ندااااااء: الحقوا شارونة مغاغة قبل ما تقلب فتنة طائفية

فيه احتقان دلوقت في حتة اسمها شارونة مغاغة في المنيا ويمكن تقلب حاجة مش كويسة

الموضوع وما فيه، ان واحدة مسيحية متزوجة ماتت - الطب الشرعي قال حمى نفاس واهل البلد بيقولوا اتقتلت - وواحد مسلم، يذكر انه كان صاحبها، لقوه مقتول، واهل البلد قالوا اهل الست هم اللي قتلوها وقتلوا الراجل، قام البوليس بمنتهى النباهة اتدخل واخد واحد من العيلة المسيحية يقرره قام الواد مات في ايدهم.

ودلوك الموضوع كبر جوي، لان اهل المسلم عايزين حجهم، والمفروض ان فيه تلات حلول، يا اما حد من اهل المسيحية يروح شايل كفنه ويعملوا صلح، وده عايوبجى واعر جوي لان ميت لهم واحد في الجسم وكماني الواد اللي انجتل فاجر، واهل المسلم مالهمش صالح باللي مات في الجسم ده الحاكومة هي اللي جتلته والواد خرع وما استحملش الضرب وكماني المسيحية متجوزة يوبجى الواد ينجتل لييييه؟ الحل التاني ان اهل المسلم يجتلوا لهم احسن واحد في عيلة البت المسيحية، وطبعا اهل البت ما عايسكتوش، الحل التالت يدخلوا معركة (واللي كلمني يحكي لي الحكاية قال لي هي بيبقى اسمها معركة وبيحضروا لها وكده كأنها معركة.. يعني حتى ما اسمهاش عركة) واللي ينجتل في المعركة مالوش دية وكل واحد وشطارته بجى والبوليس عا يتعامل معاها على انها جتل خطأ والقاتل في المعركة دهين ما عاياخدش اكتر من تلات سنين (انا عمري ما شفت ناس بتخطط للقتل الخطأ) جم شوية ناس متعلمين جالوا لهم يا ناس .. يا عالم.. الموضوع اكده عاجلوب بدد (لان زي ما انتوا شايفين الموضوع لحد دلوقت هزار، مش عايزينه يقلب بجد) طبعا هو الموضوع فيه بعض المشاعر الطائفية بس طائفية مصرية جميلة اصيلة بعيدة عن الاجندات الخارجية يعني: المسيحيين شايفين ان كيف الواد المسلم ينط على بتنا، والمسلمين شايفين انه وايه يعني لما نط على بتكوا تجوموا تكتلوه؟ دي حتى بتكوا مسيحية امال لو كانت مسلمة شوية كنتوا عملتوا اييييه؟ وكمان تدخل الشرطة بذكائها عك الدنيا زيادة

هييييه.. انا باحب الصعايدة، ومعظم صحابي صعايدة، وبارتاح في المعاملة معاهم، بس انا اتخنقت منكوا خلاص، انا عارفة الدماغ دي على فكرة، حتى اللي بيبقى مولود في بحري واصله صعيدي بيبقى هي نفس الدماغ دي، الظاهر جين، ما ينفعش اكده واصل، انتوا عاملين لنا مشاكل ومفرجين علينا الدنيا

وبعد كده الشباب والبنات المسلمين والمسيحيين يبطلوا مياصة وقلة ادب، لا مسلم يحب مسيحية ولا مسيحي يحب مسلمة

المهم الموضوع لازم يتلحق قبل وقوع المعركة اللي بيخططوا لها، وياريت الشرطة تطلع منها، ما بتعرفش تحل، ما اعرفش مين ممكن يروح ويحاول يحل بين العيلتين، لو شخصية عامة، او حد محبوب يروح ويحل ويعمل صلح ويبقى واثق انهم مش بيهاودوه وياخدوه على قد عقله وبرضه اللي في دماغهم في دماغهم، انا عارفاهم اصلي وعارفة حركاتهم دي

المهم المشكلة تتحل قبل ما تتحول من قضية شرف وتار لقضية طائفية