Saturday 10 May 2008

ماية دي وللا مش ماااااية


ما بتضحكيشي ليه؟ ماية دي وللا مش مااااية؟ الحقيقة انا كنت مستنياه يعيط بس ما عيطش
هو بس قال كام اية قرآنية وقول مأثور
انتخبوا رجل البر والتقوى صديق الحاجة كوندوليزا اللي انا فعلا بقى ابتديت اشك في علاقته بيها
كوندوليزا طلعت تصريح بتقول فيه: سأدعم فؤاد السنيورة
اشمعنى فؤاد السنيورة؟ عشان راجل مؤمن

بس فيه كام سؤال بيمغصوا في نفسيتي:
اشمعنى ميليشيات وليد جنبلاط حلوة؟
وميليشيات سعد الحريري حلوة؟
وميليشيات جعجع حلوة؟
وهي بس ميليشيات حزب الله اللي وحشة؟
ده السؤال أ
سؤال ب
فين يا حرامي فلوس النقطة اللي لميتها بالعياط والولولة على المساكين والفقرا واللي ماتوا في الجنوب
ولسة لحد دلوقت عايشين في ظروف لا انسانية؟
سؤال ج
يامي يامي يامي طالع تقول: هو حزب الله زعلان ليه؟ والله ما كلمته والله ما جيت جبنه
امال مين اللي كان عايز يدمر جهاز الاتصالات بتاعة حزب الله؟
سؤال د
بالنوسبة لانسحاب المسلخين من الشارع، هل ده يشمل المسلخين بتوع
الحريري وجنبلاط؟ وهل ناوي تنزع سلاحهم خصوصا ان جنبلاط
لامم بلطجية حوالين مقره واي حد بيهوب ناحية الحي بيرفعوه زي العصابة؟
سؤال هـ
انت مش ح تبطل انت وجنبلاط تقولوا احنا الاكترية احنا الاكترية؟
انتوا بتكلموا عيال بريالة؟
يعني احنا مش عارفين انكوا نجحتوا في الانتخابات بالتحالف مع حزب الله
وبعد ما اخدتوا اصوات الضاحية خلعتوا منهم...هو وانت وجنبلاط ليكوا جد منوفي؟
سؤال و
ايه اللي بينك وبين كوندوليزا...قول قول ما تخافش...الراجل له اربعة
وانت من خيرة الصحابة زي ما احنا عارفين
وللا انت خايف من المدام؟
سؤال ز
انت وحيد امك وابوك..صح؟ شكلك كده
وشكلك ان امك كانت بتخاف عليك تنزل الشارع لوحدك لحد
ما رحت الجامعة، والمدام عاملة لك شاندوشت لانشو ولافاه في كيس
صح؟
سؤال ح
وطلعت انت بقى اللي عامل المقاومة وانت اللي ساندت المقاومة بعياطك طبعا
والشحاتة على الناس اللي بتحارب...ومين اللي عايز ينزع سلاح حزب الله
مين؟ انا؟ والله ما كلمته..والله ما جيت جنبه
امال مين؟ مين يا سوسو؟
سؤال ط
ما بتضحكيشي ليه؟ ماية دي وللا مش مااااااية؟
انتي اسمك ايه؟ ام محمد
(اللبنانيين مش ح يعرفوها..اصل ده مقتطف من مسرحية مصرية)
معلش

No comments: