بخصوص ما يسمى بالسلفية

انا ح ارد عليكوا انتوا عشان انتوا تقريبا الوحيدين المتعاطفين مع الفكر السلفي وفي نفس الوقت محترمين ودي حاجة نادرة وشاذة

العادي ان السلفي بلطجي.. دي سمعته

وبما انكوا مش بلطجية احب اقول لكوا وجهة نظري

اولا: اللي بيطلعوا في قناة الناس بالتحديد بيعملوا اخطاء علمية فادحة

زي الخطأ بتاع حسان كده

افترض افتراض غلط وما كلفش نفسه يرجع ويشوف ابو حنيفة خالف في ايه وبنى عليه افتراض تاني خطأ وبرضه ما كلفش نفسه يعرف اذا كان الامام وصله الدليل ورد عليه وللا لا، ودي حاجة مش صعبة، اي شخص عامي زيي يقدر يفتح اي كتاب من الكتب المبسطة اللي موجودة في كل البيوت ويشوف راي ابو حنيفة وخالف الجمهور في ايه ورد على ادلتهم بايه، خصوصا ان الامام ابو حنيفة متأخر يعني اكيد لو خالف اللي قبله حيبقى وصله الادلة اللي وصلتهم ووصله قياسهم والا هو امام ليه؟

لما هو حتى ما كلفش نفسه يقرا المتقدمين عليه ولا يعرف سندهم ايه؟

ثانيا: اسلوبهم بيعتمد على الغاء العقل تماما.. يعني حتشوف في البوست الجديد الحويني وهو بيقول لواحد: لا ما تسألش ولما صمم يسأل وقال له ما معناه حكاية رضاع الكبير دي عيب وتعافها النفس ما ردش عليه قال له: مدام ربنا قال كده يبقى ما تقولش عيب، وده المنهج اللي بيتبعوه طول الوقت، وعشان كده بيكفروا عدد كبير من الناس بما فيهم الاشاعرة لان ماحدش معطل مخه ورافض المناقشة والتحليل والدراسة غيرهم، والتحليل والنظر وراء الاسباب والحكمة ده اساسي في الايمان ماحدش يبقى ماشي طحش كده عسكري امن مركزي في حياته والا دي دعوة للتخلف، ولو الاسلام بيدعو للتخلف امال عمل حضارة قعدت عشر قرون ازاي؟

ده بالنسبة لخطرهم على الافراد وعلى اتباعهم

بالنسبة بقى لخطرهم على الامة

انا كنت قلت انهم بيدعموا الصهيونية، وكنت فاكرة ان ده امر واضح بس يبدو انه مش واضح

طيب

الصهيونية دي بنت النازية، يعني المسوغ الوحيد لوجود الصهيونية هو وجود الفكر النازي

والفكر النازي بيقول الآتي:

اليهود كلهم امة واحدة، لهم صفات جينية معينة، ولهم صفات تاريخية معينة، لا يختلف يهودي عن الاخر

وهتلر استمد الكلام ده من التوراة واعتمد عليه بينما التوراة مافيش عليها اي دليل علمي ولا فيه اي اثر لوقوع القصص اللي حصلت في التوراة في الواقع فعلا ومالهاش تأريخ خالص، وبما ان التوراة كانت بتقول على اليهود الامة الزانية فهو شاف ان دول ناس ولاد كلب كلهم زي بعض لازم كلهم يموتوا، وعليه فكان بيحرقهم، وبسبب انه حرقهم - وده عمل مش انساني ولا محترم ولا يمكن الدفاع عنه - بقى فيه اتجاه ان اليهود بيتعرضوا لقهر كتير ولازم لهم وطن قومي يقعدوا فيه ويحميهم، والله لو احنا وحشين ادينا نقعد مع بعض لو احنا كويسين سيبونا في حالنا

والفكر الصهيوني بالاساس فكر علماني، مش ديني، لكنه برضه اعتمد على وجهة نظر هتلر في القول بان اليهود امة واحدة كلهم لهم صفات معينة وشبه واحد، مافيش حد بقى بين كل المسلمين بيقول الكلام ده غير السلفية

