Sunday, 30 May 2010

بالنوسبة لقناة الرحمة

والناس كلها ما صدقت ومسكت في حسان - اللي انا مش باطيقه الشهادة لله - وقطعت في لحمه عشان ناشد السيد الرئيس
امال يناشد مين؟ 
كالعادة، النظام المصري تصرف كأوطى ما يكون مع الناس اللي استجابت له وخدمته، وعشان كده حسان ناشد الرئيس، على فكرة، زي ماهو مش كل واحد بيروح يناشد امريكا انها تبطل تدعم مبارك بيبقى جاسوس، مش كل واحد بيستجيب للنظام المصري بيبقى عميل وقذر
صحيح النظام استخدم السلفيين للسيطرة على الناس
بس هم من جانبهم كانوا شايفين انهم بيعملوا خير ومقتنعين باللي هم بيعملوه وشايفين انه طب وحتى لو النظام ده ظالم وكافر من وجهة نظرهم واداهم فرصة يتعاملوا مع الناس عشان "يصلحوا المجتمع" برضه من وجهة نظرهم ومن خلال اعتقادهم هم انهم شايفين ان ده اصلاح، يبقى ليه ما يستغلوش الفرصة، مش يمكن ربنا اللي سهلها لهم؟ 
ويمكن كانوا فاكرين ان فيه رجل مؤمن من آل فرعون يكتم ايمانه اللي هو علاء مبارك وهو اللي وقف جنبهم عشان ياخدوا المكانة دي
طبعا لا
طبعا النظام كان بيستغلهم عشان يسيطر على الناس
وطبعا لا عملوا اصلاح ولا نيلة وخربوا الدنيا
وطبعا اللي يعمل صفقة مع النظام يبقى يا عبيط يا عبيط زي اللي بيعمل صفقة مع امريكا برضه يبقى يا عبيط يا عبيط
لكن في النهاية هم عملوا اللي يعرفوه واللي اقصى ما في طاقتهم واللي في تصورهم انه خير
نختلف معاهم انه خير 
وانا شخصيا شايفة انه شر كبير، زرعوا جوه الناس الكره والغل ونيموهم وعطلوا حراك سياسي كان ممكن يغير البلد للاحسن ومتوحشين غزوة الجزائر من انتاجهم - بالرغم من شيوخ السلفية ما كانوش مع فتنة الجزائر - بس طبيعة الناس المتوحشة دي تربيتهم، واللي عملوه يرقى الى الافساد لان بسببهم الناس تعدت على دور عبادة وعلى ابرياء وشقوا صف المسلمين بتكفيرهم للناس، ده غير انهم تفهوا وسطحوا الناس، وخلوا تركيز الناس كله في قضايا جوهرية زي: لما اجي اسجد انزل على ركبي وللا على ايديا؟ اي والله، وناس كانت بتعيد الصلاة يا عيني عشان نزل على ايديه مش على ركبه.. إلخ
لكن في النهاية هم كان نيتهم خير، واتصرفوا بسذاجة
والنظام دلوقت غدر عليهم وقفل لهم قناة الرحمة قال ايه عشان بيشتموا اليهود
بقى بالذمة دي حجة تدخل على عيل صغير
من ساعة ما عرفناهم وهم بيشتموا اليهود والنصارى عباد الصليب والروافض، هم بيعملوا ايه في حياتهم غير انهم يشتموا؟ ما طول عمرهم كده، ايه اللي جد؟ 
اللي جد ان النظام ما بيستخدمش اتجاه اكتر من خمس ست سنين بالكتير وبعدين يرميه زي ورقة الكلينيكس ويستخدم غيره
وهم عاملين صفقة مع النظام نهزأهم ونتخانق معاهم، لكن وهم مغدور عليهم ما ننزلش عليهم بالامواس والسكاكين ولا نشمت فيهم عشان حرام كده دي مش اخلاق، واللي حصل لقناة الرحمة ده ظلم، بالرغم من تأثيرها السيء على المصريين وعلى العالم العربي كله ده فيه واحد اردني على التويتر بيقول لي اول مرة نسمع كلمة مسلم ومسيحي وسني والشيعي في الاردن كان بسببكوا وشيوخ السلفية بتوعكوا وقنواتهم وانا اتفاجئت اساسا ان الاردن بقى فيها اتجاه كده، انا اخر ما اوعى على الاردن انه مجتمع ما فيهوش طائفية ولا مذهبية، فيه حاجات تانية، بس دي بالذات مش فيه
