Thursday 14 January 2010

عفوا غزة.. انا لست متضامن

باحبه قوي، امور والله، يا حبيبي
ده واحد من الحزب الوطني جه الندوة بتاعة الشبكة العربية اللي اتكلمت فيها في الجلسة التانية
في الجلسة الاولى اتكلم حسام الحملاوي والدكتور نادر فرجاني، جميل الدكتور نادر الفرجاني، قعدت اسقف له جامد
المهم وقف شاب كده وقال انه مدون وانه في الحزب الوطني وقعد يشتكي لنا اننا ناس مرفهة عشان عمالة تشتكي من اضطهاد الحكومة بينما الناس نفسها بتضطهده بامارة ما كان عامل جروب اسمه: عفوا غزة.. انا لست متضامن، قامت الناس فضلت تعمل للجروب ريبورت لحد ما اتشال

ده ايام ما غزة كانت بتضرب والعيال بتتفحم وكلنا عندنا صدمة عصبية، فاكرين؟

مش فاهمة جمال عيد وحسام الحملاوي اتوتروا ليه من كلامه، ده كلامه مزجني قوي، خصوصا انه في الجلسة التانية قال لنا انه من الحرس القديم ومش تبع جمال، وان الحرس القديم شمتان في جمال انه بيتشتم
انا بصراحة ما صدقتش انه من الحرس القديم دي، اصل كل الشباب اللي دخلوا الحزب الوطني ماحدش غرر بيهم غير جمال مبارك، بس الظاهر احنا اتكينا عليه قوي، وحسام وكريم البحيري انهاروا عليه، وانا قلت ان الانظمة بتحاول تدخل مجال النت في حملات مضادة بس اغبى واحد استخدم النت هو يا عيني جمال مبارك عشان جاب عيال لبسهم بدل ونضارات شمس وخلاهم يقولوا: مصر وفلستين مندمجين اندماج فزييييع
كان قصدي على الواد ده



يا حبييييبي، حلوة قوي عربية الكبدة اللي في وشه دي، المصيبة اني لما قلت للواد بتاع الفيديون انت في لجنة السياسات ما انكرش، يا روح قلبي
بس الاستاذ اللي من الحرس القديم قال: جمال مش غبي، هو لسه بيحاول
لا حول ولا قوة الا بالله، بقى دي محاولة دي يا جيمي
طب استحلفكم بالله تكملوا الفيديو للآخر، شايفين المحاولات؟  لا وفيه من ضمن المجموعة دي، (هو اصل الامور اللي مقفل وشه بقبنوري المنيوم ده عامل مجموعة لتوعية الناس بخطورة غزة) من ضمن المجموعة دي واحد مسمي نفسه
Egyptian Nazi
هو جمال مبارك بيحلم انه يبقى زي هتلر؟ يا حبيييييييبي، ماهو جمال مبارك من ساعة ما مسك البلد والبلد عمالة تتجه نحو النازية والشوفونية بهيستريا، وهو اللي مالي لنا الشوارع: بنحبك يا مصر عشان احنا شعب اصيل
وهو بتاع مصر لا مؤاخذة فوق الجميع، حتى الراجل اللي كان عايز يغير العلم امبارح في العاشرة مساء طلع تبع جمال مبارك
اممممم، بقى طلع هتلر مثله الاحلى؟ روح يا شيخ، اشوفك مهندز قد الدنيا

السؤال اللي بيطرح نفسه، واحد من لجنة السياسات مع الجدار، وواحد من الحرس القديم مش متعاطف مع العيال وهي بتموت: ايه سر العداوة اللي بين الحزب الوطني وبين غزة؟
هل مثلا، بما ان كل هتلر لازم له يهوده، وقع اختيار جمال على اهل غزة عشان يحطهم في المحارق؟ عموما هو ابتدى بالغاز الف الف الف مبروك لشعب غزة، لو جمال هتلر، وهم اليهود، ربنا ح ينفخ في صورتهم ويبقوا قوة نووية ويسيطروا على العالم واحنا ح نشوف ايام سودا وح تختم باننا نبقى تحت رجلين الفلسطينيين عشان نستسمحهم من اللي عملناه فيهم زي ما المانيا عمالة تستسمح في اليهود دلوقت...بعد ما الباشا ينتحر زي مثله الاحلى

ياللا بالشفا

43 comments:

Fatma said...