ومافيش مسلم لا يفرق بين الصهيونية واليهودية غير السلفية

والمفروض ان امر طبيعي ان يفرق المسلم بين اليهودية والصهيونية لان اليهود والمسلمين كانوا حلفاء استراتيجيين على مدى عشر قرون وعشان كده اوروبا كانت بتقتل اليهود لانها بتعتبرهم عملاء الدولة الاسلامية، وقتها كانا قوة عظمى بقى كده زي امريكا
ولان السلفية مانعين التفكير والتحليل ودراسة اسباب النزول ولان علماءهم يتميزوا بالجهل فهم بياخدوا اية قرآنية من غير ما يشوفوا اللي قبلها ولا اللي بعدها ولا اسباب نزولها ولا سياقها ولا ما يرد عليها من ايات في القرآن ويقولوا: ربنا اهو بيشتم اليهود

طب قياسا على كده ربنا بيشتم المصريين كمان ليه مش بيقولوا ان ربنا بيشتم المصريين وان المصريين لازم يموتوا كلهم

ولو قتل اليهود جميعا واجب لسبقهم اليه الخلفاء الراشدين وللا هم بيفهموا احسن منهم

ثم احنا مش حنتقل اليهود كلهم، بس هم بيقولوا الكلام ده وبيقولوا كلام نازي كتير غيره ومالوش علاقة بالاسلام زي الاستشهاد بهتلر ومش بيعملوا حاجة غير انهم يثبتوا اللي اسرائيل عايزة تثبته بقالها ستين سنة ومش عارفة ان المسلمين تعاونوا مع النازي

والتاريخ شاهد على ان الصهاينة هم اللي تعاونوا مع النازي

ماحدش بيثبت كلامهم غير السلفيين

هم كمان بيعمدوا الى التفريق والتكفير وخلق مجموعة استعلائية اقرب للفكر الصهيوني منه الى اي فكر

ده اللي حصل مع اليهود قبل كده وده اللي بيحصل معانا دلوقت، انا مش حاتكلم عن تاريخ تأسيسهم، انا حاتكلم عن دورهم

دلوقت هم دورهم التفريق وشق الصف باقصى ما يملكوا من قوة

يعني بيضربوا المقاومة الوطنية من خلال تعبئة المسلمين بالكراهية ضد المواطنين اللي معاهم من دين تاني، وعليه فالمواطنين حيحسوا انهم مش منتمين لوطن اغلبه ناس بتكرههم وتقصيهم، يعني مش حيبقى فيه اي عمل وطني ولا مقاومة وطنية وبالعكس، الامر الطبيعي اني لما ابقى عايشة في مجتمع بيقصيني اني كمان اروح الجأ لمجتمع تاني بيحترمني ولو كان مجتمع الاعداء

يعني زي ما يهود اوروبا تعاونوا مع المسلمين بسبب اقصاء المجتمع الاوروبي لهم

ما تلومش على مسيحي عايش في دولة مسلمة لما يتعاون مع امريكا وانت بتقصيه وبتحسسه ان البلد مش بلده، ومافيش مجهود مبذول من السلفية قد انهم طول الوقت يحسسوا المسيحيين ان البلد مش بلدهم، ومش المشكلة المسيحيين اللي واقفين في زور ناس كتير، المشكلة انك بتضرب التضامن الوطني وبتكسر المجتمع لفتافيت عشان لما اسرائيل تحتلنا

- وهي عايزة تحتلنا على فكرة لو ما كنتش تعرف -

ما يبقاش فيه اي مقاومة وطنية

ليه؟

عشان انا ما احاربش مع نصراني عابد صليب
وما احاربش مع اشعري على بدعة

وما احاربش مع متصوف مشرك

إلخ إلخ إلخ

وللاسف ده اللي عملوه في العراق وبسببهم حصلت الحرب الاهلية اللي انت شايفها، العراق قبل دخولهم كانت الفالوجة والنجف بيحاربوا مع بعض، بمجرد ما دخلوا حصلت الفتنة بين السنة والشيعة

وعلى سيرة الشيعة

يا سلام بقى، مافيش خدمة للصهيونية اكتر من انك تقول الشيعة كفار وبيضطهدوا السنة ههههههههه طب الشيعة دول اقلية، حيتضطهدوا الاغلبية ازاي؟ الشيعة دايما عندهم رغبة لاخذ الاعتراف مننا والعمل معانا، انا عمري ما شفت سني بيطلب من شيعي تقريب المذاهب.. الشيعة دايما هم اللي بيطلبوا ده، يعني هم بس ما اكتفوش بضرب المقاومة الوطنية، لا هم كمان بيضربوا اي محاولة لتوحيد الصف الاسلامي

