يا فتاح يا عليم يا رزاق يا كريم.. احنا حنعمل ايه في عمر عفيفي ده؟

تحديث:
القوات المسلحة تحذر من ارتداء المدنيين لزي عسكري وانها ستتعامل مع ذلك بكل حزم
وانا حابلغ عنهم.. اول مرة في حياتي اشتغل مرشدة، ده انا ايام مبارك ما رضتش ابلغ عن واحد كان بيوزع مخدرات، بس دي ثورة بقى والبلد بقت بلدي خلاص
تحديث:
بلال فضل معاه بيانات الاتنين اللي بينزلوا الفيديوهات
الاول اللي سجل فيديو كهوة المصريين ده رفدوه عشان اتجوز نرويجية وهو عايش في النرويج دلوقت
التاني اللي عامل زي عاطف السكري ده ارسلوه في بعثة للدراسة وتورط في انحرافات اخلاقية فطلبوا منه الرجوع فرفض الرجوع ففصلوه
وقال لي ان بقية المعلومات حتنزل وبيقول انه هو كمان لو ما نزلوهاش حينشرها في عموده يوم السبت
تحديث:
البنات تسد ودانها.. 
اي ظابط جيش خـ** حينزل يتدارى وسط الحريم والعيال بكرة في ميدان التحرير انا حابلغ عنه الشرطة العسكرية
الخـ** اللي بياخد مني مرتب عشان يحميني وعايز يعملني درع بشري عشان هو جبان وخايف يتظاهر في ثكناته وخايف يواجه قياداته وبيقف لهم انتباه وهو مرعوش منهم ده يبقى خان الشعب والوطن وحاسلمه للشرطة العسكرية
انا مستعدة استقبل الرصاص عشان بلدي، ووقفت في وش الرصاص كتير وللأسف للأسف للأسف ربنا كتب لي عمر وانا مش عارفة ربنا كتب لي عمر ليه؟ استغفر الله العظيم
انا واحدة ست ومدنية ومش معايا سلاح ولا لابسة خوذة وقفت قدام رصاص الشرطة وما خفتش وظابط جيش معاه سلاح وتدريب خايف يقف قصاد قياداته وبيتدارى فيا؟ 
طب ده ولا ينفع بتلاتة نكلة، مش بس ما ينفعش ظابط جيش، ده ما ينفعش راجل
العيال اللي بنطلوناتهم ساقطة لما كانت القنابل بتيجي عليهم كانوا بيتقدموا ناحيتها ما هربوش واستخبوا فينا، العيال بتوع الالتراس والدويقة قالوا لي: الحريم ورا لو ما رجعتيش حنسفخك بالكف على وشك، وظابط جيش عايز ينزل زي الصرصار يستخبى وسط المدنيين
على الله اشوف واحد منهم بكرة، انا حاعرفه المرجلة والعسكرية تبقى ازاي؟ انا واحدة ست ومش معايا سلاح وحاعرفه ازاي البني ادم يبقى راجل بجد، ولو شفت منهم حد بكرة يبقى الجيش باظ فعلا، ويبقى المشير ما عرفش يربي رجالة، ويبقى مطلوب منه توضيح ليه عياله مش رجالة؟ وازاي المدنيين اللي تحت حكم مبارك ومطولين شعرهم وبنطلوناتهم ساقطة والبنات المسرسعة يطلعوا ارجل من عياله اللي احنا بندفع لهم فلوس عشان يعرف يربيهم كويس في الصحرا؟ 
ودي نمر استغاثات القوات المسلحة عشان لو ما لقتش شرطة عسكرية بكرة وسحبوا الدبابات زي المرة اللي فاتت حاتصل بيهم واقولهم تعالوا لموا عيالكم اللي ما عرفتوش تربوهم
19488
16137
16138
24010717
تحديث:
لم تقم دير شبيغل باجراء اي حوار مع المشير طنطاوي
تحديث:
ده مقال بلال فضل ضروري للقراءة
---------
انا عايزة اشتغل بقى.. عندي شغل كتير متعطل من تحت راس ثورتكم دي، عمتو نفسي اخلص شغلي.. احنا منهارين... مافيش كله قافل

