اننا نتعلم من اخطاءنا
لو اتعلمنا من الاضراب ده اننا نقول: احنا غلطنا
ادي حاجة اتعلمناها مش موجودة في مصر اصلا، عمرنا ما سمعنا عن حكومة او معارضة مصرية بتقول على نفسها: انا غلطان ومتحمل نتيجة غلطي
دايما يبرروا لنفسهم حتى في الكورة بيتكلموا عن التمثيل المشرف
لو نجحنا اننا ما نبقاش زيهم يبقى دي حاجة
الحاجة التانية اننا نقول بصراحة غلطنا في كمجموع
ما حدش بيشاور على حد بالاتهام كلنا في الاضراب ده اللي اعترض واللي كان متحمس واللي دعا ليه كلنا في مركب واحدة وكلنا اكيد غلطانين
يبقى لازم نقول غلطنا في ايه
انا شخصيا شايفة عنصر التوقيت واختيار اليوم وانفصال الاضراب عما حدث في المحلة
ولان الدعوة للاضراب ارتبطت بعيد ميلاد الرئيس اللي هو لازم الناس كانت تهرج فيه، فارتبطت كمان الدعوة للاضراب بالتهريج
واحنا ما ينفعش ندخل الهزار في التهريج عشان ما يقلبش بضحك
كنا نحتفل بعيد ميلاده بالطريقة دي، والاضراب يبقى حاجة تانية
اكيد فيه حد غيري شايف حاجة تانية لازم يقولها
لو عرفنا نحط ايدنا على الاخطاء يبقى اتعلمنا كتير
وكده يبقى الاضراب نجح
ونجح قوي كمان واستفدنا منه اكتر من لو كانت الناس استجابت له
ومش عايزين تبريرات وتلزيقات والكلام عن شماتة شماتة ايه؟ هو احنا نسوان السبتية وخايفين ضرايرنا تشمت فينا عشان ابننا سقط وابنها نجح؟
احنا كل ورقنا مكشوف على النت وماعندناش اسرار ودي قوتنا الوحيدة
واحنا كلنا بنتعلم مع بعض ما جراش حاجة لما نقول غلطنا وده مش ندب ولا تقطيم
لازم نتعلم والا يبقى فشلنا فعلا
واللي ما بيتعلمش من كل حاجة في حياته يبقى فاشل على طول الخط حتى لو نجح ظاهريا
No comments:
Post a Comment