Monday 17 May 2010

حنعمل ايه عشان نوفر مية

تحديث:
البوست ده مهم جدا، اللي كاتبه مهندس مدني، معلش هو طويل بس لازم تقروه كلمة كلمة لان دي حياتنا، وبيوضح خطورة الوضع اللي احنا فيه واهمية دورنا احنا كشعب في الحفاظ عليه
تحديث:
رجاء الانضمام لجروب الفيس بوك
تحديث

انا علقت ورقة في الاسانسيرات بتاعة العمارة وعلى مدخل العمارة 
كتبت سريعا اننا حنواجه مشكلة مية وان كلنا نبدأ بنفسنا وكتبت خمس نقط:
1- ممنوع غسيل العربيات والاكتفاء بالتنظيف بالفوطة المبلولة
2- الاقتصاد في استخدام الماء المنزلي في الاستحمام والوضوء وغسيل الاواني
3- منع اي رش بالماء امام العمارات بدعوى تخفيف الحرارة لان ده اهدار للماء ولا يخفض الحرارة وانما يزيد الرطوبة
4- اعادة تدوير الماء المستعمل ولو لري الزرع امام العمارات
5- اتخاذ موقف ايجابي في حالة رؤية اي حد منا لشخص يهدر الماء وعدم السلبية
وحطيت حديث الرسول بتاع: لا تسرفوا في الماء ولو كنتم على نهر جار
ماليش دعوة باليائسين، انا باحاول ابقى براءة قدام ربنا على الاقل، ولو كل واحد قال مافيش فايدة يبقى ماحدش حيعمل حاجة، وبقية الناس برضه ما بيعملوش حاجة عشان هم كمان بيقولوا: مافيش فايدة

تحديث:
الوحيد اللي شارك لحد دلوقت على المدونات هي مدونة المقاومة المصرية
اللي بيقول مافيش فايدة يروح ينتحر بقى بدل ما يشوف بلده وهي بتخلص قدامه
على الاقل نبري ذمتنا قدام ربنا

2- مدونة انسانة شاركت برضه معانا في اقتراحات لترشيد المياه
-----------
احنا لازم نبتدي حملة شعبية عشان نوفر مية
ما تستنوش عوكل واللي معاه، مش حيعملوا حاجة ابدا، علي الغتيت قال ان الازمة دي قانونا اختصاص رئيس الجمهورية ومافيش اي حد ولا حتى رئيس الوزراء يصلح لحل الازمة دي
وزي ما انتوا شايفين، لو كنا حلفناهم على المصحف يضيعوا المية ما كانوش بذلوا كل الجهود المشكورة دي
دلوقت احنا علينا نعتمد على نفسنا كمواطنين
اساسي يعني مافيش غسيل عربيات، انا من زمان باقول كده للبواب وباطلب منه يطوقها بس، ومن زمان باعمل كده من قبل الازمة، هي طبعا معفنة، بس مش مهم
مافيش رش عشان الدنيا تطري
انا عارفة انك مش بترش اكيد، بس بتعدي قدام محل بيرش، وبتتكسف انك تتكلم
لا ما تتكسفش، ياروح ما بعدك روح، انا شخصيا بافتح جاعورتي عشان يقفلوا المية
ولازم نوفر في الكهربا، وده عيب فيا، دايما انسى النور، لا مش حانسى النور تاني
اي شكل من اشكال الهدر لازم تتصرف
انا قلت لهم على التويتر، وباقول لكوا اهو، اي حد عنده اقتراحات لتوفير المية، ما يكتبهاش تعليق هنا على المدونة
يكتبها على مدونته، ولو ما عندوش مدونة يعمل مدونة مخصوص عشان خاطر توفير المية
وانا حازود اللنكات هنا، ونبتدي الحملة وان شاء الله اكتب عنها كمان في الدستور وعلى قد ما نقدر نبذل مجهود شعبي وفردي
ما يجيش حد يقول لي الحكومة تعمل ايه؟ لو عايزة تعمل كانت عملت، انسوها بقى، احنا مالناش غير ربنا، واهم حتى كرهوا فينا كل الناس ماحدش حيساعدنا
موضوع المية ده لا فيه مسلم ولا مسيحي ولا اخواني ولا يساري ولا ليبرالي ولا حتى نبيل شرف الدين - اللي ميزة الازمة الوحيدة في الموضوع ده انه حيموت معانا، اللهم الا اذا عمل لجوء مائي لاسرائيل صاحبته اللي بتخطط لإفناءنا - الموضوع ده كلنا لازم نتعاون فيه ولازم تعمل توعية حواليك
انا مستنية بوستات مدوناتكوا، عشان اعمل لها لنك هنا عندي وكل واحد فينا برضه يوزع على قد ما يقدر

