Saturday, 1 May 2010

اييييوة كده... برافو عليكوا، عايزاكوا تشدوا السلخ على لبنان شوية

بلا تعديل دستوري، بلا حد ادنى للاجور، بلا انتخابات رئاسية، بلا ناس ماتت بالغاز في الانفاق كأنهم فيران ضالة، بلا احكام مهببة على دماغنا في قضية تنظيم حزب الله
كللللللللللل دي قشووووورررررر وكلام فاااااارغ
اهم حاجة دلوقت اننا نركز حنعمل ايه مع لبنان، مهم قوي الموضوع ده، واليكم بعض النصائح
1- طبعا بما اننا قلنا على الجزائريين امازيغ وبربر ولخبطنا البربر على البرابرة على البربرية على اي حاجة فيه باء وراء حتى البرابير وضحكنا علينا الناس، فعايزين نضحكهم علينا تاني ونقول على اللبنانيين فينيقيين، على اساس ان الفينيقيين دي شتيمة يعني
هو عموما الفينيقيين على مر التاريخ اشتهروا بالذكاء الحاد والجمال الاخاذ حتى في الكتاب المقدس
بس مش مهم، احنا اللي دهنا الهوا دوكو، عايزين بقى نلخبط الفينيقيين على الفنزويليين على الفنلنديين المنتوفليين
ضروري
2- عايزين نتكلم عن ان اللبنانيين بسبب اصولهم الفينيقية منعدمي الانسانية وشعب عنيف بطبعه ومش متحضرين ومسالمين وعندهم انسانية زينا كده
وبالذات الانسانية دي، اهم حاجة نتكلم على الانسانية واحنا لسه خانقين الناس في الانفاق عشان العالم كله يعرف اننا رصدين وبجحين فوق اننا مجانين مهمة قوي النقطة دي
3- مهم قوي قوي قوي نلحق نشد حيلنا الليلة دي وبكرة عشان الناس كلها تتلهي عن اعتصام 2 مايو ونحل المشكلة بدل ما احنا شايلين الهم كده ومش عارفية الداخلية ناوية تعمل ايه
واهو برضه عشان لو بكرة الداخلية ضربت المعتصمين وللا حاجة ماحدش ياخد باله، اصل يعني انتوا عارفين كرامة مصر اهم حاجة، وكرامة مصر في مرحوم قاتل اربعة ومغتصب قاصر مش في اللي رايحين يطالبوا باكل عيشهم بكرة ولا حاجة ولا في التمنتاشر مصري اللي انطسوا احكام ظلم 
عايزين نركز
4- فرصة برضه ناخد الناس بالصوت قبل ما يغلبونا، اصل يعني المنظمات الدولية ابتدت تبغبغ وفيه ناشطين ابتدوا يقولوا علينا نازيين عشان فضيحة الغاز اللي رشيناه على كام واحد معدي من الانفاق.. مش هم اللي عاملين لي نينجا ترتلز؟ يستحملوا بقى
عايزين بقى اداء اعلى من اداء مذبحة الجزائر عشان المرة اللي فاتت كنا فرجة العالم بس
المرة دي عايزين نبقى فرجة واعجوبة العالم
عايزين يضرب بنا المثل في التخلف والعته والعنصرية والغباوة والتفنن في اذية النفس بحيث يحطونا في موسوعة جينيس
او يشيلوا كل اللي في الموسوعة ويكتبوا بالبنط العرييييض من الجلدة للجلدة:
الشعب المصري الاهطلللللللللللللللللللللل

33 comments:

SpoiledEgy said...

First off, Im admitting that most of wt you wrote during the Egypt-Algeria battle of Words was right and most of what I thought and wrote replying to your posts then was wrong.

