Thursday, 27 May 2010

مسلمو امريكا ممنوعون من بناء المساجد

بيقول ان المسلمين في برنتوود حاولوا يبنوا اول مسجد لهم واتعرضوا لتهديدات واتهامات بانهم من القاعدة من قبل المحافظين لحد ما تراجع المسلمين عن بناء المسجد
في الفاريتا في جورجيا رفض السماح للمسلمين ببناء مسجد
في نيويورك برضه المحافظين عملوا هيصة وبوليكة عشان المسلمين كانوا ناويين يبنوا مسجد في منطقة جنب جراوند زيرو 
الى جانب جرائم الكراهية: 
المركز الاسلامي في فلوريدا اترمى عليه مفرقعات، وبيقولوا فيه تعتيم اعلامي على الحادثة، والخبر ما اخدش نفس المساحة اللي بياخدها اخبار ضد المسلمين 
وبيقول ان الباكستانيين ابتدوا يطفشوا من امريكا
وكمان فيه اقتراحات باختبار تسامح المسلمين قبل السماح لهم ببناء مسجد
:))
ههههههههههههه دي جامدة اخر حاجة
عموما، طبعا حاجة مقرفة اكتر، بس المقرف اكتر واكتر طريقة المسلمين في الاستجداء، ايه الشحاتة دي؟ "مافيه مسلمين ماتوا في حداشر سبتمبر كمان" يا حلوة، ولو مافيش مسلمين ماتوا في حداشر سبتمبر، ايه دخل حداشر سبتمبر في بناء مسجد لمسلم امريكاني؟ ايه التسول ده؟ وايه الاحساس الدائم والمستمر بانهم متهمين على طول ولازم يبرأوا نفسهم زي الفيلم المقرف بتاع ماي نيم ايز خان؟ 
ما يقفوا كده ويطالبوا بحقوقهم زي الناس المحترمة من غير تسول
هم لما الامريكان بيجونا سياح بنقتلهم عشان قتلوا لنا تلاتة مليون في العراق وافغانستان؟ ولا عمري شفت امريكاني واحد بيتعامل على انه متهم باحتلال بلدين وقتل ابرياء، حتى المتعاطفين مع العرب، ما سمعتش حد فيهم حتى اعتذر وقال انا خجلان اني امريكاني مثلا، ولا سامحونا احنا مالناش ذنب
مالهم المسلمين الامريكان بيعتذروا عن ايه؟ ما يخلوا عندهم كرامة وهم بيطلبوا حقهم

16 comments:

MR.PRESIDENT said...

نحن قوم اعزنا الله بالاسلام فإن ابتغينا غير الإسلام أذلنا الله .

خنوع العرب شيء أساسي ..

امريكا عايشة أصلا علي المهاجرين .. بس فيه تعصب واضح من المحافظين ..

دول ناس مرضي تقريبا

بس مسير يجي اليوم اللي العالم هيحترم المسلمين ..

تحياتي

MR.PRESIDENT said...

نحن قوم اعزنا الله بالاسلام فإن ابتغينا غير الإسلام أذلنا الله .

خنوع العرب شيء أساسي ..

امريكا عايشة أصلا علي المهاجرين .. بس فيه تعصب واضح من المحافظين ..

دول ناس مرضي تقريبا

بس مسير يجي اليوم اللي العالم هيحترم المسلمين ..

تحياتي

Dr90 said...

دة العادي
انت هناك اصلا مجرم حتى يثبت العكس
بالنسبة لموضوع بناء جامع في بعض الولايات الليلة كبيرة اوي
ابسط حاجة لازم تعمل ليستة برواد المسجد المحتملين
عشان هما يحققول معاهم و يشوفوا الخلفية الثقافية و السوابق و اللذي منه

Dr90 said...
This comment has been removed by the author.
محمد صبرى said...

عادى كل مجموعة بشرية بتمر بمرحلة انبطاح , و احنا فى مرحلة الانبطاح الكبير ... اليهود قعدوا فى المرحلة دى آلاف السنين ..و نجحوا باقتدار انهم يحافظوا على وجودهم لغاية عصر النهضة, مين كان يصدق انه اليهود بقوا اصحاب قامات مفرودة , و بيصرفوا ببزخ على بناء رفاه الشعب اليهودى ,هههههه

رغم انه يغيظ جدا جدا, و يشل اسلوب النفس الطويل و الحفاظ على القاعدة الشعبية و التخطيط طويل الامد و الحركة بس فى اللحظة الزمنية المناسبة , لانه معناه التضحية باجيال كاملة ,لكن الحق يقال الاسلوب دا متماهى جدا مع طبيعة تطور الحضارات البشرية و عند اتباعه ادراك فطرى لانه الزمن فيه فترات استعصاء تفشل كل محاولات القفز على الوقائع و المعطيات خلالها

مواطن مصري said...

طيب لما نمنع الي بالك فيهم و نعطي حقوق الاخرين في الداخل

نبقى نتكلم عن حقوق المسلمين في الخارج

جبهة التهييس الشعبية said...

مواطن

انت بتتكلم زي اللي بيقولوا هنا: لما تبقوا تشوفوا امريكا بتعمل ايه في المسلمين في العالم وبتحتلهم وتقتلهم ابقوا اتكلموا عن الاقباط هنا، هم الاقباط بيشوفوا ايه مقارنة باللي بيشوفه العراقيين..

