Friday 1 January 2010

عاجل: طلب توكيل للمحامي ابراهيم يسري

تحديث:
يعني ينفع كده يعني؟ ينفع كده؟ الناس تيجي تتبهدل عندنا بالطريقة دي عشان رافعين اعلام فلسطين؟ لو بيتظاهروا في اسرائيل مش ح يحصل لهم اكتر من كده
سيبكوا من زعيم عزبة الهجانة والخطبة العمصاء بتاعته ههههه، يا حبيبي، والله غلبان وطيب، بس شوفوا المقاطع اللي بعد كلمته، ايه المرمطة دي؟





انتوا مش مكسوفين؟ انا بقى مكسوفة ومحرجة، انا عايزة حاجة للمصريين بس زي ما تميم قال، مافيش حاجة تنفع للمصريين بس الا موضوع القضية ده، ومش اقل من ان عدد الموكلين يبقى قد عدد الاجانب اللي جم، عيب يعني، ده ايه القرف اللي احنا فيه ده ياربي؟
تحديث:
الساعة 16:49 بتاريخ 31 ديسمبر 2009
ماحدش يسأل 140 على اي حاجة لانهم ما عندهمش معلومات، واحد قال لي على التويتر مافيش يوم الخميس شهر عقاري بعد الضهر، كلمت الدليل عشان استعلم منهم قالوا لي لا فيه، طلع مافيش. المهم يعني نزلت والحمد لله انه جنبي، ح انزل اعمله ان شاء الله يوم السبت
ركزوا معايا بقى:
ان شاء الله يوم السبت كله يروح يعمل التوكيل، يوم السبت فيه صبح وبعد الضهر ومن دلوقت خدوا نمر الشهر العقاري اللي جنبكوا واتصلوا بيهم يوم السبت
خلاص كده عملتوا التوكيلات ان شاء الله؟
ح تودوا ان شاء الله التوكيلات على مركز هشام مبارك
1 شارع التوفيقية الدور الخامس
تليفون:
25758908
عشان انا اعدي على مركز هشام مبارك ما بين الساعة اربعة لخمسة عشان اخد التوكيلات واوديها المعادي للسفير ابراهيم يسري ان شاء الله
رجاء رجاء رجاء، دي مافيهاش جبن دي كمان بقى، ح تاخد رقمك القومي والتفاصيل وتعمل توكيل قضايا لمحامي، فيها ايه دي؟ مش توكيل عام، توكيل قضايا. وماحدش بيتقبض عليه ولا بيتفتح له ملف في امن الدولة عشان رفع قضية... كفاية شغل الفيران ده بقى
-----------------
السفير ابراهيم يسري المحامي بالنقض اللي كسب قضية تصدير الغاز لاسرائيل ح يرفع قضية ضد بناء الجدار ان شاء الله
اللي عايز يضم اسمه للمشاركين في القضية دي اهي رسالة السفير ابراهيم يسري على الفيس بوك:
اصدقائي المواطنين الأحرار
اطيب التهاني بعام 2010 مع تمنياتنا بأن يكون عاما للتحرير و الحرية
