Sunday 10 January 2010

احنا ح نسيب المسيحيين لوحدهم تاني؟

دلوقت بعد ما اتلسعوا على قفاهم وقالوا لهم: يعني سلامتك. ها؟ احنا ح نسكت تاني؟ انا مش عارفة اساسا اقول ايه؟ انا من امبارح وانا عمالة الف حوالين نفسي وعمالة اسب والعن في المسلمين والمسيحيين والكنيسة والحكومة والقوى السياسية والشعب وفي نفسي واشد في شعري.. ايه ده؟ ايييييييييييييه ده؟ ايه الفجر ده؟ ايه الافترا ده؟ ايه الظلم ده؟ 
هو كل مرة؟ كل مرة؟ بس المرة دي كتير، كتير قوي فوق طاقة اي انسان فيه بقايا انسانية على التحمل، كده كتير، ده مش مجرد منع كنيسة وحرق بيت
ده واحد اغتصب واحدة قاموا هجروا ستاشر اسرة من بيتها بعقاب جماعي لابرياء ولا كأننا في اسرائيل، ويتقتل الناس وهم خارجين من الصلاة زي ما الاسرائيلي قتل الفلسطينيين وهم بيصلوا في الحرم الابراهيمي، اتاريييينا بقالنا مدة سمنة على عسل مع اسرائيل، ما احنا بقينا شبههم
وبالنوسبة للمسيحيين استفزازيين، اه، هم استفزازيين فعلا، باتكلم بجد والله، يعني يتقهروا ويتمرمطوا وتيجي الكنيسة تقول لهم بيتك بيتك يروحوا مبرطعين على العشة على طول، واللي في القلب في القلب.. ونيجي احنا بقى نتكلم يقولوا لنا: مالك يا مليجي؟ مالك ومال ابن بنت بنت بنت بنتي؟ ما الناس اهي، مبسوطة راضية وفرحانة وبتزغرد ونفسها يتقتل لها خمسة ستة كده كل صلاة انتوا بتقوموهم ليه؟ انتوا بتنفذوا اجندات الخارج، انتوا عملاء اسرائيل وامريكا، انتوا عايزين تشعللوها، ما الموضوع اتلم اهو والناس اتصالحت واحنا زي الفل
ساعتها بتبقى عايز تمسك المسيحيين تخنقهم، بس هم خايفين، هم حاسين انهم لوحدهم، والملجأ الوحيد لهم هي الكنيسة، مالهمش حد تاني يسأل عنهم، حاسين انهم محاطين بجو عدائي، ولو الكنيسة باعتهم مين ح يشتريهم؟ 
انا... انا اشتريهم، هم مواطنين في الكنيسة وللا في دولة مصر؟ 
ومش كل مرة العلمانيين واليساريين هم بس اللي يتصدوا للموضوع، فين الاسلاميين؟ ها؟ فين؟ هم مش ح يقعدوا يطلعوا لنا بيانات اخرها يتلف فيها كام قرص طعمية، لازم ياخدوا اجراءات تانية ويتضامنوا ويبقى مواقفهم اوضح من كده، وفعالة اكتر من كده، والا ما يشتكوش بقى لما يتقدموا لمحاكمات عسكرية ويتظلموا هم كمان، اللي يرضى الظلم على اللي قاعد جنبه ما يشتكيش لما يقع عليه
وما يستهبليش ويروح يشتم في اسرائيل وهو بيعمل زيهم
تفرق ايه تهجير ستاشر اسرة من قريتهم عن طرد الفلسطينيين من مدينة القدس؟ 
ده بيان الجماعة الاسلامية، وهم مطالبين يفعلوا الكلام ده بشكل قانوني ممكن يرفعوا قضايا او يتضامنوا في قضايا
الاخوان المسلمين عمالين يقولوا احنا عندنا مشروع قانون دور العبادة الموحد بس اول ما نمسك الحكم، طب من ساعة ما دخل منهم كام واحد البرلمان ما قدمش المشروع ده ليه؟ ما رفعوش قضية بيه ليه؟ هم ملزمين قدام ربنا وقدام نفسهم بالاتساق الاخلاقي، يقدموا المشروع ويترفض مش مهم، يرفعوا قضية ويفتحوا الباب للتضامن ويخسروها او يكسبوها مش مهم، المهم ان المستضعف ما يحسش انه لوحده وبعد كده ترجع تلومه انه منساق ورا السلطة الكنسية اللي بتبيعه عشان تشتري رضا النظام، لو حس ان معاه ناس كتير واقفين جنبه مش ح يدخل العشة، ح يقول انا مش فرخة وليا في البلد دي والناس واقفة معايا
زي ما العمال حسوا ان فيه ناس معاهم، زي ما الفلاحين حسوا ان فيه ناس معاهم، وده اللي شجعهم غير كده ما كانوش ح يتحركوا

