يا حارة مافهاش راجل..ست كبيرة زيي تنضرب

دلوقت جورج بوش بعد ما دعك مناخيرنا في الاسفلت امبارح رايح السعودية وبعدين جايلنا، القرد ده ح يجيلنا؟ ح يجيلنا؟ انا ماليش دعوة بغيري كل واحد مسئول عن بلده
ح يجيلنا بعد ما قال شعب الله المختار، ووعد الله لبني اسرائيل؟
خلاص بقى؟ خلصنا بقى اتعشت، هو احنا ايه؟ هاويين غباوة؟ ادينا بنتغابى ورانا ايه ورانا ايه؟ لو الموضوع ده ادمان ممكن ندخل مصحة
والكلام ده مش كلام بوش بس
جيمي كارتر اللي عاملينه مسيح الشرق الاوسط وغاندي امريكا اول كلمة في كتابه
peace not apartheid
السلام لا الفصل العنصري
كاتب في التتبع التاريخي لقضية الشرق الاوسط: وعد الله لابراهيم
يعني عمالين يقولوا لنا احنا ما تدخلوش الدين في السياسة وهم بانيين دولة بحالها وبيدافعوا عنها على اساس ديني؟
طب انا مسلمة ومش مؤمنة بالكلام ده انا ذنبي ايه؟ وفيه في الدنيا بوذيين وهندوس ومسيحيين من طوايف تانية مش مؤمنين بالكلام ده، يفرضوا علينا ايمانهم ليه؟ احنا ح ندخل لبعض وعود ربنا؟
طب ندخل لبعض بقى وعود ربنا: احنا مسلمين وربنا واعدنا ان الارض كلها بتاعتنا، اشمعنى يعني احنا اللي ولاد دين كلب وبيتسب لنا الدين ليل نهار ومجبورين نؤمن باعتقاد ديني حتى اليهود والمسيحيين مش مجمعين عليه، بل ان المؤمنين بيه من المسيحيين خصوصا هم طايفة واحدة صغيرة من جوة طايفة اكبر؟ وعلى رأي زعيم ناتورا كارتا: وعود ربنا هو اللي ينفذها مش الناس
الراجل كان بيتكلم امبارح على اساس ان ربنا ده بتاعه هو لوحده وهو المتحدث الرسمي باسمه، واحنا بقى المغضوب علينا اللي لو ما سمعناش كلام وكيل ربنا ح نتقتل ومافيش "مهادنة": لا مع المسلحين ولا مع المتعاطفين مع المسلحين ولا مع من يجدون لهم اعذارا، واحنا اللي عندنا الحقيقة والعدالة والحرية واحنا طريقتنا بس هي اللي صح وغير كده غير مقبول حتى التفاوض معاهم ودي قناعتنا اللي لا ح تتأثر بالرأي العام ولا برأي النخبة ولا حتى برأي المجتمع الدولي
(انظر خطبة بوش في الكنيسيت)
كده وش
وكتر خيره انه قال الكلام ده، ده الكلام اللي كل الساسة الامريكان مقتنعين بيه بس هو اللي مدب، واقروا كتاب جيمي كارتر تاني بتركيز اللي كل العرب الهبل فرحانين بيه قوي، الكتاب بيقول بحق الهي لليهود في فلسطين، كل الحكاية انه بيقول: بس مافيش داعي للقتل الكتير ده، خليكوا في المعقول
مش مقبول اصلا الكلام عن حقوق ممنوحة من الله في اطار اعتقاد ديني معين يتبني عليها وضع سياسي عالمي
ولو هو كده وده النظام ودراعنا ورا ضهرنا ووشنا في الحيط ومطرح ما نحط راسنا نحط رجلينا، يبقى كده مافيش تكافؤ ويبقى حتى حسن نصر الله يعد متخاذل ويبقى نحط راسنا ورجلينا مع اسامة بن لادن عشان ده الوحيد اللي بيعرف يكلمهم باللغة بتاعتهم
طب القرد ده حييجي عندنا؟
فين محمد بانرات (جابر سابقا) عايزينه يعمل لنا كام بانر متسنجف بدل البانرات العرجة اللي انا باعملها
انا كنت ناوية الون الخلفية، بس ح اخليها سودا طول ما القرد ده في المنطقة
احنا ح نسكت؟
يعني قفا من جوة وقفا من برة جرا ايه يا اخونا احنا بنعمل دماغ قفوات؟
نتنيل نعمل اي حاجة..الرجل امبارح قال لنا وش: احسن حاجة ان الدول المحيطة باسرائيل تتلهي في شئونها الداخلية عشان اسرائيل تعيش في امان
ايه العسل ده؟ متآمر واهبل؟ وللا متآمر وبيستهبل؟ وللا متآمر ومستهبلنا؟