال

TAFATEFO said...

بصراحه .. أنا كده ارتحت

لو تزودي كمان انهم استخدموا غاز الخردل في حرب اليمن يبقى كويس

أضيفي كمان ان الكورال مبيغنيش ورا حسني مبارك

النظام المصري التزم الصمت وقال للكلاب هوهوا .. علشان كده تلاقي كل الأقلام والقنوات حتى اللي ملهمش دعوة بالسياسة وحتى اللي في غير خندق النظام بيتنافسوا لـالتوجيب مع النظام في ليلته

من المفيد والمناسب جداً (وإن كان خارج عن الأدب) أيضاً الإشارة إلى جزء من خالدة نجيب سرور

من بعد : والكوسه والباميه والملوخيه متعدش

وحتى قبل : الفن قسمة ونصيب

هي فعلاً خالدة نجيب سرور .. وإن كان الفن فيها يصلح رمز لمجالات كتير في المحروسه

TAFATEFO said...

ومعلش عايز أزود حاجه بس هتزعل ناس

هو احنا بنلعن سلسفيل الملك حسين ونقول عله خاين ليه؟؟ علشان كان خايف من إسرائيل وانها تعتدي على الأردن فكان بيبلغها ويتعاون معاها علشان يبقى عمل اللي عليه وإسرائيل متعتديش على مملكته

نفس اللي بيعمله نظام الكهل البغيض دلوقتي

نقدر نشير برضه لخالدة نجيبسرور كلها المره دي

Unknown said...

والله من ضمن الشوفونية المصرية ان الناس بتقول السادات كان سابق عصره لما عمل سلام مع اسرائيل

والحقيقة بقى ان الملك حسين هو اللي كان سابق عصره وضهره وفجره كمان

بس ماحدش بينسب له الفضل ده

اما بالنسبة لرائعة نجيب سرور

مش ح تصدق

طلعتها النهاردة وقعدت اقرا فيها واقول: الله الله الله، صدقت وقولت الحق الله يرحمك

TAFATEFO said...

اتأخرتي جداً

عندي جزء كبير منها بصوته

Unknown said...

تسرق شلن تبقى هيصه وبلوه وجَرِيمَه

تسرق أُلوف الأُلوف تبقى م الابطال

وكل ما السرقه تكبر .. القانون سيمه

وكل ما السرقه تصغر .. فيه حرام وحلال


نجيب سرور

دي اأدب حتة عنده
بس حلوة قوي

أكون أو لا أكون said...

لو كان أبطال عمليه إيلات في الزمن ده كان خوسني منعهم من تنفيذها... أو حتى من التخطيط لها...
سلاح اسرائيل ضد غزه هو خوسني... علشان كده خوسني بيحارب كل فرد أو حزب أو دوله بتمد يد العون للغزه...
المشكله مش في خرق سياده أو قانون... خوسني عماله يمشي كويس وتمام على المخطط الإسرائيلي لإضعاف وإرضاخ عزه وقادتها...
لو الحكايه خرق سياده كان لازم يتكلموا على القصف اللي على الحدود المصر مع غزه... واللي تسبب بترهيب وتهجير السكان على الحدود المصريه... مش ده سياده برضو... ولا ده نغمض عليها العين...

الإسلوب الإعلامي لحكومه مصر أصبح شبيها أو على الأصح التوأم للإعلام الحكومي الأمريكي خصوصا في فترة جورج بوش... يعني كله قصص خياليه وخرافيه لا يصدقها العقل... لكن الفرق أن أمريكا تكتب السيناريو بنفسها... أما حكومة مصر تستورده من اسرائيل ...

TAFATEFO said...

دي اأدب حتة عنده
بس حلوة قوي
طيب

تعجبني أوي كلمة أشرف توفيق من الواقع الساخر .. مش كتاباته اللي ساخرة الواقع هو اللي ساخر .. وهو بس بينقل الواقع

وبالقياس

خالدة نجيب سرور مش أبيحة .. الواقع هو اللي أبيح .. وهو برضه بس بينقل الواقع

Unknown said...

مظبوط
تمام

Anonymous said...

إن الاتهام الموجّه من السلطة المصرية إلى السيد حسن نصر الله وحزب الله ليس اتهاماً بل هو وسام، فالتهمة بإمداد هذا الشعب مفخرة للذين ألحقت بهم.

رئيس وزراء لبنان الاسبق
سليم الحص

Anonymous said...

نقلت صحيفة هآرتس الإسرائيلية عن موقع «اينتليجنس أون لاين» تأكيده أن المعلومات التي قدمتها أجهزة استخبارات دولية، من ضمنها جهاز الموساد الإسرائيلي والاستخبارات الأميركية (سي. آي. إيه)، للأجهزة الأمنية المصرية هي التي قادت الى اعتقال «خلية حزب الله» في مصر. ولفتت هآرتس الى أن مدير تحرير «اينتليجنس» لقضايا التجسس، فيليب فاست، هو الذي زوّدها بهذه المعطيات.
وقد أثارت الذروة التي بلغتها الحملة المصرية على حزب الله، الذي أكد علناً أنه يوفر الدعم اللوجستي للمقاومة الفلسطينية في مواجهة إسرائيل، الدهشة لدى الصحافة الإسرائيلية التي قال بعضها «للحظات من الصعب التصديق بأن ما نسمعه في الـ48 ساعة الأخيرة في القاهرة على لسان مسؤولين كبار في مصر بالنسبة إلى حزب الله، موجّه بالفعل إلى منظمة عربية».

Anonymous said...

في أعقاب فشل إسرائيل عام 2006، صدرت في إسرائيل مجموعة دراسات أعادت إبراز الأساليب غير العسكرية في مواجهة الحزب. كان من أبرز هذه الدراسات، واحدة صدرت عن معهد أبحاث الأمن القومي (مركز جافي سابقاً)، تحت عنوان «المعركة على إضعاف حزب الله»، نظّرت لإمكان إسقاط حزب الله وتحويله إلى لاعب هامشي، يصطفّ إلى جانب الأحزاب السياسية اللبنانية الأخرى، دون قدرات فاعلة على الإضرار بإسرائيل.
وقد شددت هذه الدراسة على وجوب تحقق جملة من الشروط التي من شأنها إضعاف الحزب، وتتمحور بمعظمها حول فصله عن مصادر قوّته، ومن بينها قطع المساعدة التي يتلقّاها من إيران وسوريا، وإضعاف الارتباط بينه وبين الطائفة الشيعية، وقيام تحالف مناهض للحزب تشترك فيه إسرائيل والغرب والدول العربية المعتدلة».
ورأت الدراسة أيضاً أن إسرائيل ستجد صعوبة في تحقيق كل شروط الإضعاف غير العسكرية، إن عملت منفردة من غير مساعدة تقدمها دول تتشارك معها في المصالح (الغرب والدول العربية المعتدلة).
إحدى المسائل التي تناولتها الدراسة، كانت مكانة حزب الله وأمينه العام في الشارع العربي، ووجوب العمل على ضرب هذه المكانة، مقابل الهوة الواسعة بين قادة الدول العربية وجمهورها، وشددت على أن الأنظمة العربية المعتدلة، كمصر والسعودية والأردن، تخشى من الحالة التي يقودها الأمين العام للحزب، بينما لا يخفي الشارع العربي تأييده واحترامه له.

بنجاواتى said...

السلام عليكم

ارجو ان كلامى ما يتفهمش دفاع عن النظام

ولكن هل يمكن ان تثبتى لى ان هذا التنظيم كان يستهدف اسرائل وليس اى مكان اخر..

