Friday 8 January 2010

احمد عبد الفتاح في نجع حمادي

وبيقول ان الناس هناك قالت له ان الواد المسجل اللي نفذ العملية هو الذراع الايمن لنائب اسمه عبد الرحيم الغول وان الموضوع (ده كلام الناس مش كلام احمد) مالوش علاقة بالطفلة المغتصبة ولا حاجة، الموضوع اعقد من كده
ده اللي قاله الناس لاحمد ومش رأيه ولا حاجة
المهم هو لما يرجع ح يكتب بالتفصيل
انا ما بقتش عارفة حاجة خلاص، انا اللي عارفاه ان كل الناس زعلانة، حتى اللي بيقرفوا من اكل المسيحيين زعلانين
وطبعا "النغبة" قاعدة تنظر على تلاتين ام الناس، وعمالين يتوصلوا لنظريات عبقرية لها علاقة بان المشكلة في ان الناس اصلا طول عمرها بتكره المسيحيين لوجه الله، ويمكن تطلع المشكلة في ان ربنا خلق المسلمين اساسا، بس المرة دي الحمد لله ما وقعش في سكتي مسلم من بتوع: الاقباط صوتهم علي قوي ومحتاجين يتسكوا على دماغهم، ادي اخرة الاستقواء بالخارج، ماهم استفزازيين..الخ. الحمد لله مخروسين، يمكن عشان الحادثة متوحشة قوي بزيادة، وغالبا محرجين من نفسهم، المرة دي اي حد ماشي في الشارع ح يديهم بالجزمة لو قالوا البقين الحمضانين بتوع كل مرة، الموقف محرج زي موقف الجدار المحرج كده... فجر وغدر بزيادة
انا عمالة اقلبها يمين وشمال، الكلام اللي احمد عبد الفتاح بيقوله ما يطمنش، يكونوا مدبرينها عشان تعمل رد فعل عكسي ويلموا موضوع الطائفية ده وانس اند فور اول؟ ماهو لما يعملوا حادثة بالتوحش ده، وهم عارفين المسيحيين غلابة يعني اخرهم ح يعيطوا، المسلمين يحسوا ان الموضوع خرج من ايدهم واخد شكل متوحش ويبتدوا يلايموها مثلا؟ اصل الوفد من كام يوم كده قالت ان اقباط المهجر عملاء لاسرائيل وبتقول ان هاآرتس قالت كده. يكون مثلا قبل ما جمال ييجي بيعملوا حادثة تهز الناس عشان الناس كلها تحس انها في خطر وتبتدي تتكاتف وموضوع مسلم ومسيحي ده يتقفل؟ ومش بعيد يلبسوها لواحد من "اعداء الوطن" والمسلمين هبل والمسيحيين اهبل منهم وبالسلامة كده
والله ما عارفة انا بايني باخرف وللا ايه؟ الصدمة تعمل اكتر من كده، بس انا ملاحظة انهم بيقفلوا ملفات بقالهم شوية، ملف الانفاق، ملف المعارضة (القفا اللي الفريدم هاوس اداه للعيال بتوع المعارضة وسلم اساميهم للجرايد المصرية وفضحهم) ملف التزامات مصر تجاه فلسطين، دلوقت الملف الطائفي، كل الحاجات الصداع بتتقفل، سواء الشباشب اللي كانت رافعاها امريكا للنظام، او الدبابيس اللي كان محوشها النظام لامريكا يشكها بيها من ان لاخر، الله اعلم، يمكن، ويمكن اكون باهطرس، انا اصلا حاسة ان دماغي سايحة على بعضها امبارح باكتب على التويتر عايزة اكتب طائرات اسرائيلية تقصف الانفاق على الحدود المصرية، رحت كتبت طائرات مصرية تقصف الانفاق.. وعنها وعاديك بقى: ايه يا نوارة؟ طائرات مصرية؟
لا يا جماعة دي غلطت، طائرات مصرية ايه؟ هو فيه طيارة مصرية تقدر تعدي من فوق الحدود؟
وانا عمالة ابعت في تويتات: انا اسفة غلطت، ودول ابدا مش سامعني
يا عم طائرات مصرية ايه يا عم، هم عسكريين عمي اللي على الحدود اكتر من كده نتنتش
لحد ما مهندس حر قال لهم: خلاص يا شباب زلة لسان حصل خير مافيش داعي للتقطيم عارفين اننا ما نقدرش نطير طيارة ورق فوق حدودنا
هو انا ايه اللي خلاني احكي الحكاية دي؟ اه.. اني باخرف اليومين دول، استحملوني، بس وارد يعني، وارد ان قبل ما يجيبوا جمال بيبيضوا البيت ويغيروا السيراميك وزي ما كرهوا المصريين في الجزائريين والفلسطينيين وزي ماهم اللي قبل كده كرهوا المسلمين والمسيحيين في بعض، اهم يصالحوهم تاني بحادث دامي يشعر المسلمين بالخجل ويخليهم عايزين يصالحوا المسيحيين، والمسيحيين يحسوا بالظلم ويقبلوا اي طبطبة على كتفهم، عارف اللي يضرب ابنه يضرب ابنه يضرب ابنه لحد ما راس ابنه تتفتح؟ فجأتن كده يروح واخد ابنه في حضنه وابنه يقعد يعيط وخلاص يتصالحوا
خلااااااااااااااااااص قلت باهطرس بس اللي يعمل كدهو.. يعمل غيرها
اااااااااه يا قلبي... طب الناس الغلابة ذنبهم ايه يارب في ده كله؟
"يا عدرا حوشي يا عدرا.. فينك يا عدرا"

