الطب الشرعي بيستعمانا؟

ده شكل وفاة طبيعية؟

اذا كانوا يقصدوا وفاة فلسطينية طبيعية، فآه، دي الطريقة الطبيعية اللي بقى الفلسطينيين بيموتوا بيها، دي اقل طريقة وفاة عندهم

وطبعا مافيش جولدستون ح يقدر يكتب تقرير، عشان مصر شقيقة كبرى، وما يصحش تشتكي الشقيقة الكبرى في الامم المتحدة

وشاقين بطن الواد ومخيطينها ويقولوا ما اخدناش اعضاء، امال الشق اللي بالطول ده ايه؟ تصدع حصل في جته بسبب الامراض المزمنة؟

طب هم ح يعملوا ايه دلوقت؟ اهله يعني

دلوقت بقت انشط تلات دول في تجارة الاعضاء اسرائيل ومصر والاردن... الدول المعتدلة يعني

عرفت تبقى معتدل ازاي؟ ايييييوة اقف معتوج وكلمني معتدل، بس الغريبة، هو مين عايز اعضاءنا؟ اقصد المصريين والفلسطينيين، طب الاردنيين ممكن يكونوا بياكلوا اكل انضف شوية، لكن احنا البعدا مية ملوثة واكل مروي بمية مجاري وحاجة تقرف الكلب الحزين، مين عايز اعضاء متربية على المجاري؟

لا كده كتير، كده كتير، مش لدرجة ان الطب الشرعي يستعبط كده

عبد المنعم مصمم ياخد حقه على الدولة

زي اي حد بيوصل للسن القانوني في المؤسسة، لازم يتخرج، ويبتدي نوع جديد من المشاكل. ومش محتاجة اقول لكوا المؤسسات بتبقى عاملة ازاي، المشرفين، المديرين، الاخصائيين، الزملاء، كلهم ناس غلابة بتفش غلها في بعض، وكل غلبان بيستقوى على اللي الاغلب منه.

بعد ما عبد المنعم اتخرج من المؤسسة فيه ناس ولاد حلال جابوا له شقة وكشك. الكشك اترخص في حتة يقطنها ناس شكل ذئاب الجبل كده. كل يوم على الله يمسكوه يرنوه علقة، لا بس هو واد جدع، ينضرب وما يقولش آي، ويصلح الكشك ويفتحه تاني

ماحدش يسالني بيكسروا له الكشك ويضربوه ليه؟ واحد راجع بالليل مبرشم، وعبد المنعم واد شكله غلبان ومالوش في حاجة، واللي راجع بالليل مبرشم ده واخد بالجزمة من مخاليق الله كلهم، لقى لقية واد غلبان، ما يفشش فيه غله ليه يعني؟ العيال بتوع المؤسسة يبقى جوة المؤسسة واد ايه، مقطع البطاقة، اول ما يطلع تجيله صدمة حضارية ويبقى مافيش اهبل ولا اغلب منه

المهم يا سيدي لما انت، عبد المنعم عارف ان: "الكانون يا ابلة بيقول اني لمن اتخرج من المؤسسة ليا حق اللي انا اخد شقة من المحافصة" بعد ما اهل الخير قدموا له على طلب شقة، واتطنش، كتبت مقال في الوفد لمحافظ القاهرة، اتصلوا بيا وقالوا لي ابعتي لنا عبد المنعم، فرحت فرحة الاعمى وكتبت احيي محافظ القاهرة، راح هناك، قالوا له انت تبع الجيزة، طلع بطاقة تبع القاهرة، او روح محافظة الجيزة، يبدو ان محافظة الجيزة بيبعتوا لها العيال اللي مش بتسمع الكلام عشان يعذبوهم

قام الواد عمل الاتنين، قدم على بطاقة في القاهرة وراح محافظة الجيزة، وانا كتبت نداء لمحافظ الجيزة

الكلام ده بقاله دلوقت سنتين حضراتكوا، كل اسبوعين عبد المنعم يكلمني: ايون يا ابلة، دوقت انا بقى رحت المحافصة، قالوا لي طب هات لنا وسل نور (عايزين وصل نور من واحد مقدم طلب على شقة، يعني هو لو عنده وصل نور ح يروح لهم ليه، ثم الشقة اللي جابها له اهل الخير في العشوائيات يعني، على قد فلوسهم ماهم اصلا كمان اهل الخير دول ناس مكافحين ماهماش احمد عز) جات عايدة عبد العزيز، الممثلة، قرت المقالين اللي كتبتهم عنه واتصلت بيا: انا عندي مزرعة وممكن ييجي يشتغل حارس وادي له مكان

- يا عبد المنعم

آه... بس انا يا ابلة ليا حق كانوني في شقة المحافصة، انا ايه اللي يخليني اخد حاجة من حد وانا ليا شقة في المحافصة

- طب معلش يا عبد المنعم مؤقتا كده بدل ما كل يوم وشك متخرشم من العيال اللي بيكسروا لك الكشك

طبعا قالت له طريق مصر اسكندرية قام راح اسكندرية ودور عليها هناك ما لقهاش. طريق مصر اسكندرية ايه بس؟ ده واحد عاش لسن عشرين سنة في مؤسسة ما شافش غيرها، يوم ما شاف الشارع كان بيروح يجيب سجاير للمدير من الكشك اللي جنبهم، يفهم ازاي هو فرق طريق مصر اسكندرية من اسكندرية نفسها؟ ثم حارس ايه وهو كل يوم ينضرب من عيال مبرشمة لمجرد ان شكله غلبان ومش عارف يدافع عن نفسه

"لا يا ابلة بس انا زعقت لهم بقى... قلت لهم مش كل يوم الاذية دي"

ده ما يعرفش حاجة ده غير ان له حق قانوني في شقة المحافظة، تصوروا؟ ومتسمك بيه قوي

- الو.. ايوة يا ابلة، انا رحت المحافصة وقالوا لي اليومين دولت مشكلة الدويقة ومش ح يدوك شقق فانا بقى ح اروح محافصة الجيزة، ما انا ليا حق في الجيزة

- الو ايوة يا ابلة، منكن اللي حضرتك تديني كارت برضك يساعدني؟

- الو ايوة يا ابلة، منكن اللي حضرتك بقى تديني المكال اللي فيه حضرتك بتتكلمي عني؟ برضك لمن اروح وادخل بيه

- الو ايوة ايا ابلة، انا لقيت حل.. منكن مثلا اللي انا لمن اروح اعمل مشكلة وازعق بقى واخوفهم

خلاااااااااااااااص يا عبد المنعم، يا عبد المنعم حرام عليك، يابني انا تعبت لك، ايه الاصرار اللي انت فيه ده؟ انت يابني مش عارف تفهم انهم بيمطوحوك، انسى المحافظة يا منعم، انساها

"بس انا ليا حق في شقة المحافصة دي"

عبد المنعم، مش ح يدوهالك، خلاص، دي ناس فاسدة، الشقة حقك ح يدوها لحد من معارفهم، انتهينا يا عبد المنعم مشي حالك، مشي حالك يا عبد المنعم، انا ح اكلم فلانة وفلانة واخليهم يجيبولك مكان في حتة ما تنضربش فيها

"بس ده حقي يا ابلة..طب اقول لك، انا عندي اكتراح كويس، ايه رأيك اطلع مكتب المحافص نفسه واكسر لهم المكتب؟ او ازعق"

ايه عبد المنعم اللي بتقوله ده؟

"ما انا باحاول الاقي حل... انا الظاهر تعبتك"

تعبتني؟ تعبتني في ايه عبد المنعم؟ يابني انا لو تعبانة تعبانة عشانك، انت مش حاسس بتعمل ايه في نفسك؟ يابني دول طلبوا منك وصل نور، هو فيه واحد عايز شقة يطلبوا منه وصل نور؟ انت مش واخد بالك انهم بيشيعوك؟ انا اللي تعبانة؟ وانت مش تعبان؟ ما زهقتش يا عبد المنعم؟

"ازهق من حقي؟"

مافيش فايدة

المبهر في الامر، ان انا اللي باقول له مشي حالك وهو اللي بيقول لي انا ليا حق "كانوني" وعايز اخده "الدولة مفروض اللي هي بتدي ابناء المؤسسات شقق تبعت المحافصة، يعني انا في الكانون كده" ايوة، بيقول الدولة وبيقول ابناء المؤسسات، وفي نفس الوقت بيقول المحافصة وما بيعرفش يقرا ولا يكتب عشان ما علمهوش في المؤسسة كانوا بيخلوه يمسح وينضف

وعلى كل البؤس اللي هو فيه ده جاب منين الاصرار على الحق الكانوني؟ وجاب منين التقديس المبالغ فيه للكانون اللي لازم ياخد مجراه؟ الله اعلم

ح اموت واعرف بجد، ده مش اول ولا اخر ولد من المؤسسة يتصرف بالطريقة الغريبة دي، ده كان ناقص يقول لي دي ضرايب المواطنين ولا يضيع حق وراءه مطالب واحنا لازم نحارب السلبية

ما كانش ناقص غير يقول كده بقى عشان كنت انكش شعري وامشي مجنونة في الشارع

ما بقتش عارفة اضحك وللا اعيط، افرح وللا ازعل، وامبارح مسكت صاحبتي اللي عندها جمعية اعصر فيها: العيال دي جابت الكلام ده منين؟ ده انت لما ابن عمك مات ما بقوش فاهمين يعني ايه ابن عمك

"البقية في حياتك يا ابلة، سمعت اللي حضرتك عندك حالة وفات، مين؟"

قالت لهم: ابن عمي

........ يعني ايه؟

قالت لهم: يعني ابويا له اخ، الاخ ده له ابن، ابنه ده هو اللي مات

اهو اللي مش عارفين يعني ايه ابن عمها دول، ييجوا لشقة المحافصة ويقفشوا فيها بمنطق: حقي بالكانون ويتكلموا كأنهم سليم العوا

لو جبت له قصر، عايز حقه بالكانون

- طب لو الشقة دي مش عاجباك نجيب لك شقة تانية

"بس ليا انا حق تبعت الكانون"

