والله طيب والله عال ليلي طاااال وليله لأ وليله لأ وليله لأ

لسة راجعة من برة كنت على البورصة، ومش ح اقول كنت مع مين عشان اخد راحتي في الكلام : شفت مناظر كئيبة وسمعت كلام كئيب عن الدنيا والناس والمحلة والمدونين والتدوين
خد عندك: اولا مش باحب اروح البورصة لان كمية الناس اللي بتشحت خرافية واشكال عديدة من الشحاتة يعني تروح البورصة تحس انك في انجلترا في القرن التمنتاشر ايام ما بليك كان بيكتب شعر يسب ويلعن في الفقر والغلابة اللي بيبيعوا كرامتهم عشان ياكلوا
يعني مثلا فيه الناس اللي بتطلع من بقها نار، والنهاردة كان فيه الاراجوز صورته فيديو بس مش ح اعرف احمله دلوقت لحد ما اشوف اللاب طظ بتاعي ماله
الغريبة اني كنت لسة متصلة بمالك وباقول له: هو انت ما تعرفنيش غير عشان تصلح لي الكمبيوتر بتاعي ببلاش؟ ده انت واد بتاع مصلحتي فعلا، ورجعت لقيت اللاب طظ مش بينطق وح اضطر اني اتسامح معاه كونه صاحب بتاع مصلحتي
المهم غير الاراجوز العيال اللي بتشحت: عايز اكل يا ابلة
شاب مؤكد خريج جامعة وداير ببرفانات على الناس والناس كلها بتقول له: معلش مش عايزين
مأساة اغريقية فعلا
ثانيا: انا كنت قاعدة مع ناس نقدر نسميهم تيمور وهندي ومنجاوي وعويسي مثلا
تيمور كان من ضمن الناس اللي مقبوض عليهم في احداث المحلة وكان في سجن برج العرب وحكا لي عن اهوال: ناس مروحين بيوتهم فجأة لقوا نفسهم متهمين بالشغب وقلب نظام الحكم وواحد فيهم كان ح يشنق نفسه وحاشوه على اخر لحظة
كريم البحيري والدته عايزة تدخل المستشفى ومش عارفة لان اخته في اولى اعدادي ومش عارفة ح تسيبها مع مين
واحد ميكانيكي مالوش في اي حاجة كان طول ماهو نايم ينادي على بنته ويخبط على باب الزنزانة ويقول للعسكري اشوف بنتي
كمال الفيومي ولاده واحد في تجارة وواحد في تمريض اشتغلوا عشان يعولوا اسرتهم في غياب العائل ومهددين بانهم يسيبوا الدراسة
طارق السنوسي عنده اربع بنات ومن غير عائل ولا معاش ولا اي حاجة
كلهم اترفدوا من شغلهم
التعذيب كان على ودنه قبل ما يرحلوهم على برج العرب
هندي قال لي ان المحتجزين في المحلة مش تلاتة زي ما احنا فاكرين دول سبعين واحد
4 سياسيين
2 في المرج
42 في برج العرب
24 جنائيين
وطبعا الجنائيين دول كلهم متهمين بالبلطجة وكلهم من عينة الميكانيكي اللي عايز يشوف بنته
طب السياسيين كنا بنقول: محبوسين عشان بيحبوا مصر
العمال كنا بنقول: محبوسين عشان عايزين يعيشوا عيشة كويسة
طب يا مصر فيه كتير من المحبوسين دلوقت لا بيحبوكي ولا عايزين يعيشوا عيشة كويسة...انت بتعملي كده ليه؟
ثالثا: منجاوي قال لي ان فيه بعض المدونين اللي لبستهم روح الزعامة وفاكرين نفسهم هتلر وبقوا يتكلموا بوصفهم مرجعيات سياسية وزعامية وبيتمريسوا على المدونين اللي اصغر منهم بتلات اربع سنين على اساس ان دول عيال بقى
قلت له مين يا منجاوي
قال لي انت مش بتدخلي على التويتر قلت له من ايام امنحتب التالت مش بادخل عليه قال لي خلاص بقى مش مهم مين المهم اننا بدل ما ناس تتمريس على بعضها وبدل ما ناس تتكلم وتقول انا مدون مهم وانا مدون قديم وانا مدون ليا وزن ياريت نعمل حاجة تبقى فعالة كلنا مع بعض وقبل ما يبتدي يكمل اقتراحاته قلت له مين يا منجاوي قال مش مهم
اصل منجاوي مش بيحب ينم على الناس وكويس انه ما قاليش اسامي عشان اتكلم بحيادية احسن يكون فيهم حد صاحبي وللا حاجة والنفس امارة بالسوق الحرة
والله طيب والله عااااااااال يا سادة يا مدونين
والله عال