واذا كانت القضية تمرير سلاح وفقط لماذا اذن الخلية التى عملت على نشر الفكر الشيعى وتجنيد شباب للانضمام الى هذا التنظيم.....؟

يجب ان لا نجعل من تقصير حكومتنا فى مناصرة غزة وفلسطين عموما سببا فى الوقوف بجانب انس ليسوا اصدقاء لنا ولا للقضية الفلسطينية

وتقبلى فائق احترامى

Unknown said...

شيعي ايه وسني ايه
مين اللي حيفكر يشيعنا
مش لما نبقى مسلمين الاول

حـنــّا السكران said...

(وقد أثارت الذروة التي بلغتها الحملة المصرية على حزب الله، الذي أكد علناً أنه يوفر الدعم اللوجستي للمقاومة الفلسطينية في مواجهة إسرائيل، الدهشة لدى الصحافة الإسرائيلية التي قال بعضها «للحظات من الصعب التصديق بأن ما نسمعه في الـ48 ساعة الأخيرة في القاهرة على لسان مسؤولين كبار في مصر بالنسبة إلى حزب الله، موجّه بالفعل إلى منظمة عربية». وأشارت إلى أن مسؤولين كباراً في الأجهزة الأمنية المصرية تفوّهوا، خلال حديثهم مع صحافيين إسرائيليين، بعبارات تذكّرنا بحالة الحرب)
(الجدير بالذكر أنّه في أعقاب فشل إسرائيل عام 2006، صدرت في إسرائيل مجموعة دراسات أعادت إبراز الأساليب غير العسكرية في مواجهة الحزب. كان من أبرز هذه الدراسات، واحدة صدرت عن معهد أبحاث الأمن القومي (مركز جافي سابقاً)، تحت عنوان «المعركة على إضعاف حزب الله»، نظّرت لإمكان إسقاط حزب الله وتحويله إلى لاعب هامشي، يصطفّ إلى جانب الأحزاب السياسية اللبنانية الأخرى، دون قدرات فاعلة على الإضرار بإسرائيل.
وقد شددت هذه الدراسة على وجوب تحقق جملة من الشروط التي من شأنها إضعاف الحزب، وتتمحور بمعظمها حول فصله عن مصادر قوّته، ومن بينها قطع المساعدة التي يتلقّاها من إيران وسوريا، وإضعاف الارتباط بينه وبين الطائفة الشيعية، وقيام تحالف مناهض للحزب تشترك فيه إسرائيل والغرب والدول العربية المعتدلة».
ورأت الدراسة أيضاً أن إسرائيل ستجد صعوبة في تحقيق كل شروط الإضعاف غير العسكرية، إن عملت منفردة من غير مساعدة تقدمها دول تتشارك معها في المصالح (الغرب والدول العربية المعتدلة).إحدى المسائل التي تناولتها الدراسة، كانت مكانة حزب الله وأمينه العام في الشارع العربي، ووجوب العمل على ضرب هذه المكانة، مقابل الهوة الواسعة بين قادة الدول العربية وجمهورها، وشددت على أن الأنظمة العربية المعتدلة، كمصر والسعودية والأردن، تخشى من الحالة التي يقودها الأمين العام للحزب، بينما لا يخفي الشارع العربي تأييده واحترامه له.


http://www.al-akhbar.com/ar/node/129818

Unknown said...

@ Tafatefo

الملك حسين كان خائنا لانه كان يظهر التضامن مع العرب و يتعاون مع اسرائيل في الخفاء فكان كالطابور الخامس. أذكرك بان الحبيب بورقيبة كان اول من نادي بالتفاوض مع اسرائيل و ملك المغرب الحسن الثاني كان له نفس التوجهات و مع ذلك لم يهاجم اي منهما كما هوجم الملك حسين.

أما موضوع ابطال عملية ايلات فالقياس غير دقيق. فالحكومة الاردنية هي المتضرر الوحيد و مع هذا لم تطالب باعتقالهم وقتها. فلماذا نقبض عليهم نحن؟ و لماذا نفعل ذلك الآن؟

Unknown said...

