الحمد لله

والله ربنا ما بيقفلهاش من كل ناحية، انا اصلي امبارح بعد ما كتبت البوست بتاع لقيت العلاوة قعدت اتخيل ان الناس اخدت على قفاها وقعدت اعيط بعد صلاة الفجر لحد ما نمت وصحيت عينيا وارمة بس على اخر اليوم قابلت واحد صاحبي كان واحشني قوي وكانت قعدة طويلة والواحد اتكلم وارتاح، وعرف حاجات ريحته والله، صدمته صحيح، بس طمنتني كده اني في السليم
اصل الواحد، اللي هو انا يعني، بطبعه عادة بيشك في نفسه، يعني، بحثا عن الحقيقة، بس صديقي ده من غير ما يقصد ولا ياخد باله اصلا وصلي معلومات، من غير ما اسأله، طمنتني
على فكرة البوست ده ما يهمش حد، :) بس دي مدونتي عادي يعني انا حرة
دلوقت بعد القفا اللي اخدناه، والاهانة البالغة اللي سلخت وشنا، وهي دي اللي كانت بتخليني اعيط مش الفلوس والله
عايزين نعيد حساباتنا بقى، او على الاقل انا اعيد حساباتي في ضوء اللي عرفته النهاردة واللي مش ناوية اقوله واللي ماحدش فيكم يعرفه واللي يعرف ما يعرفش اني عرفت، حد فاهم حاجة؟ مش مهم
بقى كل حاجة في الدنيا لها قواعد
حتى التهييس له قواعد
انا كنت حاطة لنفسي قواعد في التهييس، واظن اني محتاجة اراجعها
ونظرا لان جزء من قواعد التهييس بتاعي المشاركة مع اكبر عدد من البشريات فانا ح اطرحها على الطبلية وبسم الله
القاعدة الاول: الصدق منجاة:
وانا احب المنجاة، معصورة وصحيحة، والصدق من وجهة نظري المتواضعة هي شكل القسم في المحكمة الادنبي: الحق كل الحق ولا شيء غير الحق، لان ممكن الواحد يقول نص الحقيقة ويبقى معتبر نفسه صادق، ممكن يقول الحقيقة وعليها شوية تحابيش، ويبقى فاكر نفسه صادق، بس انا باعتبر ده كله كدب
القاعدةالثانية: لا خاب من استشار:
مافيش حاجة يقينية مية في المية ولا اكيدة مية في المية غير ربنا بس، بخلاف كده كل حاجة لها زوايا وعشان كده ولان الارض كروية تلف حول نفسها كل فكرة تيجي في بالي احب اني اشرك فيها اكبر عدد من الناس عشان كل واحد شايف زاوية من ناحيته اكيد انا مش شايفها
القاعدة الثالثة: يعرف الرجال بالحق ولا يعرف الحق بالرجال:
انا ماليش كواليس، خالص، البتة، وكمان مش معنية بكواليس الناس، ولا حتى حساباتهم واهدافهم، انا معنية بان اللي بيقوله ده حق وللا باطل
وش كده يعني: انا ما يهمنيش واحد عامل حملة لمساندة كذا وكذا، عشان هو شيوعي وله اجندة عايز يخدمها، وللا هو اسلامي وله اغراض، وللا هو مسيحي وله بتنجان (انا المسيحي اللي اعرفه مافيش اهبل مني غيره) انا اللي يهمني اللي بيقوله حق وللا باطل
سيدنا معاذ بن جبل قال: اقبل الحق وان جاءك من منافق او كافر او فاجر، واحيانا تنسب للامام علي
حفظي قال لي: الشمس بتشرق من الشرق، مش عشان حفظي ابن كلب وسكري وقمارتي اعند واقول الشمس بتشرق من الغرب
والا ابقىباستعبط، حفظي بيقول ان الشمس بتشرق من الشرق عشان هو عنده اهداف دنيئة، اصله لما يقول كده ح يدخل مسابقة ويكسب فيها فلوس ح يصرفها على القمار، طب وانا مالي؟ الشمس بتشرق من الشرق سواء حفظي استفاد او انضر
