Monday 25 April 2011

ودي رسالة من تونس.. يادين النبي

انا كنت قلت الشعوب العربية لازم تنسق مع بعض ونعمل جامعة الشعوب العربية بدل جامعة الدول العربية
اول تنسيق نعمله ان ماحدش يقوم بثورة قبل ما زميله يخلص ثورته بقى.. احنا كده مش حنلاحق، وبعدين احنا ثوراتنا فيها غباوات وقتل وقرف، فعلى الاقل بقى كل واحد يهدا كده وقبل ما يعمل الثورة بتاعته يستأذن زمايله احسن يكون فيهم حد مش مستعد
تونس الظرف فيها صعب
واحنا اعتبرنا ان الثورة بتاعتهم نجحت وانشغلنا في بقية القتلا اللي عندنا دول
ودي رسالة من تونس:
طيب
انتوا قريتوا البوست
اقروه كويس
احب بقى اقول للاخ التونسي، اننا لازم ننسق مع بعض فعلا، لإن عندنا مشاكل كتير من اللي هو حاططها، بس الشهادة لله احنا فعلا مشاكلنا اقل
يعني مثلا احنا بنحاكم مبارك وشلته
بس ديول مبارك اكبر مما يتخيل الاخ التونسي
اقصد قصاد ما احنا حاكمنا مبارك هم ما عندهمش مظاهرة اسفين يا ريس مثلا، ودول هم الصراصير اللي لو مبارك اتحاكم حيجيبهم شاءوا ام ابوا
بالنسبة لان رئيس الجمهورية هو رئيس مجلس الشعب السابق عندهم، وهو ما يوازي فتحي سرور عندنا، وهو زي فتحي السرور قلبا وقالبا، يعني مش مجرد بيشغل نفس وظيفته، لكن مكانه السجن هو كمان زي فتحي سرور
فاحنا فعلا وضعنا احسن، ايا كان اللي بيتلووا على المجلس العسكري، فهم الشهادة لله ناس عوجة يعني، بصرف النظر عن الشرطة العسكرية، لان دي حتبقى في نقطة تانية هو اتكلم فيها، بس اللي اقصده ان المجلس العسكري هو سلطة الجيش اللي تبقى موجودة في اي بلد المفروض انها بلد حرب، وهو جاب لنا حكومة عصام شرف، وانا شخصيا مبسوطة جدا من الحكومة دي، ومرتاحة لأدائها، وباحب عصام شرف، وانا بصراحة سمعت السبسي وهو بيتكلم وشتمته على التويتر لما اتكلم وبعدين واحدة تونسية كبستني وقالت لي لا هو كويس، فسكت بقى، مافيش داعي امرر عليها عيشتها مدام بتحبه
بس انا ما عجبنيش خالص
بس احنا كمان عندنا جدل العلمانية والاسلامية ده ومتجاهلين استحقاقات الثورة
يعني مثلا عندنا نجيب ساويرس عمل حزب، مع ان الثورة دي قامت ضد سيطرة رجال الاعمال على الحكم، والناس كلها مش بتتكلم في النقطة دي، الناس كلها بتتكلم ان النزاع علماني ولا اسلامي، واحنا خايفين جدا من البرلمان، لإن الصراع ده معناه ان حقوق الفقرا حتضيع، يعني لا ساويرس ولا الاسلاميين حيتكلموا عن الضريبة التصاعدية ولا عن منع الاستثمار في مجال التعليم والصحة ولا عن حقوق العمال والفلاحين - ساويريس عايز يلغي العمال والفلاحين، ولو يطول يعمل عبودية جديدة مش حيقول لا - ولا عن الحد الادنى والاقصى للاجور
الاسلاميين حيتكلموا عن المادة التانية 
وساويرس حيعيد سيطرة رجال الاعمال على نظام الحكم وكأنك يابو زيد ما غزيت