لسه صاحية الصبح، وباشرب القهوة وقلت النهاردة مافيش ثورة، انا الثورة، حاقعد ابتدي في شغلي المتعطل، بس عشان انا ديلي عوج دخلت على التويتر ابص على آخر الاخبار لقيت واحد بيقول لي: يا نوارة عمر عفيفي كاتب انك حتقودي مظاهرة ضد المشير طنطاوي

وبعدين بقى في الجنان ده؟ 

وبعدين؟

وبعدين؟

وبعدييييييييييييييييييييين؟ 

ماحد يشوف لنا صرفة في الراجل ده وفيديوهات الظباط "السابقين" اللي هو عمال ينشرها!

دي خيانة عظمى يا حضرات، الدعوة لانقلاب عسكري وتفكيك مؤسسة الجيش دي خيانة عظمى، وواضح يا عيني ان الناس مش فاهمة هي بتقول ايه

لما واحد يطلع يطلب من ظباط الجيش انهم يتظاهروا دي اسمها دعوة لانقلاب عسكري

لما واحد يقول المشير حاجة، والمجلس العسكري حاجة، وبقية الجيش حاجة، دي دعوة لتفكيك المؤسسة العسكرية، بعد شوية حتبقى والشرطة العسكرية مختلفة، والحرس الجمهوري حطه على جنب، والمظلات ما اعرف ايه

انا لو مش حادافع عن جيش بلدي امال ادافع عن مين؟ البلد دي انا تعبت عليها قوي وطلع عيني فيها، ومش حاسيب حد يفكها لي من بعضها ويخربها لي.. ماحدش بيعمل له حاجة ليه عمر عفيفي ده؟ مش بيتحكم عليه غيابي ليه؟ ماحدش بيكشف هو بيشتغل مع مين ليه؟ يعني دلوقت ماهو حاجة من الاتنين، يا بيشتغل مع اجهزة، اكيد يعني المخابرات العسكرية عارفة هو بيشتغل مع مين وتكشف لنا الموضوع ده عشان نخلص من الوش ده، يا هو فيه حاجة مش مظبوطة في مخه برضه يطلعونا على الموضوع ده

واحد قاعد بيدير انقلاب عسكري في امريكا؟ ده ينفع ده؟ طب الجيش لو معتبر انه راجل اهبل والفيديوهات دي عبط يا ريت ياخد باله ان في اطفال رضع هبل برضه بيخشوا صفحته وبيصدقوه، وممكن عيل تطق في دماغه يفتكر انه بيخدم بلده يروح يلبس بدلة العيد ويعمل ظابط، وممكن لو هو بيشتغل مع اجهزة، الاجهزة دي فعلا تكون بتعمل على انها تخرب لنا الدنيا هنا

ولو هو زي القذافي كده كنا سكتنا، انما فيه ناس ماشية وراه، وناس عبيطة والله مش خونة ولا حاجة

ومنزل صور للواد بتاع كهوة المصريين وهو لابس ظابط، طيب يا ريت بقى الجيش يقول لنا ليه دول اترفدوا من شغلهم وسافروا امريكا، وليه بيروجوا اشاعات كاذبة - اشاعات عن احمد شومان على سبيل المثال لا الحصر - وبعدين المشير بيكلم دير شبيجل ومش بيكلمنا؟ 

