Wednesday 8 April 2009

هههههههههههه الجزيرة دول شياطين

طبعا وصلكوا خبر تلقيح جتة الحكومة المصرية على حزب الله وقالت ان حزب الله بيجند عناصر عشان تأجر شقق مفروشة وشاليهات في مصر، وزي ما انتوا عارفين تأجير الشقق المفروشة في مصر خصوصا على الساحل الشمالي وعلى قناة السويس جريمة نكراء شنعاء جرداء لا زرع فيها ولا ماء وقال لك عشان يراقبوا الاماكن الاستراتيجية
طب والاماكن الاستراتيجية فيها شقق مفروشة اصلا ليه؟ فيها عمارات من اساسه ليه؟ مش بيكتبوا على المناطق الاستراتيجية: منطقة مش عارفة ايه ممنوع الاقتراب او اللمس انا واحدة شريفة والبيوت من ابوابها يا محترم؟
بس سيبكوا من ده كله، التقرير اللي عرضته الجزيرة كالتالي: استعرضوا ايام حرب غزة - جابوا حتة من خطبة السيد حسن اللي قال افتحوا المعبر بالقوة - وبعدين قالوا: ولم تسكت مصر على ما اعتبرته تحريضا على انقلاب عسكري يهز امنها القومي
وجابوا اللقطة دي


ههههههههههههههههههههههه ولاد الصايعة
انا مش عارفة ايه حكاية التنظيم اللي بيأجر شقق ده، اقصد ايه الهدف من قضية ضربني بوشه على ايدي يا سعادة البيه دي؟
اكيد فيه حاجة وراها، ايه هي مش عارفة، اللي فاهم يشرح لي بس من غير ما يقول لي مصر واخدة صف اسرائيل
ما عرفناها الحكاية دي، قدمت خلاص
بس بريطانيا اعترفت بحزب الله، ثم ان حزب الله ما عملش حاجة حاليا دلوقت، ومافيش حاجة معينة حاصلة، حتى امريكا ح تتكلم مع ايران، واوباما قال الدولة الفلسطينية وانا باحبكوا باحبكوا يا واد عم، والتيتة في الننة والننة في التيتة
ايه بقى؟
حد يشرح لي واحد اتنين تلاتة ويقول لي ايه الحكاية؟ دول حتى مش عارفين يلفقوا لهم تهمة عليها القيمة، يعني ايه بيأجروا شقق وبيضربوا بطايق؟ ما قالوش بيشدوا كلة وداقين تاتو عليه صورة الشيطان وبيشربوا دم قطط وبيعملوا حفلات ميتال في فندق البارون ليه بالمرة؟ بيفكروني لما قبضوا على ممدوح اسماعيل المحامي مش السفاح لان السفاح ما اتقبضش عليه وقالوا ان الاحراز فلاشة ولاب توب
واللي أجر شقة بقى في اليومين اللي فاتوا دول يقطع العقد بسرعة ويطلع من الشقة
اذا ما كنتش قاعد في شقة تمليك تبقى شيعي، على طول دي معروفة

-----
ملحوظة:
ان جميلة وايمن منفصلين او ح يطلقوا مسألة ما تخصش حد، هم مش نور الشريف وبوسي
جميلة اسماعيل ست عظيمة، وقامت بدور رائع واسطوري، ومافيش حاجة ح تقلل من قيمتها
وماحدش له دعوة بحياتها الخاصة

39 comments:

mido said...

بخصوص موضوع جميلة : ابحث عن المخبر اليوم

مواطن مصري said...