السيادة الوطنية لاي دولة علي ارضها شئ مقدس و قد ذاقت مصر مرارة تجربة مريرة عندما تجاهلت ذلك في احداث مطار لارنكا القبرصي عام 1978 في اعقاب اغتيال يوسف السباعي وزير الثقافة المصري.
بعد اغتيال السباعي أخذ القاتلان نحو ثلاثين من أعضاء الوفود المشاركين في مؤتمر التضامن كرهائن واحتجزوهم في كافيتيريا الفندق مهددين باستخدام القنابل اليدوية في قتل الرهائن ما لم تستجب السلطات القبرصية لطلبهما بنقلهما جوا إلى خارج البلاد. استجابت السلطات القبرصية لطلب القاتلين وتقرر إقلاعهما على طائرة قبرصية من طراز
(DC8)
وذلك من مطار لارنكا. أطلق القاتلان سراح معظم الرهائن بينما واصلوا احتجاز إحدى عشر رهينة من بينهم أربعة رهائن مصريين ثم أقلعت بهم الطائرة من قبرص لكن عدة دول رفضت أن تهبط بها طائرة الرهائن من بينها ليبيا وسوريا واليمن الجنوبية وبعد هبوط اضطراري في جيبوتي تقرر عودة الطائرة إلى مطار لارنكا. لم يتأخر السادت فى الرد على جريمة أغتيال السباعي فأرسل فى اليوم التالي طائرة تقل مجموعة من رجال الصاعقة إلى قبرص بغرض القبض على القاتلين وتحرير الرهائن المحتجزين على متن الطائرة القبرصية وفي السادسة مساء طلب قائد الطائرة العسكرية المصرية رخصة للهبوط فى مطار لارنكا مدعيا أن على متن الطائرة وزيرا مصريا حضر خصيصا للتفاوض مع القاتلين. هبط أحد جنود الصاعقة للاستطلاع وسرعان ما تأكد للقبارصة أن على متن الطائرة وحدة قوات خاصة مصرية مجهزة بالأسلحة فحذرت الحكومة القبرصية القوات المصرية من مهاجمة طائرة الرهائن. ما لبث قائد قوات الصاعقة المصرية بإعطاء أوامره بالهجوم الشامل على الطائرة القبرصية ومع بدء الهجوم المصري هاجمت قوات الحرس الوطني القبرصي قوات الصاعقة المصرية ودارت بينهم معركة استمرت قرابة الخمسين دقيقة وأسفرت عن تدمير الطائرة العسكرية المصرية وقتل خمسة عشرة من رجال الصاعقة المصريين وجرح على ما يزيد على ثمانين مصابا من الطرفين وتم القبض على مَن تبقى من قوات الصاعقة المصرية.

http://www.aljazeera.net/NR/exeres/64CA6562-E056-4E21-9DBD-E57E9452EC54.htm

Anonymous said...

الموااااااااااااال دا كلة مشكلتة حاجة واحدة

اننا فى مصر معدش عندنا ثقة فى الحكومة بتاعتنا
لو الشيطان نفسة اتكلم هنصدقة ونكذب حكومتنا

كان نفسى احد اعضاء مجلس الشعب الموقر يفكرنا كدا بعيل من عيال الامن المركزى اللى اسرائيل عمالة تموتهم على الحدود
وتقوليلى تفكيك اسرائيل واللة ان مجلسنا الموقر اخطر على شعب مصر من اسرائيل

مشربش الشاى اشرب ازوزة

Anonymous said...

مش بس فى عملية إيلات يا نوارة المخابرات المصرية أنتهكت حدود وسيادة دول عربية وأوروبية وافريقية وغيرها بدون تنسيق ولا أحم ولا دستور 00

لكن فى عشرات العمليات المخابراتية ولعل أشهر هذه العمليات على الأطلاق عملية تدمير الحفار الإسرائيلى فى المحيط حيث تم أنتهاك السيادة الفرنيسية إلى جانب سيادة عدة دول إفريقية منها السنغال التى تمت العملية فى مياهها الإقليمية بعدما تم إدخال المتفجرات إليها وكونت خلية خلية فعلياً مش تمثيل على أراضيها وتم تجنيد بعضاً من مواطنيها لتنفيذ العملية

mido said...

