Saturday 30 April 2011

شرف الاخوان زي عود الكبريت

هم الاخوان المسلمين بيلعبوا مع السلفيين ليه؟ والموضوع ابتدا يتطور وبقوا يلعبوا عروسة وعريس قدامنا لما حياءنا اتخدش
احنا مش قلنا كخ كده كخ؟
حتندموا ندامة الكسعي لما غدت منه مطلقة النوار
فيه اخطار واضرار كخ كخ كخ
1- الاخوان عاملين زي النشافة، لما بيلزقوا في حد بيطبع عليهم ويبقوا شبهه، وفي الحالة دي الوسطية اللي بيتكلموا عنها، وهي مكسبهم الوحيد قصاد السلفية، حيخسروها
2- اذا لم يتماهى الاخوان مع السلفية الناس طبيعي حتروح للاكثر راديكالية عشان هي دي بقى الثورية والاخوان حيضطروا يزايدوا في الراديكالية عشان يكسبوا مقاعد في البرلمان، دلوقت السلفيين محتاجين عدد الاخوان، بس لو فضل الاخوان يدعموا الخطاب السلفي، في البرلمان السلفيين حيبقى لهم اليد العليا ويبقوا يقابلوني بقى ساعتها لو عرفوا يسيطروا عليهم، ويخرجوا من ذل مبارك يخشوا على ذل السلفيين، والسلفيين حيحسوا بالخطر من الاخوان فحيتغدوا بيهم قبل ما الاخوان يتعشوا بيهم
3- انتوا بتئذوا السلفيين كده، وبتدعموا الخطاب الاعلامي الناري ضدهم، السلفيين لما بطنهم بتتملي بيتكرعوا تكريعة تجيب لآخر الشارع، ولما حيلاقوا عدد الاخوان وراهم ودنهم حتتخن واهم راحوا يتهجموا على الكاتدرائية امبارح، ويقول لك احنا ما مارسناش عنف، مع ان فعل التظاهر قدام دار عبادة للترويع ده في حد ذاته عنف، واذا كانوا ما عندهمش تقدير سليم لما هو عنيف وما هو غير عنيف، يبقى التطور الطبيعي للحاجة الساقعة حيبقى خارج سيطرة الاخوان... انتوا ما بتتعلموش؟ مش كفاية اللي حصل مع الجهاد؟
4- وبتئذوا نفسكم كمان، دي اول تجربة لكم وانتوا مش محظورة، ولما الناس تشوفكم اول ما خرجتم من اطار المحظورة لاطار اللا محظورة بتتحالفوا مع ناس بتتظاهر قدام الكاتدرائية يبقى بتدعموا كل خطاب مبارك اللي كان ضدكم طول تلاتين سنة، واول حاجة الناس حيقولوها: اهم بانوا على حقيقتهم اهم.. لا وسطيين ولا نيلة
5- لون السلفية مش لايق عليكم.. السلفية بيليق عليها الوان تانية، وغالبا بيبقوا احسن لما بيبقوا لوحدهم كده، ادوهم للجيش واتحالفوا انتوا مع حد تبانوا جنبه انكم ناس طيبة ومتسامحة وكل المخاوف اللي كان بيبثها مبارك ضدكم طلعت كدب
ولما باقول ادوهم للجيش انا مش باهزر، هم لازم يتحركوا في اطار قيادة، وقيادة حكومي كده، غير كده عيارهم بيفلت، ولما عيارهم بيفلت بيجيبوا ضرف اللي هم متحالفين معاه قبل ما يجيبوا ضرف نفسهم
انتوا بتليقوا على اليساريين، بيخلوكوا تتكلموا في قضايا كويسة وقريبة من الناس، وبتقدموا خطاب مجتمعي كويس، واليساريين بيكسبوا ان قضيتهم بتتروج، وانتوا بتكسبوا ان شكلكم بيبقى حلو
اديني جبت لكم من الآخر اهو، وبمنتهى الوضوح والصراحة عشان انا ما احبلكمش الاذية
برضه كنتوا جدعان في الميدان
والله الموفق 

93 comments:

aly said...

موضوع التحريض والوقيعة بين السلفيين والاخوان مش هاكلمك فيه هم احرار ولهم عقلهم الاتنين

انا بس مش فاهم تسامح حضرتك مع مظاهرة جبرائيل صعب اللي ادعى فيها ان المسلمين بيخطفوا بنات المسيحيين ويجبروهم على الاسلام من 4 ايام وتسمحك مع تشدد الكنيسة ورفضها حل موضوع كاميليا ووفاء والحل تافه لو الكنيسة مش دولة داخل الدولة
في نفس الوقت اللي بتقولي فيه التظاهر قدام الكنيسة عنف

أما اليساريين اللي بتقولي انهم بيقولوا كلام قريب للناس تبقى بتحلمي
ولو شايفة مصلحة الاخوان مع اليساريين ياريت تقنعي اليساريين يبطلوا شتيمة وقلة ادب على الاخوان الاول ويخلوا حوارهم محترم وبعدين تبقى تغري الاخوان بالتحالف معاهم

كلمة اخيرة لما كلنا بنقول الميدان كان هناك يساريين وسلفيين واخوان ومسيحيين وبعد موضوع اتعديلات تقريبا كل واحد ابتدى يدور على مصلحته من وجهة نظره والحقيقة كلهم كانت مصلحتهم مهاجمة الاسلاميين سلفيين واخوان

بيتهيالي ان اللي حضرتك بتقوليه ده مافيهوش أي منطق (نسيت انك بتفضلي الكلام البلدي المباشر...كلامك هبل)

aly said...

نسيت اسالك عن علاقة الدولة المدنية والحرية وسيادة القانون وكل الشعارات اللي بتقولوها دي بموضوع كاميليا ووفاء وغيرهم ؟ ولا كرامة الباب خاطف النساء اهم؟
وياترى ماسمعناش صوتكم ليه في موضوع قتل سلوى الله يرحمها؟

Unknown said...

كأننا في غابه!!! ورجعنا لنفس نبرة التخوين :\
االي مش فاهم اللي حواليه وتربس راسو على فكره معينه دي مشكلته هو

Alok Ray said...

انا عارف ان الى فارق معاكى القضايا الاجتماعيه بس من الاخر مفيش يسار فى مصر علشان حد يتحالف معاه .حتى بقايهم ركبت الموجه الامريكيه وبيقولو ليبراليه واقتصاد السوق والكلام ده . بس على العموم انا اعتقد ان الاخوان بالذات ضد الراسماليه المتوحشه ومعاهم ناس كتير من المفكريين هما بس ماكنوش ظاهريين ف الكام سنه الاخيره . اما موضوع السلفيين فاصلا هما ملهومشى تنظيم سياسى ولا اى اهتمامات سياسيه والجزء فيهم الى عنده اهتمام سياسى بقى فى ايد الشيخ حافظ سلامه يعنى ميتقلقشى عليه. وعلى فكره المظاهرات دى الى كان منظمها الشيخ حافظ سلامه والصراحه الراجل ده ميتقلقشى منه ولا يتقلق عليه

Unknown said...

ولا كدا عاجب ولا كدا عاجب .... أنا بحب كتاباتك يانوارة ..... لازم التيارات الاسلامية تتحالف كلها مع بعض ..... ده احنا اتذلينا على بال مخليناهم يقعدوا مع بعض ..... و نفهمهم ان كلنا بنعمل كده علشان بلدنا ..... و يبطلوا يشتموا في بعض و الناس تتفرج عليهم و يقولوا الاسلام اهو ...... لازم تعرفي ان السلفيين لو محطوش ايديهم في ايد الاخوان ، الخيار الآخر هيكون اللي اتعودوا عليه و هو الخناقه مع الاخوان .... و الله المستعان

Unknown said...

كأننا في غابه!!! ورجعنا لنفس نبرة التخوين :\
االي مش فاهم اللي حواليه وتربس راسو على فكره معينه دي مشكلته هو

Unknown said...

