Monday, 5 April 2010

ندااااااء: الحقوا شارونة مغاغة قبل ما تقلب فتنة طائفية

فيه احتقان دلوقت في حتة اسمها شارونة مغاغة في المنيا ويمكن تقلب حاجة مش كويسة
الموضوع وما فيه، ان واحدة مسيحية متزوجة ماتت - الطب الشرعي قال حمى نفاس واهل البلد بيقولوا اتقتلت - وواحد مسلم، يذكر انه كان صاحبها، لقوه مقتول، واهل البلد قالوا اهل الست هم اللي قتلوها وقتلوا الراجل، قام البوليس بمنتهى النباهة اتدخل واخد واحد من العيلة المسيحية يقرره قام الواد مات في ايدهم.
ودلوك الموضوع كبر جوي، لان اهل المسلم عايزين حجهم، والمفروض ان فيه تلات حلول، يا اما حد من اهل المسيحية يروح شايل كفنه ويعملوا صلح، وده عايوبجى واعر جوي لان ميت لهم واحد في الجسم وكماني الواد اللي انجتل فاجر، واهل المسلم مالهمش صالح باللي مات في الجسم ده الحاكومة هي اللي جتلته والواد خرع وما استحملش الضرب وكماني المسيحية متجوزة يوبجى الواد ينجتل لييييه؟ الحل التاني ان اهل المسلم يجتلوا لهم احسن واحد في عيلة البت المسيحية، وطبعا اهل البت ما عايسكتوش، الحل التالت يدخلوا معركة (واللي كلمني يحكي لي الحكاية قال لي هي بيبقى اسمها معركة وبيحضروا لها وكده كأنها معركة.. يعني حتى ما اسمهاش عركة) واللي ينجتل في المعركة مالوش دية وكل واحد وشطارته بجى والبوليس عا يتعامل معاها على انها جتل خطأ والقاتل في المعركة دهين ما عاياخدش اكتر من تلات سنين (انا عمري ما شفت ناس بتخطط للقتل الخطأ) جم شوية ناس متعلمين جالوا لهم يا ناس .. يا عالم.. الموضوع اكده عاجلوب بدد (لان زي ما انتوا شايفين الموضوع لحد دلوقت هزار، مش عايزينه يقلب بجد) طبعا هو الموضوع فيه بعض المشاعر الطائفية بس طائفية مصرية جميلة اصيلة بعيدة عن الاجندات الخارجية يعني: المسيحيين شايفين ان كيف الواد المسلم ينط على بتنا، والمسلمين شايفين انه وايه يعني لما نط على بتكوا تجوموا تكتلوه؟ دي حتى بتكوا مسيحية امال لو كانت مسلمة شوية كنتوا عملتوا اييييه؟ وكمان تدخل الشرطة بذكائها عك الدنيا زيادة
هييييه.. انا باحب الصعايدة، ومعظم صحابي صعايدة، وبارتاح في المعاملة معاهم، بس انا اتخنقت منكوا خلاص، انا عارفة الدماغ دي على فكرة، حتى اللي بيبقى مولود في بحري واصله صعيدي بيبقى هي نفس الدماغ دي، الظاهر جين، ما ينفعش اكده واصل، انتوا عاملين لنا مشاكل ومفرجين علينا الدنيا
وبعد كده الشباب والبنات المسلمين والمسيحيين يبطلوا مياصة وقلة ادب، لا مسلم يحب مسيحية ولا مسيحي يحب مسلمة
المهم الموضوع لازم يتلحق قبل وقوع المعركة اللي بيخططوا لها، وياريت الشرطة تطلع منها، ما بتعرفش تحل، ما اعرفش مين ممكن يروح ويحاول يحل بين العيلتين، لو شخصية عامة، او حد محبوب يروح ويحل ويعمل صلح ويبقى واثق انهم مش بيهاودوه وياخدوه على قد عقله وبرضه اللي في دماغهم في دماغهم، انا عارفاهم اصلي وعارفة حركاتهم دي
المهم المشكلة تتحل قبل ما تتحول من قضية شرف وتار لقضية طائفية

19 comments:

AhMeD RaDy said...

والله يا نوارة مش عارف اقولك ايه بصراحة المشكلة انها فعلا مشكلة ... وشكل الدنيا هناك معكوك حبتيين

ربنا يستر علينا بقى

Dr Nemo said...

هيييييييييييييه هييييييييييييه
اخيرا بعد طول اشتياق فتنه طائفيه جديده من الاخوة فى الصعيد
انا زهقت يا نواره ... جهزى نفسك لشحنة غباوة وتخلف جداد من التعامل الامنى للنظام مع اللى حصل ....اه لسه هيعكوا اكتر من كده

lastcrazyboys said...