لكن برضه القناة ما تتقفلش، دي مصادرة على حرية الرأي، والراجل ما يتبهدلش كده ويمشي يشحت ويترجى في الرئيس، مهما كان ده راجل له مكانة، ولو مالوش ده انسان، ما يصحش يتذل كده، والناس مش لعبة عشان كل ما يتعلقوا بحد يروحوا حارمينهم منه ويجيبوا لهم بديل، عيب كده، ده استخفاف بعقول البشر، عايزين اتجاه تاني ينزلوا قنوات تانية وينزلوا شيوخ من اتجاهات تانية ويفتحوا المجال قدام الناس انها تختار، مش يلعبوا بالناس بالطريقة دي، مرة يغذوا اليسار ومرة يغذوا الاخوان ومرة يغذوا السلفيين هو الناس على كيفهم؟ ويلعبوا باصحاب الاتجاهات السياسية او الدينية، والتانيين مغفلين يا عيني وفاكرين انهم بيعملوا خير 
مش مفروض اتجاه يتغذى على حساب اتجاه، المفروض كل الاتجاهات تبقى معروضة قدام الناس بفرص متساوية والناس هي اللي تختار، ومش مفروض يعاملوا الاتجاهات كأنهم واحدة استغفر الله العظيم قضوا معاها ليلة واخدوا غرضهم ومشيوا، دي ناس، اي ناس منهم، عندها عقيدة واخلاص لحاجة معينة، مش زيهم على كل لون يا باطسطة، وعندهم رغبة يخدموا، كلهم، على اختلافاتهم وكرههم لبعض، كلهم عندهم رغبة يخدموا، وكل واحد شايف اتجاهه هو الصح وطريقته هي المثلى وعايز يساعد الناس بطريقته
ومش مفروض ان الاتجاهات تشتمت في بعض مهما كان، لان اللي بيحصل لغيرك النهاردة حيحصل لك بكرة، كل انسان من حقه يعرض افكاره، بالطريقة اللي تناسبه، وبفرص كافية ومتوفرة للجميع.. وماحدش يخاف على الناس انها تتلخبط، الناس نبيهة وذكية ولو اتلخبطت في الاول بعد شوية بتستقر 
انما اللعب بالبشر كده حرام... يا ساااااااااااااتر عليك يا عووووكل، يااااا ساااااااتر، للاسف يوم القيامة مش حابقى فاضية عشان اتفرج عليك وانت بتتحاسب اعووووذ بالله يا اخي اعوذ بالله 
دي خطبة حسان.. والله صعب عليا، هو صحيح قال شوية كلام يضحك كعادته، بس صعب عليا، ما باحبش الغدر
وعموما ادي احنا قاعدين، لو اتبهدلوا قوي انا معاه، ومتوقع انهم في الفترة الجاية يتبهدلوا، السادة المهتمين بالحريات وحقوق الانسان يحضروا نفسهم من دلوقت، عادي هي الطريقة المعروفة بتاعة النظام كل ما يحب يخلص من اتجاه معين، وحينزلوا مكانهم المتصوفة
بصراحة هو من حيث المبدأ انا ارحب بالمتصوفة، انشالله سنة واحدة بس يمتصوا طاقة الكراهية المتعبية في الجو وينشروا الحب شوية
بس برضه حرام الناس تتظلم وتقمع، وانا ضد قفل قنوات السلفية او التنكيل بيهم باي طريقة 
بس لو اتصالحوا على النظام تاني، يبقى يولعوا معاه بقى، اساسا انا عاصرة على نفسي لمونة لولا قلبي الرهيف

19 comments:

مطلق said...