بقى الستاشر اسرة دول لو كانوا ستاشر اسرة مسلمة في امريكا كنا سكتنا؟ بقى اللي بيتكلموا عن تهجير الاسر الفلسطينية ساكتين على تهجير اسر مصرية في بلدها؟ انا ما باقولش تسكت عن اللي بيحصل للمسلمين في الغرب او اللي بيحصل للفلسطينيين ابدا، ولا انا من النصابين بتوع الشأن الداخلي، انا باقول لك عشان يبقى لك مصداقية، اذا ما كانش قدام العالم، يبقى قدام ربنا، وللا حتى قدام نفسك، زي ما بتتكلم عن دول ما تسمحش ان حاجة زي دي تحصل في بلدك ابدا
تعمل البدع عشان كارثة زي دي ما تحصلش، بقى انا اتكلم عن بنت الجيران انها راجعة الساعة تلاتة بالليل وانا بنتي سارحة في شارع الهرم؟ 
المنافقين في الدرك الاسفل من النار، واللي تقبله على جارك النهاردة بكرة ح يحصل لك، واللي تقبله في مجتمعك وبلدك ما تقدرش تلوم غيرك لما يعمله في بلد او مجتمع تاني، والا تبقى منافق وبتمثل وانت الخسران، دايما المنافق هو الخسران، عمره ما بيكسب ابدا لا دنيا ولا اخرة
انا عاملة توكيل لهشام مبارك اصلا، وقلت لهم اي قضية فيها اي نوع من انواع التضامن خدوا توكيلي
وشوفوا تقدروا تعملوا توكيل انتوا كمان
وائل خليل اقترح اننا نجيب عناوين اهالي الناس للي ماتت ونبعت لهم تلغرافات
طيب دي حاجة مؤقتة، بس اللي مات الله يرحمه والقضية شغالة ومركز هشام مبارك قدم بلاغ للنائب العام والتحقيق اتفتح تاني
لكن اللي عايشين ومهجرين من بيوتهم ما رجعوش لحد دلوقت، احنا ح نسيبهم؟ في اي شرع وفي اي قانون دول يعيشوا لاجئين في بلدهم؟ ازاي كده يا ناس؟ 
احنا ح نسكت؟ حد من القانونيين يروح لهم وهم في الاول ح يخافوا طبعا يتكلموا مع حد، وممكن الكنيسة تحول بينهم وبين اي حد عايز يساعدهم، بس لو اللي عايز يساعدهم عدد كبير ح يتجرأوا، وبعدين مش بس يرجعوا بيوتهم، يرجعوا بيوتهم يبقوا في امان، مش شهرين ونسمع انهم اتحرقوا وللا انطخوا، ولازم ضمانات قانونية، والعوايل اللي هجرتهم تمضي على محضر تعهد بعدم التعرض ليهم
انا ما اعرفش الصيغة القانونية بس اكيد فيه وسيلة قانونية، واكيد نقدر نتضامن معاهم باي شكل، وانا مصرة ان المحامي اللي يروح يبقى حد من الاسلاميين، لازم، لازم لازم لازم لازم لازم
والا بطلوا بقى، عمال تتوضى في الشتا وطالع نازل في الصلاة وانت ساكت عن الحق، لازمته ايه التعب؟ ولازمتها ايه الفلوس اللي بتتصرف على العمرة ما تروح فرنسا وتهيص بلا وجع دماغ