ولسة امبارح عرفت انهم بيتسللوا وينزلوا وسط البلد عشان يقفوا في الوقفات الاحتجاجية وكانوا عايزين يسافروا غزة عشان يحاربوا يناير اللي فات

"مين يا غادة اللي بيعلمهم الكلام ده؟ مين مهيج  الجماهير اللي في المؤسسات؟"

قالت لي: مافيش قاعدة، ممكن وهو قاعد على القهوة سمع كلمة، شاف منظر عيل وحس انه زيه، هم يعني عشان ما اتعلموش يبقوا ما بيفهموش وما بيحسوش؟ اما انت غبية ومتكبرة صحيح

تمام، انا غبية ومتكبرة وجاهلة وفاضية من جوة وضحلة، وعمالة ارغي

وفيه ناس ربنا خالقهم صح من غير رغي، هم ناس كده صح من راسهم لساسهم، من غير ماحد يعلمهم الصح

اللي حاول يعلمهم ما علمهمش غير ازاي يحط البشلة في بقه وما يعورش نفسه، وياريتهم بيعرفوا يستخدموها

اي حد عنده بيت واهل اسمعه يشتكي ح ارميه من الشباك

ايش عرفك انت بالسياسات الجديدة

ومن أقواله رضي الشعب عنه او لم يرض:

إحنا شعب ما بيحبش يتحرك كتير، وهذه هى ثقافتنا، لأننا لا نريد أن نتعلم أو نعمل بعيدا عن أهلنا

خصوصا لما يبقى اهلنا ساكنين في القصر الجمهوري... ح نلاقي فين سكن زي ده؟

السياسات الجديدة

ومن اقواله طيب الله سياساته الجديدة: التوزيع غير العادل للثروة افضل من التوزيع العادل للبؤس

والله لفتت نظري يا عوكل يا خويا

تحديث لا بد منه:

من حيث انه خايف، اه خايف، من حيث انه ح يمشي لا مش ح يمشي، عشان جاتلي تعليقات واتكلمت مع ناس، من ضمن الناس اللي كنت باتكلم معاهم واحد بيقول لي: يتصدروا له قانون يا نوارة خلينا نخلص... مش ح نخلص

اولا: مهم جدا نعرف الكلام جاي من مين، الكلام جاي من عماد اديب باستصدار قانون يعفيه من المحاسبة لو عايزينه يمشي وما يجيبش ابنه. عماد اديب صديق شخصي له بيقول له يا محمد عشان تبقوا عارفين يعني.

ثانيا: هو فعلا عايز يستصدر القانون ده، بس مش عشان ما يجيبش ابنه

من امتى عوكل بيوعدنا بحاجة وبيعملها؟ فاكرين ايام اضراب اربعة مايو لما جه تسعة وعشرين ابريل ادا الناس علاوة تلاتين في المية ولما اضراب اربعة مايو باظ يوم خمسة مايو رفع البنزين خمسة وتلاتين في المية؟

عادي، ده المعتاد، ابتسم انت في المنوفية حضرتك

هو عايز يستصدر قانون يحميه ويحمي ابنه من المسائلة وبررررررررررضه ح يجيب ابنه، اول ما القانون ده، لا قدر الله، يتم استصداره، عشان عادي، هو متعود يسحبنا من ايدنا بالراحة واول ما نديله ضهرنا يلسعنا على قفانا

انتوا مش حاسين وللا ايه؟ ما ورمش؟ انا شخصيا قفايا ورم... ما اعرفش بقى انتوا من كتر الضرب ممكن يكون نحس؟

وماحدش يستهين بانه خايف من الشعب، ايوة خايف منه وشاف بعينه صورته وهي بتدهس بالجزم، وعارف اننا بنكرهه، وعارف ان فيه ناس كتير تتمنى انه يتحاكم، وعارف انه عامل جرايم

بس ده مش معناه انه عايز يمشي ولا ما يجيبش ابنه، ده معناه انه عايز يأمن نفسه وابنه بزيادة

ثالثا: على فرض ان طرح عماد اديب صحيح، انا بقى عندي يقعد كمان عشرين سنة على قلبي لحد ما يسري عليه اللي بيسري على كل حي (وللا ايه؟ وللا هو مش حي؟) ولا اني استصدر قانون يعفيه ويعفي كل من ييجي بعده من المحاسبة

وبرضه ماحدش يقول لي: ماهو بيتحايل على القانون، لما يبقى فيه قانون يدينه وهو يتحايل عليه تختلف تماما عن ان يبقى فيه قانون بيقول له: اسرق براحتك

رابعا: ما تستهونوش بكلام عماد اديب، عشان ده كلام عوكل نفسه، ده الناطق باسم شخصه المعظم

وما تصدقوش عوكل، عوكل دايما بيضحك علينا

وما تستهونوش بالشعب عشان هو فعلا يخوف... الظاهر عوكل بيفهم في الشعب المصري اكتر منكوا

عوكل شكله عايز يطلقنا وخايف نطالبه بالنفقة فبيقرفنا عشان نعمل خلع

باعت لنا رسالة مع عماد اديب يقول لنا: سيب وانا اسيب

قال ايه "كل رئيس" مضطر انه يختار خلفه عشان يضمن انه ما يتحاكمش، هذه الحكمة الغراء جات لنا على لسان عماد اديب واللي ما يعرفش ده صديق شخصي لعوكل، ما يتهياليش ان فيه حد ما يعرفش

يعني عوكل جاي لنا بالمفتشر يقول لنا، اضمنوا لي اخرج انا والعيال نضيف يا اما والله اسيب عليكوا فرانكشتاين

للدرجة دي عارف هو عامل ايه؟ ايه يا ناس اللي بيتقال لنا ده؟ احنا قاعدين في بلد وللا في الجبل مع المطاريد؟ وعايزنا عشان خاطر عيونه نطلع له قانون يخرجه بالسلامة ومش مهم بعد كده نلبس في مين

مش كده؟ بعد ايه؟ بعد ايه يا عوكل؟ بعد ما خربتها؟ بعد ما سوست البلد وخوختها وسبتها للامريكان يتغلغلوا في كل خلية فيها والبلد ما بقتش بلدنا خلاص؟ تولع بقى، يجيلنا سعد الدين ابراهيم، يجيلنا اسامة الغزالي حرب، يجيلنا المهبوشة ام كدش اللي لا محصلة ست ولا راجل وهي الدليل الحي على صحة نظرية داروين، يجيلنا جدري مالكش دعوة، دي شغلانة الامريكان يحطوا الحاكم الاقليمي اللي يعجبهم، انت الحمد لله جبت ضرفها وعملت اللي عليك وعايز ترتاح بقى وتسلم شعلة الخراب لجيل الشباب، وبتهددنا بالعاهة المستديمة اللي بليت بيها البشرية؟ طب اللي قبلك والناس بتترحم عليهم من غير اي مناسبة لمجرد انهم ماتوا واحنا من عادتنا اننا نترحم على الميت حتى لو كان خط الصعيد وريا وسكينة وانت حضرتك زهقت مننا واستكفيت وعايز تمشي

لا بقى يا سيدي، تموت وسطنا زي ما التانيين ماتوا وسطنا وخلاص، عشان على الاقل تلاقي حد يترحم عليك من غير مناسبة برضه

هو انت خربتها قاعد وعايز تخربها ماشي؟ انت ايه؟ يا اخي احنا لو بينا وبينك دم ما كنتش عملت كده

ثم ايه "كل رئيس" مضطر.. ده فين يعني؟ كل رئيس فين؟ في مصر صح؟ طب ايه قولك يا عوكل ان انت الظاهر فعلا الخوف سيطر على مخك وما بقتش تعرف تكتك زي زمان؟ عشان احنا ما جاش على بالنا نحاكمك

تصدق؟ انت دلوقت اللي لفتت نظرنا انك تستاهل تتحاكم على المعاهدات اللي وفقها بعت البلد، وعلى فزعتنا لما نعرف ان ناس رافعين قضية عشان ميدان التحرير متباع لهم، وعلى سرطنة اكلنا، وعلى بيع بلدنا، وعلى الفتنة الطائفية اللي خلقتها وكل شوية تزكيها، وعلى شهداء المواصلات برا وبحرا وجوا، وعلى تسديدك لرزقنا: اللحمة فيها حمى قلاعية، الفراخ فيها انفلوانزا، السمك فيه تلوث، قوم حتى يا راجل الفول والطعمية تحط لنا فيهم مجاري؟ وعلى تكبيلك للبلد بديون بفوايد مركبة وتخطيطك لهدم كل بناها التحتية عشان البلد تفشل في سداد الدين يقوم البنك الدولي يضع ايده على بنيتنا التحتية ويديها لمستثمرين اجانب وانت تاخد كومشن، وعلى تلويثك لهوانا وسمانا وتبوير ارضنا، ده انت فضيحتك وصلت لالكس جونز، وعلى كل اللي عملته، اللي ما يتوصفش باقل من انه جرائم حرب ضد الانسانية

وتصدق بقلبنا الابيض ما كناش واخدين بالنا انك ينفع تتحاكم، انت بقى عشان عارف انت عامل ايه وخايف من المحاسبة، وعارف انت مخلف ايه وبتهددنا بيه

ومش عاجبك اعملي خلع يا اما والله كل يوم علقة

انا طالبة توضيح عاجل من الاخوة المنايفة، فيه كده في الدنيا؟

ايش عرفك انت على الشروق

الشروق كتبت عن الحملة

وعلى فكرة لما تكتب في السيرش تلاقي كتير ناس كاتبة، مدونين، واحنا بنشكرهم كلهم طبعا

بوستات كتير قوي عنوانها ايش عرفك انت... تخص جمال يعني، عشان فيه واحدة كاتبة بوست في فورم باين بتقول: ايش عرفك اني حلوة :) مالناش دعوة بيها دي

ياللا انضم بقى للحملة معانا، لسة الف وخمسمية وخمسين بس؟

بعد ما حول الدايو لشفروليه والبني ادمين لفحمة... الدبابة استقال

وهو خسران ايه؟

ولا حاجة

ح يتحاكم؟

ابدا

وتلاقيه اصلا زهقان من الوظيفة.... اصله عصفور حر.. صوصوصوصووصوصو

في كل الاحوال اهو غار غير مأسوف على شبابه

مين بقى اللي ح ييجي مكانه يا ترى؟

هو مين اللي واخد توكيل مرسيدس؟ وللا بقى خلاص، اكيد ح يجيبوا واحد شعبي عشان يحس بالشعب

