Friday 17 April 2009

احنا محتاجين توضيحات من السادة المسئولين

اولا احب ابشر السادة القراء اني جات لي تهديدات من كذا ناس، ومن ضمنهم بهيج على فكرة، باني لو ما سكتش مش ح يحصل لي كويس وح يفبركوا لي القضية ويضموني معاها، والاحراز بقى ح تبقى صور السيد حسن، اه والله، قالوا لي ما تنسيش انك حاطة صورة حسن نصر الله في اودتك، لا وبيعرفوني يعني انهم عارفين ايه اللي في اودتي
يا دهوتي، ده صوره في كل حتة، وبالبس عقد خشب عليه صورته، وباحط دلوقت في الطرحة دبوس عليه صورته
ويا ترى الصور دي بقى ح تتحرز على انها متفجرات وللا على انها اسلحة حيث ان اللي بيكرهوا السيد حسن ح يشوفوني لابسة صورته يقوم يجيلهم ازمة قلبية ويموتوا من الغيط وبكده ابقى قتلتهم؟
وح ابقى احط صورته بقى كمان على العربية اللي بالقسط الجديدة، ماهو انا بعت العربية القديمة، وصدق او لا تصدق لقيت مغفل يشتريها وحطيت تمنها في مقدم وجبت عربية تانية بالقسط سبع سنين، فهل يا ترى المرتب اللي بيتحول من الحكومة مدعوم من السيد حسن؟ ده سؤال بيطرح نفسيته
وعلى اي حال، انا حبيت اقول لكوا يا شباب على التهديدات اللي وصلت واقول للي بعت التهديدات على الميل وعلى المدونة بانونيمس ومن ميلات مالهاش اسم اننون اذا كان مالهمش اسامي، فانا ليا اسم وكل الناس عارفاه
انا مش ح اسكت
ومطلوب من الحكومة المصرية اللي انا بادفع لها ضرايب شوية توضيحات
دلوقت المعروف ان مصر عاملة اتفاقية سلام مع اسرائيل
جميل؟ جميل
ومعروف ان مصر عليها التزامات امنية وخلافه
جميل
بس معروف كمان ان مصر دايما تقول احنا داعمين للقضية الفلسطينية ولسنا ضد المقاومة ومع حق الشعب الفلسطيني
طيب
الوضع كده فعلا محرئ محرئ محرئ
ما ينفعش مصر تبقى محايدة فيما يخص الصراع الفلسطيني الاسرائيلي
لان مصر مش الصين ومش استراليا، دي لها حدود مع بؤرة الصراع، وكونها ليها حدود ده يحتم عليها توضيح موقفها بشكل واضح وبين وجلي
يعني
للاسف ما بين الفلسطينيين والكيان الصهيوني صراع
فاما ان مصر داعمة للحق الفلسطيني، والحق مدام حق يبقى يتاخد باي وسيلة وبكل وسيلة
وفي الحالة دي، وحيث ان مصر عاملة اتفاقية سلام مع اسرائيل، يبقى مصر ما تقدرش تبعت سلاح لحماس، ما تقدرش تبعت سلاح للبنان، هي وضعها مش زي سوريا
لكن تقدر تعمل عبيطة
ما اعرفش...ماحدش عدى من عندي... مين؟ لا والله ما شفتش...فين؟ ابدا انا واقفة على الحدود اهو... لا اللي عدى ده مش من عندي والله، واحنا بقى نشتمهم ونقول لهم يا بتوع اسرائيل، وهم يقولوا نستمع لصوت العقل
لكن فيه انفاق بتتحفر وهم عاملين مش واخدين بالهم، فيه سلاح بيعدي و: هاه؟ ابدا، ايه ده عدى؟ لا لا لا لا، والله لامسكهم امسح بيهم البلاط ما تقلقوش
واحنا بقى نتخانق من التصريحات المقرفة دي، وكدهون يعني
اذا كان ده الوضع (واظن ان ده كان الوضع على مدى السنين اللي فاتت) يبقى ليه مصر قبضت على الناس اللي هي فضلت عاملة عليهم عبيطة كل السنين اللي فاتت؟
ما تخليها عاملة عبيطة
اذا كانت الاجابة اصل الموساد كشفهم