32 comments:

Unknown said...

http://www.heraldsun.com.au/news/community-leaders-split-over-controversial-call-to-ban-burqas-in-public/story-e6frf7jo-1225863348860

فين حروق الإنسان ؟؟

Unknown said...

Dear Nawwaara,
Don't you think we deserve to be punished for our bad consumption of water? god's gift to us. Even at our homes, the amount of water we waste for getting a shower, for washing dishes, and even for maing WODOO2 !! is amazing!! don you knwo that excessive usage of water in WODOO2 is MAKROOH? i tried telling that to some ladies that i knwo and they looked at me as if i am just trying to annoy them...no, its a general attitude, we have no respect, not for water and not for any god gift, and i am sorry for that becuase i am one of US, and i belieev we are about to be punished!

محمد صبرى said...

لأ بقى معلش , بقى انا مطلوب منى اوفر فى المية و فى الكهربا عشان اللى أكلينها والعة يتمتعوا بخيرها لآخر لحظة .. لأ معلش .. أنا و اتصور فى زيى كتير - غالبية المصريين الأمامير معايا طبعا- هتصرف بشكل فردى انانى قذر جدا , و هبعزق ميه و كهربا زى ما انا عايز , و مادام الحريقة بعيدة عن هدومى يبقى تولع , و حتى لما تمسك الحريقة فى هدومى هغيرها و هغير جلدى و هسيبها خرابة و هدور على غيرها ,, مش قادر استوعب انا ازاى مطالبن احنا اننا نتصرف كجزء من كل فى بلد الفرد

ابشرك انه الحمد لله نجحت جهود اتربى عليها جيل كامل فى انها ترجع عقولنا و أرواحنا من مرحلة التجمع البشرى و الاستقرار حول الانهار و من ثم الاحساس بالانتماء للمكان , الى عقلية الراعى و استنزاف الموارد و من ثم البحث عن مرعى آخر , و اتوقع انه المرحلة الجاية من الخطة هينتج عنها جيل بعقلية الجمع و الالتقاط , و الحمد لله اولا و اخيرا و كل تجمع بشرى و انتوا بخير

فى فنزويلا الدنيا اتقلبت لما شافيز شاف انه فيه ازمة مية و كهربا , و عمل خطة لتوفير المية و الكهربا .. الدنيا اتقلبت رغم انه قرر انه اول منطقة هيطبق عليها نظام التقشف هى منطقة القصر الرئاسي

آل نوفر آل

utopia said...

اخشى ان حملة توفير المياه فى الاستعمال المنزلى لن تصنع فارق
نسبة الاستهلاك المنزلى تقريبا من مياه النيل 6% اى حوالى3 مليار متر مكعب
بينما الزراعة تستهلك اكتر من 70%
وخصوصا زراعة الارز التى تستهلك 25%من مياه النيل
ارجو ان تصححي معلوماتى لو كان بها خطأ

CheMonier said...

ده مشاركة منى فى الحملة ان شاء الله وهنحاول نعمل جروب على الفيس بوك للحملة
مدونة المقاومة المصرية
http://faresmuslim.blogspot.com/2010/05/blog-post_17.html

أبو أمك said...

طب أنا لو عملت بوست عن إن مافيش مزز طرية وإن العملية بقت ناشفة
ده يعتبر مساهمة في الموضوع ؟

محمد صبرى said...

