Sunday 11 May 2008

الشيخ شهال مخه نادر

مش انا شفت حوار مفتوح اللي كان فيه الشيخ ماهر حمود (سني) وواحد اسمه الشيخ داعي الاسلام الشهال، اه والله انا كنت فاكرة ان دي رتبة طلع ابوه اللي مسميه كده، رئيس جماعة سلفية. هو الحقيقة انا ما اعرفش الفصيلة بتاعته ايه ولا موطنه الاصلي، بس هو يصعب ع الكافر، ويمكن عشان كده اسرائيل بتديهم دعم، اصل هو قال ان بياخد من امريكا دعم وهو ياعيني مش مستوعب ان امريكا والحكومة السعودية واسرائيل تلاتة تملي تلاتة ويزعلوا قوي لو يبقوا اتنين
بعد ما قعد يتكلم كلام بتاع نسوان من قبيل: ونشرت الغسيل بتاعها من غير ما تعصره وهي شايفاني وانا لسة ناشرة الغسيل الابيض بتاعي، ولما جيت اكلمها قفلت الباب في وشي، ولما بانزل على باب العمار بتتوشوش مع اختها ويضحكوا بصوت عالي وبيتأوزوا عليا، وتنادي على الواد بتاع الخضار وتقول له واد يا بقه، القوطة بتاعتك مفعصة وتروح باصة لي وضاحكة
طب والله ما باتريق قعد يقول: يعني ينفع الشيعة يشتمونا واحنا ماشيين في الشوارع؟
يعني مثلا احنا هنا في مصر نموت بعض عشان فيه عيال حواري مسلمين بيمشوا يزفوا القسيس وهو ماشي في الحارة ويقولوا عليهم عضمة زرقا، وده سبب كافي جدا ان المسيحيين في مصر يتحالفوا مثلا مع امريكا واسرائيل ضد المسلمين في مصر ولما تسألهم يقولوا ما هم بيقولوا علينا عضمة زرقا؟
او احنا نتحالف مع امريكا واسرائيل ونقتل المسيحيين عشان بيقولوا علينا اننا بطنيين وبناكل كتير؟
ونطلع في حوار مفتوح، في الجزيرة، قدام العالم كله، نضحك علينا الناس ونقول: مش انتوا بتقولوا علينا مزيتين، يا سلاااااااام طب ما انتوا بتقولوا اننا مش صحاب البلد
اهي دي بقى طريقة تفكير الشيخ الشهال، والله ما قال غير بيشتمونا واحنا ماشيين في الشارع بيكببوا لنا وبيقولوا علينا يا كذا ويا كذا
طب يا عمي ما انت بتقول عليهم الروافض، وتقعد تجيب لهم من الف سنة ايام ما العلقمي تحالف مع جنكيز خان وتقول لهم يا خونة
طب احنا هنا في مصر من ايام الفاطميين بنقول: نعم يا عمر...وبنقول: عملت عيشة
هل دي مبررات سياسية ان حضرتك تتحالف مع امريكا واسرائيل؟
يا اخي مش مكسوف من نفسك وانت بتقول العيال الشيعة الصغيرين بيقولوا لنا في الشارع يا عيشة، وتقول ان ده دليل على مخطط ايراني لبسط السيطرة على لبنان وعشان كده احنا متحالفين مع امريكا لاننا محتاجين مساندتها والمخطط بتاعنا المتحالف مع امريكا ماهو الا رد على المخطط الشيعي، ماهر حمودة يقول له: يا عم امل وحزب الله اتحاربوا وكانت حركة فتح وهم سنة متحالفين مع امل وبيقتلوا حزب الله، ثم ايه لزوم الكلام ده دلوقت؟ لو ح نفتح الملفات القديمة يبقى بقى ماحدش قتل قد جعجع وجنبلاط اشمعنى دول صحابك وحبايبك؟
يقول: والله سنة اتنين وتمانين...
وغسان بن جدو يقول له: دلوقت حزب الله متحالف مع كل الطوايف وكذلك اربعتاشر اذار ايه رأي حضرتك،
يقول: والله سنة اتنين وتمانين.....
- ياعم مش بنسألك على اتنين وتمانين...طب تفتكر هل هناك طريقة للحل؟
يقول: والله سنة اتنين وتمانين...
- طب اذا كان حزب الله متحالف مع ايران وسوريا طب ما اربعتاشر اذار متحالف مع امريكا وفرنسا واسرائيل؟
شوف بقى الشيخ الشهال بيرد يقول ايه: اه احنا محتاجين للتحالف مع امريكا ومع الغرب بسبب تقاطع المصالح، لكن احنا ضد اسرائيل والله، طب حزب الله بيحارب اسرائيل، طب ليه حزب الله ما عزمناش نحارب معاه اسرائيل؟ احنا مستعدين، دي مؤامرة شيعية عشان يقولوا على نفسهم انهم بيحاربوا اسرائيل ومانعينا نحارب
مانعينهم يحاربوا ازاي؟ حاطين المقاومة في التلاجة وقافلين عليها بالمفتاح؟ هي حفلة طهور؟ ما اللي عايز يحارب ما يتنيل يحارب
- حزب الله مش عايز يضمنا معاه...والدليل سنة اتنين وتمانين....
اولا بصراحة حزب الله لو مش عايز يضم الناس دي معاه حق، لان الغباء ده ما ينفعش في الحرب، الغباوة في الحرب بتموت ناس
ثانيا يا ننوس عين ماما، يضمك ازاي يعني، يلبسك الكافولة ويجيب لك الرضعة ويلفعك على كتفه وياخدك لحد الجنوب ويمشيك تاتا خطي العتبة ويمسكك الكلاشنكوف ويقول لك: جود بوي؟
- والله سنة اتنين وتمانين...
فاكرين مسلسل سارة؟ لما حنان ترك مخها كان متوقف عند سن تمن سنين؟ اهو الشيخ شهال زي سارة كده
مخه واقف عند سنة اتنين وتمانين، وياريته فاهمها
الشيخ ماهر حمود كان بيكلم الشيخ الشهال بمنتهى الادب وبيحاول يفهمه بالراحة على طريقة: قناوي يابني...قوم البسك جلابية الفرح، ده انا ح اجوزك هنومة يا قناوي يابني
بس قناوي كان انبه من الشيخ الشهال غفر الله له وهداه ونور له مخه شوية
شيخ شهال...حاول تحل سودوكو يمكن ربنا يفتح لك مخك، انت في المدرسة كنت خايب في الرياضيات صح؟

No comments: