Saturday 9 January 2010

يا جالاوي.. انت لقيط لقيط فاهم يعني ايه لقيط؟

بعد بيان وزارة الخارجية انا مستنية تعليق مصطفى عبده على جالاوي اللقيط
الراجل قال مش داخل مصر، قوم وزارة الخارجية بجلالة قدرها تطلع بيان تشتم فيه جالاوي وتقول له اننننننت مش ابنيييييي جوردون براون بس هو اللي ابنيييييي انت لقيط لقيط فاهم يعني ايه لقيط؟ انت شخص غير مرغوب فيك، سم كده، يا بايخ، يا رذل، يا تلم، اللللللللل، مين قالك تعدي من حدودنا تشغلنا وتقل راحتنا؟ يا تشوف لك حل في حكايتنا يا تعزل وتسيب حتتنا، ده صخص ياناس، فرد، مواطن يعني من مواطنين العالم
---------
الا العاشرة مساء ما عملتش حلقة خاصة وكسرت الاجازة ليه زي ما عملوا في احداث الجزائر؟ السبعة اللي ماتوا والناس اللي اتنكدت في عيدها ما يشبهوش تي شيرت محمد فؤاد والبنطلون اللي اتلقع لفردوس عبد الحميد؟ وللا لازم هالة صدقي وهاني شنودة يبقوا من ضمن القتلى عشان يعملوا حلقة خاصة؟
-------
مقال ابراهيم عيسى حلو قوي هنا لدرجة اني سبت تعليق مش عارفة ح ينشروه وللا لا، وانا مش متعودة اسيب تعليقات عند حد ناهيك عن الجرايد
بس هو قال كلمة حكمة، النظام ده مش بس مش كفء، ده حتى مش جدير بانه يحكم مصر، هزأنا، مش مقامنا خالص ولا قيمتنا، مرمطة يعني وبهدلة، ده مش نظام ده سب دين ده، تفة حد تفها على وشنا، ست شرشوحة وحد سلطها على راجل محترم تمرمطه، عيل وحد سلطه على هانم يهزأها
كنا ناقصين احنا، الفاتيكان بتهزأنا طبعا، طب احنا نروح فين دلوقت حاليا؟ نروح فين؟ كل ما نقول العالم كله بيهزأنا قوم النظام ده يعمل عملة اسود من اللي قبلها عشان نكتشف ان لسه فيه في العالم ناس كانوا ساكتين عننا وخلاص بقوا مش قادرين يمسكوا احصابهم
والموضوع مش عايز يتلم ولا كأنه غارات اسرائيل على غزة
احمد عبد الفتاح بيقول لي المسيحيين نزلوا يتظاهروا ضد ارادة الكنيسة، والمسلمين نزلوا يضربوا في الصحفيين (ما تفهمش ايه اللي طققها في دماغهم ما يضربوش المسيحيين كالعادة وطلع في دماغهم يضربوا الصحفيين) والامن بيضرب في الكل، على رأي امي، زي خناقات افلام انور وجدي، وفي الاخر بقى زينات صدقي ح تزغرد؟
والاوشاعات بقى، الاوشاعات مالية الدنيا، واليوم الساقع قاعدة تقول: انباء عن.. انباء عن... مافيش حد راح يغطي؟ كله امباء امباء امباء؟ مافيش غير احمد عبد الفتاح وباكينام ناصر بس هم اللي راحوا بنفسهم؟ اخر حاجة امباء عن مسيحي قتل تلاتة مسلمين، خلاص، فاضل لهم اربعة تانيين ونبقى خالصين وما يوجعوش دماغنا بقى، بس باكينام بتقول انها ما سمعتش عندها في نجع حمادي كلام يؤكد ده
يعني اللي ماتوا دول لو كانوا لعيبة كورة وللا طارق الدسوقي واحمد عبد الوارث وبسام رجب اللي راحوا ماتش السودان كان زمان الدنيا كلها عندهم

---------
الا واحد مسيحي، بس متدين بقى مش زنديق زي مينا، قال لي ان ظهور العدرا بالشكل المتكرر ده ومن غير ما تتكلم ولا تقول هي جات ليه دليل على تحذير مش بشارة.. قال وبيقولوا ظهرت في نجع حمادي امبارح.. طب كفاية تحذيرات يا ام النور والنبي، حلفتك بحبيبك النبي كفاية، ماهو يا تقولي جاية تحذري من ايه يا اما كفاية بقى
الجزائريين دعوا علينا وللا ايه... هم الجزائريين هم.. انا كنت عارفة، هم قبل كده الغزاوية وحزب الله دعوا وبعدين الجزائريين...عشان فضحناهم وخلينا اللي ما يشتري يتفرج عليهم، قالوا لنا روحوا الهي تتفضحوا شرق وغرب يا بعدا
وبعدين المسيحيين ح يدعوا علينا، ناقص مين ما دعاش علينااااا ناقص مين ياربيييي ناقص مييييين؟ اه... اثيوبيا.. اثيوبيا اللي قررنا فجأتن لسوء حظها اننا نعمل معاها علاقات، نهارها اسود، اساسا هي حد دعى عليها عشان يسلطنا عليها، وبعدين هي ح تدعي علينا هي كمان، يبقى ناقص مييين، ناااقص مييين يا سيديييي، كده عندك سنة وشيعة ومسيحيين..امممم لسه البوذيين، والهندوس، لا انا الاداء ده مش عاجبني، نظام مبارك مكسل قوي، شدوا حيلكوا شوية عايزين نلحق نتسخط ورق تواليت قبل ما القيامة تقوم