والله انا فرحت جدا يا كبيره لما عرفت انهم رياحونه منه

عقبال باقي الشله الطين

ابو اسحاق و مسعد انور

جبهة التهييس الشعبية said...

حرااام
يعني ايه ريحونا منه؟

ما هم نفسهم لما اتعمل كده في الاخوان وفي اليسار قالوا ريحونا منهم

اللي ما ترضاهوش على نفسك ما ترضاهوش على غيرك

المفروض كل الناس تعبر عن نفسها بفرص متكافئة

sfsf said...

بصى يانوارة
النظام بتاعنا بيلعب لعبة تشتيت الناس عشان يفضل هو
اللى هيولع الدنيا ان مش كل التيارات اللى بتنضرب بتنسحب من الساحة
النظام ضرب الأخوان بالسلفية ... زى ماالسادات ضرب الشيوعية بالجماعات
بس السلفية بفكرهم المتشدد ممكن جدا يتحولوا لمنهج الجماعات
وهى دى النار اللى هتولع فى النظام بجد

me said...

مهما كنت مختلف مع أي حد بس في الآخر الكلام ده فكرة و وجهة نظر حتى لو كلامه هو كان ضد ده و ده معناه انه حر في نشر و عرض فكره .. و الناس تختار

Heba said...

انتى ولا بتحبى حسان ولا عمرو خالد, أمال بتحبى مين بقى؟؟

جبهة التهييس الشعبية said...

باحب ربنا
:)

Dr90 said...

ياااااااااااااااااه
انا كنت لسة هعمل بوست في نفس الاتجاه دة

اسرائيل اية اللي عايزة تقفل القناة
و ربنا انا لو من اسرائيل
لكون مطالب باعادة فتح القناة و ممولها تمويل كامل شامل
هلاقي فين تغييب و تسطيح للناس اكتر من كدة
تشويه لصورة الألام و تصديق لاتهامات الغرب ليه مش هلاقي احسن من كدة برضه
دول ممكن يدوهم الجنية تقديرا لخدماتهم الجليلة في خدمة المشروع الاسرئيلي
مش تقولي يطالبوا باغلاقها

بس فعلا هما كانو هوجة من انظام اتغييب الناس
و بقو خلاص كارت و اتحرق
و الحكومة هتشوف كارت جديد
عامة
الأخ العزيز ابو الليل ربنا يرجعوا بالسلامة
كان عامل بوست تحفة عن الجماعة دول

Sharm said...

رغم اني شايف ان انسان له الحق انه يعبر عن رأيه بصراحة و بحرية الا اني شايف ان الحرية في ابداء اراءهم عملت خلل في المجتمع

المجتمع بقى غريب .. سهل جدا انك تلاقي منقبة زوجها تاجر مخدرات و عنده دقن و هما مش بيعملوا كده كساتر للتجارة لكن لان اثم التبرج اكبر من اثم التجارة في المخدرات .. و انا والله مش ضد المنقبات ابدا لكني ضد ادخال النقاب كفرض ديني

لازم المجتمع يبقى متسامح و يقبل الاخر عشان نقدر نعيش

في مدونتي اعلان لرقاصات في الاربعينات منشور في الجرنال بإسلوب مهذب و من غير ما حد يطلع يكفرهم و احد تاني يقتلهم او حد تالت يفجر الجرنال او يعمل مقاطعة له

جبهة التهييس الشعبية said...