- ييجي واحد يقول لي ابوكي دخل الحزب بتاعه اقوله وانا مالي؟ اتصلوا بيه وطلعوه من الحزب ده، انا شخصيا اتخانقت معاه - 
انتوا مثلا ما عندكوش فتن طائفية، احنا كل شوية الفتن الطائفية تطلع لنا من تحت طقاطيق الارض
بالنسبة للحزب الوطني، هو فعلا اتحل، بس بتوع الحزب الوطني لسه شغالين، زي عندكم بالظبط
ايه العمل؟
انا شايفة اننا ننسق مع بعض ودي احسن حاجة
احنا حتى الحكومة بتاعتنا اللي احنا بنحبها قاعد فيها يحيى الجمل الطود الراسخ بلا اي مناسبة، وده راجل بتاع السادات ومبارك مش بس بتاع مبارك
بالنسبة للقمع.. احنا عندنا شرطة عسكرية كمان وبيضربوا الاعتصامات وبيفضوها وبيضربوا نار في الهوا كمان.. انتوا مش عارفين ولا ايه؟
نعمل ايه بقى؟
عموما احنا لازم نشتغل مع بعض، اقصد ان مصر وتونس عندهم مشاكل متشابهة، وعندنا استحقاقات واحدة كمان، محتاجين زي ما اجهزة الاستخبارات الاستبدادية كده بتنسق مع بعضها وترفع لنا علم السعودية في قنا، محتاجين بقى احنا في مصر وتونس اننا ننسق مع بعض ونشتغل مع بعض ونشوف اوجه التشابه والاختلاف وازاي نقدر نتغلب عليها
يعني مثلا عايزين نعرف انتوا ليه ما عندكوش ناس بيقولوا لكم كفاية او بيقولوا اسفين يا ريس
انا مش حاقدر انكر ان الوضع في مصر احسن من الوضع في تونس من حيث التطهير والتنضيف والتخلص من رموز النظام السابق ومحاكمة الرئيس وكمان ان اللي ماسك المجلس العسكري اللي هو متعاطف مع الثورة مش متدبس فيها، وحكومة الثورة بتاعة عصام شرف وهو كان بايت معانا في الميدان
لكن من حيث التجانس المجتمعي ومن حيث النشاط والوحدة انتوا احسن منا 
بالنسبة للاعلام، احنا الاتنين زي بعض، وبالنسبة للفصائل السياسة انا شايفة انكم احسن منا، على الاقل ما عندكوش ساويرس، كمان الاسلاميين اللي عندكم احسن بكتير من الاسلاميين اللي عندنا، اقصد مخهم نور عن اللي عندنا، اكيد مش بيتخانقوا على كاميليا شحاتة يعني
يبقى مافيش غير اننا نستفيد من خبرات بعض ونساعد بعض بقى، عشان احنا كمان محتاجين مشورتكم في حاجات كتير
بس شوية كده
اصل احنا وانتوا بصراحة دمنا حيبقى سم قوي لما نتكلم الكلام ده وفيه ناس بتموت في بقية الدول العربية
يعني مثلا احنا مش عارفين نعمل اي حاجة لليبيا، ده ليبيا طالع عينها يا عيني
غير سوريا، وغير البحرين دي اللي قاعدين على صدرها وكاتمين على نفسها عشان اللي بيموتوا شيعة فحلال حلال حلال... اليمن دلوقت بقت احسن وضع في وسط التانيين مع ان كل يوم يموت منهم حبة حلوين
ملحوظة: انتوا فاهميني؟ اقصد التوانسة فاهمين اللهجة؟ اصل السوريين مش فاهميني وانا استغربت قوي وتميم البرغوثي قال لي دول بيزعلوا منك عشان فاكرينك بتتخانقي وانا عمال اقولهم مش بتتخانق هي اللهجة شكلها كده
والله ما باتخانق ايها الاخوة في سوريا.. تقبروني ولاد عمي 
:)