على فكــــرة يا نـــوارة ..الموضــــوع ممكن لو فتنـــة طــائفـــية يكــبر ..ولو الشـرطة اتدخلت يوســـع

انما حكـــاية المخ الصعيــدي ..و"والتجفيل الواعــر" على حــد قولك ..فلا أظن

ولفض الالتبــاس احب اوضحلك - وممكن لو فيه حد صعيدي هيأمن على كلامي -..ان المنيــا لا تعتبــر من الصعيـــد الجواني حســب العــرف القبلي الصعيـــدي
ومســألة التــار والكفن ..لا تنتشــر باصــورة التي في مخيلتك

لأن وصفـــك جعلني احــس انك بتتكلمي عن " بهجـــورة" ..او اي نجع في قنــا او سوهاج ...او حتى اسيـــوط " والتي تعتبر الخط الفاصل بين التفتيح والتقفيل العقلي فعليــاً"..هتقوليلي : لع المنيا صعيد وبني سويف صعيد
عقــولك انا طب مالجيــزة صعيــد ..والمعـــادي حلوان ..ونزلة السمان بقت تبع اكتوبر بس كلهم بيقولوا نازل " مصــر" أو القاهرة الكبرى حسب التعبير الاعلامي

المنيا صعيد "جغرافي" بينما لا يعتبرها اهل الصعيد الجواني " اسيوط -سوهاج - قنــا" صعايدة فعلياً وهم اللي بتقولي عليهم ما بيحوقش فيهم تعليم ولا استقرار في البنــدر
كما ان المنيــاوية لا يتحدثون باللكنة التي اوردتي بها الموضوع ..وانما لهم لهجة اقـــرب الى لهجة محمد صبحي في "سنبل" ..وبيمطوا الكلام -لقربهم من الوجه البحري- ..وكمان انا ممكن اجيبلك عيال من المنيا شعهرهم اصفر وعينيهم خضرا

اداااانب ..عليا الطلااااج ادانب
فخمـــتو ولا لســة شوية

Amr said...

أنا مفهمتش حاجه من القصه الملعبكه دى

بس هو ليه دايما" الأمن بيتدخل بغباوه وغشوميه كده ؟

هو داخل يحقق فى قضيه ويحلها يقوم يقتل واحد ؟

جبهة التهييس الشعبية said...

مش فاهم ليه؟

الموضوع وما فيه ان واحدة مسيحية متجوزة وواد مسلم كانوا بينهم الشيء البطال قام اهل البت المسيحية قتلوهم الاتنين

جه الامن قبض على واحد من عيلة البت المسيحية عشان يخليه يعترف قام الواد مات من التعذيب

الموضوع اتلعبك بسبب كده

لا سابوهم يحلوا مع بعض

ولا حلوا لهم المشكلة بالعكس

شعللوا العيلة المسيحية لان كده مات لهم ميت

وفي نفس الوقت العيلة المسلمة بتقول واحنا مالنا، ده قتلته الحكومة احنا عايزين حقنا

بقى الحل ان حد من عيلة المسيحية اللي مات لهم ميت وشايفين انهم قاتلين واحد فاجر ما يستاهلش يروح يشيل كفنه

او العيلة المسلمة تقتل لها احسن واحد في عيلة المسيحية وفي الحالة دي تقلب تار لان اهل المسيحية مش حيسكتوا

او يعملوا معركة والاشطر يغلب

وفي كل الاحوال حتقلب فتنة طائفية

ياريت الشرطة ما اتدخلت من الاصل يمكن كانت اتحلت من الاول

جبهة التهييس الشعبية said...

لاست كريزي بوي

انا ما كتبتش تحليلي لا سمح الله

انا كتبت الكلام اللي جالي من البلد نفسها

فما فيش مجال للظن والتحليل

انا بانقل الكلام اللي اتقال لي من جوة البلد نفسها

lastcrazyboys said...

مانا فاهم النقطــة دي ...بس انا يمكن استفزتني الحتــة بتــاعة ان لموضوع سببه ان الناس دي صعــايدة

لإنا حبيت اوضحلك ..ان الواد الصــايع ده لو في شبـــرا ..كان زمانه...متجطع جطّـــيع برضـــه

وبيني وبينـــك ..انا فيه حاجة تانية مضايقاني في شعوري تجــاه الموضوع ده

بس هبقى اوضحها بعدين

أبو أمك said...

ممكن أعمل زي خالد الجندي وأعزمهم على عشوة سمك زي مرتضى وشوبير
بس يتخرب بيتي لو عزمت العيلتين
كفاية أعزم الواد والبت اللي اتقتلوا

overdose said...

وبعد كده الشباب والبنات المسلمين والمسيحيين يبطلوا مياصة وقلة ادب، لا مسلم يحب مسيحية ولا مسيحي يحب مسلمة









ekhs 3alekkkkkkkkkkkkkkkkkkkky

Ideas 4 Egypt said...

عيب قوى واحدة محجبة زيك وبنت ناس افاضل تستخدم الألفاظ الجنسية دى. ببساطة كدة تقولى "نط عليها"؟؟؟ اين الحياء يا آنسة؟ لو مش خايفة من ربنا فعلى الأقل عشان تلاقى حد يتجوزك

هو ايه اللى جرى فى الدنيا - لما بنات محجبات يستخدموا الألفاظ الخارجة دى - أمال الشباب يقولوا ايه؟ لاحول ولا قوة الا بالله

هو بابا بيقرا مدونتك دى؟..

