انا راحة عند الارياه

سبحان الله، ولا إله إلا الله، والحمد لله

اصل انا بعيد عنكم وعن السامعين جالي اكتوئاب اكمني كنت باكره الشعب، انتوا عارفين بقى، لا طايقة الحكومة، ولا طايقة المعارضة، ولا طايقة النشطاء، خصوصا اللي كانوا ايام حرب غزة في عز ما العيال صغيرة بتتحرق بيقولوا احنا مالنا ومال فلسطين وبيشتموا في القومية العربية ايام ماتش الجزائر واذ فجأتن بقوا مهتمين بسوريا وديكتاتور سوريا وعايزين يعملوا مظاهرة قدام سفارة سوريا مع انهم سبحان الله ايام ما العرب تظاهروا قدام سفارة مصر كانوا زعلانين وبيشتموا في العرب وبيقولوا هم مالهم بينا يا ليل ليه شاغلهم شوقنا اللي واخدنا يحسدونا وماله يا ليل اللي غيران منا يقلدنا (هو انا الشهادة لله زعلت كمان وكتبت تدوينة باردح فيها، وما زعلتش من الاجانب اللي عملوا مظاهرات قدام سفاراتنا لانهم ما يعرفوش دول حاجة دول، دول فاكرينا دولة واخدة موقف معين، لكن المفروض الشعوب العربية تبقى عارفة كويس اننا محكومين بطاغية زيهم، والمفروض انهم يبقوا حاسين بينا وعارفين اننا مالناش ذنب في اللي بيحصل زي ماهم مالهمش ذنب في اللي بيحصل، عشان كده زعلت من باب ما كانش العشم، مش من باب هم مالهم ومالنا وجالنا ايه من فلسطين زي ناس كتير من اللي حتطلع مظاهرة سفارة سوريا) وقرفانة من اهل المدن، ومن المتدينين، ومن اللي مش متدينين، وحاجة قرف كده ورا بعضه ورا بعضه ورا بعضه، حسيت ان جبل واتهد على دماغي، هلولة الجزائر، وبعدين كام حاجة مقرفة صغيرة كده، وبعدين هوجة: انا فاطر في رمضان انا فاطر في رمضان، انا واد صايع وملحد وكافر، اوعى وشك، وبعدين هوجة: خطفوا كاميليا فارسة الصليب المقدسة، وبعدين هوجة: دقن كاميليا ونصرة الاسلام هلموا الي يا معشر الكفار إخسأ يا حنظلة، وختمت بسفارة سوريا دي اللي حبكت وعمرها ما حبكت مع سفارة امريكا اللي فاتحة ابو غريب وجوانتامو ولا اسرائيل.. المهم قرفت اخر حاجة يعني، وناس تافهة تافهة تافهة، ومافيش حاجة، مافيش اي حاجة مهمة بيعملوها وجارين الواحد في مناقشات بيزنطية ومحسسيني ان العمر بيضيع على هبل، ولسه حندخل على جدل الانتخابات، ندخل الانتخابات ولا ما ندخلش، قال يعني فيه انتخابات من اساسه، وحيتخانقوا مع بعض خناقة لرب السما، واللي حيدخل الانتخابات حيبقى خاين، واللي مش حيدخل الانتخابات حيبقى متواطئ وحنسمع اهازيج

سبحان الله، رحت لبابا النهاردة على اساس بقى ازوره في العيد، لقيت بالصدفة طنط شاهندة والدكتورة زينب الديب، قعدت تفرجني على فيديوهات وتطلع لي في مستندات.. لا مش عشان انا شخصية مهمة، عشان هي كده، كل ما تشوف حد يا عيني تقعده تفرجه على الفيديوهات بتاعة القرية بتاعتها اللي طارت منها وخصخصوها لها، وتطلع المستندات وتقريني بالعربي والانجليزي والفرنساوي جوابات الشكر اللي جاية لها وتقول لي طب لو انا وحشة يبعتوا لي جوابات شكر ليه؟ لو انا اسأت ادارة المشروع ما حققوش معايا ليه؟ بصراحة صعبت عليا، انا فاهمة يعني ايه انسان يحط حلمه وامله على مشروع معين ويبقى فاكر بيخدم بلده وفجأة كل حاجة تروح منه، بس ما فهمتش منها قوي لانها كانت منفعلة من كتر ماهي مندمجة جدا في قضية زراعة القمح دي، لدرجة انها وهي بتحكي تقعد تغني لنا اغاني الفلاحين، كلها، اغنية اغنية، ولحد الاخر يعني مش حتة صغيرة، بس شفت الفيديوهات وشفت سنابل القمح وقعدت اعيط، واكتأبت زيادة ما انا مكتئبة، راحت طنط شاهندة فجأتن قالت: ايه رأيكوا نروح عند سكينة فؤاد؟

قلت لها: ايوة، يالا بينا.

