Sunday 31 January 2010

طالبان

في ظل هذا الظرف الانساني والاجواء الحماسية اللي بثها زعيم الامة عيلاء موباراك لازم الواحد يسجل اعجابه وانبهاره بطالبان
اللهم صلي ع النبي، ما شاء الله لا قوة الا بالله، ربنا يحميهم، مديين الامريكان علقة ما اخدهاش متحرش في اتوبيس وغارسين ضوافرهم في لحم وش الامريكان وكرازاي: يهديكوا يرضيكوا.. ابدا، قاعدين على على الارض مربعين كده بالجلاليب والتونيك والشباشب وتحس انهم راكزين على صدر الامريكان وهاتك يا هبد وهربدة فيهم لما خلوهم ما يسووش تلاتة نكلة في سوق الكانتو وضحكوا عليهم اللي يسوا واللي ما يسواش والامريكان بيكابروا: شيلوه من فوقي لاموته.. طب نتفاهم طاه.. يتفاهموا مع مين؟ دول عالم فاقدة باينهم وقطر مالوش فرامل ويا عيني ماسكينهم: انت مش لابس الطاقية ليه؟ من كتر الضرب اللي نازل عليهم مسكوا في الايطاليين وقالوا لهم انتوا ليه مش بتضربوا زينا؟ اكيد بتدفعوا فلوس لطالبان عشان ما تضربكوش 
حاجة تصيب الانسان بالاندهاش فعلا
ما شاء الله، ربنا يزيدهم وينفخ في صورتهم ويأييدهم.. اديله ما تريحوش، انا عايزهم كده كل ما يلاقوا نفسهم فاضيين يخطفوا لهم عسكري امريكاني وما يموتهوش.. يلبسوه جيبة فوق الركبة وعليه الصديري اللي هم بيلبسوه فوق التونيك ده وصندل بوردة برتقاني ويخلوه يلف حوالين الجبل تلاتين مرة وهو بيقول: نحن غرابة عت عت، ويصوروا ويبعتوا لنا
مافيش حد قادر على الامريكان ولا بيفش غلنا منهم الا دول.. ربنا ينصرهم ويجبر خاطرهم زي ماهم جابرين بخاطر الغلابة اللي واخدين على قفاهم ومش عارفين يعملوا حاجة
وماحدش سائل فيهم ولا بيساعدهم ولا حتى بيشكرهم، والنكتة انهم هم نفسهم مش مهتمين يعرفوا راي اي حد فيهم ولا عايزين مساعدة من خلقة حد، وتبص في وشهم ولا حتى تحس انهم تعبانين، اللهم صلي ع النبي، اللهم صلي ع النبي، الله اكبر في عيني وعين اللي شافهم ولا صلاش ع النبي 
هو احنا لو خطفنا واحد منهم وحللناه جينيا وحاولنا نستنسخ منه هنا في مصر بدل الوكسة اللي احنا فيها دي، ح ينفع؟ وللا الراجل ح ييجي يقعد اسبوع وشوية وتلاقيه نازل بيشجع في ماتش حرس الحدود ومزارع دينا؟ 

10 comments:

lastcrazyboys said...

أهـــو انتي بمواضيعـــك دي بتقوليلهم : تعالوا "اقفشـــوني " ...انا مش فاهم ايه اللي جاب علاء لطالبان
لحــرس الحدود
ولا انتي عاجبك التونيك زي ما لاحظت في كلامك
===
لا ...بس بجــد المرة دي ..انا مش مستوعب ازاي انتي مستغربة ان الناس دول مش سائلين يشوفوا رد فعــل حد عاللي بيعملوه
يبقى كده انتي لسة ما فهمتيش حاجة عنهم - ولا مواخــذة - ..لانه من المعلوم "لمن يؤيد أو يعارض " الحركة ..ان الناس دي خلاااص ..باعت الدنيا
واشترت الآخـــرة ..بغض النظر عن اللي بيعملوه
واللي يزهد في حــاجة ..بيبقى من جوة مرتااااح
وساعة ما يحصل الكلام ده هنا ..اقدر اقولك ان محدش هيسأل لو مصر حتى لاعبت البرازيل في كأس العالم
بس نعمل ايه في " شوشو "... ابن الكلاب كل ماجي أقـــول طب مادي كورة ..والواحد يركز في حاجة مفيدة...
ما يفكرنيش من القرآن غير
" ولاتنس نصيبــك من الدنيــا"

مواطن مصري said...