مين اللي واخد توكيل السرفيس؟

امناء ايه وفتاء ايه؟

مع احترامي للاستاذ هيكل والاستاذ حمدي قنديل والاساتذة مبادرات كلهم

انتوا بتليسوا للنظام؟ كل المبادرات دي كانت فين ايام التعديلات الدستورية؟ فاكرينها؟ ايام ما العيال الصغيرة اتعجنت واترمت في صندوق وفضلوا يلفوا بيهم في الصحرا وبعد ما القادة العظام جرجروهم في ميدان طلعت حرب خلعوا منهم وقفلوا تليفوناتهم وطلعوا في الجزيرة محفلطين مظفلطين كتيري الكلام والعيال طلعت من العلقة شوية تفوا على البلد وشوية شافوا نفسهم وشوية اهم لسة بيحاولوا

كانت فين بقى المبادرات دي في اللحظة التاريخية الحاسمة بتاعة التعديلات الدستورية بدل بهدلة العيال؟

جايين دلوقت تدوا النظام قبلة الحياة وتعملوا له تنفس صناعي؟ ما خلاص، ما التعديلات الدستورية اتعملت واتفصلت على جمال وخلصنا

مافيش بقى غير اننا نفضل مشكلين معارضة شديدة لجمال عشان ما ياخدهاش بالساهل، ويبقى عارف انه مكروه، وهو مكروه وسط العمال والفلاحين فعلا لان دول الفئتين اللي بيتهم اتخرب من سياساته، ولسة بيتهم ح يتخرب تاني، على احسن التقديرات المعارضة الشديدة لجمال مبارك ح تخليه ما يوصلش وعلى اوحش التقديرات لو وصل مش ح يقعد

وهو اصلا كده كده ضعيف، ومنفصل عن الواقع، وعايش في زمان ومكان مالهمش اي علاقة بينا، يعني مش ح يقعد اكتر من خمس سنين قبل ما الناس تنزل تقطع بعضها في الشارع من الجوع، وبعدها الله اعلم ايه اللي ح يحصل، كل شيء جايز، جايز الجيش يمسكها وتبقى حكم عسكري زي هندوراس، جايز تقلب فوضى وحرب اهلية، جايز والعياذ بالله امريكا تتدخل (هي اصلا زارعة صحابها هنا عشان لما تيجي تنزل اهلا وتحل سهلا) وجايز على اخر لحظة ربنا ينور لنا سكتنا وينفخ في صورتنا، مافيش حاجة بعيدة، حصلت كتير قبل كده، وكان بتبقى السكة ضلمة وببركة ربنا فجأة تنور، وح تبقى معجزة صحيح، بس حصلت كتير معانا احنا بالذات في السابق، ومصر بالذات اثبتت انها غير خاضعة للتوقعات

مافيش حاجة ح تنجينا غير اننا ما نوطيش وما نليسش ونمسك فيها بايدينا وسنانا، والله المستعان

انتهينا بقى

والنظام ده خلاص شاخ وباظ وسوس وما بقاش نافع، بتحاولوا تنقذوه ليه؟ لما كنا محتاجين انقاذ البلد من التعديلات الدستورية خلعتوا مننا، ولما النظام دلوقت محتاج انقاذ من مصير اسود بتعملوا له مبادرات؟

لا متشكرين

ثم يعني كل الاسماء المقترحة ما كانوا موجودين في البلد من قبل ما احنا نتولد، ما لو كان ال... بينفع كان نفع نفسه

انتوا لسة فايقين دلوقت؟ احنا خياراتنا مش كتير

احسن سيناريو متاح: جمال يتراجع ويفضل مبارك لحد ما ربنا يئذن وبعدها الله اعلم

اوحش سيناريو متاح: جمال يتقدم ويبتدي بقمع دموي لمعارضينه وبعدها تتقلب عليه ويطير ثم الله اعلم

كده

واجهوا الحقيقة، هي البلد بقت كده، مصيرها الله اعلم، انتهينا، مافيش داعي للخيال ودفس الراس تحت المخدة عشان ما تشوفوش الانهيار الكبير، خلاص بقى، قميص الاسمنت المية اكلته، وكل الترميمات عمرها الافتراضي خلص، وكان في ايدكوا تساعدونا في توقيتات جوهرية وكنتوا سرحانين، وضيعتوا علينا فرص كتير

اسكتوا بقى... سيبونا في اللي احنا فيه، هو احنا ح نشوف وش حد فيكوا ساعتها؟ كله ح يخلع على برة واحنا اللي ح نفضل فيها

وح نشيلها، هو حد شايلها غيرنا؟

اللي معاه مبادرات متأخرة اربعين سنة، واللي جاية لنا من برة تعمل جمعية اللي اسمها نوال السعداوي دي اللي ما بتفكرش غير في الاعضاء التناسلية، واللي فاتح لنا حزب وهو اصلا كان صاحب جمال مبارك اللي هو اسامة الغزالي حرب بدون ذكر اسماء، واللي صاحب كوندوليزا وعمل لنا بطل من غير اي مناسبة، وكل دول خواجات زي جمال بالظبط، ايش عرفهم بينا دول؟ كلهم معاهم فيزا على برة وجنسية تانية اذا ازفت الازفة... واحنا بقى معانا سيدنا الحسين والست الرئيسة ام العواجز، يا ندفن جنبهم يا نغزل برجل حمار كالعادة... مدد يارب

بالنوسبة لحكاية "الطفل الاعوجبة" دي

اولا وقبل اي حاجة، احب اسجل اعجابي الشديد بالاعلام العربي وسعادتي بحرصه، واحب اسجل فضيحة رويترز والديلي تليجراف وعدم موضوعيتهم وسفاهتهم

لان الاعلام العربي لما وكالة نوفوستي كتبت ونزل فيديوهات عن الطفل الداغستاني اللي زعمت ان بيظهر على رجله آيات قرآن، تناولوا الموضوع بمنتهى الحرص، ونقلوا الخبر بموضوعية من غير ما يهللوا له ولا يدوا له حجم اكبر من حجمه، لان لسة الاطباء ما قرروش ده ايه

ده غير ان فيه قنوات رئيسية تجاهلت الخبر لحد ما يتأكد، زي الجزيرة والعربية. وده حرص مبالغ فيه، محمود، لانهم عرب واي حاجة ح تتحسب عليهم

في المقابل، الديلي تليجراف ورويترز نقلوا الخبر، بس نقلوه كأعجب ما يكون، اولا مافيش جملة خبرية واحدة في الخبر، واحد بيكره المسلمين كره العمى، استخدم لغة الاستهزاء وحط كلمة "معجزة" بين علامتين تنصيص مع ان نوفوستي ما قالتش معجزة، وقعد يتكلم عن اليأس المسيطر على المسلمين، والعنف الاسلامي المتزايد في داغستان، ثم ختمها بالمقتطف ده