اليساريين بيقلوا ادبهم فعلا
بس هم من ساعة الثورة وهم نازلين قلة ادب على كل الناس مش سايبين حد
معلش هيستيريا الثورة
الاخوان يجيبوهم كده من ودانهم ويقولوا لهم كخ كده اللي بتعملوه ومش حتربحوا لا ابيض ولا اسود والبرلمان حيتشكل من غيركم
تعالى يا جعيدي ما تخافش

Unknown said...

السلام عليكم

غفر الله يا نوارة!!!!

للأسف من المرات القليلة اللي أجدك تتكلمي فيها بدون موضوعية بالمرة... الموضوع ده مهم جدا.. وما ينفعش فيه التحليلات السطحية دي...

يا ريت تراجعي نفسك في تحليلك... لأنه قائم بدرجة كبيرة على التفتيش في النوايا.. وبالمناسبة لم أعرف عن الإخوان إنهم بيتبنوا موقف معين علشان خاطر فلان أو علان.. هما بيتبنوا فقط اللي هما مقتنعين بيه... وإلا كانوا رضوا النظام البائد من زمااااااان.

تحياتي.

Unknown said...

لا مش لازم التيارات الاسلامية تتحالف مع بعض.. مين اللي قال انه لازم؟ كده خطر عليهم كلهم
وبعدين السلفيين فعلا بقوا شوكة في ضهر الثورة ومحتاجين يتظبطوا، والاخوان اضعف من انهم يظبطوهم
دول الجيش يعفقهم كده ويرسم لهم خطة يمشوا عليها
واكيد خطة الجيش حتبقى انضف واحسن ميت مرة من خطة امن الدولة والسعودية

Unknown said...

تصحيح: غفر الله لك يا نوارة.

deweyes said...

الحل في العك دا ان المسلمين يبطلو هبل ويبطلو اخوان وسلفيين ومش عارف مين.. ويبقو مسلمين وبس.. مينفعش تتعمل تيارات اسلاميه مختلفه لإن الاسلام واحد.. كمان هيقسموا الاسلام!!! افففففف
السياسه دي بقا حاجه تانيه.. تحصل فيها تقسيمات واختلافات ووووو الخ الخ.. لكن مش بإسم الديييييين
مش معنى كلامي اني بقول فصل الدين عن السياسه.. لكن فصدي ان يكون أساس الاختلاف هو السياسات وليس المعتقدات الدينيه
ومش معنى كلامي برضو اني ضد الاخوان او السلفيين.. انا ضد انقسامهم المستفز
وربنا يهديهم يارب ويهدي كل المسلمين ويهدي الأزهر اللي ان شاء الله هو اللي هيجمعنا ان شااااااء الله

ٍShakty said...

الغريب ان اكثر الناس مطالبة بحقوق الانسان والحريات العامة وقيم المواطنة هم الان من يسخرون من كل التيارت الاسلامية
المطالبة بكشف حقيقة كامليا شحاتة... وينتهزون اي فرصه لتحقيق نصر زائف علي السلفيين اما بالسخرية او اتهامهم بالعمالة.

aly said...

تمام أن الاسلاميين كلهم مايندمجوش في كيان واحد هم بطبيعتهم مختلفين

خطة أمن الدولة وفاهمين قصدك
تطلع ايه خطة السعودية دي كمان؟

هو انتي طلعتي منهم؟
والله المستعان على ماتصفون

(abu al-alaa) أبو العلاء said...

الإخوان و اليسار تحالف ممتاز لكن هل يوجد يساريين غير علمانيين؟ (غيرك يعنى انت حالة خاصة). و هل عندما يجد الجد سيفضل اليسار الحديث عن الحريات الشخصية و المتغير و الثابت و امتلاك الحقيقة المطلقة أم سيهتم أكثر بإعادة توزيع الثروة و تحسين التعليم و الصحة.

الحقيقة المرة إن عدد كبير من اليسار ينتمون طبقيا للكبقة المتوسطة و تركيبتهم الإجتماعية هى التى تجعلهم أقرب لليبراليين الذين يجيئون من خلفية اجتماعية مشابهة من الإخوان.

لو على المبادئ إذن الإخوان و اليسار تحالف طبيعى. لكن كما علمنا اليسار المصالح الطبقية تتغلب فى النهاية.

deweyes said...

اه صحيح.. معلش في حاجه كمان عاوزه اقولها.. اممممم لما يكون في مجموعه من البشر بغض النظر بقا هما مين.. وعاوزين يقفوا مع كاميليا ويطالبو بحقها.. المفروض يعني او المقترح يعملوا كدا فين؟ أنا بسأل بس مش بتريق ولا حاجه والله

lastcrazyboys said...

عاجبني قوي التحليل ده

بس انا كنت داخل اقول لك كل سنة وانتي وعمال مصــر كلهم بخير

لقيتك بتتكلمي على الاخوان "المتسلفنين" ومش ملتمسة لهم العذر في ظل الدعايات الاعلامية الهوجاء اللي بتؤكد إن "السيلوفان " بيحفظ الحاجة كذا يوم لما بتطلع م التلاجة

مع ان السلفنة برضه ليها اصووول بس احنا شيعب بيحب ياخد الحاجة كده على مشمهـــا

وبرضه كل سنة وانتي وعمال مصر وفلاحيها بخير

الفئات لأ
واللي بيحبنــا ما يضربش نار

د/دودى said...

اقولها بصوت عالى و بلا خوف ...كتهم نيله هما الاتنين

حسيت الاخوان بيلعبوا معانا اللعبه دى عشان نحس قد ايه هما وسطيين و زى ما واحد صاحبى بيقول ان السلفيين دول هما النجاح العسكرى للاخوان ...مش امتى و الاخوان هما رمز الوسطيه يعنى؟؟بعد ظهور الاسوء طبعا اللى هما السلفيين

تحياتى

عندما ينطق القلم said...

ليس هذا المنطق الذي يحل به العقلاء مشاكلهم، السلفييون شوكة في ظهر الثورة ولازم يتظبطوا. أختلف تمامًا مع هذه المواقف الغير محسوبة من السلفيين ووقفتهم أمام الكاتدرائية وفهمهم السطحي والساذج أحيانًا لبعض القضايا والأمور ولكن للحق أشفق عليهم لعدم تمرسهم في محاورة المخالفين بالشكل العقلي العصري دون تعصب أو إظهار فرض رأي مع أني في موضوع كاميليا ووفاء هذا أتعجب من من موقف الحقوقيين وموقفك أنت يا ست نوارة مع إن الأمر في نظري بسيط أن يخرجا للناس ويتبين هل هما أسلما أم لا وهل حقًّا الكنيسة قد حبستهما أم لا. لماذاا لا يحدث هذا . أليس هذا مريب. يا نوارة قبل أن نتهم الناس ونحاسبهم على الخطأ في مواقفهم نبحث في الأسباب الرئيسية التي دفعتهم لاتخاذ مثل هذه المواقف. " اعدلوا هو أقرب للتقوى".

amorenew said...

السلام عليكم
أنا مؤيد لتيار المسلمين
و بتابع المدونة علشان أعرف الرأي الأخر
بس ممكن أعرف مين صاحب المدونة وليه مش عايز المسلمين يحكموا البلد ليه سبب عداوته لكل حاجة إسلامية
شكرا

Anonymous said...

والله انتى مش فاهمه اى حاجه وشكلك مخك لسع زى بابا الحاج

Khaled said...

الله يرحم السادات كان راجل حل الموضوع كله في خطبة واحدة حدد إقامة البابا المحرض الرئيسي على الفتنة و خلصت

سيادة القانون أمر لا يصح التفاوض عليه أو تأجيله أو المساومة عليه و القانون فوق الجميع بما فيهم البابا و هذا هو الإختبار الحقيقي للثورة

Abeer Ahmed said...