33 comments:

Unknown said...

I like what u said.I agree with u.

Amal said...

يا نوارة والله فكرة عظيمة ان يتم عمل حاجة زي مجلس تنسيقى او حتى مجلس لتبادل الافكار بين شباب الثورة في كل بلد عربي .. وان شاء الله نخلص من صالح قريب جدا عشان ننضم لكم وناخذ من تجربتكم

Mohamed Mahmoud said...

السبب يانواره ان السبب اللي مخلي في تونس اللي هما فيه ان النظام لم يسقط بعد. كان من الافضل ان تستمر ثورتهم حتى اسقاط النظام وتسليم السلطه للجيش واسقاط الدستور الحالي والدعوه لانشاء دستور انتقالي وحل الحزب الحاكم ومباحث امن الدوله ثم دستور جديد وانتخابات برلمانيه ورئاسيه تحت اشراف قضائي كامل ومراقبه منظمات حقوق الانسان التونسيه

Heba said...

قلبنا من التوانسة بس احنا همنا كبير و الا انتي لازم تيجي الصعيد عشان تحسي؟ اهل قنا اللي محدش عبرهم بقالهم كذا اسبوع و في الآخر سكتوهم ببرشامة مخدرة و قال ايه تجميد تعيين المحافظ و يعني المحافظة حتفضل من غير مسئول يشوف امورها لمدة 3 شهور ازاى؟!
و بعدين نسيتي المجالس المحلية دي هي اساس الفساد و نهب الاموال و لسة موجودة و الا عايزة افكرك ان مالب اقالة المحافظين و حل المجالس المحلية من المطالب الاساسية للثورة!!
و احنا كمان في اسوان مش عايزين المحافظ و النوبيين بالذات قضيتهم على وشك الانفجار و شرف بيه اهتم فقط ببدو سينا و استعطفهم باكل الكبسة معاهم و مصدر الطرشة للنوبيين و للصعايدة القرفانين من محافظينهم... هو ده مش مشاكل في نظرك.. احنا لسة عندنا مصايب
و يعني مبارك اللي ما اتحبسش لغاية دلوقتي و بيماطلوا عشان ميروحش طره مش حاسةان دي مصيبة؟ و حسين سالم و بطرس الغالي اللي لسة هربانين!!

negmat lail said...

نوارتنا كلنا... ممكن زي ما كنتي بتعملي في الدستور توضبي اي كلام بتكتبيه فيكون قريب من الفصحى... اما عن انك بتتخانقي فبيتهيألي حتى لو بالفصحى ممكن تتفهم انها خناقة بس حيخف تأثير الخناقة شوية

hayat ank said...

عارفه ايه الفرق بين مصر وتونس وليه هم متماسكين علشان النقابات بتاعتهم زى الفل مشزى بتاعتنا خااااااااالص والنقابات دى هى الى قامت بالثوره وهى الى بتطالب بالتطهير وحقوق الناس اما احنا ياعينى علينا كل شويه ننزل الشارع علشان نطالب بحاجه علشان نقاباتنا كرتونيه وعايزه تتنسف هما نقاباتهم شغاله وبتوعيهم وتقولهم فين الصح والغلط فهم ايد واحده واحنا نقاباتنا بتاسف فينا مخانقانه وبتهددنا بقطع ارزاقنا والنقابات الصغيره قبل الكبيره علشان كده احنا كل شويه مظاهرات واعدين فى الشارع على طول والمطالب الفئويه شغاله على ودنه علشانكده طلعت روحى ارهاب النقابات لازم ينقضى عليه من فوق بحلها لانهم بيشتغلونا على سبيل المثال فى نقابه المرشدين السياحيين وبيقولولنا احنا لا نتبع قانون 100 وانما قانون 120 وشويه اشتغالات بشويه اعانات وشويه تهديدات بتحقيقات ورفد وتعليق عضويه وكده يعنى

negmat lail said...

بس على فكرة طريقتك جميلة ودمها خفيف... بس انا برضه اول مرة اقرا لك في الدستور ما كنتش بستوعب بسرعة بعض الحاجات في اسلوبك بس كنت بفهمها بعد شوية ..وانا مصرية ما بالك باه باللي مش مصريين .. وبعدين احنا فاكرين ان كل العرب بيفهمونا بيتهيالي الأجيال الجديدة من الشعوب العربية اللي تربت في فترة انحسار القوة الاعلامية المصرية ايام المخلوع ما بقوش بيفهمونا وده على فكرة عرفته من ناس في بيروت فوجئوا زيك كده ان الشوام بيتفرجوا على المسلسلات السوري و التركي اكتر من المصري عشان المسلسلات المصرية في معظمها مش اد كده زي مسلسلاتهم برضه فعشان ايه يتعبوا نفسهم في فهم لهجة غير لهجتهم وهيه هيه نفس المواضيع والمعالجات

Magdy El-Serafy said...

أرجوكى لا تهينى الصراصير. آسفين يا صراصير

محمد نور الدين said...