يبقى السؤال اللي ينطرح مش ايه اللي دخل بتوع المقاومة عندنا، السؤال الاهم: ايه اللي دخل بتوع الموساد عندنا؟
وليه ماحدش اتكلم عن السيادة لما الموساد اعلن ان هو اللي كشف شبكة دعم المقاومة؟
ده سؤال
لو السؤال ده برضه محرئ محرئ محرئ (يااااه هي بقت كده؟) يبقى خلاص، مصر اتزنقت ولقت نفسها مضطرة تقبض عليهم
ما خلصتش الموضوع في السكرتة ليه؟
"يا عم الكتكوت الجيران طابقين على مرواحي لم تعابينك"
ايه لزوم الحملة الشعواء دي؟ ايه الهلولة اللي هم عاملينها دي؟ وليه الغدر المفاجئ ده؟
الاحتمال التاني:
لا مصر مش داعمة للقضية الفلسطينية ولا حاجة، مصر متبنية خط امريكا
بقول اخر واوضح وابين: مصر داعمة لاسرائيل وموالية ليها، ومؤمنة، زي امريكا، ان "على الفلسطينيين الاقرار بحق اسرائيل في الوجود" وعليهم انهم يرضوا بالضفة وغزة، وزي امريكا برضه، مصر ملتزمة بامن اسرائيل، وعشان كده ساعدتها في ضربة السودان على سبيل المثال لا الحصر
اه
بس احنا ما نعرفش الكلام ده,.. يعني ماحدش ادانا خبر بيه، انا ماليش دعوة باي حد، انا باتكلم عن المصريين، احنا عايشين معاكوا في البلد، كلمونا زي ما بنكلمكوا
اذا كان الوضع كده يبقى حزب الله غلطان فعلا، وحماس كمان غلطانة، والاتنين بتوع فتح غلطانين، غلطانين اولا: انهم اتقفشوا، كان لازم يبقوا احرص من كده
وثانيا: انهم اعترفوا
ما تقوليش شرف بقى انت على ارض معادية، يعني كأنك اتقبض عليك في اسرائيل او امريكا، لو اتقبض عليك في امريكا ح تقول لهم ده شرف؟ ح تقول لهم والله ما كلمته والله ما جيت جنبه
صح؟
بس الكلام ده ما حصلش، اقصد ما حصلش ان النظام المصري اعلن بشكل واضح وبين انه قوة موالية لاسرائيل، والا كنا احنا الشعب المصري عرفنا الحكاية دي، والله ما حد قال لنا حاجة من دي
طب كده النظام المصري بيلخبطنا
هو ما كانش واضح معاهم ومع الشعب المصري من الاول، ما قلناش انه قوة ملتزمة بامن اسرائيل في المنطقة
هممممم
هو كلام جديد ويفسر ليه بنبعت لهم الغاز حاجة ببلاش كده، والبترول، دي تبقى بقى معونة مصرية رايحة لهم مع المعونة الامريكية
الله
طب مش تقولوا؟
كونه تفسير لا يعفي النظام المصري من مسئولية انه ضحك علينا وقال لنا انه داعم للحق الفلسطيني، انا اللي اعرفه ان لحد هذه اللحظة عيالنا في الحربية بياخدوا في المناهج: اسرائيل هي العدو
وان دي عقيدة الجيش لحد النهاردة
وللا هاه؟
ايه اللخبطة دي؟
ما تكلمونا احنا مش معترضين: آه آه... لا لا
بس نبقى عارفين، لان فيه حالة لبس ادت للموقف البايخ اللي كل الناس فيه
وبلاش كلام عن السيادة والنبي عشان ده كلام يضحك
بس مسئول مصري واحد يبقى عنده الشجاعة انه يطلع علينا ويقول لنا: يا جماعة احنا غيرنا هدومنا، اسرائيل بتاعتنا واحنا بتوعها
ودي مش اسمها جمهورية مصر العربية
والمادة الاولى من الدستور اتغيرت
واسم مصر اتغير
وعلمها
وتاريخها... خلاص
نقوم نعرف ونستبين ونبقى على مية بيضا ولا المشاكل ووجع الدماغ
صح؟

32 comments:

مواطن مصري said...