ههههههههههههه رهيييييييييب رهيييييييييييب هموووووووووووووت مين دا ازاي كدا هو بيتكلم كدا ليه احييييييييييييييه

مواطن مصري said...

الواد بيقول كلام زي الفل اهو قال كلامي ب الظبط دة غش مني يا نوارة

محمود سعيد said...

اللى فى الفيديو ده مدون قديم على فكرة من 2006
http://modernpharaoh.blogspot.com/

عايش فى أمريكا وميعرفش حاجة عن مصر

هو بس فاكر أنه يعرف عن مصر كل حاجة

Phobos said...
This comment has been removed by the author.
دعاء said...

في إيه ليه كده يا نوارة أحنا عملنالك إيه علشان تعملي فينا كده وتحطي الحاجات دي..

ده أنا عندي عيب خلقي بأني مخلوقة بمرارة واحدة راحت كده

مين مسر دي؟؟ و مين فلستين؟؟
ومين الكلام المنتكي و واكعي دي؟؟

هما أخترعوا كلام؟؟

وليه أحنا وحشين قوي كده وكل حاجة عايزين نقول الأسرائليين و أمريكا غالطنين إيه الوحاشه ألي أحنا فيها دي؟؟

أما أحنا وحشين بجد وأحنا مش عارفين

تؤ تؤ تؤ وكمان مكناش عارفيبن إن حماس عملت حاجات غلط، كمان؟؟

طب إيه الحاجات الغلط دي يا ترى؟؟ معملتش الواجب ولا سرقت الأستيكة بتاعت مصر زميلتها في الدسك؟؟

ربنا موجود وبيشفي برضة مفيش حاجة كبيره على ربنا أبدًا

MoMo said...

ابوس ايدك يا نوارة شوفيلك حل في الاخ مواطن مصري ده وبلاش حالة الاستبحس اللي الواحد بيحس بيها كل مرة ييجي يقرا التعليقات . هو انا عاوز اعرف هو بيعمل ايه هنا؟؟ مش شايف يا عم الحاج ان البوستات كلها ضد افكارك علي طول الخط؟؟ والمشكلة اني بحس انه سايب الدنيا كلها ومتفرغ للمدونة دي ودايما اول تعليق؟؟؟ انت بتشتغل فين يا مواطن؟ اقصد انهو فرع؟ لاظوغلي صح؟

Unknown said...

dah bytkalem 3araby mkasar a7a

Sosso said...

حرااااام عليكي الواحد اصلا مش قادر تجيبيلنا عيل كيجي وان واخد بونيه في الفسحة يدينا درووووس. قرف آه مصر اكتر واحده فيها اجتماعات عن فلسطين عادي يا روح مامي ماهي لازقاها على طول لعنة جغرافية عارفها دي وعل
ى فكره الملعون مش مصر وبعدين ايه حدوته مصر اكتر واحده عملت عملت ايه معاهده و طلعت من الجاهعة العربيه و الا نسينا؟؟؟؟؟؟ يعني من الاخر روح ذاكر يا ماما و بعد كده اتكلم بس و انت في كجي وان ما ينفعش.
.

justicentric said...

Funny that searching for that group name shows a link to the group which does not work and then your post! :)

Someone's gotta make some study of the current practices of the Egyptian government. Amazing how overtly fascist their strategy for survival is. Even more amazing how many Egyptians fall for it!