صح

انا ما بانكرش الخلل اللي عملوه في المجتمع ولا الضرر اللي اصاب الناس بسببهم

ومش في مصر بس في العالم العربي كله

بس ده مش عشان هو موجودين

لكن عشان الدولة دعمتهم وفرغت لهم الساحة ونشرتهم في الجوامع والسعودية بقت تديهم فلوس

انفرادهم بالساحة واخدهم لفرص غيرهم هو اللي خلا تأثيرهم كده على الناس

وتم تهميش اتجاهات دينية اخرى

واتجاهات سياسية
واتجاهات دينية سياسية وفيه بعضهم تعرض للاضطهاد بعد ما استخدم فترة زي الاخوان

وده اللي انا رافضاه وبارفضه

وده مش في ايد الدولة بس
ده في ايد كل الاتجاهات السياسية والدينية انها ترفض تبقى لعبة في ايد النظام عشان تحقق مكاسب ده تغفيل وغباء منهم

الدولة تختار حاجة من الاتنين

يا تقفل على كله وتبقى مسئولة مسئولية مباشرة عن الاتجاه العام الحاكم للبلد من خلال الازهر بحيث ان لو فيه تأثير سلبي نحاسب الدولة ومؤسساتها رأسا زي الازهر مثلا

يا اما ما تستخباش ورا الناس وتقدمهم كبش فداء زي ما عملت مع السلفيين تستغلهم وبعدين رئيس الدولة يطلع يشتمهم

وقبل كده عملت مع ناس تانية

لو حتفتح يبقى تفتح المجال للكل بفرص متساوية ومتكافئة وكل واحد يعرض اللي عنده والناس تختار

انما التعامل مع الاتجاهات السياسية بوصفها عاهرة يقضوا معاها ليلة وخلاص دي اهانة لكل الناس

انا حسيت باهانة شخصية من اللي اتعمل قبل كده مع كل الاتجاهات وبيتعمل ولسه حيتعمل مع السلفيين

رغم اني مش محسوبة عليهم
بس الاهانة اللي تلحق بواحد تلحق بالكل

xMetatron said...

صباحو فل يا نواره..

ربنا يجازيك على التكدير اللي كدرتوهولى..
و انا اللي فاكر ان النظام ماسكه شويه عيال خاربنها و بينسجوا حبل المشنقه على رقابيهم بغبائهم..

تقوم تطلعي انت و تطلعيهم ابطال شطرنج ممشيينا زي الماريونت..

لأ و قال ايه " بغيروا الكارت كل خمس سنين"

اقلب الدور يا عم..انا مش لاعب

اوكى .. نفس عميق..نعمل ريستارت و نبدأ خطه مناهضه جديده..


تقعدوا بالعافيه

نديم

محمد صبرى said...

"لكن برضه القناة ما تتقفلش، دي مصادرة على حرية الرأي...كل انسان من حقه يعرض افكاره، بالطريقة اللي تناسبه، وبفرص كافية ومتوفرة للجميع"

العبارة اللى فاتت دى مفتكرش حد هيختلف معاكى فيها , و اظنها صلب الموضوع

اما بخصوص كلامك عن السلفية و السلفيين فأنا شايف انه محتاج مناقشة

*مبدئيا انا مش مستوعب الحقيقة تنميطك لصورة السلفي لما اتكلمتى عن مسلم فى موضوع نجاد.. يعنى نمارس احنا التنميط و نرجع نتظلم من القولبة اللى بتشوف بيه كتير من شعوب الغرب الكائن المسلم؟

*و لما بتقولى "طبيعة الناس المتوحشة دي تربيتهم، واللي عملوه يرقى الى الافساد لان بسببهم الناس تعدت على دور عبادة وعلى ابرياء وشقوا صف المسلمين بتكفيرهم للناس، ده غير انهم تفهوا وسطحوا الناس، وخلوا تركيز الناس كله في قضايا جوهرية زي: لما اجي اسجد انزل على ركبي وللا على ايديا؟ اي والله، وناس كانت بتعيد الصلاة يا عيني عشان نزل على ايديه مش على ركبه"