هى فيه حاجات كده رغم انها ممكن تتحس , انما احيانا بتبقى محتاجة تتقال صريحة لأنه الموقف لا يحتمل

عشان كده حابب أوضح أنه أنا طبعا بتمنالك النجاح فى حملتك دى , بس فى فرق كبيرأوى , بين الأمنية و بين واقع الحال, و انا شايف انه واقع الحال بيقول أولا إنه الموضوع أكبر منك و منى و من حملة توفير مقترحة لأنه المسألة مش سنه جفاف و لا اتنين و لا حتى عشرة , دا مخطط محصلش زيه فى تاريخ البشرية كلها للسيطرة على بعض الشعوب (المارقة) من وجهة نظر الامبريالية العالمية , و المخطط دا اتصرف عليه جامد جدا و اتوظفتله أحدث تكنولوجيا العصر بعد دراسات جدوى حاسمة لأثره و قدرته التدميرية , و عليه فمش متصوَر أبدا انه المقاومة تكون من خلال توفير مية الاستهلاك المنزلى دا مش واقعى ابدا , المقاومة لازم تكون سياسة دولة عندها اوراق ضغط اقليمية و دولية و وسائل جذب و صنع تحالفات مع الدول المهمة مائيا بالنسبالنا و انتى و انا عارفين انه دا كمان مش فى ايدك , واقع الحال بيقول انه أغلب الناس يأسوا فعلا من كل حاجة - و انا منهم - يحزنى دا جدا , بجد و الله العظيم يحزنى , انما دا مش هيغير من الحقيقة شيء , واقع الحال بيقول هو و آخر التقارير انه العراق بلاد الرافدين - و اللى بتخضع لنفس المخطط , بدأ اهله بالذات فى الشمال يواجهون الموت عطشا و لأنه التوفير مش هيخلى النهر يجرى بدأت الناس تحفر آبار لانقاذ ما يمكن انقاذه , رغم عدم جودة مياه الآبار فى المنطة للاستهلاك , تفتكرى التوفير لغاية مرحلة الآبار دا شىء تقدر روح بنى آدم انها تتحمله , هو مش كده نبقى اشبه برضو بالللى بيحارب طواحين الهوا, على فكرة فى ختام سلسلة واقع الحال حابب اقولك انه انطباعى عنك انك كمان جواكِ يأس اهل البلد اللى انتى واحدة منهم و الأسلوب الساخر اللذيذ و ضحكتك اللى هى ضحك كالبكاء أكبر دليل على دا , يمكن بس الفرق انه يأسك دا تحت السيطرة و كل امنياتى انه يفضل كده دايما تحت السيطرة

-فى النهاية بقولك رغم كل شىء انا فعلا يسعدنى انى اشوف ناس لسه متملكش منها اليأس بالكامل بتاخد خطوات و باتمنالك و اللى هينضم ليكى النجاح ,و مين عارف يمكن تقدروا تعملوا المستحيل و تبعثوا فينا الروح من جديد

فيه ناس مبدأها,خلى بالك انك متديش امل للناس فى حاجة انتى مش شايفة احتمال نجاحك فيها أكبر من احتمال الفشل لانه لو اتصرفتى بالشكل دا و فشلتى أكتر من مرة ,الناس هتفقد الثقة فى اللى بتقوليه و مش هيصدقوكى تانى و لا هيسمعولك حتى فى الوقت اللى هتطلبى منهم حاجة جوهرية جدا و خطيرة جدا و انتى مالية ايدك من جدواها, و انا الى حد ما بميل للرأى دا

و فيه ناس بتتبنى الحلم حتى لو كانت كل حاجة بتقول انه هيفضل بس حلم طالما مؤمنة بيه و بقيمته , و الناس دى غالبا بتفشل , بس هما دول اللى بيبقوا رموز و ابطال لما بيناضلوا بتفانى بغض النظر عن النتيجة, و اظنك من الفئة دى, و ان كنت بتمنالك انتى و اللى زيك انكوا تنجحوا و تصنعوا الاستثناء

على فكرة الحلم مبهر اوى و حتى غير الحالمين ,كتير منهم بيحترموا و بيقدروا الناس الحالمة , فاختلاف التفكير هنا مش بالضرورة معناه رفض و تضاد


على فكرة مداخلتى دى مش للنشر لانى مازلت متمسك بكل حرف قلته فى مداخلتى الاولانية اللى هى قناعتى دلوقتى , و لانى مش عايز ادخل فى سجال , خلى اللى هيشاركوا يشاركوا من غير شوشرة عليهم ,, يمكن , لعل و عسى

انا بس اسف انى انفعلت و جت مشاركتى اللى اتنشرت فى اول الموضوع بدرى اوى و فى توقيت بايخ شوية

و بالتوفيق ان شاء الله

lastcrazyboys said...