اتصل بي مساء أمس 30 ديسمبر عدد من الرموز حول رفع دعوي للمطالبة بفتح معبر رفح و النظر في سلامة إجراءات السور العازل ، و قد شرحت المصاعب القانونية في هذه الدعوي إلا أن الإتجاه الغالب كان في صف رفعها أيا كانت المعوقات القانونية . و قد بلغ عدد الرموز و الناشطين الذين ابلغوني بموافقتهم ثلاثون مواطنا بين قادة أحزاب و أدباء و كتاب .و ما زلت اتلقي المزيد من الأسماء.
و قد رأيت من واجبي أن أعمم الدعوة للمشاركة في هذه الدعوي لكم ايها الشباب الناهض.
و المطلوب أحد امرين
الأول هو الحضور الي مجلس الدولة الساعة 9 صباحا للتوقيع علي عريضة الدعوي
الثاني لمن لا يستطيع الحضور أن يرسلوا توكيل رسمي عام لمحام من الشهر الققاري باسم ابراهيم يسري سيد حسين المحامي و مكتبه 11 شارع 213دجلة المعادي بالبريد السريع أو مع أي شخص في الموعد: الساعة التاسعة صباح 4 يناير بمجلس الدولة .
و ندعو الله أن يوفقنا في حل هذه الأزمة و استعادة شرف مصر و تاريخها ووجهها العربي.
و السلام عليكم
السفير
ابراهيم يسري
المحامي بالنقض
-----
انا ان شاء الله ح اقوم البس وانزل الشهر العقاري دلوقت هو بيشتغل من اربعة بعد الضهر لتمانية على ما اذكر، ح اتصل بيهم، يا اربعة يا خمسة بيبتدوا واعمل التوكيل وبرضه ان شاء الله اروح مجلس الدولة في المعاد بس انا بافكر اني ابعت له التوكيل او اروح اوديه بنفسي بعد ما يخلص احسن عشان ابقى ضمنت انه معاه التوكيل في حال لا قدر الله ما قدرتش اروح في الموعد لاي ظرف
اي شهر عقاري جنبك تقدر تسجل فيه، واي شهر عقاري بيشتغل من تمانية الصبح لاتنين بعد الضهر ومن اربعة او خمسة العصر لتمانية بالليل، والتوكيل بيخلص في ساعتها وانت واقف، تاخد الرقم القومي بتاعك واسم المحامي بالكامل وعنوانه اللي مكتوب
وتبعت التوكيل بالبريد السريع بس على طول بالكتير بكرة، والتوكيل مش ح ياخد حاجة يعني، او لو مش ح تقدر تيجي تديه لحد يكون جاي يوم اربعة يناير انا ان شاء الله بامر الله رايحة بس انا باحب احتاط، اللي عايز يسلمني التوكيلات شوفوا اقابلكوا فين او تسيبوه فين بس مجموعة مجموعة تتفق مع بعضها، ولو لا قدر الله ما قدرتش اروح ح اسلمه لحد رايح، ده للي مش ح يروحوا
لكن اللي ح يروح وضامن ان شاء الله انه رايح يوم اربعة يناير الساعة تسعة الصبح في مجلس الدولة مش لازم يعمل توكيل يقدر يروح على طول ويوقع على العريضة





