Monday 18 January 2010

احنا معانا احسن ست، اوعي تنخي يا جورجيت

مواطن مصري جاب لي الخبر ده
ايه المهزلة دي؟ الموضوع اتلم؟ اتلم؟ انا اتلهيت في العيال اللي اتقبض عليهم وما اخدتش بالي من اخبار لم الموضوع
اتلم ازاي؟ وبيهددوا جورجيت؟ بيهددوها عيانا بيانا كده في وضح النهار؟
امال ايه بقى فهمونا انهم ح ياكلوا الغول والشاطر حسن ح يضرب الغول في وركه وكل الكلام ده، دول شككونا ان الغول يكون مظلوم من كتر ما نزلوا عليه هبد
خلاص؟ بعد ما اتفضح الفضايح دي ح يكمل عادي عضو مجلس شعب عاتشي يعني عاتشي؟ لا وايه؟ جورجيت هي اللي بتتهدد؟ والمحافص ح يكمل عادي بعد ما طلع يبرر للقاتل؟ والكموني ح يلبسها لوحده عشان يا قلب امه غار على شرف البنت المسلمة؟ مشجل خيطر عنده شرف

ايه اللي بيعملوه ده؟ في وشنا؟ في وشنا كده؟ بيقولوا لنا في وشنا احنا اللي مدبرين الحادث واحنا ح نلمه وماحدش له عندنا حاجة؟ زي ما مصطفى الفقي قال لنا احنا محتلين من امريكا واسرائيل والريس اللي ييجي لازم الباب العالي يوافق عليه؟
مش المفروض الرقاصة بتقول على نفسها فنانة استعراضية؟ فيه رقاصة بتقول انا رقاصة وفتاحة للزباين ما شاء الله ما شاء الله؟ ايه الوضوح ده؟
لا.. طب انا انهارت دلوقت حاليا، انهارت لما النظام قال لي انه رقاصة وفتاحة للزباين ماشاء الله ما شاء الله، عايزاهم يرجعوا يقولوا انا فنانة استعراضية
ما يقلعوش مالط، لو سمحتوا احنا مالناش ذنب نشوف المناظر دي
وبعدين ايه ده؟ ها؟ ايه ده بجد؟
"رد بسم ناقع"
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ثم عيب يعني، ده راجل قد والده، هو صحيح قال لنا في وشنا: في المديرية.. في المديريييييية
بس هو خلاص الحزب الوطني بقى شرشوح رسمي نظمي؟ مين اللي بيدربهم؟ ههههههه طب احنا مدونين، احنا مدونيييييييييييييين، فاهمين يعني ايه مدونيييييين، احنا لقيط لقيط فاهم يعني ايه لقيط، فاتحين المدونات دي عشان ناخد راحتنا، مش ح اروح شغلي اكتب الكلام ده
وبعدين عيب كده، تعملوا زي العيال؟ ده حتى فيه مثل صعيدي بيقول: دلع الكبار زي حك الزيار

ثم ايه ده؟ ايه ايه ايه؟ مين اللي بيعمل كده؟ مين المسئول عن حالة احلى هبل اللي احنا عايشين فيها دي؟ دول لازم بيتعاطوا حاجة، مش ممكن دي دماغهم الطبيعي سادة كده
هههههههههههه والله حرام عليهم، هم لو يعرفوا اللي احنا فيه ح يطبطبوا علينا ويبوسونا ويحطونا جنب الحيط زي ما خالد مشعل عمل في مؤتمر المقاومة في لبنان، والله انا لما سمعت كلمته قلت ده هاني شاكر، بس بعد ما شفت حالنا قلت الراجل حاسس بينا واحنا صعبانين عليه، قعد يقول: مصر حلوة، مصر جميلة، وشعب مصر طيب، وحياة حبيبك النبي يا مصر ما تعملي كده، قناوي يابني، قوم يا قناوي ده انا جبت لك بدلة الفرح، ده انا ح اجوزك هنومة، وجايب لك المهر في جيبي اهو، وبعدين مش عاجبكوا ايران؟ بلاش.. وحشة ايران، امشي يا ايران.. امشي، اهي مشيت اهي، شايفين تركيا؟ ايه رأيكوا؟ اجيب لكوا فستان زي اللي تركيا لابساه؟ هاه؟ والنبي ما تزعلي نفسك يا مصر.. ده انا باحبك
وعلى رأي واحد على التويتر قال: خالد مشعل طالع بيقول لمصر بلاها سوسو خد نادية، بلاها ايران خدي تركيا
وبعدين واحد طالع مع خالد الغندور يقول: اهم حاجة في العلاقة ما بين اللاعب والمدرب انها تكون علاقة "يشوبها" التدين
هو فيه ايه؟
----
ايه ده ايه ده؟ ايه الحوار ده؟ بصوا بصوا:
وهاجم اللواء عبد الفتاح عمر الفضائيات، وقال إنها كانت لها اليد الأولى لإشعال الفتنة فى مصر. وأضاف لا تستمعوا للفضائيات وقال إن أنس الفقى لا يملك أن يوقفها عند حدها مشيراً إلى ضرورة إصدار تشريع لمواجهتها.


