Saturday, 25 September 2010

شرح العوا غلط في ايه

انا متفهمة تماما الناس مش شايفة تشابه بين موقف العوا وموقف بشوي 
لان هي دي الناس اللي مش شايفة تشابه ما بين بوش واوباما
لان الناس بتشوف ان الاشيك اكيد احسن، مع ان الاشيك مش بالضرورة يبقى احسن، ممكن اقول لك انت غبي، وممكن اقول لك: حضرتك ما بتفهمش
الاتنين معناهم: انت غبي
التوضيح ده ان شاء الله حاكتبه في الدستور عشان مساحة القراءة تبقى اوسع لاني مصدقة تماما ان الناس مش شايفة التشابه مش لانهم طائفيين، هم فعلا مش شايفينه
العوا راجل اكاديمي، مفوه، شيك من الاخر كده، حاجة فخيمة، بس هو قال فيه سلاح في الكنيسة
صحيح انه طرح فكرته على شكل تساؤل، وصحيح انه صاغ كلامه بشياكة مش زي بشوي اللي بيدب الكلام بشكل بدائي، بس عشان تعرف كلامه حلو ولا وحش، صح ولا غلط فيه حاجتين تعملهم دلوقت حالا وانت قاعد
1- رد فعل المهابيش على كلام العوا كان ايه
2- تخيل ان العوا اسمه تادرس وانه قال نفس الكلام بس شيل كلمة كنيسة والاخوة الاقباط وحط مكانها كلمة جامع والاخوة المسلمون
دلوقت اعمل كده
اقصد لو عايز توصل للحق
انا عملت كده، انا حاكدب وحادعي؟ لا مش حاكدب ولا حادعي، سمعت العوا اول مرة استشيكت الكلام
وبعدين رجعت فرغت البرنامج على الكمبيوتر، وقلبت الكلام، بجد.. مش الكلام اللي اتنشر في الجرايد، لان ده تفسير الصحفيين، الكلام اللي هو قاله، شلت كلمة كنيسة، وحطيت كلمة جامع، وشلت كلمة اقباط وحطيت كلمة مسلمين
ولما عدت قراية الكلام لقيت نفسي زعلت على روحي
يعني انا نفسي اهو باعترف اني غلطت في الحكم واني احتاجت اعيد النظر وافرغ البرنامج الطويل ده واعمل عملية الاحلال والتبديل دي عشان افهم الكلام صح، وباعترف لكم اهو ان اسلوبه المفوه المرتب بهرني في الاول
ماهم السفسطائيين كانوا بيكسبوا المحاورات بالطريقة دي، الواحد عايز الحق ولا عايز الشياكة
انا شلت كمان كلمة سلاح وحطيت مكانها خطف المسيحيات عشان اخلي الاحلال والتبديل اكثر واقعية، انا شخصيا بازعل قوي من كلام خطف المسيحيات ده لانها اتهامات باطلة ليس عليها دليل وعاملة زي اتهامات الاسود اللي في البدروم
خلاص كده؟
طيب بعد ما تعمل كده (انا باكلم ناس عارفة ومتأكدة انهم عايزين يعرفوا الحق مش عايزين يهللوا وخلاص، وعارفة ان فيه ناس بتقرا تانية مش حتعمل كده لان الموضوع بالنسبة لهم مش حق وباطل، هو مش عايز يسمع غير وجهة نظره، فالبوست ده مش موجه لهم، البوست ده موجه لناس معينة انا عارفاهم بالاسم وعارفة من خلال تعليقاتهم بيفكروا ازاي، زي مثلا المهدي ومش فاهمة على سبيل المثال لا الحصر، مش هم بس فيه غيرهم، بس دول اللي حاضريني) المهم
معلش عطلوا نفسكوا شوية، واعملوا الحكاية دي زي ما انا عملت، مافيش حاجة احسن من المذاكرة عشان الواحد يحكم صح
خلاص كده ذاكرت كلام العوا وعملت التبديل ده وشفت وقعه عليك ايه؟ مش لازم ابدا توصل للنتيجة اللي انا وصلت لها، انا باقول لك الطريقة اللي توصل بيها لنتيجة اقرب ما يكون للصواب بالنسبة لك انت، لان مش كل الناس بتزعل من اللي انا بازعل منه، المهم بس توصل لنتيجة حقيقية مافيهاش مؤثرات خارجية مثل نصاعة الاسلوب، وفصاحة المنطق..إلخ
هات بقى كلام بشوي، الكلام اللي انتشر ما عندناش للاسف تسجيل له
برضه اعمل نفس الحكاية، سواء في موضوع الضيوف ده، او في موضوع القرآن
واعمل عملية الاحلال والتبديل اللي باقول لك عليها، وحاول انك تخليها واقعية، يعني هو مثلا قال المسلمين ضيوف، حط مكانها المسيحيين اقلية، هو اتكلم عن القرآن وقال ان فيه اية محطوطة ايام عثمان بن عفان، شيل القرآن وحط كلمة الانجيل، وشيل عثمان بن عفان وحط مكانها مثلا قسطنطين
خلاص كده
بعد ما قريت بشوي بالشكل المعكوس ده، كام مسلم  بيقول نفس الكلام بقالهم خمس سنين دلوقت؟ انا عاداهم على فكرة
علينا اننا نتفق على قانون يسري على الجميع.. ده في حال ما اذا كنت مسلم بجد، اقصد مسلم متفهم للفلسفة الاسلامية، او لنقطة الانطلاق بتاعة العقيدة الاسلامية وهي العدالة ومن نقطة الانطلاق دي بيتسلسل ضفيرة منطقية زي شريط الدي ان ايه كده، وبيوصل في النهاية لنتائج معينة، وده حال كل العقائد، المهم يعني، نقطة انطلاقك انت كمسلم العدالة، العدالة لا تفرض عليك منهج معين، ولكن تفرض عليك نتائج معينة، وهي غير الحرية اللي مبني عليها المسيحية، العدالة تعني: اعمل اللي انت عايزه، اتبع المنهج اللي انت عايزه على شرط توصل في النهاية لنتيجة ان الناس سواسية كأسنان المشط وان المنهج اللي بتتبعه لا يؤدي في النهاية ان حد يجور على حق حد
صح؟
طيب، قدامك اختيارين دلوقت:
يا اما انت شخص روحك رياضية، لا تأبه للطعن في القرآن، ولا في الرسول، ولا في العقيدة الاسلامية
مش بتتضايق لو حد قال لك يا عباد الكعبة؟ يبقى براحتك قول يا عباد الصليب
مش بتتضايق لو حد قال على القرآن الخرفان؟ يبقى براحتك قول الكتاب المكدس
مش بتتضايق لو حد قال المسلمين بيخطفوا البنات بدون دليل ولا بينة واحدة؟ براحتك قول يمكن المسيحيين عندهم سلاح وانت برضه ما عندكش دليل ولا بينة واحدة
بتضايق؟
انا شخصيا باتضايق، بس مش لازم تبقى زيي، انا باتضايق لاسباب برضه لها نقطة انطلاق وتسلسل منطقي وصلني لنتيجة ان ده كلام يضايق، بس فيه غيري مش لازم يتضايقوا
لكن لو كنت بتضايق زيي، ما تقولش كلام يخلي الرد عليك جارح في حاجة عزيزة عليك
ربنا بيقول على المشركين، على اللات والعزى ومناة وهبل: ولا تسبوا الذين يدعون من دون الله، فيسبوا الله عدوا بغير علم.
يبقى منين سامح لنفسك تقول على الناس: احنا الاغلبية وكلامنا هو اللي يمشي، بكتابهم المكدس، وربهم الخروف، عباد الصليب، النصارى، اللي احتمال يبقى عندهم سلاح في البدروم؟
العوا ما قالش الكلام بالبدائية دي، ببساطة لانه مش بدائي، ربنا انعم عليه بالبلاغة والعلم والاسلوب المبهر، ينفع يستخدمه لصالح اثارة الناس وتجريح ناس تانية؟