Though divine "miracles" are common in Christianity -- such as weeping icons and stigmata, bleeding wounds in the hands and feet similar to those of Christ -- Islam rarely has them.
هههههههههههههههههههههههههه
لا حول ولا قوة الا بالله، والظاهر يا اما ناقلين من بعض يا اما هو صحفي واحد وبيعمل سبوبة في مكانين لان المقتطف ده نازل في الاتنين.
طيب يعني رويترز والتلجراف بيتخانقوا مع مين دلوقت؟ بيتخانقوا مع نفسهم
اولا: احنا مش بنصدق في المعجزات، ما عندناش معجزات في الاسلام وكلمة معجزة دي مش مذكورة في القرآن بالمعنى ده، مذكور وما أنتم بمعجزين في الأرض، ودي مالهاش علاقة بالمعجزات
احنا مؤمنين بالايات، والايات دي في النفس اللي طالع وداخل، مش لازم تبقى حاجة غريبة، المفروض اننا مؤمنين ان كل حاجة في الدنيا غريبة ولازم نتأملها، حتى النشاط اليومي بتاعنا
والمعجزات دي، وفقا للتصور الاسلامي، ربنا كان بيبعتها للانسانية لما كانت بدائية، بس بنزول الاسلام خلاص، والرسول قال ما معناه لو واحد قال لكوا فيه إله غير الله كدبوه ولو شفتوه ماشي على المية، عشان الفيصل في الايمان الاسلامي مش اللي بيمشي على المية، الفيصل هو ان الناس تستخدم عقلها
هم اللي قالوا معجزة، لا نوفوستي قالت معجزة، ولا احنا قلنا معجزة، ده الاعلام العربي ادا الخبر ادنى اهمية على الاطلاق
ثانيا: هههههههه هو حد جاب سيرة المسيحية دلوقت؟ ايه يعني اللي كاتب الخبر بيقول لنا معجزاتنا اكتر من معجزاتكوا؟ هههههه طيب يا حبيبي معلش ما تزعلش
ده حتى الايات المكتوبة مش جايبة سيرة المسيحية في حاجة
ثالثا: ايه لزوم قلة الادب واليأس والعنف الاسلامي؟ ايه دخل ده في الخبر؟ انتوا شفتوا نوفوستي نقلت الخبر ازاي، انقلوها زي ما هي نقلتها، والحقيقة الاعلام العربي اللي منهم اهتم ينقل نقل بالظبط من نوفوستي زي ما هي وقال ان مصدره نوفوستي، ايه دخل "العنف الاسلامي" في داغستان في الموضوع ده؟
وانا عمالة اكرر واقول الاعلام العربي، لان المسلمين الغربيين اهتموا نفس الاهتمام الهيستيري بالخبر بنفس طريقة رويترز والتليجراف بس في الاتجاه المعاكس، يعني انا متعمدة اقول انها مسألة ثقافة مش مسألة دين، ومش باقول كده من جيبي دي حقيقة
الاتنين، المسلمين والمسيحيين الغربيين بيتكلموا في الموضوع على انه حاجة اصلا مهمة، وقاطعة وبيتناقشوا على الاساس ده، وبينقلوا الخبر بدون ادنى موضوعية ولا مهنية
وانا شخصيا مبسوطة قوي من رد الفعل العربي عشان ده مؤشر تطور في طريقة التفكير، خلينا نبقى صرحا، لو ده خبر نزل من عشر سنين ما كانش رد الفعل العربي ح يبقى بالعقلانية دي، بس الظاهر كتر الاسية علمتنا
والظاهر كمان ان الحضارة الاوروبية في تآكل لما يوصل الامر باهم وكالة اخبارية في العالم انها تنزل خبر بالطريقة الخزعبلية دي
ده بالنوسبة للمهنيين
بالنوسبة للبلوجات واليوتيوب بقى، اللي هو رد الفعل الشعبي، برضه رد الفعل الشعبي العربي اكثر تطورا بكتير من رد الفعل الغربي على الجانبين
يعني مثلا المسلمين العرب كتير منهم علقوا بانهم متشككين في الكلام ده، وناس حاولت تستخدم المنطق، سواء منطق ديني او علمي، لتفسير الخبر، فيه اللي قال: ربنا ح يعمل كده ليه يعني؟ على رجل عيل يكتب قرآن؟ وفيه ناس قالت: اكيد فيه تفسير علمي للموضوع، وفيه ناس قالت: استنوا شوية اما نشوف الدكاترة ح يقولوا ايه. دي معظم التعليقات اللي كتبت بالحرف العربي
وما شفتش مسيحي عربي واحد دخل يقول: معجزاتنا اكتر من معجزاتكوا دي اللي كتبتها رويترز ابدا. ما علقوش خالص. مع ان لو كتبها معلق مسيحي مفهومة، لكن لما تكتبها وكالة تبقى مش مفهومة خالص
وانا شايفة برضه ان ده رد فعل عقلاني جدا من الجمهور العربي سواء مسلم او مسيحي، دول جمهور عادي من اللي بيعلق
فيه ناس قالت: سبحان الله. وام زينب قالت لي: مش عايزة اشوفه، انا باخاف من الكلام ده. هههههه
البلوجات بقى المكتوبة بالانجليزي سواء من مسلمين او غير مسلمين اتسمت برضه برد الفعل الهيستيري، المسلمين يقولوا للناس: اسلموا بقى. واللي مش مسلمين يقولوا للناس: ده انتهاك لحقوق الطفل انكم تصوروه بالطريقة دي. ههههههه، والخناقة ما كانتش بين مسلمين ومسيحيين بس، الملحدين الغربيين تعليقهم كان
I am not ready to believe in shit
اظن احنا كمان عندنا ملحدين، وانا شخصيا ما شفتش حد منهم علق التعليق ده
طب كويس، انا مبسوطة مننا، وده برضه له تفسير علمي، ان فعلا المعاناة اللي عاناها العرب طبيعي تدفعهم دفعا انهم يحكموا عقلهم ويبقوا اكثر حرصا
والقوة المبالغ فيها اللي في الغرب طبيعي تبث فيهم احساس انهم بتوع ربنا وربنا بتاعهم وانهم فوق البشر وده بينتج عنه غرور وصلف يوقع الواحد في الغلط ويخليه يرتكب اخطاء مهنية ما يعملهاش عيل عنده خمس سنين
والتفسير بقى التاني
ان العرب فعلا عندهم مشاكل قد دماغهم ومش فاضيين حقيقي للكلام ده
بينما الرفاهية بتخلي الواحد فاضي يسفسط، ودايما الامم لما بتوصل لقمة الرفاهية بتبتدي تتآكل، واحد علامات تآكلها انها تنغمس في السفسطة، دول حتى سموه "جدل بيزنطي" في اشارة الى انشغال القصر البيزنطي في جدل عقيم والعدو على الابواب من كتر ماهم سكرانين بالقوة والرفاهية
نيجي بقى للطفل المعجزة
انا في الاول ما اهتميتش قوي لسبب بسيط، حاجة زي دي لا ح تنقص ولا ح تزود، المسلم مش محتاج معجزة، واللي مش مسلم ومؤمن بدين تاني ممكن يفسرها على ان الشيطان هو اللي بيعمل كده، واللي مش مؤمن بديانة ح يقول يا اما معمولة يا اما لها تفسير علمي. ماحدش بيغير معتقده عشان حاجة بسيطة زي دي.
طيب انا متشككة في موضوع الطفل ده، وعندي احساس، ربنا يسامحني لو كنت ظالمة فيه، بيقول ان دي معمولة
بالرغم من ان الخبر بيقول
Medics deny that the marks are from someone writing on the child's skin.
بس الله اعلم، ممكن يكون الدكاترة صح، وممكن يا حمير يا كدابين، ليه بقى؟ لأن ربنا لو ح يكتب قرآن مش ح يغلط فيه
بصوا على الصورة دي

بصوا بقى على اخر كلمة على رجل الواد، اللي هي مفيدة شوية دي؟ اييييوة

"علم"

غلط

الآية في سورة الاعراف بتقول: ولنقصن عليهم بعلم

مش

علم

الله اعلم

يمكن الصورة مش جايبة حرف الباء، بس انا فعلا مش شايفاه، ومش باين ان فيه حرف قبل العين والا كانت ح تبقى مقفولة، ولو الكاميرا جايبة الصورة صح، يبقى فعلا الاب والام هم اللي عاملين الحكاية دي لاي اسباب بقى

وبرضه ياعيني الله يكون في عونهم في داغستان واخدين بالجزمة ونفسهم يترحموا، فممكن يكون الاب والام تفتق ذهنهم عن الفكرة الجهنمية دي

وعموما الدكاترة ح يقولوا، لو دي حاجة مكتوبة فعلا على جلد الواد بمادة تسبب الالتهاب ح يقدروا يعرفوا

في كل الاحوال، انا بس حبيت اسجل اعجابي برد الفعل العربي

نو مور وور؟ فعلا

حد يقول لي احنا ايه الفرق بينا وبين اي بلد بتحارب؟ ومش ح اسأل ايه الفرق بينا وبين اي بلد تانية في حالة لا سلم لا حرب مع اسرائيل عشان دول حالهم احسن مننا بكتير، ولا نحلم اننا نتقارن بيهم

ايه الوحش في الحرب؟ انها بتموت الناس، انها بتعمل فوضى، ممكن تعمل حرب اهلية، (في حالة لما يبقى فيه احتلال مش مجرد حرب) ممكن تجيب احتلال، ايه الوحش في الاحتلال؟ ناس اغراب عايزين ياخدوا موارد البلد لحسابهم ويستعبدوا الشعب

حد يقول لي ان اللي فوق ده مش موجود هنا في مصر، قولوا لي، يمكن انا بابص بنضارة سودا

احنا بناكل احسن من العراق مثلا او فلسطين وافغانستان؟ بنشرب مية انضف من ميتهم؟ لما الف واحد يموتوا في لبنان على مدى تلاتة وتلاتين يوم في الحرب دي حاجة فظيعة، ازاي بقى مات قدهم في اربعة وعشرين ساعة في البحر عندنا واحنا ما كناش بنحارب؟ حادثة القطر الاولاني مات فيها تلاتلاف واحد في ست ساعات، يعني قد اللي موتتهم اسرائيل في تلات اسابيع في غزة مرتين، من غير قنابل ولا فسفور ولا سحر ولا شعوذة

الاحتلال، خصوصا المودرن ده، بيستخدم اسلحة محرمة دوليا، وحشة في ايه؟ اذا مش بتموت بتجيب امراض وغالبا سرطان

يا سلااااام، واحنا لما ناكل خضار مروي بمية المجاري ده بيجيب ايه؟ حلاوة مولد؟ لما التقاوي بتاعتنا تيجي من اسرائيل مسرطنة، ده اسمه ايه؟

العدد المهول من الاطفال المرضى بالسرطان اللي انفجر في وشنا فجأة ده ايه؟ يعني لو كنا انضربنا بقنبلة ذرية ما كانش كل العيال دي جالها سرطان، تلت سرطان الاطفال في العالم موجود في مصر

حرب اهلية؟ الصعيد ما بطلهاش، من ساعة ما الامن عتبه ولحد اخر مرة اتحرق فيها مسيحيين ما بطلتش، هم بس مش راضيين يفسروا في وشنا

ما اعتقدش ابدا ان اللاجئين الفلسطينيين والعراقيين والافغان واليمنيين حالهم اوحش كتير من سكان العشوائيات اللي تعدادهم بالملايين وكل شوية يجروا وراهم بالونش عشان يهدوا عششهم وهم ينزوحوا في حتة تانية ويبنوا عشش تانية

هو احنا مش بقالنا تلاتين سنة عاملين سلام؟ مين اللي رمى القنبلة دي علينا؟ ثم اترمت امتى؟ انا ما شفتهاش

مش ح نتكلم عن سرقة موارد الوطن لحساب الاجنبي واستعباد الشعب عشان مش عايزين قباحة، المدونة دي طاهرة، وح تفضل طول عمرها طاهرة

طب ايه؟ ايه الفرق؟

فيه فرقين:

الفرق الاولاني: ان اللي عنده حرب او احتلال عارف هو بيتعمل فيه كده ليه؟ وعنده قضية، وهدف، وعارف عدوه، وعارف يعمل معاه ايه؟ حتى لما بيبقى فيه خاين بيعرف يسميه خاين وعميل للعدو، بسهولة الحكاية دي بتتعمل، احنا هنا كل ما بنتكلم بيقولوا لنا مافيش داعي للتخوين

ولما ناس بتموت بيزعل عليهم وبيقول شهدا، بس بيبقى فخور بيهم

لكن احنا بنموت فطيس، موت عبثي مالوش معنى ولا معروف حصل ليه ولا حتى ايه؟ يعني تقدر تزعل على ضحايا الدويقة ويصعبوا عليك، لكن ح تبقى فخور بيهم ليه يعني؟ وللا هم حتى يفخروا بنفسهم ليه ويقولوا احنا صامدين ومستحملين؟ عشان ايه الهدف في الاخر؟

الفرق التاني:

نكتة.... كل الدول اللي بتحارب او اللي لا قدر الله عندها احتلال عندها انتخابات

تصدقوا؟

شوف، برضه باقول لا قدر الله

وده الفرق التالت، اننا عندنا كل اعراض الاحتلال وخايفين، بينما اللي واقع تحت احتلال فعلي مش خايف من حاجة، خلاص، اوحش حاجة حصلت له.

