Saturday 30 January 2010

للمهتمين بالماتش.. للاسف، غالبا ماتش غانا طار خلاص

تحديث:
ميدو اخد سكرين شوت للخبر بتاع العربية في حال ما العربية شالت الخبر، وهو متوقع انها تعمل كده، ليه؟ لان الخبر ده مش موجود في اي مكان صحرا ان كان او بستان الا على العربية، ولا حتى على مواقع الكورة بالعربي والانجليزي والفرنساوي مافيش
يعني قناة العبرية دي مش اول مرة في حياتها تضرب اخبار وتسرق فيديوهات من الجزيرة، وبعدين انا قدام الجزيرة اهو ومافيش اي اثر للخبر ده
ان شاء الله ح نعمل لها فضيحة محترمة على بكرة كده وللا بعده
بس انا برضه مش حاسة ان دخلت جمال وعيلاء على البطولة ح تعدي بخير

تحديث:
العببببب يا معلللللللللللللللللللللب، بشاير سفر جمال وعيلاء
الحكم بتاع ماتش مصر والجزائر ح يتوقف، دول لسه في الطيارة ياربي، امال لما يوصلوا... يا دهوتيييييييييييييييييييييييي
انا سمعت ان عيلاء بيشجع الزمالك وتهربت من الحقيقة دي... لو سمحت يا كابتن، الاهلي محتاجك، عاطف عاطف فيه مكان في الاهلي، سيبنا شوية الله لا يسيئك


تحديث:
بالنوسبة لتوقعات الماتش (انا عادة باتوقع نتائج الماتشات وبتصيب زي قلب الام) بس المرة دي مش عارفة اتوقع، البنورة السحرية مغبشة عشان علاء دخل فيها وعفرها
الماتش دلوقت بين ايادي رب كريم
الخوف بقى ان يكون المشجعين الجزائريين لسه موجودين ما سافروش، وهم غالبا ما سافروش لسه، لو اتغلبنا من غانا ح يرجعوا يقولوا لنا المشجعين الجزائريين كانوا لابدين لنا في الدرا وضربونا عشان نتلهي عن هزيمة الماتش زي المرة اللي فاتت
عموما، انا عشان اشبع تعطشي الكروي قاعدة اتابع ماتش مابين فريقين اسمهم الشرطة والجيش لبلد عربي مش عارفة هو ايه؟ وماتش ايه، فاشل فاشل فااااااشل، العيال بيتكعبلوا في ركبهم
:((
منك لله يا علاء
---------
انا ما اعرفش فردوس رايحة وللا لا، بس يمكن بسام رجب واحمد عبد الوارث ح يروحوا تاني، ولو ما راحوش
دلوقت في عاملين في منتهى الخطورة بيهددوا ماتش بكرة
الاول: ان المنتخب المصري مش خايف وواخد ثقة في نفسه، وهو عادة ما بيلعبش كويس غير لما بيبقى خايف
التاني والاهم والاخطر: ان علاء وجمال رايحين ومعاهم مشجعين
ليه كده؟ ليه؟ ده انا الشرانية اللي بقيت اكره الكورة من التأثير السلبي اللي عاملاه على الناس ما يهونش عليا انكد عليهم للدرجة دي، اخري لما يفرحوا بالفوز اتلوي واخد لي جنب، لكن ليه الاذية؟ ليه؟ في النهاية دي ناس غلابة، واللي حاصل لهم مش بايديهم، قدر ومكتوب
لا حول ولا قوة الا بالله
انا لله وانا اليه راجعون، الانسان مها كان بني ادم برضه وعنده قلب، ذنبها ايه الناس دي؟ وانا... انا ذنبي ايه؟ انا كنت باحب الكورة زمان، نفسي اتفرج على ماتش واحد بمزاج يا ناااااااااااااااااااااس
ليه لازم يحطوا لي دبانة في كوباية القهوة، ده ايه قلة المزاج دي؟ طب ماتش غانا ده انا كنت ناوية اشجع فيه، يعني فوتوا مني ماتش الجزائر وما شجعتش، كمان ح يفوتوا مني الماتش ده؟
دلوقت حسن شحاتة قدامه معركتين، معركة انه يكربج المنتخب ويخوفه عشان يلعب ماتش كويس، ودي سهلة، الجيل ده بيسمع الكلام زي عساكر الامن المركزي
والمعركة التانية مع النحس
ودي بقى في ايد ربنا... بس المهم استعدوا نفسيا لاي حاجة بقى

18 comments:

Abdelrahman said...