لا مانتي ماعرفتيييش ...الل حوصول ان الاخــوة في اثيــوبيــا واوغنــدا ..جاتلهم اخبــارية ان الميــة كده كده هتتخصخص ..!!قال لك : يا فيها ياأخفيـها..يا حونتوس منــك له

طبعا عرق الكرامة "نقح" هالحناتيس..وانت تشاركنا لقمتنا بحق ايه..!؟
قوووم ايييه ..عتريس قفل الهوييييس.. والأكــادة ان البلــد المــرة دي
..........



مافهــــاش فـــؤادة ..يا ولـــداه

أنا و هؤلاء said...

بصوا يا رجاله بالصلاة علي النبي كده انا مهندس مدني وده تخصصي فهتكلم من منطلق علمي فياريت محدش يزعل من الكلام الي هقوله

اول حاجه حصة مياه الشرب بتبقي من نهر النيل كويس؟
طب حصة النيل كام حصة النيل 55 مليار متر مكعب

طب يا تري قدين بنستهلك من الحصة دي مية شرب يعني المية الي بتيجي في الحنفية

تعالوا نحسب متوسط استهلاك الفرد في السنة وبيقدر ب 480 متر مكعب سنويا

يعني معدل استهلاك شعب مصر سنويا بمعادلة بسيطة بيساوي

480*80000000عدد سكان مصر *1.2 معامل فقد او هدر

الاستهلاك بتاعنا يطلع 46 مليار متر مكعب سنويا

تعالوا بقي نقسم الاستهلاك بتاع الحنفية ده بيروح فين

50% استهلاك منزلي (اكل وشرب وحموم ووضوء ورش قدام البيت -قال بيجيب تراوة- )

20% استهلاك صناعي للمصانع

20% استهلاك تجاري محلات ومولات وكده

10% خدمات عامة حمامات وجناين وكده

يبقي النتيجة ان 23 مليار متر مكعب في ايدك في البيت خلي عندك دم بقي وحاول تحافظ عليهم

انتهي والله الموفق

Unknown said...

انا عندى راي وهو ان المشكلة مش في مياه الشرب لان استخدام المياه في الشرب والاحتياجات لالشخصيه بما فيهم الرش في الشوارع وغسل السيارات يمثل 15% من كميه المياه التى تقع من نصيب مصر اما 85% من مياه مصر فتذهب للزراعة والحل الامثل هو تغيير اساليب الري التقليديه الجارية والانتقال بدل من ري الغمر ان نروي باسلوب الرش او التنقيط او اي اساليب حديثه اخرى

Unknown said...

انا عندى راي وهو ان المشكلة مش في مياه الشرب لان استخدام المياه في الشرب والاحتياجات لالشخصيه بما فيهم الرش في الشوارع وغسل السيارات يمثل 15% من كميه المياه التى تقع من نصيب مصر اما 85% من مياه مصر فتذهب للزراعة والحل الامثل هو تغيير اساليب الري التقليديه الجارية والانتقال بدل من ري الغمر ان نروي باسلوب الرش او التنقيط او اي اساليب حديثه اخرى

سكوت هنصوت said...

تم بالفعل...بقترح تعليق الورق في المحلات مش بس في العماير...عشان دول اكتر ناس بتهدر مية قدامهم

سكوت هنصوت said...

مهندس مدني

اجزت فأوجزت

نفس الناس تعمل بدل ما ترغي...يعني يصدعوا دماغنا مفيش فايدة...وفي الاخر يبقوا هم اول ناس تبهدل الدنيا...مهو عندهم حق...فعلا..مفيش فايدة فيهم...الناس بتوع مفيش فايدة..انتم اكبر اعداء لمصر...لإنكم اكبر محطم لقوة تحرر مصر

بطلوا سلبية وابدأوا بنفسكوا...وسيبوا الباقي لله

kholy said...