طب ربنا ما انعمش على بشوي لا ببلاغة ولا علم ولا اسلوب مبهر، الراجل مدب، انتوا متضايقين منه عشان مدب ومش بيعرف يزوق اسلوبه، ولا متضايقين منه عشان فحوى كلامه؟ لو الحكاية كلها انه مدب، نجيب لكم البابا شنودة يقول نفس المعنى باسلوب لطيف ومبهر وببلاغة، المسيحيين مش حيشوفوا ان الكلام يضايق، المسلمين بس هم اللي حيتضايقوا مهما كان الكلام بليغ وناصع، وشنودة عنده من الذكاء اللي عند العوا، مش ذنب بشوي ان الاي كيو بتاعه منخفض، دي خلقة ربنا
احمد خالد توفيق قال العوا كلامه موزون بالمازورة، صح.. ده يحمله مسئولية اكبر، احنا بنلعب شطرنج ولا عايزين نهدي الناس، ايه الهدف النهائي؟ افهم بس الهدف النهائي من كلام د.العوا عشان نشوف الكلام الموزون بالمازورة ده يؤدي للهدف ولا يؤدي الى انه يبقى قرينة لامعة في ايد مشعلي الفتنة؟
اوعى حد يقول لي الهدف الحقيقة، عشان الحقائق يستدل عليها بالادلة الدامغة، مش بالظن، ولا بالتساؤل الملغم والمبطن بمعاني قد تستغل في اغراض اظنها منافية لاهداف العوا
اذا كان هدفه تحقيق المواطنة زي ما هو قال بنفسه، كان كافي انه ينتقد الكنيسة لعدم انصياعها لاحكام القضاء، وكان كافي انه ينتقد بشوي على كلامه دون الخروج باستنتاجات ملغمة مافيش عليها ادلة مادية زي امتلاك سلاح او الظن بامتلاك سلاح او التساؤل اذا كانوا يتملكوا سلاح
اللي قاله بشوي قلة ادب، بس قلة الادب تدفع دفعا في سكة امتلاك سلاح؟ على كده السلفيين عندهم ترسانة نووية بقى
من حيث ان بشوي بيوجه رسالة فحواها: بقالكوا سنة واتنين وخمسة تتريقوا على كتابنا وثالوثنا وصليبنا وفاكرينا ما عندناش لسان؟ لا عندنا لسان ونقدر نقل ادبنا، وعندنا منطق ونقدر نرد، وعندنا حجة ونقدر نجرح، مش عشان ساكتين نبقى ما نقدرش
بس دي رسالة ظالمة
ظالمة لواحدة زيي مثلا، انا مسلمة، آمل أن أكون مؤمنة، معتزة بديني، واخترته وانا في الجامعة بعد  ما قريت كذا ديانة بمحض ارادتي وحريتي، وعمري في حياتي، ولا حتى بيني وبين نفسي، ما حقرت ديانة، ولا عقيدة، ولا ايمان، عشان بسبب دراستي للاديان المختلفة بشكل مش بطال، وبسبب اني كنت باقراهم وانا فعلا مش عايزة اخد منهم موقف مسبق ولو طلع معاهم حق كان عندي النية وقتها اني اغير للديانة اللي باقراها، بسبب كده، ربنا قدرني اني اشوف نقطة الانطلاق، او اللبنة الفلسفية اللي بتنطلق منها كل عقيدة (بما في ذلك الهندوسية ولو اني تعبت قوي عشان اجيب مصادر لها) والتسلسل المنطقي اللي بيخرج من اللبنة دي والنتيجة النهائية اللي بيوصل لها التسلسل واللي بيؤدي حتميا لشكل الديانة
لو انت بتحترم عقلك حتحترم عقل غيرك، ممكن المنظومة كلها، او الدي ان ايه بتاع العقيدة الفلانية ما اقنعكش، بس هو مش بيقنعك انت لكن بيقنع غيرك، ومين قال لك انك انبه من غيرك ولا افهم من غيرك عشان تحقر منظومة فكرية اقنعته وما اقنعتكش؟
لو انت مؤمن صحيح مش حتحقر غيرك، مش بتحقر غيرك الا لما تكون مهزوز والمنظومة الفكرية اللي انت بتدعي الانتماء لها مش قادرة تقنعك بنفسها وبشكل مستقل، وعشان كده بتلجأ انك تحقر غيرك وتقلل من غير عشان تثبت لنفسك ان انت صح، لو حاسس انك صح فعلا مش حتحتاج تطلع غيرك غلط بالتحقير والتسفيه والاهانة، لو انت حابب اختيارك لنفسك مش حتحس انك بتكره اختيارات غيرك، لو انت فاهم عقيدتك ومتبنيها عن اقتناع مش حتستغبى غيرك، كل الكلام اللي بتقوله على غيرك ده كلامك لنفسك، لو مؤمن بعمق مش محتاج عناصر خارجية تقنعك ان انت صح بدليل ان اللي مش معاك في الفريق عبيط واهبل وحمار، مش بتحتاج تعمل كده غير لما تحس ان فيه حاجة غلط في الفريق بتاعك، فبتدور على اغلاط اكبر في الفرق التانية عشان ترتاح وتستكين.. جدد ايمانك، انت عندك مشكلة لو ده سلوكك
طيب انا ذنبي ايه يا بشوي، انا صدقا وعمقا فعلا باحترم الدي ان ايه بتاع الديانات التانية والعقائد التانية كمان بما فيها الالحاد، عارفة تركبيتها، ومش اختياري، ومش راكبة على دماغي، بس فاهماها ومحترماها
وعمري ما سكت على قلة ادب ولا تطاول على اديان الناس
ذنبي ايه انا عشان بتحدف ناس بتقول على كتابك مكدس انك تخبطني في السكة؟ ماهو ده نفس الحكاية لما ييجي حد يرد على بشوي يقوم ياخد كل المسيحيين بذنبه
زي ما المسيحيين بيتاخدوا بذنب الامريكان
زي ما المسلمين بيتاخدوا بذنب القاعدة
زي ما اليهود بيتاخدوا بذنب الصهاينة
انا اتاخد بذنب الحويني واتخبطت طوبة في دماغي 
والعوا كمان اخد المسيحيين بذنب بشوي وشنودة واتهمهم بحيازة سلاح والناس دلوقت اللي نازل عليها فتشوا الكنايس فتشوا الكنايس
ليه؟ ايه القرينة؟ فين السلاح بتاع المسيحيين عمرنا شفنا لهم سلاح؟ فين عقد توريد السلاح؟ طيب اللي عارف ان فيه سلاح شافه فين؟ في انهي كنيسة وانهي بدروم؟ 
مافيش
فيه بس ابن وكيل المطرانية هرب سلاح، طلع بمب ما طلعش بمب، طلع من الصين من اسرائيل، ما يخصنيش
هو ابن شيخ الازهر لو تاجر مخدرات يبقى بالضرورة المسلمين كلهم شمامين؟ بالضرورة الازهر مخبي مخدرات في البدروم؟
ابن وكيل المطرانية مهرب سلاح. نقطة من اول السطر، فين الدليل على ان السلاح ده اتورد للكنيسة؟ هو تاجر السلاح عنده دين؟ تاجر السلاح بيبيع للسنة والشيعة سلاح في العراق، بيبيع لحزب الله واسرائيل اثناء الحرب سلاح، وابن وكيل المطرانية لو تاجر سلاح، حيبيع للي يشتري، مش حيطلب منه البطاقة، حيطلب منه المعلوم
ومع ذلك، لو فيه نسخة لعقد توريد سلاح للكنيسة طلعوها
لو فيه مكان معين حد عارف ان المكان ده في كنيسة فيه سلاح، يطلع يقول اسمه الثلاثي ورقم بطاقته ويبلغ النائب العام عن المكان ويبقى مستعد ان لو ما لقوش السلاح في المكان ده يتحاسب بتهمة ازعاج سلطات واثارة فتنة طائفية
الكلام من غير قرينة شهادة زور
اظن اي مؤمن من اي ديانة يعرف يعني ايه شهادة زور.... ولا ما يعرفش؟
انتهى

