Thursday 7 January 2010

هو فيه اتنين فلسطينيين ماتوا؟

الله يرحمه حارس الحدود المصرية ويحسن اليه، هو مالوش ذنب في اي حاجة، وربنا يصبر اهله، وايا من كان اللي عمل كده ده عمل غبي فوق انه اجرامي
ولو ان قلبي بيقول لي ان اللي عمل كده مش فلسطيني (لانهم مش عايزين يقفلوا الحدود ولا يخسروا مصر) ولا اسرائيلي كمان، عروستي، مش عارفة ليه افتكرت المحلة، اللي ربى خير م اللي اشترى، قلب الام بقى
المهم يعني ده مجرد تخمين مش لازم قلب الام يطلع صح، لكن في كل الاحوال الله يرحم الفقيد
الاصابات في الجانب المصري 9 ربنا يشفيهم، وفي الجانب الفلسطيني 35 فيهم خمس حالات خطرة ومش ح ادعي لهم بقى احسن اطلع عميلة لحماس، خصوصا ان الامن المصري بيأكد انه ما اطلقش رصاصة واحدة، هم اصيبوا كده بسبب سواد قلوبهم
بس الخبر ده بيقول ان فيه اتنين فلسطينيين ماتوا
طبعا في داهية زي ما كلنا عارفين، دول فلسطينيين يعني مش مهم، بس انا عايزة اتأكد من صحة الخبر، اصل الخبر ده لو صحيح يبقى الامانة المهنية تحتم على تامر امين اللي نصب لنا عزا وقعد يتكلم عن جرائم حماس انه يقول برضه ان فيه اتنين فلسطينيين ماتوا
انا بس كل هدفي اني اتأكد من صحة الخبر لو حد يعرف مصدر تاني
واحد على التويتر بيقول السنة اللي فاتت كنا بنتخانق مع الجزيرة السنة دي بنتخانق مع فرد اللي هو جالاوي وده التطور الطبيعي
بس تصدقوا وزارة الخارجية المصرية طلعت بيان تدين فيه جالاوي؟ بس الشهادة لله مصطفى الفقي شتم تركيا برضه وقال هي مش ح تبقى احن على فلسطين مننا، اه والله 
ماهو انا شرحت لهم على التويتر طبيعة العلاقة بين مصر وفلسطين، مصر عاملة زي الراجل اللي راكن مراته في البيت وداير يخونها بس اول ما يعرف ان ابن الجيران صبح عليها يقلب الدنيا: مالك ومال مراتي؟ وفلسطين عاملة زي اللي اتجوزت وهي عندها اتناشر سنة وما تعرفش حد غير جوزها ده، حتى اللي تعرفهم دول كانوا بييجوا يزوروا جوزها في البيت وهي كانت بتحط لهم العشا، وبتحبه مش عايزة حد غيره، هي بس بتكلم ابن الجيران عشان تحرق دمه وتغيظه وتنتقم منه عشان كل يوم والتاني راجع لها على كتفه شعر حريمي
يعني طول ما فلسطين مركونة يبقى احنا مالنا ومال فلسطين ما ياما عملنا لها، اول ما حد تاني يتدخل: خلاص يا سيدي .. سيبك من فلسطين انا ح اخدها. نتجنن: لأ..مالك ومال فلسطين؟ دي بتاعتي...هات
هو ده اصل خناقتنا مع ايران، ومع قناة الجزيرة (اصلها بتجيب سيرة فلسطين كتير واحنا ما نحبش حد ينادي على حريمنا بالاسم كده، ما يقول لها يا ام محمد، او يا محمد على طول) ومع حزب الله، وبعد ما دولة باكملها قعدت تتخانق مع حزب، وبعدين قناة، وبعدين فريق كورة دلوقت بتتخانق مع شخص، السنة الجاية ح نتخانق مع نملة، ح نزنقها في الركنة ونقول لها: انت رخمة وبتطلعي على السرير وتقرصي فينا ومهما نرشك مش بتموتي يا رخمة
ووزارة الخارجية برضه تطلع بيان تدين فيه النملة، ويطلع في الاساس ان النملة دي شالت حتت سكر وهربتها لغزة 
وطبعا في خضم هذه العلاقة الشاذة بين مصر وفلسطين، الاخوة الادانب جم وقعدوا يتظاهروا في مصر وشايلين علم فلسطين وعملوا لنا شمبورة قام الفلسطينيين صعب عليهم نفسهم قوي عشان جات من الغريب وما جاتش منا، وازاي يعني كمان نضربهم؟ وبعد مرحلة الانكار النفسي والضلالات اللي عيشوا فيها نفسهم بتاعة اوهام العمال المصريين اللي مش عايزين يشتغلوا راحوا وقفوا على الحدود بيتخانقوا معانا
مش فاهمين انتوا، فاكرينهم بيتخانقوا معانا دفاعا عن القافلة، ابدا والله، دول مقموصين من جوزهم عشان شمت فيهم الغريب، بس 
طاااااب بقى
كل سنة والمسيحيين المصريين مقتولين بعد صلاة العيد في "مصادمات" طائفية، ناس خارجة من الكنيسة قام ناس ضربوا عليهم نار وجريوا، ولسة ما نعرفش مين دول، فدي مصادمات زي ما احنا كلنا شايفين كده
والالطف ان فيه واحد، اللي هو مواطن مصري بدون ذكر اسماء، قال ان اصابع ايران واضحة في العملية دي ويجب غلق الانفاق فورا
لا مش بيهزر، بيتكلم جد، ما داهية يطلع لنا تامر امين بكرة ويضيف الجريمة دي لقائمة جرائم حماس
بس فيه حاجة غريبة في الخبر، الخبر بيقول ان سيارة مجهولة اطلقت رصاص على المسيحيين وهم خارجين من صلاة العيد، وبرضه الخبر بيقول ان اللي عمل كده مسلمين، طب عرفوا منين انهم مسلمين؟ من المصادر الامنية طبعا، طب والمصادر الامنية عرفت منين انهم مسلمين وانها "مصادمات" طائفية مش تار مثلا الا يكون الامن عارف مين اللي عمل كده، وللا ايه؟