For the past couple of weeks I read comments demanding that we bomb Ethiopia and all of the other Nile countries who dared to demand more fair Nile agreements. Then came the Lebanon incident and i read comments (few I have to say) demanding we bomb that village, realizing that the Lebanese deserved the crimes the Israelis committed against them and believe it or not stating that the Lebanese "damaween" betab3ohom. Funny, I have several Lebanese friends and never saw that in them, guess they know how to hide it well :D

I saw your interview with Ibrahim Eissa about the New (mutant) Egyptians and while you based your point on the Camp David effect I have to ask you, dnt you think that we seem to have some Egyptians who actually got affected by the Bush mind-set American New-Cons?! Bombing is the way to go, we are above all others, we are angels and all others hate us bec we are better, weve done so much good to others only to be rewarded with hatred.

The Lebanon 2 crimes were sick no doubt, the fact that an entire village has lost faith in the fairness of the judiciary and the rule of law all together is alarming, the fact that a Lebanese PM from Saad Al Hariry's party called for the killing of an accused offender shows how like-minded our PMs are he must have admired Al Qassa's statements about 6 April protestors, the fact that some idiots are trying to connect it to HizbAllah case is an indication of how low some are willing to sink to protect the regime and the sad thing is that this form of false patriotic attitude seems to appeal to many Egyptians.

So, lets see now we want to bomb Algeria, Sudan, Nile Countries, Hizballah along w Ketrmayia village, Hamas and may be a couple of rockets to Qatar somehow, did I miss any countries on the list?!

محمد صبرى said...

هما قدماء الأثيوبين اسمهم ايه؟ عشان هنحتاجه قريب
:D

جبهة التهييس الشعبية said...

spoiledegy

يسلم فمك.. او صوابعك بالاحرى
:)

محمد صبري
اظن ان قدماء الاثيوبيين اسمهم ثوبيا نسبة الى شراب السوبيا المشهور في مصر وهو اسم محرف من اسم ثوبيا
وبالتالي فعلينا اننا نقاطع السوبيا خاااااالص دلوقت حاليا
:)

مواطن مصري said...

طب كويس مش بحب السوبيا

طيف بدر said...

وأنا يا نوارة أؤكد بالمنطق نفسه أن قتل سوزان تميم كان دليل على الحقد المصري ضد اللبنانيين
و كمان قتل المطربة ذكرى دليل على الحقد المصري ضد تونس

مواطن مصري said...

طيف قاتل سوزان بيتم حمايتة بأكثر ب 3 الاف عسكري

Sui said...

http://arabic.cnn.com/2010/middle_east/5/1/lebanon.egyptian/index.html
الشاب مصرى ووالده هنا فى مصر ومامته عايشة فى لبنان وكان بيشرب مخدرات الله يرحمه

Ideas 4 Egypt said...

نفهم من كدة إن لو إنتى يانوارة وقعتى مرة فى ايدين اللبنانيين وجردوكى من ملابسك وربطوكى فى مؤحرة عربية وسحلوكى على اسفلت شوارع بيروت كلها وبعدين علقوكى من رقبتك فى ميدان عام إننا نسيبك متعلقة ونركز فى الأمور الأهم ومانطالبش حتى بجثتك ولا نيجى ناحيتها؟

حرام عليكى كفاياكى ظلم وتهور - الشاب دة وقع وهو طفل على رأسه فى الملاهى وتكسرت عظام جمجمته وعمل عمليات وأصبح غير سوى فيصاب بهياج عقلى لاإرادى - ولو قدم لمحاكمة عادلة فى أى دولة متحضرة لتمت براءته لكونه غير مسئول عن أفعاله ولأودع مصحة عقلية لعلاجه

أنا حزين إن كتير من شباب المستقبل اللى بيطالبوا بالتغيير للتخلص من الظلم هم أنفسهم بيكونوا ظلمة ومتسرعين فى أحكامهم المسبقة

mido said...