مواطن مصري said...

momo انا حر اعلق براحتي في اي مدونة

انا عاوزها انت مالك و احترم نفسك لأني مش شغال في لاظوغلي ولا تبع مليشيات اخوان

سيد المعلمين said...

حرام عليك. ضيعت النص بيضة اللي انا عايش بيها !

علا من غزة said...

دعاية مجانية للنظارات

هههههههه

الخوجة said...

انتى يابنى جاى منين
انته ماتعرفش ان هى حديقة دولية الا حالا
دا بيغسل سنانة
وبلغة الفلاحين شفايفه حمرا وبيغسل سنانة يعنى شاب فرفور ماكسرش ولا سنة
دانته سنتك بيضة مين بقى طارق معاكم ده
وترد بصفتك ايه تتكلم عن مصر هو دة التضامن بالبق
الجدار ده يمنع عن مين محدش يحوشنى سيونى يعنى ايه جوة او برة مصر لألأ ياروحى سينا حديقة دولية وشوف على الطبيعة والشواطىء بتاعتهم على ارض مصرية انتى اعمى ولا ايه حكايتك روح ياض اجرى مين اللى ضحك عليك كل كلامك غلط وشكلك بتغسل ايديك ووشك بالصابون وبتشرب زيت عافية الواد دة خريج مدارس خاصة مش مدارس حكومة لامؤاخذة ماعندناش حد متربى فى مدارس حكومة لهجتة كدة ده ابن مدينة الرسمة دى مش خريج اقاليم لامؤاخذة دا شكله بيشرب كانز ونايتى وضحت فى عهدنا عهد مين بقى
يقول نص جملة صح والباقى مهبب متحفظ نايتى اوى وطعم دا اللى بيعملوا علية الطابور

الخوجة said...

اللى عاوز يبكى بجد ويغسل قلبة من هموم الدنيا

كلهم يقرأوا القصة انتى لا يانوارة انتى العياط عندك توماتيكى بلاش انا باقولك اهه

قصة براءة

Anonymous said...

بعض الحكومات العربية شراءت اسلحة
وجالسة تجربها .ضد مجموعات
قد لا تحمل السلاح .ما يستحق الضحك
ان هاذي الاسلحة غير صالحة للأستعمال
تم الاستغنا عنها من قبل الغرب
مقاتلات لا تحلق اكثر من نصف ساعة
صواريخ لا يمكنها الوصول الي تل ابيب
وكن هدف هالجيوش والاسلحة هي قمع المواطن لا اكثر .
ومنذ سنوات طويلة والدول العربية تشتري الاسلحة التي أصبحت الآن غير صالحة للأستعمال بسبب عدم مشاركتها في إية معركة ( قومجية )وسباتها في المخازن التي خسرت الدولة على حراستها أكثر من سعر شرائها عشرات المرات .. والتي أصبحت حاجة مكلفة على المواطن العربي أكثر ما هي حاجة ماسة لهذا المواطن الذي لو كلف له الامر لباعها في سوق الخرده وبنا من سعرها منزلا يليق به ولاطفاله الذين يشكلون أهم مصدرا للقوة في حالة الاعتداء على البلد ..ولنا من صدام حسين والقذافي تجربة مازالت ماثلة أمام الانظار ..الاول يعد جيشه من أقوى الجيوش العربية من حيث التجربة القتالية والتعداد البشري ونوعية التسليح ..ولكنه كان يفتقر إلى أهم نقطة يستند عليها هذا الجيش .. وهي الالتفاف نحو القائد وحب الوطن الذي أصبح مقصلة لقطع رقاب المواطنين..والثاني ما أن رأى هزيمة الاول حتى سلم كل ما بجعبته والتي كلفت أبناء ليبيا سنواتهم من الحصار والتقشف والإضطهاد الذي مورس ضدهم .

اما هتلر جمال المدلل الصغير
فهو هتلر على شعبة .
وكل عام وغزة حرة.
.
تفاعل .. أرجو ألا يكون أزعجك

بهيج الشرير said...