26 comments:

مواطن مصري said...

شركة حميد الأحمر تكسب تعاقد إقامة الحاجز الحدودي بين اليمن والسعودية

علم موقع لحج نيوز من ان شركة حميد الاحمر للمقاولات فازت بالتعاقد مع المملكة العربية السعودية لبناء جدار عازل الكتروني مزود بكاميرات حرارية واجهزة استشعار" رادارات "تحذر من عبور أي شخص ذلك السياج
http://www.lahjnews.net/news-1402.htm

السعودية بتحمي حدودها من العراقين و اليمنين

هتعترضي على الجدار دة بردو

mido said...

مواطن مصرى

الجدار ده مفيش وراه ناس متحاصرة و لا جعانة

و بعدين ده جدار حدودى فوق الارض مفيش مقارنة بينه بين الجدار الخازوقى اللى بيتبنى على حدودنا و محاصر ناس و مجوعهم

امانى عزالدين said...

اخليكى ترقعى بالصوت يا نوارة
انا من اسكندرية المهم عملت نوت عندى عشان زمايلى ف الكلية رورحو يعملو التوكيل
هاوريكى رد بقة من الردود يخليكى تعرفى احنا نستاهل اللى احنا فيه ده والا لا

Hi amanyy.. ana 3yza a2ool r2ye fe elmwdoo3.. e7na mafeesh balad betsa3ed felestine zayyena.. w ana shyfa en elgedaar da ma3mool 3ala ardena 3shan ma7addesh ye2arrab mennena.. w de 7emaya le baladna.. w lw el3arab mesh 3agebhom yegebo tayyarteen w ye7arbo isra2el zy ma7na 3amalna.. w matenseesh ennena 7awelna negeblohom ardohom ayyam elsadaat w ... See Morehomma elle mardoosh..
w kaman lamma fata7na elma3bar w da55alnahom.. darabo elgonood elmasreyyen w darabo eltoggar w 5ado el beda3a beta3etna be floos mozawwara.. anyway.. ana tab3n mesh badafe3 3n 7okometna bs fe nfs elwa2t shyfa en mafehash 7aga ennena nebne elgedaar da madaam beye7mena..

w fe wa7ed tala3 mn felestine... w 2al ennena benharrablohom asle7a mn 5elal 30 nafa2 3ala tool el7odood ma3ahum... w 2al kaman ennohom mesh 7ayesta5demooha dedd masr.. ma3na keda ennena bnsa3edhom w mesh benakrahhom.. dool 3arab w e7na mesh 7anoskot ella lamma ne7arrarhom zy ma7arrarna elgazayer w 3'erha.. w fe el2a5er bardo beyeshtemona

مش عايزة اقولك ان ده راى ناس كتير اوى يعنى حالة مش فردية
بجد الشعب ده عار على البلد
ده احنا هيتقال علينا كلام كمان ميت سنة
ارحمنا يا رب·

Kalimalhus said...

عجبنى قوى .. دى مفيهاش جبن دى بقى .. إنتى هارشة العملية صح بالنسبة لعدد كبير من الساخطين على موضوع الجدار و قاعدين فى بيتهم يهروا و ينكتوا..

بس فيه ناس زى مواطن كده موافقين على الجدار .. همه قلة زى الزمالكاوية بس موجودين..

الأغلبية بقى من نوع .. جدار إيه؟ .. يا عم إحنا فاضيين للهم ده؟

على أى حال سعادة السفير راجل مقاتل و ما بيزهقش و ده مطمئن إن القضية مش هتتقلب و تدفن بسهولة .. كل ما هناك إنى بسجل رأيى بإن قضية السور تبقى حاجة و قضية فتح المعبر حاجة تانية لأن التكييف القانونى للإتنين مختلف ..

ممكن طبعا أقولك إن القضية هتترفض لعدم الإختصاص .. فيه قانون بيقول إن بعض أعمال السيادة لا يجوز نظرها أمام القضاء .. فتح المعبر منها و بناء السور على الحدود برضه منها .. لكن ده مش معناه إن القضية ما تترفعش لأن الهدف المهم إن الموضوع يفضل مثار و ما يتنسيش (زى ما المعبر نفسه إتنسى و بقاله سنتين و نص مقفول)..موضوع الغاز كان هيتنسى لولا القضية اللى السفير إبراهيم يسرى مستمر فى متابعتها رغم كل شيئ..

فيه فكرة تانية بقى .. ليه الفلسطينيين اللى إحتجزوا داخل مصر بسبب غلق المعبر لأى فترة ما يرفعوش قضايا تعويض على الضرر المادى و المعنوى اللى أصابهم نتيجة ده .. و اللى تعرض منهم لإساءة معاملة يرفع قضية زيادة .. و اللى إحتجازهم فى غزة أدى لأضرار كذلك .. دى ممكن تكون آلاف القضايا و مفيش فيها حكم بعدم الإختصاص و لا غيره .. ده تصرف من جهة إدارية تسبب فى ضرر و سواء التصرف كان عمل سيادى و ألا قرار إدارى من رئيس حى الأمر قانونا سواء .. زى كده ما إنتزاع الأراضى للمنفعة العامة عمل سيادى لكن برضه تقدرى ترفعى قضية و تاخدى تعويض..

طنطـــا واى said...