ست الكل مساء الخير
شوفي يا النوارة تتحدثين عن التنسيق وأنا قبل قليل وعلى الفيس بوك وعلى صفحات المدونة تقدمت بطلب بسيط هدفه التنسيق. نعم يا النوارة هدفه التنسيق، هدفه تعريف بالثورة في مصر من طرف بنت الثورة. ولما طلبت منك السيرة الذاتية لأنه يوجد مشروع نحن نعمل على تحقيقه . وأنت يا النوارة محور هذا المشروع ولم أشأ أن أشرح أكثر لأن المشروع قد يتحقق وقد لا يتحقق .مرة أخرى الرجاء مكنيني من السيرة الذاتية.
أما بخصوص رسالة الأخ التونسي لقد اطلعت عليها في صفحتك على الفيس بوك ،وقد أثار جملة من التساؤلات كما أثرت أنت أيضا جملة من التساؤلات . لكن رسالة الأخر التونسي فيها ما هو خاص وما هو عام .لما قال أن " الاستقلال الحقيقي وعودة تونس إلى حاضنتها العربية: هذه الجملة يا النوارة لمن يعرف تونس تختزل الكثير و لها علاقة بتاريخ الحركة الوطنية التونسية، لأنه لما نقول الحركة الوطنية التونسية و الحركة العمالية التونسية و الوطنية التونسية و الثورة التونسية، لا تعني إلا شيئا واحد هو الجنوب وأبناء الجنوب الذين اختطفت منهم بورجوازية الساحل الاستقلال وهي بورجوازية فرنكوفونية مستلبة وهذا حديث يطول شرحه.
أما ما هو عام فهو ذلك العتاب التاريخي ، عتاب المغرب للمشرق ، و هو عتاب قديم منذ الأندلس ،لما كان المشارقة يقولون عن كل ما هو قادم من المغرب، أدب كان أو فكر وفن ، كانوا يقولون هذه بضاعتنا ردت إلينا ولهذا أتوجه للأخ التونسي وأقول له ، ومها كانت نوايا النوارة هذه التحفة المصرية الجميلة، وهي دائما صادقة . أقول له، إن المطلوب من المغرب العربي هو العمل على تقديم الفكر العربي بجميع أبعاده بلون مغربي .هذا هو الطريق السليم و الصحيح لأي تكامل عربي وليس في الاستجداء
تحياتي الصادقة

hebaanoor said...

كلام جميل بس المجلس الشعبي الدولي دا هيكون علي النت بردو و لا ايه فعلا ان كانت الحكومات البديله كتير عليها المهام المسندة اليها فلابد من تعاون الشعوب معها و لابد ان يكون للشعوب دور سياسي قوي في بلادهم حتي ينتخبوا من هم أقدر علي توصيل أفكارهم ومطالبهم للحكومات كل حسب متطلبات دولته و ظروفها الجغرافيه والاقتصاديه

محمد نبيل said...

احنا عندنا فى مصر حاجة مهمة جدا ما اتعملتش ألا وهى حظر أعضاء الحزب الوطنى من العمل السياسى ولو حتى لمدة معينة تضمن بناء ديموقراطية سليمة

moo said...

اولا الطريقة
هى مصرى الشهادة لله بس بنرفزة والبوست ده قد عالجها لان الكلام منتتقى وعلى الهادى
ثانيا الاخ التونسى انتم كنتم دائما سباقين لنا ولكن اذ فجأتن لم تكملوا كما اكملنا وطلع النفس عندكوا زى نفس المنتخب بتاعنا والظاهر الناس بتوع سيبونا نشوف اكل عيشنا عندكوا اكلوا ودانكوا ورجعوكوا خطوات للوراء بس ملحوقه وزى ما مشينا على خطاويكم
زمان امشوا انتم على خطواتنا الان ونفذوا جمعات تطهير و محاكمة للنظام واخرى لتطهير البلد من الفلول ولا تنسوا ان من السذاجة ان تقوم ثورة وتترك اهدافها ليحققها من قامت ضده
ثالثا الى نوارة اللينكات دى بتقول ان الاسد كان يقدر يصد الضربة الجوية الاسرائيلية على ما اطلق عليه مفاعل نووى ولكنه اختار ان ياخذ على قفاه ولم يحرك ساكنا وكمان انه له يد فى قتل رجل حزب الله عماد مغنية
http://wikileaks-a.blogspot.com/2010/12/blog-post_3122.html

http://wikileaks-a.blogspot.com/2011/04/blog-post_18.html
ده كده ماطلعش اسد ده طلع فأر مع الإعتذار لميكى ماوس

محمد القاوي said...