اسد الجيزة said...

انت هاتحكوا بتوع المنيا فينا الصعيد من سوهاج ونت نازلة دول صعايدة زهرات

حسن على said...

يخرب "مطنك"يا نوارة...(مطنك هى "مظنك" يعنى يخرب عقلكك بالمنياوى

عم مينا said...

فعلاً أين الحياء يا أنسة؟
هاهاها

جبهة التهييس الشعبية said...

انا مش عارفة اقوله ايه؟

انا مبسوطة قوي انه قال لي يا انسة

ده انا مرة اديت عسكري مرور عشرة جنيه عشان قال لي يا انسة

عبد الزهراء المصري (علي الحسيني) said...

هقول لك الفولة إيه يانوارة ؟؟؟
المنيا مش زيها زي أي محافظة على فكرة ، أحنا محافظة تعتبر متفتحة حتى عن كتير من المحافظات البرحية عنا زي بني سويف والفيوم ، اي نعم فيه موضوع التار ده لكن مش زي بقية المحافظات التانية .
أما الحل من وجهة نظري للموضوع ده إن الواد المسلم الفاجر فياريت اللي قتلوه يسلموا نفسهم ويقدموا كفنهم لعيلة الواد المسلم ويدفعوا الدية وهم بقى وحظهم أتقبل منهم ولا لأ ؟؟؟.
أما الواد المسيحي اللي مات فده الشرطة قتلته يبقى عليهم وعلى الشطرة ومالهمش دعوة بالمسلمين خالص فالشرطة هي القاتل وليس المسلمين .
بس خلاص

Ahmed said...

http://www.masrawy.com/News/Cases/General/2010/april/5/tanta_strike.aspx

خدي ده بمناسبة الأمن الهمام يا أنسة,, هههه

نعيب زماننا

شمس العصارى said...

واوووووووووووووووو
الموضوع واسع و متشعب
بس ايه الى انتى كاتباه ده انا مش عارف اقرا الكلام
وهو مين قالك ان كل الصعايدة بيتكلموا كده
ده انا كنت بترجم الكلام
يعنى موضوع مهم تقومى تكتبيه بالكشل ده
تفتكرى ان شخصية مهمة او غيرها ممكن تحل
فاكرة كلام من شهور لما قلت " ان تدخل الامن بيكون سافر و بيدير الموضوعات دى بطريقة غريبة و فوقية "
وادى اخرتها
ربنا يستر
نلتقى بعد الامن

شمس العصارى said...

يعنى ينفع كده يعنى
اقتباس " لأن وصفـــك جعلني احــس انك بتتكلمي عن " بهجـــورة" ..او اي نجع في قنــا او سوهاج ...او حتى اسيـــوط " والتي تعتبر الخط الفاصل بين التفتيح والتقفيل العقلي فعليــاً".." انتهى
ينفع كده يا اخ لاست كريزى بوى
الخط الفاصل بين التفتح و التقفيل
تفتح و تقفيل
وهو انت ازاى حكمت حكمك باتفتح و التعقل ده
اسيوط وسط الصعيد جغرافيا فقط
ثم هل من انجب عباس العقاد و امل دنقل و الابودى و عبدالمعطى حجازى - مش بحبه - و الطهطاوى و المنفلوطى و عمر سليمان و مصطفى بكرى - مش بحبه - كل دول و غيرهم انجبتهم المناطق المقفلة
اذا كان كده فمرحبا التقفيل
شكرا لاست كريزى بوى
ــــــــــــــــــــــــــــ
كل من يتكلم عن الصعيد واخد معلوماته من التليفزيون و اتحدى واحد ينزل مدينة قنا و يقلى ايه الفرق بينها و بين مدينة نصر
واتحدى واحد يزل الاقصر و يجارى اهلها فى اللغات
و اتحدى واحد ينزل اسوان و ميدهش من طيبة اهلها
الا مش دول صعايدة و تبع المناطق المقفلة
ثم ان اهل بنى سويف و المنيا هما الى مش بيقولوا على نفسهم صعايدة
هما الى بينكروا عن نفسهم هذه التهمة
و عن نفسى لو لم اكن صعيديا لوددت ان اكون صعيديا
شوفتى يا ست نوارة شكل كلامك عمل ايه مع الناس
انا قلتلك قبل كده انزلى الصعيد و بعدين اتكلمى و اوصفى
وساعتها حتعرفى احنا نقصد ايه و ساعتها كلامك حيبقى عن معاينة
الله يحرقه مينا موحد القطرن
و نلتقى بعد ما يرجعوا قطرين تانى ان شاء الله

شمس العصارى said...

الا الموضوع ده مفيهوش جديد ولا ايه
نهاية الاسبوع الماضى سالت سواق من بنى مزار قلتله فى مشكلة فى مغاغة
قالى مش عارف بطريقة عادية جدا توحى بانه لا شئ حدث
الا انتى مصدر الخبر ده عندك ايه
و شوفيلنا ايه الجديد و اخر التطورات