سامح سمير فى ستاتس على الفايس:

عاجل:

وجه دكتور البرادعى كلمة الى أهالى قرية كترمايا اللبنانية , لامهم خلالها على الجريمة البشعة التى ارتكبوها ضد الشاب المصرى و طالبهم بالاعتذار و دعاهم للانضمام الى الجمعية الوطنية للتغيير


=))

جبهة التهييس الشعبية said...

وقع على دماغه؟

طيب هات واحد وقع على دماغه وقتل اربعة واغتصب واحدة في الصعيد كده ووريني الصعايدة حيعملوا فيه ايه؟

ليه خير اللهم اجعله خير؟ مافيش سبع مسيحيين غلابة اتقتلوا عشان واحد مسيحي اغتصب طفلة لا هو قريبهم ولا هو يعرفهم لمجرد انهم من نفس الدين وللا ايه؟

جبهة التهييس الشعبية said...

وبالمناسبة بقى شباب المستقبل يستاهلوا كل خير

بسكوا عليهم

ahmedyosry21 said...

بت يا نوارة انا رايح بكرة قدام مجلس الوزرا انا و الرجالة ..عارفة لو ماجتيش...هانخطفك

مواطن مصري said...

على فكرة بسب انا اعترض على كلمة الشعب المصري الاهطل

شيليها ل احسن يتعمل فيكي زي ما اتعمل في مهدي طز في مصر

Bella said...

ازيك يانوارة

وحشتيني قوي والله

قريت التدوينة 3 مرات وكل مرة اقع على روحي م الضحك

والله الناس عندنا عايزين مولد وشوية مراجيح وهات يامرجحة وكلمة تجيبهم وكلمة توديهم

يعني العنف اللى في الشارع عندنا بيدل على اننا شعب متسامح وطيب وعطوف

كفاية الواحد يمشي في اي مكان ويشاور على واحد ويقول حرامي علشان الناس تمسكه ترنه علقة تطلع روحه فيها من قبل حتى ماتعرف الكلام حقيقي ولا كذب

ولا لو حد خبط حد بالعربية الناس بتعمل فيه وفي عربيته ايه؟؟

والليبي اللى الناس ولعوا فيه في اسكندرية كان دليل على ايه

Love-Guru said...

فعلا برافو
قتل ايه؟ و اغتصاب ايه؟ ده كان مشتبه فيه و التحقيق لم يتم بعد. و حتي لو تم التحقيق و تمت ادانته ففيه محاكمة تبحث التحقيق و تستمع للدفاع و بعدها يصدر الحكم بصورة عادلة اما مذنب او برئ. و حتي لو ادانته المحكمة و حكمت عليه بالاعدام فتنفيذ الحكم سيكون يصورة آدمية تحفظ للانسان انسانيته و كرامته و لا تمثل بجثته بعد موته.
اما ان نترك الموضوع و كأنه شئ عادي كده فهذا هو الهطل بعينه
و لا يعني هذا ان نغفل الامور الاخري
اما اذا كنت مش عايزة تهتمي بهذا الموضوع فهذا حقك و لكن ما ليس من حقك ان تسفهي من يهتم بهذا الموضوع و كما قال احد المعلقين سوف نتبع نصيحتك عندما يقتلوكي في لبنان او اي مكان آخر و يجردوكي من ملابسك و يسحلوكي في الشوارع و يعلقوقي من رقبتك علي عامود لتكوني فرجة للعامة وقتها اوعدك اننا لن نتهتم اطلاقا اتباعا لنصيحتك و سنركز اهتمامنا بالاشياء الكبري المصيريه

lebnenieh said...

سلام عليكم

يعني الواحد ما عارف شو يقول بس الله يكون بعون اهل الضحايا.قد ما يكون هالمجرم غلط وقتل و اغتصب مش ضروري كان ينكلوا و يمثلوا فيه حرام يعني بطريقتن هيدي رجعوا اللي ماتوا؟منظر بشع و بدل كأننا عايشين بغابة.المنظر كان افظع من اي وصف.الله يصبر امه و يصبر اهل الطفلتين و جديهما.

wissam said...