معلش لسه عندك فرصة تشجعى الجزائر قدام نيجيريا النهاردة!
ولو على جوز الخيل اطمنى، غالبا مش هتشوفيهم علشان المخرج خواجة ملهوش فى الحركات بتاعتنا :)

Unknown said...

ممكن يكون ده ذنب فردوس عشان كلنا جينا عليها

اهي الست مش رايحة واحنا ح نتغلب انتقاما منا عشان اللي عملناه فيها

وانا مش ح اشجع

مافيش امل غير ان فريق غانا يبقى مكسح والحكم مجنون

شمس العصارى said...

يادى النيلة
الماتش راح بالتاكيد
و الله دول وشهم فقرى
و الله هما الى هزمونا فى ام درمان علشان ربنا مش راضى عن الى بيحصل
انا قلت قبل كده المنتخب لما بيلعب للناس و الجماهير بيكسب لكن لما بيلعب لمبارك و عياله بيخسر ده اكيد
يلا مش بوشوشهم الفقرية دى اجلوا حلم المونديال الى 2014 خلاص يبقى ناجل الفوز بكأس الامم ل 2012
الله يحرقهم فى كل خطوة
يارب يروحوا ميرجعوش
يا رب يارب يارب
ادعوا معايا
كل ده علشان لا قدر الله و كسبنا ياخدوا هما اللقطة الاخيرة ... عالم سافلة
و الله انا كرهت الكورة الميرى دى من ايام الجيش و انا كرهتها اليومين دول بقيت بكرها اكتر من الاول
نلتقى بعد النهائى

Anonymous said...

Expected, u thought they would let this chance go away w/o exploiting it!!

The ref is innocent btw and Rorwara has threatened him by exploiting his so many positions at CAF, and FIFA, such a sick person.

I hope the ref is protected bec all his decisions were correct and if he gets banned that would not only set a bad example to all refs but will also encourage more unfair play from the Algerian team and those who think if you are loosing its alright to try and smash the other players like that.

Check this link:
http://www.youtube.com/watchv=ijZ3qASSbWc&feature=sub

Phobos said...

على فكرة.. لو كسبنا كاس الامم الافريقية ، جمال مبارك هيعلن ترشيح نفسه للرئاسة.... إعملوا حسابكم !

lastcrazyboys said...

طبـــعاً مش هستفيض في كم المشــاعر "الفياضــة "..اللي جواكي تجـــاه علاء وجمال ..وتأثيــر ذلك على كتاباتك ..حتى ولو تعــلق الأمـــر بالمنتخـــب" المــصـــري" الشكيك

طب انتي بتــاعة سيــاسة ..وطووول عمري اللي اعرفــه ان الجماعة بتوع بالروح بالدم..وما أخذ بالقـــوة لا يستــرد سوى بالقـــوة ..الناس دول مالهمش في الكورة
ايش حشركم بقى اليومين دول في الموضوع ده ..انا مش فــاهم

هتقوليلي ماهو لما لقيت الناس كلها مسحورة ..!! لاااا مانتوا طول عمركم شايفين الموضوع ده
وطول عمركم "النخــبــة" ..والصفـــوة
والكورة دي بتاعة الغوغائية اللي كلمة توديهم وكلمة تجيبهم
=====

سيييييبك من كل الهبل اللي انا قلته دلوقتي ..انتي جبتي مصدر مهم جــداً للخــبر "العربيـــة " ..بس طبعا مكلفتيش نفســـك تدوري على مين اللي كاتبه
أنا عاذرك ..لأنه مش تخصصك ..ودايما الواحد لما يتحشر في اللي مالوش فيه ..بيبقى مش قــد كده ..بس اهو يكفيه شرف المحاولة ..والتمثيل المشـــرف
ولو انــك كده عملتي زي "الرشيدي الميـــزان " ..طب انت راجل بتــاع حلاوة ..وطوووول عمرك بتاع حلاوة ...مالك ومال المربى
!!!!!!!!؟؟؟؟
بتعمل "منبى " لييييه يا فتحي..!! ماعليييينا
المهم..اللي كاتب الموضوع يا آنســة اسمه "ظفر الله المؤذن " ..وطبعا بما انك متعرفهوش من الاساس ..فاستحــالة
mbcتعرفي انه مذيع في
ومش هتعــرفي كمان انه جزائري
وفوق كلللل ده انه كان أحد اهم اقطــاب الفتنـــة المرة اللي فاتت عبر جريدة الشروق
يعني انتي عملتي كده زي لما واحــد من المدونيين الجزائريين يجيب خبر ..ويقول الدليل جبته من الكابتشن مدحت شلبي ..او الكابتشن مصطفى عبده
دي حـــاجة ..تاني هااام بقى ..علاء مش زملكاوي ..جيمي هو اللي زملكاوي ..مسيو عيــلاء اسمعلاوي

وأخيراً وليس آخـــراً..."بحبها قوي الجملة دي " ..حضرتك من امتى بتجيبي البوم الســاقع ..مصدراً لاخبـــارك

Unknown said...

