Thursday 6 May 2010

اللي يعرف يقول واللي ما يعرفش يخرس

 تحديث: المصدر جمال عيد:
اجرى جمال عيد اتصالات وعلم ان الفريدم هاوس قالت بانها لن تورط نفسها مع البرادعي (!) وان من حضر المقابلة حضر بصفته الشخصية وليس ممثلا عن المنظمة


تحديث:
قام جمال عيد بالاتصال بالدكتور عبد الجليل مصطفى واليكم التوضيحات من المصدر الموثوق:
1- البرادعي لم يجتمع مع منظمة الفريدم هاوس بصفتها، لكنه اجتمع مع المصريين في المهجر، وبعض من الحضور بيشتغلوا مع الفريدم هاوس وحضروا بصفتهم مصريين في المهجر ولم يحضروا بصفتهم ممثلين عن الفريدم هاوس كما انه لم يجتمع مع منظمات اقباط المهجر بصفتهم
2- البرادعي لم يؤسس اي جمعيات في الخارج مع اي حد لا مع سعد الدين ابراهيم ولا مع غيره
3- تعالوا لي بقى من خلال الشنطة.... اللي يحفتح بقه في الكلام ده والهطرسة دي حانسل الشبشب على دماغه
ليه؟ 
اولا: لانه كلام بلا دليل
ثانيا: لانه يثير الشكوك
ايه اللي يخلي ناس تفتري على الراجل بحاجة زي دي الا اذا كان وراهم اجندة معينة وبيهللوا بقى
صح وللا انا غلطانة
4- قعدة البرادعي في امريكا طول المدة دي هي السبب في انها تدي فرصة للناس تطلع عليه اشاعات
بالمفتشر كده: انا ما باحبش البرادعي.. نفسيتي قافلة منه اخر حاجة
وحاسة انه ملبوخ وعمال يقول اموت واعرف مين اللي زقني
وقعدته في امريكا مالهاش اي لازمة غير انه عايز يطفش منا
بس كلللللل ده حاجة، والطعن في الشرف الوطني حاجة تانية خالص الافترا حرام وحسبي الله ونعم الوكيل في اللي يفتري على الناس
واللي يقول لكوا كده اقلعوا الجزمة وارزعوها على بقه، احنا توثقنا من المعلومات خلاص
---------------


دلوقت فيه واحد صاحبي كلمني ونقل لي اوشاعات ان البرادعي في امريكا اجتمع بالفريدم هاوس وان سعد الدين ابراهيم عمل معاه جمعية وبيلم فلوس على حسه
الكلام ده مش هزار وما ينفعش يبقى لك نسوان 
اللي يقول كلام زي ده يجيب مصدر او صورة مش عشاني، انا شخصيا مش حاطة امل على البرادعي خالص الراجل قاعد لنا في امريكا وعمال يقول لنا على التويتر انه لامر مشين
انما فيه ناس كتير حاطة امل وحاطة صورته
حسبي الله ونعم الوكيل في اللي يعرف حاجة موثقة ولها مصدر ويخبيها على الناس
وحسبي الله ونعم الوكيل في اللي مش متأكد من الكلام ده وبينشره على شكل رط نسوان من غير توثيق 
اللي يعرف حاجة واجب عليه قدام ربنا انه يقولها ويوثقها على الاقل بخبر او صورة انا قلبت النت على خبر زي ده ما لقتش
واللي بيشوه سمعة الراجل بالكدب او بالظن ربنا ينتقم منه عشان ده مش هزار، بصرف النظر حد بيحبه وللا حد ما بيحبوش، دي حاجة والاتهامات دي حاجة تانية خاااااالص
لو المصدر عبد الله كمال يبقى ينجزوا ما يكرروش كلامه لانه مش مصدر اصلا
لو فيه مصدر تاني يجيبوه
لو ما عندهمش مصدر يسكتوا والا اللي ما يجيبش دليل على كلامه يبقى هو موضع الشك مش الناس اللي هو بيتهمهم
هو قابل سعد الدين ابراهيم.. بس يقابله حاجة ويعمل معاه جمعية ويخليه يلم فلوس على حسه حاجة تانية، الناس توعى للكلام اللي بتقوله 
مش قعدة شلت هي.. يا يجيبوا دليل يا يقولوا لنا مين اللي وراهم بيخليهم يقولوا الكلام ده ويفتروا على الناس من غير دليل

12 comments:

mido said...

حتى لو اجتمع مع منظمات م و منها الفريدوم او حتى سعد الدين او غيره فين المشكلة ؟

هو اشتغل معاهم؟

اخد منهم فلوس؟

هى القعدة و الكلام معاهم عليه جمرك؟

Unknown said...