بنجاواتى

شكلك بتقرا الصحافة الحكومية كتير او بتتفرج على البيت بيتك و القاهرة اليوم

الراجل نفسه قال لم أكشف عن مذهبى لأن مهمتى بعيدة عن المذهبية

مصطفي النجار said...

نوارة
في هذا الزمن
انقلب كل شيء
وصار البطل مخربا
وصار العميل معتدلا وحكيما
ما يغيظني اكثر هم من ركبوا الموجة
وزاطوا في المزايدة
لعن الله النفاق
افة كل نظام مستبد

Anonymous said...

كشفت التحقيقات الاوليه لأجهزة التحقيق المصريه تورط بعض الفنانات المصريات الشهيرات في عملية نقل معلومات لـ"حسن نصر الله"مباشرة حيث أعترف بعض المتهمين في الخلية أن هناك أصالات سريه جرت بين الجانبين .

وأكدت التحقيقات أن الفنانات نقلن معلومات لـ"حزب الله"عن الحياة الاجتماعيه والاقتصاديه في المجتمع المصري وغيرها من المعلومات الخطيره.

من جانب أخر عقد اللواء عق اللواء حسين العدلي وزير الداخليه المصري اجتماعا مع شخصيات أمنيه رفيعة المستوى لوضع خطة امنيه لمراقبة الاجانب من الجنسيات الفلسطينيه واللبنانيه والباكستانيه والايرانيه.

وفي سياق متصل أكد مجلس الشعب المصري بالأجماع أدانته لمخططات حزب الله اللبناني والتي قال أنها تهدف الى التآمر على مصر للنيل من أسقرارها وأمنها رافضا محاولات أنتهاك الحدود مهما كان الثمن مؤكدين وقوفهم خلف القيادة المصريه.

Anonymous said...