البلد اتهبلت
وفيه اجماع دولي على ان البلد اتهبلت، بس العالم منقسم، شوية فاتحين بقهم ومنبهرين (خصوصا اسرائيل، عمالة تقول: ايه ده يا جدعان؟  مش معقول، والله ما كلمتها انتوا كل حاجة بتجيبوها فيا؟ انا سايباها اهو) وشوية عمالين يقولوا يا عيني كانت صاحية وبتلعب، وشوية عمالين يقولوا خلاص بقى، ماحدش يزعلها تاني، امنا واتجننت ح نرميها؟ نصيبنا كده، وشوية بيتخانقوا: انتوا اتجننتوا وللا ايييييه؟ واحنا اللي جاي علينا بضحك

انا باقول لازم نقفل الانفاق برضه احتياطي يمكن مدخلنا لنا هوا نافد على نافوخنا
ضرب نار يابني ادمين.. وبوليس واقف بيتفرج

16 comments:

مواطن مصري said...

هو لية كل حاجة بتحصل في يوم واحد ربنا يستر استشهاد جندي مصري برصاص أرهابين و احداث فتنة طائفية برصاص أرهابين في نفس اليوم مين من مصلحتة دة يحصل في نفس اليوم أكيد ايران يا بتوع حماس ربنا يستر على مصر الايام القادمة

خيوط المؤامرة الكبرى على مصر بانت

و انكشفت

Anonymous said...

لاحول ولا قوه الا بالله
انا الله ونا له لراجعون.

كل ما قلت بعيش حياتي وسيب هموم ده الشعوب وبلاش من ده الاخبار وريح دماغي وفي ستين داهية ماقدردش.

الصراحة اللي بتفعله الحكومة المصرية شي مستفز لـ شعب محاصر
طفحان
كن مصر مش دوله من العالم الثالث مثلها مثل فلسطين

بس حد يقولي هيا مصر بتعمل مع مراتها كدا ليه!

انا اراء انهم يسيبو ايران في حالها والحكومات المهببه العربيه تشوف حال شعوبها الغلبانة.

وكفي توظيف الشعوب
حاربنا صدام وقلنا خاين وعميل وبن كلب واصله مش مسلم
وكافر وقتله حلال
حاربنا كل مسلم متشدد وقلنا ده مالهوش في الاسلام ولا حاجه
الحين حايزينا نحارب ايران

فتنو بين شعوبنا قسمونا الي مذاهب ومجموعات

عايزين ايه تاني.

.

Anonymous said...

البلد مش باقي فيها امل طول ما ناس زي ابو الغيط الي مسئولين فيها

ola said...

أنا بقى تقريبا شبه متنأكدة إنهم زقوا المجند ده الله يرحمه علشان يموت -دا لو مكانش حتى الموضوع أوسخ من كدة- أنا كنت عارفة والله إنهم لازم يعملوا حاجة شبه كدة في الورطة السودة اللي لقوا نفسهم فيها

Unknown said...

تشبيهاتك فى البوست ده فى الجووووووول

شهود العيان أتعرفوا على واحد من اللى فتحوا النار على المسيحيين

والتحريات بتتجه للتار فى حادثة أغتصاب البنت المسلمه من المسيحى اللى كانت من شهر تقريبا"

سامي said...