وانا شخصيا مش ح اسكت من هنا ورايح، انا مش مستعدة اتعرض للهلع اللي شفته ليلة سبعة يناير ده تاني، وكمان اكتشف انهم اساسا مرحلين ستاشر اسرة من ورانا واحنا مش دريانين، والمؤسسة الكنسية قابلة، والناس موحودة مالهاش حد يقول لها انت فين، ايه ده؟ لا انسانية ولا دين ولا رحمة، وعايزين ربنا يسترها معانا؟ وكمان هم اللي متهمين بالسلبية والانسياق ورا المؤسسة الكنسية؟ هم لقوا حد تاني يقف جنبهم وقالوا لا؟ 
كل اللي بيقفوا جنبهم بيشبهوهم، ما تقعدوش تقولوا منظمات اقباط المهجر دول مستفيدين من استمرار اضطهاد المسيحيين عشان يبيعوا ويكسبوا وانتوا اللي سايبينهم للمؤسسات دي، يوم ما بيقرروا يتمردوا على تسكيت الكنيسة لهم مش بيلاقوا غير المنظمات دي، وفوق البيعة كل ما بيتدخلوا لهم في حاجة بيعكوها فوق دماغهم اكتر، هم مالهمش دعوة، دي ناس قاعدة هنا في مصر هنا، مش مسموح لها تبني كنيسة ولا تصلحها على خير ابدا، ولما بتصلي في بيت بيتحرق عليها، واخرتها يتهجروا بذنب ما ارتكبوهوش قال ايه عشان واحد مسيحي اغتصب طفلة، جرا ايه يا امامير؟ ما عندكوش حد بيغتصب طفلة وطفل كمان؟ نتهجر كلنا من بيوتنا عشان واحد في المنطقة عمل جريمة والامن طرمخ عليه؟ ما سألتوش نفسكوا ليه دايما الامن بيطرمخ على المجرمين مسلمين ومسيحيين؟ الامن يطرمخ على مرتكب الجريمة ويوافق على تهجير ستاشر اسرة بريئة؟ مافيش حاجة غريبة في الموضوع ده؟ مافيش حاجة تشكك؟ واحنا نقبل بجريمة زي دي ونسكت؟ وواحد يقول لي المسيحيين ما بيحصلهمش حاجة انا اعرف مسيحي عنده صيدلية؟ 
الناس اتجننت وللا ايه؟ 
تاني: البر لا يبلى والذنب لا ينسى والديان لا يموت، اعمل ما شئت فكما تدين تدان
ومن رأى منكم منكرا فليغيره بيده فإن لم يستطع فبلسانه فإن لم يستطع فبقلبه وهذا اضعف الايمان
والمؤمن القوي خير واحب الى الله من المؤمن الضعيف
وللا انتوا ما تعرفوش من المنكر اللي يتغير غير ان واحدة لابسة بنطلون محزق؟ واخراج الناس من بيوتها وازهاق الارواح البريئة وخطاب الكراهية اللي مالي الميكروفونات، واسأل شيخ ليه بتدعي على اليهود والنصارى في الميكروفون يقول لي: اصل الامن مانعنا ندعي على اسرائيل وامريكا
يا راجل يا جبااااااااااااان، يا جبااااااااااااااااااااااان، خايف من الامن ومش خايف من ربنا وتوقع الظلم على ناس مالهاش ذنب قاعدة في بيوتها تتشتم من غير جريرة عشان انت خايف من السجن؟ ايه ده؟ عامل سيم بينك وبين ربنا؟
البلد اتهبلت وللا ايه؟ 