ده نفس المنطق

دلوقت ايه ذنب مسلمين امريكا في جريمة نجع حمادي؟ وايه ذنب اقباط مصر في احتلال العراق؟

ماهو انت اذا قبلت تبرير اضطهاد مسلمين امريكا بذريعة السلفيين اللي في مصر واللي بيعملوه في الاقباط

يبقى تقبل منطق السلفيين نفسه انهم بيبرروا الاعتداءات الطائفية على الاقباط بذريعة ان امريكا بتحتل العراق وافغانستان وبوش قال دي حملة صليبية وبيبعتوا مؤسسات تنصيرية هناك ويموتوا المسلمين

احنا حنبطل نفكر كده امتى؟

مسلمين امريكا دول امريكان مالهمش علاقة ابدا لا بالعبيطان ولا بابو اسحاق الحويني ولا بجريمة نجع حمادي ولا المفروض يتحاسبوا على تصرفات غيرهم

مسيحيين مصر دول مصريين مالهمش علاقة بحملة بوش الصليبية ولا بنشاط مؤسسات التنصير في العراق ولا بالمذابح اللي بتحصل في افغانستان

دول ناس ودول ناس تانية

وكل ناس يتحاسبوا على تصرفاتهم هم بس وكل ناس لهم حقوق لا تمس ولا يتم الاعتداء عليها

حق الانسان في بناء دار عبادة ده حق انساني بصرف النظر عن البلد اللي هو جاي منها والدين اللي هو يتبعه

ومش الناس يتعاقبوا بذنوب ناس غيرهم ويتحرموا من حقوقهم

جبهة التهييس الشعبية said...

انا كان قصدي اكتب العبيكان بس طلعت العبيطان

ههههههههههههه

قدر الله

mido said...

@نوارة نجم

طيب انت ليه قلت كلام مواطن نفسه فى مشكلة المأذن.؟

!!!!

جبهة التهييس الشعبية said...

ما قلتش نفس الكلام على المآذن

zahra el feky said...

الأستاذة نوارة
أنا باحثة ماجستير وباعمل بحث عن المدونات وأرجو إنك ترسلي لي وسيلة للاتصال بكي
أرسلت لك اميل قبل ذلك ولكن دون رد
أرجو الاستجابة

mido said...

قلتى
لما نبقى نحترم الناس هنا نبقى نقف مع مسلمى سويسرا

جبهة التهييس الشعبية said...

لا ما قلتش كده خالص

قلت بالظبط: حسيتوا بالناس بقى لما تعوز تبني دار عبادة وما تعرفش؟
وحسيتوا بالناس حاجة، وما تتضامنوش مع الناس حاجة تانية، اظن واضحة، وللا محتاجة توضيح؟

ونقلت رسالة مسلمي سويسرا اللي قالوا: نناشد العالم الاسلامي الا يتدخل

يعني ولاد ال... مش عايزين من خلقتنا حاجة، حنتاجر بيهم ليه بقى؟

خلاص يغوروا، المآذن اساسا مش مهمة، المهم المسجد

mido said...

قلتى انا اتكسف اقف معاهم و انا بضرب المسيحيين هنا فى مصر بالجزمة

Raafatology®الأغانى للرأفتانى said...

ThinkProgress عامل زى اليوم السابع كده واوسخ شويه يعنى المفروض تشوفى مصدر انظف من ده شويه
المركز الاسلامى اللى جنب الجراوند زيور تمت التصويت عليه.. باغلبية ٢٩-١
وانا عابش هنا بقالى اكثر من ١٥ سنه فى نيويورك وبسم الله ماشاء الله المساجد بتزيد والمدارس الاسلاميه

جرايم الكرايهه ماليه الدنيا . من اول شبرا وغيط العنب لحد باريس ولندن

دى نبذه بسيطه
Demographic Facts

Mosques in the United States: 1,209
American Muslims associated with a mosque: 2 million
Increase in number of mosques since 1994: 25 percent
Proportion of mosques founded since 1980: 62 percent
Average number of Muslims associated with each mosque in the United States: 1,625
U.S. mosque participants who are converts: 30 percent
American Muslims who "strongly agree" that they should participate in American institutions and the political process: 70 percent
U.S. mosques attended by a single ethnic group: 7 percent
U.S. mosques that have some Asian, African-American, and Arab members: nearly 90 percent
Ethnic origins of regular participants in U.S. mosques:
South Asian (Pakistani, Indian, Bangladeshi, Afghani) = 33 percent
African-America = 30 percent
Arab = 25 percent
Sub-Saharan African = 3.4 percent
European (Bosnian, Tartar, Kosovar, etc.) = 2.1 percent
White American = 1.6 percent
Southeast Asian ( Malaysian, Indonesian, Filipino) = 1.3 percent
Caribbean = 1.2 percent
Turkish = 1.1 percent
Iranian = 0.7 percent
Hispanic/Latino = 0.6 percent
U.S. mosques that feel they strictly follow the Koran and Sunnah: more than 90 percent
U.S. mosques that feel the Koran should be interpreted with consideration of its purposes and modern circumstances: 71 percent
U.S. mosques that provide some assistance to the needy: nearly 70 percent
U.S. mosques with a full-time school: more than 20 percent

واحدة من الناس said...

هى ديه أكبر مشكلة عند معظم المسلمين الشعور بالدونية مع إن أخص صفات المسلم هى العزة فإن العزة لله ولرسوله وللم}منين وهو ده المفهوم اللى اتعامل بيه أردوجان مع الدول التانية فأجبر اسرائيل على الاعتذار وده زعيم يعلم شعبه العزة أما معظم المسلمين المهاجرين بره خارجين من بلاد مقهوره نفسيا وزعماء منبطحين على طول ومن أهانه الله فما له من معز