والله معاكى حق
بس مين اللى يسمع
اصلى الغباء صفة اصيلة فى السلفيين وكل مرة بينفذوا اللى النظام عايزة وياخدوا بعد كده على قفاهم ،اصلى السلفيين عاملين زى العيل الصغير لازم حد يوجهه والا هيولع فى بيت اهله
اما الاخوان فكفاية بقى تحسبوها غلط ،احسبوها صح مرة لاجل خاطر النبى ،نفسى اشوفكم مرة ماشيين صح وافرح بيكم
خليكم مع اليساريين علشان هتعملوا شغل حلو مع بعض

Aalaa Elshamy said...

كلامك دايما يعجبني يا أستاذة نوراة ... انا طول عمري بشوف السلفيين للدين بس وفي منهم ايام الثورة شارك بس كان رأي كتير منهم ان كفر وخروج عن الحاكم واول م الثورة نجحت دخلو السياسة والجو ده لكن الاخوان المسلمين طول عمرهم مستقلين بيعملو دعوة وفي نفس الوقت بيدخلو في السياسة ... واظن الغلط مش من عند الاخوان الغلط من فهم الناس نفسها م كل حزب يخليه ف حاله احسن ويبقى مستقل مع نفسه ويسمع رأيه ورأي الاخر مش دي الديموقراطية اللي هما نزلو ينادو بيها ولا كان شعار وبس !!

Unknown said...

لا جدعة يا نوارة بقالك كتيير مقولتيش كلمتين فى الجون زى دول , موافقة على كل كلمة كتبتيها الواحد فعلا حاسس ان السلفيين شوكة فى الضهر متعبين جدا و بيتكلموا عن غير علم و الناس بتصدق اى كلام و خلاص

hossam said...

معاكى فى اللى قلتيه وان المزايدات اللى حتتم من الاخوان المسلمين مع السلفيين مش حتكون فى مصلحه الثوره ولا مصلحه مصر لانها بصراحه حتكون الطريق الوحيد لدوله لا هى دينيه ولا هى ديموقراطيه ولكن بلد مهلبيه الكل بيشتم والكل بيخون وللاسف حنحتاج ثوره تانيه علشان نخرج من النفق المظلم المنتظر ربنا يستر اعجابي برجاحه عقلك وتقييمك السليم للامور يزيدنى اعجابا بك تحياتي

istratigi said...

أنا افتكرتك بتفهمي و كنت واضع مدونتك في المفضلة آن لأبي حنيفةأن يمد قدميه

Mr.FOX said...

فى المرجعية الدينية الاكثر تشددا دائما يفوز

Mariam said...
This comment has been removed by the author.
Unknown said...

مليش دعوة بالاخوان مش حتكلم عنهم .

حتكلم عن اللى يخصونى ( السلفيون )

بدون مقدمات افهموا المقدمات تعرفوا النتائج ، اللى بيحرك السلفيين هو الدين ، الدين و بس ، و لما بيلعبوا سياسة بيلعبوها لصالح الدين ، و أى حسبة تانية مش حتيجي معاهم سكة ، الثورة اللى شارك فيها منهم و هو معتقد ان ما يفعله هو تغيير للمنكر و هو دين ، و الجزء الذى لم يشارك كان يراها مفاسد تضر بالمسلمين و هذا ايضا دين ، و كاميليا ووفاء و كريستين و دميانه و كل السابقين و اللاحقين هم يناصرونهم لأن هذا بالنسبة لهم دين ، أما حسابات المكسب و الخسارة و الكلام ده مش حياكل معاهم ، و بعدين عيب عليكى يا نوارة شغل التلقيح ده ، أمن دولة ايه و سعودية ايه ، ده انا كنت فاكرك بتفهمى عن كده و الله

يالله يعنى هى جت عليكى .
و اللى يحبنا يطالب بخروج الأسيرات و برده مايضربش نار .

amer said...

كلامك غير منصف و لا يمكن قبوله لأننا في الأول و الأخير مسلمون و سنظل كذلك و لا يمكن قبول أي نقد لأحد فئات المسلمين بأستخدام تلك المفردات الواردة في كلامك التي تخرج عن نطاق النقد البناءالي نطاق السب و التجريح المغرض و أستعداء و كراهية لا يمكن ان يقبلها مسلم غيور .. و كان الأولي لكي نقد سلوك النصاري المقيت التي تستحي من حتي الأشارة أليه من بعيدو كأن شئون المسلمين أصبحت مطية لكل داني و قاصي و هذا هو الوهم الذي يقع فيه الكثيرون و لا أظن أنت منهم .. فالأسلام عزيز و سيظل كذلك .. أتقي الله في طرحك

الميدان said...

يسلم قلمك يا نواره فعلا السلفيين لما بيتساب لهم الحبل علي الغارب هيخربوها لانهم ما بيعرفوش يفكرو اصلا غير بعقل شيوخهم اللي رفعوا علمهم في قنا من غير مناسبه وعشان كدا لازم يتوصع لتهورهم حد ..يعني ممكن نعتبره تهور بافتراض حسن النيه مش أجنده..وفعلا الاخوان هيخسروا كتير لو اتحالفوا معاهم بس طول عمر قيادات الاخوان بيحسبوها غلط تاريخهم بيقول كدا بصراحه انا فقدت الامل في قيادات الاخوان اللي دايما جايبين للاخوان الكافيه بس عندي أمل كبير في
شباب الاخوان

المهدى said...

تو مادريتى التحالف الإسلامى بدأ من أول ما خرج الرجل الحديدى خيرت الشاطر ومن مظاهره إستفتاء من دقن كاميليا وإفتله وشرفاء شباب الجماعة وأبو الفتوح وعاكف والهلباوى شايفين كل اللى بتقوليه ومرعوبين منه لأنه فعلا خطر عليهم وعلى الجميع
الأخطر مش بس الإخوان كمان المفكريين الإسلاميين اللى سابقين الإخوان وبيسترشد بيهم الإخوان بيدفعوا فى إتحاه هذا التحالف وما بيقولوش كخ ولا عيب (راجعى فهمى هويدى ومقالات الدفاع عن السلفيين وخاصة مقارنته السلفيين فى مصر والسلفيين فى أمريكا ) ومتهافتين على لقب منظر الدولة المدنية ذات المرجعية الإسلامية
لكن على مين السلفى حيقش الكل

Anonymous said...

والله حاجه تحير بس الاخوان لازم فعلا ياخدوا كل الحذر لأنهم اخر مره عملو تحالف لبسونا حكم عسكري بعد الملكي معرفناش نخلص منه غير بعد 60 سنه ومخلصناش منه بمزاجنا لا ده العسكر هما اللي قالو انتو زهقتو خلاص احنا معاكم وطلعو جدعان

المهدى said...

خدى كمان مفاجأة ضيفيها على كل النقاط الصحيحة عندك
السلفيون أكبر فى العدد من الإخوان ومخترقين قواعد الإخوان ( نفس قضايا الشيعة والنصارى تثار بنفس الحدة ويحاول شباب الإخوان الشريف توعية أقرانهم مرة بالعقل ومرة بسيرة حسن البنا وموقفه من المسيحيين والشيعة دون جدوى )كمان هم أخف فى الحركة وأوضح فى الفكرة خاصة مع أجيال التعليم المباركى أو الطافريين الجدد
ربنا يستر كلهم بيلعبوا بالنار الإخوان والوسط والمنظريين والنار حتاكل الكل
باين رفعت السعيد لسة ليه عيش فى البلد دى

ساعي الخير said...