طيب الكلام ده كويس يا سيادة المشير، كويس قوي، ويريح قلب ناس كتير، يا ريت تطلع تقوله للناس، احنا اولى بالكلام والاخد والعطا، بدل ما العيال متسابة كده وهي فاتحة مخها كنيف لأي حد يعمل فيها زي الناس، احنا دورنا على الكلام ده على صفحة دير شبيجل ومش لاقيينه، مش عارفة بقى حينزل امتى على الصفحة لإنه اتكلم للتلفزيون بيقولوا، وانا عارفة انه مش عايز يتكلم في التلفزيون عشان حريص انه ما يبانش بيدور على زعامة.. بس يعني ده كل الناس بتتكلم في التلفزيون المصري، مش لازم المبالغة في التواري عن الاضواء كده، اذا كنت انا الفسلة باطلع في التلفزيون، وبعدين ماحدش عايز يتكلم في السياسة، الناس عايزة تسمع منك ايه اللي حصل بالظبط - بدل ما الجيش والوزارة ياخدوا مراسلين القنوات على جنب ويقولهم بكرة الحقيقة تبان والناس تعرف طنطاوي عمل ايه عشان الثورة وحيعملوا له تمثال - بكرة امتى؟ انتوا مكسوفين تتكلموا؟ انتوا مش شايفين المستوى الفكري والعمر العقلي اللي لا يزيد عن 5 سنين؟ وكمان عايزين يعرفوا انت عايز منهم ايه؟ ناوي تعمل ايه؟ ايه اللي معطلك، مدام قلت بصراحة ان فيه ضغط  خارجي لدير شبيجل، ومدام باعت لنا وزير العدل يقول لنا: اتظاهروا يا عيال عشان نتحجج بيكم، ما تكلم الناس يا سيادة المشير دوغري كده، او حد من المجلس العسكري حتى يقول لهم الكلام ده، كاتمين في قلبكم وساكتين ليه؟ زمن اللللل... خلاص انتهى، ايوة اييييوووووةةةة، زمن حظر النشر عن مصانع بوتاجازات الانتاج الحربي، وتغيير المانشيتات بتاعة "الاهلي يهزم الجيش" الى "الاهلي يفوز على الطلائع" عشان ما يصحش نجيب سيرة الجيش، الزمن ده خلص، معلش، انا عارفة انكم مذهولين وحاسين انه ايه ده ايه ده ايه ده؟ الكلام ده ممنوع... ممنوووووووعععععع.... ممنوووووووووعععععععععععععع انتوا اتجننتوا ده جيييييششششش واحنا ظباااااط جيييييييشششششش - زي ما احمد شومان يا عيني كان متضايق من الكلام وقعد يشد لي في شعره في التليفون - وماشيين ورا واحد دجال وعمالين يألفوا ويلحنوا على الشعب وحالة الساسبنس اللي هو عاملها مسلية عيال كتير وقلنا العمر العقلي خمس سنين، هم طيبين بس عبط يعني، وعاملين فولو لواحد على التويتر مسمي نفسه ضابط جيش، وبيتعاملوا مع تويتاته على انها معلومات من مصادر موثوقة

امبارح كنت قاعدة مع دكتور بشير نافع وباحكي له على التوتر اللي حاصل وبعدين وريته الصفحات اللي على الفيس بوك قال لي:  ايه الهبل ده؟ هو شغل العيال ده اللي عامل التوتر؟ قلت له ماهي ثورة "شباب" بقى.. حناكل من ده كتير، واساسا بيتكلموا كلام يجيب لهم اعدام وهم مش واعيين لخطورة الكلام، والجيش بيتعامل معاهم على ان دي ناس مش مظبوطة في مخها وما ينفعش حد يحاسبهم على كلامهم

-----------

يوم 31 مارس عمر عفيفي بعت لي رسالة على الموبايل من رقم:

00962797054236

ونص الرسالة مكتوب فيها:

يا نوارا انا عمر عفيفي وتليفوني 

0018318093994

لكن لا يظهر عندك كلميني ضروري

فكتبت على التويتر الكلام ده، وما اتصلتش.. بعدها يوم 4 ابريل الساعة 11 بالليل اتصل بيا وقعد يقول الكلام اللطيف اللي قاعد يقوله على الصفحة بتاعته

وقال لي: انا مش لاقي اكل، وعيالي في مصر مش لاقيين ياكلوا، وانا رجالتي في كل حتة، ولما باكلمك دلوقت انا عارف عنك كل حاجة انا مش باكلمك من امريكا، انا كأني باكلمك وانا قاعد جنبك لإن رجالتي في كل حتة