Ideas 4 Egypt

يا حبيبى وقع على راسه ؟؟؟ فى الملاهى !! ويا ترى المخدرات اللى كان بيشربها عشان وقع على راسه .. وخطط ودخل بيت الجيران وهو فى حالة الهياج دى ؟؟ وقتل الاول وقتل التانى والتالت والرابع .. وو فى حالة الهياج دى برضه ؟؟؟

لاء لاء بجد احنا فعلاً ظلمينه
بقولك ايه .. هو لو واحد وقع على راسه ودخل على بيتكو وقتل مامتك وابوك وبناتك الاتنين .. وبعد كده شفته وعرفت انه وقع على راسه

هتعمله ايه ؟؟؟؟

اكيد هتجبله ريفو اة هتبوس راسه .. صح ؟... اصل شكلك حنين اوى

يا نوارة اللى حصل هو رد فعل غاضر جماعى .. وانا لو زى الناس دول بجد ممكن اتجيب اجله فى ايدى .. وبعدين يعنى هما العيال اللى بيجيلها سرطان من المبيدات المسرطنة مش جريمة بشعة ؟؟ واللى ماتوا فى الانفاق مش جريمة بشعة .. وولاد الوسخة بتوع الوطنى مش وجودهم فى الحياة اصلا جريمة بشعة ؟؟؟

قالك وقع على راسه .... اه مختل عقلياً يعنى برضه

جبهة التهييس الشعبية said...

انا مبسوطة قوي من صدمة المصريين في الهمجية!
وكلامهم عن سيادة القانون والالتزام بعدالة القضاء وبراءة المتهم حتى تثبت ادانته!

اكن بقى اللبنانيين هم اللي جم ولعوا قرية بكاملها في الصعيد عشان واد مسيحي وبت مسلمة حبوا بعض

اللي حصل في كترمايا همجية صحيح

بس خير يعني؟

ما تعرفوهاش انتوا الهمجية دي؟ غريبة علينا مثلا؟

muhammd fattouh said...

يا استاذه نواره الشعب المصر مغلوب على امره الغباء مش جاى منه الغباء جاى من الحكومه اللى بتستغل التضليل الاعلامى بكل الطرق و سبحان الله شوفى المفرقه اليهود برضه بيستغلو التضليل الاعلامى لكن علشان يضللو الدنيا كلها عن كل اللى هما بيعملوه و بيعرفو يخلقو من كل حاجه مبرر علشان يبقو المغلوبين على امرهم لكن احنا الحكومه بتعتنا بسم الله ما شاء الله مبتفكرش غير انها تيضلل الشعب حتى مبتفكرش تظهر الحقايق اللى الصهينه بيزعوها و اخر الاخبار الزفت من الحكومه الحكيمه معالى السفير المصرى التيييييييييييت فى اسرائيل بيقترح عمل مباره فى كره القدم بين المنتخب المصرى و المنتخب الاسرائيلى

محمد الشوادفي said...

ياااااااااه أنتي لسه عارفة ان أحنا
دخلنا الموسوعة أحنا وبلا فخر محتلين الموسوعة من زمان وتلاقينا في صفحة الهطالة والعبط ولحس العتب وبوس الأيادي
وعلشان نعلا ونعلا لازم نطاااااااااطي

محمد الشوادفي said...

تفضلي بمتابعتي على هذه المدونة
www.adpsakher.blogspot.com

Gaber said...

سؤال صغير بس ، مين اللى أكدلك إنه اغتصب أو قتل؟ وبعدين الموضوع مش موضوع لبنان ولا غيرها ، القصة كلها فى كرامة المواطن المصرى المهدرة فى أى مكان واللى لازم ندور عليها .... ياريت تكونى فهمتى

طيف بدر said...

