Saturday 9 January 2010

حكاية هاني المسيحي اللي كل الناس بتعامله على انه مسلم

انا والله ما اعرف اسمه هاني ايه؟ انا اعرف انه هاني وحتى مش فاكرة عرفت انه مسيحي منين، متهيالي حد كان بيهرج معاه في الموضوع ده، المهم هاني ده مافيش مخلوق في الدنيا مش بيتعامل معاه على انه مسلم، ده لو كتب مذكراته ح يكتب مواقف مالهاش حل
اول مرة اشوفه كنا طالعين السنة اللي فاتت في القافلة دي اللي اتمنعت، ايام ضرب غزة، كان معانا واحدة منقبة ما بطلتش رغي وكلام حماسي من عينة اننا كلنا فداء فلسطين ولازم نستشهد ولما الامن وقفنا جه التلفزيون يصور وماحدش فينا فايق يتكلم هي الوحيدة اللي قعدت تتكلم تتكلم وتقول لهم شعر وتعلن عن استعدادها للسير على الاقدام لنيل الشهادة في غزة لحد ما الكاميرا مان قفل الكاميرا والمذيعة طلعت تجري راحت جارية وراهم وسألتهم: هي الفقرة دي ح تتذاع على انهي قناة؟ اصل جوز اختي ما يعرفش اني جاية ولو شافني ح يزعل ويحرمني من اني اشوف ولاد اختي. هي منقبة اساسا، جوز اختها ح يعرفها ازاي؟ ثم ايه دخل جوز اختها في حياتها دي فهمتنا انها مقطعة البطاقة وح تروح تفجر نفسها. وبعدين طلعت الاتوبيس وبعد فشل محاولات مالك مصطفى ومحمد جابر انهم يقنعوها تقرا عدية يس عشان تحل عنهم الكل هرب، مين اللي فضل مستحملها وزنقته في الركن؟ هاني، المسيحي الوحيد في القافلة، قالت لهاني ايه: احنا لازم نموت عشان فلسطين (وبعدين راحت موطية صوتها لبعدين حد مسيحي يسمع وللا حاجة) وقالت: اذا كان النصارى اللي هم النصارى متعاطفين مع فلسطين، ازاي احنا بقى نسيب فلسطين. وهو يا قلبي يهز راسه.
النهاردة بقى، هاني اتعامل على انه مسلم برضه في الوقفة اللي ضد التمييز الطائفي امام النائب العام، واللي مركز هشام مبارك قدم له بلاغ، بس المرة دي من واحد مسيحي، هو يا حبيبي من اهالي الضحايا، وما اقولكوش بقى، انا رحت متأخر لأني فضلت ساعة الف على ركنة، ما عدتش اروح الوقفات بالعربية تاني، دخلت لقيت واحد بيتخانق، سايب دقنه، والدمعة بترقص في عينه ما بتنشفش ابدا، وعمال يزعق، بيزعق لمين؟ بيزعق لهاني: "لااااا، انا مش جايين هنا حفلة ولا بارتي وح نوزع جاتو، انتوا جايين تبيضوا وشكوا على قفانا؟ لأ، الحقيقة لازم تتقال، احنا مش جايين نقول الهلال مع الصليب، دي امنيات نتمناها، بس احنا مش جايين نقدم بلاغ بامنياتنا، احنا جايين نقول الحقيقة، مافيش هلال مع صليب في البلد دي، البلد مليانة كره، دي الحقيقة، فيه شعب بيكره، ده مش اضطهاد حكومي، ده اضطهاد شعبي.." والمسيحيين عمالين يسكتوه عشان ما يغلطش في واحد مسلم، اللي هو ميييين؟ اللي هو هاني، بصراحة انا شفت الواد بيتكلم بحرقة كده وهاتك يا عياط وشحتفة، وانا راخرة نسيت ان هاني مسيحي قعدت ازعق له: ما تسكتوش يا هاني، هو عارف ان فيه نفاق ومش عايز النفاق ده، هو عايز يقول حاجة سيبه يقول..الله يكون في عونه، انت مش حاسس بيه؟

مع العلم ان مش هاني اللي كان بيسكته... هاني مسيحي.. هاني مسيحي.. وما كانش بيسكت الجدع

لا بقى، باقول لكوا ايه؟ هم المسيحيين بقى شكلهم بيستفز الناس عشان تضطهدهم من غير ما يعملوا حاجة، امال كل الناس كانت بتزعق لهاني ليه؟ والست اياها افترست هاني وزنقته في الحيطة ليه؟ وايه اللي طسها في عقلها وخلاها دونا عن كل الناس تنم معاه على النصارى؟ ده نصيب بقى، يرضوا بنصيبهم

وطبعا ماحدش فيكوا ح يتف على وشي، لأن اللي حضروا الوقفة النهاردة هم اللي حضروا وقفة غزة، ماحدش من بتوع الشأن الداخلي شرفنا ولا آنسنا...عبده ظروف كالعادة