العمل الذي قام به الأمين العام لحزب الله اللبناني السيد حسن نصرالله بتبنيه للمعتقل سامي شهاب في مصر تبنيا كاملا لقلت بانها عملية انتحارية من الوجهة القانونية، خاصة إعلانه بأن الشاب اللبناني هو (حمّال) الأسلحة والعتاد اللوجستي لغزة، ولهذا كان يتواجد في سيناء التي لم تكن يوما محررة كما هي مع أقدام المجاهدين الطاهرة التي حررت لبنان وتساعد في تحرير فلسطين على قدر استطاعتها. السيد نصرالله تصرف بطريقة أقل ما يقال فيها بأنها نبيلة، وشريفة، وصادقة كعادته، على الرغم من تبعاتها القانونية المحتملة لا بل والأكيدة. فسماحته صيد ثمين بالنسبة للدول المساندة لإسرائيل، وما قاله قابل للاستخدام ضد شخصه وضد حزبه في المحافل الدولية وفي مجلس الأمن، خصوصا وان مجلس الأمن ليس سوى أداة تستخدمها أميركا ضد أعدائها وتحديدا في حالة كان العدو مهما ضربه بالنسبة لإسرائيل . وعلى الرغم من معرفتنا بأن السيد نصرالله يدرك كل هذه الأمور، ولا شك بأنه درس أثر تصريحاته «المصرية» على العلاقات الدولية مع حزبه والتي تنفرج يوما بعد يوم مع الأوروبيين خاصة، إلا أنه فعلها فلماذا يا ترى ؟ في المبدأ المنطقي أن عامودا أساسيا من اساسات البناء إن سقط فإن المبنى كله يسقط، لذا فإن ما قام السيد وعلى مسمع الملايين، هو أنه فضل إسقاط المبنى المذهبي مرة واحدة وإلى الأبد حتى ولو كان الأمر يعني وضع أسلحة إضافية لتستخدم ضده من قبل أعدائه ولو على المستوى القانوني، والقانون الدولي لا بارك الله بمستغليه مطية للمتكبرين عبر أدواتهم واسألوا أوكامبو عن حماسه لدارفور وبروده ورفضه التصرف في موضوع جرائم إسرائيل في غزة. والسيد ضرب المذهبيين في مقتل، في حين أن الكل في ما يسمى حركات التكفير مشغولون في تبرير التكفير كجائزة لحزب الله نظير هزيمته لإسرائيل وفي حين أن رموز التكفيريين ممن يزعمون الجهاد وهم ليسوا سوى قتلة وإرهابيين مشغولون في شرح ما يسمونه خطر «الروافض» على الأمة، نرى وبشهادة مصرية رسمية وباعتراف من أمين عام حزب الله بأن «الروافض» اللبنانيين وفي مقدمتهم نصرالله لا يشغلهم إلا هم واحد هو مساعدة الفلسطينيين حتى ولو تطلب ذلك المخاطرة بعناصرهم الميدانيين عبر إرسالهم إلى سيناء على بعد مئات الكيلو مترات من لبنان. نصرالله اعترف والمصريون أكدوا بطريقة غير مباشرة، بأن لا أجندة مذهبية لحزب الله خصوصا وأن «الروافض» الذين يساعدون الفلسطينيين ويخاطرون بحياتهم وبسمعتهم في سبيل فلسطين يعرفون تمام المعرفة ليس في غزة «روافض» بل أهل سنة وجماعة وبعضهم وهم من مسؤولي حماس استنكر زيارة مشعل إلى طهران إن لم تكن الذاكرة خانتنا بعد. هذا من ناحية ضرب البعد المذهبي في العلاقات العربية العربية، وأما من الناحية الأخرى ، فأن يعلن السيد بأن حزبه كلف أحد كوادره بمهمة لوجستية في سيناء لمساعدة الفلسطينيين، فإنه يوجه ضربة قاضية ستظهر تداعياتها أكثر فأكثر في أوساط الشعوب العربية والإسلامية، وستلقي بثقلها على العلاقة ما بين الانظمة والشعوب، وستبلغ هدفها مع الزمن مثل حركة التسونامي البحرية. فما أراده الرسميون هو معاقبة السيد على موقفه من إغلاق معبر رفح من الجهة المصرية، وما فعله نصرالله هو أنه أعاد كرة النار جاعلا من الشعب العربي والمسلم حكما وقاضيا بينه وبين المتورطين منهم في الحرب على المقاومة في فلسطين خصوصا وفي المنطقة العربية عموما. وما قاله السيد يؤكد على الحقيقة وهي أن أصل القضية التي يطبل لها المستزلمون في الصحف هو المقاومة وموقف مصر منها وما قاله السيد نصرالله أعاد الكرة إلى الملعب الشعبي العربي والإسلامي وأظهر الحقيقة، اذ ليس حزب الله من يتآمر على مصر العرب ومصر الله والإسلام ، فما يفعله نصرالله ومجاهدو حزب الله في مصر ليس سوى القيام بالواجب مع الفلسطينيين نيابة عن الشعب المصري وعن أبطال أكتوبر في الجيش المصري البطل، ونيابة حتى عن الرئيس المصري وعن نظامه، فإن كانت التحالفات الدولية والالتزامات المصلحية للنظام المصري تمنعه من العودة إلى موقعه الطبيعي ومن القيام بواجبه في نصرة غزة ، فإن في الأمة من باع جمجمته لله وأعار مجاهديه للمصريين وجاء سامي شهاب إلى سيناء يحمل راية مصر نفسها التي حملها الجندي المصري في أكتوبر ورفعها فوق خط بارليف وما فعله سامي شهاب عدا عن كونه واجبا عربيا تجاه العرب في فلسطين، وهو أيضا واجب إسلامي وإنساني بنسبة أكبر.
وفي الختام رسالة... السكوت بعد كلام السيد نعمة يا أهلنا في مصر، وكفى الإخوة شر النزاع، وأنتم أخوة لنا كما المقاومون في لبنان وفلسطين أخوة .