59 comments:

khaled said...

الكلام اللى على هيئة تساؤل بيبقى متحاج لرد مش محتاج لقرينة
الدكتور العوا لما طرح التساؤل بناه على حادثة ضبط شحنة أسلحة ملك لأبن وكيل مطرنية بورسعيد واللى الداخلية معتقها لحد دلوقتى ومفيش أى توضيح رسمى من الكنيسة على الموضوع ده زى ما مفيش تصريح رسمى من الكنيسة على واقعة كامليا شحاتة

khaled said...

ولو واحد من النصارى قال أن الجوامع فيها أسلحة بناء على واقعة معينة فألف مرحب نرد عليه ونقوله الجوامع قدامك فتشها

khaled said...

بس هى المشكلة أنه لا زم يكون فيه ضحيةمتهم مسلم زى ما فيه مجرم مسيحى علشان الكفة تتعدل ومنبقاش طائفيين

مواطن مصري said...

أزيك يا نوارة



مسئولة امريكية: الديمقراطية ليست اختراعا امريكيا وغياب الحريات يؤثر سلبا على المشاركة في الانتخابات

http://www.masrawy.com/News/Egypt/Politics/2010/september/25/america_democracy.aspx

القاهرة - محرر مصراوي - أكدت نائب مساعد وزير الخارجية الامريكية لشئون الشرق الاوسط أنها تعمل على ملف تدعيم وتنمية الديمقراطية وحقوق الانسان في الشرق الأوسط وشمال افريقيا.
وقالت تمارا ويتس ان زيارتها للقاهرة تعد فرصة لمواصلة الحوار القيم مع الحكومة المصرية ومع منظمات المجتمع المدني في موضوعات تتعلق بالديمقراطية وحقوق الانسان وهو الامر الذي يعتبر جزءا من سلسلة حوارات مستمرة تحدث على مستويات مختلفة بين الطرفين.
واضافت في المؤتمر الصحفي الذي عقد بالسفارة الامريكية بالقاهرة أنه في حين يستعد الشعب المصري لخوض انتخابات مجلس الشعب خلال الفترة القليلة القادمة فإنها ستستمع وتتعلم بشأن دور المواطنين المصريين في هذه العملية كما ستتعرف على عن آمالهم وأحلامهم ومخاوفهم حيال هذه الانتخابات

مواطن مصري said...

واخدة بالك انتي في البقين الجامدين

دول و فاكرة المشروع الكانون الي

جيبتهولك و الي قولتلك علية هيتنفذ

عشان جمال يمسك بشرعية امريكية



القاهرة - محرر مصراوي - أكدت نائب مساعد وزير الخارجية الامريكية لشئون الشرق الاوسط أنها تعمل على ملف تدعيم وتنمية الديمقراطية وحقوق الانسان في الشرق الأوسط وشمال افريقيا.
وقالت تمارا ويتس ان زيارتها للقاهرة تعد فرصة لمواصلة الحوار القيم مع الحكومة المصرية ومع منظمات المجتمع المدني في موضوعات تتعلق بالديمقراطية وحقوق الانسان وهو الامر الذي يعتبر جزءا من سلسلة حوارات مستمرة تحدث على مستويات مختلفة بين الطرفين



http://www.masrawy.com/News/Egypt/Politics/2010/september/25/america_democracy.aspx

عم مينا said...

الله عليكي
ربنا يكتر من امثالك يا شيخة

جبهة التهييس الشعبية said...

اوكيه اوكيه

التساؤل يستلزم اجابة

خد عندك التساؤلات وقول لي احساسك بامانة:

ماذا يعني اهتمام المسلمين بوفاء قسطنطين بهذا الشكل؟ هل ما يشاع حول تنظيم مدعوم من المملكة العربية السعودية لخطف المسيحيات المصريات واسلمتهن صحيح؟ هل يعلم العوا عن هذا المخطط؟ هل هو جزء من هذا المخطط حيث انه لا يكف عن ذكر وفاء قسطنطين

مصر بها اغلبية اسلامية، وطول عمر الناس بتغير ديانتها، ما الذي جد ودفع بعض اناس من ذوي الثقل مثل العوا والنجار لتسليط الضوء على المتحولات الى الاسلام؟ ولماذا دائما المتحولات كلهن من النساء؟ ومن الذي وراء تحول كل هؤلاء النساء الى الاسلام؟ ومن الذي يمول هذا المخطط؟ وما الهدف من تسليط الضوء اعلاميا عليه؟ ولماذا يثير عقلاء المسلمون سفهاءهم للثورة من اجل امرأة واحدة بينما لم يتحدث العوا والنجار وابو يحيى وابو محمد والحويني وغيرهم عن قتل المسلمين في شتى انحاء العالم؟ هل هناك من يدفع اموالا لعلماء المسلمين لاثارة هذه الفتن؟ هل يتلقى زغلول النجار اموالا من السعودية؟ هل يتقاضى العوا اموالا للحديث بهذا الشكل عن المسيحيين؟ هل علماء المسلمين مرتشون؟

كل دي اسئلة ممكن يقولها بشوي

والختمة الشريفة لو ما لميتوا نفسكم لابعتها له يطلع يقولها وهو ما حيصدق

مواطن مصري said...

يا نوارة بدل ما نتلهي ب بشوي و العوا


ننركز في الكانون الامريكي دة و لازم

نرفضة عشان لو اتنفذ كدة لو كسب

جمال االحزب مش هيبقالة حجة

مواطن مصري said...

يا نوارة بدل ما نتلهي ب بشوي و العوا


ننركز في الكانون الامريكي دة و لازم

نرفضة عشان لو اتنفذ كدة لو كسب

جمال االحزب مش هيبقالة حجة

مواطن مصري said...

يا نوارة بدل ما نتلهي ب بشوي و العوا


ننركز في الكانون الامريكي دة و لازم

نرفضة عشان لو اتنفذ كدة لو كسب

جمال االحزب مش هيبقالة حجة

khaled said...

من غير ما تبيعتيها هى بتتقال الصبح وأخر النهار ومش من بشوى أنما من خالد منتصر وعبدالرحيم على وعادل خمودة و.....غيرهم وهم زى ما أنت شيفاه كلهم مسلمين
وكل الأسماء اللى ذكرتيها أتقال أنها بتقبض وبتاخد فلوس من السعودية وبتدى الفنانات فلوس علشان تسلم وبتدى فلوس للنصارى علشان يسلموا
ولكن لو خرج محمد سليم العوا أو غيره وقال أن النصارى دول ضيوف فى مصر وأننا أصحاب البلد أو خرج شيخ الأزهر فقال أنه على أستعداد للأستشهاد لو حاولت الدولة تفتش المساجد هيكون أيه الرد

أبو هاجر said...

أنا خايف عليك يانوارة
نعم خايف عليك لأنك أسندت لنفسك دورا في مسرحية أبطالها معروفين وادوارهم معروفة و مرسومة لهم بدقة متناهية اما أنت فتقومين بدور الأطرش في الزفة إنها مسرحية حقيرة ومخرجها لا يقل حقارة ومؤلفها أحقرهم جميعا.هل تصدقين أن العوا المعروف عنه الذكاء و الحنكة و الدهاء ،و اللي متبرعيلوا بجمعية وينشط على راحتو. يدلي بتلك التصريحات التي تمس بالوحدة الوطنية و السيادة و الأمن المصري وعلى قناة الجزيرة يعني اللي مايشري يتفرج بدون تنسيق مع الأجهزة من يقول غير ذلك يكون فعلا مابيفهمش وهل تصدقين أن رجل الدين المسيحي يتحدث عن مصحف عثمان وقص ولزق القرآن هذه القضايا نتحرج نحن ابناء الإسلام الخوض فيها لأن لها تداعيات خطيرة . هل يجرؤ بيشوي على ذلك بدون إذن البابا شنودة الذي له صلة قوية بالنظام واجهزته. من يقول غير ذلك هو فعلا ما بيفهمش
وهل كل ذلك مفصول عن بوستير عمر
سليمان و شعار لا البرادعي و لا جمال ورئيسنا هو عمر سليمان
أو تلك الشعارات التي ظهرت في عدة محافظات تقول لجمال مصر اكبر منك أن ذلك االمشهد المصري السخيف في جوهره مفاوضات وترتيبات بين البارونات و الديناصورات التي لم تنقرض من اجل إقتاسام تركةالرجل المريض
ولك اجمل التحيات ياوجه مصر الجميل المشرق

قهوة كتكوت said...

كل اللى انت قلتيه بالنسبة للحرية واصول الاسلام فعلا صحيح ومحتاج موضوع لوحده لان عقول الناس ضلمت من
الاعلامين العلمانى والقنوات المدعوة اسلامية واللى ماسكها شوية ارزقية.
انما بالنسبة للموضوع التانى العوا وبشوى.....هل يستوى البحران؟؟؟
العوا مهما شكرنا فيه هو لا يمثل المسلمين يعنى كلامه ده هو المسئول عنه لوحده ومش هادافع عنه واقول انه كان منفعل من كلام بيشوى(وده ممكن يكون صح)
ولا كلام شوية عيال صغيرة سمع كلمتين
من التلفزيون وافتكر نفسه سلفى و شتم المسيحيين لانه عيل اهبل ومش بيمثل غير نفسه....
انما المشكلة ان بيشوى بيمثل الكنيسة
ولم ينتقض كلامه البابا وانا ما زعلتش من ادعائه على القرأن لان ده طبيعى لانه لا يؤمن بيه
انما اللى يغضب تزوير التاريخ وادعاء الاضطهاد وده اللى بيوصل للمسيحيين فى الكنايس يعنى من الاخر ده كلام
الكنيسة المتكلمة رسميا باسم ابناء الديانة المسيحية فى مصر
...الحل دلوقتى ان الكنيسة تكون مسئولة عن علاقة المسيحيين بربنا وبس
ويرجع مال قيصر لقيصر
واظن ده مش كتير

بهيج الشرير said...