وقال لم أسمح بوجود فتنة طائفية فى نجع حمادى ولم يسمع بها أهالى قنا ـ وإنما أنتم من ترددونها الآن كما لو كنتم تحرضون البرلمان الأوربى للتدخل فى شئون مصر وتابع قائلاً بس المجلس الأوربى رئيس أوربا وأمريكا
(الاتحاد الاوروبي رئيس امريكا؟ والسنغال طبعا.. نسي السنغال) .


وقاطعة سرور مطالباً بحذف سبه لأوربا وأمريكا
( هو شتم اوروبا وامريكا في ايه؟ ايه ده؟ فيه ايه؟ ماهو يا اما اللي كتب الخبر مجنون يا السادة اعضاء مجلس الشعب كانوا شامين غازات سامة قبل الجلسة، طب اشمعنى جورجيت وابتسام ما شموش حاجة؟ طب كاتب الخبر مجنون، طب اشمعنى مش بيحط على لسانهم هلاوس زي اللي على لسان السادة النواب التانيين؟
وتصدقوا بالله؟ النائب الوحيد، الراجل، اللي قال كلام كويس هو نائب الاخوان)


وأكد حسين إبراهيم نائب رئيس الكتلة البرلمانية للإخوان. إدانته لما حدث وثقفة فى القضاء ولكنه أشار إلى أنه يتمنى أن تكون هذا الحادث هى الأخيرة، ولكن ليس بالتمنى سيتحقق الأمر. وطالب بأن تكون سيادة القانون هو أساس الحكم عندما تقع أى مشكلة وأضاف أن هذه المشكلة ليست حصرية على جهد واحدة مشيراً إلى أن الأمن لم يكون قادراً على حلها.


وقال نحن فى أشد الحاجة إلى حوار حقيقى وليس حوار شكلى، يتم فيه تبادل القساوس والشيوخ الأحضان والقبل، مشيراً إلى ضرورة أن يضم الحوار جميع طوائف المجتمع لا يتم إقصاء أى طرف منه.
(طب يبقى العيب مش من الصحفي اهو، وبعدين جورجيت وابتسام حبيب وحسين ابراهيم مع بعض في جبهة لوحدهم وبقية المجلس بيقول لهم انتوا بتشعللوها ليه؟ عشان عايزين الناس تاخد حقها، كده يا اما جورجيت وابتسام رجالة يا اما حسين ابراهيم ست، ويا اما جورجيت وابتسام اخوان يا حسين ابراهيم مسيحي، وعموما هم التلاتة تبع الاتحاد الاوروبي اللي بيحكم امريكا والسنغال والتبت ومزارع دينا)
وبعدين السي اي ايه بعد ما جندت الكبار في مصر فتحت قسم للاشبال
لا فيه حاجة مش مظبوطة، يا اما انا اللي اتجننت بقى، مش ممكن كل الناس دي غلط وانا وجورجيت وابتسام وحسين ابراهيم بس اللي صح

18 comments:

mido said...

اتكلمتى على كل حاجة ماعدا الكشف الاثرى الخاص بكابييير الهوارة
:D

mido said...

لا متجننتيش ولا حاجة

هى هى نفس المسرحية بتاعة كل مرة

amr565 said...

بصراحة الموضوع باخ جدا في جريمة حصلت وتم القبض علي الجناة هل المطلوب جعلها ظائفية وان العيال دي عملتها علشان خاطر الدين طب ازاي والمسيحيين عايشين بيننا تمام ولما تكلم واحد مسيحي تقوله ايه المشكلة يقولك الكشح وديروط وفرشوط ودي كلها حدثت للرد فعل ورد الفعل ساعات مبيكنش محسوب بالورقة والقلم يعني بنت اغتصبت يبقي الرد واحد قتيل فقط وهكذا لا طبعا لاتحسب هكذا عند المتشنج هل في شي ابعد من كده يعني مثلا مطالب طائفية بالمس بالمادة التانية في الدستور لاني مش شايف مشكلة جريمة حصلت والناس والمشايخ وا لحخامات حتي ادنوها وتم القبض علي الجناة ولا اليسار الكاره للاسلام والليبراليين واقباط المهجر ما صدقوا وحبوا يركبوا الموجهوخلاص باختصار اي مطلب طائفي يصدر من اي حد بعد الحادثة دي يبقي مفهموم هما بيعملوا هيصة وهليلة ليه واي حادث وجريمة حيعملها مسيحي حعتبرها طائفية ونطالب بمطالب احنا كمان هل حينشر تعليقي حنشوف?