ايوة ايوة
انا كنت لسه ح اعمل تحديث اننا في انتظار فضيحة كبيرة للعربية بس ح نفوت يوم لان الخبر مش موجود في اي وكالات ولا اي مصادر تانية غير العربية

وانا العبرية دي من زمان نفسي تقع في ايدي

ان ما مشيتها تكلم نفسها

lastcrazyboys said...

تحديث من عندي انا بقى المرة دي
:)

ظفرالله" تونسي ..مش جزائري"

بس التوجه بتاعه معروف من زمان
http://www.echoroukonline.com/ara/sports/46208.html
والدليل : قالوله

= عاجبتني قوي حوار هسيبهم لبكــرة
انتي لما بتنوي لحد على نية
بتبقى وقعة امه سودا

Muhammad Al-Ansary (@iOrto) said...

بالنسبة لخبر شطب الحكم

مراسل العربية (وهو نفسه مراسل فرانس فوتبول) "ظفر الله المؤذن" تونسي وغير محايد عندما يتعلق الأمر بمنتخب مصر
وكلنا فاكرين له تصريحاته للجريدة الجزائرية الصفراء (الشروق) اللي أكد فيها شائعة بنات الليل بتوع جنوب إفريقيا (في عز الحساسية وتصيد الأخطاء بين مصر والجزائر)وادعى أن نفي الشرطة الجنوب إفريقية للخبر كان صفقة لستر فضائح "أبناء زاهر" على حد تعبيره

واحنا تعلمنا من الهوجة الإعلامية الحالية (في عصر السموات المفتوحة ع البحري) أن الخبر الذي ينشره مصدر واحد بيبقى 90% خبر كاذب

عموماً الأيام بيننا يا عربية... وستبدي لك الأيام ما كنت جاهلاً يا سيد ظفر الله المؤذن، ويأتيك بالأنباء من لم تزودِ

أبو عمر - الصارم الحاسم said...

http://ahmedsaed.blogspot.com/2010/01/blog-post_28.html

شمس العصارى said...

احد المعلقين هنا كان بيقول
لو فزنا عيلاء حيرشح نفسه للرئاسة
وااااااااااااااااوووو
طيب و الله كويس
يعلن ترشيح نفسه ضد اخوه
و ياريت يخلصوا على بعض انتقاما من بعض
اشمعنا رشا و وائل خلصوا على بعض مش كان بناتهم تار
و ادى جيمال و عيلاء حيكون بينهم تار و تنافس
وااااااااااااااوو
المهم لو خلصوا على بعض شعب مصر هو الكسبان و تبقى الفرحة فرحتين فرحة بكأس الامم و فرحة باننا خلصنا منهم و فرحة تالتة بتاعة سمن الاكل
واااووو ههههههههه
معلش اكيد الشاى الى شربته كان فيه حاجة

Unknown said...

وحياتك أنتى ماهتشوفيهم

الا اذا كان بأه المخرج حزب وطنى

منظور شامل للحياة السعيده said...

اخر الاخبار ان الحكم اخد تقييم 8 و نص في الماتش بناء على لجنة تقييم التحكيم للكاف

المفاجئه ان سبب نقص نقطه انه محسبشي تلات ضربات جزاء صحيحه للمنتخب المصري

و كمان تأخر في طرد شاوشي و حليش

ايه رأيك بقا

Tamer said...

Dr.Online said...

مصدر الخبر الله يكرمك
:)))

AmmAr said...

الخبر إتشال فعلاً من علي موقع العربية

Anonymous said...

نوارة انا عملت بحث على عنوان الخبر في جوجل
وجدت عشرات النتائج
ثم أضفت العربية وجدت حوالي عشرة
معنى هذا أن هناك عشرات المواقع التي أخذت نفس نص الخبر و حتى نفس الصورة
قص و لصق

Anonymous said...

علاء إسماعلاوي

Anonymous said...

اعملي بحث على
نفس عنوان خبر العربية
تقرير مراقبي الحكام اتهم كودجا بإفساد لقاء نصف النهائي

ستجدي
نتيجة 555