يلعن دين ام غزة على ابو اللى فيها كلهم ( ولكم فى الحزب الوطنى قدوة حسنة ) الدنيا بتولع وبتوع غزة والجزيرة مطلعين دين ابونا بالجلاوى والغزة والجدار والمعبر ........ لا مؤاخذة يعنى أحة يا عرب ؟؟؟ لما يكون الكلام دة فى اكبر مدونة مثقفيين مصريين ؟؟ لما نكون على صفحات ام المدونيين ؟؟ لما النخب المصرية بتتكلم كدة ؟؟؟

انا عارف انك ضد معارضة المعارضة ؟؟ ومفيش عندك راى ثالث ... يا تكون حكومى خاين او معارض شهيد .....لكن فعلا طريقتك بتفكرنى بطريقة اسمها اية دى ومسكوها طبلة ؟؟


اقامة الحاجز الحدودى بين السعودية واليمن ؟؟ زى خبر مواطن مصرى ؟؟؟

تهويد القدس بيشتغل على ودنة ؟؟؟

نرفع قضية على الانفاق اسفل الاقصى اللى حيتهدم قريب ؟؟؟

ايران كل يوم تاكل حتة من العراق ؟؟

عدد قتلى جنوب السودان فى 2009 حوالى 80% من قتلى انجاس غزة ومن سكات وبدون تهليل ؟؟

سنة واحدة وحينورنا المولود العربى الجديد دولة جنوب السودان الشقيقة وفى ميلاد ديمقراطى باستفتاء ؟؟؟ اية سفن اية ولو فية ارقام اكبر يبقى ممكن


نموذج البطل العربى المغوار بشار الاسد ؟؟ صباح التوريث والتشويش ؟؟

قانون بيع الاعضاء فى مصر اتمرر زى الحلاوة وادينى ربع كبدة واتنين طحال ؟؟

محدش رد عليا ازاى اوروبا حتخاصمنا زعل على المحروقة غزة ؟؟

قضية غزة نفسها بقت مع مصر وكأن مصر هى البديل ؟؟ يا عم روحوا اعملوا مظاهرات فى الست معابر الموجودة داخل فلسطين او بينكم وبين اسرائيل ان كنتم فعلا ارتضيتم ان حدودكم الشرقية تكون ارض اسرائيلية مش فلسطينية محتلة

غزة بقت شعار الاسلام والمسلمين ؟؟؟ طيب والمسلمين سنة وشيعة حوثيين وسعوديين ويمنيين وعراقيين وباكستانيين وسودانيين وافغان وفى البلبساريو كل دول اسلامهم ناقص لانهم مش بلطموا على خدودهم زى الغزاويين ؟؟

الواد النيجيرى اللى كان حيفجر الطيارة الامريكية وبسببة حيدوسوا على المسلمين فى امريكا واوروبا باوسخ جزمة ؟؟

وووووووووووو


يا نهار اسود ؟؟


انا بقول تروحوا يوم السبت تعملوا توكيلات برضة فى الاول والاخر احنا ملناش غير غزة والغزاويين وعبد البارى عطوان والجلاوى ؟؟ كدة اسهل مليون مرة

يساري فلسطيني said...

ربنا معاكم

يساري فلسطيني

Unknown said...

اهو ربنا رزقنا بمختل عقليا تاني عايزنا نرفع في مصر قضية على اسرائيل اللي بتهود القدس

طب مش لما نحارب تهويد مصر الاول

سامي said...

وطبعا الدعوة دى للقاهريين بس صح
زى موضوع الوقفة اللى خلانى اغير منكو

يساري فلسطيني said...

هههههههههه

انتم كمان محتلين من اليهود

Unknown said...

لا مش قاهرية
تقدر تبعت التوكيل بالبريد السريع على العنوان بتاع المعادي

بس مجلس الدولة في القاهرة بس

طب نعمل ايه؟ ده نظام مبارك اللي عامل كل حاجة في القاهرة مش احنا

wahat_alshohada said...