على الله يطلع لي واحد بروتستانت يقول لي ده شرك.. عاملين زي السلفية راخرين
---- 
الا صحيح واحدة صاحبتي باقول لها الشتا مش عايز ييجي قالت لي: "ربنا بيحبنا لاسباب مجهولة بالنسبة لي، لان فيروس الانفلوانزا بيبقى انشط في البرد واحنا بتبقى مناعتنا اقل، يعني لو الجو برد ح تلاقي مصر كلها عندها انفلوانزا خنازير، لا وعمالين يقولوا للمصريين اغسلوا ايديكوا، ما بيركبوش مواصلات دول؟ هم بيستحموا عشان يغسلوا ايديهم؟ هي رحمة من ربنا وما تسألنيش ليه؟ هو ادرى مني ومنك"
على فكرة صاحبتي دي بقت تكلم القطط والكلاب من كتر ماهي مش عارفة تتعامل مع البني ادمين

 

12 comments:

sal said...

انا بقالى كثير بكلم القطط والكلاب والحمير والحيطان ...هى دى عيبه وانا مش واخد بالى ....استر يارب

Anonymous said...

القفا اللي الفريدم هاوس اداه للعيال بتوع المعارضة وسلم اساميهم للجرايد المصرية وفضحهم

تعرفي يا نوارة تجيبي لينك لحد ناشر الأسماء دي..؟
عايز اطمّن على حبايب زمان :D :D

الخوجة said...

اكثر ماعجبنى يانوارة الكل نهاية البوست واحد بيسأل ليه عيال الآكابر بس اللى بيجى ليها بتاع الخنازير وعيال الشعب مافيش قالوا لآنهم بيأكلوا من الزبالة وقالعين بناطيلهم طول النهار يعنى عندهم مناعة طبيعى ومافيش حاجه اسمها دفا الكلام ده مايعرفهوش علشان مافيش فلوس يشتروا مضاد حيوى وبعيد عنك وعن السامعين مافيش هنا مستشفيات زى عندكم وعلاج التأمين بالبق وبالطابور هى الناس اللى فى مصر دى مابتصدقناش لييه
مش عارف
تخيلى ان فيه حضانة ومدرسة ابتدائى ببركة السبع مصدر الشرب طرمبة على عمق المجارى والمساكن الشعبية يعنى مزروعات بمياة المحارى علشان كده مناعة طبيعى
الجماعه بتوع النظام والقوانين مفروض يروحوا الصحرا هما وحبايبهم ويتركونا احنا فى حالنا من رابع المستحيلات اننا هنسمع كلامهم او نصدقهم
كانوا صادقيين امتى دول مابختروش الا الناس اللى بنكرهها
وللاسف كلامك تانى صح
جاىىىىىىىىى
No To Swine Flu Vaccine - لا لمصل انفلونزا الخنازير

هنا بقى اخر فيديو امبارح لجدار العار
Israel’s Iron Kipa

سامي said...

طب عبد الرحيم الغول دا عضو وطنى فى مجلس الشعب من خمستلاف سنة تقريبا وكان رئيس لجنة الشباب فيه ولما حصل اشراف قضائي على الانتخابات سقط وبعدين رجع تانى وكمان رئيس مجلس ادارة جمعية مش عارف ايه خاصة خاصة بزراعة القصب وانتاج السكر وبتاع ويملك الاف الافدنة الزراعية حاجة كدا زى كمال الشاذلي نسخة صعيدية ماله ومال النصارى والمجازر والحاجات دي

كلاكيت تانى وتانى said...