حتى امريكا ح تتكلم مع ايران، واوباما قال الدولة الفلسطينية وانا باحبكوا باحبكوا يا واد عم، والتيتة في الننة والننة في التيتة
ايه بقى؟

بصي يا نوارة انا هحاول بكل جهدي اجي الجمعة المهم

انا كنت متوقع الي هيحصل من الجزيرة
زي ما قولت ايران دولة توسعية مش بعيد يكون الحرس الثوري مجند جواسيس و انت عارفه بيحبو يصطادو في المية العكرة زي العراق كدة
زي مليشات المهدي و الحوثين في اليمن

دي نقطة

توضيحا لكلام اوبما كنتي كملي الجملة هو قال انو على استعداد انو يتكلم مع ايران في حال تخليها عن تطوير المفعلات النووية و الصواريخ و دة طبعا مستحيل خصوصا بعد صاروخ كوريا الشمالية
عشان كدة راح لتركيا و قالهم انا مش في حرب من الاسلام

و ايران صعب انها تتخلى عن سلاحها او برنامج النووي فصعب انو هيعمل معاها اي حوار و اوبما عاوز يتقرب من العرب عن طريق تركيا عشان الخلافة العثمانية او الاحتلال العقماني
عشان لما يصدر قرار ضرب ايران او يعطي ل اسرائيل الضوء الاخضر لضرب ايران و خصوصا في تدريبات عسكرية شغالة في اسرائيل الان كانالمسلماني اتكلم عليها

مواطن مصري said...

ب النسبة لنور و جميلة يطلقو ولا يتجوزو احنا مالنا ودي امور شخصيةةةةةة

م/ الحسيني لزومي said...

إذا لم تستح فأفعل ما شئت
طيب بالعقل ايه البعد الاسراتيجي لحزب الله في مصر؟!!!!!!!!!!!
الموضوع ده فكرني يا نواره بايام السادات لما كنا علي خلاف مع ليبيا وكان كل يوم يتم ضبط تنظيم ليبي...وللا تمثيلية محاولة اغتيال البكوش....هيه دي مصر يا عبله

mido said...

مواطن/ ايه علاقة ايران بالموضوع !؟ سؤال تاني _انت اسمك ايه؟

مواطن مصري said...

ميدو دة تحليل الوضع و الاحداث

Unknown said...

مواطن

ده تحليل بول يا حبيبي

منظور شامل للحياة السعيده said...

Blogger جبهة التهييس الشعبية said...

مواطن

ده تحليل بول يا حبيبي

09 April 2009 00:20

نوارة حرام عليكي

انا وقعت من على الكرسي من الضحك

مواطن مصري said...

نوارة اقرائي الوضع تاني

و شوفي خطاب اوبما في عيد النيروز

مواطن مصري said...

http://www.youtube.com/watch?v=0ee0wrjVtkk
Obama's Norouz Message to Iran


شوفي

Unknown said...

يعني اهي علاقة ده كله بان مصر بترمي بلاها على حزب الله وبتقول له بتجند عناصر تأجر شاليهات؟

وكنت عايز تفجرنا من خمسة وتسعين سنة؟

هو حزب الله من امتى بيعمل اي حاجة داخل اي بلد عربي؟

ويجند عناصر يأجروا شقق؟ كتر خيره يعني بينشط لنا السياحة

وللا الايجار كان شوية وللا ايه؟

تلقيح الجتت ده بعد ما حرب غزة خلصت لزومه ايه؟

وللا اسرائيل ح تضرب لبنان ومصر بتحضر عشان تخوض معاها المعركة

هو احنا اتجوزنا اسرائيل جواز كاتوليكي بجد وللا ايه؟

طب والمأذون اللي جوزنا ليها اتقتل مين اللي ح يطلقنا؟

ahmed samir said...

جملتك لمواطن مصرى
أحسن جملة سمعتها النهاردة

*****
هو ايه العلاقة بين ايران و صاروخ كوريا
و ايه علاقة الخلافة بأمريكا

mido said...

@مواطن مصرى

اسمك ايه بجد ؟

Unknown said...

شفت الفيديو

امور قوي
:)

بس يعني ايه يقول لهم بطلوا ارهاب؟

مش عشان امور وكتكوت وقال لهم بيتين شعر ايراني وعيدي شوما موباراك

يقول لهم بطلوا ارهاب
ما يقول لاسرائيل بطلوا ارهاب

Unknown said...