طب انا مش عايزة احتلال

انا عايزة بلد.. اصل البلد اللي حيلتي بااااااظط... بااااااظط

مش كفاية تشوف مصر من هنا عشان تعرفها

تصميم: محمد عبد العاطي

انضم الى ايش عرفك انت؟

شيفروليه الدبابة

دبااااااااااااااااااابة

يعني تدهس المصريين وانت نااااازل

يعني تعجن المصريين وانت ماااااشي

يعني طظ في المصريين المهم انت تعمل فلوووووس

البلد اللي حيلتنا باااااااااااااااااااظط

باااااااظط

ومش مهم اللي ماتوا قد ايه؟ للدرجة دي اللي ماتوا مش مهمين، لدرجة ان جهة تقول تمانية ماتوا، وجهة تانية، حكومية برضه احنا مالناش دعوة احنا مش بنتكلم، قالت خمسة وعشرين، وجهة تالتة حكومية بتقول خمسين

وممكن تطلع جهة تقول ماحدش مات، لانهم شهداء، والشهداء احياء عند ربهم يرزقون، يبقى بتقولوا عليهم ماتوا ليه؟

انا كل يوم باقتنع انهم عايزين يموتونا بالقصد، والله العظيم، قولوا عليا مجنونة، مهبوشة، مخي فوت

ما انا ليا حق مخي يفوت، هو اللي قاعد في البلد دي ومخه ما فوتش يبقى البعيد ما عندوش دم،، بس انا فعلا مقتنعة انهم بيخططوا يموتونا ازاي، القتل ده مقصود

اشمعنى القتل الجماعي ده ما يصيبش غير الغلابة؟ حد يشرح لي، مش اهمال، الاهمال ده ييجي على الكل، لكن لما ييجي على فئة معينة بس من الشعب، الاهمال ده بينقي يعني؟ وقتل كده على طول، في البر والبحر والجو؟ فوق الارض وتحت الارض؟ في الريف والحضر؟ وكل سنة؟ كل سنة؟ حد يقول لي ازاي دي كلها مصادفات

والله عايزين يموتونا، عايزين يخلصوا مننا عشان احنا كتير وفقرا وعاملين لهم دوشة

طيب بس احنا العيال عايزين يسافروا ويسيبوا لهم البلد، ما يساعدوهم يسافروا وبلاش يموتوهم.....هييييه، الناس مش عايزانا

ما حدش عايزنا، اوروبا مش عايزانا، الدول العربية ما بقتش عايزانا، وطبعا الحكومة مش عايزانا وبتموتنا

طب هم لما يموتونا كده، ح يلاقوا مين يضربوه؟ ح يلاقوا مين ياخدوا منه ضرايب يضربوها في جيبهم؟ ح يلاقوا مين يستعبدوه؟

ماحدش عايزنا غير ربنا... احسن من الكل

-------

ليث شبيلات شفته في الجزيرة دلوقت اتعجن، خمس بلطجية ضربوه في الشارع، لا ده مش عادي، ده في الاردن مش هنا، الجزيرة بتقول انه من يومين انتقد الحكومة

-------

فيه مصادمات في القدس ما بين الشباب والقوات الاسرائيلية، ضربوهم بالكراسي والشباشب وحاجات كده عمالة تطير، ربنا يهديهم ويهدي لهم الحال ويوحد كلمتهم ويكفيهم شر الخونة والحمقى، هم ايه الانتخابات اللي ملبوخين فيها دي؟

والله انا حاسة ان حكاية الانتخابات الوهمية في بلد ما حصلتش لسة معمولة لهم مخصوص زنبة فيهم عشان يتلهوا عن اسرائيل، ماعاشوا خمسين سنة من غير انتخابات، هم عندهم بلد؟ قاعدين سايبين الدنيا وعمالين يقولوا الانتخابات في الضفة وللا في غزة، الانتخابات تبتدي وللا ما تبتديش

عندهم احتلال، اللي يقدر على حاجة يعملها

ربنا ينفخ في صورتهم، انا زعلانة عليهم قوي، ما احبهمش يبقوا زي بقية الشعوب العربية ابدا يارب يرجعوا زي ما كانوا كده

الاعلام المصري الراقص

القناة الاولى جايبة حفلة فيها مدحت صالح بيقول: وانا ويايا بعيش زي المليونيرات واحلم وانا ماعييش ما العنش الازمات

البيض بيضك بيتكلم عن: الشائعات في المجتمع المصري

قناة الحياة بتقول: الشعب المصري بيبالغ

قناة النيل للاخبار: جايبة برنامج مباشر عن الاثار المصرية

دريم: بتتكلم عن الانتخابات

الجزيرة مباشر هي الوحيدة اللي عاملة علينا مناحة، وحسين عبد الغني وشه ازرق من كتر الزعل، وجايب الناس تتكلم

واحد قال: الفلاحين هم اللي عملوا عمليات الانقاذ

الناس ملمومة على حسين عبد الغني وعايزة تتكلم، وهو عمال يقول لهم حاضر حاضر، ويستضيفهم ويسيبهم يتكلموا

واحد تاني قال: محافظة الجيزة هي المحافظة المهمل في العالم المصري كله من حيث حكومتها ومن حيث كل حاجة برة فيه كل الخدمات

واحد قال: مش عايزين نلوم الحكومة، احنا اللي مهملين، الموظفين نازل لهم اجهزة ما عرفوش يتعاملوا معاها، هم ناس فلاحين ايش عرفهم بالاجهزة دي؟ اعضاء مجلس الشعب مش بينزلوا غير في الانتخابات، هيئة السكة الحديد عارفة ان العياط مكان المصايب، بس بيبصوا لنا اننا راكبين ببلاش، اللي بيدفع خمسين جنيه وخمسة وسبعين جنيه ده ياخد خدمات، لكن ابو اتنين جنيه ده مش مهم، ولما بنروح الموقف بيقولوا لنا: اجرة الميكروباظ خمسة جنيه وان كان عاجبكوا، وانا مرتبي خمسميت جنيه خمسة جنيه رايح وخمسة جنيه جاي؟ ولو وصلت لعشرة جنيه ح اركب، ياروح ما بعدك روح

ماما كانت عمالة تعيط وانا مش عارفة اضحكها، ما ضحكتش غير لما قلت لها على "العالم المصري" وبعدين قالت لي، ماهي مصر فعلا بقت كرة ارضية لوحدها

انا عايزة اعرف ايه كم الجليطة وقلة الذوق وقلة الادب اللي الاعلام المصري فيها دي، الناس في ميتم وهم بيذيعوا اغاني؟ ده ماما كانت باعتة مقال عن حدث فني كلمت المجلة وقالت لهم الغوا المقال وهو لسة ح ينزل الاربع الجاي، ايه قلة الادب دي؟ هي الناس دي ايه؟ ما بتحسش؟ ما بتفهمش؟ بهايم؟ حلاليف؟ جواميس؟ ايه ده؟

ثم ايه قناة الحياة بتاعة المصريين بيبالغوا دي؟ بيبالغوا ازاي؟ موتوا الناس بنفسهم؟

المصريين مالهم؟ مالهم؟ انا عايزة اعرف مين شعب في الدنيا مالوش حكومة خالص ولا دفاع مدني وواقف لوحده ينقذ الضحايا

طيب لو هي اناركية، عيشونا اناركية صح، نعتمد على نفسنا، وما يبقاش فيه عملة ولا حكومة ولا ضرايب ندفعها ولا شرطة وناخد بالنا من بعض وخلاص

ح نعرف ناخد بالنا من بعض احنا كويسين في الحكاية دي، مافيش حاجة بتنكد علينا غير حكومة ورانا بالكرباج وبتقلبنا في الفلوس

لو هي دولة يبقى تبقى دولة، مارضيوش ينزلوا الجيش عشان اللي ماتوا غلابة

مع ان الجيش ده اتعمل في اساسه عشان يدافع عن الغلابة ومعمول من الغلابة، والغلابة هم اللي مشيوا على الالغام وخير الغلابة على الجيش والحكومة وعلى البلد كلها، دول اللي بيكنسوا لنا الشوارع ويشيلوا زبالتنا وقرفنا

دول اللي بيأكلونا ويشربونا من شقاهم وتعبهم

ودول لما ماتوا مالقوش غير غلابة زيهم يشيلوهم، وواقفة الشرطة تقول لهم انزلوا من فوق؟ طالعين يجيبوا الجثث قوم الشرطة تقول لهم انزلوا من فوق؟ يا خرابي على التخلف، انبي تعوض عليا عوض الصابرين يارب

وشايفاهم اهو، عمالين يطلعوا الجثث ويقولوا كلهم في صوت واحد: لا اله الا الله، لا اله الا الله، لا اله الا الله

والشرطة والدفاع المدني بيعملوا ايه؟ الدفاع مصدر الفلاحين وواقف وراهم مستنيهم اما يطلعوا له الجثث، والشرطة عمالة تزق في الناس، يعني لا عايزين يعملوا حاجة وبيزقوا اللي بيعمل

يا ناس هو كل سنة؟ كل سنة؟ ده الدويقة كانت رمضان اللي فات، هم المصريين دول ايه؟ عليهم ذنب؟

يموتوا كده؟ ولا بواكي لهم خالص كده غير الغريب هو اللي بيعيط عليهم؟ يوم ما مصري زي حسين عبد الغني عايز يعيط على اهله ما يلاقيش غير قناة قطرية يعيط فيها؟

اتفوووو

اتفوووووووووو عليكوا وعلى وشكوا عالم رمم جرابيع شبعة من بعد جوعة

آآآآآآآآه يخرب بيتك يا عوكل القطر طلع بتاع الفقرا

حسين عبد الغني بيقول ان ده القطر اللي بيستخدمه عمال النضافة وبياعات البيض والجبنة والفطير والحاجات