بس الحمد لله ربنا مونسنا والله، ماليزيا المسلمين والمسيحيين بيتخانقوا مع بعض على اسم "الله".. اي والله، الله كلمة عربي زي ما علمونا في المدارس، وهم بيتكلموا ماليزي، ايه اللي يخلي المسلمين والمسيحيين الماليزيين يقولوا الله على ربنا مع ان اكيد فيه ربنا بالماليزي؟ ما تعرفش، المهم ان فيه ناس مجانين غيرنا في العالم ده والحمد لله، عشان ما نحسش بالوحدة في المصحة العقلية اللي احنا قاعدين فيها دي 

10 comments:

أبو أمير said...

بدون الدخول في تفاصيل
بما إنك مؤمنة بالقرآن فلا يجب عليك استعمال لفظ "أم النور" ده
لأن إنتي عارفة معناه إيه
ستنا مريم لها أسماء كثيرة جدا ممكن تستعمليها
العذراء، مريم، الصديقة، أم المسيح

Unknown said...

الحكومات اللي صحت فجأة على حقوق الإنسان دي والحرية الدينية دي معلش يعني. العبوا غيرها. هم يعني مش شايفين حقوق كل المصريين بيطلع ميتينها التلاتين سنة اللي فاتو ولا هو النظام بتاعنا كا حيعرف يقعد على تلها من غير مساعدتهم؟

وكله كوم والباشا رئيس وزراء كندا اللي بيدينا درس في التسامح ده كوم. ده بأه صهيوني أكتر من الصهاينة. الأول قطع الدعم عن الكنديين المسلمين والعرب عشان انتقدوا إسرائيل أيام حرب غزة وقالك دول معادين للسامية. دلوقتي قطع الدعم عن الكنايس الكندية عشان عايزين يقاطعوا المستوطنات وقالك برده معادين للسامية. كل الكنايس. والمفروض ان الباشا مسيحي. يعني هو شخصيا مضطهد المسيحيين في بلده وما صدق سمع عن اللي حصل قالك اعمل عليهم فط

بهيج الشرير said...

على فكرة ياأبلتي في بلد لسه ماشتمتناش، والبلد دي إسمها سورينام، بس ناويين يطلعوا ميتين أبونا بعد مايغيروا إسمهم ويبقى سوريصاحي

Anonymous said...

الحين جون جالوي بقى مش بريطاني واحد النبلا البريطان شي مو غريب على من انكر وجود الجدار الفولاذي وقد تمتد المبالغة فيهم الي انكار وجود غزة وسرائيل وجون جالوي .

الحاجة اللي مش عارفينة جون ورفاقة اهم اتو مخدوعين في تاريخ مصر بيضنوا انها مصر السابقة مصر التاريخ والعروبة السابقة طبعاً.
هم لو كان بيعرفوا ان مصر ما عندهاش سيادة صدقيني هم ما كان راج يجو لمصر لن الحكومة الصرية
بتفتح المعبر بتلفون اسرائيلي وبتقفلة بتلفون اسرائيلي
ابو الغيظ لو شرح لنبيل جون ورفاقة

انهم فعل ما يستطيعون فعلة انهم كلمو اسرائيل وقالو لهم دول ناس غلابة وعايزين ندخلهم شوية مساعدات
وسرائيل مرمططنا ونحن مرمطناكم
و جوردن براون
عارف ووباما عارف
ما فية سيادة مصرية مع حدودها مع غزة خالص مثلها مثل اي وزير عربي يجي بتلفون ويروح بتلفون ومثلها مثل اي حكومة عربية اخرا ..كان قدرو جهود الحكومة المصرية ورجع الي اهلة

واضح من كلام جالوي مع الجزيرة الجليزية بيتكلم عن شعب مصر العظيم عن شعب جمال عبدالناصر واضح انة انخدع بيفتكر ان الحكومة مصر هي حكومة مصر السابق.

Anonymous said...

على فكره اطلقت اسم جون لـ جورج جالوي

لحبي الكبير لـ جورج دبليو بوش


و لـ يختلف جالوي الانسان النبيل عن المكروه بوش

مواطن مصري said...

