Friday 3 April 2009

وتاني، اللي عايز يزعل ينزل اسكندرية

تحديث:
شفتوا بقى جو بيقول ايه؟ والله ما كنت قريت البوست بتاعه وانا باكتب البوست بتاعي
كل واحد بيتصرف زي ماهو شايف نفسه، احنا محتاجين نشوف نفسنا احسن من كده بقى، متهيالي خلصنا اننا نشوف نفسنا صراصير
شوية نشوف نفسنا وردة، فلة، ياسمينا، ريحانة كدهون يعني
والتاني ح اقول الكلام اللي بيزعل الكل بس ح اقوله عشان خاطر ربنا، الحقيقة عشان خاطر نفسي قدام ربنا، واللي يزعل عنده بحر اسكندرية واسع ولو بحر اسكندرية ملوث يقدر يروح مرسى مطروح... او العلمين خليه ينفجر ويريحنا
البلد دي لو فضل كل واحد فيها مش بيفكر غير في نفسه
لو فضل المثقفين يتكلموا عن الادان الموحد، والمادة التانية من الدستور، وازمة الهوية، والماضوية والبظرميطية،
لو فضل رجال الاعمال يلموا فلوس ويطلعوها على برة وكل همهم يكسبوا وبس وما ينتجوش
لو فضلت الطبقة المتوسطة تتشعلق على كتاف الاغنيا وتغرق في طمعها وتشتغل في شركات مالتي ناشونال وتدخل عيالها انترناشونال ويوم ما تعمل مجتمع مدني تاخد من التمويل الانترناشونال وكل حياتها بقت ناشونال في ناشونال ومش بيفكروا غير في نفسهم ازاي يتشعلقوا عشان ما ينزلوش، ومش بيفكروا غير في ازاي يدافعوا عن نفسهم ويبرروا طمعهم وما يفتكروش من الصحابة غير عبد الرحمن بن عوف ومش فاكرين من عبد الرحمن ابن عوف غير انه كان معاه قافلة مش عارفين اولها من اخرها (وطبعا ده حلم حياتهم) ونسيوا انه اتبرع بيها كلها، ونسيوا اصلا انه ما جبهاش من منين ما كان، لدرجة انهم نسيوا سيدنا محمد نفسه
ولو فضلت الطبقة المتوسطة والمثقفين ما يجيبوش غير سيرة الانحدار الاخلاقي والتآكل القيمي والاسفاف الفني
لو فضل الاجانب يدخلوا فلوسهم هنا والمصريين يطلعوا فلوسهم برة
البلد دي في انتظار احتلال
مش امريكاني
اسرائيلي
ومش ح يحصل الانقلاب العسكري اللي كل الناس نايمة عليه
احنا مش زي ايام الملك.... احنا زي ايام الخديوي، وكل حاجة اترستقت واتظبطت والبلد كلها بقت انترناثونال يا ثامح مش ناقصها غير جحافل التتار
اللي جاية جاية، اديني باقول لكوا اهو
المثقفين عليهم دور يحطوا للبلد دي خطة نهضة ما تخرش المية، ويتعبوا نفسهم شوية، مش كل حاجة ينقلوها نقل مسطرة
محتاجين زي ما بيستفيدوا من خبرات اللي قبل كده يعرفوا مالها مصر؟ ايه اللي صابها؟ وينظّروا في حاجة مفيدة شوية بدل التنظير في الهبتولة
يحطوا لنا خطة سياسية واقتصادية وثقافية واجتماعية من نفسنا ومن تربتنا وفي نفس الوقت تحدثنا وتقببنا على وش الدنيا
ويرفعوا من روح الناس المعنوية ويدوهم امل
ما تبس بقى كلام عن انحدار اخلاق المصريين، مالهم المصريين؟ اللي يشتم في اخلاق المصريين يعرف انه اسوأهم اخلاقا، المنطق بيقول كده، ايه السب واللعن اللي علاولة ده؟ المصريين كويسين جدا
جدا، كتر خيرهم اللي زيهم كان زمانه ماشي ياكل لحم الناس ني في الشارع
ويعملوا لنا خطة ثقافية عالمية ترفعنا قدام العالم وترفع روحنا قدام نفسنا
يعرفونا امتى ننفتح على العالم بثقافتنا وامتى نحاجي على بلدنا ونحميها من اللي جاي عليها بحيث نبقى احنا متحكمين في الارسال والاستقبال لا نستخبى تحت الترابيزة ولا نفتح ايدينا و... على البحري
ورجال الاعمال غصب عن بوزهم يعملوا لنا اقتصاد وطني زي طلعت حرب واحسن منه كمان، دي الجاموسة اللي بتحلب لهم الماظ ودهب، لو وقعت ح يحلبوا مين؟
والطبقة المتوسطة غصب عن بوزها تاخد الافكار وتطبقها على المشاريع وتعمل عمل اهلي وطني براسمال وطني، وتبطل تسول بالانجليزي والفرنساوي
ولو فيه اتفاقيات بتعوقنا ربنا خلق لنا محامين وقضاة وناشطين، هم مش دول الطبقة المتوسطة برضه؟
يا كده يا نقعد نهبش من بعض وفي بعض ونعايب على اخلاق بعض عشان كل واحد مش عايز غير يفكر في نفسه
انا ماليش دعوة
انا باقول الكلمتين دول عشان اغسل ايدي من دم البلد دي
الا هل بلغت
اللهم فاشهد
كده لو مت الليلة دي ابقى ضميري مستريح
على الله بس ما ابقاش باغسل ايدي زي هيرودس انا كمان، البلد دي ضحيتنا كلنا
ودي الحاجة اللي ما اقدرش اغسل ايدي منها، مياه كل الانهار والمحيطات في العالم ما تغسلش ايدين الليدي ماكبث من دم البلد دي اللي قدامها عشر سنين بس، يارب اكون مت قبلها
كلنا الليدي ماكبث، الا من رحم ربي
ملحوظة: ماحدش يسألني عن اضراب ستة ابريل تاني ومش ح ارد على اي اسئلة بخصوصه

72 comments:

مواطن مصري said...