و هو كان أيه طلع من كوعك يعني أنتي و الميدان لحد النهاردة

و مع أنه مش حكمة التظاهر قدام الكاتدرائية

لكن و ماله لما الناس تتظاهر قدام الكاتدرائية و لا الجوامع حتي و اشمعني فيه ناس اتظاهرت قدام مجلس الشعب و الشوري و المباني الحكومية مش كل مظلوم بيوصل صوته للي مش عايز يحس بيه و يعطي له حقه

هي مش الثورة اللي بيقولوا عليها كانت علشان تحقيق العدل و الظالم يرتدع و كل واحد ياخد حقه

هو مش أنتي اللي قلت فيه واحدة ست زيك مظلومة و مش باين لها قرار يعني عدل ده و لا ظلم و لا كانت عشان ايه الثورة

و لا كانت علشان الفوضي الخلاقة و تقسيم البلد عشان ترتاح أميركا و حبيبتها

هو في ايه يا نوارة مالك في ايه ما تقولي كلمة الحق ما تطلبي من الثوار و الميدان و رئيس الوزراء و المجلس العسكري تطهير القضاء العلق الفاسد اللي عمال يأجل القضايا _ قضية كاميليا بتتأجل _ و مش عايز يحكم بالحق القضاء اللي بيحكم بقوانين فاسدة هتطلع حسني و رجالته براءة
ما تتطهر الحكومة و المجلس العسكري و يتعمل مبادئ واضحة تقوم علي العدل يتحاسب عليها كل المجرمين و المفسدين في البلد و الدنيا تتلم و لا هو بس ثورة ثورة زنقة زنقة خراب خراب يبقي كان ماله حسني ما دام الظلم هو هو
حسي يا نوارة حسي شوية دم أنسانية م اللي بيقولوا عليها واحدة ست محبوسة يعلم الله بتتعذب و لا بتعاني ازاي حسي يا نوارة حسوا يا بشر حسوا فأنه يحس البقر
حسوا ده الأحساس نعمة
و علي فكرة برضة ما تغيريش الموضوع

ساعي الخير said...

يا نوارة فيه واحدة محبوسة لا في دين و لا شرع و لا قانون و لا زفت

واحدة يا نوارة مش واحد أشمعني خالد سعيد يعني

مال الأخوان و مال السلفيين و مال المسيحين مالنا و مال الحوارات دي كلها

هم كلمتين و بس

واحدة بتتعذب و مهددة بالقتل و قبلها ناس اتقتلت

ست زيك يا ست حسي يا نوارة

و ماتغيريش الموضوع

العدل ما يتجزأش

الفوريجي said...

فهمي هويدى لم يدافع عن السلفين وهذا هو نص المقال
http://fahmyhoweidy.blogspot.com/2011/04/blog-post_06.html

صافي ناز كاظم: لساني حصاني said...

لايمكن إقامة تحالف بين الإخوان واليسار، هذا منطق مماثل لمنطق طفل يريد " أنا وبابا وماما وعمو في بيت واحد"! مستحيل! وما حاجة الإخوان إلى التحالفات؟

لاخير فيمن يسمون أنفسهم يسار، إتركوهم يجفوا وينشفوا حتى تذهب بهم الرياح إلى حيث ألقت!

حرسك الله يانوارة! صافي ناز كاظم

مش فاهمه said...

عارفه يا نوارة يظهر ان الأخوان طول الوقت بيكذبوا علينا و بيقولوا انهم وسطيين و اتاريهم مش وسطيين ولا نيله انا شوفت زوجه خيرى الشاطر فى الميدان منقبه ماعلينا اللى اقصده ان عصام سلطان و ابو العلا ماضى و سليم العوا و القرضاوى و دلوقتى ابو الفتوح و شباب الأخوان واضح انهم كلهم انشقوا عن الأخوان لما لقيوا انهم قلبوا على سلفيين يعنى شغلانة السلفيين دى باديه من بدرى مش من بعد الثورة و احنا مش داريانيين يالا على البركه عموما هم كده ولا كده بقى شكلهم وحش قوى احنا نحول العطا على حزب الوسط و العدل و نفكنا من الأخوان و حركاتهم و تحالفاتهم

صافي ناز كاظم: لساني حصاني said...

لايمكن التحالف بين الإخوان واليسار! مستحيل إن ذلك بمثابة منطق طفل يريد: أنا وبابا وماما وعمو في بيت واحد! ثم أين هذا اليسار؟ لقد جفوا وذبلوا وذهبت بهم الرياح إلى الفناء والحمد لله كثيرا. حرسك الله يا نوارة الإنتصار

صافي ناز كاظم

نور الدين (محمد الجيزاوى) said...

يا افندم الديموقراطية مفيهاش خيار وفقوس
يعنى مش حلو لدعاة المدنية ووحش لدعاة الدينية .. زى ما فى ببريطانيا وايطاليا والمانيا احزاب الاسم الرسمى ليها (الحزب المسيحى ) ايه مشكلتك ان يبقى فى ناس اسلامية تمارس سياسة أو يكون ليها مطالب

ليه صوتك كان عالى فى التظاهر قدام كاتدرائية ومسمعتش لحضرتك صوت خاااالص ان الكاتدرائية دى خاطفة ناس وقتلت بعضهم وعلى رأسهم وفاء قسطنطين

ايه حرمة الدين تعنى حرية الخطف وعودة محاكم التفتيش

تعودنا منك الحيادية اتمنى تعيدى نظرتك
تحياتى لك

نور الدين (محمد الجيزاوى) said...

بالمناسبة اسم التدوينة كمان عنيف جداااااااا
ووالله انا لا اخوانى ولا سلفى
لكن انت مش حيادية بالمررة

محمد نور الدين said...

إلى المحترم

Adb El-Hameed Riad
لقد أثرت جملة من القضايا كل واحدة تحتاج إلى وقفة خاصة ، وكلامك ينم على فهم ، وأيضا يكشف عن قلق فكري . ولما المساحة المتاحة لا تكفي أتوقف عند نقاط أراها تحتاج إلى تطوير .لكن قبل ذلك لي رأي أقول فيه أن الفكر العربي المعاصر هو فكر الأزمة، وهي تتجلى في عدة مستويات فكرية من اليسار إلى الإسلاميين . اليسار مع ظاهرة العولمة وتداعياتها المختلفة بدأ يركز على قضايا مجتمعية، مثل الدفاع عن الأقليات و الثقافة الهامشية وحقوق الإنسان وحقوق النساء . وعلى أهمية هذه المطالب لكنها تتم بدون مشروع واضح المعالم فأصبح فريسة للاستقطاب و للهيمنة الخارجية. بكل أشكالها. أما إشارتك للإسلاميين كونهم يرفضون الرأسمالية المتوحشة .صحيح هم أكثر الناس عداءا للرأسمالية المتوحشة لأن الإسلام يلح على الربح الحلال . لكنهم غير قادرين على تقديم بديل لهذه الرأسمالية المتوحشة ،لأن تفكيرهم حبيس الفهم الإسلامي البسيط للتجارة و المبادلات التجارية ولرابح الحلال .بعبارة أكثر وضوحا تفكيرهم يظل حبيس العلاقات ما قبل الرأسمالية هذه الوضعية، وهي وضعية تاريخية، تمنعهم من تقديم أي مشروع أو برنامج للخروج من الأزمة لأن ذلك يتطلب منها أنة تنقلب على ذاتها ، وتتخطى القيم و العلاقات ما قبل الرأسمالية أي تتحول من حركة ماضوية إلى حركة تؤمن بقيم العصر ومكاسبه ومنجزاته. وهذه المهمة و في مصر تحديدا ، يتعذر انجازها في المدى المنظور بحكم التأخر التاريخي . لأن مصر التي كانت في عهد محمد على متقدمة على اليابان بخمسين سنة تعرضت إلى ضربات قوية منذ محمد على إلى جمال عبد الناصر فضلت الكثير من المؤسسات ،بخاصة الدينية منها تقليدية ولم تعرف تحديثا ولا نهضة .وهذا في تقديري سيكون حاجزا كبيرا في وجه أي حركة تنويرية قادمة في مصر ويساعدها في ذلك تشرذم قوى التقدم في مصر .

mansh_86 said...

والله عين العقل يا بنت نجم
بس مين يسمع

الشبكة المستقلة said...

هااااااا
الاخوان بيحاولوا يعملوا تحالفات للاستيلاء على الارض بالطبع و السلفيين اقرب لاهادافهم السياسية
طبعاً عايزين يحكموا و النسبة بتذيد من 25% الى 35% الى 45% الى 50 %
و هلم جرة و بيشتغلونا صح
و دلوأت بيأولوا عندهم مرشح رئاسة و دلعني يا معلم
انا مكنتش مقتنع بفكرة انهم عايزين دولة دينية ذي ايران و لكن الواضح انهم معندهمش فكر سياسي حقيقي و كل قوتهم في استغلال الدين و شكل امريكا كمان عاجبها كدة و نفسها انهم يحكموا عشان يخربوها ذي ما عملوا في السودان
و سلميلي على الصنلديق يا نوارتي

Anonymous said...