وبيقول ان الدفاع المدني اتأخر، والمسطحات المائية والجيش طنشوا وقالوا مافيش حاجة ملحة لحضور الجيش!!! طبعا مافيش حاجة ملحة انكوا تنقذوا الفقرا

وبيقول ان الانقاذ بيتم معظمه من الاهالي

من الاهالي

حسبي الله ونعم الوكيل، ربنا ح يعمل فيك ايه يا عوكل حسبي الله ونعم الوكيل
وعلى فكرة، احمد نظيف بيتابع في التليفون
زينا كده ما احنا بنتابع، اشمعنى هو رئيس وزراء واحنا لا؟

القطر اللي على حق يبعت المصريين لدار الحق

هي دي القطارات اللي صرفوا عليها ملايين في الاعلانات عشان، على رأي صاحبة ماما، يعلمونا ازاي نركبها؟ على اساس اننا عمرنا ما شفنا قطر قبل كده

ودي بقى اللي اتصرف عليها ملايين من ضرايبنا

بيقول لك جاموسة "شاردة"، وفي بعض الروايات بقرة، هي اللي صدمت القطرين مع بعض

طب ازاي؟ بصت بطرف عينها للسواق سحرته؟ قال لك لا، ده القطر لما شاف الجاموسة الشاردة ام عيون قتالة قام اتسمر مكانه قام جه القطر اللي بعده ما اخدش باله ان القطططططططررررررررررر واقف

ما شافش قطر 

قام لابس فيه

هو القطر بيوقف بالسهولة دي؟ اقصد لما شاف الغزال الشارد وقف ببساطة كده؟ مش مفروض انه ما بيقفش غير بالطبل البلدي؟ ثم وقف بالطبل البلدي مش مفروض ان بيبقى فيه اشارة انه واقف؟ وفوق ده كله بيبقى فيه اخطار للقطر اللي جاي بعديه

ازاي القطر فرمل لما شاف الجاموسة الشاردة؟ حد يقنعني، احنا مش بنشوف في الافلام ان القطر لو اتفاجئ ما بيوقفش؟ ولازم تبعت له اشارة ان فيه حاجة على الطريق عشان يقف؟ وللا حطوا له خاصية الفرامل دي لما جددوه هيهيهيهيهييييي

الواحد مش عارف يضحك وللا يعيط

خمستاشر واحد ماتوا، لاااا بسيطة، مدام ما عدوش الالف تبقى بسيطة

وحياتك ولو عدوا الالف بسيطة برضه

كل ده من اجلك انت انكوي بالنار والقح جتتي

ده طلع ايش عرفنا احنا؟

يا جاهل منها لها له له

ايش عرفكوا بتطور العالم السريع وتفضلوا كده تفكيركوا متوقف عند الستينات؟ الله يرحمه السادات

لا انا ما اتجننتش، ده جزء من اقوال جمال مبارك رضي الله عنه وارضاه

هو طبعا الله يرحم السادات مش جابكوا؟

ايش عرفنا احنا بدور مصر الاقليمي المهم؟ الكلام عن تراجع الدور المصري وقفاها اللي بتاخد عليه بمضرب الدبان ده كلام انشا، مصر مهما كان، ست كبارة، وقد والدتنا، وكل الناس بتحترمها، اذا ما كانش عشان حاجة يبقى عشان سنها ومركزها

موضوع ضرب الحدود واختراق مجالها الجوي ده كلام انشا

موضوع ان السيد الوالد بلسانه قال: اللي بيدخل من حدود باخطر اسرائيل واللي بيخرج باخطر اسرائيل ولو ما اخطرتهم هم شايفين من المونيتور وح ينزلوا لي بنفسهم ده كلام انشا

موضوع اننا ما بقالناش منتج محترم نصدره ونعرف نضغط بيه على اللي بيتعاملوا معانا اذا احتكم الامر ده كلام انشا

موضوع ان دول حوض النيل مدية ودنها لاسرائيل واحنا مش عارفين نفتح بقنا ده كلام انشا

موضوع اننا لما حبينا نرشح واحد لليونسكو رحنا اخدنا الاذن والسماح من الاسرائيل وبرضه ادتنا على قفانا ده كلام انشا

العالم بيتغير

ييجي واحد وللا واحدة اغبيا زيي يسألوا طب ملامح التغيير ده ايه؟

ايش عرفكوا انتوا؟

هو ليه محسسني انه بيتكلم عن حاجة اخترعوها اول امبارح الساعة عشرة الصبح؟ اللي بيقوله ده كان بيتقال في القرن التمنتاشر واثبت فشله ونفس اللي انتجوا الافكار دي عدلوا فيها كتير، ده امريكا وحش الرأسمالية بتأمم اهي وبتعمل تأمين صحي، طب يقرا كتب اتكتبت في العشرينات على الاقل بدل ما هو قاعد في متحف الشمع بيكلمنا عن الفكر الجديد

ده ناقص يكلمنا عن اكتشاف نظرية داروين بوصفها ثورة في العلم ح تغير العالم

قال واحنا اللي كنا بنقول له ايش عرفك بمصر؟ هو ايش عرفه احنا سنة كام اصلا؟ بصوا والنبي بيقول ايه؟

موضحاً أن مصر يجب أن تظل متواجدة على الساحة الدولية بعد أن ولى زمن المقاطعة عندما نختلف مع أحد. وشدد جمال مبارك على أنه يشعر بتفاؤل نسبى من الجهد المبذول خلال السنوات الماضية، وأن محافظات الصعيد بدأت تأخذ حقها فى فرص العمل، سواء من استثمارات الدولة أو القطاع الخاص، موضحاً أن القطاع الصناعى حقق خلال ٤ سنوات ما يفوق المحقق خلال ١٥ سنة.
طب ده عايش فين وسنة كام؟
زمن المقاطعة ولى ازاي اذا كانت امريكا اللي في ايدها تعجن العالم لما فرنسا رفضت الانضمام لها في غزو العراق قاطعت المنتجات الفرنسية، ده كان سنة الفين وتلاتة يعني يا عم الكتكوت ياللي عايش سنة الف وسبعمية واحد وخمسين وبتكلمنا عن التجديد وفاكر نفسك محمد علي باشا الكبير ووصفك محافظ قنا بإنه من ابناء مصر العظام والمخ والاعصاب
بس فيه نايب قال عليه "رائد الاصلاح في الالفية الثالثة" طب حيث كده بقى، وبما اننا يا افندية من بتوع فكر الستينات
فـيصح اننا نبحث عن لقب كويس قوي خالص وارجوكو ما يمكنش ابدا نتكلم بالطريقة البطالة دي مرة تاني عن جنابه، اه يا زلنطحية يا دون، احفظوا مركزكوا، انا بدي اعرف ايه سر الحئد الدفين اللي عامي قلوبكوا عن الحقيقة، صدقوني (بتضخيم الصاد) انتوا اللي بتجنوا على انفسكممممم، لو مافيهاش اساءة ادب يصح اني انتظر منكوا شوية القاب خصوص افندينا


بس الحقيقة، العمدة قال لك: والله انا مش بانافق، اللي شايفة على ارض الواقع فوق الخيال
ليه؟
عشان بقى عندنا صرف صحي
ههههههههه
اي والله قال كده
اهو في الخبر ده
ايه فيلم سلامة في خير ده؟
بس الحقيقة، انا اضايقت (مع تضخيم الضاد قوي زي حسين صدقي) من الطلبات المرفهة اللي مالهاش داعي ابدا، اذا كان العمدة بذات نفسه قال ان اللي شايفه على ارض الواقع يفوق الخيال امال ايه لازمة الكماليات اللي طلبوها دي:
وطالب أحد الحضور بإنشاء مكتب بريد، واقترح عماد عبدالهادى إنشاء مدرسة ثانوية تجارية، وعندما سأله جمال مبارك: هل لها الأولوية؟ قال: «عندنا ٦ آلاف طالب يذهبون لمراكز أخرى.. العيال هيروحوا فين؟!»


واستنكر عبدالمحسن حافظ زيادة فوائد الصندوق الاجتماعى للتنمية، واستنكر سيد الخولى عدم تطهير الترع ونوهت الدكتورة منى الشحات إلى ضرورة حل مشكلة صعوبة إجراءات ساقطى القيد وطالبت بإلغاء التعليم التجارى، وطالب د.بركات بتخفيض أسعار أراضى المدن الجديدة.


ما كانش يصح ابدا انهم يتمادوا في الطلبات السفيهة دي يا منير، ده العز اللي هم عايشين فيه من لحظة ما دخلت مواسير المجاري قريتهم السعيدة ما عمرهمش شافوا زيه ابدا، اييييه، ياما كان في نفسي اعيش حياة الريف، حيث مافيش النفاق والكدب والخداع اللي بيتحكم في ابناء المدنية الحديثة


وفيه سؤال صفيق سألته طالبة مش ولابد عن نيته في الترشح فأجاب بمنتهى اللباقة:
«يبدو كل ما تتأخر الأسئلة ستسخن»
يبدو؟ يبدو كل ما تتأخر الاسئلة؟ سليمان باشا نجيب بيتكلم يا اخواتي

ارجو من جنابكم زيارة المكان ده في اقرب فرصة

(منعا لاني افاجئكم بشيء ما يسركمش اللنك اللي فوق ده الفيس بوك)