انا معاكي في البوست دة بس لو موتي هلاقي مين هعلق عندة؟

77Math. said...

طيب المثقفين وحيعملوا خطة ما تخرش المية ،

مين حينفذ يا نوارة؟

حتقولي يبدؤوا بنفسهم؟ طبيعي أي حد مش عاجبه الوضع بيبدأ في نفسه أو من كثر ما هو مش قادر يطبق في نفسه بيهج من البلد عشان يقدر يطبق في نفسه بنِفْسْ


لازم الحاكم يكون عايز ينفذ كمان عشان هو دا الطريق اللي بتتنفذ بيه القوانين اللي نحطها دي..

نفسي بجد في اللي بتقولي عليه دا


بس لما بنشوف حتى المثقفين بيتخانقوا على حاجات تافهة، كل واحد عايز يثبت إن هو اللي مثقف واللي قدامه دا تقليد، بتقولي من جواااااااااا قلبك: مفيش فايدة ف البلد دي


أيوة المصريين أغلبهم فيهم خير، وكلهم مش عارفين يعملوا ايه، كللللللللللنا متربيين على: قل لي أعمل إيه وأنا أعمل

عشان كدا بقول لك، لازم اللي ينفذ القوانين دي تبقى على الكل، ومن فوق، عشان المصريين يطبقوها

وينصلح حالهم ..

ربنا يسمع منكـ

77Math. said...

باي ذا واي

مفيش كتاب تاني قريب؟

انت بتكتبي في أية جرنان؟

Unknown said...

انا ياحبيبتي اترفدت من الجرنال اللي كنت باكتب فيه والناس مش بتحبني عشان بازعل كل الناس زي ما انتي شايفة

Unknown said...

المثقفين بس يحطوا لنا الخطة واكيد اكيد
فيه انشالله رجل اعمال واحد نفسه يعمل حاجة

بس يرسموا لنا سكة بدل ما احنا عاملين زي بني اسرائيل في التيه كده ونمشي نمشي نمشي وننتهي من عند النقطة اللي ابتدينا منها

يساعدونا يساعدهم ربنا

Unknown said...

وبعدين يا ماث
المثقف عليه ينظر مش ينفذ
التنفيذ شغلانة الطبقة المتوسطة وفوق المتوسطة

ما عندناش مشكلة في الاغلبية الفقيرة اللي هي خمسة وتمانين في المية من الشعب المصري

دول تقولي لهم يزرعوا ح يزرعوا تقولي لهم يصنعوا ح يصنعوا

بس مش معقولة ينطردوا من اراضيهم ومصانعهم ولما يشتغلوا سواقين ميكروباص يكسروا على الناس الناس تعايب على اخلاقهم

كتر خيرهم انهم مش نازلين فينا قتل وضرب

77Math. said...

ماهو عشان التنفيذ يتم لازم القوانين تبقى منفذة


واللي بيخلي القوانين تتنفذ هو الحاكم " بكل فرقته يعني !"


اللي المفروض جه أصلا بيعمل على راحة الشعب وبقاءه في عيشة كريمة

مش حقول رفاهيته عشان ما أكونش بخرّف

يعني المثقفين لوحدهم مش كفاية من غير دعم السُلطة ..

مواطن مصري said...

لما الشعب المصري يكون عندة الارادة بيعمل
لما يكون عندة العزيمة بينجح

انما في مناخ فاسد من رجالح حكم الي رجال دين سواء من الازهر او المتطرفين


يبقى ازاي المثقف او الحاكم هينجح المجتمع عاوز واحد مثلا زيمالكوم اكس او مارتن لوثركينج يعملو تغير في ثقافة المجتمع عشان ينجحححح

مواطن مصري said...

معندكيش صورة انحناء اوبما للملك ؟؟

Unknown said...

ايوة يا مواطن

اول مرة اتفق معاك وافتكر اني نسيت اكتب النقطة التالية:

لو علماء الدين فضلوا ما يفكروش في حاجة غير في المد الشيعي والتنصير ووفاء قسطنطين ورواية عزازيل

يبقى ح يقابلوا ربنا ازاي والبلد في رقبتهم وماحدش بيعمل الفتن غيرهم

Unknown said...

باقول لك ايه؟

احنا قوانينا زي الفل

احنا اللي مش بنطالب بحقوقنا القانونية

يا ستي لما نبقى ناخد حقوقنا القانونية اللي منصوص عليها نبقى نطالب بتعديل القوانين اللي مش عاجبانا

الحقوق مش ح تيجي لحد بيتنا

احنا نتعب نفسنا ونعرض نفسنا للتريقة والتعب والدوخة في الاقسام والمحاكم

عشان ناخد حقنا

غير كده مش ح ينفع

Ahmad said...