عبد الناصرجابر عبد الرحمن المشيطي
سائق ليبي كان يسير على كورنيش الإسكندرية و دهس سيدة بالخطأ
قام المصريون بتوقيفه و حرق سيارته و ضربه ضربا مبرحا و نجا من الموت بأعجوبة
http://www.moheet.com/show_news.aspx?nid=165600&pg=21

http://www.youtube.com/watch?v=pnFokSDszkE

Ahmed said...

هي الناس مش قادرة تفهم ليه ان الاعتراض هنا مش على مدى بشاعة الطريقة اللي قتلوه و مثلوا به,, محدش يختلف أن كل ده لا يرضاه لا دين و لا انسانية و لا قانون و لا عقل.
الاعتراض هنا على تحويل الحالة دي لكره بين المصريين و اللبنانيين,,, الكلام الغبي اللي بيطلع زي اللبنانيين بيكرهونا, المصري لما يروح في حتة بيتفوق عشان كده بيكرهوه,, طب الأخ اللي قتل و اغتصب ده تفوق ي ايه بالضبط.
يا جدعان,,, الناس اللي قتلوه لم يقتلوه لأنه مصري, قتلوه لأنهم اعتقدوا أنه مرتكب تلك المذبحة,, شغل الطار اللي موجود عندنا في مصر مش مهم انه يثبت انه قتل المهم يقتلوا حد و خلاص أدام الناس اللي اتقتلت. يعني لو اللي اتمسك و اشتبه فيه لبناني كانوا بردو حيعملوا فيه نفس اللي اتعمل في المصري فليه نحول الموضوع لعداء بين شعبين
سؤال أخير هو ليه مبنقولش نفس الكلام على الألمان في قضية مروة الشربيني و عن بطوطي اللي اتقتل في أمريكا و الدكتور المصري اللي قتله الولا المجنون اللي فتح النار على زمايله في جامعة فيرجينيا تك و أكيد في مصري اتقتل في الكونغو مبنقولش على كل دول بيكرهونا ليه؟؟؟!!! اشمعنى مبنولعهاش حريقة إلا مع العرب بس.
لو ارتكب الجريمة دي في مصر و مصريين اللي مسكوه و عملوا فيه كدة, حنلاقي ناس كتير بتقول عليه أحسن و يستاهل و يسبوا و يلعنوا فيه أو على الأقل حنبرر لمن قتله و حنقول عليهم معذوريين و فورة غضب و الكلام ده, إنما عشان اتقتل في لبنان بقى شهيد و لا زم ناخد بطاره من اللبنانيين الفجرة.
مش ملاحظين ان أحنا بنتحول لصهاينة صرف, و مش فاضل غير نقول نحن أبناء الله و أحباؤه,,,هههه ده احنا قلناها فعلا و قلنا اننا مذكوريين في القرآن و لما واحد نشر فيديو للحويني يقول فيه أن حديث خير أجناد الأرض باطل اتهم الحويني بالجهل و خد شتيمه للصبح من ناس متعرفش يعني ايه حديث ضعيف و ازاي يكون ضعيف.
و أخيرا نطالب الخارجية المصرية بالتحقيق في الواقعة و حيثياتها و المطالبة بمحاسبة المقصريين و المهمليين من رجال الأمن اللبناني الذي أدى لمقتل ذلك الشاب, أما الكلام عن كرامة مصر و كرامة المصري التي انتهكت في لبنان فهو على رأي نوارة شعب أهطل,,, و أزيد بعنصريتنا دي على أخواتنا نستاهل ربنا يقطع عننا مياه النيل على يد بلد من العالم الخامس زي أثيوبيا.

نعيب زماننا

شمس العصارى said...