إيه الواد ده ياأبلتي! وإيه النضارة الخشب اللي مستخبي وراها دي اللي عاملة زي نضارات عصابة القناع الأسود، بس أحلى حاجة في الفيديو ده بنطلون البيجاما الكستور اللي لابسه مع الجاكتة صوف العسكري والكرافتة الجبس دي

dr.lecter said...

جامد كيييك

لا لا معدي بيفكرني باللي مايتسموش بتوع حاله حوار

dr.lecter said...

الواد ده خريج الامريكان كوليدج

عم مينا said...

هو ده ابن أبو الغيط؟
أصل حتة من هب و دب دي مركة مسجلة

Unknown said...

مفيش مانع ان حد يقول رأيه
بس من غير الثقه والفرشخه دى ياعم الأمور


بيتهيالى انه عايز يخش معهد السينما فقال امثل مشهد كوميدى وأشوف رأى الناس

Mahmoud Ibrahem said...

يا استاذة نوارة...صباحك جميل ..مين قال ان ده في لجنة السياسات ؟؟؟
لجنة السياسات موجود اسماء اعضائها علي الانترنت و معروفين ومش فيها ده
الاهم حتي لو هو قال هو يقول اللي عايزه ...انا يا ستي هعمل فيديو زي ده و اخلي عبد الله كمال يسألني و اقول انا اشتراكي ثوري ..خلينا موضوعيين أكثر من كده

Mahmoud Ibrahem said...

صباحك حلو تاني
...انا حطيت ردي علي مدونتي
ده لو عديتي الكلام يعني
يا بتوع الرقابة
:P

LiNa Sh said...

لأ ماشاء الله
لأ عبقري
وان هاندريد بيرسينت عبقري

مافيش فلستيني يقدر ينكر اندماجه في القدية الفلستينية

Unknown said...

محمد ابراهيم

انت يا عم الامور انت بتشتم حسام الحملاوي؟

انت تشتم حسام الحملاوي انت؟ ومن غير سبب ومن غير ما يعمل لك حاجة؟ وكمان بتكدب وتقول حسام الحملاوي قمعك وصادر حرية رايك؟

بقى احنا نقدر نحضر مؤتمر للحزب الوطني اساسا ناهيك عن اننا نقف نقول راينا زي ما احنا عايزين زي ما انت عملت؟

حسام عملك ايه عشان تطول لسانك عليه؟ ها؟
سابوك تتكلم من غير ما يقاطعوك وحسام رد عليك وقال لك انا ضد انه يتعمل لك ريبورت وانا لو كنت شفت الجروب بتاعك ده كنت اخدت لنك ليه على مدونتي

وكعادة اي واحد من الحزب الوطني قعدت زي القطة ما ردتش ولا اتكلمت ورجعت على التويتر تغلط في حسام

بص بقى، انا اللي يغلط في حسام الحملاوي انشر لسانه بالمنشار انت فاهم؟

وما تحاولش تتشهر عندي تاني لو سمحت

Unknown said...

اه ونسيت اقول لك

انت من نوعية المصريين الجدد اللي وجها لوجه ما يقدرش يعمل حاجة ويبقى مهذب وخجول وامور واول ما يستخبى ورا الكمبيوتر يكدب ويألف ويشتم ويغلط

وتغلط في حسام الحملاوي؟ حسام الحملاوي

كده انت حطيت ايدك في الكبس معايا بقى واشتريت عداوتي انا شخصيا

Unknown said...

هدى نفسك يابونسمه مش كده

هو محدش تابع توكيلات مركز هشام مبارك ليه ؟

التوكيلات راحت فين ؟

Tamer said...

نياهاهاهاهااهاههاهاهاهاها

زي العسل و الله
عسل عسل يعني

Mahmoud Ibrahem said...

