اقروا الكتاب ده ضروري

اتصرف.. الكتاب ده تحمله وتقراه، هو بالانجليزي، ما بتعرفش انجليزي شوف اي طريقة تترجم بيها الكتاب وتقراه

لازم لازم لازم، لما اخلصه ولو ربنا قدرني اترجمهولكوا

ده كتاب اسمه اختراع الامة اليهودية، اللي كاتبه عالم تاريخ اسرائيلي، يعني حلال تحمل كتابه ببلاش هع هع هع 

لا والله، راجل لطيف يعني، هو مش صهيوني، هو اتولد في اسرائيل ولقى نفسه اتدبس التدبيسة دي، شيوعي هو، وصاحب محمود درويش وكان قعد برة اسرائيل فترة لانه لما كان لسه شاب ورور شارك في حرب سبعة وستين وحصل له تأنيب ضمير من قتل الناس وفضل يسكر ويعيط وبعدين طفش من اسرائيل ورجع تاني عشان الدور اللي هو بيعمله ده

محمود درويش كان قاله قبل ما يسافر كده، قاله خليك وقاوم الصهيونية اللي زيك يساعدنا اكتر، المهم رجع

هو بس فيه نقطة، الكتاب ده ضد العنصرية، فاي حد عنصري يا عيني حيتضايق منه اخر حاجة وبتوع القومية المصرية دماغهم حتولع وكده يعني، بس هو بيبين ان القوميات دي اكذوبة واوهام، وان مافيش حاجة اسمها امة يهودية، وان الفلسطينيين هم اللي جدودهم يهود واليهود اللي دلوقت مالهمش اي صلة بفلسطين، وبيثبت ده بالبحث العلمي، وطبعا بيتطرق لكل القوميات بشكل عابر

بس احسن.. العنصريين وبتوع القومية المصرية بقى يقروا الكتاب ده عشان يشوفوا قد ايه هم بيساعدوا الصهيونية

المهم، الكتاب تقروه، ما تستنوش لاني ممكن اكسل وما اترجموش، انشالله تترجموا الترجمة المعفنة دي بتاعة جوجل، زي بعضه احسن من مافيش