لازم مهندسين الري يوفروا للفلاحين و يشرحولنا و للناس اللي في مجلس الشعب إزاي نقلل استهلاك المياه في الري و لازم رجال الأعمال اللي عايزين يعملوا خدمات للمجتمع يمولوا مشاريع تحويل الري للطرق الأحدث الموفرة في المياه
بالنسبة للي زينا أنا شايف إن أهم حاجة إن لو الواحد شاف حنفية مفتوحة في جنينه و لا في الشارع يقضي خمس دقايق بس في إنه يحاول يقفلها أو يجيب المسئول عنها يفهموا إن دا غلط
و ربنا يلطف بينا

احمد خليل said...

مياة الشرب او المياة المعلجة تمثل 2,3مليار متر مكعب ونصيب مصر الحالى 55.5متر مكعبوالزراعة تستهلك 80 %المية من المياة لا شك ان الحملة لترشيد استهلاك المياة امر محمود ويجب تشجيعة ولكنى اود ان اضيف ان حصة مصر ستنخفض لصالح دول المنبع .الصين وكوريا استأجرت 20 مليون فدان لانتاج الوقود الحيوى وفى المستقبل القريب سيكون الوقود الحيوزى مطلوب بشدة والمكان المناسب افريقيا .
الزاعة فى مصر تستهلك 80 فى المائة من المياة ,والزراعة بالغمر تهدر 6 اضعاف الطرق الحديثة كالرش والتنقيط.واذا فقدت مصر نصف حصتها من المياة فيمكنا زراعة نفس المساحة بالرى بالطرق الجديثة .ولكن الطرق الحديثة لاعداد الارض مكلفة ولا يستطيع الفلاح بامكانتة تنفيذها كما انها تحتاح الى انهاء التحزئة والمساحات الصغيرة والملكيات المجزأة ,
الرأسمالة المصرية والعربية جاهزة للدخول وشراء الارضمن الفلاحين بسعر متدنى واقامة مشروعات عملاقة تحتاج عمالة صغيرة وتزرع الارض بالاساليب الحديثة وتختفى من مصر طبقة الفلاحين .حدث هذا فى اورباحيث تقضى الرأسمالية على طبقة بالكامل .
اذكر بمشروع قانونبيع مياة الرى الذى رفض حين عرض وتلان مع حملات ترشيد الاستهلاك سيقبل
40 مليون فلاح حيموتوا من الجوع...

مش فاهمه said...

طيب يعنى احنا نحط المواعين الوسخه فى طبق كبير و النضيفه فى طبق تانى كبير و نحاول نوفر نقطه ميه و ملاعب الجولف فى القاهرة الجديده و دريم و مارينا بتبلع ميه بالهبل .......معقوله دى يا ناس ملاعب جولف فى بلد صحراويه على وشك الموت عطشا
احنا فى كابوس الناس دى بتقولك مش مشكله دلوقتى المشكله بعد خمسين سنه تخيلوا بيتكلموا عن ولادى و احفادى باستهتار غريب

تونسي said...

"1- كل نقطه تنزل من الحنفية كل ثانيه نفقد 4 لتر / يوم
2- كل 2 نقطه تنزل من الحنفية كل ثانيه نفقد 14 لتر / يوم

متأكدة أنه مهندس؟؟

ehabafndy said...

متضامن ... متفاعل ... مشارك معاكى بقوة فى هذا الموضوع و أنا عملت أول موضوع ليا على المدونة بتاعتى و طرحت فيه بعض الأفكار أرجو تكون مفيده .

وادى اللينك

http://ehabafndy.blogspot.com/

Unknown said...