اول شئ يا نوارة
لو سمحتى احذفى و لا تسمحى بنشر التعليقات الغير محترمة والقذرة زى بتاعة اللى اسمة طنطاوى
انا مش قادرة افهم ازاى توافقى على نشر تعليق قذر زى دة وفيه سب دين
خدى بالك انتى بتاخذى ذنب و اثم اكبر منه لاننا كلنا بنقرأ القذارة دى هنا
خلاص ماليش نفس اعلق ولا اقول حاجة تانى
كنت عايزة اعلق بس القذارة والحقارةاللى قريتها قرفتنى
هو صعب قوى كدة تكون محترم و تحترم باقى الناس اللى بتدخل؟؟ فى مدونتك انت سب زى مانت عايز
هنا لالالالا
وكمان كنت عايزة اعمل الرسالة و البوست فورورد
كدة مش هقدر طول ما فيه قذارة وسب للدين
ايه ابعتة واخذ ذنب
لا شكرا هى مش ناقصة
ايه الناس المقرفة دى
لا حول ولا قوة الا بالله

طنطـــا واى said...

فعلا انا مدين باعتذار الى كل الموجودين لانى زى ما قلت من الاول انا داخل غلط هنا ... واقسم لكم ان يكون دة اخر تعليق لى ... بالنسبة للكلام القذر واللى باعتذر عنة فهو مش من تاليفى دة لغة الحوار فى السياسة المصرية دلوقتى وعلى اعلى المستويات ودة الكلام اللى بيتناقش فى برلمان الامةوباسم الشعب اللى هوة حضراتكم ..... انا عارف ان التعليق كان عصبى جدا ويا ريت تسامحونى لان فعلا خبر إسرائيل تقرر بناء 692 وحدة استيطانية بالقدس
http://www.alriyadh.com/2009/12/29/article485146.html

جننى وخلانى اخبط راسى فى الحيط والناس كلها عمالة تتكلم عن معبر ونفق ??? وشعب غزة ممنوع عن العمل وممارسة الحياة الطبيعية بغلق ست ( 6 ) معابر داخل الارض الفلسطينية وقناة الحظيرة حولت كراهية كل العرب من اسرائيل الى مصر واصبحت مصر هى العدو الوحيد والحقيقى وسبب كل مصايب فلسطين والفلسطينيين الذين انحصروا فى الغزاويين وكان اهالى الضفة الغربية اصبحوا امريكان ويعيشوا فى سعادة ؟ واوعوا حد يفتكر ان دى كراهية للحكومة بس وانهم بيحبوا الشعب المصرى ؟ أكرر اعتذارى لكل من اسأت لة .. واشكر لام المدونيين سعة صدرها ؟

dr.lecter said...

رد طنطاوي مسخره بجد

عجبني كلام الفيديو الاجانب محاصرين بقوا عاملين زي الاقليات واحنا مضهدينهم
يخرب بيت ام المسخره احنا ايه اللي بيجري لنا ده؟ حاسس بحاجه قريبه هتحصل

ماتنسيش صحيح يانواره تعملي حمله علشان البطاقه الانتخابيه عاوزين نوعي الناس

يساري فلسطيني said...

يعني فعلا مسالة حرية الراي مشكلة

يعني انت عندك ناس زي طنطاوي بيشتم في الشعب الفلسطيني ,,, و بيلخبط المواضيع و يشتم في الاديان , حرية الراي تختلف عن العهر في القول

معلش هو حالة وحيدة من عشرات تابعت تعليقاتهم الوطنية و المنطقية ... النزول الى هذا المستوى لايناسب احد

و القرار لك

overdose said...

انتي بتتكلمي بسرعة اوي وانا مش فاهمة قولي واحدة واحدة
اوكل محامي الاول ولا اروح الشهر العقاري اعمل ايه بالظبط
فهميني
واروح لمحامي اقوله ايه
من غير شتيمة:(

overdose said...

مجلس الدولة دا فين طب؟

elmonadel said...

فيديو واضح جدا للى حصل مع الاجانب فى اعتصام ميدان التحرير 31/12

http://www.youtube.com/watch?v=yT4tk2RiNIo

بهيج الشرير said...