استغفري الله
الي بتقوليه ده يندرج تحت بند البرايز الفكرية
نوارة الي ميشوفشي من الغربال يبقي اعمي و الموضوع واضح
المثقفين مش هيتلمو و يتفقو انهم يحطو خطط الا لو راس الهرم مش فاسد و بيهمه مصلحة البلد اكتر من كلب الحراسة زي مقلتي قبل كدة و عشان يبقي مش فاسد لازم يمشي و عشان يمشي لازم ثورة
و مختلف معاكي
ايام الخديو زي ايام الملك زي ايام جمال زي ايام انور زي ايام ابن الوسخة

مواطن مصري said...

نوارررررررررة شوفي فيديو انحناء اوبما لملك السعوديةةة
http://www.youtube.com/watch?v=5JGK-xbXxMw

احمد سعيد said...

ورجال الاعمال غصب عن بوزهم يعملوا لنا اقتصاد وطني زي طلعت حرب واحسن منه كمان، دي الجاموسة اللي بتحلب لهم الماظ ودهب، لو وقعت ح يحلبوا مين؟

.........................

معلش يا نوارة

دى

جت منك اوت


دول خلاص زهقوا من حلب البقرة

خلاص

لبنها قل

وبقت كل شويه ترفص وتنهق

دا غير ريحتها الوحشه

يااااى

خلاص

قرروا انهم يدبحوا البقرة

ويبيعوها بالكيلو

ههههههههههه

تحبيه ضانى ولا كندوز ؟؟؟

وبالنسبه لمسأله اللبن

فكك بقى من الكلام دة

فيه لبن بودرة دلوقتى ياماما

وفى لندن وكندا وسويسرا والصين

متسع لجميع الحراميه والهباشين

ويستقبلوهم بمزيكه حسب الله كمان

مش مدخلين فلوس لبلدهم

معلش

لو انتى معتمدة على النقطه دى ومطمنه انهم لازم هيعملوا اقتصاد وطنى

تبقى غلطااااانه

لانهم عارفين انها بتخرب

وبيتعاملوا مع الموضوع دة على انه مسلمات

وساعه الصفر

الجنسيات البديله جاهزة

والجوازات الحمرا على قفا من يشيل
( من يشيل منهم طبعا )

والحسابات مستنياهم برا

وصاله كبار الزوار فى المطار جاااهزة

اذا كان جيمى نفسه معاة الجنسيه الانجليزيه

ههههههههه

Unknown said...

http://www.aybasu.com/

دى حاجة كده احنا عملينها فى هندسة عين شمس شوفيها كده و قولليلى رأيك

عصفور المدينة said...

حضرت لأسجل التأييد والاقتناع بس فين الناس اللي عايزة التعب الابتكاري نحن محاطون بالمقلدين

mido said...

@مواطن مصرى


الصورة فى الدستور يا مواطن

mido said...
This comment has been removed by the author.
Unknown said...

ايوة يا طارق

انا عارفة عشانك يا بلدي

ده ممتاز

وان شاء الله ربنا يوفقكوا

انا مش بانكر ان فيه ناس بتعمل اللي ربنا يقدرها عليه
ومش ساكتين وان شاء الله ابرياء من دم البلد دي

بس احنا محتاجين مشروع قومي ليه مافيش حد من المثقفين ورجال الاعمال الوطنيين يتبنوا المشروع ده؟

Unknown said...

مواطن

ماهو الملك عبد الله هو اللي ح ينجده من الازمة الاقتصادية

يا زين ما اتبلينا يا اخويا

ده اليهود اهون من الحكام العرب

مواطن مصري said...

يعنيي بيشحت اخسسسسسسسسسسسسسسسسسسس

mido said...

@نوارة



صورة أوباما وهو ينحنى للملك السعودى

Unknown said...

انا شفت الفيديو

لا مش شايفة فيها حاجة

مش عارفة ماحسيتش ان فيها حاجة
حسيت ان عيل صغير وبيحترم راجل قد جده

مش عارفة ليه ما حستش ان فيها حاجة

رئيس جمهوريه نفسى said...

بخصوص حلب البقرة يا نوارة كان في حلم جة في كتاب احلام فترة النقاهة لنجيب محفوظ بيصور فيه مصر على شط النيل بترضع اولادها ولما لبنها جف ابتدو ينهشوا في لحمها وبعدين ابتدوء ياكلو في لحم بعض مش عايز اقلك انى الوضع الحالي مصر بقيت قاب قوسين أو ادني من المرحلة دي وصراعات رجال الاعمال والاكتاف الغير قانونية اللى بيضربوها لبعض جزء علشان كل واحد يلحق ليه حلبة من البقرة زى ما قلتى فى الردود بخصوص المثقفين دول قدامهم كتير على ما يفكرو يعملوا حاجه للبلد لما بيبطلوا خناقات مع بعض حولين الفكر الاصلح والافضل وبعدين يبقوا يدورو على منهج وخطط نطبقها ومع احترامى ليكى انتى لسة متخيلة انى فى مصر طبقة متوسطة يا نوارة مصر ينطبق عليها قول المولى عز وجل ( مرج البحرين يلتقيان * بينهما برزخ لايبغيان) مصر بقيت مقسومة طبقة اغنيه وطبقة فقراء كل الرابط بينهم انهم مصريين بس محدش منهم بيختلط بالتانى وحتى فكرة رجل اعمال يعمل اقتصاد لمصر تفتكرى حينج فى وسط ام الفساد اللى عايشة فيه مصر ولا حد حيسيبة يعمل حاجه فى ولاد الوسخة اللى وكلينها والعة معتقدتش

مواطن مصري said...