حل مشكلة السلفيين سهل جداً
يتم تكليفهم رسمياً بمحاربة البلطجية
ونخلص من السلفيين والبلطجية مرة واحدة

حياة الظل said...

ولما باقول ادوهم للجيش انا مش باهزر، هم لازم يتحركوا في اطار قيادة، وقيادة حكومي كده، غير كده عيارهم بيفلت

معاك حق ميه بالمية والي مش مصدق يذكر ايام حرمانية الخروج على ولي الامر

مع تحيات شيال الهموم يا صغير

hardway said...

وبعدين ..وبعدين يا د/محمد بديع...
معقول كده يا باشمهندس/ خيرت الشاطر
الحاجة / نوارة خدش حياءها......
لالالالالالالا لا نقبل.... الا حياءالحاجة/نوارة
وبعدين دي لسه راجعة من الاراضي المقدسة بقـــطــــــــر
ما تسمعوا الكلام ياد/الكتاتني الحاجة أعتطكم خطة طريق لمستقبل الاخوان المسلمين
وبلغت الجيش علي الشيخ /حسان و أخوانه
عايزين أيه تاني.....معقول..؟؟؟؟؟؟؟؟
لازم تيجي بنفسها فيلا 5 ش 10 بالمقطم..
والمليونية معاها..هي هتلاقيها من التحرير ولا المقطم!!!!!!!!!!!!

سامح said...

نوارة هاتي من الآخر وقولي انك مش عاوزة الاسلاميين يحكموا
تحالف الاخوان مع السلفيين = قوة كاسحة للتيار الاسلامي
اما فيلم السلفيين وشوكة في الثورة ده اشتغالات اعلامية ، والاعلام مش مدينا فرصة نتكلم عن مشروعنا.
في اي حوار بتكون الاسئلة : انتو بتكفروا المسيحيين ؟
انتوا هتقطعوا ايد الناس ؟
انتوا هتجبروا الناس ع الحجاب ؟
هتمنعوا الخمرة ؟ هتقعدوا الحريم في البيت؟
وهتقولي السعودية هقلك ايران
هتقولي امن الدولة هقلك الموساد
وعموما الاخوان والسلفيين في تعاون بينهم في الدعوة وفي قضية كاميليا من قبل الثورة لان الشباب المتدين كلهم بيتقابلوا في المساجد كغيرهم من المجتمعين في الروتاري والليونز

Dr.issamo said...

معلمة يا نوارة


بس على فكرة

الاخوان والسلفيين عمرهم ما هيتفقوا
لان بينهم خلافات عميقة جدا

والاخوان بالذات علشان مصلحتهم المباشرة اهم شيء عندهم
لن يتحالفوا مع اي تيار ديني حتى لا يقاسمهم احد في الكعكة المنتظرة

وليد said...

من الواضح ان الكثيرين يرون ان الثورة قد حققت كل اهدافها وان الوقت قد حان للحصول

على اكبر قدر ممكن من المكاسب ولا مانع من التحريض على بعض رفاق الميدان بالامس

لانتهاء الحاجة اليهم,

بالنسبة لكارثة المسلمات المعتقلات فى الكنيسة -والتى يصر البعض فى سماجة ولزوجة ان احسنا

الظن او تواطؤ وتاّمر ان استخدمنا المنطق السليم-على تلخيصها وحصرها فى اسم كاميليا وفقط,

اقول...قد بينت تلك المصيبة مقدار النفاق والادعاء الذى تتمتع به "النخبة"و"الحقوقيون" فى مصر

فنحن امام "حالات"اختفاء واحتجاز قسرى واعتداء على حرية الاعتقاد ومع ذلك لم يحرك احد

ممن يتلبسهم شيطان حرية الاعتقاد ساكنا,مما يجعل حجة القائلين ان المقصود بتلك الحرية هدم

ثوابت الاسلام قوية فعلا,

اما الاعتراض على التظاهر السلمى امام الكنيسة-التى تحتجز اخواتنا منذ سنين-والادعاء ان هذا

استخدام للعنف!! فيعتبر منطق مغلوط وخلط حقير وعن نفسى اراه مبالغة فى السلمية فطول التجاهل

والتسويف والاستهانة جعل الامر محسوما عندى ويبقى فقط المعلومات الدقيقة عن اماكن الاحتجاز,

فطالما انه من الواضح ان دولة القانون المزعومة اضعف من ان ترد ظلم وان تجبر الجميع

على الانصياع للقانون بل واضعف من تحتكر العنف اذن لابد من القيام بنصرة"ديننا"بانفسنا,
بالمناسبة محدش بيتهم الفرنسيين باى حاجه عشان حرروا المساجين من الباستيل
على فكرة انا مش سلفى ,مش بس السلفيين اللى عندهم غيرة على الاسلام واستعداد للتضحية عشانه

amr565 said...

يسار مين والناس نايمين يا جديدة هل صحيح الكنيسة ترفض مثول المواطنة المصرية كاميليا ده السؤال اللي لازم الجميع يساله وليس اخوان وسلفيه والهجص ده الكلام ده يدخل علي الغلابة وبعض السذج اللي حيقعدوا يدافعوا والموضوع يتوهه بصي الموضوع سهل جدا المواطنة كاميليا تروح للنيابة فاهمة يا جديدة وليس فيديو مفبرك يطلعوه في تليفزيون لان المواطنة كاميليا لايوجد احد له سلطة عليها الا الدولة المصرية والا محتاجين نكلم سفير الكنيسة في مصر لاجل الست كاميليا تروح النيابة وبعدين تقول في النيابة انا مسيحية بي انتهي فيها حاجة دي ولا تتعبي نفسك في تلقيح كلام علي الاخوان ولا تركبي موجه الهجوم علي كل ما هو اسلامي الايام دي وتضطري ترجعي لعقيلتك السابقة اللي قبل 25 يناير ولا حاجة انت في غني عن كل ده لو نسيتي سلفوبيا اللي عندك دي وركزتي في هل فعلا الناس السلفية دول طالعين في قضية عادلة و ولا لا فحتلاقي نفسك بتعدلي ولا جل الا نصل الي ان تصبح الكنيسة دولة فوق الدولة ياريت تقراي الرابط ده هو قديم وانا وضعته هنا قبل كده لكن بصي علي الخبر ده واسرحي حبة
http://www.almasry-alyoum.com/article.aspx?ArticleID=98053
وبعد ما تقراي الرابط هل ينفع نقيم دولة العدل في وجود كنيسة يقرر فيها البطريرك هل الحادثة دي جريمة قتل ولا لالا وزي ما قلت التعليق السابق في البوست السابق كنت اتمني تكون الثورة نضفتنا من قذارة الطائفية والانحياز ونكون بجد دولة العدل علي الجميع ولا اظن العدل يتم لما الاغلبية تحس انها مقهورة مهانة .. لا تتوهي القضية وجوبي علي السؤال هل الكنيسة والبطرك بتاعها فوق الدولة وهل كاميليا تبع اي بلد بلد الدولة المصرية ام من رعايا جناب البطرك والكنايس لازم تتفتس زي المساجد ما الكل بيدخل دي قضية اخري حتيجي لوحدها بعد ما ينكسر دولة البابا وجمهوريته ويسلم المواطنة كاميليا للدولة المصرية ساعتها الجميع حيعرف ان كاميليا ليست اقوي من حسني مبارك وولاده الكل لازم يحترم القضاء حتي لو كان كبير الازهر

حسن محمد على said...

حكمة اليوم :- شهاب الدين اظرط من اخية ,وكلا الاثنين مظراط

nosseir73 said...