أ/نوارة
بقالى كثير
غايب عن متابعة مدونة حضرتك
بس بقول
ايه
طالما حضرتك
جبتى فيديو لأبو الغيط
فكملى جميلك
و انشرى الفيديو
الساخر ده
لأبو الغيط الحويط
ههههه
انا واثق انك مش حتتمالكى نفسك من الضحك
ابو الغيط ينافس
هنيدى
ابو الغيط يتحدى
هههه
اسمعى وشوفيه
و انشريه فى المدونة

http://www.youtube.com/watch?v=ydjV-QCdPKo&feature=channel_page

http://www.youtube.com/watch?v=s7WMUAtaKhk&feature=channel_page

Unknown said...

شوف بقى يا مواطن الناس اللي عندها كرامة ومش بتدلق اول ما يتقال لها كلمتين حلوين

http://www.youtube.com/watch?v=ZNg0A3PLdxQ&feature=related

عقبالنا يا رب
انا ح اطق من الغيرة
اللهم لا حسد

مواطن مصري said...

يسمع من بقك ربنا يقول ل اسرائيل بطل ارهاب و خصوصا قال ليبرممان ان لازم حل دولتين و ليبرمان رفض

Anonymous said...

الحقيقة ان احد كادرات حزب الله جرى توقيفه على الحدود مع غزة، بعد انتهاء الحرب وانتهاء مهمته في نصرة اهلنا في القطاع
وبعد ان اصدرت الحكومة بيان حول الحادث قالت فيه ما معناه انها اوقفت عناصر من المقاومة اللبنانية بتهمة دعم المقاومة الفلسطينية!!!!!!!!!!
تبين لبعض من لديهم عقل في النظام فداحة الهبل الاستراتيجي في اصدار
اتهامات من هذا النوع تعتبر بمثابة وسام شرف بكل المقاييس القانونية والشعبية
فلجأوا كالعادة الى سيناريهوات الافلام الهندية: راجا فقد وهو طفل ثم كبر في الشوارع والازقة بصحبة فيل وقرد وزرافة تبين فيما بعد انهم اخوته من عمته
وبخصوص نظرية الحرب على لبنان والتمهيد لها، لا استبعد ان تكون صحيحة.
نظراً لما نقل عن اخواننا في لبنان من استعدادات غير عادية توحى بانهم يتأهبون لحرب في هذا الصيف

Unknown said...

ههههههههههههههه

بقى هي الحكاية كده؟

ههههههههههههههههههههه
هههههههههههههههههههههههههه

طب وراخر الموكوس ما لقاش غير حدود مصر اللي يعدي منها؟ هو مش شايف المصريين والغزاوية بيتقفشوا ويتقبض عليهم؟

طب وهم عرفوا منين انه من حزب الله؟ ليه ما قالهمش انه مواطن عادي وداخل عشان صعب عليه الوضع في غزة

ههههههههههههههههههههههههه

وما عرفوش يتهموه بانه داخل يساند غزة يقوموا يتهموه انه بيأجر شاليهات وشقق؟

يا سلااااااااام
يعني هي دي التهمة بقى اللي بيصلحوا بيها غلطتهم؟
يعني واحد اسمه فهمي الحيوان يغير اسمه ويبقى حمدي الحيوان؟

mido said...

اتفضلي يا استاذة جميلة في حوار بكره في المخبر اليوم

Unknown said...

هي المخبر اليوم دي ما تسيب الناس في حالها
هم بيشعللوا ما بينهم ليه؟

اكيد هي اعصابها تعبانة بعد كل اللي شافته ده
وهو لسة خارج من السجن واكيد دماغه مش مظبوطة بعد كل اللي حصل

وطبيعي ان الجو يبقى مكهرب ما بينهم
وان شاء الله النفوس تهدا
ما يسبوهم في حالهم
الله يخرب بيوتهم
يعني هم مش لاقيين فتنة طائفية ولا اخوان يبلغوا عنهم بيشتغلوا دلوقت في خراب البيوت؟

مواطن مصري said...