يا استاذة نوارة ...انا مش بشتم حد ومش بحب أشتم حد ...و الاستاذ حسام الحملاوي انا فعلا مش اعرفه و كلامي عنه مش غلط فيه لا خالص ولكن نوع من الاعتراض لان هو سخر من أفكاري و انا كمان سخرت من سخريته عليا

انا مش مصري جديد و لا بخاف انا مش حبيت اخرج عن قواعد الندوة و اقاطع و ازعق و أرد ...يعني صمتي نوع من التحضر و احترام القواعد المنظمة للندوة ...لكن يعني انا مش عندي مشكلة خالص في الرد
و يا ستي لو حتي كلامي خرج عن اللياقة لكن مش بقصد التجريح اطلاقا و لكن لاني مش حبيت ارد في الندوة و تبقي مش لطيفة لما نقاطع بعض قولت يعني هنا لطيف برضه
و من فضلك تقبلي اعتذاري ليكي و للاستاذ الحملاوي واللي انا هختلف معاكم طبعا من هنا للاسبوع الجاي لكن مش بشتم و مش احب ان يبقي ده الانطباع عني ابدا و تحياتي ليكم جميعا

Mahmoud Ibrahem said...

و بعدين انا ليا عندك حق عرب لانك من قبل ما اشوفك من الندوة و انتي عملتي بلوك لما رديت علي شتيمتك في السادات
يعني تعذريني بقي لاني لما شفتك في الندوة كنت متحفز ضدك شوية
:P

شمس العصارى said...

الواد - وبقول واد عيل يعنى - عنده حق فى كل الى قاله من خلال افعال الحزب و كل الى قاله يمثل رؤية الحزب الوطنى و اذنابه
منتظرين ايه منهم يعنى
و الواد حابب يقلد كبرات الحزب الوطنى فى طريقة كلامهم
و الحق اقول هو لا يختلف عنهم كثيرا فعلا الواد و كبرات الحزب لما تسمعهم بيتكلموا تحس انك بتسمع بهايم بتنعق و مش فاهمة حاجة و لا عارفة الى بتقوله
اخيرا : سلام على الحزب الوطنى
سلام وداع لا سلام قدوم
نلتقى بعد الحزب الوطنى

الدرويش المرووش said...

أنا كنت بأسمع ستى الله يرحمها بتقول جتها نيله اللى عايزه خلف
بس أول مره أفهم معناها إيه

و الله يا حاجه ولا ليكى عليا يمين
أنا و أنا بأتفرج إفتكرت اﻹعلانات القديمه بتاعة مزارع التونسى

مش عارف ليه

Unknown said...

يتعرض صيادون فلسطينيين للاعتداء الجسدي واللفظي وتقطيع شباك صيدهم، عندما يعبرون بقواربهم بضعة أمتار من الحدود البحرية المصرية، لأنهم بحسب القوانين والأعراف "تجاوزوا سيادة بلد مجاور".


http://www.aljazeera.net/NR/EXERES/20F96F82-C1A7-4988-AF03-ABBEE030A278.htm

Modern Pharaoh said...

هههه شكرا إنك مهتمة بيه. أولا أنا مش في ولا حزب و بكره الحكومة إلي وديت مصر في داهيه ديه. لكن مش معنى إني ضد الحكومة يبقى لازم أي حاجة يقولوها أعمل عكسها. ثانيا كلمة عربية كبده ديه تدل على ألفاظك المهم النضارة لإني بتعامل مع مجانين فى هي نوع من التنكر. لما تعملي فيديو و تظهري فيه إبقي ألسي. بعدين الفيديو بيتكلم عن الجدار تحت الأرض فقط ليمنع الأنفاق عشان محدش يدخل أو يطلع حاجة من مصر بدون رقابه..و لو إنتي مش متابعة الأخبار و شايفه تفجيرات كل يوم في باكستان..اليمن..ساعات الجزائر و و و بإسم الدين ده على طول بيحصل..و ممكن يحصل في مصر بعد الشر عشان كدة لازم لازم نأمن الحدود..مش ليمنع مسعدة أهل غزة..لازم نساعد غزة و ده واجيب لكن من فوق الأرض مش من أنفاق تحت الأرض. ده الكلام المنطقي...و حاجة تانية مين EGYPTIANNAZI إلي حضرتك بتقولي إنو صديقي ده؟ بلاش تتبلي على الناس و الشهاده الباطل ديه...أنا ولا حزب وطني ولا بكلم الولد ده أصلا أبدا.

sorry 3la el spelling bas i'm using google translate li2in ma3andish keyboard araby!

Modern Pharaoh said...

و كمان بتقولي إني اتكلمت في الحزب الوطني هههههههه سبحان الله ....يا بينتي بطلي شهادة زور إيه الجنان ده بس..أنا واحد بيحب بلده حنضم للحزب إلي ضيع البلد؟ ههههه لا و بيتكلمي أكنك شفتيني و متأكده ١٠٠% يا سلام يمكن بأه أنا انضميت للحزب و رحت اتكلمت هناك و عملت مدونه و أنا مش واخد بالي،،هههه ..يأ ريت قبل متكلمي على الناس تكوني متأكده من معلوماتك ..و كمان واضح جدا من كلام كتير من العيال الهابطة ديه هنا ذي اللي بيقول "ده بيغسل سنانه" أكن مثلا غسيل السنان ده وحش إن جمهورك عبارة عن شباب ماجر نص ساعه في نت كافيه و بيتكلم بدون أي معلومات أو أي منطق...أصلا أنا متفق معاكي في معظم كتابتك للمواضيع التانيه و مش شايف إختلاف كبير بنا إلى في موضوع الجدار.

again sorry fo the spelling ya gama3a using Google because i dont have an arabic keyboard

Unknown said...

ايه ده ايه ده؟

انتي جيتي يا حلوة

يا حبيبتي

وكمان ما بتفهميش هههههه

Unknown said...

قول لي يا كابتن

هو جوجل ترانسليشن بيكتب بالعامية المصرية؟

Unknown said...

وعلى فكرة انا قلت لك انت من لجنة السياسات وانت قلت مالهم بتوع لجنة السياسات؟
ههههههههه
ثم انا ما قلتش اني شفتك ده واحد تاني انت دخلت شخصيتين على بعض

Nemo said...

ههههههههههه جامدة يا نوارة الترانسليشن اللى بيترجم بالعامية

أصل هو بيستعمل جوجل يادلعدى ترانسليشن ... على قد فلوسه ... زى النضارة اللى ضارب أمها وهى أصلا نضارة بحر بس مقيفها

Unknown said...

انت ازاي تقول لي انا باستخدم جوجل ترانسليشن وانت كاتب بالعامية المصرية؟

انت اتجننت؟

انا مش مصدقة عينيا

justicentric said...

قصده على جوجل ترانسليتريشن. بيحول الحروف الأجنبي لعربي فصحى أو عامي

http://www.google.com/ime/transliteration/

بهيج الشرير said...

والنبي ياأبلتي أنا عندي سؤال! ياترى الحاج جوجل ترجم عربية الكبدة دي إزاي؟ اللي أعرفه أن الجواجلة ليهم فرع في الكيت كات، بس مالهومش في بيزنس الكبدة ده

سؤال تاني والنبي ياأبلتي! لما يبنوا السور تحت الأرض، العيال في المدارس لما يحبوا يزوغوا حينطوا من فوق السور إزاي

Modern Pharaoh said...

قبل قلت الادب إسمو تعريب و بيغير الكلام من عرب فرانكو لي عربي ...فهمتي...بعدين ليه قلت أدبك ديه؟ برضو بتتكلمي وإنتي غلطانة ..إنتي متربيه فين إنتي أنا مش فاهم...

http://www.google.com/ta3reeb/

Phobos said...

Well its called transliteration... not translation! :)