انا بدات اخاف جدا لحد امتى الموضوع ده هيستمر الخوف من الفتن وان الناس تزهق من الطبطبة على السلفيين الحكومة والجيش ما بيقفوش وقفة رجالة امام المواضيع اللى بتعمل فتن ليه
الفترة دى فيها حاجة غريبة فى تامر
منين باس مش عارفاه واللى بقلقنى
التلميع فى الجيش على ودنه لية
مفيش حد بيعمل دعاية انتخابية لمجلس الشعب ولا شباب ثورة ولا غيره هو فيه ايه
الصورة مشوشه ومخيفة مشعارفالها اول من اخر ربنا الستار والمستعان

وحدتي said...
This comment has been removed by the author.
ahmed said...

انا دمي بيتحرق لما الاقي الهجوم القذر والتريقة على الاخوان والسلف واقسم بالله ان في كتير ما يعرف الفرق بينهم
انا لا سلف ولا اخوان ولا اي حاجة دا انا حتى بصلي بالعافية و بدخن
بس الحملة الاعلامية من اون تي في والمصري اليوم وكام جرنال
المهم مش لازم يا قطة نركب الموجة عشان المسيحين يقولوا علينا معتدلين
هو صحيح بالنسبة لموضوع كاميليا هو مش اللي بيخطف بيتحاسب يا ترى مين اللي هيتحاسب في الموضوع دا

NAGWA said...

http://up.g4z4.com/download-64ec72e2d2.gif.html
معلش حدث خطأ بالرابط دا من تصميمي لسوريا

حسني مبارك الا ظلمتوة said...

انتم لسة شفتم حاجة دا انتم ياما هتشوفوا من بعدي ودة كمان عشان تستاهلوا لانكم طعنتم في شرفي وطلعتوني حرامي دي اخرتها وانتي يابنت احمد هو ابوك شتم في عبد الناصر وكمان سب في السادات وكمان سب فية وانتي كمان اية هو كلنا كدة وحشيين وانت وابوكي لا عموما احنا الا نستاهل انا والسادات وعبد الناصر اننا حاولنا وتعبنا عشان نجعلكم شعب لية قيمة وبكرة تحلفوا بايامي وتقولوا ياريتها ترجع لكن مش هترجع تاني وهتعيشوا في نكد وغم ومش هتلاقوا الامن ولا حتي الرغيف ابو شلن والي اللقاء في رسالة اخري تتكم الهم

Ahmed . M . Abdulrahman said...

الاخوان تاريخهم معروف منذ بدايتهم ختى تلك اللحظه باختصار انا لن اطول فى الحديث

يتحالف الاخوان مع الشيطان ليصلوا الى الكرسى

و تحالفهم مع السلفين لانهم يروا انهم اقوياء

هم بالمال و العدد و السلفين بالحرب الفكريه

العلاقه هنا تسمى علاقه منفعه مشتركه

و عندما يجد الاخوان تيار اقوى من السلفين سيتحافوا معهم

وادى ذقنى انا معاشر الاخوان كويس وعارف هم بيفكروا الزاى

الكرسى الكرسى

سلام مؤقتاً يا نواره

______________________
الى عاوزنى يجيلى
http://misr25jan2011.blogspot.com

omar said...

هو بس يمكن المشكله ان حضرتك لم تختلط بالسلفيين ولم تسمع منهم ولا تعرف من هم احب اقلك انك لو لقيت واحد بينصح شخص ماشى فى الشارع ميعرفوش انه يبطل سجائر او يقول له حان وقت الصلاه بمنتهى الحكمه والموعظه الحسنه فاعلم انه سلفى كل ما يقال عنا ما هو الا من صنع الاعلام المصرى اللذى يريد ان يخوفنا من بعض او بمعنى اصح يخوف يوقع الفتنه بين المسلمين ليرتضى المسلمون دوله علمانيه قطع الاذن وطلعنا ملناش علاقه بيهاhttp://www.youm7.com/News.asp?NewsID=385595&SecID=296 هدم الأضرحه ومعمناش ومش اسلوبنا ولا ديننا الى عرفينهhttp://www.youm7.com/News.asp?NewsID=386861&SecID=12&IssueID=0 احب اقلك لو عايز تتأكد مما يحاك لنا من مؤامرات ممكن بسهوله تقارن بين تعاطى الاعلام لقضية قطع اذن وتعاطيه لقضية سلوى عادل اللتى اسلمت وقتلها اخوانها وقتلوا طفلها و
بالنسبه لموضوع كاميليا مش احنا الى بنعمل فتنه احنا مش عايزين حاجه غير انقاذ اخت مسلمه وربنا سبحانه وتعالى بيقول (اذا جاءتكم المؤمنات مهاجرات فامتحنوهن الله اعلم بايمانهن فان علمتموهن مؤمنات فلا ترجعوهن الى الكفار لا هن حل لهم ولا هم يحلون لهن )
دا دين يا استاذتى مش فتنه وعلى فكره مستحيل يبقى فى خطر من السلفيه اطلاقا لسبب بسيط .... لأنهم ميعرفوش مصدر غير القرأن الكريم والسنه النبويه وطبعا مش محتاج اقلك اد ايه بيحضوا على الدعوه الى الله بالحكمه والموعظه الحسنه هتقلى يمكن بيفهموا القرأن والسنه على مزاجهم اقلك حتى دى مستحيله لأن منهجنا هو ( اتباع القرأن والسنه بفهم سلف الامه ) يعنى مش بفهم محمد حسان ولا محمد حسين يعقوب ولا اى حد لكن بفهم سيدنا عمر وابو بكر وعثمان ومن انبعهم جزاك الله خيرا على حسن نيتك وعذرا للاطاله

omar said...

اه صحيح نسيت اقلك
الاخوان دعوه سلفيه يا نواره وبعدين على فكره انا اخوان ودا يخلينى بالضروره سلفى
تخلصى بقى من تاثيرات التخويف من الفتنه لأننا الأحرص على مصلحة الوطن او بلاش الاحرص خليها لأننا حريصين على مصلحة الوطن

Unknown said...

تخلصنا من الدكتاتورية السابقة وجينا لدكتاتورية الثورة
يجب ان نستوعب الجميع والأغلب له الكلمه

Unknown said...

سبحان الله هى الحرية والديموقراطية دى لناس وناس لأ قامت ثورة عشان كل واحد يعرض افكاره زى ما هو عايز والحكم يكون للناس فى الانتخابات ومتخافيش مافيش حد يقدر يضحك على الناس ولا يستعبطها لان المصريين اوعى واذكى مما تتخيلوا واللى الاغلبية هتقول عليه هو اللى هيمشى كونكوا بقى انتو او اى حد تانى مقدرش يقنع الناس بأفكاره وبكلامه فدى مشكلته بقى يروح يحلها وبعدين يجى يتكلم
وبعدين حضرتك كنتى بتعيطى على المعتقلين اللى ملهمش ذنب غير انهم قالوا رأيهم ولازم يطلعوا لازم يطلعوا ومسمعناش صوت حضرتك فى ناس محبوسين فى كنيسة وبيتعذبواوالله اعلم عايشين ولا ماتوالا وبتغلطى كمان اللى بيحاولو يخرجوهم ومسمعناش صوتك فى قضية سلوى اللى اتقتلت هى وابنها والكنيسة و شنودة والاعلام القذر لا حس ولاخبر خليكى منصفة يا نوارة الحق مافيهوش خيار وفاقوس

amr565 said...

ارجوا ان تسمعي التسجيل ده للاهمية وهو من سنودة الثالث وبصوته يوضح امر هام
http://www.tanseerel.com/main/articles.aspx?selected_article_no=21873
اهتمي بهذا التسجيل وفكري فيه

dr.lecter said...

انا مش هنكر انهم وقفوا معانا في التحرير وكان لهم دور حلو لكن اللي بيحصل ده اسمه نداله واسمه تفضيل مصالحهم علي مصالح البلد

ali said...