mido said...

pink

السيادة الوطنية أمر مفروغ منه

و لكن المشكلة ان دى أقل تهمة موجهة لحزب الله

احنا معترضين على لستة التهم التانية

Unknown said...

هههههههههههههههههههههه

ايه مغامرة رجل المستحيل الفاشلة دي

فنانات شهيرات؟

مين بقى؟

يسرا وللا روبي وللا سمية الخشاب؟

ههههههههههههههههه
ههههههههههههههههههههههههه
ههههههههههههههههههههههه

مرة واحد متخلف كتب في جرنال الوفد يقول ان الغزو الشيعي قادم بدليل انتشار اغاني هيفاء وهبي وفضل شاكر وراغب علامة

طب والله العظيم كتب كده وما كانش بيهزر

ahmed samir said...

@ Pink

الملك حسين قبض على افراد المجموعه اللى نفذت عملية ايلات

ثانياً بيتهاجم أكتر لأنه من دول المواجهة
الدول اللى ليها حدود مع اسرائيل او قريبة منها زى مصر سوريا لبنان الاردن العراق

لكن المغرب و الجزائر مش من دول المواجهة دول بعيدة

Anonymous said...

http://www.sarayanews.com/home.asp?mode=more&NewsID=12818&catID=10

فنانات شهيرات

Anonymous said...

العراق من دول المواجهة!!!!! ، بعدين الاردن عندها حدود طولها قريب ال 600 كيلو ، و تضاريسها و تركيبتها مختلفة عن غزة و مصر ، و بعدين يا عمي احنا مش قد مصر و جيشها

Unknown said...

أنا أريد أن أفهم
إذا كان الموساد والسي آي إيه من أبلغا السلطات المصرية أليس هذا يدل على أن مصر مخترقة أيضا من جهازي المخابرات السابقين؟
إذن لماذا فقط التركيز على خلية حزب الله؟
أرجو أن نأخذ هذه النقطة في الاعتبار عندما نتحدث مع المدافعين عن سيادة مصر مبارك

ahmed samir said...

@ انونيموس

قلت الدول اللى ليها حدود
أو قريبة منها عارف كويس ان العراق مالهاش حدود مع اسرائيل

ثانياً
هو انا جيبت سيرة الجيش اصلاً

lastcrazyboys said...