مين حفظي ده؟
اتاري بقى الناس لها كواليس وقاعدين يزنبقوا في بعض من تحت لتحت،طب وانا مالي؟ انا مش طرف مع حد، انا مع الحق
القاعدة الرابعة: الحق احق ان يتبع:
انا اصلي مخي عامل زي الغسالة الفول اتوماتيك اللي على برنامج العصر، بيلف حتى وانا نايمة، لدرجة اني ساعات احلم بدواير وحاجات بتلف، ومناقشات وكلام، قلت حاجة او اقتنعت بحاجة او عملت حاجة، طلعت غلط، لازم اقول اني غلطانة واني طلعت غلط وما الاقيش لنفسي مبررات، عشان اعرف اصلح، وبما اني من الشرقية، مش من الصعيد، فانا مخي مش بيتربس، حد قال كلام معقول طلع احسن يبقى الحق احق ان يتبع، وكل حاجة في الدنيا دي الاكيد انها مش اكيد
only fools are positive
الغلط مش خطيئة، لكن الاصرار على الغلط خطيئة كبيرة
القاعدة الخامسة: الانسان فوق الاوثان والمبدأ فوق الانسان:
افرض مثلا مثلا يعني ان البيني ادم ده واحد حقير وابن كلب نتن ويستاهل ضرب القباقيب، ووقع عليه ظلم، اسيبه يولع بجاز وسخ؟ ابقى زيه اكيد، البني ادم اهم من اي حاجة تانية في الدنيا، ايا كانت الحاجة دي حتى لو كانت الكعبة المشرفة، والمبدأ ده اهم من ان الفرد نفسه شخص كويس او مش كويس، انا بطبعي باعرف الناس بمسافة، مش بادفلق يعني، مش عشان اوتيستك، بس عشان ما اكرههمش
القاعدة السادسة: الاجماع على الخطأ افضل من الانفراد بالصح:
لو كل الناس اجمعت على تصرف ممكن اشوف انه غلط، لازم اقول اني شايفة انه غلط، بس لو الناس اصرت، لازم اشارك معاهم لان الاجماع بيخلي كل الناس تتحمل مع بعض نتائج الغلط وتكبر وتتصلح مع بعض، وبالتالي ده بيخفف من وقع النتائج السلبية
انما الانفراد بالرأي دايما يكون غلط حتى لو كان صح
القاعدة السابعة: حط نفسك مكان الناس:
قبل ما تحكم على حد وللا تدينه، حط نفسك مكانه مع الوضع في الاعتبار ان اكيد له ظروف تختلف عنك، ويمكن تكون اوحش
القاعدة الثامنة: كل الناس محترمة عدا الكدابين:
والله العظيم لو واحد بيقول انا باحب اسرائيل وانا عنصري وبيتصرف بناء على كلامه يبقى محترم اكتر بكتير من واحد بيقول كلام وفي السر بيعمل عكسه، مافيش حاجة اسمها عميل، العميل هو الكداب اللي بيغش الناس بكلام وهو في السر بيعمل حاجة تتناقض مع كلامه
ده هو العميل الف وواحد
هو كان الف وواحد وللا الف ومية ولا الف تلتمية ولا ولا مليوووووون

دي القواعد اللي كنت باحاول التزم بيها طول الوقت من ساعة ما ابتديت المدونة، حتى اول تدوينة ليا كنت باتكلم فيها عن التسامح مع اي حاجة الا الكدب
وبما ان احد القواعد ان الاكيد اللي مافيش حاجة اكيد، فمش اكيد ان القواعد دي كلها صح مية في المية
وبما ان احد القواعد انه لا خاب من استشار، فقولوا لي: انا غلطانة في ايه؟
اه، انا كنت قلت في اول البوست اني عرفت معلومات طمنتني، هي ما طمنتنيش اني صح على طول الخط، هي بس طمنتني ان محاولاتي للالتزام بالقواعد دي، اللي مش اكيد كلها صح، تعتبر ناجحة بنسبة كبيرة