الاهالي مغدورين، مش حزنانين، مغدوريييييييييين، مش مقهورين من الموت، مقهورين من اللي حط عليهم ولا كان ع البال ولا ع الخاطر، حاجة فظيعة، مافيش حد حالق دقنه حتى، شكلهم عامل زي اهالي العبارة، واحد من الاهالي قال لي ان المسجل ده اللي اتقبض عليه بينزل في كل الانتخابات، وانه قبل الحادث باسبوع الحكومة اخدته وطلعت له شهادة تخلف عقلي، واحد تاني قال لي ما كانش فيه حراسة كافية، والبوليس وقف يتفرج على الناس ولا حتى جري ورا العربية، ولا اتحركوا من مكانهم، قلت لهم ما كانش فيه اسعاف سريع؟ قالوا لي مافيش اسعاف في نجع حمادي اصلا!!! يعني ايه مافيش اسعاف في نجع حمادي؟ يعني مافيش
من الهتافات بقى اللي اتقالت: ما تقولوش احنا ضعاف احنا اقوى من اي رصاص
ههههههههههههههه بصراحة ضحكت، مع اني كنت مفحوتة من العياط بسبب الولد اللي مش عايز نفاق، يا عم اقعد انت وهو، على فكرة في فوء تساهم، المسيحيين حاسين ان الناس بتعمل فيهم كده عشان مستضعفينهم ومستهفأينهم، بينما المسلمين بيخافوا المسيحيين وعشان كده بيعملوا معاهم كده، ومش حاسين انهم ضعاف ابدا، بالعكس، دول فاكرينهم ياما هنا ياما هناك، وصدق او لا تصدق، هتاف زي اللي ضحكني ده بيخوف المسلمين بجد.. بينما واقع الامر انهم بيتبهدلوا ومش عارفين ياخدوا حق ولا باطل وكل ما يعملوا حاجة تيجي على دماغهم اكتر ومش عارفين يروحوا فين وييجوا منين، مش ح ينفع كده، مش ح ينفع فريق الاهلي والزمالك، دي مش كورة، دي بلدنا

على رأي الصخص اللي قال لي: البلد بتطلع في الروح يا آنسة. وانا اشرت امبارح على التويتر ان البلد تولع، المهم انه قال لي يا آنسة، بس الظاهر انها بتطلع في الروح فعلا
فيه ناس طلبت مني اني اتأكد من المعلومة اللي قالها لي احد اهالي الضحايا بتاعة شهادة التخلف العقلي، بس اليوم الساقع بتقول دلوقت ان المتهمين انكروا اي صلة لهم بالحادث!!!!! يعني نستنى الاغبار، كلها اربعة وعشرين ساعة وشهادة التخلف العقلي بتاعة البلد كلها تطلع

ثم ايه حكاية الهلال مع الصليب دي؟ الشارة دي بتغيظني قوي بصراحة، انا دلوقت حاليا مسلمة اهو، ايه كنه الهلال بالنوسبة لي يعني؟ ده هلال ايه ده؟ ده هلال الدولة العثمانية؟ وللا هلال رمضان؟ غالبا هلال رمضان حيث ان فيه مسلمين مش بيصلوا غير في رمضان وبنات مش محجبات بيلبسوا حجاب في رمضان، هو لازم شارة يعني؟ لو لازم شارة شوفوا لكوا اي شارة تانية غير الهلال مع الصليب دي عشان بقت مبتذلة قوي وبقت تفكر الناس بالنفاق والتلييس
مش مهم يبقى فيه هلال جواه صليب، المهم ان لما واحد يبقى قاعد بيتغدى ما يسمعش جيرانه بيدعوا عليه في الميكروفون وهم بيصلوا

----------
البحرين عاملة مظاهرات ضدنا... هيهيهيهيهيييييي، احنا اتشهرنا فعلا
وح نتشهر اكتر واكتر كل ما ابو الغيط يفتح بقه ويقول الضرر بتاعته، وطبعا ده ابلغ رد على اتهامات جالاوي المغرضة
اسكتوا اسكتوا اسكتوا، مش الراجل اول ما نزل مطار هيثرو فضح اللي جابونا وخلا اللي ما يشتري يتفرج علينا؟ وقال عندنا البحر وعندنا تركيا وده وسام على صدري ان مصر ما ترحبش بيا
انا مبسوطة قوي مننا يا شباب.. انتوا كمان مبسوطين؟
اه.. نسيت: فيه حد على التويتر بيقول ان المنقبات راحوا الامتحان لابسين كمامات وقالوا عشان انفلوانزا الخنازير
والله العظيم بنات بميت... لا انا مش ح اقول بميت راجل، عشان نو افنس كده، ميت راجل دول ما يوزنوش ربع كيلو جبنة رومي قديمة عند البقال.. كل واحدة فيهم بنت بميت بنت

2 comments:

soreal said...

this mask issue really took the biscuit :P


and am not sure why and how, but i firmly believe that , and in a similar twist to that flu mask niqaby women, the gazzians will find a way, just like they found the tunnels, to stay alive..

شمس العصارى said...

لا الوقفات الاحتجاجية و لا الشعارات ولا هانى المسلم ولا المحجبة المسيحية ولا ده كله بياثر فى الموضوع
كل ده فى ناحية و الواقع فى الناحية التانية
الحل ان الامن و النظام يبعدوا عن الموضوع
و الكنيسة لازم كلامها و ثقافتها و تعاليمها و اتفقاتها تبقى على الملاء
و التيارات المسلمة تعلن هويتها و مبادئها
و بعد كده يقعد المسلميين و المسيحيين مع بعض بلا قيادات كنسية ولا ازهرية ولا تيارات لو تحبوا
نرجع للقرآن و نشوفه بيقول ايه
و نشوف الانجيل
لكن شعارت ووقفات و حلول فوقية و الاستجابة للضغوط الخارجية و اقباط المهجر ده بيزود الموضوع
زى ما قلت فى تعليق سابق " المسيحيين البسطاء هم الخاسرين الوحيدين من اتفاق الكنيسة و النظام "
و الامن مش حيحميهم الامن ليه مصلحة الرئاسة و الخليفة