Tuesday 19 January 2010

ده هزار وللا جد؟

يعني بعيدا عن نبيه الوحش اللي سخر حياته لرفع قضايا على عمرو دياب، ده مش مهم انما ايه بيان مجلس الشعب ده؟
"وكان مجلس الشعب المصري قد شهد أيضا جدلا حادا بعد مطالبة 150 عضوا من الحزب الوطني الحاكم حركة حماس بتسليم قاتل أحمد شعبان.


وتلا أمين التنظيم في الحزب الحاكم أحمد عز بيانا وقعه 150 عضوا بالحزب يتضمن هجوما وصف بأنه غير مسبوق على الفلسطينيين, ولم يستبعد أي عمل بما فيه العسكري من أجل القصاص ممن وصفهم بـ"مليشيات فلسطينية" قامت بقتل الجندي شعبان.


وقال عز "إن صبر مصر ينفد لأن دم أحد أبنائها أهدر". وطالب عز السلطة التي تمثلها حماس بأن تثبت حسن نواياها بتسليم من سماه "القاتل المجرم الآثم".


نعم؟ نعم؟ نعم؟ نعم؟ مين ايه يضرب ايه عمل فين عسكري ليه؟ بتقولوا ايه يا امور انت وهو؟ والقاتل اللي قاعد بينكوا اللي شتم الست وقال لها انت مجرمة عشان كشفته وكلكوا غطيتوا عليه؟ وقائمة المصريين اللي اتقتلوا على الحدود المصرية من اسرائيل؟ انا عارفة ان كلام مجلس الشعب كلام فض مجالس مالوش اي قيمة، بس ايه اللهجة دي؟ طب يا كتكوت انت وهو ما طالبوا "العمل العسكري" ده انه يدخل يحرر غزة اللي احتلت وهي تحت حكمنا احنا واحنا اللي ضيعناها ويرجعها بقى تحت الوصاية المصرية لحد ما ربنا يأذن

والكلام ده بجد وللا بيفرقعوا كلام زي الكلام اللي قالوه على اليمن؟ اصل الواحد ما بقاش عارف لهم، مرة يفرقعوا تصريحات كده ولا ليها اي لازمة وينسوها بعد شوية، ومرة يقولوا كلام ويطلعوا كدابين، ومرة يقولوا لنا كلام غريب مالوش اي علاقة بحاجة ويطلعوا بيمهدوا لنا لحاجة تانية خالص، ومرة يفضحوا عضو مجلس شعب ويقولوا لنا في وشنا انه هو المحرض على القتل ويرجعوا يقولوا مافيش حاجة كله تمام، ومش بيبطلوا يفاجئونا
ده هزار وللا جد وللا هلوسة من اللي هم معتادين يقولوها، وللا تمهيد لما اسرائيل تضرب غزة اننا ما نفتحش بقنا، وللا ح نضربها بدل اسرائيل وللا هم مش دريانين بيقولوا ايه وبيتعاطوا حبوب هلوسة وكتاب الله، طب يمين بالله ده ماهو كلام ناس عقلها في راسها ابدا ولا مجمعين ولا عندهم سلك واحد موصل على التاني في مخهم
احنا ايه؟ انا مش مستوعبة، بس.. بصوا احنا ح نستنى، ح نعمل ايه طيب؟ ماهو انت لو بتكلم انسان عاقل تعرف تاخد وتدي معاه في الكلام، لكن لما تبقى عايش حياتك كلها في ناس بتهطرس لا عارف جدهم من هزارهم ولا كدبهم من صدقهم ح تعمل ايه؟ ح تستنى، يايرحلوا، يا تيجي مصيبة تاخدنا احنا لان شكلهم كده ولا حتى المصايب مستنضفاهم عشان تاخدهم 

8 comments:

مناكف said...

سيدتي
الموضوع جد و جد الجد كمان
يجب أن نحافظ علي سيادتنا و أمننا القومي خاصة و إن سيادتنا و أمننا القومي عندهم حساسية و فيهم واوا جامدة خاصة لما حد غريب بيقرب منهم و لكن بيحسوا بالراحة الجامدة لما حبايبنا الأمريكان و الصهاينة بيحسسوا عليها
ثم هل يمكن لمكابر أن ينكر أن حماس و حزب الله هما السبب المباشر لكل مشاكلنا
اليسوا السبب في سيول العريش و شرم الشيخ
اليسوا السبب فيما حدث لشرم الشيخ
أليسوا السبب في تفشي أنفلونزا الخنازير
أليسوا السبب في إنتشار رنات و صور الموبايلات القبيحة
أليسوا السبب في إن أحمد عز عمال يقصر و يتعقد نفسيا
هما السبب في الزراعة بمياه المجاري
و أخيرا عرفت إن هما السبب في إن شارعنا بقي إتجاه واحد مما يضيف علينا أعباء السير مافات طويلة
إن هؤلاء المجرمين بعد ما خرموا الأوزون في عملية إرهابية
عايزين يخرموا أمننا القومي و سيادتنا و إيه من الحتة اللي فيها الواوا
عالم مفترية

مواطن مصري said...

