حان الآن موعد التهزيئ حسب التوقيت المحلي لمدينة التخلف العقلي

البوست ده اتكتب قبل الاضراب بست ايام ياريت نبص عليه تاني انا مش باتكلم هيروغليفي
مش نركز كده ونشوف احنا غلطنا في ايه؟ عيب ان الواحد يغلط؟ وللا عيب انه يغلط ويقول ما غلطتش؟
انا لسة رجعة من صلاة الضهر وصورت الشارع والجامع وبانزل الفيديوهات
الشارع زحمة وفوق بعضه، دخلت مسجد النور لقيته زحمة وناس لابسة اسود فرحت، طلعت صلاة جنازة ودول جايين مع الجنازة
بنت في الثانوية العامة صليت عليها بعد صلاة الضهر وقعدت اعيط، ما اعرفش عليها وللا علينا
جه خبر على التويتر ان فيه مظاهرات مفاجئة صغيرة متفرقة في كذا حتة
دي الاخبار وبينا كلام
قلنا تاريخ اربعة مايو تاريخ مش مناسب وفيه شخصنة وجليطة غير محببة للنفس المصرية والناس مش ح تستجيب له وللا ما قلناش؟
قلنا الناس ح تفتكره نكتة وهو فعلا كان بادي نكتة وللا ما قلناش؟
قلنا الحكومة صعدت مع المحلة ويجب التركيز على المحلة بدل اضراب التهريج وللا ما قلناش؟
قلنا اختيار التاريخ اختيار خاطئ وللا ما قلناش ولحد امبارح كنا بنقول كده وللا لا؟
قلنا كان الاولى اننا نتضامن مع المحلة بتوافدنا عليها من ساعة ما حصلت المذبحة عشان ما نسيبهاش فريسة للامن وللا ما قلناش؟
قلنا ان الغنوة بضان وبتدي انطباع اننا بنهرج وما كانش فيه مطالب محددة وللا ما قلناش؟
قلنا ان ده ح يدي الناس احساس باننا ما عندناش احساس بالمسئولية وللا ما قلناش؟
قلنا لازم نبقى على قد الحدث احنا مش بنعمل حفلة طهور وللا ما قلناش؟ واننا ما ينفعش نتعامل مع الموضوع على ان الاضراب نجح ونقول مبروك وفيه ناس مصابة وميتة ومحبوسة وان ده اسلوب عمرو خالد الفاشل اللي بيحسس الناس بالانجاز وهي ما عملتش حاجة وانا عندي الدكتور الانجليزي اللي بيقول للمريض انت عندك سرطان احسن من اللي يضحك عليه وللا ما قلناش؟
قلنا الحكاية مش لعبة ولا تهريج والمفروض ان رد فعلنا للي عملته الحكومة مع المحلة يبقى على قد الحدث وللا ما قلناش؟
قلنا ان الاضراب ح يفشل لان عنصر المفاجأة اللي اربك الحكومة راح واننا لازم نلاقي طريقة تانية سلمية برضه وتفاجئ الحكومة وللا ما قلناش؟
دخل لي ولاد وسخة اغبيا ما بيفهموش وعملوا فيها عنتر بن شداد وزايدوا عليا وللا لا؟
ومع كل الغباوة دي ما ينفعش الواحد يخالف المجموع حتى لو غلطان، ليه؟ عشان الكل يتحمل نتيجة التصرف الجماعي مع بعضنا ولان مافيش فينا حد ينفع يخلع من الباقي
بس ممكن نعمل نقد ذاتي بقى
الامن عمل نقد ذاتي واتصرف المرة دي بدماغ نضيفة وما عبرش قرعة الناس ببريزة
ولاننا اتخلينا عن المحلة فهو استفرد بيها
والله جدعان انا اشجع اللعبة الحلوة
ماحدش يقول لي التلاتين في المية والدعوة ما وصلتش للناس وحملات التشويه والكلام العرص ده
العلاوة الناس ما فرحتش بيها والدعوة وصلت للناس وحملات التشويه لما تبقى في الاهرام تبقى حملات دعاية الناس ما بتصدقش الاهرام
ده غير بقى انهم بيتعاملوا مع روز اليوسف على انها ابو لهب
قوووووم بدل ما نقعد ونعمل نقد ذاتي ونحترم نفسيتنا ونواجه الحقيقة ونقول اننا فشلنا نتغابى زيادة وزيادة
وينزل بعض الناس في مظاهرات فاشلة عشان يتحرشوا بالامن ويعملوا نفسهم ضحايا وشهداء بالعافية
وزي ما يكون قلبي حاسس والله امبارح قلت الاخوة مدمنو البطولات الجهجهونية يقدروا يقدموا في معهد فنون مسرحية ويرحمونا احنا
انما ازاي بقى؟ ازاي؟ لازم نعمل ابطال بالعافية وضحايا بالعافية وعلى رأي مالك مصطفى لازم نثبت اننا بنحب السجن والضرب
والله لسة باقول ايه الغباوة دي وبافتح على التويتر لقيت مالك بيقول نفس الكلام
ممكن نتعلم اننا نتعلم من اخطاءنا وللا احنا عايزين بطولات اعلامية عشان الجزيرة تيجي تصور الناس؟ لو الحكاية كده
والله والله والله معهد السينما والفنون المسرحية فيه دراسات حرة وممكن ياخدوا فرصتهم ويمثلوا زي ما هم عايزين ويبقوا ولا احمد السقا
مش ح اقول اني مش عايزة احبطكوا
لاني عايزة احبطكوا
فوقوا بقى
يخرب بيت ام اسلوب عمرو خالد اللي انتشر كالنار في الهشيم