بعيدا عن الموضوع خالص
الله الله الله
ايه ده
ايه ده الف مرة
كل موضوع تستشهدى و تاخدى الصعايدة دليل – بدون وجه حق – الموضوع بره مصر و الى بيعلقوا و بتردى عليهم مش صعايدة وولا يعرفوا حاجة عن الصعايدة زيك بالظبط
قلتلك قبل كده كتيييييييييييييييير قبل ما تتكلمى عن الصعيد انزلى و زورى مدنه الاول و بعدين اتكلمى
بدايتا الصعيد كلمة من اربع حروف – طبعا بتنطقيها بكل بساطة – لكنها 8 محافظات بحوالى 50 مركز ادارى بمئات القرى و التركيبة السكانية خليط متعدد فيهم القبائل و فيهم ذوى الاصول المغربية و فيهم البدو المتوطن من مئات السنين و فيهم العائلات و فيهم اصحاب الثقافات الغربية لغتا و طبعا – زى مناطق السياحة – و فيهم سكان النوبة ذوى العادات المختلفة جدا ........ حتى المسيحيين فى الصعيد عائلات و عائلات من زمان
كل ده من اختلاف ثقافات و لهجات و صفات و عادات و ......... كل ده انتى – و غيرك - بتختصريهم
فى كلمة من 4 حروف وولا تعرفوا حاجة عن عادات كل المناطق فى الصعيد اخركم تسمعوا خبر مفبرك و تبنوا عليه حقائق تذيعونها بين الناس - زى موضوع بنى مزار الى قلتى عليه من شهر و مشسمعناش عن حاحة عنه بعدها - ..........
فين حالات التمثيل بالجثث فى الصعيد
و فين القرية الى ولعت بكاملها و فين الهمجية – التى يفهم من كلامك وصفك للصعيد بها – فين الهمجية الى فى الصعيد
الناس فى الصعيد مثلا مجنونة تصحا الصبح تروح تقتل 10 و تمثل بجثثهم و بعدين يحرقو القرى
كده منهم لنفسهم يعملوا كده علشان كده لما كل قتل ولا مذابح بتحصل بتشبهيهم بالصعايدة
موضوع نجع حمادى شبع بحث و استقصاء و الكل اجمع انه سياسى و انتخابى و اسالى جورجيت و الانبا بتاعهم جاية انتى بعد شهرين تلاته ترددى نفس كلام بتوع الحزب الوطنى – و اولهم فتحى سرور لما رد على جورجيت – جاية انتى و تقولى ان حادث نجع حمادى سببه اغتصاب البت فى فرشوط
بتكررى كلام الى طلمسوا على الموضوع من الوطنى يعنى انتى بتقولى نفس كلامهم اهه
طيب ارجعى لبوستاتك و التعليقات عليها ايامها
سبحان الله
و متقولليش انك بتردى على المصريين بالكلام ده لان المصريين الى انتى بتردى عليهم ليسوا من اهل الصعيد ولا يفرق معاهم الصعيد اساسا ثم هما بيكلموكى على احداث لبنان لازم تحشرى الصعيد فى النص و الكل يجرى و يكتب تعليقات على الصعيد
الى حصل فى لبنان ليس له مثيل فى الصعيد اطلاقا يبقى مال الصعيد و مال بوستاتك و مال الصعيد و ما التعليقات و مال الصعيد و مال الى حصل فى لبنان
حاجة تزهق
الله يحرقه مينا الف الف الف الف مرة
ليه يوحد القطرين
كان ماله نفضل بعاداتنا و تقاليدنا و همجيتنا فى حالنا و حال نفسنا ولا وجع الدماغ الى بناخده منكم
خلاص الكل بقا محللين
يارب يا رب يارب يرجعوا قطرين تانى

haneen said...