كل دي قضايا لازم تترفع، واحنا نتضامن فيها، والاسلاميين مطالبين اكتر من اي حد تاني، العلمانيين واليساريين موقفهم معروف، الاسلاميين بقى لازم يوضحوا موقفهم حالا دلوقت، وياخدوا مواقف جادة واجراءات قانونية بالخصوص ده، والا النار اللي جاية ح تاكل الاخضر واليابس.. ولات حين مناص
آخر حاجة: "المسيحيين المصريين طائفيين زي المسلمين بالظبط" همممم
الكلام ده مظبوط، واكتر من كده، منعزلين ومش بيصاحبوا غير بعض، واكتر من كده، بيقال لهم خطاب كراهية في السر ضد المسلمين، بس فيه شوية فروق
المسيحيين المصريين لسه طائفيتهم ما اتحولتش لشكل عنف زي المسلمين
وباقول لسه، باقول لسه، اوعى تفتكر ان عشان عددهم قليل ح يفضلوا يبلعوا ويسكتوا، الضغط يولد الانفجار، وممكن يوصلوا لنقطة يقولوا: ناخد حقنا ونموت، الموت اكرم لنا من العيشة دي
الفرق التاني ان الطائفية دي لا تبث عبر الميكروفونات في الشارع، انت مالكش دعوة باللي الناس بتقوله في الاروقة، انت لك دعوة باللي بيتقال في وشك
وبطلوا عادة التفتيش في الضماير دي، الشيعة عندهم تقية، والمسيحيين مية من تحت تبن، ولما يقولوا لكوا لا تقولوا لهم يا كدابين ولما يقولوا لكوا اه تقولوا: شفتوا؟ شفتوا؟ اهو اهو اتجرأوا اهو وصوتهم علي، يعملوا ايه يعني؟ يسلموا اسلام سني بالتحديد عشان ترتاحوا؟ ح تطلعوا الناس من دينها او مذهبها بالعافية يعني؟

الحاجة التالتة بقى، ان نفس الكلام اللي انت بتقوله على الناس بيتقال عليك، برضه الناس بتقول المسلمين لو شموا نفسهم ح يفتروا وعايزين يحكموا العالم وهم متعصبين إلخ، وبرضه بيتقال التيارات الاسلامية السياسية لو شمت نفسها ح تعمل وح تسوي وعليه فبيحصل ايقاع ظلمي استباقي، زي اللي حصل مع حماس مثلا، ماهو اتقال لو حماس اخدت فرصة للحكم ح تعمل وتسوي

انت يا مسلم... يا مسسسسلم، ياللي ربنا امرك بالعدل والاحسان وايتاء ذي القربى فيه حاجة عندك اسمها عقوبة على جريمة من قبل ان تقع تحسبا لامكانية وقوعها؟  ده اسلام ده؟ ده الجريمة بتقع ولو واحد من الشهود شك العقوبة بتسقط

وبعدين خلاص.. خلاص، انت بتكره المسيحيين؟ بتكرههم كده يعني؟ رخما مثلا؟ طيب
"ولا يجرمنكم شنآن قوم على ألا تعدلوا، اعدلوا هو أقرب للتقوى"
والعدل انك تاخد موقف ايجابي مش تقعد تمصمص شفايفك وتقول: حرام والله

24 comments:

مواطن مصري said...

