Friday 22 January 2010

انا متضايقة قوي من موضوع حظر النقاب

قوي يعني، متغاظة جدا.. ومش عارفة اعمل ايه وللا اقول ايه؟ بس متغاظة متغاظة، والموضوع اتعمل كده بلطجة، ونفسي اعرف ايه السر وراه، ايه اللي حصل مثلا؟ هل حصلت جريمة؟ لا، عصابة منقبات لسرقة البنوك؟ ابدا، وبعدين ايه موضوع الغش في الامتحانات ده؟ هل اتظبطت بنت منقبة بتغش قريب؟ مش على حد علمي
طب ايه؟ ده حتى النقاب مش منتشر ولا حاجة، ده واحد في المية بس وتلاتة وتمانين في المية محجبات حجاب عادي
ايه؟ هاه؟ ايه؟ حد يديني سبب للهبل ده غير موضوع الامن والغش في الامتحانات  والنبي، ما بقتش صغيرة على الكلام ده، انا باعرف كل المنقبات من غير ما يكشفوا وشهم ولا حاجة
فرنسا دفعت لهم فلوس؟ ممكن والله

11 comments:

شمس العصارى said...

ازيك نوارة
سواء موضوع النقاب او غيره من هجوم على سلوكيات المسلمين اعتقد ده لعدة اسباب
الساهلة و المفهومة و بطريقة مباشرة
ان معظم القيادات و صناع القرار حاليا تربية غربية يا اما درسوا بره يا اما عاشوا بره و لما رجعوا بيتنكروا لكل مظهر اسلامى
و كمان دى ورقة مهمة لتشويش على اى موضوع تانى مهم يعنى مثلا لو الاسلاميين حيبنبكوا على قرار سياسى زى الجدار او المشاكل الحالية يبقى بسرعة نلهى الناس فى حاجة منتشرة و يبقى التركيز راح من على المهم
ثم الطموح السياسى و المجد الشخصى للوزرا و سوزان
يعنى بعد كل موضوع سوزان بتاخد جايزة من بره من ايام مؤتمر السكان الاول 1993
و متنسيش الغرب و اليهود ليهم رجالتهم و دعاتهم هنا برضه
اخيرا محاولة اقتلال الجزور لكل ما هو اسلامى و تمييع الهوية
نلتقى بعد الاحكام القضائية لصالح المنقبات

Anonymous said...

ياريت يحظروا النقاب كمان في المستشفيات
يعني انا نفسي افهم
هي اللي داخله لجنة امتحانات دي هتخسر حاجة ولا هتخرج من ملة الاسلام لو كشفت وشها في بداية دخولها اللجنة يعني اول عشر دقايق وبعد كدا ممكن تنزل نقابها تاني زي ماهي عاوزه
او متنزلوش خالص لنهاية اللجنة

الدنيا مش هتتهد

ومش هتكفر
والناس مش هتاكلها

انا مع الحرية وحرية الفرد في اختيار اي شيء خاص به وخصوصا لبسه
لكن لو لبسه دا بيعوق سير النظام يبقى لا والف لا

يعني واحده منقبه تسوق عربيه ؟. طيب ازاي
واحده منقبه تدخل مستشفى
طيب ازاي
واحده منقبه تدخل بنك
طيب ازاي

ولو الامن قالها اكشفي وشك تقوله هاتلي واحده ست تتأكد مني وتشوف البطاقة

يعني يجيبوا ست بقا لكن مدخل بنك ولا مستشفى ولا امتحان ولا جامعه عشان خاطر المنقبات خايفين الامن ياكلهم ولا ياخد حته من مناخيرهم

ربنا يكرم الكل ويجازي الكل
النقاب ابتغاء للعفه واعتقد ان اغلب المنقبات ملتزمات وربنا يجازيهم كل خير
لكن في حاجات بصراحة مينفعش فيها نقاب نهائي

والا تقعد في البيت بكرامتها احسن

دا رأيي ببساطه وشكرا ليكي

Anonymous said...

عاوز اقولك حاجه كمان
انا خايف الناس تكون اصابتها عدوة كره اي حاجة تيجي من ناحية النظام
اي كانت
حلوة او وحشه
المهم انها فيها ريحة الحكومة تبقى مش تمام

انا مش بدافع عن النظام

يلعن .... يحرق .... يفرم ..... تي تيت تيتت يتتييتيتيت ام النظام والحكومة الف مره

لكن بحب افكر في الحاجة قبل ما احكم عليها

Wild at Heart said...

والله لو عرفتي قولي لي عشان أنا كمان هتجنن ورأيي إن السبب بسيط جداً وهو إن الناس يتشغلوا بالنقاب والقضايا الفقهية الفرعية في رأيي وينسوا إن الكلية عندنا مثلاً مفيهاش كمبيوتر واحد العيال تعرف تدخل منه على النت والكتب اللي في المكتبة ماتجددتش بقى لها ييجي 15 سنة والمحاضرة فيها مئات من الطلبة يبغمى عليهم في الحر والمعيد أول ما بيتعين بياخد 800 جنيه وإن ممكن جداً معيدة تكتشف حالة غش ورئيسة القسم تهزئها قدام الطلبة عشان يغشوا براحتهم.
كفاية ولا أكمل؟
وعلى العموم المفروض إن المحكمة الإدارية العليا لغت قرار الحظر خلاص...والمنقبات تحايلوا على الموقف بإنهم يلبسوا كمامات (أحييهن الصراحة) وطول عمر المنقبات كان بيمر عليهم موظفات في اللجنة تاخدها على جنب وتتأكد من هويتها من غير أي مشاكل...وبيني وبينك يعني اللي بيغشوا غالباً بيبقى بنات شيك ناكشين شعرهم عشان عينيهم وبقهم مايبانوش أو الولاد اللي عايزين يظبطوهم كده يعني.