الله ينور يا احمد ... كلامك عين العقل والله ... عارفه يا نواره معظم القراء بيفهموكى غلط ليه ودايماً مش بياخدوا بكلامك ... اسفه يعنى انى اقولك انك طريقتك فى كتابتك من كتر ما فيها نوع من السخرية اللاذعة والتريقه فى بعض الاحيان على اوضاعنا المؤسفة مستفزه جداً بصراحه. زى ما تكونى كده بتدوسى على الجرح من غير رحمه واللى بيقراها من اول وهله بيحس انك ضده مش قلبك عليه وبتنصحيه وبتفوقيه من نومته والمصريين بيحبوا وبيسمعوا كلام اللى يفهمهم براحه وجهة نظرة ويعرفهم غلطهم بطريقة مباشرة.انا ما انكرش ان بحب جداً كلامك وبحبك انت شخصياً وبعتبرك مثل اعلى ليه والله .بس نفسى الناس كلها تفهمك صح وتتفاعل معاكى ويعرفوا هدفك الاساسى من التدوين ... ربنا يهدينا للحق والعدل والخير يا رب

عم مينا said...

أحلي حاجة ازاي الدولة المصرية بطالب باعمال دولة القانون في قضية لبنان في الوقت اللي كل اما تحصل موضوع مشكلة ما بين مسلمين و مسيحيين و تتحرق بيوت و محلات.. في الأخر يحلوا الموضوع بأعدة عرب.. هو ايه الفرق بين اللي حصل في لبنان و أعدات العرب بتاعتنا؟

ola said...

التعليقات على الخبر في موقع اليوم الساقع تجنن ،،،
الكل نازل شتيمة في العرب ككل و القومية العربية التي كانت السبب في تأخرنا 1000 عام وإنها هطل ولازم نفوق منها،، معلهش والله أنا فهمي على قدي شوية ،، هي إيه القومية العربية دي؟ وإيه مظاهرها في حياتنا دلوقت؟ وإزاي مأخرانا 1000 سنة
أنا شايفة بقى إننا لازم فعلا نرضخ لرجاء الإتحاد الأوروبي ونقبل الإنضمام إليه ونسيبنا من العرب دول

مدير التحرير said...

ما هذه هي المآساة لم نعيش بدول لا يوجد فيها قانون و بتدعي وجود قانون

JUS_ME said...

هو كلامك صح و كل حاجة .. بس ايه حكاية خلية حزب الله .. قصدي انك دايما بتدافعي عنها ف مش فاهم وجهة نظرك .. يعني التهمة دي متلفقلهم و لا هما كانوا فعلا معاهم متفجرات و تبع الحزب بس عشان يهربوها لغزة و لا الموضوع غير ده وده ؟

ana ga3an said...

اية الجهل والسطحية اللي انتي فيها دي
عرفتي منين وحكمتي علي الشخص انة قاتل ومغتصب
ولا بتاخدي علي السمع
مش في زفت قضاء ومحاكم وقصاص عادل
ولا الناس تروح تسلخ وتعلق علي عمدان النور
دة اللي امرنا بية ربنا
هو دة حسن القتل والقصاص
بقيتي فاقدة للموضوعية وبتكرري نفسك
وبتعيدي وتزيدي
بدون مضمون حقيقي

خاطر said...

الحقيقة جريمتي قتل مزدوجة الهمجية
وتبريرها بهذا الشكل بالمدونة والحكم على المسحول أنه القاتل الفعلي هو حكم جائر

أيضا صعيد مصر لا يشتهر بالإجرام والتمثيل بالجثث لكي يتم الزج بأهل الصعيد وهم لا علاقة لهم بما حدث لتبرير غير مباشر للجريمة

فخلط وتشبيك القضايا بهذه الكيفية تكون نتيجته حكم عام أرعن على مثقفي مصر بالهطل وليس على كل المصريين

حادث القتل لمشتبه به وشبهة تواطؤ لجهاز الشرطة والضرب الجماعي والطعن حتى الموت ثم السحل بالنعال وتعليقه كالذبيحة أمر غير عادي ولا يعقل أن يكون رد فعل الناس على الخبر بسطحية: عادي وبتحصل أو كأنك مشوفتش حاجة ويستاهل وإلا تعال أقولك بقى أنت عندك بلاوي إية ومصايب إية ولو مش عاجبك تبقى بتاع قشور