انت حاطط بلان انك تقرن على البرادعي انت حر

بس انا مش في خطتي اني اقرن

مافيش حاجة اسمها حتى لو اجتمع

اجتمع وللا ما اجتمعش؟

والا العيال الصغيرة اللي اتفضحوا فضيحة القطط كانوا اولى ان الواحد يقرن عليهم على الاقل غلابة وما لقوش حد يقف جنبهم راحوا تافين على البلد

انما ده حيتف علينا من اولها؟

mido said...

انا بقول فرضا

وبعدين

العيال اشتغلت معاهم و اخدت فلوس

البرادعى اخباره كلها تنشر اول بأول و مفيش حاجة من دى اتنشرت

ahmedyosry21 said...

جبهة التهييس الشعبية said...

انت حاطط """ بلان """ انك تقرن على البرادعي انت حر


نوارةةةةةةةةةةةةة... انتي بتقولي "بلان" !!!!!!!!؟؟؟؟؟
هو مش انتي عربية؟؟!!!
اشمعني كنتي محموقة قوي لما قولتلك "زيرو" و انا باخد رقم تليفونك في 2 مايو !!!!!!!!

mido said...

احمد يسرى

خلاص بقى يا يسرى ملوش لزمة تعيد التعليق تانى

:D

افروديت said...

نواره متابعاكي من زمان بس اول مره أعلق انت بنت جدعه ..شوفي بقي انا شايفاكي متأثره أوي ع اتهامات صدرت في حق البرادعي وده حقك خاصه انه اللي قال كده بيفتري عليه والاكان وثق .بس بصراحه انامش شايفه للبرادعي ده أي دور ولا أعرف له برنامج لحد الان يا تري هومستني أيه لحد ما نموت نفسنا ونجيب له الكرسي لحدعنده يا ستي بلاكلام فارغ اللي عايز يحكم بيتفرج من بعيد ايه ده

amr220 said...

هو البرادعي دا ساحر؟ حايعمل ايه لوحده
قال اعملوا توكيل ماحدش عمل
قال اعملوا مظاهرات تلاقي 400 واحد بس اللي طلعوا من 85 مليون
الناس في مصر عندها استعداد تشتكي و بس
العيب فينا احنا مش في البرادعي و لا مبارك و لا أحمد عز
و النظام عارف الكلام دا كويس عشان كده بقالة 30 سنة و 30 سنة جاية تحت رجلين جمال مبارك
مش حاتحصل اي حاجة الا لما كل الناس تنزل الشارع و تقول هي عايزه ايه بالظبط
و يا سلام يا فايزة لما تبقي عايزة زي ما الاستاذة نوارة قالت قبل كده
يا تري فايزة عايزة و لا مبسوطة كده؟؟؟

حاج محمد said...

أى حديث عن البرادعى سيكون حديث عبثى وتضييع وقت - هو شخص غير جدير بالإهتمام أصلاً - طب ماكنا إهتمينا بأى سائح جاء يزور مصر يومين وإتفرج علينا وبعدين روح بيتهم - إشمعنى يعنى الخواجة البرادعى بالذات؟

mohammed said...

بصراحة يا نوراة مع احترامى يعنى ما كانش ليها لازمة التدوينة دى اصلا
اقصد يعنى كنتى الاول تتأكدى من المعلومة بعد كده تعملى التدوينة يعنى انت برجيلتينا و خلاص و بعدين هدى اعصابك شوية و بعد هو الخومينى كان فين لما الثورة قامت فى ايران اهدى أومال كد ه و بالراحة على نفسك شوية

dr.lecter said...

ياجدعان سيبوا الراجل في حاله خليه يعمل في صمت

Unknown said...

search for the regime behind these rumors and link them to the role youm7 has played by publishing false info repeatedly about the failure of el baradie's group in the US even though he doesnt have a group in the US!
I think this man knows what he is doing but it is we the ppl who arent doing enough. Those who dislike him need to come up with ideas and actions instead of spending years suspecting him while wasting a real chance to get rid of the regime.

طنطـــا واى said...

؟(((موقع الجمعية الوطنية للتغيير معطل حاليا.
نأسف لهذا العطل ونعدكم بالعمل على اعادته فى أقرب وقت ممكن ان شاء
الله))) .؟؟؟؟؟ يا نهار أســـــود ... مش عارفين يحلوا عطل صفحة انترنت
؟؟؟ حيحلوا عطل دولة و 80 مليون بنى أدم ؟؟؟ أنة لأمر مشين