نوارة انا سامع ان الاسعار هتغلى تاني صح؟

Anonymous said...

هههههههههههههههههه
ليس للقطاع باب آخر الا الباب الاسرائيلي والمصري.
الباب الاسرائيلي تم استخدامه لاهداف اخرى وبجنسيات اخرى
الموكوس لم يقل شيئاً خرجت بعض اخباره ممن اضطر للاستعانة بهم، وكما هو معلوم الازمنة الحرجة تتطلب اجراءات ليست مثالية
واستبدال التهمة المشرفة باخرى حمالة اوجه افضل بمالا يقاس

mido said...

بقولك ايه : هي عصمة جميلة في ايد مجدي الجلاد و لا نور ؟ :)

Unknown said...

لا يا ميدو
جميلة ست الناس وعملت معاه ولا ايزيس ولو اول ما خرج من السجن ادته بالروسية المفروض يستحملها
هي اللي شالته وهي اللي عملت له سيرة وحس
وبعدين بصراحة بقى من ساعة ما خرج وهو عمال يعك في الكلام، لما كان مسجون وهي بتتكلم نيابة عنه كان احسن
هي اذكى وبليغة اكتر
واول ما خرج طلع في العاشرة مساء يقول: جميلة بقى تاخد اثتراحة المحارب وترجع لبرنامجها في التلفثيون

تلفثيون ايه اللي ترجع له بعد ما اتورطت معاه في عداوة الحكومة واستحملت كل ده وكانت ح تتحرق وتتخنق وعرضت نفسها لجرابيع السياسة وهي بنت ناس يقولوا لها يا عميلة امريكية ويا عميلة اوروبية وهي تقول له: يا مصطفى بيه، يا مصطفى بيه
والتاني جربوع وشرشوح وعمال يقل ادبه
وماشية بكلب قد الباب عشان يحميها
وماحدش عمل اللي هي عملته يا ميدو
هو حد عمل ايقونة ايمن نور دي غيرها؟
ما اكم من ناس بتترمي في السجون بالخمستاشر سنة وبيتنسي ذكرها ومن غير تحقيق كمان
هو لولا جميلة والباللو اللي عملته جميلة كان هو خرج ولا شاف النور؟ ده كان ح يموت في السجن لولاها

mido said...

طيب متلم الدور بقي لازم حب الظهور ده علي حساب الأسرة

Unknown said...

ههههههههه
هي ايه التهمة حمالة الاوجه في انه بيأجر شقق على الساحل الشمالي
ههههههههههههههه
والله العظيم اصحاب العقول في راحة

الا اذا كانوا بقى بيقولوا عليه راجل هلاس وان حزب الله كان عايز يعمل شبكة دعارة في مصر عشان يزعزع امن واستقرار تايلاند حيث ان تايلاند هي اللي متخصصة في الدعارة العالمية

لا والا نشر المذهب الشيعي في مصر

يا ياباي

اما غلسين صحيح بينشروا المذهب بتاعهم عندنا ليه؟ ما عندهمش منشر؟ وهم كل شوية ح يغسلوا المذهب ويخبطوا علينا: المنشر والنبي

يعني ما نغسلش احنا بقى؟

Unknown said...

ما تحكمش على الناس يا ميدو
انت ما تعرفش ظروف الناس
الله يكون في عونها
يعني تفتكر بعد كل اللي هي عملته ده ح تبقى عايزة تخرب بيتها؟

مواطن مصري said...

ميدو انت عارف المخبر اليوم عاوزة اي فضيحة و تشت فيها حتى لو انفصلو مش ممكن نور عاوز يصالحها و بعدين حياتة الشخصيةةةةةةةةةةةةةةةةةةةةةةةةة محدش لية دعوة بيها

Anonymous said...