والنبي ياأبلتي أنا عندي سؤال! ياترى بعد مايعملوا دولة إسراطين، حيغيروا إسم مصرائيل ويبقى مصراطين

Anonymous said...

ربنا معاكم بكم نكون امة عظيمة وبدونكم لا شيء

Placebo said...

على فكره يا نواره الشهر العقارى بيشتغل النهارده(الجمعه) فتره واحده ساعتين بعد صلاة الجمعه من الساعه اتنين ونص بعد الضهر لغاية الساعه اربعه ونص
انا سألت فى مكتب الشهر العقارى اللى جنبى فى مدينة نصر

Unknown said...

طنطاوي

انت ربنا ح يخرب بيتك على فكرة

ده بالمناسبة كده

Unknown said...

خلاص

عموما انا خارجة بعد الصلاة اما اشوف كده ان شاء الله

Unknown said...

اوفردوز

مش فاهم ايه يابني

ح تروح الشهر العقاري معاك الرقم القومي بتاعك

تروح تقول لهم عايز اعمل توكيل قضايا

يقولوا لك اسم المحامي تقول لهم اسمه: ابراهيم يسري سيد حسين

يقولوا لك عنوانه ايه؟ تقول لهم: 11 شارع 213 دجلة المعادي

ح ياخد بيانات الرقم القومي وتدفع دمغة وتاخد التوكيل

خلاص اخدت التوكيل؟

ح تاخد بقى تاكسي وللا عربية وللا اتوبيس تروح شارع التوفيقية

تدخل عمارة واحد في شارع التوفيقية تطلع الدور الخامس ح تلاقي مركز هشام مبارك للقانون

سواء موجودين تدخل تقول لهم انا جايب التوكيل بتاع ابراهيم يسري اللي نوارة ح تعدي تاخده ح يقولوا لك وماله يا اخويا سيبه هنا واتكل على الله

او مش موجودين ترمي التوكيل من تحت عقب الباب

خلاص كده؟

مجلس الدولة في الدقي

Unknown said...

اه عشان بس ماحدش يقول لي ليه قلتي لطنطاوي ان ربنا ح يخرب بيته

ارجع يا اخ طنطاوي شوف انت اتكلمت على ناس محاصرين ازاي وحرضت عليهم ازاي والشر اللي جوة قلبك اتكلمت بيه ازاي

وافتكر ان ربنا دخل واحدة ست النار عشان جوعت قطة

وسيبك بقى من فيلم تهويد القدس اللي انت عايش فيه ده

اعتبر الغزاوية كلاب وقطط مش عرب ولا حتى بني ادمين برضه ما ينفعش نجوعهم ونحاصرهم

هو حد بيطلب اكل من الاحتلال؟ الاحتلال شغلته يموت الناس

احنا حطينا نفسنا على قدم المساواة مع اسرائيل بارادتنا مش هم اللي حطونا في الموقف ده

Nemo said...

الإجراء القانوني للى بره مصر إزاى

wahat_alshohada said...

لو صحيح حابب تعتذر يا طنطاوى احذف مشاركتك
شوفوا
احنا فى ظروف صعبة جداااا وانا بدخل هنا و بحب الموجودين وبستفيد جدااا من تعليقاتكم
وبنشر وبوزع رسائل بكم كبير
وبضع روابط للمدونة
فاذا استمر الوضوع كدة بهذا الشكل من الردود لن استطيع لا قراءة التعليقات ولا وضع روابط ولا اى شئ
فشوفوا فين المصلحة و فين المهم و عملوه
اذا كانت المصلحة و الاولى اننا ننشر و نترك ردود سب دين والفاظ قذرة
فماشى زى ما تحبوا
بس ساعتها خلاص
هضطرة اوقف كل شئ
انا فعلا فى منتهى الغضب
ما ينفعش كدة يا نوارة
اذا كان هو كاتب رد بالشكل دة و بسب الدين هو حر
انتى ايه يجبرك انك تنشريلنا الكلام دة؟
؟؟؟؟؟
ايمان بدوى