بص
الشيعة مسلمين سواء انت او الحويني او اي حد تاني رضي ام ابى، هم متسجلين في تعداد العالم مسلمين ومحسوبين على المسلمين وبينضربوا بالقنابل معانا

بقت ايه قضية السلفية دلوقت؟ ااخر حاجة بيفكروا فيها مقاومة الاحتلال او التصدي للحاكم الظالم

كل همهم التصدي لعباد الصليب والروافض

وعباد الصليب والروافض دول هم المخزون الاستراتيجي للسنة اذا حبوا يعملوا مقاومة وطنية ضد الاحتلال او ثورة على الحاكم الظالم

وتفريقهم واشعال الفتن ما بينا وبينهم ما يخدمش غير اسرائيل والحاكم الظالم

والحاكم الظالم كمان سعيد بالسلفية وعشان كده الامن بيشغلهم وبينشرهم في الجوامع لانهم بيقولوا بحرمة الثورة على الحاكم وحرمة الجهاد بغير امام سني

وبالنسبة لهم اي حد مش تبعهم يبقى مش سني

اه فيه حاجة تانية نسيت اقولها

خلق مجموعة "الفرقة الناجية" ده تفكير صهيوني، وانا مش عايزة عشان احنا بنتعرض للاضطهاد اننا نكون فكر صهيوني داخل الاسلام، الواحد بس يقرا التاريخ عشان يعرف ان الامم اللي بتتعرض للاضطهاد والاتهام طول الوقت اولا بتقتنع بالتهم اللي بيرميها بيها اعداءها ثانيا بتتصرف على اساسها وبتعمل عنصرية مضادة وده اللي سلفيين بيعملوه

وده اللي عمله الصهاينة قبلنا واليهود ما لحقوش نفسهم وبيضربوا نفسهم بالجزمة دلوقت، والوهم بان اليهود علا نجمهم ده وهم خرافي

مش معنى ان عندهم قوة نووية يبقى لهم اي نجم

اليهود دلوقت بالفعل مكروهين من العالم وبقى اليهودي مضطر طول الوقت يقول: انا يهودي بس مش صهيوني، طب انا اسرائيلي بس مش معنى كده اني مش انسان

يعني هتلر نجح - من خلال الصهيونية - انه يثبت صحة الفكر النازي، وانه ينشر افكاره ويكره الناس في اليهود مهما السياسيين دافعوا عن اسرائيل يظل الرأي العام كاره لليهود

احنا لازم نبقى واعيين ليحصل لنا كده، احنا ممكن يحصل لنا زي اليهود، ونعمل حركة عنصرية كارهه للبشر، اقصائية، تكفيرية، ذكورية وبالطريقة دي القوى الامبريالية ومؤسسة ميمري والصهيونية وامريكا كده نجحوا في انهم يثبتوا صحة اتهاماتهم لينا من خلالنا احنا، خصوصا ان اصحاب الفكر ده بيدعوا انهم هم الوحيدين الممثلين للاسلام الصحيح، وهم اللي على المحجة البيضاء، وهم اللي بياخدوا من منابع صافية بعيدا عن الخرافات والبدع.. اي حد يجتهد اي اجتهاد من الاقدمين وحتى المحدثين يبقى صاحب بدعة وخرافة، يعني بقالنا 1300 سنة على بدعة وخرافة وماحدش اكتشف الذرة غيرهم؟ ماهو نفس الفكر الصهيوني اللي عايزين يقنعوا العالم ان اليهودية كانت غلط بقالها تلاتلاف سنة وماحدش عرف فولة اليهودية الحقة غيرهم

وانا مش عايزة اجرح في حد، بس معروف المجموعات اللي خلقها الاحتلال الانجليزي كلهم واحدة واحدة ومجموعة مجموعة ومن ضمنها الفكر ده اللي بيسموه سلفي، وده خلط كبير لانه مش فكر سلفي، ابن القيم سلفي، وابن القيم مش زيهم، بل بيخطأوه وبيخطأوا حتى ابن تيمية، اي حد ما يمشيش تبع مزاجهم يبقى غلطان او اختلط عليه الامر او قياسه قياس فاسد

اكبر انتصار لاعداءنا اننا نأكد كلامهم ونثبته علينا من خلال سلوكنا

----------------

بناء على طلب مهندس حر نقلت التعليق لبوست، والتعليق ده كنت بارد بيه على اتنين سلفيين كانوا - وياللعجب - مؤدبين ومحترمين وبيتكلموا بشكل عقلاني