lastcrazyboys said...

http://international.daralhayat.com/internationalarticle/98625

انا عارف انه مش وقته

بس ســؤال لولبي..الموقف ده لو كان من مصـــر ..ضد واحد من بتوع "حمــاس"

مش كان هيبقى ازاااااي..ده موقف انســاني
ويسقط يسقط حسني مبــارك

وافتحوا المعابر..وفكوا الحصــااااار

وكان الحاج " جالاوي" بجلالة قــدره ..هيهز طوله ويتدخل عشان الموقف الانساني

==
انا بس حبيــت اسجـل ..انه مفيييش فــرق

وزي لما واحد ارسل لي كشف بأسماء شخصيات من هنا ..ومن هنا

قلتله : حسستني انه "أفيــش" لفيلم جديد
"!!.....اسمــه "كلهم ولاد وســ

Anonymous said...

الاسم على مسمى وربنا تهييس فعلا انا عمرى ما دخلت مدونتك يا نواره الا لما طلعت لازم ابص على الساعه والموبايل اشوف انا لسه عا يشولا لا واول مره اعلق بس قبل كده كنت بطلع تايه تايه حرام عليكى الى بتعمليه فينا ده ....على فكره انا عندى فكره تدوينه هاعملها قريب باذن الله هايتريح كل المدونين كلهم وتخلى الحياه حلوه ............بالنسبه لموضوع ناصر شوفتى حد يا ظالمه بيكتب فى حد مقدمه كتاب 2.5 صفحه الا لو كان عزيز ..........وبعدين من الاخر كده زى ما ناصر اتغدى بالمشير قبل ما يتعشى بيه عملها السادات وهايعملها زعيم الهجانه باذن الله فى امن الدوله ههههههه......فلتحيا المقاومه الغطس....انا مش عارف انتى بتجيبى الطاقه دى منين تكتبى التدوينات كلها ...........بس طول عمرى بافتكر حكمه امى ان البنات يا ابنى فيهم صحه اكتر من الرجاله ومع ذلك بيخلوا الرجاله تشتغل وهما يشتغلوا الرجاله ههههههههههه...........تصبحى على خير مش عارف اشكر تويتر ازاى انه عرفنى بناس دماغها عاليه زيكو .........صباح الفوقان

dr.lecter said...

مش بيقولك اللي اختشوا ماتوا

هو ده فعلا اللي بيحصل اليومين دوول

شمس العصارى said...

انا لسه بأكد على طيبتك
بس مش انا فهمت الموضوع و جبت من الاخر قبلك هههههههههههههههه
مش انا من ايام قلتلك الموضوع اتلم و انتى مصدقتنيش يعنى لازم مجلس الشعب هو الى يقلك الموضوع اتلم ههههههههههههه
و بعدين حسين ابراهيم مش ست لا ده راجل و جرورجيت و ابتسام هما الى رجالة - لان الرجولة صفات و افعال و ممكن الانثى تبقى راجل - و بعدين ده مش غريب على الاخوان
طول عمرهم كده و حيفضلوا كده و متستغربيش ان مسيحيين يحترموا الاخوان او الاخوان يدافعوا عن الحق حتى لو الحق مع مسيحى هو انتى نسيتى ان جنازة حسن البنا - الله يرحمه - كان يتقدمها مكرم عبيد باشا
و اهالى قنا محسوش بالفتنة يمكن القول ده فيه بعض الصحة - بس من الناحية التانية - لان اهالى قنا يعيشون خارج نطاق زمن الدولة و مهمشين و و مش واخدين حقوقهم ولا حد حاسس بيهم و نوابهم بيبيعوهم للحكومة و الامن بيفعل ما يشاء يعنى بعد الموضوع ده الاهالى فى قنا مش مستغربين قوى يعنى
تاكيدا لما قلته : المسيحيين البسطاء هم الخاسرين الوحيدين من صفقات الكنيسة و النظام ، سلوك النظام -الامن و الحزب - فى الموضوع ده بيدل على سلوكهم المستقبلى فى مثل تلك المواقف
، الموضوع اتلم من ايامه الاولى - بس انتى الى مصدقتنيش - ، جورجيت حتخسر كتير - و ده يشرفها - ، طول عمر التيار الاسلامى و على راسهم الاخوان بعيدين عن الطائفية ، الحزب المش وطنى حيظل قابض على الاوضاع اكثر و اكثر .........
و انتى مجننتيش و لا حاجة - اصمله عليكى من الجنان - و انتى و جورجيت و ابتسام و حسين و كتير تانى صح صحو وماشيين فى الاتجاه الصحيح بس الاكثرية ماشية فى الاتجاه المعاكس علشان كده الصورة بتدى مدلول خاطى
و النبى ابقى صدقينى لما اقلك على حاجة تانية
نلتقى بعد المدونيين
الا صحيح شوفى كده انا قلت ايه قبل الفقى ما يتكلم بكتييييييييييييييير
http://shamsal3sary.blogspot.com/2009/12/blog-post_20.html
و الله انا شكلى بفهم مش زى ما بتقولى انتى ههههههههههههه