والنبي ياأبلتي أنا عندي إقتراح، إيه رأييك علشان تقوية الوحدة الوطنية نخللي الأنبا بيشوي درة بعد ما يخلص شوي؛ يدي القوالح لأبو التعالب ملك الفياجرا وقاهر الهكسوس بدل ما يروح ألمانيا والدكاترة الألمان يمنظروه بالمنظارالألماني، وفي الحالة دي يبقى إتقولح بالقوالح المصري مما يدعم أواصر الترابط بين عنصري الأمة؛ تشجيع المنتج المحلي وفتح "نوافذ" جديدة للتسويق (إيه رأييك في نوافذ دي)؛ وتوفير العملة الصعبة "بضغط" النفقات خصوصا في سن الكهولة والترهل لازم يضغط أكتر وأكتر

جبهة التهييس الشعبية said...

ابو هاجر

كلامك مظبوط بالنسبة لرؤوس الفتنة ودلاديلها

بس فيه ناس كتير بريئة وبتدخل في الظيطة

وفيه ناس اظنها كويسة واتلخبطت بسبب المسرحية اللي بتقول عليها

وقلت برضه الواحد يخلص ضميره من ربنا

حاقرا كتكوت بقى وارد عليه

جبهة التهييس الشعبية said...

قهوة كتكوت

برضه نقطة انه ممثل لمؤسسة الكنيسة بينما العوا ممثل لنفسه دي صحيحة من الناحية النظرية

لكن من الناحية الفعلية التأثير النفسي اكبر من التأثير المؤسسي

جبهة التهييس الشعبية said...

بهيج

ههههههههههه

صح

جبهة التهييس الشعبية said...

ولما الاسئلة دي بتطرح بتبقى مبسوط طبعا ورحك رياضية يا خالد

مش انت بتاع العقيدة الطحاوية؟

اصل كان فيه واحد بيدخل من اربع سنين اسمه خالد بيشتم الشيعة ويقول لي يا جاهلة قريتي العقيدة الطحاوية؟ الظاهر كان لسه قاريها جديد

انت ده ولا انت خالد تاني؟

محمود المصرى said...

بسم الله الرحمن الرحيم

التساؤلات التى اوردتيها لا تستفز بصراحة ودا لسبب بسيت انها ليست اول مرة يطرح فيها مثل هذه التساؤلات وطرحت كثيرا جدا وتم الاجابة على كثير منها وتم الاعراض عن بعضها لكن يهمنى ان اعيد الاجابة على التساؤلات الخاصة بالمسلمين الجدد والمسلمات الجدد.
مقولة ان المتحولين للاسلام مؤخرا من المسيحيات فقط هذا غير حقيقى بالمرة ويستطيع اى واحد ان يذهب لمكتب الاشهار ويشوف الكشوفات , لكن عادة المسيحيين لا يهيجوا الا على اسلام المسيحيات فالقضية بتشتعل , ولو استعرضتى كل القضايا السابقة هاتلاقى ان اللى اشعلها مسيحيين وليس المسلمين , يعنى المسلمين كانوا فى موقف رد الفعل لتوضيح الموقف ,وتسليط الضوء على المسلمات الجدد من قبل الكبار مثل العوا وعمارة والنجار لأن الدولة بدأت تسلك مسلك جديد هو الاخر بتسليمهن للكنيسة حسب الاوضاع السياسية , وطبعا الاجابات دى مش ليكى لأن الاسئلة دى مش بتاعتك .


بالنسبة لمتن الموضوع عاوز اسأل حضرتك سؤال هل من ضمن احترام تسلسل الدى ان ايه المسيحى انى الغى اجزاء من الدى ان ايه بتاع عقيدتى؟ اجزاء زى ان الكتب السابقة نالها التحريف او ان المسيح ليس هو الله او ان من لا يؤمن بالقران والاسلام كافر او ان من يقول بألوهية المسيح كافر وكل هذه اجزاء من الدى ان ايه بتاع عقيدتى هل انكره ولا اقبله ؟
نقطة مهمة اخرى حضرتك بتقولى ان من خمس سنين وكبار المسلمين بيهاجموا المسيحية وبيقولوا كتاب مكدس ونصارى وعباد صليب , بالنسبة لكلمة نصارى هى مش شتيمة نهائيا ولا فيها اى اهانة وانا مستعد اجيبلك قائمة بأسماء فحول الكنيسة المصرية المتقدمين كانوا يسمون المسيحية بالملة النصرانية فى كتبهم اما عباد الصليب فهى شىء يفتخر به المسيحيون لأن اى مسيحى يفتخر بعبادة المسيح الذى هو الصليب على وزن غريق كده , موضوع الكتاب المكدس انا كنت زمان طلبت الدليل على ان الدكتور النجار قاله لكن انا سمعته بنفسى وكان فى حلقة تناولت زكريا بطرس , وبصراحة هى خطأ بلا شك لكن دائما نزع رد الفعل عن الفعل يخل بالحكم عليه , زى كلامك عن حداشر سبتمبر كده , يعنى لما زكريا بطرس كان بيقول فى الرسول كلام فى منتهى السفالة والحقارة , والغالبية العظمى ممن قابلتهم من المسيحيين لم يستقبحوا كلامه بل ان شنودة قال انه بيتساءل ماتردوا عليه ماتردوش ليه يا حبيبى فلما واحد ينفعل ويقول المكدس ( وهو بلا شك خطأ ) اكيد بنقدر نفهم كلامه فى سياقه .
بالنسبة لكلام الدكتور العوا ومسألة السلاح انا قلبت الكلام وحطيت موضوع خطف المسيحيات , ولقيت نفسى برد واقول هاتولنا اسماء اللى خطفناهم واحنا نطلعهم فى التليفزيون ونشوف خطفناهم ولا لا ولو كانوا اتخطفوا فعلا يتم حساب المختطف ماعنديش مشكلة ولا حساسية فى الموضوع .

طبعا مرة اخرى انا اعلم ان كلامك ليس موجها لى لأنى افكر بطريقة لا تعجبك وبالتالى فردى ليس موجها لكى لكن لمن سيقرأ كلامك .
ومن كان له اذنان للسمع فليسمع .

بالمناسبة منطلق العقيدة الاسلامية التوحيد .

محمود المصرى said...
This comment has been removed by the author.
محمود المصرى said...
This comment has been removed by the author.
السلام عليكم said...

معقول واحده صحفيه زيك متصوره ان المتحوليين نساء فقط امال اللى قتله اخوه فى الفيوم علشان اسلم واللى حاصروا القسم علشانه فى بنى سويف

انتى بتعتبرى سؤالنا على وفاء واخواتها المختفيات خلف اسوار الكنيسه دليل على اننا طائفيين مع اننا لم نعلم عنهن شئ الا من مظاهرات المسيحيين فى كنائسهم لما اختفوا واتهموا المسلميين بخطفهم ثم تم تسليمهم للكنيسه وبعد كده لا رجعوا بيوتهم ولا حد عرف عنهم شئ الا تصريحات غامضه عن انهم بخير ومش عايزيين يكلموا حد

وفاء دى تقريبا بقالها خمس سنيين طيب زغلول النجار ده راجل مخه مفوت وبيتكلم من منطلق اسلامى بحت يعنى خايف انها تكون اسلمت والا حاجه ومحبوسه وبتعدب لترتد عن دينهاواللى بيساعد على تفكيره ده ان كل ده والست دى مابنيتش

طيب انتى يا ام العقلاء يا اللى العداله الاجتماعيه واكله مخك ومتبنيه كل انواع الحريات متدوريش على حريه الست دى ليه

وبعديين ما بشوى يقول اللى يقوله تفتكرى ان القواله دى جديده الفرق انها بس بقت علنيه ويمكن ان ده احسن علشان الناس تبقى تاخد بالها وتبطل العبط اللى هم فيه وتعرف عدوها من صديقهاوالمثل بيقول حرص من صاحبك ولا تخونه احسن نفوق فى يوم نلاقى نفسنا نصين زى ما السوادان بقت نصيين او ثلاثه لما اقليم دارفور ينفصل او اربعه لان فى قلاقل برضه فى شرق السودان

انا طبعا مش بتكلم عليكى انت العبط متاصل فيكى وصعب انك تتخلصى منه

السلام عليكم said...