----------

بالنسبة للكتب، فيه كتاب اسمه تجارة الهولوكوست لنورمان فنلكستاين وفيه كتب كتير عن نشأة الصهيونية، ياريت لو تقرا بس كتاب تجارة الهولوكوست وتطلع له في نقط وتقارن

-----------

بالنسبة للمصادرة على حرية الرأي فده كان ردي على ايهاب - واحد من الاتنين المحترمين - لما قال لي انت بتعادي السلفية: 

والله العظيم انا مش عايزة اناصب اي حد العداء

مش ممكن ابقى ضد التفريق والفتن وابقى عايزة اني اجتزئ مجموعة لها فكر مختلف واناصبها العداء

انا كل اللي عايزاه منهم حاجتين:

اولا ان اللي بيسمع حاجة يشغل مخه، فيه حديث عن الرسول مش فاكرة نصه لكن فاكرة معناه انه بيقول الحاجة اللي تسمعوها عني وتعافها انفسكم اعرفوا اني انا ابعد الناس عنها بمعنى ان الرسول مش ممكن يجانب الفطرة السليمة

ثانيا: انهم يبطلوا يستعدوا الناس على بعضها ويبطلوا تكبر واستعلاء وكأن هم بس المسلمين واللي يعرفوا الصح واللي اكتشفوا الذرة وغيرهم يا اما يستحقوا الشفقة او العداء

ويركزوا على اولويات الامة بدل التركيز على خلق جيتو الفرقة الناجية


بالنسبة لكلامك

انا مش عايزة اي حاجة من اي حد غير اللي انت بتقوله ده

ان الواحد ما يمشيش ورا كلام حد، هو يقرا بنفسه ويبحث ويفكر ويقرر ونختلف او نتفق المهم نتبادل الاحترام ونكون متفقين على الاولوليات على الاقل

فيه حد مختلف هنا عن ان الصهيونية هي اكبر خطر علينا كلنا كسكان للمنطقة بصرف النظر عن دينا؟

فيه حد مختلف على عدم شرعية الاحتلال الامريكي؟

فيه حد مختلف على عدم شرعية الحكام الظلمة؟ وان مافيش خدمة للصهيونية والاحتلال قد وجود الحكام الظلمة على راسنا؟

غير كده كل انسان حر يفكر زي ماهو عايز

والمختلفين معايا في التلات حاجات دول برضه هم احرار بس معلش بقى هم من سكة وانا من سكة تانية وكل واحد ربنا يسهل له، وانا ممكن اتضامن مع حد متفق معايا في التلات نقاط دول بصرف النظر عن دينه او جنسيته او لونه او طوله او عرضه، ولو ليا اخت توأم ومش مدية اولوية لخطر الصهيونية والاحتلال والتصدي للحكام الظالم ما اعرفهاش تاني

آز سيبمل آز ذات.. انا ما قلتش اقتلها.. بس ما اعرفهاش تاني انا حرة

وايوة اناصب العداء لكل من يلفت نظر الناس ويشتتهم عن التلات اولوليات دول، وانا حاطاهم بالترتيب من حيث الاولوية لكن من حيث القدرة على التغيير يبقى الترتيب كده

1- الحاكم الظالم

2- التصدي للصهيونية

3- التصدي للامبريالية العالمية المتمثلة في القوة الامريكية

لان اقواهم من تحت لفوق، ولذلك تغييرهم لازم يتم من فوق لتحت، وتغييرهم واجب على كل انسان بيحترم نفسه، وتغييرهم ممكن، العالم مش طول عمره كده

واول خطوات تغييرهم هو مخالفتهم.. مش ده كلام الرسول؟ لازم تخالفهم في اخلاقهم وافكارهم ومنهجهم ومسلكهم وطريقتهم عشان يبقى لك عين تتهمهم، مش ممكن تبقى راسمالي وضد امريكا، مش ممكن تبقى عنصري وبتحقر غيرك وضد الصهيونية مش ممكن تبقى ظالم وتبقى ضد الحاكم الظالم، مش ممكن تبقى داعي للفتنة  والفرقة والتكفير وتدعي انك مش بتخدم مصالحهم، بعلمك او غير علمك انت عميل لهم لما بتعمل كده

تاني خطوة، انك تبتدي تحط نفسك مكانهم عشان تعرف هم بيفكروا ازاي، وازاي تدحض منطقهم من جوة منطقهم نفسه زي ما سيدنا ابراهيم عمل
تالت خطوة.. الله المستعان