فهنا بقى فيه حاجات عسيرة الاستيعاب , يعنى مثلا منين هما تفهوا اهتمامات الناس و اختزلوها فى تفاصيل العبادات , و منين وجهوا الناس لتكفير مخالفيهم و مش بس كده لأ و لممارسة العنف و التخريب ضد مخالفيهم , معلش يمكن انا مش متابع انما تقدرى تجيبيلنا نص من كلام حسان أو محمود المصرى مثلا فيه تحريض ع العنف؟؟مش فيه هنا شوية خلط بين السلفية ,و بين السلفية الجهادية اللى مبقيتش موجودة اساسا فى مصر؟


*و إذا كانت أهم المآخذ على السلفيين إنهم - و غيرهم- مواقفهم من الأحداث الكبرى -زى حرب غزة- مبنية على مبدأ ما باليد حيلة , و حبسنا العذر , فى الوقت اللى هما كشخصيات جماهيرية -بالذات بخلاف غيرهم- مش مسموح ليهم بالتصرف بالشكل دا فى مواقف لا تحتمل أى تخاذل فإزاى يكونوا هما هما المتهمين بتربية الروح الوحشية , هى مش الكلمة دى -الوحشية - بغض النظر عن كونها كلمة ذات معنى سلبي انما تتضمن معنى الفعل و المبادرة؟؟ ازاى يعنى زراع السلبية يبقوا زراع الايجابية؟

* طيب و على فرض انه العباقرة السلفيين قادرين على زرع السلبية بشكل موجه , و زرع المبادرة غير المحمودة تجاه قضايا أخرى اقل اهمية , بيتهيألى ده يبرر مصادرة أى حكومة لحق الشعب دا فى الاختيار لأنه شعب بهذه القابلية للتوجيه يتخاف عليه فعلا ,لأنه قصوره عن استخدام عقله بالطريقة دى اكثر من واضح , و متقوليليش لأ مهو لو الاختيار متاح بين اكتر من بديل هتتجلى الحقائق للشعب و هيقدروا يختاروا على بصيرة لانه احنا فعلا فى عصر البدائل , و اللى عايز يوصل لاى معلومة عن اى تيار بيوصلها.


*كمان سؤال ..هى المجموعات الدينية الفاعلة اللى كلنا بنحترمها زى حزب الله و حماس و الجهاد ,مش بيهتموا بتفاصيل العبادة و بالتأصيل الشرعى لأدق الأمور الحياتية؟؟

بيتهيألى معروف و واضح انه سواء حزب الله او حماس او الجهاد هم اتباع مناهج دينية مفصِّلة لأدق تفاصيل العبادة, يعنى هما بمعنى أو بآخر سلفيين و أتباع منظومات فكرية ليها قواعد بنيوية ممتدة فى الزمن , و كونهم خلف لسلف دا ميعيبهمش و لا حتى يميزهم ,دا طبيعى جدا عن اى مجموعة تحمل فكرا

و فى النهاية الكل أتباع لنفس السلف , و الاختلاف فقط اساسه طريقة فهمهم عن السلف. أينعم انا فاهم انك تقصدى بانتقادك - لما بتقولى سلفي و السلف- معنى اصطلاحى مرتبط بفئة معينة ذات فهم معين عن السلف اصبح متعارف عليهم باسم السلفيين , انما فى كل الاحوال لازم تبقى عارفة انه السبب ورا انه ناس بتاخد جنب من حماس او الجهاد او حزب الله هو ربطهم فى اللاوعى بين السلف اللى بتسفهيهم انتى هنا و بين الجماعات المقاومة المشتركين معاهم فى نفس السلف

محمد صبرى said...