انا اتفق معاكي في البوست دة على النقطة الاولى


بس لو مصر بتنام على تهريب السلام و تستعبط ممكن تكون بتلعب على الوشين وش يبان انة مع امريكا ووش يبان انو عمع المقاومة بحس يبقى مع امريكا مية مية و مع فلسطين بردو لما يحس ان فية خطر على مصلحة مصر تطلع ناس كبش فدى عشان تنيم على خطوط التانية


نوارة انا و انتي بنختلف مع بعض في الاراء بس بحترم الاختلاف دة و انا سعات بستفيد بس فية ناس من الي بيعلقو بيدخلو عندي و بيشتمو

يا ريت لو عملك انا مشكلة او اي حاجة تقوليل

Unknown said...

لا يا مواطن انت مش عامل لي اي مشكلة وانت عارف لما باتخنق من حد بالوشه في وشه باقول له ما تجيش هنا تاني

فيه حد شتمك؟

بص انت عارف اني بانزل التعليقات من غير ما اقراها ولولا باهيج اللي جه يهددني النهاردة وجوده بيضايق الناس ما كنتش عملت مودريشن

انا فيه ساعات بانزل تعليق بيبقى صاحبه كاتب: ليس للنشر
وفيه بينزل تعليق فيه كلام عنصري او طائفي ومش باخد بالي غير لما بادخل في البوست نفسه اقراه

وياشباب لو سمحتوا

اللي عنده اعتراض عليا انا مش باتضايق
بس مدام الشخص بيدخل بيقول رأيه وما بيغلطش في حد يبقى تغلط فيه ليه

ومواطن عمره ما شتم حد عشان حد يشتمه

mido said...

يهددك ايه بس ! هو أي حد يقولك كلمتين يبقي يقدر يعمل حاجة

Unknown said...

لا ده كذا حد يا ميدو

بس وحياة امهم بقى ح ازودها مش ح انقصها

mido said...

طيب متنشري تهديد منهم _اهوه نتسلي :)

Unknown said...

ماهو منشور على مدونات تانية

TAFATEFO said...

ايه لزوم الحملة الشعواء دي؟ ايه الهلولة اللي هم عاملينها دي؟..

"إن ما حدث من دفاع عن تنظيم نصر الله الإرهابي سيكون مقدمة للهجوم على قانون مكافحة الإرهاب عند مناقشته في البرلمان حيث سيرفضه من لا يحبون مصر باعتباره قيداً على الحريات الخاصة" .. من لا يحبون مصر يا ابن المتحابين؟؟!!

فقرة الحمار رئيس تحرير الجمهورية في الصفحة الأولى من أهرام الخميس أهي .. والأهبل كاتبها صغيرة في الآخر زي التدخين ضار بالصحة على علب السجاير زمان وزي سعر الدقيقة جنيه ونصف في إعلانات التليفونات دلوقتيوده المقال الحمار للكاتب الحمار رئيس تحرير الجمهورية .. اللي بعد الشيخ قرد .. بقى يقول حسن بقو وحسن زعبلة

TAFATEFO said...

مع ملاحظة ان لو كل ده علشان يضربوا 3 عصافير بحجر واحد .. رد على خطاب نصر الله أثناء محرقة غزة .. محاولة تحجيم دور حزب الله والتأثير على الانتخابات النيابية القادمة لينفذوا ما لم تستطع الآلة العسكرية الإسرائيلية أن تقوم به في 2006 .. وتمرير قانون الإرهاب

يبقوا هما بقوا يقدروا الشعب المصري .. اللهم لك الحمد والمنة

الكلمة نور said...