وانا ما اعرفش الانسان مش لاقي ياكل ازاي ويتكلم من امريكا ساعة في التليفون وبعدين يستلم دماغ بلال فضل بعد ما يقفل معايا، وما اعرفش ازاي رجالته في كل حتة وهو عارف عني كل حاجة، ومش عارف عني اللي باكتبه على مدونتي؟ مع ان رأيي في المشير والمجلس والجيش مكتوب على المدونة ومش محتاج رجالته يراقبوني عشان يعرفوا انه لما يكلمني ويقول لي التخريف والتخريب بتاعه ده اني حاغسله واشطفه واعصره وانشره واكويه

وقلت له: الصفحة اللي انت عاملها باسم ضباط جيش من اجل الثورة دي اذت ناس كتير هنا في مصر واذت ظباط جيش

طبعا انا ما اعرفش اذت ضباط جيش ولا لا.. انا تعمدت ارمي الكلمة دي عشان اشوف رد فعله، بس هو ما ردش خالص على الجملة دي، سكت.. فقلت له واللواء العيسوي كلمك وقالك تعالى مصر واحنا نعين عليك حراسة خاصة وانت رفضت، فقال لي مين قال كده؟ اللواء العيسوي قالك كده؟ هههههههههههههههه الراجل فاكرني واصلة

قلت له لا: بلال اللي قال لي كده خد نمرة بلال كلمه 

هههههههههههههههههههههههههه وبلال قعد يدعي عليا تاني يوم من اعماق قلبه اني رميته عليه وبرضه اداله اللي فيه النصيب 

لولا اني انسانة اخلاق كنت سجلت المكالمة والله... يا رب يكون تليفوني لسه متراقب وارجو من الجهة اللي مراقبة التليفون انها تطلع التسجيل ده عشان الناس اللي ماشية تهلل وراه هو والعيال اللي فقسوا منه دول ومقيمين في امريكا معاه يسمعوا بودنهم هو بيتكلم ازاي ولما بيتواجه بالحقايق بيبقى رد فعله ايه

معقول ده يا ناس؟ يوم الجمعة مؤثر للدرجة دي؟ لدرجة ان كل المجهود ده يبذل عشان يوم الجمعة بتاع بكرة يفشل والناس ما تقولش مطالبها

انا عايزة افكركم بالمطالب بس بدل فيلم انقلاب الكتاكيت اللي انتوا عايشين فيه ده:

1- الاسراع في محاكمة حسني مبارك واسرته واسترداد اموالهم

2- التحفظ الفوري على الثلاثي المرح ووضع عمر سليمان تحت الاقامة الجبرية 

3- حل الحزب الوطني وتجميد نشاط اعضائه السياسي لمدة لا تقل عن 5 سنوات

4- الاشراف القضائي والحقوقي على جهاز الامن الوطني

وزاد عليهم مطلب خامس بقى من عندي انا: انتوا واجبكم تحمونا من البلبلة دي... ولا ده مقصود؟ 

ماهو انا كده ابتديت اشك في صوابع رجليا، وقاعدة اقول يا بت.. ليكون كل ده بيحصل عشان يطبقوا نظرية المغنطيس ويرصدوا الناس اللي حتستجيب للخطاب ده عشان يعرفوا مين المندس... ولا يكونوا بيرصدوا اتجاهات الشارع.. ولا يكون عمر عفيفي ده بيشتغل معاهم اصلا

ماهو لو تفتكروا يعني عمر عفيفي في اول نجاح الثورة كان بيحب المشير وبيحب المجلس وفجأتن كده غير رأيه وقلب 180، وبعدين الترويج له بالطريقة دي مش تمام، يعني فيه حاجة مش مظبوطة، مش مجرد واحد مخه لاسع، فيه حد وراه، ولو طلع ان الجيش هو اللي وراه عشان يقيس الاتجاهات حازعل قوي.. حرام عليكم، ما تطبقوش علينا اللي ذاكرتوه في الكلية لو سمحتوا

------------

لو سمحتوا سيبوني اكلم الاولاد...