يااااااه، سبحان الله يا اخي، ما ضاقت الا لما فرجت، وربنا بيقطع من الحكومة والمعارضة ويوصل من عند سكينة فؤاد

طبعا كلامها متستف وفهمت كويس قوي منها

قالت لي ان الاكتفاء الذاتي من القمح مش لازم يبقى شغلانة دولة، هو طبعا مسئولية الدولة، واحنا حنطالبهم بمسئوليتهم، بس احنا نقدر نحقق الاكتفاء ده، وقالت لي اننا مش حندخل في معارك جانبية مع حد ولا حننجر لخناقات، احنا مش عايزين نتخانق، احنا عايزين نحقق الاكتفاء من القمح وحنحققه ان شاء الله، وحندور على مالنا العام وحنجيبه، وقالت لي ان القمح متبارك، ولما تزرعي موسم الموسم الجاي بييجي الضعف، ومش بياخد مية كتير، واننا بسهولة نقدر نحقق ده، واننا عندنا تلاتة مليون فلاح مالهمش امل في الدنيا غير انهم يزرعوا قمح، ومستعدين يحطوا من جيوبهم عشان يزرعوه ويكفوا نفسهم ويكفوا البلد، وقالت لي ما اخافش من المصريين، عشان المصريين زي الصحرا بتاعتهم، يبانوا رمل اصفر بور، بس قلبهم طين خصب، بس انت ارمي فيه البذرة واسقيه وانت تشوفي النتيجة، وقالت لي اننا حنقدم بلاغ للنائب العام نسأل عن البذور اللي ادتها الدكتورة زينب لوزارة الزراعة واختفت، وقالت لي ان بعد كده حنبتدي خطوات عملية، مش مجرد حملة اعلامية، وقالت لي ان عندنا علماء عباقرة، وعندهم براءات اختراع مصرية، يقدروا يزرعوا الصحرا بمية البحر المالحة قمح، وتطلع السنابل زي ضفيرة البنات، والموسم اللي بعده يطلع الزرع احسن من الموسم اللي قبله، وان كل ما حنزرع الصحرا اكتر كل ما الدنيا حتمطر والمية تزيد، وحنعمل كده، عشان الفلاحين عايزين كده، هم بس مش عارفين يعملوا كده ازاي، واحنا حنقول لهم يعملوا كده ازاي، والمصريين كلهم عايزين كده، حتى اللي بيشجعوا كورة، واللي بيتخانقوا على كاميليا، واللي بيهيفوا، كل الناس عايزة اكتفاء ذاتي من القمح، عشان دي حياتهم، ومافيش اهم من الحياة، ولما نحقق الاكتفاء الذاتي من القمح، المية كمان حتزيد، والعلماء المصريين عاملين خريطة ابار، وحنحفرها ومش حنكلفها ولا حاجة، وكل ده بتكاليف قليلة، والدولة تقدر تلم مننا، ولو ما رضيتش احنا نعمل اكتتاب، وفيه ناس كتير مستعدة تساعد وتنضم، شمال ويمين، واهم ناس الفلاحين

وقالت لي ان الفلاحين لما بيعوزوا حاجة بيعملوها

انا بقى كمان حاقابل الدكتور ايمن ابو حديد رئيس مركز البحوث الزراعية واتكلم معاه عشان هو قال اننا نقدر ببساطة نحقق الاكتفاء الذاتي من القمح، ونقدر لو زرعنا سيناء نروي بعد كده بالمطر، وبرضه حاتكلم معاه ونشوف نقدر نعمل ايه

انا خلاص بقى، راحة عند الفلاحين في الارياه.. دي اهم حاجة ممكن الواحد يسعى لها في حياته: العيش والمية للناس

اشوفكوا هناك بقى

اللي عايز ييجي ينضم على الفيس بوك هنا وان شاء الله نخلص نيتنا لربنا وحنقدر نعمل حاجة

سكينة فؤاد عندها امل وطاقة ايجابية واقنعتني اننا ان شاء الله نعمل حاجة

وان شاء الله مش حاكره الفلاحين المرة دي، انا اصلي كنت اتعاملت مع الفلاحين زمان، لا ما ينكرهوش، بالعكس يريحوا الاعصاب، اصل دماغهم مش فاضية زي اهل المدن اللي بيبقوا مش عارفين يملوا دماغهم بايه ومافيش حواليهم غير الزبالة، الفلاحين ما عندهمش زبالة، عندهم اشغال ومشاغل، والزبالة بيعملوا لها اعادة تدوير، مش بيحطوها في دماغهم، صحيح ما يحبوش السياسة، بس يحبوا يشتغلوا، واحنا مالنا ومال السياسة، احنا عايزين مصر ترجع سلة الغلال زي ما كانت