معقول واحده صحفيه زيك متصوره ان المتحوليين نساء فقط امال اللى قتله اخوه فى الفيوم علشان اسلم واللى حاصروا القسم علشانه فى بنى سويف

انتى بتعتبرى سؤالنا على وفاء واخواتها المختفيات خلف اسوار الكنيسه دليل على اننا طائفيين مع اننا لم نعلم عنهن شئ الا من مظاهرات المسيحيين فى كنائسهم لما اختفوا واتهموا المسلميين بخطفهم ثم تم تسليمهم للكنيسه وبعد كده لا رجعوا بيوتهم ولا حد عرف عنهم شئ الا تصريحات غامضه عن انهم بخير ومش عايزيين يكلموا حد

وفاء دى تقريبا بقالها خمس سنيين طيب زغلول النجار ده راجل مخه مفوت وبيتكلم من منطلق اسلامى بحت يعنى خايف انها تكون اسلمت والا حاجه ومحبوسه وبتعدب لترتد عن دينهاواللى بيساعد على تفكيره ده ان كل ده والست دى مابنيتش

طيب انتى يا ام العقلاء يا اللى العداله الاجتماعيه واكله مخك ومتبنيه كل انواع الحريات متدوريش على حريه الست دى ليه

وبعديين ما بشوى يقول اللى يقوله تفتكرى ان القواله دى جديده الفرق انها بس بقت علنيه ويمكن ان ده احسن علشان الناس تبقى تاخد بالها وتبطل العبط اللى هم فيه وتعرف عدوها من صديقهاوالمثل بيقول حرص من صاحبك ولا تخونه احسن نفوق فى يوم نلاقى نفسنا نصين زى ما السوادان بقت نصيين او ثلاثه لما اقليم دارفور ينفصل او اربعه لان فى قلاقل برضه فى شرق السودان

انا طبعا مش بتكلم عليكى انت العبط متاصل فيكى وصعب انك تتخلصى منه

Shoukry said...

Thumbs-Up

محمود المصرى said...

بالنسبة لكلمة نصارى اللى بيقولوا انها بتزعلهم هى مذكورة فى الكتاب المقدس فى نسخة دار المشرق
اع-24-5: وجدنا هذا الرجل آفة من الآفات، يثير الفتن بين اليهود كافة في العالم أجمع، وأحد أئمة شيعة النصارى.
واصل الكلمة فى اليونانى هو ναζωραιων
وتنطق nasoraios
وبالتالى كلمة نصارى هى تعريب للكلمةا ليونانية المذكورة فى العهد الجديد وعمر المسيحيين على مر العصور ما اعتبروها اهانة وابن العسال ليه كتاب اسمه "التبصرة فى العقائد النصرانية "
لكن بما ان الكنيسة الان يحكمها فريق معادى لكل ما هو عربى واسلامى فساءه ان نسميهم بكلمة فى القران فأنكروها علينا رغم انها فى العهد الجديد اصلا .
لكن المفارقة المضحكة بقى ان شنودة ولا بيشوى ولا اللى معاهم لما يحبوا يتكلموا عن الوحدة تلاقيهم يجيبوا اية ولتجدن اقربهم مودة , اشمعنى عاجباكم كلمة نصارى فى الاية دى ومش عاجباكم فى كلامنا؟

جبهة التهييس الشعبية said...

هي المجموعة دي بتيجي كلها مع بعضها ليه؟ هههههههههههههه انتوا قاعدين في بيت واحد؟

عموما البوست ده مش ليكم
البوست ده لامخاخ تانية خالص لا مؤاخذة

khaled said...

لا ياستى والله أنا لا قريت العقيدة الطحاوية ولا العقيدة الطحالية
وعن نفسى نظرتى للشيعة مش اللى فى بالك خالص
وروحى رياضيةبالفعل وأرفض أن يحاسب الناس على عقائدهم لأن التفاضل بالعقيدة عند الله مش عند البشر (أن أكرمكم عند الله أتقاكم )
ولكن فى المقابل أكره من ينتقص من هويتى الأسلامية بدعوى فارغة من نوع المواطنة والحفاظ على نسيج معرفش أيه وعنصرى معرفش مين
وأعتقد لو سألت الأستاذة الكبيرة صافيناز كاظم والدتك هتقولك الفرق بين الحفاظ على هويتنا الأسلامية وبين التعصب والتطرف والطائفية

مواطن مصري said...

«فورين بوليسى» عن جمال مبارك: «وعسى أن تكرهوا شيئاً وهو خير لكم»


http://www.almasryalyoum.com/node/160330



قالت مجلة «فورين بوليسى» الأمريكية، إن وصول جمال مبارك، أمين السياسات بالحزب الوطنى، إلى منصب رئيس الجمهورية هو الخيار الأفضل لتحقيق الديمقراطية فى مصر على المدى البعيد، مستشهدة بالآية القرآنية.. «وعسى أن تكرهوا شيئاً وهو خير لكم ».


اهي البدايات الصفقة حصلت

و بكرة القانون الامريكي

و بكدو جمال معاة الشرعية الامريكية

الفورين بوليسي بتستشهد باية بالقران لصالح جمال

مواطن مصري said...

«فورين بوليسى» عن جمال مبارك: «وعسى أن تكرهوا شيئاً وهو خير لكم»


http://www.almasryalyoum.com/node/160330



قالت مجلة «فورين بوليسى» الأمريكية، إن وصول جمال مبارك، أمين السياسات بالحزب الوطنى، إلى منصب رئيس الجمهورية هو الخيار الأفضل لتحقيق الديمقراطية فى مصر على المدى البعيد، مستشهدة بالآية القرآنية.. «وعسى أن تكرهوا شيئاً وهو خير لكم ».


اهي البدايات الصفقة حصلت

و بكرة القانون الامريكي

و بكدو جمال معاة الشرعية الامريكية

الفورين بوليسي بتستشهد باية بالقران لصالح جمال

محمود المصرى said...

بسم الله الرحمن الرحيم

والله واخد بالى انها لامخاخ تانية وانا بوجه كلامى لنفس الامخاخ التانية دى لأنها هى القادرة على تقبل الكلام لما بتشوفه منطقى .

اما موضوع التزامن فدا يعزى الى ان الشيك بتاع السعودية والاوامر بتاعت قيادة التنظيم السلفى الارهابى فى مصر بتوصل لينا جميعا فى وقت واحد .

جبهة التهييس الشعبية said...

مواطن مصري

يا عمرو مالك مخضوض كده يا حبيبي، ما ده بقاله كتير ده

ايوة جمال حيمسك، ما احنا عارفين، من ساعة ما راح واشنطن مع ابوه، ونوفوستي قالت صفقة جمال تمت خلاص

نعمل ايه بقى؟

اقصى حاجة نعملها انه لما يمسك ما يقلبهاش عسكري ويكتم انفاسنا

لان ممكن الفوضى الشديدة دي تبقى تمهيد انه يمسكنا بقبضة حديدية

عشان كده لازم احنا نهدي وما نديهوش فرصة انه يتحجج بالفوضى ويفرض قبضة حديدية على الناس وفجأة نلاقي نفسنا سوريا ولا العراق ايام صدام

لكن انه يمسك ده قضاء الله وقدره

ماما امريكا وافقت، والسعودية موافقة

والمعاتيه اللي عندنا كانوا بيتخانقوا على الحسنة اللي في دقن كاميليا وفي حالة هذيان ولا ايام فتنة الجزائر

خلاص يا عمرو، مافيش حاجة تتعمل يا حبيبي

جبهة التهييس الشعبية said...

هم بيبعتوا شيكات؟ اما معاتيه صحيح

فيه وسائل للتمويل احسن من الشيكات :)

جبهة التهييس الشعبية said...

هههههههه بس لطيفة قوي يا عمور عسى ان تكرهوا شيئا وهو خير لكم

هم الامريكان كده اعلنوا انهم بيكرهوا جمال؟

ههههه الواد دمه تقيل قوي يا عمرو، حتى الامريكان مستبضنينه

قهوة كتكوت said...