العلاقة بين مصر كدولة ولبنان كدولة على كل المستويات الحيوية في الوضع الحالي أقوى من ظن وأوهام إعلام أشباه المثقفين - ولا أقصد صاحبة المدونة حتى لا يساء الظن-
ويؤكده أوضاع قائمة وأحداث كبرى تم تفاديها إعلاميا ودبلوماسيا وكان التركيز على الحدث وفقط.

وجهة نظري أن الجهة الأمنية بالقرية المسئول الأول عن الجريمة وهي ليست بجهة إختصاص قضائي كي تصدر أمر بتمثيل المتهم لجريمته تاني يوم -29 إبريل-بعد وقوع الحادث -28إبريل- وقت تجمع أهل القرية لإستلام الجثث من المشرحة وهذا فعل مثير جدا للشك

الأمر هكذا زاد تعقيدا ولن يستطيع أحد الآن الجزم بمن القاتل الفعلي وبالتالي ضاع حق القتلى الأربعة وحق أسرهم وأيضا حق المشتبه به لإمكانية وجود شهود زور في هذا الوضع وأيضا لتلافي مشاكل أخرى.


لكن دائما المتهم أو المشتبه به برئ حتى تثبت إدانته

مشتبه به لا تعني قاتل
و برئ معناها برئ

Amr said...

و انا معدي في الشارع الصبح يوم الحكم عيني وقعت عالصفحة الاولى بتاعت الاخبار عند بتاع جرايد و العنوان بيقول "احكام رادعة ضد تنظيم حزب الله الارهابي" قلت عادي ما هي الاخبار دي العزبة اللي الحاج قط سابها للكابتن ممتاز
بس للاسف ساعتها كان عندي امتحانات و دماغي مش رايقة
رحت داخل النهاردة اشوف اتحكم "عالارهابيين" بايه و ياريتني ما شفت
مش قصدي ان الاحكام مروعة انا كنت متوقع اسوأ من كده طبعا بس اللي قهرني لدرجة ان مبقتش عارف اخد نفسي هي تعليقات القراء " الشروق و اليوم السابع" كلهم الجلالة كانت وخداهم و الشعوبية كانت عاملة عمايلهاو نازلين تلطيش و سلخ في رمز الكرامة الوحيد اللي فاضلنا و في مستوى عمري ما شفت زيه قبل كده من قراء الشروق و كل كلامهم مغالطات شوية يقولك ان ده السبب ان قرية كترمايا الشيعية -مش عارف جابوا منين شيعية دي- مثلت بجثة الشاب اياه "و ده الطعم اللي الجرايد الاسرائيلية رمته لنا و احنا بلعناه بمنتهى الهبل لدرجة ان نايب من نوايب الشعب كرر نفس الكلام"
و ناس تقولك ان نصرالله ده ماخدناش منه غير الكلام و التقيلة بقى ان واحد يقولك ان حزب الله هو السبب في ان اسرائيل تحتل جزء اكبر من ارض لبنان
و اللي زاد و غطى اني قريت تقرير على موقع محيط بيتكلم عن اكبر برنامج حواري عالتليفزيون الاسرائيلي و المذيع بيقول بمنتهى السعادة -و له حق طبعا- ان المرة الجاية الصواريخ هاتعدي من فوق تل ابيب عشان تنزل على مصر
ساعتها كنت وصلت لمرحلة اني بجد حاسس مابقتش باتنفس من الهم اللي كبس على قلبي
و مش عارف ليه اول حاجة فكرت فيها هي المدونة دي مع اني دخلتها مرة واحدة و من شهور بس كنت متأكد اني هاتنصف هنا
و الف شكر لانك خففتي شوية من السواد اللي مش شايف غيره