الناس بتحبك يا مواطن متبقاش حساس كدا
والناس بتتعلم من بعض

Unknown said...

Some one

كلام حضرتك تكفيري ومذهبي وطائفي وعنصري ومش مقبول يتنشر في المدونة

ومتشكرة على الاتهامات

Unknown said...

كل الكلام ده بيتقال على الشيعة اللي هم مسلمين زينا زيهم؟

كل اللي في بندنج ده على الشيعة؟

عشان لما اقول لكوا المسيحيين مضطهدين كلامي ما بيعجبش

بقى دي ناس تعرف ربنا؟

اذا كانوا مش قابلين ناس مسلمين زيهم

تخيلوا دول بقى بيعملوا ايه في المسيحيين ولو ربنا قدرهم على واحد مسيحي ح يعملوا فيه ايه

mido said...

كلامك بيوجع بهيج و شركاه_ يبقي احنا كده في الطريق الصحيح

Unknown said...

يا جدعان ان مش مصدقة ان لسة فيه بني ادمين من ايام القناة الاولى والتانية والتالتة كانت لسة فاتحة جديدة ومن ساعتها ما عرفوش حاجة في حياتهم غير برنامج حياتي وبرنامج روبي للاطفال ومسلسل حيرم
هو لسة فيه ناس بتقول الشيعة بيقولوا جبريل غلط؟ لسة فيه ناس بتقول كده؟ واخدوا الاعدادية يعني

والاخ
some one

انا اسفة مش ح انزل تعليقاتك عشان كلها خرافات فوق الطائفية
وبتقول لي انا اقرا؟

انت باين عليك غلبان ومضحوك عليك

بس ارجوك انا مش بانزل تعليقات لا طائفية ولا مذهبية ولا عنصرية

Anonymous said...

عليك نور ياست الكل ونوارة البلد
يفطمونا الحكاية ايه واحنا مع بلدنا ودستورنا وتاريخنا وعقيدة جيشنا ودم شهدائنا
احنا بتوع جمهورية مصر العربية

تحيا جمهورية مصر العربية
تحيا جمهورية مصر العربية
تحيا جمهورية مصر العربية

وجمهورية صرم العبرية منعرفهاش ومتلزمناش

Some One said...

ههههههههههه

نواره من حقك طبعا ما تنشريش دي مدونتك ومقدرش اجبرك تنشريها احنا بننادي بالديمواقرطيه ماينفعش نستعمل غيرها في حياتنا :)

بس ياريت تقرأي في دينك الاول وتعرفيه علشان تعرفي ان الاسلام اصلا بيحرم العنصريه بين البشر وبيصنفهم بس على اساس الدين

لا فرق بين عربي ولا اعجمي الا بالتقوى

انا على فكره ماسمعتش القناه الاولى ولا التانيه ولا التاالته من زمان :d

بس انتي الي عندك تفكيرك ومش عندك استعداد تغيريه وفاكره نفسك صح دايما وكل الي معارض ليكي هو خطأ


حاولي تفكري ولو لمره وتدوري على الحقيقه , زي ما بتدوري على حقائق اوباما والجلد الاسود والحاجات العبيطه دي من باب اولى تدوري في دينك وتعاملك مع الناس وحكم شرب السجاير كمان بما انك بتشربي ( شوفت صورتك ماسكه سيجاره LM :p في حفل توقيع الكتاب
مبروك الكتاب الجديد صحيح بس انا مش هشتريه :p )


كل واحد في الدنيا بيتحمل مسئولية نفسه , لكن واجب على كل مسلم تقديم باب النصيحه لاخيه المسلم وانا نصيحتي ليكي تقراي كتب في العقيده والتوحيد اولا وبعدين في السيره والمعاملات وبعدين الفقه

اقري كتب صغيره يعني مش لازم كبيره عارفك بتحبي القرايه ;)

وحاولي تشوفي كتب لشيوخ من زمان يعني بلاش بتوع النهارده علشان نصهم في الضياع ونصهم في السليم وهيلتبس الامر علينا

اتمنى ليكي سهره سعيده امام بلوجر :D

على فكره انا مش من الاعداء والله انا احيانا تفكيري بيتوافق مع تفكيرك بس مش دايما :p والاختلاف في الراي لايفسد للود قضيه

Unknown said...