رئيس جمهورية اة الحلم دة في ص 13


شوف انت الحلم 3 تقريا بتاع السفينة و الراجل الي بيولع في نفسة


على فكرة احلام فترة النقاهة حلوة اوووي

حلمبوحة أخت فتكات رمش العين said...

يا ست نوارة

باختصار انتي منافقة وبتاعة كلام وبس

تنادي وتسرخي بحاجات كتيرة وانتي بنفس الوقت ما بتطبقيهاش على نفسك

باختصار انتي منافقة واونطجية

ما تزعليش مني بس دي هي الحقيقة

دمتي بود

77Math. said...

أنا كمان شايفاها عادي

حركة تقدير عادية مش أكثر

77Math. said...

واحد معلق بيقول شكرا أوباما

معرفش على إيه

ما علينا

رحلتنا في الحياة said...

انتظار الخطط اللى هيعملوها المثقفين ورجال الاعمال علشان البلد دى
معلش يانوراة انتى بتتكلمى عن قلة قليلة من الشعب الشعب كله تحت خط الفقر والجهل تفتكرى دل حلهم ايه

Unknown said...

باسرخ؟

باسرخ؟

ودي بتتعمل ازاي؟


لا لك حق انا مش مفروض اسرخ

ينفع اسلخ؟

حاضر
ح اجيب فلوسي اللي وديتها سويسرا
وح اغير موضوع الموسوعة بتاعتي واحط لكوا نظريات تمشوا عليها

وح اسيب الشركة المالتي ناشونال اللي باشتغل فيها

وح اعمل عدة مشاريع بفلوسي اللي سرقتها من الشعب

واول مشروع ح اعمله اني امحي اميتك

واعرفك ان مافيش في الدنيا حاجة اسمها

دمتييييييييييييييييييييييي بود

فيه حاجة اسمها دومتي دمياطي

Unknown said...

ماث 77

ايوة بيقول له شكرا لساعي البريد

او يمكن
احم

بلاش بقى عشان دي اعراض ناس

Unknown said...

ايوشة

ياختي انا باخلص ضميري من ربنا

mido said...

سمعت يا نوارة عن د.أشول ضلمة :))

الكلمة نور said...

هو سكة كل اللى انتى قولتيه ده يبدا منين؟
اللى هينظر
واللى هينفذ
واللى هيمول؟
يبدأ كل ده ازاى؟
مين؟ وازاى؟

Ahmad said...

لووووووول اسرخ
نوارة علي فكرة ده مش مصطفي مش عارف ليه حبيت انوه
هو حد بيستهبل و يقلد مصطفي

mido said...

متحاوليش تخدعي الناس و تفهميم انك معاكيش فلوس ومش غنية ! امال فين أرباح ‎مبيعات كتابك ؟ d:‎ P: ‎

حسن على said...

تكرر نوارة دائما توقعها -بعد الشر عنها- لوفاة قريبة تنتظرها ... وهذا توقع خاطىء لأن الموت يختار الطيبين اولا ونوارة (اشرار) مش طيببين وعلى ذلك فهى ستعيش مائة سنة واكثر حتى ينتهوا من الطيبين اولا !!بس خلاص

Unknown said...

ميدو
ههههههههههه
مين اشول ضلمة ده؟


الكلمة نور

يا عيب الشوووووووم

بقى ربنا مدينا كل الامخاخ دي
ورجال اعمال على قائمة اغنى اغنياء العالم
وبلد الازهر اللي ياما قوم ثورات وحركات مقاومة
ومش عارفين مين يبتدي؟

طيب انا اقول لك

فيه ناس بتعمل شغل زي عشانك يا بلدي مثلا وزي صحبة خير

وبيعملوا شغل اهلي ومش شحاتين من برة ولا ليهم اجندا ملعوب في اساسها
ولا بياخدوا تمويل من كل خواجة معدي
وعندهم مشاريع كويسة

ليه مثلا مش كل الناس اللي بتعمل شغل بالطريقة دي تقعد مع بعضها ويشوفوا ح يعملوا ايه؟

بس مش ح ينفع على فكرة

لان في النهاية هم شباب ونفسهم يعملوا حاجة كويسة

لازم يبقى لهم مرجعية يرجعوا لها

يعني الملايين دي مش عارفين يخلفوا واحد زي هرتزل يحط خطة بسيطة وواضحة المعالم نمشي عليها كلنا؟

وماحدش يقول لي الحكومة والنبي

الحكومة دي نسمة
نسمة كده

تدخل وتخرج ولا تحس بيها

Unknown said...

احنا مشكلتنا الاساسية في المثقفين على فكرة

متقعرين ومش عارفين يوصلوا للناس

لو يكلمونا زي ما بنكلمهم

ينشلونا من حالة التوهان اللي احنا فيها دي

ويبطلوا يقولوا في شعارات

يقولوا لنا نعمل ايه واحنا نعمله

احنا كلنا زهقنا من النظريات

احنا عايزين حد يقول لنا اعملوا كذا كذا واحنا نقوم نعمله على طول

ووالله صدقني لو حتى الحكومة سلطت علينا بلاويها الناس مش ح تخاف لانها ح تحس انها بتعمل حاجة لها راس ورجلين وهدف محدد

لكن طول ماهم بيقولوا في شعارات وحاجات مش محددة الهدف الناس ح تخاف

مش لانها خايفة من العكشة

لانها مش عارفة ح تتعكش على ايه؟

Unknown said...