بــادئ ذي بدء..أنــا مكنتش عايز اتدخــل في الموضوع برمته منذ بدايته

وذلك نظــرا لموقفي من"حـزب الله" -ليس طبعا بالنسبة للمقاومة - وإنما لطريقتهم للتعامل مع الشأن المصري
طبعا مش تأييد مني للموقف والنظام بتاعنا
مش عارف اوضحهالك ازاي ..هي فعلا ملعبكة شوية ..يعني مثلا انتي لو ليكم جاركم الراجل المهذب المحترم اللي بيصلي الفجر حاضر..بس طبعا لو اتخانق مع ابويا ..لا ممكن اقف في صفه
اياكش يكون ابويا اييييه ..انتي عارفة اثناء تواجدي في الصعيد لفترة سمعت مثل بيقول "لو ابــوك"........." امسك"........"طبعا مش مثل ابيح بس ميصحش يتقال هنا
ممكن تقولي على موقفي ده ..نتاج التطعيم والتلقيح المستمر من اول" مصر هي امي "لحد بعث السيد الرئيس ببرقية تهنئة للمنتحب ..وعلى قد نيتنا ادييييييييينا
آه والله بعترف ان الحاجات دي نجحت معايا ..وان احنا شركاء في الوطن نعمل سويا -نتفق او نختلف - لمصلحة الوطن اولا وأخيرا
وعشان كده آثرت الصمت ..ولحد ما اشفى من النظرية الهبلة دي
او استمر على هذا الحال وتصبح ميئوس منها
أمــا بالنسبة لموضوع "يارتني كت معاهم"وعملوها الوحوش
فأبطال ايلات من المعروف انهم اتقبض عليهم ..بس على ميييييييين..!! احنا كان عندنا عبدالناصر..وانا سمعت -وممكن تكون تحابيشنا المصرية-إنه تحفظ على الملك حسين لحين رجوع الأبطال المصريين
بس ملخص للموقف الحاصل ..الخطأ أولا وأخيرا عند حزب الله ..لأنه كلنا عارفين ان حكاية سيادة الأراضي دي ماهي إلا المقبض اللي ماسكين ومتبتين فيه
الحوار كــله "تــوم وجيري" ..بس
متبقاش تديني اي فرصة امسك عليك حاجة
ماهو الحكومة دي ملخص للمرأة المصرية ."العتييييدة".انتي حبيبتي وصاحبتشي ..وروحي روحي روحي..لحد ما يحصل بينا حاجة
ساعتها هتبقي كـذا..وكــذا ..وممكن توصل لبنت كــذا
مش عشان هي كــذا بجــد ..بقدر ما هو عشان أخلت بالصحوبية
يعني هو الــ"كــذا " ما ظهــرش إلا دلوقتي

glgl said...

انا بس عاوز اسال سؤال للى كتب البوست ده و اقوله
مصر زمان قالت للاردن احنا عاوزين نعمل عمليه ضد اسرائيل من ارضكو و هما رفضوا
قام المصريين عملوها من وراهم
فهل يا ترى حضرتك بمعرفتك الكبيره بالنظام عرفت ان حسن نصر الله قالنا انو هيعمل عمليه ضد اسرائيل و مصر قالتلو لا

ثانيا
وده للناس اللى بتفكر بس
شويه مصريين و معاهم معدات من مصر و مصر لسه مهزومه من اسرائيل اتسللو للاردن و دمروا ميناء اسرائيلى

ازاى بقى يمكن مقارنتهم

بناس جايين من بلدهم و قاعدين فى بلدنا و بيشترو بيوت بتاعتنا وعاوزين يعملو عمليه ضد اسرائيل (ضدها يعنى مش هايدخلو يعملو العمليه هناك)
يمكن انا فهمى بطيء ولا حاجه بس اللى انا اعرفو ان اللى عملو عمليه ايلات راحو دمرو ايلات و رجعوا


ولا اشتروا بيوت ولا جندوا ناس وبعدين هوا من قله حدود لبنان مع اسرائيل جايين يعملو عمليات من عندنا


انا اسف بس كرهك للنظام بيخليك تشوف كل حاجه سوده

بالمناسبه انا مخنوق من النظام بس فيه ساعات النظام الزباله بيعمل حاجات ما ينفعش يتعمل غيرها

alnafezah said...

الاخ بتاع التهييس الظاهر ضرب جوينت صينى عالصبح من اللى مبيطلعش دخان و النيكوتين اتحبس جواه فقعد يرفس عشان يطلع النيكوتين فقابل سيد العقب صاحبه فاخترعوا الافتكاسه دى عفر على قصةة المدملرة ايلات عشان تهدى يا بو التهييس هى الاردن جت اشتكت لك فى الغرزة و اللا المخابراتت الردنية وكلتك تنشر التهييسه دى و هو يا نجم عملية ايلات هتشبهها بحزب ابليس اخص عليك يا جعر عموما ارجوك بلاش السجايرالصينى تانى احسن تقول ان حزب الله دغدغ اسرائيل بالصواريخ من لبنان ايام حرب غزة بس اسرائيل خافت تعترف