:D
حاضر ح اقرا

بس والنبي تجيب لي اسم الكتاب اللي بيقول ان الشيعة بيقولوا ان جبريل غلط ده؟

عشان امسك صاحبه وازفه في الشارع واجري العيال وراه

Anonymous said...

Some One

اساس الطرح الخاص بسيادتك خاطيء، لو عندك خير وعايز اخواننا الشيعة يعرفوه اتفضل لعندهم واعمل معاهم الواجب اللي انت عايزه
احنا بنتكلم في السياسة وعندنا وقت يوم القيامة نشوف حضرتك فين وحضراتهم فين

mido said...

ليه مكتوب على الصورة اللى انت حطاها نشر الغسيل ؟

!!

TAFATEFO said...

@ someone

بس ياريت تقرأي في دينك الاول وتعرفيه علشان تعرفي ان الاسلام اصلا بيحرم العنصريه بين البشر وبيصنفهم بس على اساس الدين..

تعرف تفسير قوله تعالى "ليس بأمانيكم ولا أماني أهل الكتاب من يعمل سوءاً يحز به ولا يجد له من دون الله ولياً ولا نصيراً. ومن يعمل من الصالحات من ذكر أو أنثى وهو مؤمن فأولئك يدخلون الجنة ولا يظلمون نقيراً"

وايه المعنى المستوحى من الآيتين؟؟

وبعدين بلاش تأليف الله يكرمك .. مهياش ناقصه الحكايه

الكلمة نور said...

والله انا متحيز لاهل السنه كسنى
بس مش وقته ده
اه الناس مفتونة بالشيعة ودا غلط
بس بعد لما اللحظة دى تعدى
كل واحد يقول رايه
كمان صحيح الشيعه فى ايران تحديدا عندهم اجندة مش واضحة بالنسبة لنشر مذهبهم
بس نعدى الكام شهر دول وبعدين اللى عايز يتكلم يتكلم
اه الانحياز لمذهبك شئ كويس
بس بلاش حد يلبسنا عمة ويستغل خوفنا وجهلنا وتطرفنا ويكرهنا فى اشرف حاجه
حصلتلنا فى اخر 100 سنه قول 200
وزى ما كل دا واجب
ميصحش ان احنا نحب حد لدرجة ان احنا منشوفش عيوبه ونسلمله كل حاجه
كل حاجه تبقى على بصيرة
مش لانه مختلف فى المذهب بس
وارد اننا نعجب باى حد حتى لو مالوش دين
بس من غير زيادة نبطل نعبد البشر بقه
ونبص على المبدا
نحب النظام مش اللى عملوه

Anonymous said...

ياصمصم ازيك ياخوي

انا افهم ان ننقى المذهب الخاص بنا من التوافه ثم نتوجه لمذاهب الآخرين بالنصيحة
مش عندنا كلما تأخر جبرائيل ظننته نزل على ابوبكر؟؟
ولا هو جر شكل وبس؟
احنا عايزين نشوف سيادة المذهب بتاعي عملي ايه في دنيتي علشان هو نزل من السما علشان اعيش مرتاحة في دنيتي ولما تقوم قيامتي برضو بيفدني هناك
طيب لما سيادة المذهب بتاعي وسيادة اخواته من المذاهب الاخرى مش نافعين الا في الحض على اطاعة اولياء الامور حتى لو جنحو على العبري نجنح معاهم يبقى حضرتك جاي تعمل ايه في الليلة السودا دي؟
دي الكبير فينا بيمسح جوخ للعاق والقاتل والمرتشي وبيرجع على التلفزيون ينتصب كده ويعملي فيها رسول الله والنذير البشير وحضرتك عايزني امسك بخناق الناس واترك خناقي الماسك في زمارة رقبتي؟

TAFATEFO said...