احمد

لا قطعا طبعا مش مصطفى


مصطفى بيعرف يقرا ويكتب ومعاه الابتدائية

انما الاخت وللا الاخ ده خرجوه من كي جي تو عشان سقط في السندوتشات


ميدو

فكرتني

ده انا لازم انوه عن حفل التوقيع اللي ح يتعمل في البلد

يا خرابي

ده انا ما كلمتش الناشرة من ساعتها عشان اقول لها تجيب كتب في حفل التوقيع

يا لهوي

احمد مهنى ح يدبحني

يعني عامل لي حفل توقيع سفلقة وكمان مسطولة؟

حسن علي
:(
كده برضه؟
مستخسر فيا الموت

طيب ح احاول ابقى طيبة يمكن ربنا يكرمنا

الا الواحد يبقى طيب ازاي؟

mido said...

د،أشول ضلمة = د،أيمن نور :)

mido said...

بعتلك رابط ملف صور _وصلك ؟

مواطن مصري said...

نوارة زي ما توقعت اوبما عاوز ياكل بعقول العرب حلاوة و يصيع عليهم بحكاية التسليمة دي عشان يكسب ودهم شوفي تعليقات المواقع الاخبارية و الراي العام و هتقولي المواطن قال

الكلمة نور said...
This comment has been removed by the author.
مواطن مصري said...

ههه نوارة عملتي اقرارك الضريبي بعد التربخ من الكتال لتاعك ولا القانون واضحح
:))))

Unknown said...

لا يا ميدو

مافيش حاجة وصلت
ابعت تاني

الله يخرب بيتك يا بطرس


ايمن نور؟

ههههههههههه
والنبي سيبوه في حاله
ده تعباااااااان يا قلبي

Unknown said...

مواطن

اه ماهو بيوطي لزكيبة فلوس

خلي بقى الاخ العظيم صديق امام المسلمين اللي هزأه وهو بيصالحه او صالحه وهو بيهزأه يصرف عليه فلوسنا

خلينا نخلص بقى

من ساعة ما ربنا بلانا بالزيت ده واحنا في النازل

كان مالنا؟

ما كنا زي الفل


الكلمة نور


طيب ما فاروق الباز كان عامل ممر التنمية
مشروع كويس قوي

هو لازم الحكومة هي اللي تنفذه؟

لو رجال اعمال مصريين

مش لازم يبقوا من الحيتان

انا باتكلم عن الناس اللي عندها مصانع صغيرة او متوسطة

ميسوري الحال اللي رايحين جايين على الجامع والكنيسة يا اخويا

بلاش

ما نعمل اكتتاب
ونعمل ممر التنمية ده

صحيح اسرائيل مش موافقة عليه

بس هو احنا ح نفضل كده؟

طيب ما نمشي في كذا سكة

سكة اننا نتفك من اسرائيل وسكة اننا نعمل اكتتاب ونشتري الاراضي ونساهم في ممر التنمية

فاروق الباز حط المشروع

اي حد اقتصادي كويس واحنا نثق فيه نعمل اكتتاب معاه

بس هو يبتدي

ما فيه ناس ميسوري الحال

بدل ما يحطوا فلوسهم في توظيف الاموال وكل شوية واحد ياخد الفلوس ويخلع

ما يعملوا اكتتاب مع بعض وبعدين لما يبتدوا مشروع الناس ممكن تتلم عليهم

وبالنسبة لاسرائيل اللي مش موافقة على المشروع

يبقى نمشي في موضوع كامب ديفيد

وبعدين اسرائيل مش موافقة على المشروع لو الحكومة ح تعمله

لكن لو احنا اللي نعمله ليه لا؟

انا بافكر معاكوا يعني

انا واحدة على ما تفرج انتوا عارفين

حسن على said...

الواحد يبقى طيب ازاى؟؟؟ سؤال ساذج جدا... كدهوة ... هى دى عايزة علام؟؟؟

الكلمة نور said...

دا حقيقى انتى مقتنعة ان الحاجات بتحصل فى مصر كده؟
والله بجد عايز اعرف انتى دى قناعة عندك؟

Unknown said...

يا اخي مافيش حاجة بتتحصل الا لما احنا بنحصلها

امال ح تحصل ازاي؟

هو احنا جربنا؟

طيب ما طلعت حرب عمل اقتصاد مصري بالاكتتاب

الكلمة نور said...

من غير ماتبصى على الظرف اللى كان فيه؟
ماهو فى ظروف
وبعدين ايه مافيش حاجه بتحصل من غير ما نحصلها
صح
اه
وربنا

بس اللى بيعمل عيش
بيفتح فرن
بيشترى دقيق
وخميرة
ويسخن الفرن
ويعجن
ويخمر العجين
ويبطط وبعدين يخبز

احنا شترينا ايه
طب طلعت حرب كان فى نظام اقطاعى زراعى يقبل نمو راسمالى صناعى جديد فيه
نظامنا يتوصف بايه؟
عشان نعرف هنبدا منين؟
يعنى اللى ماشى ايه؟
مين بيبع دقيق؟
مين هيسب العجين يخمر؟؟؟؟؟

عباس العبد said...