نفسي يكون في تنسيق بينا وبين تونس بالذات لان البلدين بجد شبه بعض في كل حاجه .. كل حاجه .. بعيد عن اليمن وسوريا وليبيا.. احنا وتونس هنفيد بعض كتير اوي

salma dodin said...

7abeebtee nawara,
belnosba le tunis, el wada3 el mogtama3ee 3andohom a7san le anohom - wana asfa ya3nee we ma7desh yefhamnee ghalat - mothaqafeen.....a2sod en el 7araka el thaqafya ma we2fetsh 3endohom thanya.......sa3ab tela2ee 7ad momken ye2athar 3ala 3o2olhm gamed ya3nee......yemkan dah le 2orbohom men faransa we ray7een gayeen henak.......ma3rafsh! we yemken 3ashan ma3andohmsh aflam keteer 3arabee om el agnabee men el malya masr dee....laken ana be7okom wogoodee fe faransa we ma3reftee fe kteer menhom - ele homa gayeen yedresoo mosh el mawlodeen fe faransa - mothaqafeen away away we ye3rafoo ya3nee eeh seyasa!...3al aqal keda ye3rafo el mostala7at....mesh te2oleelo heya eeh el sheo3ya ye2olek dee el beqyadet el imam el akbar!!...heheheh.
el mohem ana shayfa keda we momken nekhtelef awnetefe2 3ala keda.
belnosba le 7ekayet el lahga; ana azon en el moshkela momken tekoon akbar ma3 tunis......;;metha2aly el shamyee beyfham el masree aktar men el tuinsee........laken beshakal 3am ahal el sham betefham el masree bas yemken lazem tekhafefee shwaya men el ta3abeer el masrya gedan.......aslohom bardo ba2alhom fatra betfarago 3ala drama soreya!!........heheheh......mosh zayena fe flesteen lesa mtab3een!!
salaaaam ya wardet masr!
e7na fel khedma.....3ala tool....bas masr to2mor!!
mola7za keda belnosba la 3omar soliman...ele momken tob2a men falasteen et3azebet 3ala yado naw3ya sa3b tob2a 2a3da 3al net aw bet2ra blogs!!......asdee lazem nefakar newsalohom betaree2a tanya le anahom aslan bemooto khoof men gheer kol dah ya3nee.

7obeeeeeee ela al abad!!

بساطه said...

لو تفتكري يانواره انا كنت اتمنيت معاكي ان يحصل اتحاد باي شكل بينا وبين تونس ينضم اليه كل من ينتصر في ثورته.. دي امنيتي جامعة دول عربيه الدول النضيفه بس.. الي لسه مانضفتش لأ.. تنضف وتيجي اهلا وسهلا..واسفنا لاهل تونس لو كنا اتلهينا عنهم وركزنا بس في المنافسه والاجوال الي بنجبها في بعض .. عاده قديمه:) واتلهينا في سوريا وتونس واليمن والبحرين عشان ماتزعليش ..
على فكره في اشاعه قالت ان في عشر قتلى من الجيش فى سوريامش عارف مدى صحتها .. ومش عارف مين الي قتلهم؟ ربنا يستر

bang887 said...

*********************

ساويرس

*********************

هوّ مش برضه من المتربحين من النظام السابق؟ وكانت تصريحاته ضد الثورة؟

http://www.youtube.com/watch?v=2PU_jUCWnDs

ليه متساب بدون محاكمة؟

dalyanassar_15 said...

أنا لسه كنت بفكر أعمل الحملة دى " حملة الإتحاد العربى الحر" و كنت فعلا ناويه ابتديها بمصر و تونس و كنت عايزه انسق مع ناس من تونس, ياريت لو تقدرى تساعدينى فى ده

Abd Elhamed said...

احنا فعلا عايزين الثوره تبقى متضمنه مع اي ثوره تانيه بتنجح لازم يبقى في قومبه عربيه ولو مفيش قائد دلوأتي زي ما قلتي نعمل مجلس بينا و بين تونس دلوأتي لحد ما بقيت الدول تنجح انشاء الله و بعد كده هيظهر القائد احنا محتاجين واحد العرب كلهم يحبوه سواء مصرى تونسي تركي سعودي سوري مش فرقا المهم لازم قوميه عربيه

Abd Elhamed said...