طيب يانوارة بدون زعل كده

احناحانبطل نستحمى و حانعفن وريحتنا تطلع

وحانبطل نغسل العربيات وحانربى فيها فيران و حانطوقها بالبللة لغاية الدهان مايروح

وحانروى أشجار الحديقة زى المهندس اللى انت حاطه اللينك بتاعه مابيقول (مع انى مش فاهم هو متخيل المصريين عايشين فى قصور بجناين ولا ايه)

وحانعمل زى الأجانب ونلغى الشطافات فى التواليت ونستخدم ورق التواليت ونشيله على راسنا لمقلب الزبالة عشان الزبالين بطلوا ييجوا البيوت

حانعمل كل ده عشان نوفر

بس السؤال المهم

هل الباشوات بتوع ملاعب الجولف حايوفروا فى الميه؟

هل الباشوات بتوع البيسيم حايوفروا فى مية البيسيم؟

هل نقدر نقنع الباشوات ان المرسيدس والبى ام والجاجوار والهامر مايتغسلوش بالميه ويطوقوا بالفوطة الزفرة؟

هل نقدر نقنع السادة ملاك الجاكوزى بتوفير شوية ميه نستحمى بيهم بالكوز؟

Unknown said...

لا البشوات بتوع ملاعب الجولف وحمامات السباحة دول عايزين بقى قسم خاص في الحملة دي

وان شاء الله انا لاعنة ابوهم في الدستور الخميس ده

دول اكتر ناس بتستهلك مية

بس مش احرص ناس على البلد

وبما انهم عندهم باسبورات لجنسيات تانية بحيث ان لما البلد تخرب ياخدوا بعضهم ويمشوا

فياريت يلموا فلوسهم ويخلعوا من دلوقت

حلال عليهم الفلوس اللي سرقوها بس ما يخلصوش المية

احنا ابتدينا بالطبقة المتوسطة والطبقة الفقيرة في النصح لان دول اللي يهمهم مصر يا ابو عمر

هم دول اللي حريصين عليها ومالهمش حتة غيرها

بس البهوات بقى ان شاء الله حنمسكهم كده ونمصمص اهاليهم

يا الناس تطلع عليهم تخلصهم يا يمشوا من البلد

قال حمامات سباحة قال

مش كفاية انهم واخدين الساحل الشمالي لحسابهم

Unknown said...

ولاد الكلب لا منهم ولا كفاية شرهم

انت ايه اللي خلاك تفتح الموضوع ده دلوقت؟ انا كل ما حد يفتحه انفجر

ehabafndy said...

يا أستاذ أبو عمر إحنا ملناش فيه إبدأ بنفسك و حاول توعى غيرك على قد ما تقدر و نصيحة قليلة تمنع بلاوى كتيره و خلونا بقى نبص لنفسنا و نبطل نبص لغيرنا يمكن غيرنا لما يشوفنا يتكسف على دمه . و حتى إذا الكلام ده كله مجابش نتيجه فمعذرة إلى الله بنقوله يا رب اهه إحنا عملنا على قد مقدرتنا و اهو حتى لو منابناش دنيا يبقا نابنا الآخره .

Unknown said...

يا أستاذ ايهاب أفندى

احنا مش بنبص لغيرنا لسبب بسيط انه لو بصينالهم مش حانعرف نعيش وحانتجنن أو حاننتحر

يا أستاذ ايهاب أفندى

ابدأ بنفسك دى خطة الحكومة عشان تعودك انك تخلليك فى حالك مقفول على نفسك فى كل حاجة واللى يولع يولع.. وبالتالى يبقى اللى بتعمله الحكومة مالناش فيه زى مابتقول حضرتك

يا أستاذ ايهاب أفندى

الناس دى عمرها ماحاتشوفنا لأننا دون مستوى نظرهم وحياتهم ولو شافونا عمرهم ماحايتكسفوا على دمهم ل 3 أسباب: أولها اننا بالنسبة لهم مالناش وزن وثانيا لأنهم مابيتكسفوش وثالثا لأنهم ماعندهمش دم

يا أستاذ ايهاب أفندى

ربنا لما يسألك حايقوللك انت ليه عشت جبان ومت جبان.. انت ليه كنت ضعيف؟
رسولنا قال : المؤمن اقوى خير و أحب الى الله من المؤمن الضعيف

واحنا ضعاف

والضعيف مابيطولش دنيا و مايضمنش أخرة

Anonymous said...

http://mogradfekr.blogspot.com/2010/03/blog-post_07.html

سبهللة said...