يا اولاد.. فيه فرق اننا ننتقد المجلس العسكري بوصفه الحاكم السياسي المؤقت، ونعلق على قراراته ونعلق على سياساته فيما يخصنا احنا كمدنيين، وده حقنا واللي يقول غير كده نبج بطنه بجيج

وفرق ان تاخدنا الجلالة ونردد خطاب بيهدف الى تفكيك المؤسسة العسكرية الوطنية واحداث انقلاب عسكري داخل الجيش.. دي اسمها خيانة عظمى، دي اسمها خيانة عظمى، دي اسمها خيانة عظمى

ولما الانسان يردد الخطاب ده بناء على اكاونت على التويتر وفيديوهات على اليوتيوب ومدونة لشخص عمرنا ما شفناه ولا نعرف هو راجل ولا ست اساسا وصفحة على الفيس بوك، دي تبقى خيانة عظمى وهبل.. فيبقى في الحالة دي الناس مش حتعرف تتعامل معانا احنا هبل يحطونا في مصحة، ولا احنا خونة يعدمونا؟ 

انا عارفة طبعا ان الساسبنس ده لذيذ، بس كخ كخ

وتاني مرة لما "واحد صاحبي ظابط جيش ثقة" يقولك احنا بنكره قيادات الجيش وعايزين نغيرها قول له:

يا راااااجل.. ولما انتوا من زمان متضايقين من قيادات الجيش وبتقولوا عليها فاسدة وجزء من نظام مبارك، وبتقولوا على نفسكم انكم كتير قوي، ما اتحركتوش من زمان ليه ووفرتوا علينا البيات في الشارع 18 يوم و1000 شهيد قابلين للزيادة؟ هو فيه كده يا اخواتي؟ لما انتوا جبنا لدرجة انكم مش قادرين تواجهوا قيادتكم اللي قارفاكم طول السنين دي ومستنيين مدنيين عزل يموتوا في الشارع عشان تتكلموا امال حتحموا البلد ازاي؟ طب بلاش، ما اتحركتوش ليه واحنا بايتين في الشارع 18 يوم ليه؟ طب بلاش، ما اتحركتوش اول ما تنحى المخلوع ليه وقلتوا لهم: وانتوا كمان معاه؟ طب بلاش، كنتوا نايمين وصحيتوا بعد شهرين افتكرتوا ان قيادات الجيش وحشة وانتوا كتير زي ما بتقول، ما اتحركتوش فورا ليه؟ مالكم ومالنا احنا؟ احنا ناس مدنيين، وعزل، وما نعرفش حاجة عن الجيش، ولا نعرف مين فيكم الكويس ومين الوحش؟ قاعدين مستنينا لما احنا اللي ندعي لمليونية في التحرير عشان تتمهمزوا وتنزلوا تتحاموا فينا احنا؟ واحنا برضه اللي حننضرب بالرصاص برضه بدالكم؟ عاملينا دروع بشرية؟ يا وكستي يانا.. ده انتوا كده جيش؟ امال ابطال البلي مسافات طويلة يعملوا ايه؟ والمفروض اننا نثق في ظباط بالجبن ده؟ فيه يا اخواتي ظباط جيش سلميين؟ يعني لما تقوم حرب ما اسرائيل حتعملوا لهم وقفة سلمية على شط الكنال؟ طيب المجلس العسكري ده هو اللي رفّع مبارك وقال له حتتنحى يعني حتتنحى ووقف الراجل اللي واقف ورا عمر سليمان عشان يرفّعه وهو بيقول الخطاب، وانتوا يا قلبي قاعدين زي الكتاكيت خايفين تورونا حتى وشكم.. يبقى المفروض نثق في مين فيكم؟ واشمعنى التحركات الانقلابية دي ما حصلتش الا لما جيتس وكلينتون قالوا احنا مختلفين مع القيادة المصرية ورجعوا امريكا وبعدها على طول اشتغلت الحملة على الجيش المصري؟ واشمعنى التحركات الانقلابية دي ما حصلتش الا لما جيتس قال للمشير ما تقعدوا شوية وهو قالهم لا مش قاعدين احنا ماشيين؟ واشمعنى التحركات الانقلابية دي جاية كلها من فيديوهات متسجلة في امريكا؟ ثم احنا مالنا احنا؟ بترموا بلاكم علينا ليه؟ 