يا نواره يا غاليه علينا كلنا
مش ححاول أأثر عليكي برأيي
لكن ليه المره دي إنت مش كاتبه بعمق كدا وباصه للموصوع من الدور العشرين على ميدان مثلا، الموضوع المره دي عاوز منك إطلاع شويه
ربنا معاكي

Hana said...

الله.. اهو البوست ده ناجح فعلاً، والدليل ان من ضمن اللي ردوا عليه الاستاذة صافي ناز، وطبعاً الرد نابع من اتجاهها الفكري مش إحساس الأم، رغم الصبغة الأمية (من الأمومة) فيه. وان كنت لا أوافقها الرأي - وده لا يفسد للود والاحترام قضية. ومش مجال مقارعة الحجة هنا، لأني لا أراني أهلاً لذلك في المرحلة دي. لكني أحب اغتنم الفرصة واطلب من الاستاذة صافي ناز تفصل ردها بخصوص الموضوع، وكمان بخصوص المرحلة دي تصريحاً لا تلميحاً ان شاءت التكرم علينا بذلك. وشفيعي في طلبي هو حق الضيف، فأنا ضيفة عليكم في مصر ولي حق القرى على الكرام.

Wael said...

مشكلة الكل قلتها على تويتر ليك وهقولها هنا قلتى قتل مسلمه علشان ديانتها ده مش طائفى دى علشان تعتبر شرف للتبرير وتبرير اقبح من ذنب ولما ودن واحد اتقطعت من جيرانه علشان شقة دعارة لذقوها للسلفيين والناس كلها مسكتها وحقوق (النسناس )والكلام الفارغ اللى بتيستخدم لما يخدم الغرض المراد منه وخلاص لما كان فيه مظاهرات عند ماسبيرو وانت مكنتيش بتعرفى تروحى الشغل وكان اعتصام مش تظاهر وكان مليان قلة ادب وعنف بعديه ادى لقتل اكثر من شخص كان حقهم لما طالبوا بخروج قس مزور محبوس جنائيا كان حقهم ولما طالبوا بعديها بخروج بائعة الاطفال المصريين للامريكان كان حقهم ولما خطفوا بنات اسلمت تبقا قلة ادب والبنت لا هتقدم ولا هتاخر وارموها بقا وخلاص هى والباقى اللى محجوزين اللى بيردد الكلام ده اشخاص ملهاش مبداء وبتاعت شيلنى واشيلك غير الهجمه المنظمه من المصرى اليوم واليوم الساقع والاتنين مشارك فيهم ساويرس على اى شئ مرتبط ذكرة بالاسلام اعتقد ان الهجمه ضرتهم اكتر ما نفعتهم لانها خلت جميع الطوائف تتعالى على اختلافهم وتتوحد ضدهم وخليها تنفعهم قلنا قبل كده البلد دى لازم تفهمهوا قبل ما تشتغلوا سياسه فيها لازم تفهموا ان الشعب بطبيعته مسلم ومسيحى متدين مجرد شعوره بالخطر على هويته ودينه هينفر من اى شخص بيدعوه لاى حاجه حتتى لو فيها صالح له وفى الاخر
العلمانيين والليبراليين واليساريين اللى كنت منهم والنشطاء والحقوقيون بيفكرونى بكفار قريش والهتهم اذا ارادوا عبدوها واذا جاعوا اكلوها هى نفسها ازدواجية المعايير اللى بنشتكى ان امريكا والغرب بيعملونا بيها

safaa_shehata_89 said...

كاميليا شحاتة تحل المشكلة وتروح النيابة بنفسها

Diaa said...

بصراحة عندك حق
لازم يكون فيه خطوط فاصلة بينا وبين السلفيين,,
السلفيين دول تتفات ليهم بلاد مخضرة,,

Diaa said...

د/دودى

انتي بتقولي بعد ظهور الأسوأ اللي هوا السلفيين!!!! لا, هما موجودين من زمان مش طلعوا دلوقت,, ومش احنا طبعا اللي أظهرناهم, هما مع نفسهم ,, هو احنا ايه إكس- من,, بلاش كلام التخوين ده

Diaa said...

لكن انا طبعا مع كل التعليقات اللي بتقول إن موضوع كاميليا حله بسيط جدااااااا

تروح النيابة وتقول أنا مش مخطوفة وخلصت القصة
سيادة الدولة والقانون هوالحل للهبل اللي حاصل من السلفيين أو من محامي الكنيسة نجيب جبرائيل اللي بيقول ان المسلمين بيخطفوا المسيحيات!!!

Diaa said...

سامح

مشروع ايه بس؟؟؟
بلاش فضايح بلا مشروع بلا بتاع
اعلام ايه اللي مش مديكم فرصة؟؟؟
ما انتوا عندكم القنوات الفضائية بتاعتكم

Diaa said...

نوارة

بالنسبة لموضوع التحالف مع القوى السياسية زي اليساريين مثلا ده في رأيي شئ كويس

الدكتور عصام بعد اجتماع مجلس شورى الإخوان قال إننا بنمد ايدينا لكل القوى اللي عايزة تتحالف معانا

Hesham essa said...

انا مش عارف انتى بتقراى التعليقات اللى بتتبعتلك ، طبعا صعب تردى عليها كلها بس المفروض تعلقى فى مدونتك على مجملها
بس انا لو سمحتى ممكن اضيفلك ان السلفيين محتاجين حد يسمعهم اولا ويشعرهم انهم لهم حق الاعتراض ثم بعد ذلك يتناقش معهم شعرت بذلك من ناس كتيير استضافوا نوعيات مختلفة منهم وعلى فكرة همه الخلافات بين اطيافهم كتيرة جدا يعنى مش كلهم راى واحد واظن حلقة منى الشاذلى اللى استضافت الشيخ عمارة اثبتت ذلك ، كل ماهنالك مطلوب وسيلة استيعاب لهم وهم اكثر وضوحا من الاخوان بكثير مع العلم ان الاخوان برضه مش كلهم مع راى مجلس شورتهم
يبقى بس شىء واحد اننا الغلابة فى البلد دى خايفين عليها من الكل وعلى فكرة الناس مش منضمة الى اى من اللى انتى شيفاهم
الناس تايها ولم تجد فكر او حزب او جماعة تمثلهم
وشكرا لحضرتك ياعسل

aly said...

الاستاذ اللي بيطالب السلفيين بمحاربة البلطجية

امال وقفاتهم عشان كاميليا ودفاعهم عن الاسلام ضد اليسار والعلمانيين وحملاتهم الكذابة دي تسميها ايه؟

الاستاذ اللي بيقول الاسلاميين ماعندهمش مشروع

ماشالله على مشاريع اليسار والعلمانيين اوعى وشك انا غرقت مشاريع


خنقتونا لكن اهو على رأي نوارة اليسار والعلمانيين ده فيه اسمه هيستريا الثورة وانا باقول ان موضوع الاستفتاء هم خدوه بشكل شخصي والقلم كان يوجع الحقيقة

houssein ramadan said...

المطلوب اليوم ليس الغاء حسني مبارك واعدامه بينما يبقى النظام ممسوكا اميركيا بيد عميلهم طنطاوي لاحتواءهذا الحراك الشعبي الرائع بل المطلوب اولا واخيرا لتأكيدالثورةالحقيقية الغاء كمب دايفد واعدامه عندها تنكشف حقيقة من يمسك حقا بمصر
ي

qqq said...

معلش الشريط سف خالص، 5% من كلامك صح و 95% عبارة عن مهاترات، و لما أقول مهاترات أقصد كلام فاضي بلا موضوعية و أشبه بالكلام الإنشائي و القصص البوليسية، و بعدين يعني إيه إديهم للجيش؟؟ سوري نوارة يبدوا إنك النهاردة موش في المود و فعلا الشريط سف، عارفة إيه اللي بيخليني أزعل منك دايما؟ إنك للأسف متقلبة و متذبذبة. بس أعمل إيه مافيش حل لازم أرضى بالأمر الواقع خصوصا إنك شريفة و بلا مصالح شخصية زي ناس كتير، فقط تحتاجين إلى مرجعية سليمة تحميكي من التذبذب و تخلي مواقفك و كلامك أكثر إتزانا، على فكرة بيقولوا نقد الحبيب زي أكل الزبيب مع الحفاظ على المقامات. سلام

dr.moony said...