ميرسي...
ميرسي...
نهاركم سعيد

ايش عرفك انت، على الفيس بوك

اضغط على الصورة للمشاركة في جروب "ايش عرفك انت" وادخل اسأل

ايش عرفك انت 3

التصميم لمادو

مادو سأل اسئلة

ايش عرفك انت بالناس الفقرا الي مش لاقيين قوت يومهم
ايش عرفك انت بالمرضي الي مش لاقيين تكاليف العالج ولا مكان ادمي يتعالجو فيه
ايش عرفك انت بملايين الشباب الي بتتخرج ومبتلاقيش فرصة عمل ولو في فرصة عمل بيبقو تحت رحمة اصحاب العمل وبيتم استغلالهم
ايش عرفك انت بالطعام الملوث والمحاصيل الزراعية الي بتروي بمياه الصرف
ايش عرفك انت بالمحاصيل المسرطنة
ايش عرفك انت بالموصلات المتهالكة و الزحمة في المترو والاتوبيس
ايش عرفك انت اشارات المرور الي ممكن الناس تقف فيها بالساعات متعطلة مصالحهم
ايش عرفك انت بالشباب الي بترمي نفسها في البحر وبتحاول تهاجر وتهرب من ظروف المعيشة السيئة
ايش عرفك انت بالفساد الي مالي البلد و مصالح الناس الي مش بتمشي غير بالرشاوي
ايش عرفك انت بفساد الجهاز الاداري في الدولة
ايش عرفك انت بالتعذيب واهانة المواطنين في اقسام البوليس وعلي يد رجال الشرطة
ايش عرفك انت طوبير العيش الي ناس بتموت فيها علشان يجيبو كام رغيف
ايش عرفك انت عن مياه الشرب الملوثة بالصرف
ايش عرفك انت الشوراع الي مليانة مطبات ومفيهاش اضاءة ومليناة اكوام زبالة
ايش عرفك انت بمصر ولا ناس مصر
------
Wild Heart


إيش عرفك إنت بإحساس واحد ماشي في الشارع خايف اللي يطلع عليك بمطواة ولا الي يشدك إحم ولا اللي يدوسك بالعربية عشان ماحدش بينفذ القانون ولا تدوس على سلك كهربا عريان ولا ابنك يقع في بلاعة مفتوحة؟
------
الباب لسه مفتوح ومافيش حد ح يسدك... اسأل، ايش عرفه هو؟
-----
الشباب اللي بيستأذنوا ياخدوا بانر وللا اسئلة، اللي ياخد حاجة من المدونة دي ياخدها من غير استئذان، حقوق النشر محفوظة للانسانية

--------

شارك في جروب إيش عرفك انت؟ على الفيس بوك

المصريون يسألون جمال: ايش عرفك انت؟

الحقيقة انا ما توقعتش المشاركات تبقى بالكثافة دي، ياااااه، ده الناس شايلة ومعبية يا جيمي، دول كأنهم ما صدقوا يا قلب امهم، حنفية واتفتحت ما بقتش عارفة اسدهم ازاي

وبقت بقى مش عارفة، اكتب الاسئلة على طول، وللا اقول كل واحد قال ايه؟ انا قلت احط اللنك اللي عليه المشاركات وانتوا تشوفوا

واليكم دون ادنى تدخل مني ولا حتى بتصحيح اخطاء الكي بورد.... مصر تسأل جمال مبارك، ايش عرفك انت:

إيش عرفك بخريج جامعة أو تعليم متوسط مش لاقى شغلانة لا بشهادته و لا من غيرها و معندوش واسطة؟

إيش عرفك بواحد أبوه إترفد من شغله و مابقاش يقدر يصرف عليه و لا على إخواته فإضطر يسيب المدرسة و يدور على رزقه فى الشوارع؟

إيش عرفك بمهندس خبرة خمس سنين لأ و بيشتغل و بشهادته و قطاع خاص و مع ذلك مرتبه ما يجيبلوش شقة لو حوشه كله 15 سنة؟

---

سؤال بسيط لو سمحتي

هو مش جيمي برضة ممته نصها انجليزي و نصها مصري؟

يعني جيمي 75% منه بس مصري

و على حسب معلوماتي ان اللي زيه لا يصلح ان يكون عسكري في الجيش اصلا فكيف يصبح القائد الاعلى للقوات المسلحة و هو 25% منه انجليزي؟

سؤال اصغر

هل جيمي عند بسبور انجليزي؟

----

وانا هاضيف من عندي كمان :

ايش عرفك انت باحساس شاب لسه في العشرينيات وقلبه حزين وعنده احباط ويأس الدنياكله راكبه وتشوفه تديله 100 سنه.

اتقتل طموحه وكل الابواب مقفوله في وشه هو ومفتوحه علي مصراعيها للتافهين والاغبياء والفاشلين

ومطلوب منه يكون انسان كوووووووول وميحقدش علي ولاد الناس الواصلين علي الرغم من تفوقه وكم الشهادات العليا وكورسات اللغه والكمبيوتر اللي واخدها لكن مش عارف يلاقي مكان محترم يقبله للعمل فيه وكل ده لسبب بسيط لأنه معندوش واسطه واسطته دراسته وعمله الجاد ودول موصلهوش لاي حاجه...

-------

ايش عرفك انت بواحدة ست عجوزة ماتت في سريرها وحيدة بتبكي ان ولادها كلهم مش جنبها عشان راحوا الخليج بعد ما ضاقت بيهم الدنيا هنا عشان يعرفوا يستروا نفسهم

ايش عرفك انت باوضة وصالة ساكن فيها 3 اسر بملحقاتهم

ايش عرفك انت بناس ساكنة في عشش كل 10 اسر ليهم حمام واحد مشترك

ايش عرفك انت بواحد ولا واحدة عزيز النفس مش لاقي يأكل عياله ويسترهم وبيستعفف ومش هاين عليه نفسه يشحت

ايش عرفك انت بناس بتموت عشان مش لاقيين تمن الدوا

ايش عرفك انت بينا انت مش مننا على فكرة

---------

إيش عرفك

انت وانت اللي قابض علي نفسنا بعد المتعوس ابو كلت مدلدل اللي مسكك البلد دى ان فيه 10 مليون معاق اللهي اللي فيهم يجي فيك يابعيد انهم مبيشتغلوش ولا ليهم تأمين صحي محترم ولا سكن يلهم ولا جوازة تعفهم ايش عرفك انت وانت عامل فيها فرعون تيت اوى وعامل فاهم البلد جتنا نيله في حظنا بعد ما السادات خمنا وجابك

------

ايش عرفك انت بحالنا وحال عيال وعمال المصانع في بلدنا

ايش عرفك ومين فينا اصلا عاوز يعرفك

من الاخر خليك بعيد لانك متشرفناش رغم اننا نشرفك

---------

ايش عرفك ب 5 ماتوا مخنقوين من السحابه السوداء وناس عندها ربو و ازمات حتى الهواء النضيف مش عارفين يشموه؟

ايه عرفك بواحد عنده الكبد و استسقاء وبيعملوله بزل كل شويه و بيلف على التامين الصحى علشان يلاقى الدواء و لسه بيشتغل لاخر نفس علشان يوفر لولاده لقمه؟

ايه عرفك بمعنى انك تكون مصرى ابن مصرى شريف وتتعامل معمله الكلاب فى القسو ولو حد طلع بسبور امريكانى ؟؟

ينضربله تعظيم

ايه عرفك عن شاب باع الى وراه والى قدامه علشان يركب قارب فى البحر علشان ياكل اكله نضيفه؟

ايه عرفك باكل مسمم بالمجارى و انت بتاكل الاورجنك؟

ايه عرفك بواحده غلبانه بتحط القرش على القرش علشان تجيب خلاط لجهاز بنتها احسن الجوازه حتبوظ؟

انا بصراحه لو انفتحت مش حسكت خلى الى فى القلب فى القلب بقه

------

ايش عرفك انت بواحد ساكن فى عشة

يصحى من نومه ويكون فطاره صخرة تقع عليه تدفنوا تحتهاو مقدرتش تطلعه, عمرك صحيت من النوم؟

ايش عرفك انت باحساس ام مستنية ابنها يرجع من غربته هو وابنه من السعودية و الحوت ياكلهم فى البحرو الحوت ياخد 7 سنين,عمرك حسيت بالظلم ؟

ايش عرفك بام تانية ابنها نازل يعيد عليها ويولع فى قطار. عمرك ركبت قطار؟

-----

ايش عرفك بـ شباب كتير بيدرسوا حاجة مش طايقنها لمجرد ان مكتب التنسيق رماهم فيها ؟؟

ومع ذلك بيذاكر وبينجح بيتخرج

ايش عرفك بطلبة الانتساب المشوخين من الدكاترة وادارة الجامعة اللي عاملاهم سبوبة بصرفوا بيها علي الجامعة وكل شهر زيادة في الرسوم واخرها مفيش حضور علشان انفلونزا الخنازير

ايش عرفك بواحد طالع عينه علشان يحوش 95 جنيه اشتراك نت من الزبالة وفي الاخر السنترال يتعوج ويقوله خطك مش نافع روح غيره

ايش عرفك بأربعة جيران مشتركين مع بعض في وصلة نت علشان الاشتراك عالي

ايش عرفك بموظف شاطر وعنده 24 سنة وشغال 15 ساعة بمرتب 600 جنيه مع العلم بأن صاحب الشركة مليونير

ايش عرفك بالبنات اللي بتبيع نفسها وشغالة جرسونة في كافيه علي البحر علشان الف جنيه مع العلم ان كهم مؤهلات عليا

ايش عرفك ب بنت اتجوزت من واحد خليجي اكبر من ابوها واتطلقت وعي مجبتش 25 سنة

عايزة تاني ولا اكتبهم في بوست عندي ؟؟

--------

أسمحولى ابأه أنانى شويه

أيش عرفك أنت

بخريج هندسه حاسبات وأهله طفحوا الدم فى كورسات علشان ياخد أكبر شهادات تقنيه فى العالم وبيتفرج على أعلان (أشتغل أى حاجه لا القطر يفوتك)

ومطلوب منه 25 الف جنيه علشان يتعين فى الحكومه ؟!!!!!