انا عاوز مصدر من رويترز لو سمحتي يا نوارة او البي بي سي او السي ان ان

ل الخبر دة لأن أكيد خبر زي دة ينزل في جميع المواقع العالمية

الخبر مصدرين فقط معادين لمصر

الجزيرة و الجريدة السورية

علا من غزة said...

عزيزتي نوارة

من شوية قريت قصيدة وحبيت اشاركك فيها .. هي على لسان رجل صعيدي راح بحري عشان يشتكي على مقتل الاقباط في نجع حمادي

النص شديد الخصوصية لدرجة اني كنت متوقعة اقرأ توقيع كبيرنا الفاجومي ..

النص موجود في هادا الرابط نقلا عن صاحبه



تحياتي

dr.lecter said...

مااظنش ان الكلام ده صحيح والا يبقي فعلا الحزب بيهرج اشمعني جاي دلوقتي ؟ هو فاكرنا عبط

حـنــّا السكران said...

الجزيرة و الجريدة السورية معادين لمصر يا مواطن ؟
تصدّق يا مواطن ..منطقك ممكن يخلّي مصر ذات نفسها , تصير معادية لمصر .

Tamer said...

و الله انا ما استبعدش اي حاجة على شعب الحزب الوثني , اي حاجة مش بعيد
بس اول مرة اعرف ان الوحش ده حزب وثني هو كمان
اي كلام في اي كلام

اه بمناسبة ان المدونة جبهة التهييس
حتة تهيييييييييييييييييييييييييييييس على تقيل اوي اوي اوي من تعليقات مصراوي
:))))))))
, و خلينا نضحك على الكوميديا السوداء اللي بنعوم فيها دي

طبعا ده اكيد من بتوع المرتبات الشهرية


* تعليق :mahmoudalmsre
* بتاريخ : 20/01/2010 12:48:00 ص

الجدار الفولاذي من اجل فلسطين
احب اقول ان الجدار الفولاذي ده لمصلحة الفلسطينين من قبل مصلحتنا لان ممكن مثلا اسرائيل تعمل هجوم او اتنين علي غزة فالفلسطينين يعملوا زي ماعملوا قبل كده ويدخلوا مصر ويسيبه في فلسطين قلة فاسرائيل تاخد باقي فلسطين وتبقي حققت اول حلم ليها وبعد كده تقولك لالا دي حماس موجودة في سيناء احنا ملناش دعوة هنهجم عليها ونلقيهم خدوا سيناء كمان

واوعوا تنسوا ان المعاهدة اللي بينا وبين اسرائيل رمزية لحد لما يتاكدوا انهم يقدروا علينا وبعد كده يتسلوا علينا وسلملي علي حماس
وغزة وطبعا مينفعش احطهم جنب بعض علشان ميضربوش بعض

شمس العصارى said...

و الله العظيم انتى طيبة
لا الناس دى عقلها فى راسها و بتتكلم جد الجد ابو الجد و جد الجد
اه و حياة الاخوة
الناس دى عاقلة بس فجرة و فسقة
عارفة لما الواحد كده محدش يعرف يلمه و الناس تقول عليه اصله خلاص فجر اهه هما دول كده
وبعدين الموضه اليومين دول شراء رضاء امريكا و اسرائيل حتى لو التمن دم فلسطينيين او حتى مصريين
على ما يبدوا ان ليس شروط الرئيس القادم موافقة اسرائيل و امريكا على ما يبدوا دى شروط وجود الحاشية كمان
يعنى الراجل بيشترى ود سياده حد ليه دخل ......... اما دى غريبة و الله ..........

مكنوش قالوا ان خرج العيب من اهل العيب ميبقاش عيب
الواد مقتول برصاصتين فى ضهره يعنى الضرب من مصر و شوف هما بيقولوا ايه
دول عدوا مرحلة الفجر و دخلوا فى مرحلة .........ولا بلاش اقلكم خليكوا عايشين يومي كمان فى مصر هههههههههههه
صدقى كلامى يا نوراة
انا واحد من الناس - وده غير الفيلم طبعا ههههه - من المطلعين على المستخبى و المدبر لسه برضه مش بتصدقى كلامى و تاخديه على محمل الجد
نلتقى بعد الفجرة - عز و امثاله
ها حتبطلى الطيبة دى امتا

Anonymous said...

حاجة وحد عايز افهمها هم ماذا يريدون من حماس هولا الذين يشحنون العالم ضد حماس ؟
حماس ـ تنتظر من أوربة والإدارة الأمريكيّة أن تحاوراها، بعد أن توقفّت عن المقاومة العمليّة، و..أعلنت أنها مع دولة فلسطينيّة في حدود الـ67، فهل في هذا الطرح تطرّف؟! أليس هذا هو الاعتدال المطلوب أمريكيّا، و
(مصريّا)، وعربيّا رسميّا؟
اتوقع كل مايريدونة من حماس هو الاعتراف بسرائيل التخلي عن حق العودةوعن الاسراء ومغادرة قطاع غزة وتسليمة للاسرائيلين.
وهاذا مالا تريد الشعوب العربية قبل حماس وقبل الفلسطينيون انفسهم.