ملهم الاخوان ؟دول زى الفل يا جدعان!! وبيتلونو زى الحرباية وممشين حالهم زى القشطة!!بيتكلمو ف 50% بعد ما كانو بيتكلمو ف 30%...وده طبعا مع الرأفة.....ده غير انها حزب مستقل..!!!طبعا مستقل بس بينسق مع الجماعة !!!! بما يضمن مصلحة الجماعة ققصدى مصلحة مصر طبعا......والأكادة انهم حزب مدنى يا جماعة والمصحف مدنى وحياة النعمة دى مدنى !!!!!...بس مرجعيته دينية؟؟؟..طب حد فاهم حاجة...ولسه بتقولو الاخوان وحشين؟!

ملكش دعوة said...

نفسي اعرف وافهم احنا لبه بنضرب بعض ببعض ...غباء ده ولا اسمه ايه ... يعني لما النصاري عملوا مظاهرات ماسبيرو وكان دمهم سم والجيش خدهم علي رجليه وهشكهم محدش ابدي استياؤه وخاصه شله التوك شو ولماساويرس قال لا للتعديلات محدش امتعض ولما العلمانيين نزلوا شتيمه وقله ادب علي التيارات الدينيه من اول الاخوان والسلفيين واللحي والحجاب محدش نطق هو ايه انتوا لسه حاطيين فرده الجزمه بدل امخاخكم كده
طب احب ابشركم ان التيار الديني تحت اي مسمي بيكسب تعاطف والله بيكسب تعاطف وخليكوا شغالين مطبلاتيه للاقليات اللي بطلت تتكلم عن حقوقها لما لقت دشليون واحد بيدافع عنها ويكون في علم الجميع ان التيار العلماني هيتوحش وهيظهر وجهه القذر وساعتها اللي بيبوسوا في جزمته هيتبروا منه
والله انا اوقات بحس انك فاهمين ده كويس وبتطرمخوا

ملكش دعوة said...

آه اضافه بسيطه ليه لما اتقتلت المسكينه سلوي وزوجها واولادها الحقوقيين والناس اللي احاسيسها مرهفه متهزلهاش شعره ولا دول مش محسوبين بشر
اذا كانت التناقضات هتكون سمه تناول الاحداث متلوموش الناس دي علي اي تصرف حتي لو كان مش محسوب الهجمه الشرسه دي علي الاخوان والسلفيين تخلي اي حد يطلع من شعوره ولما تهاجمني وانا في حالي متتوقعش مني اكون اكثر سماحه
بتوع السماحه والمحبه مكنش عندهم ادني قدر من الانسانيه

ملكش دعوة said...

عايزه اقولك يا نواره ان مامتك ست فله والله فله واجدع منك كمان وان كنت انتي بميت راجل هيه بقه بعشرميت راجل
وازعلي ولا طقي مش مهم

بساطه said...

عيب نقول ان السلفيين لازم يبقوا تحت حكومه .. الي يخرج عن القانون يتحاسب بالقانون.. انا قرفان من الي عملوه قدام الكنيسه ده ارهاب وقرف بجد .. بس انا مش مرتاح لطريقتك في الحوار في الموضوع ده ومش حاسس انك موفقه في الكلام فيه .. اسف

كيوبيد said...

نواره الاخوان والسلفين وجهان للعمله واحده لاتنين بيلعبو بنار وغير مقدرين مواقف البلاد الى بتمر بيه مصر كل الى يهمهم عايزين يوصلو للكراسى عايزين ياخدو نصيب من السلطه ولو حتى كان باسم الدين والعب بيه والكداب انا بقى مش عندى ثقه فيهم ان كان الاخوان او السلف لاتنين زى بعض فاكرهم واحد منغلق وظلامى غير متقبل الاخر وتهم جاهزة هى الكفر والذندقة تهم معلبة والحرية هما لا يعترفو بالحرية الشخصية كل من يخلف عندهم كفار وحب اقولك اغبى انسان على وجه الارض الى يصدق ان الناس دى خلاص مش هاترجع تانى للعنف الناس دى شايفه العنف جهاد مش عنف وتطرف وربنا يستر علينا وعلى مصر من هاولاء الذين يردو بيع الدين بالتين

محمد السيد said...

شئ من الانصاف يانوارة
مظاهرة امام الكاتدرائية تخلي السلفيين شوكة في ضهر الثورة
امال تقولي ايه علي الكدب اللي شغال ضدهم ليل نهار في التليفزيون
وسجن كاميليا وغيرها
واغتصاب طفلة الزاوية
وسلوي عادل واسرتها
وتصريحات شنودة المستفذة
حرام عليكي
اول مرة اخالفك الرأي والاقيكي تتكلمي بغير موضوعية

محمد السيد said...

شئ من الانصاف يانوارة
مظاهرة امام الكاتدرائية تخلي السلفيين شوكة في ضهر الثورة
امال تقولي ايه علي الكدب اللي شغال ضدهم ليل نهار في التليفزيون
وسجن كاميليا وغيرها
واغتصاب طفلة الزاوية
وسلوي عادل واسرتها
وتصريحات شنودة المستفذة
حرام عليكي
اول مرة اخالفك الرأي والاقيكي تتكلمي بغير موضوعية

Um Moa's said...

ارجو قراءة هذا المقال والتعليق عليه
http://www.tanseerel.com/main/articles.aspx?selected_article_no=21724

Dr. Ahmed Wagih said...

للأسف يا نوارة الوقت فات، والثورة أتسرقت من ناس مشاركوش فيها، ومكانوش يقدروا يرفعوا رأسهم ادام أقل شاويش مش ظابط، وأمن الدولة بكل مساوءه كان له أيجابيات وكان مانع البلد انها تفرط! القادم أسود، وأنصحك تدوري على بلد تاني لأن البلد ده رايح على البلاعة...

Unknown said...

بالعكس يا نوارة لما السلفيين ينتخبوا الاخوان احسن لما يعملوا حزب دول افكارهم خام ومحدش بيعرف يكلم معاهم هيبهدلوا الدنيا لو ادخلوا اكتر فى السياسةرايى تخليهم يتغزلوا هم والاخوان بدل ميدخلوا فى السياسة ويقرفوا الكل

Unknown said...

ياريت تدعى لايام نركز كل يوم فيها على نشر اخبار ثورة بدل ما كل الاهتمام فى المواقع على ثورة سوريا

Unknown said...

ياست نوارة بلاش كلام عن الاخوان والسلفيين وخليكى مع احبابك واصحابك من النصارى والعلمانيين واليساريين ، وعلى فكرة هل السيد والدك اليسارى الاشتراكى القديم غير جلده واصبح علمانى ليبرالى من اجل سواد عيون ساويرس ، ارحمينا بقى وخليكى فى حالك او روحى مع ابوكى لساويرس بوسوا القدم من اجل رضا الكنيسة وللحصول على البكة وعلى اموال اقباط المهجر اللى بيوزعها ساويرس على امثالكم من اعداء الامة

Unknown said...

ياست نوارة بلاش كلام عن الاخوان والسلفيين وخليكى مع احبابك واصحابك من النصارى والعلمانيين واليساريين ، وعلى فكرة هل السيد والدك اليسارى الاشتراكى القديم غير جلده واصبح علمانى ليبرالى من اجل سواد عيون ساويرس ، ارحمينا بقى وخليكى فى حالك او روحى مع ابوكى لساويرس بوسوا القدم من اجل رضا الكنيسة وللحصول على البكة وعلى اموال اقباط المهجر اللى بيوزعها ساويرس على امثالكم من اعداء الامة

محمد said...

امنية ونفسي اشوفها عاوز اشوف عمرو خالد مع محمد حسان مع دكتور عبد المنعم ابو الفتوح مع كرم زهدي الصورة ديه اكيد هاتغيظ ناس كتير