بعد اذنك يا نوارة
عايز اسأل سؤال
هو ليه فيه ناس ردودهم شبه بعض هما حافظين ولا ايه؟؟
سؤال تانى برضه هما المسلمين المراق دمهم فى كل حتة واللى مش لاقى كتير منهم ياكل فى مصر ما يهموش الاخوة
؟؟
انا معاكم فى الجهاد ضد عباد الصليب الكفرة....بس ياريت بقى نبتدى
باللى بيقتلوا المسلمين كل يوم برة
عجبى

قهوة كتكوت said...
This comment has been removed by the author.
قهوة كتكوت said...
This comment has been removed by the author.
قهوة كتكوت said...
This comment has been removed by the author.
قهوة كتكوت said...
This comment has been removed by the author.
جبهة التهييس الشعبية said...

قهوة كتكوت

لا هو غالبا واحد يا عيني وطالع بكذا منظر

ههههههههههه زي محمد سعد في افلامه كده لما بيطلع الاب والام والابن

السلام عليكم said...

امخاخ تانيه

اللى هى ايه بالضبط بس

على فكره احترام العقيده دى شئ ظريف بس كل ما افكر كده الاقى الانبياء ربنا بعتهم لتصحيح عقيده البشر يعنى على سبيل المثال لا الحصر سيدنا نوح لم يحترم عقيده قومه ولم يقرهم على عباده ود وسواع ويغوث ويعوق ونسرا بل على العكس ظل يدعوا قومه لعباده الله لاواحد ولما لم يستجيبوا له اغرقهم الله بالطوفان ونجى المؤمنيين

يعنى ما ينفعش اننا نقول كله كويس وكله زى بعضه ده كده احنا بنخدع نفسنا وبنخدع غيرنامش مفهومه دى فى ايه انا للاسف مخى مش مستوعب غير هده الحقيقه ومش قادر افهم صعبه دى فى ايه وتتعارض ليه مع حقوق الانسان

بشوى ده اللى انتى يا عينى حاطه نفسك مكانه وانه يا عينى بيدافع عن افتراات المسلميين عليه اكثر واحد يعرف ان الاسلام هو الحق بس نقول ايه فى الكبروده مش قولى انا
:{الَّذِينَ آتَيْنَاهُمُ الْكِتَابَ يَعْرِفُونَهُ كَمَا يَعْرِفُونَ أَبْنَاءهُمْ وَإِنَّ فَرِيقاً مِّنْهُمْ لَيَكْتُمُونَ الْحَقَّ وَهُمْ يَعْلَمُونَ } [ سورة البقرة الآية
146 :
وبعديين اعتقد ان الامخاخ اللى بتخاطيبيها اختفت مع تفكك الاتحاد السوفيتى

أحمد سلام said...

يقول أبوك دائما
إللى مايشوفش من الغربال يبقى أعمى
وأكررها اليوم خلفه
ألم نعد نرى الحقائق
ام أننا لم نعد نعمل عقولنا
واستبدلنا الفلسفة باللهو والضحك على انفسنا
نقرع رءوس من يخالفوننا قبل أن يناقشونا حتى لا يجرءوا
ويبقى رأينا الأوحد
ياللعجب
شتان ما بين الآباء والأبناء فى عصر إثبات الذات بالمخالفة
أراك مثقفة حقا
لكن ابتعدى عن قهر آرأء الآخر قبل ظهوره
حتى لا تعمى الحقيقة عنك
ولا تدركيها إلا بعد فوات الأوان ويومها لا ينفع الندم صاحبه

محمود المصرى said...

بسم الله الرحمن الرحيم

قهوة كتكوت

ايه مشكلتك فى الردود بالظبط؟ ومين جاب سيرة جهاد عباد الصليب الكفرة؟
بص يا كتكوت مش بالضرورة الانسان يخترع خصم ليه علشان يثبت كفاءة وموقف , يعنى انت من اول ما شفت ردودك عمال تشتم فى السلفيين وترجع تكرر نفس كلامهم شبرا بشبر وذراعا بذراع , فهل انت مضايقك الاسم وخلاص؟ اما لو خصومتك مع السلفيين بسبب ما تراه خلل فى منهجهم فياريت تقولى انت معارضهم فى ايه بالظبط فى الموضوع اللى بنتكلم فيه دلوقت .
بالمناسبة يا نوارة انا لما بحب اكتب بدخل بالاكاونت دا وبقول كل اللى نفسى فيه يعنى مش محتاج ادخل بأسماء اخرى .

المهدى said...

والله فيك الخير إنك بتقرى اللى ببعتهولك وأنا اللى كنت عامل زى عبيط الفضاء الإفتراضى وفاكر إن كلامى مش بيتقرى ... نخش فى المهم
1-النص الأخرانى من كلامك أعتقد أنه لا يخصنى أنا أيضا ليس لدى أى مشكلة مع أى ديانة أو مذهب أو إعتقاد وبطلى الحى هو السيد حسن نصر الله الشيعى وأعتقد أن البابا شنودة كان أفضل للوطن من كل مشايخ مصر ( ده فى فترة معينة ) وحسابه وحسابهم عند من خلقهم وبس المفاجأة إن ده كمان ممكن يكون رأى العوا الذى يشتم فى جميع المحافل السلفية
2- النص الأولانى اللى يخصنى بقى
فعلى الرغم من عظمة إقتراحك الذى لم أستطع تنفيذه لطول حلقة منى الشاذلى عن الزعيم عليه رحمة الله إلا أننى سأبدأ حالا فى التنفيذ وفى هذه الأثناء أقترح عليك منهج أخر لقراءة العوا وهو كالأتى

المهدى said...

منهج أخر لقراءة العوا
1- العوا لم يكن أبدا داعية فتنة ولم يبد يوما تعصبا لأى مذهب بل كان دوما داعية للتقريب شأنه فى ذلك شأن طارق البشرى وفهمى هويدى ولكن
2- وتحديدا هؤلاء الثلاثة ( الغير مرحب بهم من العامة وطبعا من المعاتيه ) هالهم إنهيار الدولة ومحاولات البابا شنودة الدائمة لإنتزاع حقوق تفوق حقوق المواطنة وتدفع المسيحيين قبل المسلمين إلى الهاوية والثلاثة بالمناسبة تابعوا ذلك من بدايته وعاتبوا بلطف ثم بحدة وهم دائما موقنين أن هناك ما يدفع البابا شنودة ( قوة نفوذ أقباط المهجر ومحاولته الدائمة لمنازعتهم التحكم فى أقدار إخوانا الغلابة شركائنا فى الهم والعذاب الذى كان وطن
وهم الثلاثة أيضا يدركون أن هناك زمن أخر قادم سيقتص فيه معاتيه الأغلبية من معاتيه الأقلية وأول المواجهات ستكون بسبب ما سلبه شنودة من دولة رخوة فى نهاية أيامها السوداء

المهدى said...

3-راجعى تصريحات الثلاثة وتدرج نظرتهم للبابا شنودة وراجعى تطور أو تدهور مواقف البابا شنودة من أول ( لن نكون خونة الأمة العربية ) وحتى حديثه المخيف عن عدم وجود قوة تجبر الكنيسة على مخالفة الإنجيل ( حتى لو القضاء ) ولا توجد قوة تجبر الكنيسة على إظهار كاميليا حتى لو ... مش عارف
الراجل واصل لمرحلة عجيبة مش بتاعة دولة دى بتاعة بيت أبوك وقع إلحق خدلك طوبة
4- كل كلام العوا كان حول هذه النقطة الخطيرة ( حتى موضوع السلاح ) أين الدولة إتهاماته كانت للدولة ( رغم محاولات منصور الدنيئة ) وكانت عن البيت الذى نتمنى أن لا يقع عشان دماغهم قبل دماغنا تصدقى بالله أنا بأحزن من كلمات نصارى وروافض أكتر من النصارى والروافض بأحزن على وطن كان ومسخوه ( ولاحظى أخيرا إن العوا مش بتاع المعاتيه ده بتاعنا إحنا واللى بيشوفوه مش المعاتيه اللى بيشوفوه إحنا )
أقريها كده الحكاية مش بالشياكة البابا شنودة كان شيك وهو بيقول أنه لن يتصدى لزكريا بطرس الحكاية فى الوطن ومنهج البابا الذى يجب أن تقوم الدولة لتتصدى له مش تهد البيت عشان الننوس يأخد له طوبة

المهدى said...

أخيرا كلام أبو هاجر مهم وعظيم وخطير فيه ترتيبات وصراع حول هذه الترتيبات ولكن كلام العوا لو أخذ من منطق الموجه والمأمور فهذا لا يتسق مع العوا ولا مع منطق الترتيبات ولكن لو أخذ من منطق الحريص على بقايا دولة لنسلمه لدولة حقيقية فهذا ما يتسق مع العوا ومع الرئيس القادم اللى مش جمال مبارك

إياكش تولع said...