نوارة انا عارف تعليقي مش هينزل بس قلت اجيبلك حاجة حلوة

شوفي الواد دة على اليو تيوب بيتكلم عن احمد ابو الغيط

http://www.youtube.com/watch?v=4kvvKk0omz0

قال اية بيقول ان احمد ابو الغيط عامل تجمع و دعى لتشكيل new world order

لسيططرة على القرارات العالمية


هو احمد ابو الغيط طلع ماسوني؟؟؟

Unknown said...

اي انسان بيحب ياخد دعم نفسي خصوصا لما يبقى بيضحي بحياته

wahat_alshohada said...

تمام يا نوارة
انا طول عمرى بحب طالبان و بأييدهم طبعا
ناس مجاهدة بتقاوم الاحتلال
لازم نحبهم
الله ينصرهم ويثبتهم
فاكرة ايفون ريدلى وحبها ليهم اللى انتقل لينا
بصراحة من اول ما كتبت عنهم
وعن اللى عملوه معاها من سنين و انا بحبهم وبحبها

lastcrazyboys said...

http://www.watan.com/news/53-2008-09-29-18-54-21/19458---------qq.html

أهم ردوا عليكي وعلى طـــالبـــان بتاعتك

وبعدين اييييه ..بيقولولك ..مييين فرنســا دي اللي بتقولي اننا خلاص بقينا زيهم

لأااااااا.."الحــاجر " حاجة تااانية

الخوجة said...

انا شخصيا متكيف اوى اوى اوى من البوست دة مساء الناس الرايقة اللى فاهمة كل حاجه معلهش
اهه لو يقرأوا البوست عشرين مرة هيفهموا

سامي said...

الله ينور عليكي
واحب اقلك ان دول بياخدوا دعم نفسى
بس من اللى بيضحوا بحياتهم عشانه سبحانه وتعالي

سامي said...

اطلالة العظيمة الرائعة صافيناز كاظم على برنامج مانشيت

http://www.youtube.com/watch?v=9sCtUxv8pBA&feature=related

شمس العصارى said...

للاسف الشديد ان هنا اغلب الناس لا تعرف شئ عن طالبان الا من خلال ما يقدمه الاعلام الحكومى الموجه
انا كنت زيهم لغاية ما سمعتها من واحد افغانى كان بيدرس فى الازهر
بعد شوية كلام فى اكتر من مرة
قلت : بس المشكلة فى حركة طالبان و الى بتعمله .
رد بنظرة غريبة جدا جدا جدا متذكرها الى الان و قال " شعب افغانستان كله طالبان " ....
هنا سكت انا و علمت ان ما نسمعه لا يوت للحقيقة بصلة و ادركت ان اذا كان الشعب كله طالبان فما يصيره و من يستطيع كسره
ـــــــــــــــــــــــــــــــ
الان بعض الكتاب حتى من الغربيين يقولون ان طالبان ليست تنظيم و لكن افكار و معتقدات و اهداف
و اعتقد انا هذا يفسر ما يحدذ هناك الان
8 سنين و اعتى القوى العالمية و كل انواع الاسلحة ولا تزال طالبان - شعب افغانستان - صامدة و فى كل انحاء افغانستان فى كابل و غيرها و يكفى ان حامد قارضاى لا يستطيع ان يخرج من حدود القصر الرئاسى فقط
انطلاقا من القاعدة الثابتة " ان الامم و الشعوب لا تباد " فستبقى طالبان و سيبقى الشعب الافغانى و طالما انه على الحق حتما سنتصر و ما نراه الان ما هو الا بوادر ذلك النصر
احب اضيف ان طبيعة افغانستان الجبلية القحلة و نشئتهم فى تلك البيئة اكسبتهم قوة و صلابة و عزم لا يوصفون
اضفى الى ذلك تطبيقهم للاسلام ككل فى حياتهم و فى حكمهم
هذا هو سرهم الذى لم يعد سرا على الاخرين
و احب اقلك ان تجربة كل شعب لا يمكن اخذها و تطبيقها على شعب و مكان اخر
فتجربة طالبان لا يمكن تكرارها كما ان تجربة حزب الله لا يمكن تكرارها و لا يمكن تكرار تجربة جبهة الانقاذ - حتى قبل الاقتتال الداخلى - كما لا يمكن تكرار التجربة الوهابية ّ.....
نلتقى بعد جبروت القوات الامريكية

احمد سعيد said...

انا بحب طالبان
وبحب القاعدة كمان

هييييييييييييييييييييه

هيييييييييييييييييييييييييه