طب كويس ان موقفنا كا ليبرالين و علمانين معروف بس الجماعات الاسلامية و الاخوان المفروض هما الي يدفعو تعويضات لأنهم سبب في الازمة

الي احنا فيها بسبب الخطاب الديني المتدني

سواء ع الجانب الاسلامي او المسيحي

و فين موقف الاخوانجية الي طلعو يتظاهرو عشان الشهيدة مروة الشربيني ولا المدونات الي قعدت تتكلم و تكتب

مشفناش منهم حاجة لا حد اتضامن ولا كتب عنهم

لاخوان و مدونتها فالحين يقولو الاضهاد المسيحي العنصري في الغرب و الكلام الكبير

في حين هما بيمارسو العنصرية و التميز هنا ضد المصرين

تحياتي

wahat_alshohada said...

انا اشترى معاكى وفيه كتييير هيشتروا يا نوارة بس المشكلة فعلا ان المسيحيين مش هيعملوا لنا اعتبار او مش هيحسوا اننا معاهم هما هيسمعوا برضو كلام الكنيسة مش هيسمعوا كلام الناس اللى زينا اللى عايزين يساعدوهم واحنا هنطلع قد ايه مانتى عارفة البير وغطاةوايه سلطتنا؟
هما مواطنين مصريين وزيهم زينا وزى اى حد

عم مينا said...

نوارة مش عارف أقولك ايه
أول مرة أحس ان ممكن حد تاني يطلع الكلام اللي جوة الواحد بالشكل ده
معنديش أي تعليق و موافق علي كل كلمة قلتيها
الكلام ده هو اللي الأقباط بيقولوه ما بين بعض بس عمرهم ما هيقولوا في العلن.. فان يبقي فيه حد مسلم فاهم اللي بيحصل فده شيء هايل
الكنيسة خلاص باعت القضية.. أحمد عز راح زار نجع حمادي و خلص الموضوع
http://www.youm7.com/News.asp?NewsID=176092
و الأسقف بتاع نجع حمادي مبسوط من الأمن و الحزب الوطني و الحكومة و كله تمام.. و مش بعيد يطالب بالإفراج عن المتهمين الثلاثة علي أساس ان الإنجيل بيؤمرنا بالمغفرة

wahat_alshohada said...

يعنى المهم هما كمان يساعدونا ويساعدوا نفسهم معانا واحنا مستعدين علشان كل اللى بيحصل دة كله لازم ينتهى

Unknown said...

المره دى لو حق الناس دول ضاع - يبأه الكنيسه هى السبب وهى اللى تتحاسب

هو البابا شنوده ماله ؟ فينه ؟
أيام السادات كان صوته أعلى من كده بكتير وكان بيخش فى صدامات قويه مع الحكومه
دلوقتى ليه السكوت ؟

Unknown said...

لا حق الناس دي لو ضاع يبقى ذنبهم في رقابينا كلنا
كللللنا
وربنا مش ح يسيبنا بخير ابدا
اعملوا حسابكوا... ربنا مش ح يسيب اي حد سكت على الجريمة دي بخير ابدا

انا اللنك اللي جايبه مينا خلا الدموع نازلة حنفيات ومش عارفة اسكتها

مواطن مصري said...

عمروو السكو عشان الحكومة بتخوفهم من الاخوان


عشان تعرفو ان الاخوان مجرد اداة للتخويف

فقط لا شرعية لها

Unknown said...

عز ؟
والله العظيم
يعنى كلام الأستاذ محمد صفاء عامر والأستاذ بتاع جمعية حقوق الأنسان أتنفذ وبأسرع مايكون

الدنيا أطرمخت والوطنى نزل بتقله والجرح هايتقفل من غير ماالدكتور يطهره

أن شاء الله الجرح هايتلوث وهايحصل غرغرينا كمان وهو نفس الدكتور اللى هايعمل عملية البتر
خلينا نخلص

عم مينا said...

ليه كده بس يا نوارة
ده زمان الكنيسة مبسوطة جداً
احنا كنا فين و بقينا فين.. زمان أما كانت بتحصل مشكلة من دول كانوا بيبعتولنا واحد من المحليات يتصور مع القسيس و كانوا يبعتوا عقيد يحقق في الموضوع.. المرة دي النائب العام بنفسه جيه.. و أحمد باشا عز بذات نفسيته جاي يعزي.. و أكيد أكد للمطران ان الرئيس مبارك بيتابع بنفسه الموضوع.. عاوزين ايه تاني؟

أبو عمر - الصارم الحاسم said...