بس كلام العوا مادخلش فى صلب العقيدة يا نوارة، يعنى لا اتكلم لا على الصلب و لا على الاناجيل، ولو كان الخواجة بيشو اتكلم عن الاسلحة اللى فى الجوامع كان ممكن يبقى فيه اخد و رد....دة اللى مقوم الناس (بالااضافة لسكوت البابا)!
!!!

عالعموم هية البلد خلقتها كدة، علماءها من طينة ناسها....شبه بعض!!

khalil said...

الدين عقيدة راسخة فى قلب المؤمن بها ،ومن غير المقبول او اللائق ان يشكك الاخر بها .فلا يجب على المسلم ان يقول ان المسيحيين غيروا فى الانجيل ، وايضا غير مقبول من المسيحى ان يقول ان القران بة اضافات .هذة قضايا ليست للعامة ،ومكانها الدراسات الاكاديمية .

العوا وبيشوى لا يبحثوا عن الحقيقة انما يبحثون عن زيادة الاتباع …وتولع البلد. ما اسهل سب الدين..وسب الدين يتم بطرق كثيرة وغير مباشرة.

utopia said...

محمود المصرى:
يعنى ايه سلفيين؟؟
لوقصدك بتوع الفضائيات من اول اقرأ لغاية اخرقناة فى الطابور ده؟؟
دول ناس عاملين شغلتهم الدين
وبيكسبوا منه وبينافقوا السلطة فى بلدهم
واغلب اتباعهم مابيسمعوش غير رأيهم وبس
وده مش الاسلام الاسلام مش ابن عثيمين ولا ابن تيمية بس...
وزى ما الكنيسة غلطانة شيوخ الفضائيات غلطانين ... فيه فرق بين الدعوة للاسلام
ومعايرة الاخرين بتحريف كتابهم و
شتمهم بما لم يجىء فى القرأن
يعنى ايه عباد الصليب؟؟ والخروف
يعنى ايه تفضل تقول لهم ياكفرة؟؟
عمرك سمعت أن الرسول قال كده؟؟
ده حتى ربنا قال وجادلهم بالتى هى احسن
يا سيدى مش عايزين يسمعوا هما احرار
زمان ايام ما كان فيه الغزالى والشعراوى وجاد الحق كان فيه سلفيين
احسن من كده والمثل بيقول القوالب نامت والانصاص قامت...
اسف على الرد هنا يا نوارة
بس البلد بتولع ولازم نتكلم بالعقل مش بهيستريا ونشوف الاول احنا بيتحضر لنا ايه؟؟ اقرا كلام ابو هاجر لانه كلام
سليم

محمود المصرى said...

بسم الله الرحمن الرحيم

يوتوبيا :

المشكلة عند تناول مسألة السلفيين انه بيتم قولبتهم آليا فى نمط معين , انا ارى ان السلفية هى اتباع منهج معين فى تلقى العلوم الشرعية , وهذا يشمل اناس كثيرين جدا خارج الصورة النمطية التى يحاول البعض رسمها عنهم وبالتالى فأنا لما اقول سلفيين فأكيد اقصد شريحة اشمل بكثير جدا ممن تفضلت بذكرهم .
اما بالنسبة لعباد الصليب مرة اخرى اوضح الصليب هنا هو المسيح وليس خشبة الصليب نفسها ,لأن المصلوب يقال له صليب زى غريق وقتيل وسجين وجريح وبالتالى لا يقصد بها الاهانة , اما موضوع الخروف فدى ليها مرجعية فى سفر الرؤيا لكن بالتأكيد يقصد بها الاهانة وفى سياق الكلام العادى تكون غير مقبولة لكن بصراحة فى سياقات اخرى اصبحت هى الغالبة يمكن ان تكون اخف شىء يمكن قوله .
اما موضوع كفرة فلابد من التفريق بين حقيقة ايمانية وهى تعريف الكفر بأنه انكار اى معلوم من الدين بالضرورة ويترتب على هذا التعريف امور شرعية كثيرة جدا , وبين ان اظل اقول له يا كافر يا كافر , فطبعا لا يمكن انشاء حوار بترديد مثل هذا الوصف , ولا اختلف معك فى هذا .
وبالنسبة لأيام الغزالى والشعراوى فهما كمان اسلوبهم مش عاجب الاخرين , روح شوف قالوا ايه عنهم , ياخى دا الانبا غريغريوس اللى كان اسقف البحث العلمى هاجم الشيخ الشعراوى بالاسم فى كتابه موسوعة اللاهوت العقيدى , يعنى بيكتب كتاب عن اللاهوت العقيدى وبيهاجم فيه الشعراوى سبحان الله .
لكن بالنسبة للأنصاص اللى قامت فهل ترى ان محمد عمارة وسليم العوا من هذه الانصاص التى قامت ام من القوالب التى نامت؟
اما بالنسبة لكلام ابو هاجر وهو شخص محترم وعاقل وذكى لكن انا لا اتفق معه على ان هناك محرك وحيد لكل هذه الخيوط انا اراها برؤية مختلفة , لكن قد اتفق على ان هناك من يشعر بالاستفادة من مثل هذا السجال .

جبهة التهييس الشعبية said...

لا ما قدرتش امسك احصابي

بقى السلفيين بيتم قولبتهم في نمط معين؟

يا راجل؟

ده انت بالصلاة ع النبي تقدر تعرف السلفي من مشيته، من تون صوته، من جملة واحدة يكتبها
ومش حاقول نمط التفكير لان كل الناس يا بتفكر من اليمين للشمال يا من الشمال لليمين وهم بيفكروا بالورب

قال قولبتهم قال

طب ما تحاولوا كده تغيروا حتى في المصطلحات اللي بتستخدموها، في طريقة الكلام، في طريقة التعبير، يا راجل ده انتوا بتقولوا نفس القفشات ونفس الافيهات مش ممكن الاستنساخ الجنوني ده

صحيح كل اللي بينتموا لتيار معين بيبقى لهم رطانة واحدة زي الشيوعيين والاخوان مثلا، بس على الاقل بتعرف تميزهم من بعض

ده انتوا عاملين ولا التوائم الملتصقة

ده انتوا لما بتدخلوا تعلقوا بتدخلوا في وقت واحد

ده اذا ما كانش الخمسة اللي بيدخلوا كلهم واحد وعامل كذا اكاونت

محمود المصرى said...

بسم الله الرحمن الرحيم


هو اللى انا متأكد منه ان اللى بيدخلوا يعلقوا اكتر من واحد لأنى بدخل بالاكاونت دا بس .
اما بالنسبة للى قلتيه فدا دليل على عملية القولبة لأننا برضه بنقول ان اليساريين زى بعض ونفس التفكير ونفس المصطلحات ونفس الكلام ونفس اللبس ونفس نكشة الشعر والضوافر الطويلة .
لكن ما هو مفهومك اصلا للسلفيين ؟
انتى عندك نمط ليهم انهم كلهم ملتحين وبيلبسوا بنطلونات قصيرة وبيسمعوا الشيخ محمد حسان ومحمد حسين يعقوب وبيشغلوا قناة الناس بالليل وبيقروا العقيدة الطحاوية وبيعتبروا الاشتغال بالسياسة رجس من عمل الشيطان وان النصارى لازم نقتلهم ونسبى نساءهم , وعلى هذا التصور الخرافى بتتعاملى مع اى واحد تعتبريه انه سلفى , بل انك بتعتبرى ان هو دا المنهج السلفى .
اما المصطلحات وطريقة الكلام فدى فرع على تشابه الاصول اللى بيستقى منها ابناءاى تيار , زى اليساريين او الاخوان او الليبراليين .
بالنسبة للتفكير فكون انك تقولى اننا بنفكر بالورب فدا تطور مذهل لأنك قبل كده كنتى بتعتبرينا مابنفكرش .
فى النهاية احب اقولك يا استاذة نوارة انك قد تكونى مطلعة ومثقفة لكن بالتأكيد لم تحوزى العلم كله ولا الحقيقة المطلقة فحاولى تحطى لنفسك هامش للمراجعة جايز يكون السلفيين دول عندهم شىء يستحق الاهتمام او التقدير

شمس العصارى said...