لا فرق بين عربي ولا اعجمي الا بالتقوىاللي يقعد ينصح ويعظ ويقولوا اقرى .. لازم يبقى عنده حد أدنى من المعرفة .. علشان على الأقل يبقى مقنع للي بينصحه

ازاي مفيش فرق بين عربي وأعجمي .. ده عربي وده أعجمي

لما تيجي تنسب قول لرسول الله (ص) أو تقتبس من أقواله .. يا تقول النص يا تقول المعنى الصحيح وتقول ما معناه

انما تألف؟؟ ليه اسم الله؟؟
قال (ص) : يا أيها الناس ألا ان ربكم واحد وإن اباكم واحد ألا لا فضل لعربي على أعجمي ولا لعجمي على عربي ولا لأحمر على أسود ولا لأسود على أحمر إلا بالتقوى ..............

والتقوى يا سيد .. دي بين العبد وربه

اقرأ ما قاله الإمام مالك عن جعفر الصادق .. إن كنت تعرف أيهما .. ولا أقصد إهانه

بس انت نرفزتني .. وكنت بقرا كبسولة .. أقصد لبوسة زفت سمير رجب

TAFATEFO said...

تقراي كتب في العقيده والتوحيد اولا وبعدين في السيره والمعاملات وبعدين الفقه ..

بصراحة أنا مش فاهم الترتيب ده جه كده ازاي

باعتبار من توجه له النصيحة (نوارة هانم) مبتدئه أو متعرفش حاجه خالص (باين عليها كده) فاللي أعرفه ان الترتيب ده غلط .. مع ان حضرتك مقترحتش عليها كتب معينة تبدأ بيها تراها حضرتك سهلة وواضحة

بس حضرتك اقترحت اقتراح مناسب جداً

اقري كتب صغيره يعني مش لازم كبيره..

أنا هقصر الشر وأتكتم

بس لي تعليق أخير .. زي كل المنتديات

نرجو التثبيت لتعم الفائدة

Unknown said...

يا مصطفى

انت لسة شباب
واللي انت بتعمله ده عيب وحرام ويتهز له سبع سموات

طب وديني لافضحك واقول لكل الناس انت بتعمل ايه دلوقت


يا نااااااااااااااااااس


طفاطيفو ماسك الجمهورية وعمال يقراها صفحة صفحة وخبر خبر وعمود عمود ومقال مقال


وخلااااااص

مصطفى خلاااااص

حد يلحقه بالاسعاف

مصري بالغربة said...

ازيك يا نواره
انا بجد باحيكي على جهودك بالمدونه بجد والله

وما تنسيش زي ما فكرتك قبل كده واحب افكرك دايما لو ما تزعليش مني بس

بتجديد النيه عشان يكون كل العمل والجهد ده في سبيل الله

عشان يكون في ميزان حسناتك ان شاء الله

وعلى فكره انا باستفيد كتير جدا من مدونتك ديه والله

وانا موافقك على رايك الاول وهي ان الفوركيشه ديه من الاول بترتيب اسرائيلي ومن الموساد طبعا

مواطن مصري said...

مصطففى بتقرأ الجمهورية يا نهار اسود خلاص تعالى نعلي كوشتينة حسن من الجمهورية

احمد سعيد said...

هههههههههههههه

اة يانى ياما

Some One said...

أخ طفاطيفو


وايه المعنى المستوحى من الآيتين؟؟

هل تعتقد ان اهل الكتاب حاليا على حق ؟؟ الي بيقولو ان الله ثالث ثلاثه والي بيقولو ان المسيح ابن الله ؟


لا فرق بين عربي ولا اعجمي الا بالتقوى
انا ما قلتش دا حديث انا لما كتبت حديث كتبت قبله قال رسول الله