صديقتى جبهة
مش عارف قريتى اللى انا كتبته و لا لأ .. بس المثقفين اللى بتتكلمى عليهم دول ايدك منهم و القبر مش حيعملوا حاجة
دول حيولعوا فى البلد زيادة
دول مشغولين بالتنوير و التغيير
مشغولين بالتنوير .. بيولعوا بيوت الناس بحرايق .. و مشغولين بتغيير عربياتهم و فيلاتهم
الناس لازم تفوق .. الدور على اللى عايز خير للبلد
الدور على الناس اللى زيك و زى و زى كل واحد بيكتب كلمة لوجه الله
ربنا يستر علينا

أكون أو لا أكون said...

شوفي يانواره... لازم الأول نعرف إيه الأسباب التخلف اللي العالم العربي غرقان
...
أهم الأسباب إن بلادنا بيحكمها مجموعات من الجهله المتخلفين... واللي هم كل اهدافهم السيطره على الشعوب بقبضه من حديد
...
يعني العلم والتعلم آخر أهدافهم...
العصابات دول نصّبوا قرايبهم و اهلهم واصدقاءهم ومعارفهم... وماخلوش للمثقفين مجال للتصرف...
المشكله ان اي واحد يحاول يعمل حاجه بيتهموه بالتخريب والتصرف بدون العوده للجهات المسؤول...
وإنت أكيد تعرفي اد ايه وقت بتاخد دراسه كل مشروع من قبل الحكومات...
يعني كل مشروع يلزمك عشر سنين دراسه بعدين يقرروا موافقين ولا لاه...
وحيكون الرد لاء لو كان المشروع مكلف طبعاً...

احنا كلنا متفقين إن فيه أزمه كبيره في التعليم... وإن الجهل استفحل في الشعوب العربيه...
المشروع لازمه دراسه عميقه... في ظل قيادات متعلمه ومثقفه... وطموحه ويهمها مصلحه الشعوب والوطن...

لو توفرت هذه الاساسيات... نبقى نبتدي نفكر ازاي نغير المستوى التعليمي تغييراً جذريا...

لكن مع وجود هؤلاء فلن نستطيع تحقيق المستوى الذي نطمح له.

أكون أو لا أكون said...

شوفي يانواره الخطه الحقيقه هي
انجوي يور استودي...
يعني لو اترتبت خطة للدراسه بالشكل ده حتلاقي الطالب حصّل أعلى الدرجات...
المتعه في الدراسه تكمن في التطبيق العملي...
لو توفرت اساليب وادوات التطبيق العملي يبقى احنا بنتمشي على الطريق السليم...
لأن التطبيق بيقتل الملل في روح الطالب...
وبيطبع المعلومه في دماغه للأبد...


المدرسه لازم تكون فاتحه ابوابها للطلاب بعد الدوام وفي اوقات العطل أيضا...
لأن بالشكل ده الطلاب حيتشجعوا إنهم يدرسوا مع بعض... ويعلموا بعض... ويساعدوا بعض... وخصوصا ان الطالب بيستقبل المعلومه من زميله اكثر من المدرس...


اهم شيء الابحاث... لازم يتعلم الطالب كيفيه القيام بالبحث من المرحله المتوسطه... ويكون نص الدرجه على البحث ... والنص الثاني على الإمتحان



المنحه والسلفه الدراسيه للطلاب اللي مالهومش معيل...

انا اعتقد ان ده شيء مهم جداً... لأنه بيأمن للطالب استقرار من ناحية الماده... فبيتفرغ للدراسه كلياً...
خصوصا للطلاب اللي تحت سن الـ ١٦

فيه اشياء كتيـــــــــــــر ممكن انها تساهم رفع مستوى التعليم... لكن مين حيسمعنا؟
لو فيه احنا كلنا حنفكر...
لكن لنا الله...

منظور شامل للحياة السعيده said...

متابع معاكم

TAFATEFO said...

lol @ حلمبوحة أخت فتكات رمش العين

على فكره ده أقدم مني في جبهة التهييس

:D

TAFATEFO said...

ودومتي دمياطي فعلاً زي ما قالت نوارة هانم

Anonymous said...

أوعى يكون الكلام على ابوكو الحج مصطفى شوشه
أه أسحل منكو يا كماحه
وبالمناسبه السعيده دي أحب أهدي الشعب المصري العتيق
أغنية
البامبو السواداني بامبو
البامبو علشاني بامبو
بامبوووووو يوووه
مع دموتي الدمياطي لازم هتلغوص أيديك

عمكوالحاج مصطفى شوشه
ويخرب بيت أم أي حد يتقمص سخصيتي

حلمبوحة أخت فتكات رمش العين said...

يا معلمة نوارة

يعني أنا قلت لك رأيي فيكي وبكل صراحة وفوقهم بوستين وبالأخير كتب لك دمتي بود

تقومي تتريقي على كلامي؟

تسرخي = تصرخي = تولولي = تهيّسي = تجرّسي ... الخ الخ


المعنى كله واحد وكله عندنا صابووون

اما انتي طلع خلقك ديق بشكل


دمتي بود واعتزاز

Unknown said...