انا اساسا جورج بلاوي دة مش طايقة

و كان من الاول المفروض يتمنع الدخول من مصر

دة نصاب زي لورانس العرب

احمد سعيد said...

ياسادة
احنا داخلين على دراما عاليه جدا

كله يشد الاحزمه من دلوقت

2010
2011

هيحصل فيهم ما لا يتخيله عقل

عمار يامصر

khairy said...

جالاوي ده لا يدخولنا بيت ولا يخطيلنا عتنبه تاني ابدا وبعدين هو من الاول كده احنا مبنحبوش هو الحب يعني بالعافيه ده حتي سيادة السفير اللواء حسام زكي مكانش عايز ينطق اسمه من كتر ماهو كارهه وكمان جالاوي ده الخارجيه بتاعتنا بعد مطأست وسألت عليه لقت ان جوز بنت عمت جدته يبقي بلفور وهنا اتضح الملعوب وانه جاي ونيته وحشه ولولا ان احنا قلبنا طيب مكانش عدي ده غيره كان بيلف راس الرجاء الصالح واحنا مكناش بنوافق وبعدين هما بيعملوا كده الخارجيه بيعملوا كده عشان مصلحتنا انتي اللي مش فاهمه وقال ايه يقولك سور وجدار فولازي وكلام فارغ والحقد بتاع الناس مبدئيا زي مقال سيادة السفير اللواء هو مش جدار وعداه العيب لان الجدار بيبقي فوق الارض مش تحتها وبكده نقدر نقول عليه انشاءات هندسيه لانهم جابوا مهندسين يعملوه مش مقاول رماله شكارتين اسمنت وخلاص لا ده متهندس اشي خيال يعني وبعدين ايه بقي الجاي من بعيد ميشوفوش لكن اللي يقرب كده خير اللهم اجعله خير يحس بيه ويلاقي كده قلبه مهفهف فيعرف ان هنا في انشاء متهندس

ملحوظه
دلوقتي مفروض ان في جنديين ماتوا واحد علي الحدود والتاني في قنا بتاع قنا دلا اتجاب سيرته ولا اسمه ولا اي حاجه عنه بس جندي مات لا اول ولا اخر اللي بيموتوا لكن بتاع الحدود عرفنا اسمه وسنه وعنوانه وصورته وحياته ومحطوط علي المواقع عشان يعزوا فيه اللي هو الخارجيه شويه هتكتب تحته ده اللي حماس موتوه ادي اللي انتوا بتدافعوا عنهم لكن عمرك عرفتي اسم وشوفتي شكل جندي واحد من اللي اسرائيل موتتهم بتوع اسرائيل مبيتجابش سيرتهم بس بيتقال عليهم جنود بيلعبوا في نفسويت الناس الكفره

masrawy ala tool said...

أنتى نسيتى دعوات الخنازير اللى قتلناهم وعذبناهم بكل قسوه كأنهم مش من مخاليق ربنا؟؟.. الجديد بقى أن الحكومه الذكيه بتدارى فشلها فى الاتفاق مع قناه الجزيره الرياضيه فى نقل المباريات بأن القناه... القناه؟؟ واخدين بالكم؟ بتحارب مصر وشعبهاوكأن قناه الجزيؤه لما أشترت ال أيه أر تى مادفعتش مليارات ومفروض انها تدينا الماتشات ببلاش .. نع أن الجزائر أشترت الماتشات بنفس المبلغ.ياعنى ياربى أحنا خايبيين فى كل حاجه حتى البيع والشرا.. نبيعلهم الغاز بأرخص سعر ونصوت نروح نستورد غاز.. نأجر النايل سات بأرقام هزيله ونرجع نشترى الماتشات بأرقام فلكيه وندارى فشلنا بكل بساطه فى أن الناس دى بتكرهنا .. والشعب بيصدق وبيسخن والمشكله ان اللى بيسخنهم أفراد موظفين فشله..زى الشيخ ده بتاع أتحاد الأذاعه والتلفزيون وزى رئيس أتحاد الكره يوم صفر المونديال وقال ان الفيفا وبلاتر مرتشين ويوم فشل فاروق حسنى وقال ان اليونسكو مرتشين.. وأى هبل فى حكومه أرمى ورا ضهرك..

بهيج الشرير said...

والنبي ياأبلتي أنا عندي سؤال! ليه الواد أبوالعلوء سفاح الأمازيغ وأخوه إبن عرس مايعملوش حملة زي بتاعة أم درمان كده، ويطلعواعلى نجع حمادي ويعتذروا للي حصل للأقباط في عيدهم؟ وبعدين يطلع يشحطف في التليفزيون بعد كده مع الواد المذيع الأقرع اللي راسه شبه طيظ العيل، ورجاءا مايخدوش معاهم الولية فردوس بنت الحاج عبحميد لأن زي ماإحنا عارفين الصعايدة مشهورين بإيه لو حد قلع لها اللباس، بالإضافة طبعا أن دي منطقة زراعة القصب