الناس فالشارع بقت حالتها صعبة كل ما تتكلمى مع حد ميقدرش يتحكم فنفسة خالص الناس بقى عندها رغبة 24 فى 24 للخناق والحقد والصوت العالى بقى اسهل من الصوت الهادئ
انا بقيت اكلم الاطفال بحس انهم اسهل وابسط عشان دماغى متولعش
على اى حال الاحداث اللى بتمر بيها مصر الايام دى تدعو للأسف ومؤشر قوى يانوارة ان زمام الأمور بدأ يفلت من الحكومة ولناس عاوزاكى تساعدينى توصلينى بأى حد بيعمل بانرات عاوزة اعمل بانر للحملة بتاعتى دى يمكن نقدر نغير بيها شئ او حتى نزرع امل فقلب طفلة ماشية فالشارع مبتسمعش الا المهاترات ومش قادرة تشوف الا ورق المدرسة المهترئ والمستقبل المظلم
فكرة بسيطة تراودنى منذ زمن وحديث نبوى يملأ عقلى وقلبى ولكننى لا املك القدرة على تنفيذة ولذا لجأت اليكم أصدقائى لمساعدتى الفكرة ببساطة هى أنشاء سلسلة مكتبات للفتيات فى جميع قرى مصر فنحن هنا على الفيس كوكبة من جميع المحافظات والبلدان وقد نستطيع جميعا تحقيق هذا الحلم البسيط الذى احلم به فمنا من يعيش فى القاهرة او الاسكندرية او عواصم المحافظات ولكننا جميعنا من قرى مصريه نشأنا بها فلماذا لا نحاول جميعا مساعدة بعضنا البعض فى انشاء مكتبة مصغرة فى كل قرية ترعرعنا فيها ويمكننا تكوين مؤسسه أو جمعية يكون هدفها نشر الثقافة وانشاء مكتبات او لنكون فريق عمل يتلقى تبرعات الكتب من جميع من على الفيس اما ان ترسل لنا بالبريد او نتلقاها يدويا ونقوم بحصر القرى التى سوف نبدأ مشروعنا بها ونسافر اليها ونحاول بمعاونة أهلها والقاطنين فيها توفير مكان ليكون مكتبة لفتيات القرية ويمكن بمعاونة بعض القاطنين فيها عمل نادى قروى للفتيات لنشر الوعى لديهن وتنمية حب العلم والثقافة لديهم ......... أنها فكرة بسيطة من حديث الرسول الكريم ( ص) اذا مات ابن أدم أنقطع عملة الا من ثلاث صدقة جارية وولد صالح وعلم ينتفع به ...........
فتياتنا يحتجن الى كثير من الثقافة والعلم والاحتكاك والمعرفة معرفة حقوقهن وواجباتهن معرفة العالم من حولهن معرفة كيف يمكنهن انشاء اسرة وكيف يمكنهن التغلب على معوقات الحياة يحتجن الى ثقافة وعلم لا يحصلن علية بالطريقة المثلى داخل مجتمع القرية المغلق يحتجن الينا نحن بتجاربنا وافكارنا وقراءاتنا ......
فساعدونى كى نجعل لأنفسنا خيرا من حديث رسولنا الكريم ويظل لدينا ولدى اجيال من بعدنا علم ننفع به غيرنا فخيركم من علم العلم وعلمة أنتظر أقتراحاتكم ومساعدتكم وأرغب أن تكون اولى المكتبات المشأة فى قريتى التى اعيش فيها الأن على أن أوفر انا مكان لأنشاء مكتبة ونادى مصغر للفتيات ثم نبدأ فى وضع خطة لتنفيذ الفكرة فى باقى محافظات مصر وقراها ..........
تحياتى وحبى

مواطن مصري said...

ربنا يستر و يحفظ مصر ببركة القرأن و الأنجيل

مصر في رباط الي يوم الدين

و مبارك شعبي مصر

احمد سعيد said...

النظام مش عاوز يقفل ملف الطائفيه يانوارة

بل بالعكس النظام عاوز يعمق الازمه خصوصا الفترة اللى جايه دى

وبالتحديد لغايه ما جيمى يمسك

اظن فهمتى قصدى


--------------

بالنسبه للموضوع التانى دة

انا بكلم السلاحف دلوقت

عندى جوز بقعد اتكلم معاهم طول اليوم

وفيه ضفدع كمان اتصاحبت عليه وباخد كورسات فى اللغه الضفاديعى دلوقت

ياحلولى

dr.lecter said...

ايه يعني اللي حصل

هانت خلاص

والله العظيم هانت ده كله العد التنازلي لانهيار النظام وبكره تشوفي اذا كنت صح ولا لا

النظام المصايب بتنزل ترف عليه وهو مش ملاحق

عاوزين نتستحمل بعض بس حبتين

بهيج الشرير said...

والنبي ياأبلتي أنا لا أباتكلم مع الكلاب أو القطط ولا حتى الكتاكيت لأني ماأعرفش اللغة الكتاكيتي، وعلى فكرة هما اللي إبتدوا يكلموني الأول

احمد سعيد said...

بهيج

لا عندكوا هناك انتوا بتكلموا نفسكوا اساسا

wahat_alshohada said...

والله و بقينا على رأس الاخبار كل يوم
دخلت موقع من شوية وجدت مصر محتلة خبرين فى الصدارة - اخبار زبالة طبعا
مبارك وصلنا لمزبلة التاريخ
فاضل ايه تانى - عايز ايه تانى مننا الراجل دة -
روح بقى يا اخى - انصرف

بهيج الشرير said...

أحمد سعيد

طيب أنا أرضى ذمتك! عايز حد يشوف الحريم اللي هنا ويشرب تكيلة وحشيش مكسيكاني ومايكلمش نفسه؟ دا حتى يبقى بطر، وأما بنعمة ربك فحدث