"مراقبة اهداف استراتيجية"عبر استئجار
شقق مفروشة وخلافه
على كل حال
171 ب50
وعلى مزبلة التاريخ بعد شهرين

ahmed samir said...

على فكرة
المحامى بيقول أن أمن الدولة قابض على خمسين نفر فى الموضوع
منهم فلسطينين و مصريين و لبنانين
و زعيمهم لبنانى هو ده اللى بيقولوا عليه جاسوس حزب الله
و على فكرة كمان
المحامى بيقول انهم مقبوض عليهم من شهر ديسمبر اللى فات
يعنى العالم دى ضيوف امن الدولة من أربع شهور
تخيلى ممكن يعترفوا بأية؟؟

Unknown said...

يا لهوووووويييييييي

دول اكيد اعترفوا انهم هم اللي عملوا حداشر سبتمبر وهم اللي عملوا الحرب العالمية الاولى والتانية وبيخططوا للتالتة

اكيد كل واحد فيهم اعترف انه اسامة بن لادن

dr.lecter said...

طب بدل ماحنا عمالين نناغش في حزب الله ونخرف ونقول الحقودين والمتئامرين ومش عارف ايه

مايشوفوا اللي فعلا ضيعوا البلد من غير تاجير شقق ولا فلوس اتفعت ولا خطط ولا يحزنون

احنا علايا النعمه شعب وحكومه فاكسين جتنا البله في عتهنا

اما جمياه ونور


مش مصدق طبعا ومش عاوز اعرف انا معجب اصلا بجميله اكتر من ايمن نور ايمن نفسه انا مابحبهوش ومش مستريح له بس بحترمه علي ايه حال


لكن جميله بجد مثال رائع للست القويه الاصيله الشجاعه وحتي لو كان الكلام ده صحيح

ممكن يكون له ابعاد تانيه ماحدش يعرفها الا هما وبس

وممكنت يكون زي ماحد قال لي ان نور اتغير فعلا بعد اطلع من السججن ومابقاش زي الاول او ان بدا يسلك تيار ماعجبش جميله وماتطابقش مع معتقداتها ومبتادئها وافكارها


الله اعلم لكن الجرايد كبرت الموضوع اووي بجد

Anonymous said...

ممكن اللىمايتسموش
اللىكاتمين على انفاسنا بقالهم 82سنة عاوزين يعملوا واجب مع حلفاؤهم فى لبنان والانتخابات داخلة اى كلام يطلع الشيخ سوسو يشتغل بية بدل مابيطلع يتاتاء
---دودو

Rania Lelah said...

اه و الله حاجة غريبه من كام يوم يقبضوا على مصريين و فلسطينيين و يقولك بيقوموا بالاعلان عن حزب الله او دعمه
و دلوقت يقولك انه مجند عناصر
منظرنا اكيد غريب و فعلا بنرمى بلانا على الناس
و هو دة فعلا تعزيز الدور مصر
و عجببببببببببى

حـنــّا السكران said...

