وتاني، اللي عايز يزعل ينزل اسكندرية

تحديث:

شفتوا بقى جو بيقول ايه؟ والله ما كنت قريت البوست بتاعه وانا باكتب البوست بتاعي

كل واحد بيتصرف زي ماهو شايف نفسه، احنا محتاجين نشوف نفسنا احسن من كده بقى، متهيالي خلصنا اننا نشوف نفسنا صراصير

شوية نشوف نفسنا وردة، فلة، ياسمينا، ريحانة كدهون يعني

والتاني ح اقول الكلام اللي بيزعل الكل بس ح اقوله عشان خاطر ربنا، الحقيقة عشان خاطر نفسي قدام ربنا، واللي يزعل عنده بحر اسكندرية واسع ولو بحر اسكندرية ملوث يقدر يروح مرسى مطروح... او العلمين خليه ينفجر ويريحنا

البلد دي لو فضل كل واحد فيها مش بيفكر غير في نفسه

لو فضل المثقفين يتكلموا عن الادان الموحد، والمادة التانية من الدستور، وازمة الهوية، والماضوية والبظرميطية،

لو فضل رجال الاعمال يلموا فلوس ويطلعوها على برة وكل همهم يكسبوا وبس وما ينتجوش

لو فضلت الطبقة المتوسطة تتشعلق على كتاف الاغنيا وتغرق في طمعها وتشتغل في شركات مالتي ناشونال وتدخل عيالها انترناشونال ويوم ما تعمل مجتمع مدني تاخد من التمويل الانترناشونال وكل حياتها بقت ناشونال في ناشونال ومش بيفكروا غير في نفسهم ازاي يتشعلقوا عشان ما ينزلوش، ومش بيفكروا غير في ازاي يدافعوا عن نفسهم ويبرروا طمعهم وما يفتكروش من الصحابة غير عبد الرحمن بن عوف ومش فاكرين من عبد الرحمن ابن عوف غير انه كان معاه قافلة مش عارفين اولها من اخرها (وطبعا ده حلم حياتهم) ونسيوا انه اتبرع بيها كلها، ونسيوا اصلا انه ما جبهاش من منين ما كان، لدرجة انهم نسيوا سيدنا محمد نفسه

ولو فضلت الطبقة المتوسطة والمثقفين ما يجيبوش غير سيرة الانحدار الاخلاقي والتآكل القيمي والاسفاف الفني

لو فضل الاجانب يدخلوا فلوسهم هنا والمصريين يطلعوا فلوسهم برة

البلد دي في انتظار احتلال

مش امريكاني

اسرائيلي

ومش ح يحصل الانقلاب العسكري اللي كل الناس نايمة عليه

احنا مش زي ايام الملك.... احنا زي ايام الخديوي، وكل حاجة اترستقت واتظبطت والبلد كلها بقت انترناثونال يا ثامح مش ناقصها غير جحافل التتار

اللي جاية جاية، اديني باقول لكوا اهو

المثقفين عليهم دور يحطوا للبلد دي خطة نهضة ما تخرش المية، ويتعبوا نفسهم شوية، مش كل حاجة ينقلوها نقل مسطرة

محتاجين زي ما بيستفيدوا من خبرات اللي قبل كده يعرفوا مالها مصر؟ ايه اللي صابها؟ وينظّروا في حاجة مفيدة شوية بدل التنظير في الهبتولة

يحطوا لنا خطة سياسية واقتصادية وثقافية واجتماعية من نفسنا ومن تربتنا وفي نفس الوقت تحدثنا وتقببنا على وش الدنيا

ويرفعوا من روح الناس المعنوية ويدوهم امل

ما تبس بقى كلام عن انحدار اخلاق المصريين، مالهم المصريين؟ اللي يشتم في اخلاق المصريين يعرف انه اسوأهم اخلاقا، المنطق بيقول كده، ايه السب واللعن اللي علاولة ده؟ المصريين كويسين جدا

جدا، كتر خيرهم اللي زيهم كان زمانه ماشي ياكل لحم الناس ني في الشارع

ويعملوا لنا خطة ثقافية عالمية ترفعنا قدام العالم وترفع روحنا قدام نفسنا

يعرفونا امتى ننفتح على العالم بثقافتنا وامتى نحاجي على بلدنا ونحميها من اللي جاي عليها بحيث نبقى احنا متحكمين في الارسال والاستقبال لا نستخبى تحت الترابيزة ولا نفتح ايدينا و... على البحري

ورجال الاعمال غصب عن بوزهم يعملوا لنا اقتصاد وطني زي طلعت حرب واحسن منه كمان، دي الجاموسة اللي بتحلب لهم الماظ ودهب، لو وقعت ح يحلبوا مين؟

والطبقة المتوسطة غصب عن بوزها تاخد الافكار وتطبقها على المشاريع وتعمل عمل اهلي وطني براسمال وطني، وتبطل تسول بالانجليزي والفرنساوي

ولو فيه اتفاقيات بتعوقنا ربنا خلق لنا محامين وقضاة وناشطين، هم مش دول الطبقة المتوسطة برضه؟

يا كده يا نقعد نهبش من بعض وفي بعض ونعايب على اخلاق بعض عشان كل واحد مش عايز غير يفكر في نفسه

انا ماليش دعوة

انا باقول الكلمتين دول عشان اغسل ايدي من دم البلد دي

الا هل بلغت

اللهم فاشهد

كده لو مت الليلة دي ابقى ضميري مستريح

على الله بس ما ابقاش باغسل ايدي زي هيرودس انا كمان، البلد دي ضحيتنا كلنا

ودي الحاجة اللي ما اقدرش اغسل ايدي منها، مياه كل الانهار والمحيطات في العالم ما تغسلش ايدين الليدي ماكبث من دم البلد دي اللي قدامها عشر سنين بس، يارب اكون مت قبلها

كلنا الليدي ماكبث، الا من رحم ربي

ملحوظة: ماحدش يسألني عن اضراب ستة ابريل تاني ومش ح ارد على اي اسئلة بخصوصه