الفارس النبيل عبد الحليم قنديل فى الاتجاة المعاكس

http://www.youtube.com/watch?v=9vssr9zaCE4

Unknown said...

تنبيه هام
ماحدش يغلط في ظابط الحدود الضحية
اي حد في الشباب اللي بيدخل كان ممكن تبقى خدمة الجيش بتاعته هناك ومعرض ان يحصل له كده
وماحدش يعمل لي سبع ويقول لي يعمل زي سليمان خاطر
ادخل الجيش واطلب خدمتك على الحدود ورونا ح تعملوا زي سليمان خاطر ازاي؟
الشاب اللي مات مالوش اي ذنب الله يرحمه ويصبر اهله

بس حد يشوف لي خبر الاتنين الفلسطينيين اللي ماتوا عشان اتأكد منه بس

Dr. Eyad Harfoush said...

عارفة ليه بنتخانق مع قناة وناشط حقوقي وبكرة هنتخانق مع نملة زي ما قلت؟ لأننا لم نعد دولة بالمعنى المفهوم للكلمة، من يوم كبير العيلة الله يرحمه ما قلبها قعدة مندرة وهي مكملة زي ما هي
تحياتي

للأخ مواطن مصري
إيران في وضع أفضل من مصر داخليا وخارجيا، فما دوافعها للتآمر علينا يا سيدي؟ المؤامرة علينا منا فينا زي دود المش
ثانيا، عن نفسي لا باطيق الاخوان هنا ولا هناك، يعني مش "بتوع حماس" احنا بتوع فلسطين خاصة وقضايا الانسان عامة

مواطن مصري said...

الي بيطبلو ل ايران وضع افضل اية اذا كان مرجعية الباستيج مكفرة الاصلاحين كلهم و عاوزة تعدمهم بانهم فاسدون في الارض

احمد العربي said...

اول شيء الف رحمة على روح الجندي لأنة مات وهو يؤدي واجبة سواء اتففنا أو أختلفنا مع واجبة، وربنا يصبر أهلة ويغفر له ويسكنة فسيح جناتة
التصعيد الغبي على الحدود بين غزة ومصر لا يصب في مصلحة غزة ولا في مصلحة مصر
المصيبة إنو البوصلة بدأت تنحرف والصراع صار غزاوي مصري بدل عربي اسرائيلي أو حتى فلسطيني إسرائيلي
لو عاوزين نشوف مين ليه مصلحة الجواب بسيط جداً إسرائيل صاحبة المصلحة الأولى والأخيرة
*****
في إصابات فلسطينية يا نوارة وفي ناس في حلة مةت سريري وفي صور لحرس الحدود المصري بيضرب نار
( لا ألوم من ينفذ أوامر قادته العسكريين بالطبع)
لكن القضية الأهم هي لماذا هذا التصعيد من حكومة مصر ومن حكومة حماس في هذا الوقت بالذات؟
هناك طبخ هادئ لمؤامرة أخرى على الشعب الفلسطيني ومن مصلحة حماس وحكومة مصر تصعيد الأمر حتى تأتي الأطراف مرة أخرى لطاولة المفاوضات العربية عربية هذه المرة. حماس تريد إظهار نفسها بأنها حاربت حتى النهاية لرفع الحصار وحكومة مصر تريد إظهار نفسها أنها حاربت حتى النهاية لتشديد الحصار من جانبها
الطرفين من مصلحتهم التصعيد الأن حتى يرضي كل طرف مؤيدوه أو أسيادة _ بغض النظر عن تأييدنا لهذا الطرف أو ذاك_
للأسف لا يوجد غير دم الأبرياء ثمن للجلوس مرة أخرى مع بعضنا البعض
لا يملك رؤوسائنا وزعمائنا وقادتنا إلا دمنا البرئ ثمن لمغامراتهم البطولية السياسية
*********
دم المسلم على المسلم حرام ، اي رصاصة بين الطرفين حرام وعلى حماس قبل حكومة عوكل الإعتذار عن هذا التصعيد غير الضروري على الحدود
يعني عرفنا حكومة مصر مش راح ترفع حظرها عن المعبر ، خلص شو نعمل يعني إسرائيل أولى بالمحاربة كفاية مهازل ، اللي بيحصل ده عوافبة خطيرة وطويلة الأمد في المستقبل
يجب توجية البنادق للعدو الحقيقي إسرائيل
لو الجندي المصري استشهد برصاص فلسطيني أنا أعتذر وأعتبر أن هذا السلاح إجرامي يهدف لقتل علاقة الدم التي تربطنا
******
يجب أن نعيد بوصلتنا إلى الإتجاه الصحيح وأن نتوقف عن شتم بعضنا البعض

*******
استبعد طبعا وجود ترابط بين حادث إطلاق النار المؤسف على الأخوة المسيحيين وبين أحداث رفح، مش ممكن يعني هي أيران مافيش وراها ألا العكننة على المصريين ولا إيه
سوء إدارة الدولة المصرية سبب رئيسى في كل الاحداث ويمكن هادا هو الرابط الوحيد بين الحدثين

تحياتي

مهندس مصري بيحب مصر said...

