Sunday 18 April 2010

هي الاشكال دي لسه عايشة؟

ده واحد... انا مش عارفة اصنفه، بس انا متأكدة ان ده حداهم في البلد يحتبر زي العسكري اللي معاه دبلون في سرس الليان عندنا كده
هاذوها الانسان قاعد لنا على التويتر يفتي فتي خرافي، وكل شوية يروح فاقع لنا تويتة ذات صوت ورائحة وفتافيت كمان
ماشي.. هو حر القعدة حرية يعني
انما يوصل الامر انه يدخل حمام الجارديان ويخلي ماسورة المجاري تطفح بفتيه في الشأن المصري وهو معلوماته عن الشأن المصري تشبه بالظبط معلوماتي عن الشأن الكوري من خلال متابعتي لمسلسل اغراء زوجة اللي فيه البت انتقمت من حماتها بانها ما طبختش وطلبت اكل ديلفري؟
انا ما عنديش مشكلة في الفتي والله... عادي ما يفتي هو حر، زيه زي اللي تسأله على شارع فيجاوبك: هو قالك فين؟
انا بس اللي مضايقني عدة اشياء:
1- انه فعلا حداهم في البلد مفهمهم انه هو اللي جايب لهم التايهة عشان يفهموا العقل العربي الغريب اللي مكون من بنطلون سندباد وقصة علاء الدين
2- هي لسه العقلية دي مسيطرة على الانجليز؟ تاني؟
a passage to india
تاني؟
طب ده كان ادب الاستحمار في القرن التسعتاشر واوائل القرن العشرين هم مش حيفوقوا بقى من اللي هم فيه ده ويصدقوا اننا بني ادمين زينا زيهم وان فصوص مخنا مافيهاش ضمور ولا حاجة واننا مش عايشين في الاحراش ولا قاعدين على فرع الشجرة بناكل موزة؟ وان مافيش اختراع اسمه العقل الغربي والعقل الشرقي والعقل العربي؟
twisted arab mind
كما كان يشاع في فترة الاستحمار لحد ما احنا نفسنا يا عيني اقتنعنا اننا كائنات فضائية
المفاهيم دي فيها خطورة لان اتبنى عليها تبريرات
the white man's burden
حمل الرجل الابيض في النهوض بالعقول العنكبوتية اللي زي عقولنا اسم الله عليهم، مش ممكن الاستعمار خلص ولسه فيهم ناس بيفكروا كده وكمان بيتنشر لهم في الجارديان مش جرنال تحت السلم ولا حاجة
انا رافضة المفاهيم العنصرية دي... مش عشان النوعية اللي بتفكر كده صعبانين عليا وعايزة اوعيهم، دي ناس بتسترزق اصلا، واللي بيصدقهم بيصدقهم بكيفه، كل واحد عقله في راسه يعرف خلاصه وكل واحد ربنا اداله عقل يفهم بيه الناس كلهم زي بعض وبني ادمين، عايزين يستحمروا نفسهم بارداتهم هم احرار، احنا كمان بنستحمر نفسنا في حاجات كتير بارادتنا، زي وهم ان الطفل المصري اذكى طفل في العالم، ده لسه فيه ناس كتير مصدقة الاوشاعة دي ويقولوا لك: بحث اثبت ان الطفل المصري اذكى طفل في العالم.. طب فين يا عم البحث ده؟ مين اللي نشره؟ مين المؤسسة اللي عملته؟
موجود موجود
ماشي
بس انا كمان من حقي ارفض الاهانة
الافندي باني افتراضات وهمية قراها في ادب القرن التسعتاشر بتاعهم وعلى اساسها بيدينا اوامر بوصفه البيج براذر والمعاتيه في الجارديان بينشروا له البراز ده
3- الراجل بياكل عيش... ممكن ياكل عيش بعيد عننا؟ احنا مش ناقصينه هو كمان، مش ناقصين واحد يقب لنا في الجارديان ويدينا اوامر ويشوه سمعتنا هنا ويخلي واحد زي غضب الله كمان يستغل مقاله ده عشان يتهمنا بالعمالة لمجرد ان افندي حمار مش فاهم طظ من سبحان الله عنده غازات فكرية على اثر قراءة بيض ممشش في الادب الانجليزي
وعليه
طبعا احنا مش حنوصل للجارديان، ولا حنطالب بمنعه بسبب غباءه زي ما وائل خليل اقترح، لاننا لو حنمنع الاغبيا كان زمان نص العالم اخدوا اعدام
بس احنا لازم نتنبه للناس اللي بتاكل عيش في بلدها على قفانا ونديهم على قفاهم اول باول
وبناء عليه قولوا ورايا:
خيط بقك يا مايتون انت الابعد ما بتفهمش حاجة في حياتك
ومن هنا ورايح اي فتاي يفتح بقه يطلع تلاتة.. احنا مش ناقصين، الناس تتعجن في الشارع وكمان نلاقي اللي فاتح دكاكين واكشاك على قفانا