ديق؟

حسبي الله ونعم الوكيل

عارفة لو طلعت تعليم مدارس حكومة ح ادلدل وداني زي الكلبة

ده انا كنت لسة باقول احنا اجدع ناس وتعليمنا اجدع تعليم عشان ارفع من روحنا المعدنية ويبقى عندنا ثقة في نفسيتنا

ياااااااااااااارببببببببب تطلعي تعليم مدارس مش حكومة

ياااااااااااا ررررررررربببببببببببب

حلمبوحة أخت فتكات رمش العين said...

مين مصطفي ده اللي بتشبهوني بيه؟

يخرب بيتكو
دنتوا حتى بالتخمين مش فالحين
اومال فالحين بس (تسرخووووووو) زي معلمتكو نوارة؟

بالمناسبة انا ما بحبش الجبنة الدمياطي وافضل عليها الجبنة القريش مع بصل اخضر


دمتي بجبنة قريش

Unknown said...

يا ستي الله يعمر بيتك ويكرمك على الدعوات اللطيفة دي

ماحدش شبه مصطفى بيك
قلنا لك مصطفى معاه الابتدائية القديمة وبيعرف يقرا ويكتب

وبيعرف نحو كمان

معلمتكوووووو

هههههههههههههه
انت كل تعليق تكتبي لنا كلام لوز لوز لوز

ربنا يحظك يا شيخة

TAFATEFO said...

Check This

أيمن عبد العظيم طه said...

ردي الوحيد عليك هو

http://aymanabdoo.jeeran.com/archive/2007/10/345503.html

أيمن عبد العظيم طه said...

ردي الوحيد عليك هو

http://aymanabdoo.jeeran.com/archive/2007/10/345503.html

Anonymous said...

ها ها لأ لنا هنا وقفة يا ست الكتكوتة اوعي تقنعي نفسك انك كده عملتي اللي عليكي ده يبقى اسمه خداع نفس...يعيش أهل بلدي و بينهم مفيش تعارف يخلي التحالف يعيش تعيش كل طايفة من التانية خايفة وتنزل ستاير بداير و شيش...يا نوصة هانم مثقفين مين اللي هيحطوا خطة متخرش الميه؟انتم ليه مصممين ان كل فئة تعمل لوحدها من غير ترابط؟قصدي الخطة لازم معظم المشاركين في وضعها ناس بتشتغل بايدها علشان ميبقاش(يعيش المثقف على مقهى ريش محفلط مظفلط كتير الكلام عديم الممارسة عدو الزحام بكام كلمة فاضية و كام اصطلاح يفبرك حلول المشاكل قوام)وكمان يا أستاذتي زي ماكتبني في كتابك الأخير عش على الريح-لسنوات طالبنا بالحرية بدون أن نعمل للحصول عليها- يبقى لابد من خطوات مش مثقفين يحطوا خطة(زي ما قعدوا يطالبوا بالحرية في الصالونات الثقافية)يعني احنا كلنا ملح الأرض مش شويه يفكروا و شوية ينفذوا عمياني لأ لازم التوازن علشان ننتج بالضبط زي الأررض الزراعية لازم تكون أملاحها متوازنة علشان تطلع خير..كل واحد له دور ولديه شئ يقدر يقدمه بس لازم الصورة الكبيرة تبقىواضحة وتتقسم علينا كلنا قطع صغيرة زي قطع البازلpuzzel
وأهم حاجة التشبيك بين القطع الصغيرة والدور مستمر مش شوية وأخلصه يعني ده مش دور في مسرحية حتى لو مات الشخص فيه غيره هيكمل لأنه في وسط مجموعة ودائما ابدأ من حيث انتهى الآخرون

Unknown said...

لا
بس انا ما قلتش ان كل فئة تشتغل لوحدها

مش ده معنى كلامي خالص يعني اظن انه كان واضح

انا باقول المفروض ان الكل يتكاتف وكل واحد يعمل دوره
المثقف يحط خطة ورجل الاعمال يساهم برأس المال والطبقة المتوسطة تشتغل

ده اللي انا كنت باقوله

يعني فاروق الباز حط خطة ممر التنمية

مش معاه فلوس عشان ينفذ الخطة
المفروض ان مجموعة رجال اعمال يمولوا الخطة دي
والمفروض ان بيبقى فيه خبرات من الخبراء ياخدوا راس المال وينفذوا بيه الخطة اللي على الورق

لكن يعني فاروق الباز بنفسه ح ياخد فاس وينزل يعمل الممر؟

مش تقولي كلام عاقل؟

Anonymous said...

يعني ايه كلام عاقل؟ مش فاهمة
الدكتور الباز اقترح في اختصاصه جزء من خطةالتنمية ده
أنا باتكلم على الكليات الصورة الكبيرة و تقسيمها ده مش معناه خالص يا فندم ان فاروق الباز هينزل يشتغل بايده لكن قصدي في التخطيط الإستراتيجي لابد من شراكة التطبيقين مع الناس اللي عندهم علم ولازم نعرف ان هذاالمشروع جزء من التنمية
ولابد من وضع آليات لتنفيذه ضمن الخطة الكلية و المتابعة والتقييم تتم من خلال دكتور الباز ومجموعة عمله ليشرف على التطبيق علشان يحقق اهدافه

Unknown said...

ههههههههههههههه
يعني انت حفظت كلمتين وعايزة تدلقيهم كده كده؟

امال احنا بنقول في ايه من الصبح؟

Anonymous said...