احنا فعلا عايزين الثوره تبقى متضمنه مع اي ثوره تانيه بتنجح لازم يبقى في قومبه عربيه ولو مفيش قائد دلوأتي زي ما قلتي نعمل مجلس بينا و بين تونس دلوأتي لحد ما بقيت الدول تنجح انشاء الله و بعد كده هيظهر القائد احنا محتاجين واحد العرب كلهم يحبوه سواء مصرى تونسي تركي سعودي سوري مش فرقا المهم لازم قوميه عربيه

Ahmed . M . Abdulrahman said...

نواره انا جالى الرد ده على المدونه و خلى الفار يلعب فى عبى شكل كده بشار حد مقوى قلبه على شعبه مهو مش معقول دا معندوش نظر ولا دم و لا عقل

الثائر السوري يقول...

السلام عليكم
نعجز عن وصف شعورنا تجاه وقفتكم معنا يا اخواني
ونناشد اخواننا بمصر ان يمنعو وصول السفينه الايرانيه المحمله بالسلاح الى سوريا
ونرجو ان تكون الوقفه امام هيئة الامم المتحده والجامعه العربيه للتنديد واتخاذ مواقف ضد النظام البعثي السوري وليست السفارة السفارة لا قيمة لها لانها اساسا لا تمثل الا النظام وهو عبارة عن عصابه ولا يابه بالشعب ولا الديمقراطيه ممكن ان تكون لها فائدة عند حكومات ديمقراطيه وهي بالتاكيد ليست سوريا
ونشكركم من اعماق قلبنا

يا ريت تقوليلى رأيك

__________________________
الى عاوزنى يجينى
http://misr25jan2011.blogspot.com

magda said...

الهجوم علي شخص الدكتور شرف واداء حكومته اصبح شرس جدا وعلي المكشوف حاجة محبطة جدا

أمينة سمير said...

والله المنطقة كلها والحمدلله مولعة
ممكن احنا نشوف ان ده شر لينا لأننا مش هنلاحق نتكلم عن مشاكل مصر ولا تونس ولا عن ثوار ليبيا ولا سوريا ولا اليمن

بس ان شاء الله ده يكون هو الخير

يمكن - والله أعلم - ربنا مقدر كده عشان الامريكان والاسرائيليين ما يلاحقوش يفشلوا أنهي ثورة ولا يسرقوا أية ثورة ،، لو في بلد واحدة هي اللي فيها الثورة هيركزوا عليها عشان يجهضوها ويسرقوها و...و ... الخ

وربنا يشغلهم عن المسلمين جميعا

بس في نقطة نفسي افهم وجهة نظرك فيها : ايه اللي مزعلك من اللي بتسميهم الاسلاميين ؟

كاميليا شحاتة : طيب افرضي انها بجد واحدة مسجونة في الكنيسة وانها بيتعمل لها غسيل مخ ،، افرضي لو ده صحيح مش دي مشكلة كبيرة جدا ؟
وبعدين هما مش بس بيتكلموا عن كاميليا شحاتة ،، وكمان عن سلوى اللي اتقلت عشانها اسلمت وعن وفاء قسطنطين وغيرهم

كانوا متقيدة حريتهم ( زي ما الكل كانت متقيدة حريته ) وجاه الوقت اللي يقولوا فيها مطالبهم )

Hala said...

غريبة كيف السوريين ما فهمو عليكي
اللهجة المصرية كتير مفهومة بسوريا باستثناء بعض الكلمات

الله محيي تونس ومصر
والله ينصر سوريا
يارب ماإلنا غيرك
بصدورنا العارية نواجه دبابتهم
يا رب
كن معنا

فانتوماس said...

اجهزة الاستخبارات الاستبدادية كده بتنسق مع بعضها وترفع لنا علم السعودية في قنا
مش فاهم الجملة دي ممكن ايضاح بعد اذنك؟

Unknown said...