عموما الفيديوهات المعاتيهي دي كويسة.. اقصد مبشرة، لإن امريكا لو عارفة تخترق الجيش كانت خلصت من بدري، لإنها من زمان عايزة تشيل قيادات الجيش، لكن معنى ان الفيديوهات دي تنزل انها مش عارفة تعمل حاجة.. ده مجرد تخمين، لإني الحقيقة مش عارفة اخمن هل الهبل ده نابع من رغبة امريكا في انها تعمل بلبلة تقوم تضطر الجيش يقعد المدة الاطول اللي هي عايزاها - وموضوع انهم عايزين الجيش يقعد مدة اطول دي اتنشرت في الجرايد مش تأليفي انا - ولا الهبل ده نابع من رغبة الجيش نفسه في انه يدور على المندسين بإنه يعمل خطة المغنطيس اللي هم مذاكرينها وكل ما يشوفوا وشنا يطبقوا علينا اللي ذاكروه، ولا دي المخابرات المصرية المتصارعة مع الجيش وعايزة تعمل بلبلة عشان تحمي عناصرها اللي الجيش اكتشف انها متورطة في خيانة عظمى؟

وبالمناسبة بقى.. هو الجيش مش بيقول لنا انه لقى ناس في قيادات المؤسسات متورطين في خيانة عظمى ليه؟ ليه برضه كل شوية ياخد حد على جنب ويقول له؟

ما قلنا زمن اللللل.... خلاص انتهى... كلموا الشعب دوغري، احنا ناس طيبين.. اوكيه فيه شوية هبل وعدم نضح، بس طيبين وجدعان والله ويقفوا وقفة رجالة.. بس عدم المصارحة والشفافية دي بتخلي الناس تتشتت عن مطالبها الاساسية وتلتفت لفيلم الساسبنس.. وهو المطلوب اثباته 

----

انا ما اقدرش اقول الثورة بطيئة، يوم 12 فبراير لما اصريت افضل معتصمة واتلم عليا بتاع تلاتين واحد شالوني هيلا بيلا عشان امشي من الميدان بالعافية، ولما الناس ما رضتيش تبات عند مجلس الوزرا وروحوا وسابوا بتاع 150 واحد ينضربوا ولما الناس ما نزلتش باعداد كويسة عند وزارة الداخلية ولما الناس راحت فضت الميدان بنفسها وقالت على المعتصمين دعارة ولما الناس نامت على روحها وفجأتن صحيت قالت: ايه ده؟ الثلاثي ومبارك لسه ما اتحاكموش؟ وما فاقوش غير الجمعة اللي فاتت، ما اقدرش اقول عليهم شعب بطيء.. لإن هم الاغلبية واكيد هم اللي صح، وبعدين مش عاجبني الشعب ومش عاجبني الجيش والله اشوف لي بلد تانية، البلد بلدهم، وانا مجرد واحدة تنتمي لرأي الاقلية، والاغلبية هي اللي لها تقرر، فأنا سكت ما قلتش حاجة، وطبيعي ادلع الشعب وادلع الجيش لإنهم كويسين وعاملين حاجة كويسة، واي بطء في ادائهم هم احرار على فكرة، واقدر على قياس قوتهم

لكن انا ادافع عن كيان الدولة وجيش بلدي واجز لسان اي حد يتكلم عن الجيش وعايز يفككه وعايز يعمل فيه انقلاب وعايز يهد كيان الدولة ويخلينا عريانين قدام اسرائيل، تماسك المؤسسة العسكرية من تماسك الدولة، مافيش مؤسسة عسكرية يبقى مافيش دولة، واي حد عايز يفكك الدولة ارميه من الشباك انا... انا اتهريت بهدلة في البلد دي وعشانها من ايام ما كنت في بطن امي، بعد التعب ده كله عايزين يفكوها لي؟ لا دي بلدي بقى.. واللي قاعد في امريكا خليه قاعد مبسوط ربنا يهنيه بالعز اللي هو فيه، ويسيبنا احنا في حالنا، اخره يتضامن معانا، مش يعمل لنا انقلاب في ام البلد دي، احنا اخر انقلاب عسكري حصل من ستين سنة اضعف لنا الجيش واتسبب لنا في هزيمة 67.. هو كده، لما الجيش بيعمل شغلانة غير شغلانته بيتهزم