Thursday 2 September 2010

انا مش عايزة ادهم صبري

مين اللي عمل كده؟ انت اللي عملت الصوت ده؟ يا لئيم... ده بالون اختبار؟ طب لا لا لا 
مش عايزين اي حاجة من ريحة رأفت الهجان وجمعة الشوان، رأفت وجمعة عندهم مهمة يقوموا بيها، مش شغلتهم يبقوا رؤوساء جمهورية، وبعدين انتوا مالكوا ومالنا؟ مالكوا ومالنا بقى ما تسيبونا في حالنا، مرة تقولوا لنا جمال ومرة تقولوا لنا عمر سليمان، ما تسيبونا بقى، سيبونا بقى... فين عماد اديب مش كان اتنيل اتكلم عن الخروج الآمن؟ برضه كان بالون اختبار؟ طب احنا وافقنا على فكرة على ما اذكر، ايه؟ عشان وافقنا انتوا ما رضيتوش؟ سيبونا بقى
حرام عليكوا يعني ايه الافترا ده؟ ايه يا شيخة.. ايه يا شيييييخةةةةةة كشفت راسي ودعيت عليكم
عموما بيقولوا فيه حظر نشر على بوسترات عمر سليمان بعد ما الخبر ده اتنشر في اللنك 
الحمد لله.. ايوة كده اعقلوا، كل واحد يخلي باله من لغاليغه

16 comments:

Ahmed Rihan said...

مش عايزين اى حد من ولاد التنظيم الحكومي ده
ولا حتى ادهم صبري

Anonymous said...

شوفى يا أخت نوارة
هما أتنين سيناريو لا ثالث لهما
أما أن بوسترات السيد عمر سيلمان الهدف منها أن نغمة جديدة تظهر تقول كفاية حكم العسكر وأن جمال مبارك هو المرشح المدنى اللى ممكن نتوافق عليه فبكده تكون بوسترات عمر سليمان دفعة غير مباشرة لجمال مبارك الى كرسى الرئاسة والسيناريو ده هو الأضعف لأن عمر سليمان أقوى داخليا وخارجيا من أنه يتلعب بيه لعبة زى دى
أما السيناريو اللى أنا حاسس بيه من الأول أنه سواء البرادعى أو جمال مبارك كلاهما كومبارس فى فيلم بطله المنتظر هو عمر سليمان وأن فيه مصلحة دولية أن الرجل ده هو اللى يحكم مصر وخاصة أن علاقته بأسرائيل أكثر من السمن على العسل وكل المصايب اللى أسرائيل عملتها من حرب غزة حتى ضرب أسطول الحرية كان هو على علم بها
شوفى تقرير القدس العربى وهما بيسألو حمدين صباحى وفهمى هويدى والمستشار الخضيرى وردهم بأن عمر سليمان أفضل مليون مرة من جمال مبارك بما يعنى أن السنارة غمزت وأن الأفلام الحمضانة بتاعة الأخ الكردى والتصريحات البجحة بتاعى العم أبراهيم كامل كلها أستفزاز للشعب المصرى علشان لما يجى البطل المنتظر عمر سليمان تكون النتيجة لصالحه طبعا

مواطن مصري said...

طب و نادية الجنسي دي الست راحت تل ابيب و عذبوها و هزت عرش مصر و مخدوش الميكروفلم من بقها و قالت عااااااااا


بصراحة نادية الجنسي لازم تحكم مصر عشان تعمل مسلسل امرأة حكمت عرش مصر

Fatma said...

وفي هذه اللحظة تحضرني مقولتك الشهيرة : العجل هد المصطبة ..شرب السبرتو واللي جاله جاله " ايه البلد المسلية دي انا متسلية اوي :)

Nicholas Urfe said...

:)

عنده ميزة نسبية أنه كبير في السن . مواليد 1936!

لما بيمسكنا شاب صغير بيطول وبيلزق


على رايك كلها خطط ترويج ومناورة مع الشعب واستطلاعات.

بس عمر سليمان عنجه ايه يقدمه للشعب كرئيس؟؟؟؟

لكن العمل ايه ، جمال مبارك بقالو سنين طويلة بيشتغل ومسخر البلد كلها لتلميعه ووراه حزب الأغلبية ، إيه البدائل قدام المصريين ؟ يعملو ايه ؟؟ وهل فعلاً يقدروا يعملو حاجة ؟

سواح في ملك اللــــــــــــــــــه- said...

بمناسبه لغاليغوا وانا بقي راجل بخاف علي لغلوغي ومحيلتيش غيره وكل اللي في السوق دلوقتي صيني مش بتاع بلاده فاكرين الفيلم بتاع احمد رمزي وعبد الحليم وعمر الشريف لما احمد رمزي كان عايز البت فاتن حمامه تحبه راح جاب بطل ملاكمه حاجه كده سته في سبعه عشان يضربوا قدام البت فاتن حمامه ويطلع بطل قدامها ويعجب السنيوره هتقولوا ايه علاقه الفيلم هقولكم الحدق يفهم بس عشان اللغلوغ ميضيعش مش هوضح

المهدى said...