كنت ناوية أتضامن معاكى ييا نوارتنا
بس لما قريت آخر بوست انا كاتباه عن طبقة معينة من الناس تمثل أكثر من نصف عدد السكان
لاقيت انى مش هاقدر أتضامن معاكى
لان الناس اللى المفروض نوعيهم
ما يعرفوش يعنى ايه ميه أصلا عشان يوفروها

ممكن تقرى البوست وتقوليلى رأيك؟؟

Dr90 said...

حاجة تجيب شلل رباعي
شكلنا هنرجع لعصر ما قبل الزراعة
و نرجع لمرحلة الصيد و الجمع و
الألتقاط
بس عامة في تهويل شوية في الموضوع من اعلامنا
حا ان في مصيبة بتحصل و احنا مرميلنا حاحجة تلهينا
ب لو بيلهوتا بحاجة زي دي
تبقى المصيبة اية
ربنا يستر

Zanitty said...

الاخوه الافاضل
نظرا لاهميه الموضوع القصوى فقد نقلته الى مدونتى بعد اذنكم مع ذكر المصدر الاصلى (مدونتكم)
اشكر لكم تفهمكم للموقف كما اشكر لكم اهتمامكم بهذا الموضوع القيم

Unknown said...

السلا عليكم
شيء كويس جدا الحملة دي
مشاركتي و رأيي في الوصلة التالية
http://internetawy.blogspot.com/2010/05/blog-post_5763.html

suidreams said...

"دول المنبع" توقع اتفاقية لتقسيم مياه النيل اليوم

الأربعاء، 19 مايو 2010 -

ذكرت صحيفة "نيو تايمز" الرواندية فى عددها الصادر اليوم أن وزير البيئة الرواندى، ستانيسلاس كامانزى، وصل أمس الأول، الاثنين، إلى أوغندا ضمن زيارة رسمية لوفود سبعة من الدول الأعضاء فى مبادرة حوض النيل بدون الحليفين مصر والسودان، وذلك لعدم موافقتهم على الاتفاقية التى سيتم توقيعها اليوم والهادفة إلى تقسيم مياه النيل بحصص ثابتة ومتساوية.

و صرح كامانزى لدى وصوله أمس مدينة انطيبى الأوغندية لـ "نيو تايمز" قائلا: "لقد جئت اليوم لسبب واضح، إذ سأتمكن من الاتصال بشكل أكثر تفصيلا بعد جلسات الاستماع والاستشارة مع زملائى من وزراء الدول السبع الأخرى".

وتسعى هذه الاتفاقية بين دول المنبع السبع إلى تحديد إجراءات تقسيم مياه النيل بين الدول السبع بدون مصر والسودان، بزعم أن تقسيم المياه وفقا لاتفاقيتى 1929 و1959 كان غير عادل، كما تعمل الاتفاقية الجديدة على إلغاء حق مصر فى الحصول على نحو 55,5 بليون متر مكعب من المياه، وأيضا حقها فى الإخطار المسبق قبل إقامة مشروعات على مجرى النيل

suidreams said...

http://www.youm7.com/News.asp?NewsID=229146

ehabafndy said...

على مهلك عليا شوية يا إبو عمر هو أنا قلتلك خليك سلبى و ضعيف إنا بقولك يا عم خليك إيجابى ويلا بينا نعمل حاجه يمكن تجيب نتيجه .
إذا كنت من الناس إللى شايفة إن مفيش فايده فدى مشكلتك و إنت حر و على العموم أنا غلطانلك يا عم خليك إنت قوى و سيبنا إحنا فى ضعفنا .
ملحوظة : أنا مش من الإخوان بس إبدأ بنفسك ثم أدعو غيرك دى من مبادىء الإخوان مش الحزب الوطنى أما مبادىء الحزب الوطنى هى إتلهى فى نفسك و ملكش دعوة بحد و إللالالالالالالالالالا.

Unknown said...

نوفر عشان حتى ناننبقاش مسرفين و ربنا يحاسبنا على ده
واللي بالعينها هيتحاسبوا برضه

دي مشاركتي
http://www.sinarshebl.com/water/05/2010