اختنا العزيزة نواره نجم
التنسيق بين الشعوب لعمل ثورات او للاستفادة من تبادل الافكار هيدخلنا في حوار من بيمثل الثورة من يتحدث عنها ولن يفيد فى اى شيئ من وجهة نظرى
لكن هناك حل افضل وهو ان نتابع الاخبار ونقترح حلول ولو بعمل بلوجر اسمه وجهة نظر الكل يشارك وهكذا يكون هناك حوار ووجهات نظر
ويجعلها ثورة نور وتنمية وعدل ويبعد عنها كل حرامى

Unknown said...

http://www.facebook.com/event.php?eid=221544074525591

if u wanna help tunis :))) plz help :)))

Unknown said...

http://www.facebook.com/event.php?eid=221544074525591

if u want to help tunis :)) plz share :))

Mohamed Nida said...

بالنسبة لساويرس فهو ذكي وخلاني اكتشف مدى غباء الشعب بتاعنا الأهبل اللي ع نياته
ده واحد جري يعمل حوار مع عمر سليمان وقال للناس كفاية كدة وكان واحد من رجال النظام بغض النظر عن عدم وجوده في الحزب والكلام انه مضطهد وعندك مرتضى عبرة تناه بشتم وبتاع وطلع ف الاخر زيهم
كمان تحوم الشبهات حول تمويل جريدته الأمريكي وكمان تلمعه الصحافة الأمريكية بوصفه المنحاز لمحدودي الخل وبصانع الملوك
غير ده كله قطع الاتصالات فساهم في قتل شبابنا وتجب محاكمته
وف الاخر جرنانه وقناته يكسبوا كل حاجة ولما يعمل حزب يلم كبارات البلد واللي المفروض بيتقال عليهم مثقفين هم نسيوا عمل ايه ولا بيطنشوا وانضموا عشان الوحدة الوطنية !!!
يلعن أبو دي وحدة لو جت صوري عشان تغطي ع فساد كدة كدة مش فارقة هم أناس أغبياء

Unknown said...

http://www.facebook.com/event.php?eid=221544074525591 help tunis :))

alaeldin said...

اعتقد ان اختلاف الثقافة التونسية عن الثقافه المصريه واختلاف عدد السكان في تونس عن عدد السكان في مصر واختلاف المستوي الاجتماعي ومتوسط فرد الدخل بين مصر وتونسي والاختلاف الجغرافي بمعني ان مصر لها حدود مع عدو اسرائيلي مما يجعل هناك الكثير من التعقيدات سواء بشكل مباشر او غير مباشر في اتخاذ بعض القرارات بعكس تونس أعتقد ان كل الاسباب دي تجعل المقارنه بين ثورة مصر وثورة تونس أمر عديم الجدوي لان كلا من تونس ومصر تتخذ القرارات التي تتناسب مع ظروف كلا منهم قد تتفوق تونس في أمر يصعب تطبيقه في مصر لاحد الاسباب التي سبق ذكرها وقد تتفوق مصر في اتخاذ قرار يصعب اتخاذه في تونس ايضا وأعتقد بوجه عام ظروف تونس كدولة افضل من ظروف مصر سواء من الناحيه الاقتصاديه او الاجتماعية

Unknown said...

http://www.facebook.com/event.php?eid=221544074525591 help tunis :))

مولاى صلى و سلم دائما أبدا على حبيبك خير الخلق كلهم said...

الوضع معقد فى الدولتين و المجلس العسكرى أنا شايف له مزايا و معانا بس له عيوب زى إنكار الأخطاء و مع الإعلام القذر المجلس حيبقى ديكتاتور جديد , الكلمة الأهم اللى وجعتنى فى مقالة التونسى العزيز إن معندهمش لا إبراهيم عيسى ولا غيره و دى فعلا مشكلة كبيرة
أقترح مبدئيا عم إئتلاف عام أو صفحة على الفيسبوك للتواصل و ممكن إئتلافات مغلقة عشان متلمش يعنى مثلا مدونين مع بعض , إقتصاديين مع بعض , كده يعنى

احلام جوليا said...

لا مش سم ولا حاجة احنا اولى نتعاضد ونساعد بعض في الوقت ده بالذات لان زي ما انت شايفة باقي الدول الي ضد الثورات وخايفين توصل لهم بينسقوا بينهم ويؤدوا الثورات الي لسه ناشئة زي سوريا واليمن وغيرهم وكمان بيحاولوا يبوظوا الثورات الي نجحت في ازاحة رؤوس الانظمة بمحاولةعدم محاكمة الانظمة المستبدة يعني ده احسن وقت للتنسيق وتبادل الخبرات اسمحي لي