نوارة لن يكون هناك تغيير غير من داخل النظام ومؤسساته الباقية على قيد الحياة واللى يقدر يجمع تلات تنفار يجمعهم حتى سيناريو الفوضى والعشوائيات سينتهى بمؤسسة قوية تنزل الشارع ولا تعود إلى ثكناتها دى الحقيقة مرة .. مرة لكن حقيقة المهم التعامل معها وإن كانت أشباه الأحزاب وأشباه القوى الوطنية فشلت وتواطأت فعليها أن تقف معا لمرة واحدة لتفاوض واقعيا القادم خاصة وهو يحتاج إلى شرعية
ثانيا ( ودى معلومات مش تنظير ) كل من قابل خالد مشعل سمع منه أن عمر سليمان هو الوحيد الذى يقف إلى جانبهم ضد كل العالم وراجعى مؤتمر شرم الشيخ بعد ما سمى إنقلاب حماس لتجدى إنقلاب حقيقى داخل السلطة فى مصر ويمكن ده سبب ما أشار إليه خالد عن رأى حمدين وفهمى هويدى والخضيرى فى عمر سليمان
ياريت ... هو ده الخبر اللى ممكن يكون بعده التغيير

dr.lecter said...

رمضان 2010 قمه المسخره

هم عملوا بمبدا بلاها سوسو خدوا نوسه

الطمي يابطاطس ده اللي كان ناقص

احمد سعيد said...

دة تصرف خبيث من اعداء الراجل

كدة عوكل هيكرهه وهيرميه من على حجرة

هههههههههههه

---------

وعموما فيه حل بسيط جدا
شوفتى ايدة عامله ازاى ؟؟
ممكن شويه دعايه بسيطه انه بيؤدى التحيه النازيه

وكدة حبايبنا الحلوين فى بلاد الفرنجه
هيقوموا بالواجد

----------

بس عارفه

شبه ميييييييين ؟؟

شبه الراجل مدير الشركه المنافسه بتاع اعلان سيراميك كليوباترا الجديد

بتاع ( رااااااايح فيييييين يافتحى ؟

كل ما اشوفه اضحك



نيااااااااهاههاهاهاهااااععععععع

anaURZ said...

أنا مش عايز رامبو بتاع الحصانة

أبو أمك said...

طب ما يأيدوني أنا

Ahmed Fawzi said...

ليه يا نوارة عم نجم فى برنامج منى الحسينى إعتذر عن حاجة صح ؟ ؟؟ عن حقه فى إنه يقول اللى مفروض يتقال ..

بهيج الشرير said...

والنبي ياأبلتي أنا عندي سؤال بمناسبة رئيس مصر الجاي! إيه العامل المشترك بين الواد إبن عرس المعروف أيضا بإسم الثعبان الأقرع، وعمر سليمان، والبرادعي اللميع حبيب الملايين والبعبع النووي، والبطيخ؟ في الحالة دي وبعد مسلسلات رمضان أنا بأرشح لرئاسة مصر دوسة بنت الحاج عبد الحميد وصديقة أبو لباس

كريـــم said...

هل تعتقد كاتبة هذه الفوضى أن فوضى الحديث التي تُضحك الناس على ما بهم من هم ومشاكل هو الطريق الشجاع والعادل والعلمي والمتطور للتغيير والاصلاح؟ أم أن أهم ما يهمها هو عدد التعليقات وشهرة المقالات؟ أم انها تؤمن أن المستوى الثقافي والعلمي لجمهور من يقرأ لها لا يمكّنهم من فهم الحديث إن كُتِبَ بلغة جيدة وجادة. أنا لست ضد السخرية والفكاهة في الوقت المناسب ولكنني لا أعتقد أن الباحثة عن العدل يمكنها العثور عليه، على العدل، بهذا الحديث الساخر فقط، الساخر من الامور وما هي عليه والساخر بمن يقرأ. العرب جميعهم قادرون بحنكة وبلاغة على السخرية وترديد عبارات عادل إمام وسعيد صالح و زكي جمعه، ولكننا لازلنا نبحث عمن يستطيع أن يكتب بالمنطق والعلم ويفصح عن الاشياء بأسمائها ويدل الناس على الطريق الصواب والمنهج المحترم من أجل عدل أكثر ولا أقول عدل كامل.

محمد نور الدين said...

إلى النجمة بنت النجم ألف تحية من الجزائر
هي إيه الحكاية ، أنت مقاطعة تعليقاتي والا إيه يا نوارة. مقاطعة في الدستور و في المدونة .الله يسامحك أحنا زعناك في حاجة ؟

Unknown said...

ليس لي ادنى علاقة بالتعليقات التي تنشر في الدستور ولا حتى أقرأها

المسئولون عن الموقع هم الذين ينشرون التعليقات أو يحذفونها

اظن ده المفروض انه معروف

وانا مش باقرا التعليقات في الدستور عادة انا باقرا التعليقات اللي هنا لان دي اللي انا مسئولة عنها