أنا أيام الحرب الهمجية على غزة قلت لك كلام من هالنوع يا نوارة ..فاكرة؟ و قلتلك في ناس استشهدوا في الطريق .
ـ اللي بتقوم فيه الحكومة المصرية هو تشويه سمعة مش أكتر .و دي حفلة بدأت من زمان , فشلت في لبنان على يد جنبلاط و سعد الحريري و شلـّة الأنس هناك . و الحكومة المصرية أهم مميزاتها أنها ما بتستوعب بسرعة , بتحتاج وقت طويل جدا عشان تستوعب أي حاجة . و تبدأ دائما من حيث انتهى الاخرين.و وجود أبو الغيط على رأس الديلوماسية المصرية أكبر دليل على الزهايمر اللي صايبهم .
تشويه صورة حماس و حزب الله هو هدف دائم حتى الان للحكومة المصرية .لأن السمعة الطيبة للمقاومة ينعكس دائما على الشعب المصري بالإيجاب .. انت فاكرة حادثة الحسين ؟ الإنفجار اللي صار يومها ؟ ده كان بداية المخطط الغبي على الأرض . في الميدان ..ميدان الحرب الخفية مع المقاومة في فلسطين و لبنان ..
المعروف لأي متابع ( ذكي أو غبي ) أن حزب الله لم يحدث يوما أن وضع نفسه في زاوية محرجة له , حتى في حربه مع الصهاينة . المرة الوحيدة اللي أعلن فيها حزب الله أنّ حربه مع الصهاينة قد تنتقل لأي مكان في العالم . كان يتكلم عن جزئية واضحة جدا .. و هي اغتيال الشهيد عماد مغنية خارج الأراضي اللبنانية .لذلك قال حزب الله انه سوف نعاملهم بالمثل و قد نردّ في أي مكان في العالم ..( و طبعا مش باستئجار شقق مفروشة في مصر .. حزب الله و السيد حسن خصوصا . يعرف أهمية العمق الشعبي في مصر . و هم من الذكاء الكبير لدرجة أن لا يفكروا مجرد تفكير بضرب عمقهم المفترض , بتصرفات غبية لا تشبه سوى الحكومة المصرية , و انت خصوصا , تعرفين كيف يتعامل نصرالله مع المصريين عندما يقابلهم , و مدى الإحترام الذي يكنه للشعب ) .
ـ لا .. لا أحد سيقول أن الحكومة المصرية أخدت جانب اسرائيل .. الواضح أن إسرائيل الان هي من يحاول أخد جانب الحكومة المصرية في تطرفها ضد المقاومة و الحق و الحرية و الديمقراطية و الحقوق المصرية و العربية .

Anonymous said...

بص يا أستاذ مواطن ، أنا رأيى كاللآتى:
أوباما مش فى حرب من الإسلام بسبب حرب فيتنام اللى انتصرت فيها أمريكا على الخلافة العثمانية المتوطنة فى شرق آسيا ... وده طبعا بعد إيران ما هددت إنها حتضرب السد العالى لأن ميه بحيرة ناصر بتطرطش عليها وبتطفى الولعة بتاعة المفاعل النووى بتاعها ، قوم إيه .... راحت إسرائيل عاملة تدريبات عسكرية علشان تضرب جواسيس إيران اللى مخبياهم فى اليمن تحت شجر القات واليمنيين الغلابة مخزنين قات ومش شايفينهم ، فلازم مصر بقى تتدخل أحسن الحرس الثورى المنوفى يفكر فى احتلال العراق كبوابة رئيسية للدخول للبنان والقضاء على حزب الله اللى بيشترى شقق عندنا فى مصر وحيرفع سعر المتر علشان طبعا بيدفع بالعملة الإيرانية اللى هيا الدولار الأمريكى يعنى
متهيألى تحليل أحسن من كده ما فيش

Anonymous said...

هو احنا اتجوزنا اسرائيل جواز كاتوليكي بجد وللا ايه؟

طب والمأذون اللي جوزنا ليها اتقتل مين اللي ح يطلقنا؟
شششششششششششششششششششششششش

حـنــّا السكران said...

شفتي؟ في جمل من اللي انا قلتها هنا , قالها السيد حسن زي ما هي ..قبل شوية بكلامه . و هيدا معناه انه الناس عارفة و حافظه سياسة المقاومة .. بس اللي مش عايز يعرف ..انشالله عمره ما عرف ..بيشوّه سمعة نفسه و بس .. اكتر ما هي مشوهة . و زي ما احنا حافظين المقاومة و سياستها .. احنا كمان حافظين الانظمة دي و سياستها ..
ـ بس كان السيد مرتاح جدا و هو بيبهدلهم ههههههه ..