Unknown said...

نوارة

أنا راضى ذمتك ودينك وأنت ست محترمة بتدرسى الدراما والسيناريو بشل أكاديمى ياريت تجاوبينى بصراحة

هل ما كتبته الست بتاعة اليوم الساقع يوحى بحال من الأحوال أنها درست صحافة أو حتى شرفت الأعدادية بالحصول عليها

وهل الأسلوب الذى يكتب به رئيس تحرير المساء يوحى بأن الأفندى شرف kg2 حتى بمجرد المرور

والله والله والله

أن الموضوعين لو كتبهم طالب فى ثانوى فى موضوع تعبير لازم يسقط

Unknown said...

يانوارة

اهدى بقى عشان انتى مزوداها قوى ... الموضوع ليه دهاليز وكواليس طبعا بس البومة اللى اسمها جورجيت دى مش ست الستات ولا حاجة وده مش كلامى ده كلام ناس مسيحيين كتير أعرفهم وهما مقتنعين تماما انهم بيتلعب بيهم من جهات خارجية لتحقيق أهداف مش فى مصلحة البلد.. وحكومتنا العبيطة لا عارفة تبقى متواطئة ولا عارفة تبقى عادلة

بعيدا عن كده أنا بانصحك تحملى كتاب قذائف الحق للمرحوم باذن الله الشيخ الغزالى وبالذات الفصل التالت

حاتلاقيه ع الفورشير

الخوجة said...

زرغتوا ياللى انتو معانا :عقد قران الدكتور أحمد نظيف الشهر القادم على مسئولة بوزارة الاتصالات

لووووووولى طرع طرع طرع

عندك وقت وصحة يابختك ياعم

عقد قران الدكتور أحمد نظيف الشهر القادم على مسئولة بوزارة الاتصالات

http://www.masrawy.com/News/Egypt/Politics/2010/january/18/nazeef_marriage.aspx

Unknown said...

طبعا مزوداها
عشان مالكش اب ولا اخ ولا ابن راح في مذبحة وما اطردتش من بيتك ونايم زي اللاجئين

لازمتها ايه اوجع دماغك؟

Unknown said...

نوارة

طب هو انتى كان عم أحمد ولا أمنا صافيناز هانم لاقدر الله فى الموضوع و أنا ماعرفش؟

ماتبقيش ملكية أكتر من الملك يا ستى ودورى على الكتاب اللى قلت لك عليه

على باب الله said...

المسجل خطر اللي طول عمره بيتأجر إيجار جديد ... قرر فجأة أنه يشتغل شُغل حر ..

مش ناقص في الحكاية غير أنه يطلع متخلف عقلياً هو و زمايله و أن الدولة تعمل قعدة صُلح عُرفي علشان تبقى حادثة كربون زي بقية ام الحوادث المشابهة في بر مصر المحروسة

Unknown said...

لا الحمد لله
بس باحس بغيري
بعيد عنك دي مسالة احساس بس

عم مينا said...

amr565

يا ريت تشرحلي ازاي المطالبة بالمس بالمادة التانية من الدستور طائفية؟؟

سامي said...

ما يهمش يا خبيث
انت عايزها تقرأ الجزء الخاص بمحاضرة نظير جيد فى الكتاب صح؟
لا دي مبتفرقش معاها ولا بتاكل من الكلام دا

كان غيرك اشطر يا واد
هى مع الوقت حتهمد كدا وتسكت لحالها
اهمدى يا نوارة

Unknown said...

الاحساس عند كل الناس يابنت الناس

وبلاش الغلط وطولة اللسان ع اللى بيكلموكى بأدب عشان قلة الأدب مافيش أسهل منها

Anonymous said...

الاشبال بتوع السي اي ايه واحد سئط
نظام حكم الجزائر دكتاتوري للابد
ما انا قلتله وفهمته
لا برضك مهما حصل ما تأخذنيش اللى
عملته مايصحش هو قمعي اه استعبادي وراثي اه بس تكتاتوري عمروه ما حصل