*بالنسبة لكلامك عن الشيخ حسان اللى كلامه مضحك دايما بالنسبالك , فأنا مش فاهم الحقيقة هو انتى ازاى مش واخدة بالك انه فيه فرق بين النقد و بين التجريح , اذا كنا هنعتبر التهكم على الرموز حرية رأى فيبقى من حق الدنمارك و غيرها يرسموا و يشتموا فى النبى كمان براحتهم ,الحرية مش من حقك بس افتكر,الشيخ حسان طبعا مش قديس و لا نبى و مش فوق النقد , انما الراجل زى ما انتى قلتى ليه مكانته و مش اى مكانة , الراجل بالنسبة لجموع من الشعب العربى عالم , و العلماء زى ما انتى عارفة هم ورثة الانبيا و نقلة الوحى فانتقادهم مفروض يكون فيه مراعاه لمشاعر أتباعه , و مينفعش اتباعه ميهموكيش لانهم اغلبية فى مصر بشهادتك و مينفعش تبقى متبنية قضايا شعب و تتهكمى على رموزه .. دا بيسحب من رصيدك عند الناس و من دعمهم لمواقفك المحترمة جدا

*على فكرة اعتراضى على طبيعة انتقادك للشيخ حسان , هو هو كان انتقادى لتهجم الشيخ العريفى على المرجع الشيعى السيستانى , يعنى الموضوع مش مرتبط بموالاه توجه معين لكن بالانتماء لمبدأ معين .


عامة لو اى شخص اتكلمتى عليه بالطريقة المنتقدة دى , لو عنده كرامة يرفض دعمك و دعم اى حد من طرفك , حتى و لو هياخد فيها اعدام


و بعدين العجيب فى الامر دعمك للتصوف , و ان كنت انا احترم حق الصوفية فى نشر افكارها زى اى مجموعة , انما مش قادر افهم الحقيقة هى الصوفية هى الفئة اللى هتهتم بقضايا الامة و هتبعد الناس عن سفاسف الامور , يعنى من غير تجنى على الصوفية و من غير تعميم تصور معين عنهم , انما يعنى بجد ختامك للموضوع بكلامك عن الصوفية بالشكل دا عجيب حبتين


المصيبة انى مقتنع انك بعيدا عن الفقرة اللى استحسنتها فى كلامك و شفتها صلب الموضوع مش قاصدة فعلا لكتير من باقى الكلام .. يعنى جزء منه بيجى فظ شوية كنوع من الانفعال , و شوية مناقض اساسا لما هو معلوم عن توجهاتك بالضرورة :D

انما يعنى بالطريقة دى هتضطرينى اناقش كلامك على شكل العرائض اللى تغيظ دى عشان نستوضح الامر

مدير التحرير said...

الشيخ حسان و اللي معاه في القناة مشكلة و لا تستغربي ليهم شعبية في الدول العربية مش طبيعية بس اللي بتقال في مصر مفروض ما يروحش لبره

مواطن مصري said...

احنا بنطالب بغلق قناة الناس و الحافظ

مواطن مصري said...

ههههههههههههههههه اللهم اهلك الظلامين ب الظلاممين و اخرجنا منها امنيننن

عقبال الشلة وجدي غنيم و اخواتة

مواطن مصري said...

انا نفسي ان فرق الفتنة الطائفية بشيوخ السنة و الشيعة و القساوسة المتطرفين يتم منعم و طردهم خارج مصر

lastcrazyboys said...

أنا هفضــل طول عمري بلهــاء ..وعبيطة وأم بدوي

وبيصعب عليا اي حد ..كنت حــاسة ان ده هيحصـل من بدري بس بعاني من سنتمالتية مهترئة


الكلمتين دول هتسمعهــا من مييين بكرة يا صديقي "أبــو أمـــك"..لما نكتشــف ان فيه حاجة ورا الحوار ده

dr.lecter said...

رغم اني مبطيقش القنوات دي لكن قناه الرحمه افضل من غيرها بكتيير وساعات اتفرج عليها

مواطن مصري said...

«المصرى اليوم» تكشف: شبكات دولية تُدخل نفايات مشعة إلى مصر
http://www.almasry-alyoum.com/article2.aspx?ArticleID=256953&IssueID=1786

يا ريت نتهم ب الموضوع دة يا نوارة