كلام جميل جدا مين فى ايدة السلطة انه ينفذ
الاصلاح بداية من العقول
والعقول بدايتها من الكتب والثقافة والفكر العام الجمعى والهدف العام و الثقافة التى لا تتمثل فى لبس الجلابية زى ما عضو مش عارف اية عاوز يخليها زى موحد للمصرين
احنا اتفرمنا و انصهرنا فى بوتقة من التيارات الثقافية والسياسية اللى اهدافها فلوس و سلطة و الانسان المصرى اتركن على الرف من زمان من زمان قوى البلد عاوزة اللى يدبها و يخاف عليها و ينور عقول اهلها بس اية السبيل لدة . انا وانتى و المدونين و المعلقين على البوساتات وكل واحد منا فى مركزة او ظيفته بيشوف العجب و يحاول يصلح و نحاول تانى و الغلط زى السرطان تطبيق الافكار عاوز قوة و سلطة و نفوذ وتاثير عاوز شعب فاهم واعى عارف هو مين ورايح فين واهدافة اية
احكيلك موقف حصل معايا الصبح واقفة فى شباك عشان ادفع فاتورة التليفون كنت التانية فى الصف و ورايا اتنين ستات و فى الصف التانى اتنين رجالة
السباك اللى جمبى فضى ومفيهوش حد قلت للست اللى ورايا روحى ادفعى الشباك فاضى بصتلى بخوف وقلق وقالتلى لا انا اخدت مكانى هنا وخلاص قمت انا سبت دورى ورحت دفعت ومشيت الموقف دة يوريكى احنا ادة اية بنخاف من التغير اد اية بنخاف اوى على اللى فى ايدينا ونخاف اوى نضحى بية ونخاف اوى احسن يضيع بنخاف ناخد اول خطوة بنخاف نفكر فى اول خطوة بس لو واحد عمل اول خطوة ممكن كتير يمشوا وراة ممكن يتصلح حالنا ممكن نتغير ممكن اصغر نجع كله اميين وجهل وامراض يبقى مكان زى الريف الانجليزى اللى بنقرا عنه البلد دى جميله و تستحق حد بيحبها وبيخاف عليها . اما الفكر الفردى والمصلحة الفردية والتسلق والنفاق فدى امراض اجتماعية مش متوقعلها علاج مش احنا برضى مبتكرين المثل الشعبى انا ومن بعدى الطوفان ، ولو جالك الطوفان حط ابنك تحت رجليك يا بنتى مفيش فايدة فى اخلاقنا كشعب مفيش فايدة بجد

Unknown said...

مافيش حاجة في الدنيا اسمها شعب وحش

والست الغلبانة دي لها حق تخاف لان مافيش سيستم ومافيش قانون يضمن لها حقها ولها خبرات كتير سيئة في حياتها تقول ان الحكومة مستقصداها وبتدور على اي حاجة عشان تضايقها بيها من غير سبب واضح لها على الاقل

واي بلد في الدنيا بتقع بيبقى العيب في المثقفين والطبقة المتوسطة واصحاب رؤوس المال

مش بيبقى العيب في عامة الشعب
لان عامة الشعب لما يلاقي قانون وخطة واضحة المعالم بيمشي فيها لانه مستفيد منها

وطبيعة الانسان انه يسعى ورا الاستفادة

زي مثلا الناس لما شاركت واشترت اسهم في مشاريع طلعت حرب

لانهم مستفيدين ولان عندهم حس وطني

بس كان فيه واحد زي طلعت حرب
مش هو اللي حط النظريات
كان فيه مثقفين حطوا النظريات الاصلاحية وفيه ناس طبقت

لكن لو طلعت حرب كان حرامي وبيحتكر الحديد والمثقفين اللي الموجودين كانوا مشغولين بس بالادان الموحد
ما كانش الناس اشترت اسهم في مشروعه

صح؟

الناس لما بتلاقي حاجة كويسة وللا حتى والله العظيم نص كويسة
يعني سعد زغلول ده ولا كان يستاهل اللي ربع الشعب عمله عشانه

بس هم عملوا كده لان المصلحة المجلوبة اهو بكتير من الخسائر اللي ح تلحق بيهم لو ما اتوحدوش حوالين اي رمز حتى لو كان رمز قمارتي وممكن ياخد فلوسهم يلعب بيها قمار ويضيعها عليهم

المصريين كويسين، واستحملوا كتير وعلى استعداد يستحملوا اكتر

بس حد يعبرنا

حد يكلمنا

حد يسأل في قرعتنا

Anonymous said...

أهوه كله كلام في كلام و الجعانين بيزيدوا و الآدمية بتموت
حسبي الله و نعم الوكيل
و اللي بيحاول يعمل حاجة بيطرد
والكلام شغال على ودنه
بس بلاش و حياة والدك كلمة مثقفين أصلي باضرس خليها علماء متخصصين تطبيقيين مصلحين فنيين يين ايين
اخدتم بالكم اننا كلنا مش بنعرف نوصل عاوزين نقول ايه و كمان مش بنحاول بجهد نفهم التاني بيقول ايه؟الحوار بينا بقى صعب صعب قوي
و غالبا كلنا قصدنا تقريبا نفس المعاني مع اختلاف الشخصية متفائلة أو مندفعة أو متمهلة أو عملية أو غرقانة في النظريات و الكتب