مواطن مصري said...

الله يرحمك يا قاسم يا امين

مصر بترجع للخلف اشهد يا تاريخ في 2010

بنتكلم عن النقاب و ان ما يقابلة عري و فجور


حقاً نحن في زمن المسخ

انا مع منع النقاب في الجامعات

و بعدين الله الزمنا ب الحجاب

مش النقاب

ابو على said...

هيا الحكومه عايزانا نمشى ملط ف الشارع دا اللى هايعجب

lastcrazyboys said...

والله ما صعبـــان عليا غـــير الردود اللي في مدونتك

وانا عذرتــك لما كنتي بتقولي ..هذه المدونة ليست ديموقراطية

سيبــك من كل واحد حر في رأيه ..المشكلة ان انتي بتتكلمي في نقطة..وهم بيرغوا في حــوار تاني خااالص

يعني انتي ولا بتسألي عن الحكم الشرعي ولا بتاع ...وطالعلك ناس تقول ..وماله لما تكشف ..ما تكشف

النـــاس مش راضية تفهم ان القضيــة قضية حرية سخصيــة..وانا لو سألتيني عن رأيي الشخصي في المنقبــات هقولك
مبــالغة ..ونقدر نعتبرها تبع المبدأ المصري العريق " فوق نفحتــــك..نفـــحة"..ولكن اللي متفشي في البلد
انه الحرية الشخصية هي ما يتوافق مع
مزاج اهلي
!!!!!!!!
او اسماعيلي..او ترسانة مش قضيــة..المهم انه الشخص صاحب الشــأن آخــر من يخصه الموضوع برمته
حيث ان في رمّـــة تانية تدخلت في الموضوع
==========
المهم انا كنت هنسى انا جايلك ليه
عكننوني ..الله يهديـــهم
http://www.aljazeera.net/NR/exeres/E64FC308-C173-4895-8876-4CDB6830CA09.htm?wbc_purpose=Basic%2CBasic_Current

قوليلي رأيك ..ها ..أهو لا سحر ولا شعوذة
نهــدد ..ونتــوعـــد..ونحــذر

بقولك ايه مش عايزة رأي
انا هشتري الصيني بعد كده ..ولا تراجع ولا استسلام

Unknown said...

فى لجنة من لجان كفرالشيخ
واحد طلب من منقبة تكشف وجهها فرفضت قال لها هعملك محضر غش طبعا غير الشتايم من نوعية شيللى الزفت اللى على وشك و شد الورق من البنات و اكتر من طالبة جالها انهيار فى حين شباب بيغش و اخرين داخلين بسجاير عادى خالص
التأسى بزوجات النبى اصبح ردة و مسخ
صحيح حجة البليد مسح التختة بدل مايتكلموا فى التطوير العلمى و البحوث المبنية على الدليل ماسكين فى المنقبات
تقدر تقول لواحدة مسيحية اقلعى الصليب لأ طبعا لان دة رمز دينى
كل الناس حرة الا المنقبات
على العموم دى البداية و الدور اللى جاى على المحجبات اللى اصلا ممنوعات حاليا من اشغال كتيرة حتى لو كانوا الأكفأ
حسبى الله ونعم الوكيل

Unknown said...

المره دى من المرات القليله اللى مش بالع فيها نظرية المؤامره

بداية الكلام كان أن الأمن الجامعى وأمن المدينه الجامعيه مسك كذا واحد لابس نقاب وعايز يخش المدينه الجامعيه ولما حققوا معاه قال انه كان عايز يخش للجيرل فريند بتاعته جوه المدينه

أنا مع حظر النقاب وقت الأمتحانات طالما أن المشرفات نساء والباب مقفول فى اللجنه

Amal said...

بلا حريات بلا بطيخ !! معروف ان فرنسا من اشد البلدان عنصرية تجاه الاسلام تحت غطاء العلمانية .... طب طالما ناويين يحظروا النقاب في الاماكن العامة يا ريت كمان يحظروا على اليهود لبس الكوفيه الصغير بتاعتهم كمان في الاماكن العامة !!!
اكبر تجمع يهودي في اوروبا هو في فرنسا واليهود شبه مسيطرين على كل حاجة هنا فلازم ما نتوقع تكون فرنسا حنينة على المسلمين

justicentric said...

بيتهيألي كده إن الأزهريين الجدد لما بيشوفو واحدة بنقاب بيحسو ان ده تهديد لسلطتهم جاي من الخارج. مصر بتاعتهم طبعا وطنطاوي يعرف أكتر من المنقبات ومن اللي خلفوهم. ونعم الأخلاق.

حرب يعني ما بين أولياء الحكومة السعودية وأولياء الحكومة المصرية والمنقبات بأه هما اللي لاقو نفسهم في النص. هم الغالطانين. بيسمعو كلام شيوخ مش مصريين ليه؟

كل اللي بيحاول يخترع حجة عشان يغطي على كرهه للاختلاف أو الاحتشام أو للدين يروح يقرا شوية في المناظرات عن الموضوع ده في الغرب. المسلمين هناك رادين على كل اختراع.

لا ولسه فرنسا ماشية في مشروع منع النقاب بتاتا في الأماكن العامة. يعني لو قالو أخرجوهم من قريتكم إنهم أناس يتطهرون ححترمهم أكتر