مين بقى اللي فاكر نفسه في المدونين زعيم ومهم وريادة وعايش في دور عرابي؟ مين اللي عايز يتمريس على ناس اصغر منه او اجدد منه في التدوين؟ والله حلوة النكتة دي، فيه مثل قديم بيقول: سي خرا جاب له مرة وحلف عليها بالطلاق
طب يا سي خرا او يا ست خرا ولو اني اشك ان فيه مدونات بنات او ستات ممكن تتكلم بالطريقة دي، وللا اشك ليه ما بقاش فيه حاجة مضمونة دلوقت
احب ابلغكوا انه انتهى عصر الزعماء، وانتهى عصر التنظيمات، وانتهى عصر الوصاية، وانتهى عصر النخب
واحنا هربنا للتدوين عشان نبقى احرار نفسنا وعشان ماحدش يفرض على حد وصاية وماحدش ياخد سمت الاهمية والباقيين هاموش حواليه
احنا كلنا في نفس القدر ونفس القيمة وكلنا زي بعض وكلنا راسنا براس بعض وممكن عيل عنده تمنتاشر سنة يبقى بيفهم احسن من اكبر مدون سنا، ولو السن بيفهم يبقى حسني مبارك اكتر واحد بيفهم في البلد دي
ويوم ما نحب نختار لنفسنا زعماء مش ح يبقى واحد بشخة كتب له كام بوست وسمعوا شوية ومش عايزين واحد قاعد منه للنت وجاله اوتيزم من كتر ما بقاله عالمه الخاص على النت يجيله جنون العظمة ويفتكر نفسه زعيم المدونين ولا اهم المدونين ولا مدون من افضل المدونين من اشجع المدونين من ابضن المدونين واذا مات المدون فكلنا المدون وفي مصر اربعين مليون مدون
واللي ح يجيله جنون العظمة ح يبقى شأنه شأن كل تافه صدق نفسه ح يترمي في مزبلة التاريخ
المدونين دول مش فئة ولا نخبة، احنا مواطنين هربنا من النخبة للتدوين عايزين تعملوا لنا نخب جوا التدوين كمان؟
المواطنين كلهم زي بعض يا سيادة المدونين المهمين واللي فاكر نفسه مهم زيه زي الفاكر نفسه اكصلانص زيه زي اللي فاكر نفسه زعيم كلهم صفررررررر كبيييييييييييير
احنا مش حاطين التيتة في بقنا
اي مواطن النهادرة، دلوقت اهو، يقدر يعمل اكاونت لنفسه ويبقى عنده مدونة، ايه فيه ايه؟ ماحدش بيمر بامتحان وزارة الخارجية وياخد لائق اجتماعيا عشان يدون، اي حد بيدون، وانا شخصيا شايفة ان التدوين المفروض يبقى للمصريين كالماء والهواء ودخول الحمام
ح يبقى في دخول الحمام ناس مهمين وزعما؟ وواحد يقول على نفسه انا من اهم الناس اللي بتدخل الحمام؟ انا زعيم داخلي الحمام؟ انا اقدم واحد بيدخل الحمام في البلد دي واسألوا ورق التواليت؟
امبارح كنت باكلم طنط محسنة توفيق، هي غير اني افخر بانها واحدة من امهاتي (اصل انا ليا امهات كتير ) هي واحدة من اهم الناس اللي لها خبرة في العمل العام والسياسي والفني والنخبوي كمان قالت لي كلمة مهمة قوي:
زي ما انتهى عصر الانبياء ومش ح ييجي انبياء تاني، عصر التنظير والمنظرين والزعماء والنخبة انتهى كمان
الناس نضجت بما يكفي وتعرف تقود نفسها ومش محتاجة حد يقودها
وانا ابصم على الكلام ده بصوابعي العشرة، خصوصا بقى لما اللي بيرشحوا نفسهم للزعامة يبقوا....احا....احنا بنتكلم في ايه اساسا؟
انتوا اتهبلتوا؟
عموما
افضل ما في التدوين انه زي مصر، زي الدنيا، جسمها ح يلفظ الرايش
واللي افتكر نفسه زعيم وبيتنطط على المدونين التانيين ويقول انا وانا قريب قوي ح يتشد عليه السيفون ومش عايزة اعرف هم مين اللي بيتكلموا كده عشان لو صادف وقابلت حد فيهم في اي حتة ما اغرقش وشه تفافة
يا حلاوة يا ولااااااد فيه مدونين عايزين يعملوا نفسهم نخبة ومهمين
تيمور وهندي ومنجاوي وعويسي كانوا بيفكروا في اننا نعمل حاجة تضامنية مع محابيس المحلة من غير ما حد يقول لي وقفة احتجاجية ابوس ايديكوا احنا مش عشان نطلع ناس نحبس ناس تانية
لسة بنفكر نعمل حاجة تكون امنة وفعالة وانا لسة عند كلامي ماعندناش استعداد نضحي بشباب زي الفل بيفيدوا فعلا في الهجايص عشان ناس تانية تعمل ابطال وكمان زعماء وهم جيص في قفص