شوفي التعليق ده على خبر الحدود في الجزيرة نت
من واحد بيدعي إنه شاهد عيان

167
طارق رفح المصرية
رفح المصرية
والله أنا مصري واعتز باني مصري لكن يجب الا توارى الحقيقة فالجندي المصري الشهيد باذن الله قتل بالخطئ من اخوانه الجنود المصريين فلا دعي للتوتر وانا والله شاهدت الشرطة في غزة وهي تلاحق الفلسطينيين حتى لا يلقوا الحجارة على ابنائنا في الجيش وعلى فكرة كمان الجندي الذي استشهد شاهدته وهو يطلق النار على الفلسطينين وعندما اراد طفل فلسطيني ان يعتلي البرج الذي هو فيه اطلق الجنود المصريين النار على الطفل فاصيب الجندي وليس الطفل والطفل سقط على الارض وانا الحقيقة لا اعرف شو صار فيه

ميادة said...

خبر موت اثنين من الفلسطينيين موت سريري منشور في موقع المركز الفلسطيني للإعلام وهو موقع موثوق فيه.

Unknown said...

أخ مواطن
عمركش سمعت من ساعة الأنتخابات الأيرانيه الأخيره - وأكيد عارف عنف المصادمات فيها وأنها أكبر خطر فعلى على ايران حاليا

سمعت القياده الأيرانيه من أكبرهم لأصغرهم - بيقولوا مصر هى السبب ؟
مصر هى اللى عايزه تخرب البلد؟

اه ضد سياسات ايران فى المنطقه بس بلاش نعمل العمله الوسخه ونشيلها لغيرنا
لما تكون دوله ذات سياده وبتحترم نفسها وتقول هانمنع وهانعمل وهانسوى - يباه تتحمل هجوم الشعوب عليها

وبالنسبه للجندى اللى مات ده ربنا يصبر اهله
لو واحد اتجند وخدم على الحدود والقائد قاله اضرب على اخوك ومانفذش هايخش السجن ويتحبس ويضاعف مدة خدمته وفى وسط كل ده لو الاعلام شم خبر انه رفض الخدمه على الحدود وأتسجن أهله كلهم هايتبهدلوا

ميادة said...

دي تاني مرة أكتب فيها تعليقي . المرة الاولي لم ينشرولذلك سأعيد كتابته.
خبر موت اثنين فلسطينيين موت سريري منشور على موقع المركز الفلسطيني للإعلام. وده موقع موثوق فيه.

Unknown said...

مش بتوع شريان الحياة طلع برضه معاهم سيوف ومطاوى شوفتوا ازاى بس لسه ماحدش قال انهم قلعوا البنطلونات خصوصا وانهم خواجات ما لهموش دين ومش مشكلة عندهم لو طلعوا عورتهم لضباط الامن المصرى المؤدبين
الكلام اللى جاة ده منقول من مصراوى
"وأشارت الجهات الإعلامية إلى أن بعض منظمي القافلة كان بحوزتهم اسلحة بيضاء مثل السيوف والات معدنية حادة وهو مايجعل مصر تفكر جديا فى منع دخول جالاوى ومنظمى هذه القافلة الى مصر مرة اخرى مهما كانت النتائج ردا على انتهاك اعضاء هذه القافلة للسيادة المصرية".
http://www.masrawy.com/News/Egypt/Politics/2010/january/7/black_list.aspx

wahat_alshohada said...

ال 2 فلسطينيين موت سريرى كما قالت ميادة و فيه 35 جريح
وانا شفت النهاردة فى فضائية شفتهم مصورين الجنود المصريين و هما بيضربوا نار على الفلسطينيين و اللى شفتة مكنش بيضرب فى الهواء
كان بيضرب على ناس
الكلام دة للحكومة المصرية الكذابة اللى بتقول محدش ضرب من عندنا
وانا برجح جدا مصداقية التعليق اللى عند مهندس مصرى
اكيد هو دة اللى حصل و لبسوة للفلسطينيين
حد شايف حاجة حد هيشوف نوع الرصاص و الا التقرير الفنى
حسبنا الله ونعم الوكيل