ودا نص الحديث

قال رسول الله صلى الله عليه وسلم"
30438 - يا أيها الناس : ألا إن ربكم واحد ، وإن أباكم واحد ، ألا لا فضل لعربي على أعجمي ولا لعجمي على عربي ولا لأحمر على أسود ، ولا لأسود على أحمر ، إلا بالتقوى ، أبلغت ؟ قالوا : بلغ رسول الله - صلى الله عليه وعلى آله وسلم - ثم قال : أي يوم هذا ؟ قالوا : يوم حرام ، قال : أي شهر هذا ؟ قالوا : شهر حرام ، قال : أي بلد هذا ؟ ، قالوا : بلد حرام ، قال : إن الله قد حرم بينكم دماءكم وأموالكم قال ولا أدري ، قال : أو أعرضكم أم لا كحرمة يومكم هذا في شهركم هذا في بلدكم هذا أبلغت ؟ قالوا : بلغ رسول الله - صلى الله عليه وعلى آله وسلم - قال : ليبلغ الشاهد الغائب ."


الراوي: من سمع النبي المحدث: الوادعي - المصدر: الصحيح المسند - الصفحة أو الرقم: 1536
خلاصة الدرجة: صحيح


يبدو ان حضرتك متعصب اوي , او في حاجه في ردي وكلامي عن الشيعه ضايقك !!

عموما ياحج ماتزعلش نفسك الي عايز يدور عن الحقيقه بيعرفها

بالنسبه لترتيب الكتب دي لازم علشان لا يلتبس عليك الامر تزود معلوماتك وتوحيدك بربك وتقوي اعتقادك فيه علشان لما تعرف بعد كدا حاجات ماتستغربش منها وان كانت غلط تنكرها ( دا لو بتقرا لاي حد )

عموما الي عايز الحقيقه بيدور عليها والي عايز يعرف الشيعه يشوف اللينكات الي بعتها لنواره وهي ليها الحريه تنشر ردي دا وردي الي فيه اللينكات قبل دا او لا


يظهر ان كل الي هنا زي بعضهم كل واحد فاكر نفسه صح والباقي غلط

حتى لو الي ادامك بيغلط المفروض بتقوله بالراحه مش تضربه وتقوله مافهمتش ليـــه ؟

mido said...

عايز أعرف مين اللى عامل البانر الاخير اللى حطتيه ؟

و يقصد ايه بنشر الغسيل ؟

TAFATEFO said...

عم علي .. ده في أسوان

رجل محترم في الأربعينات

كل ما يتصل بي أقوله .. عمي .. كيفك؟

يقوللي تمام يا سيد عمك الحمد لله .. انت ايه عامل

عم علي وفر من فاتورة المحمول وبقى يرن علي .. اشترى باللي وفره كارت 25

والله براوه عليك يا عم علي .. احسبها صح .. تعيشها صح

someone

انت قلت ايه يترد عليه؟؟ .. عموماً يا سيدي أنا آسف

بس كنت باخد لبوسة سمير رجب وقريت تعليقك في النص

TAFATEFO said...

@someone

رغم اني بصراحه مكنتش ناوي أعلق على ردك الأخير علشان متزعلش

انت فهمت ايه من الآيتين؟؟ انت لقيت أهل الكتاب فقلت النصارى؟؟ مش مشكله .. بس هما الشيعة لو حضرتك مش معتبرهم مسلمين .. انت أو غيرك .. مهماش برضه أهل كتاب؟؟

:D:D:D:D:D

بص يا سيد عمك .. زي ما قلتلك .. خليني مكتوم أحسن

into said...

كفاية بأه بضان كفاااااايه
سيادة مصر سيادة مصر
طيب و اللي بيزوروا في الانتخابات دول مش بينتهكو سياده مصر؟؟؟ دول "بيغتصبو مصر"(كنت عايز اقول كلمة اوضح)ارحمونا بأه من حملة الصدمه و الترويع اللي جهاز الاعلام المصري بيقوم بيها ليل نهار دي
صحيح شوية اعلاميين زي الكلاب اللي صاحبه يشاور بصباعه على واحد و يقول بسك عليه ينطلقوا يهوهوه عليه!!!
يحيا حسن نصرالله
يسقط مزوري ارادة الشعب!!!!!!!!!!!!!!!!