في ظني الاسلاميين مش باينين اوي ليه...لانهم ماينفعش يطلعوا يشجبوا وينددوا على طريقة الاعلام الرسمي والمؤسسات الدينية الرسمية

التيارات والشيوخ الاسلاميين المستقلين عن الحكومة عشان يتكلموا صح لازم يتكلموا في الموضوع من اوله لآخره

مطلوب منهم ولازم عليهم تصحيح مفاهيم الاستقواء والعصبية الجاهلية في نفوس عامة المسلمين ...ده شئ اساسي وضروري ولازم لا فعلا فيه مشكلة كبيرة في تفكير عامة المسلمين وسهل التأثير عليهم...صحيح العاطفة الدينية شئ رائع والحمد لله انه مازال موجود وغير مطلوب على الاطلاق قتل هذه العاطفة بدعوى الليبرالية وقبول الآخر.....لكن تهذيب لها ومعرفة الظلم والبغي من الحق

لكن في الوقت نفسه مطلوب انهم- التيارات الاسلامية - ياخدوا المساحة الكافية للكلام عن كل شئ في هذا الملف بكل الحرية وبما يجب عليهم قوله

فيه حاجات كتير حصلت الفترة اللي فاتت في الملف ده مش مظبوطة اعلاميا وامنيا وسياسيا واجتماعيا...وقاعدة اساسية في الافتاء انه عندما يوجه للمفتي سؤال فعليه اجابة الموضوع بكل جوانبه وليس فقط موضوع السؤال ولالا يكون خائنا لله ورسوله وللعلم الذي اعطاه الله له


هل حد بقى عنده استعداد يديهم المساحة دي ...واللا برضه الناس عايزة انهم يطلعوا يشجبوا وينددوا ويتكلموا في حتة صغيرة

اما ان ماكانش الموضوع هيتقال من كل جوانبه فهيبقى بالظبط زي الامام الازعر ومن حوله اللي بيطلعوا يقولوا فتاوى مجتزئة من عينة هذا حقها وان الجدار حلال وان مبارك تمام وتحيا الوحدة الوطنية وهكذا


يمكن عشان كده هما مش باينين اوي والله اعلم...بس برضه هما ماغابوش عن الساحة بالكامل


الحاجة التانية...بصراحة...الحادثة لسه فيها كام نقطة غامضة...لكن المشكلة اللي هيقول كده هيبقى متطرف متعصب منخرط متشدد همجي

اول ما اتقتل الجندي وقلت تفسير في الموضوع ناس هاجمتني وشتمتني واتريقت عليا ...وفي الاخر طلع صح بشكل كبير...الحادثة دي بقى فيها كام نقطة ناقصة

ويمكن لان شيوخ مسلمين آخرين عارفين ان الحقيقة لم تظهر كاملة والله اعلم هل هيقدر لها ده ام لا فعشان كده ممسكين عن الكلام

سامي said...

انا متضامن مع اهالي ضحايا المذبحة العبثية دى لكن ايه المطلوب منى كمسلم مصرى؟ احس بالعار والذنب كل ما اقابل واحد مسيحى واخده فى حضني واغسل قدميه بدموعي؟

أبو عمر - الصارم الحاسم said...

http://www.youm7.com/News.asp?NewsID=176198&SecID=65&IssueID=93

:S

مهندس مصري بيحب مصر said...

المفروض ما يبقاش فيه تصالح و حكم القانون و العدل هو اللي يتنفذ
ده دم ناس
أرواح بشر
لازم من قتل يقتل
و دي مفيهاش مسلم و مسيحي من قتل لازم يقتل

أما تهجير الأسر فده غلط طبعاً و لازم يرجعوا بيوتهم
بس حنحميهم إزاي ؟

Unknown said...