7 comments:

بهيج الشرير said...

شفتيني ياأبلتي وأنا باطاهر الواد جوزيف مايتون

Wild at Heart said...

أنا مش شايفة إن في أي إشارات عنصرية في مقاله، بس هو عايزنا نقلد غاندي في الكفاح غير المسلح...وهو حد كان قال له إننا نزلنا المظاهرات بالسنج والمطاوي؟ حاجة تانية إن الأفرو-أمريكيين قاطعوا الأتوبيسات، يعني عايزنا نقاطع الحكومة إزاي يعني؟ عايز عمال غزل المحلة ييجوا مشي لحد القاهرة عشان يعتصموا؟ كلامه مش منطقي.

Unknown said...

I cant believe someone else is watching the Korea TV ! :) i salute you Nawwara:)
Did you see Princes Jamyung???
sorry to not comment about the topic of the blog itself, but i am just amazed that someone else knows about this:)
After seeing Princes Jamyung i have a probelms watching any other series eitehr arabic or western! now i love only Korean drama :)

مواطن مصري said...

اشتباكات بين نواب الإخوان والوطنى.."القصاص" و"حميدة" و"أبو عقرب" يطالبون بإطلاق النار على المتظاهرين.. و"البلتاجى" و"حسن" و"عامر" يهاجمون"الداخلية"
http://www.youm7.com/News.asp?NewsID=216059&SecID=12

شمس العصارى said...

زى ما قلتى ارزاق
الا بذمكتك مش انا بكتب احسن منه
بس هو مفيش فى كلامه عنصرية
ده يصنف من المحلليين السياسيين فى الشرق الاوسط
اى و الله بجد
اصل مفهوم المحلل عندهم انه يكون قرأ كتابين او 3 عن مصر او الشرق الاوسط و فى الغالب الكتب دى بتكون بوجهة نظر غربية برضه
زى المحللين الى بيظهروا فى الميديا الامريكية
يعنى من الاخر بيقول - و بيقولوا - كلام لا يمت لواقع الاحداث كثيرا
يعنى شوفتى مصادره الى هو ذكرها تقارير صحفية و كلام على التويتر
ده من ناحية شكل كلامه
اما من ناحية مضمونه
فهو كلام نظرى بعيد عن واقع مصر
و امثلته الى هو ضربها لا تصح للقياس هنا
لان غاندى كان ضد مستعمر و لوثر كينج كان ضد العنصرية فبسهولة وحد السود ناهيكى طبعا عن طبيعة امريكا الكبيرة و المنفتحة
لكن احنا هنا بنواجه استعمار وطنى يبقى وسائل غاندى و كينج مش حتنفع معنا قوى
ثم واضح من كلامه انه لا يعرف التيارات الموجودة على الساحة المصرية ولا يعرف طبيعة المجتمع المصرى اصلا
مش قلتلك هو محلل سياسى
وخلاصة كلامه انه بطيخ و عايم فى مية البطيخ كمان
بس ايه وجع الدماغ ده
مالنا احنا و مال مايتون
هو انتى فاضية اليومين دول يا نوارة ولا ايه
هههههههههههههههههههههههه

عين فى الجنة said...

ليه يا نوارة معلقتيش على مقاله؟ فى تعليقات جامدة جدا هناك
كان ممكن تعملى اثراء للحوار خصوصا مع اشخاص زى
iruka
وغيرها

Unknown said...

"القصاص" و"حميدة" و"أبو عقرب" يطالبون بإطلاق النار على المتظاهرين..


http://www.youm7.com/News.asp?NewsID=216059&SecID=12