------

ايش عرفك انت

ايش بلدي بمسامير

وايش فينو بنص جنيه

واللي يايش ياما يشوف

اللهجة معدلة عشان ماننساش الربع الانجليزي

-----

طيب هحاول أشارك معاكم :

أيش عرفك أنت بشاب ترك تعليمه وبيشتغل في شغله مالوش أي دعوة بيها علشان يقدر يعيش في بلد أنت بتطمع تحكمه ؟؟؟

أيش عرفك أنت بنظام الكفيل اللي بيستعبد شباب بلدنا في الخليج وبيذلهم ؟؟؟

أيش عرفك أنت بشباب نفسهم يعيشوا كبشر في بلدهم ؟؟؟

أيش عرفك أنت بشباب كتير أنتحروا علشان شافوا من كرم نظام حكام أبوك كتير ؟؟؟

أيش عرفك أنت بشباب بيسب ويلعن في اليوم اللي أهله خلفوه فيه علشان حاسس أن خير بلده مش لأهلها ؟؟؟

أيش عرفك أنت بشباب ماشيين مع بعض ويوقفهم ظابط معفن بـ 50% ويقول لهم طلعوا بطايقكم ؟؟؟

------

ايش عرفك انت بواحد ولا واحده بيركب له 3 او اربع مواصلات علشان مافيش حاجه اسمها هيئة النقل العام او دور للحكومة فى المواصلات و سايبين عليهم سواقين الميكروباصات البلطجيه و بتوع التكاتك

ايش عرفك انت بعيل فى اعدادى مش بيعرف يقرأ و يكتب لأن تعداد الفصل بتاعه 60 تلميذ و بيروح 3 فترات دراسه تخيل عيال تروح الساعه 7 تخرج على الساعه 10 بيضحكوا على مين

ايش عرفك انت بالستات اللى بيتروح للفرارجيه علشان يشتروا كيلو رؤوس و اجنحة فراخ يعملوا عليهم مرقه ياكلوا بيها

------

ايش عرفك بالغلابة الفقراء اللى بيسترزقوا بالبيع فى المترو وكل شوية الامن يجرى وراهم و يسحبهم علشان يزهقوا و يتحولوا لحرامية؟

ايش عرفك بأم الايتام اللى بتدور تشحت علشان جوزها كان عامل سريح مالوش معاش؟

----------

ايش عرفك بالملايين اللي هجوا بره مصر و كتير منهم مش عايز يرجع تاني

ايش عرفك يعني ايه تكون بتشرف على بناء و تشطيب شقق و انت مرتبك ما يسمحلكش تحلم بأوضة حتى مش بشقة

ايش عرفك لما تكون بتمضي على مستخلصات للمقاولين بملايين و مرتبك 500 جنيه و الرشاوي بتتعرض عليك يومياً و انت تقول لأ رغم انك عارف إنك لو فضلت تحوش مرتبك 50 سنة مش حتعرف تتجوز و لا تجيب حق شقة و لا شبكة و لا مهر و لا فرح

على فكرة أنا فاكر إني كنت قريت في جرنان الدستور من زمان إن جمال و علاء معاهم جوازات سفر بريطانية

لأنهم أخدوا الجنسية البريطانية من مامتهم سوزان اللي أخدتها من أمها الممرضة من مقاطعة ويلز

---------

انتهت المشاركات ولم تنته الاسئلة

المدون اللي عايز ينقل عنده الاسئلة والحملة ياريت

ونحن في انتظار بقية البانرات من مادو ومن جابر، لسة في الفرن

دعوة لاطلاق حملة "ايش عرفك انت" بمناسبة من اجلك انت

احبك انت، يا ابيض انت

وتعتمد حملة ايش عرفك انت على عشرة اسئلة توجه لحياتي انت جمالك انت مبارك انت خاصة بالشعب المصري

1-  ايش عرفك انت اللي بيقبض 300 جنيه في الشهر وعنده عيلين بيعيش ازاي؟ جربت تعيش بتلتميت جنيه في الشهر بطولك؟

2- ايش عرفك انت لما اي حاجة بتبوظ (تلفزيون، تلاجة، عربية، جلدة حنفية، تليفون) في بيت موظف مرتبه الف جنيه بيعمل ايه؟

3- ايش عرفك انت باحساس الناس اللي واقفة في الاشارة لحد ما نبت لها جدور في الارض عشان حضرتك او اي مسئول تاني معدي؟ عمرك استنيت حد؟ 

4- ايش عرفك انت باحساس واحد راكب اسانسير فيه حوالي خمستاشر واحد؟ واحيانا بيبقوا تلاتين؟ عمرك شميت؟

5- ايش عرفك انت شكل سواق الميكروباص، بعد ستاشر ساعة لف في عربية شكمانها منفس وتعامل مع ركاب ياكلوا دماغه عشان خمستاشر قرش وامين شرطة بيطلب منه اتاوة، وهو راجع بالليل البيت بيعمل ايه في مراته؟

6- ايش عرفك انت بقى بمراته بتعمل ايه في عياله عشان تفش غلها؟

7- ايش عرفك انت بيعمل ايه العامل اللي بقاله تلات شهور ما قبضش مليم؟

8- ايش عرفك انت بفلاح صرف اللي وراه واللي قدامه على زراعة القطن عشان يجهز بنته وجيتوا انتوا بمنتهى البساطة عملتوا فيه مغرز وادتوا له تقاوي بايظة: مدودة، طلعت المحصول اصفر، ما طلعتش محصول اصلا؟

9- ايش عرفك انت بواحدة ست جوزها عاطل (مرفود من مصنع مثلا) وهي اللي بتشتغل بتعمل ايه عشان تحوش القسط الاولاني بتاع المدرسة؟

10- ايش عرفك انت بحال المواطن والموظف في المصالح الحكومية: السجل المدني، المرور، الجوازات..إلخ؟ وايش عرفك بالمرتب اللي بيقبضه الموظف وبالرشوة اللي بيدفعها المواطن؟

-------

يا جاااااااااااابرررررررررررررر

اذا عجبتك الفكرة توكل على الله، والاقتراحات مفتوحة للاضافة والتعديل والتطوير

احنا ناس ديمقراطيين يا ولادي

الاسئلة ممكن تزيد وممكن تتعدل

وانني اهيب بالوكالة الحاج حسام الحملاوي للحملات بمد يد المساعدة

تابع الجابريزم للتوريث عند ست الحبايب يا حبيبة

نحن وراءك يا جابر، واللي يروح في داهية ما يتوهش

حد يجيب لي بسرعة الفيديو بتاع الواد اللي شتم توني بلير

الله ده انا لقيت فيديو احلى، ده فيه واحدة انجليزية من اصل عربي هزأته، تقدمت بوصفها بريطانية وقالت له ح تعمل ايه للفلسطينيين ابتدى يرغي فقاطعته وقالت له: لا انت بتدور على الفلوس وهنا فيه فلوس كتير... نفر مايند وسابته ومشيت

اللطيف بقى انه قال: انا متعود....هيهيهيهيييييييي يا حبيبي

اتفرجوا الفيديو ده احلى واوضح: قال لو توني بلير يو جو اوت ذا ومسك، وبعدين لما مسكوه، كان عايز يقول له يو ار اه تيروريس، فالعجنة خلته يغلط ويقول له يو ار اه

threesome

اي والله، هم ثريسوم فعلا، بوش وبلير ورامسفيلد، ربنا نطقه بالحق، رب ضارة نافعة، وبعدين كمل، يو ار ان انيمي تو موسليمز يو ار اه كلللللبببببببب

ههههههههه اظن بعد ما بوش اتقال له يا كلب، بقت شتيمة كلب دي عالمية زي

imam

hijab

kaaalllllllllllllllllb

ومش بعيد تنزل في ويبستر:

An Arabic Muslim term usually said to Western leaders when they visit the Middle East.

إليكم الفيديو

تحديث:
لقيت الفيديو

قال له يو آر اه تيروريست، وده الخبر
عايزين نعرف هو مين لبعدين يحبسوه
يعني إيه يقولوا له هس ولا كلمة، سكت حسهم، ورويترز تقول ايه: اصله كان شايل شنطة
------
هو توني بلير بيعمل ايه في فلسطين؟ وقال ايه داخل الجامع قام واحد راح شاتمه شتايم كتير بس ما ميزتش قوي قال ايه كل اللي سمعته: لا اهلا ولا سهلا في ارض فلسطين

خسارة انه كان في الجامع، اكيد ما كانش لابس في رجله حاجة عشان جوة الجامع

بس مسكوه وكتفوه وقعدوا يقولوا له هس ولا كلمة وهو مش عايز يسكت راحوا رازعينه في الحيطة

على فكرة انا عايزة اقول ملحوظة يعني لل....ت ال....ات ال....يط ولاد ال.....ة بتوع الامن والاوسخ منهم اللي بيتطوعوا عشان يساعدوا الامن من صحفيين وللا مصوروين او اي وسخ تاني

مافيش حاجة ح تغير الموقف، خلاص، يعني منتظر رمى الجزمة وخلاص... الواد ده زعق وشتم وتوني بلير ابتسم ابتسامة هابلة وخلاص

المشهد خلص، وما تقدروش تمنعوه ولا تلغوه، وضربكوا ليهم مش ح يقلل منهم ده بيرفع منهم

يعني مازادش على المشهد غير مناظركوا القذرة الحقيرة المنحطة ووشوشكوا السمجة القاسية وهي بتتحفر في ذاكرتنا ومش ح ننسى ابدا الوشوش دي ومش ح ننسى ابدا انها وشوش حقيرة

وبرضه ما عرفتوش تمنعوا حاجة، وبرضه ما عرفتوش تعملوا حاجة

وطبعا مش ممكن يوصل غباءكوا انكوا تفتكروا انكوا بتعملوا كده عشان خايفين ليكون معاه متفجرات او مسدس.... ده اي عيل لسة بيبل نفسه يعرف ان اللي بيفجر مش ح يلفت النظر ليه بانه يشتم او يرمي جزمة، مش كده؟ وللا انتوا اغبى من اللي بيبل نفسه؟ طب اشتروا بامبرز بقى

يعني ما نابكوش غير انكوا رفعتوا من قدر اللي اخد الموقف وحطيتوا من قدر انفسكوا، وكل الناس ح تعايركوا وتعاير عيالكوا انهم يقربوا لكوا ده غير انتقام ربنا منكوا بسبب قمعكوا لواحد مظلوم بيعبر عن المه

جاتكوا القرف عليكوا وعلى اللي رباكوا وعلى اللي شغلكوا وعلى اللي عايز يبص في خلقتكوا

لو عندكوا كرامة تعملوا زي ظابط الشرطة المصري اللي انتحر بالمسدس ايام حرب غزة عشان ما يروحش على المعبر ويمنع الفلسطينيين، وان شاء الله ربنا يرحمه ويغفر له لانهم زنقوه في الشغل وابوه ظابط شرطة وكان عايز يجبره وماكنش له مهرب

لو مالكمش مهرب زيه انتحروا اشرف لكوا