زقزوق

انا اقول لك مطلوب منك ايه كمواطن مسلم

نفس اللي انت تتمناه من مواطن الماني ايام حادثة مروة الشربيني بالظبط

شوف نفسك هو يعمل ايه وعامل الناس بما تحب ان تعامل

mido said...

مواطن مصرى

الاخوان كانوا حاضرين الوقفة الاحتجاجية

اقرا قبل متقول

أبو عمر - الصارم الحاسم said...

مش كنت لسه بقولك فيه حاجة ناقصة في القضية دي

لسه قاري الخبر ده حالا

http://www.almasry-alyoum.com/article2.aspx?ArticleID=239761

أبو عمر - الصارم الحاسم said...

هو لتاني مرة اقرا الكلام ده...الشاب المتهم باغتصاب الطفلة هربان واحتملا يكون محتمي بالكنيسة....الكلام ده مظبوط
؟؟؟

عندك معلومات يا نوارة
؟؟؟

أبو عمر - الصارم الحاسم said...

كل الاخبار بتقول انه محبوس وده الطبيعي بس فيه مكانين قريت فيهم انه هربان
؟؟؟؟؟

Unknown said...

الشاب المتهم بأغتصاب الطفله موجود بمكان لايعلمه الا أجهزة الشرطه والمباحث خشية الوصول اليه وقتله

وبعدين ايه اللى هايخلى النائب الغول يضحى بمركزه ويدخل نفسه فى قضيه زى دى ؟

Rateb said...

مش مقتنع لازم المسيحى يطالب بحقه الاول وبعد كده يشوف مين اللى يقف معاه لكن اروح اطالب لحد مش عاوز حقه وكل اما اكلمه يقول لى الرب يدافع عنكم وانتم قاعدين
وبالمناسبة التيارات الاسلامية تخاف من الاحراج يعنى الاخوان يهمهم مصلحتهم ولو هيعرفوا يعملوا خدمات للمسيحيين عشان يكسبوهم مش هيترددوا بس يخافوا المسيحيين يرفضوا رفض قاطع فيبانوا كانهم بيخطبوا ود النصارى والنصارى بيستعلوا عليهم ولكى ان تتخيلى تأثير ده على شعبيتهم بين المتدينين المسلمين غير انهم ممكن الكنيسة والدولة يتهموهم بمحاولة اثارة الفتنة ومحاكمات عسكرية بعد كده فالموضوع بقى صعب والمسيحيين خدوا جنب وصعبوا البموضوع علينا

منظور شامل للحياة السعيده said...

يسلم بقك

انا معاكي قلبا و قالبا

و متضامن و هشوف اقتراحاتك و لازم نبقى ايجابيين

Unknown said...

يوم الحساب
http://dostor.org/authors/11/49/10/january/10/2649?nocache=1#comment-5031

سكوت هنصوت said...

نوارة بجد انت حارقة دمي

انا هولع..ورحت النهاردة الشغل مسكت كل المسيحين الي في وشي وطحنتهم....طب اعمل ايه

انا هولع...بس ابوس ايدك بلاش حملات التسخين الي عالفاضي دي...ماهو كده الواحد هيجيله ضغط عالفاضي...طب قوليلي حل...اقترحي...مخمخمي..

نظام التلغرافات ده مش هينفع...

لازم حاجة اجتماعية ضخمة...ولو عايزة الحق بقى...احنا ننزل قدام الجوامع
بيفط نكتب عليها الساكت عن الحق شيطان اخرس

والله الوقوف قدام المساجد اولى وابدى...يمكن المسلمين يحسوا على دمهم

عم مينا said...

يا جماعة الشاب اللي اغتصب الطفلة المسلمة مقبوض عليه و بيتحاكم
متصدقوش كل كلمة بتتكتب