كل ما اقول مليش دعوة بوجع الدماغ ده الاقى ايدى بتكتب لوحدها على الكى بيورد
رغم انى عارف اخرتها ... كارت احمر ههههههههههههه
مشكلتك انك بتسهبى جدا جدا فى ردود الافعال
وعلشان كده التعليقات بتروح لمنحى تانى وكله يقول شئ تانى وكله يمشى وراه
كنت اتمنى لو انك تسهبى نصف اسهابك هذا فى اصول الكلام واصول المشكلات اولا قبل ردود الافعال
عن نفسى حطرح رؤيتى
انا حرجع لنقطة ما قبل تصريحات العوا وبشوى
لا كمان انا حرجع لما قبل موضوع وفاء
لا كمان حرجع لما قبل 11 سبتمبر والتدخل الغربى السافر فى الشئن المسيحى المصرى
يعنى كل ده انا حعتبره محصلش اطلاقا
الاصل كما تدعى وكما يردد البعض حرية العقيدة بدون تدخل من احد يعنى زى ما انتى اخترتى ديانتك - وده شئ رائع ان المسلم يسلم لله - كمان فى غيرك قرر واختار ديانته
وطالما الموضوع اليومين دول قلب لمواطنة .. مش المواطنة دى برضه بتقول ان مفيش حاجة اسمها سلطة دينية ... و على الكل
خلينا نقول نقطة مهمة : النظام هو المسئول عن التحامل على الشعب مسلميه و مسيحييه
بس التحالم على المسلمين بيجى بالهيمنة على مؤسساته والتحامل على المسيحيين بيجى من عقد صفقات مع الكنيسة ربما اضرت بمسيحيين بسطاء - قلتها واركررها خارج السياق هنا : المسيحيين هم اكثر الناس تضرر من صفقات الكنيسة والنظام حتى لو بدا عكس ذلك الان - يبقى بتوضيح اكتر
النظام موجود ومش قادريين نغيره
حرية العقيدة مفقودة ومش حنوجدها اطلاقا
الكنيسة كما هى ولن تتغير
المسيحيين الذى يشهرون اسلامهم كثيرين وكل يوم
اذن الاركان والاصول ثابتة وتتغيير شكل رودو الافعال
النهارة كاميليا اسلمت وبشوى تكلم والعوا رد عليه
بكره واحدة او واحد حيسلم وحد تانى غير بشوى حيتكلم وحد تانى غير العوا حيرد
الاصول ثابتة وردود الافعال لن تتغيير
اين الحل
ــــــــــــــــــــــــــــــــ
اه نسيت اقول كمسلم لا اخفى - ولن يستطيع احد ان يمنعنى - تعاطفى مع اخى فى العقيدة سواء فى الفلبين او روندا او هنا فى مصر واحزن حينما اراه مظلوما ولا يجد من ينصره لانه ربما لو هناك من ينصره لقل التأسى
ولا يضرنى ولا ينهرنى من يختلف عنى فى روسيا او بلغاريا او اسبانا او هولندا طالما انه لا يسعى لضررى
نهاياتا : ادعوكى وكل المعلقين ان تقرأوا فصل واحد من كتاب " معالم على الطريق " لسيد قطب
وطالما الناس بتقرى عن الديانات بدون اراء مسبقة .. ما تقرا لسيد قطب بدون اراء مسبقة
الفصل بعنوان " الحاكمية لله " والى يقرا الكتاب كله يبقى كويس
الفصل يتحدث عن الاطار الاخلاقى والقيمى والقانونى للمجتمع المسلم الذى يستوعب داخله المختلفين عنه فى الدين .... او كيف ينبغى ان يكون
ـــــــــــــــــــــ
انا ماشى لوحدى .... مش مستنى كروت

شمس العصارى said...

كل ما اقول مليش دعوة بوجع الدماغ ده الاقى ايدى بتكتب لوحدها على الكى بيورد
رغم انى عارف اخرتها ... كارت احمر ههههههههههههه
مشكلتك انك بتسهبى جدا جدا فى ردود الافعال
وعلشان كده التعليقات بتروح لمنحى تانى وكله يقول شئ تانى وكله يمشى وراه
كنت اتمنى لو انك تسهبى نصف اسهابك هذا فى اصول الكلام واصول المشكلات اولا قبل ردود الافعال
عن نفسى حطرح رؤيتى
انا حرجع لنقطة ما قبل تصريحات العوا وبشوى
لا كمان انا حرجع لما قبل موضوع وفاء
لا كمان حرجع لما قبل 11 سبتمبر والتدخل الغربى السافر فى الشئن المسيحى المصرى
يعنى كل ده انا حعتبره محصلش اطلاقا
الاصل كما تدعى وكما يردد البعض حرية العقيدة بدون تدخل من احد يعنى زى ما انتى اخترتى ديانتك - وده شئ رائع ان المسلم يسلم لله - كمان فى غيرك قرر واختار ديانته
وطالما الموضوع اليومين دول قلب لمواطنة .. مش المواطنة دى برضه بتقول ان مفيش حاجة اسمها سلطة دينية ... و على الكل
خلينا نقول نقطة مهمة : النظام هو المسئول عن التحامل على الشعب مسلميه و مسيحييه
بس التحالم على المسلمين بيجى بالهيمنة على مؤسساته والتحامل على المسيحيين بيجى من عقد صفقات مع الكنيسة ربما اضرت بمسيحيين بسطاء - قلتها واركررها خارج السياق هنا : المسيحيين هم اكثر الناس تضرر من صفقات الكنيسة والنظام حتى لو بدا عكس ذلك الان - يبقى بتوضيح اكتر
النظام موجود ومش قادريين نغيره
حرية العقيدة مفقودة ومش حنوجدها اطلاقا
الكنيسة كما هى ولن تتغير
المسيحيين الذى يشهرون اسلامهم كثيرين وكل يوم
اذن الاركان والاصول ثابتة وتتغيير شكل رودو الافعال
النهارة كاميليا اسلمت وبشوى تكلم والعوا رد عليه
بكره واحدة او واحد حيسلم وحد تانى غير بشوى حيتكلم وحد تانى غير العوا حيرد
الاصول ثابتة وردود الافعال لن تتغيير
اين الحل ؟؟؟؟؟؟؟؟؟؟؟؟؟

شمس العصارى said...

كل ما اقول مليش دعوة بوجع الدماغ ده الاقى ايدى بتكتب لوحدها على الكى بيورد
رغم انى عارف اخرتها ... كارت احمر ههههههههههههه
مشكلتك انك بتسهبى جدا جدا فى ردود الافعال
وعلشان كده التعليقات بتروح لمنحى تانى وكله يقول شئ تانى وكله يمشى وراه
كنت اتمنى لو انك تسهبى نصف اسهابك هذا فى اصول الكلام واصول المشكلات اولا قبل ردود الافعال
عن نفسى حطرح رؤيتى
انا حرجع لنقطة ما قبل تصريحات العوا وبشوى
لا كمان انا حرجع لما قبل موضوع وفاء
لا كمان حرجع لما قبل 11 سبتمبر والتدخل الغربى السافر فى الشئن المسيحى المصرى
يعنى كل ده انا حعتبره محصلش اطلاقا
الاصل كما تدعى وكما يردد البعض حرية العقيدة بدون تدخل من احد يعنى زى ما انتى اخترتى ديانتك - وده شئ رائع ان المسلم يسلم لله - كمان فى غيرك قرر واختار ديانته
وطالما الموضوع اليومين دول قلب لمواطنة .. مش المواطنة دى برضه بتقول ان مفيش حاجة اسمها سلطة دينية ... و على الكل
خلينا نقول نقطة مهمة : النظام هو المسئول عن التحامل على الشعب مسلميه و مسيحييه
بس التحالم على المسلمين بيجى بالهيمنة على مؤسساته والتحامل على المسيحيين بيجى من عقد صفقات مع الكنيسة ربما اضرت بمسيحيين بسطاء - قلتها واركررها خارج السياق هنا : المسيحيين هم اكثر الناس تضرر من صفقات الكنيسة والنظام حتى لو بدا عكس ذلك الان
.... يتبع .....

شمس العصارى said...

يبقى بتوضيح اكتر
النظام موجود ومش قادريين نغيره
حرية العقيدة مفقودة ومش حنوجدها اطلاقا
الكنيسة كما هى ولن تتغير
المسيحيين الذى يشهرون اسلامهم كثيرين وكل يوم
اذن الاركان والاصول ثابتة وتتغيير شكل رودو الافعال
النهارة كاميليا اسلمت وبشوى تكلم والعوا رد عليه
بكره واحدة او واحد حيسلم وحد تانى غير بشوى حيتكلم وحد تانى غير العوا حيرد
الاصول ثابتة وردود الافعال لن تتغيير
اين الحل ؟؟؟؟؟؟؟؟؟؟؟؟؟
ــــــــــــــــــــــــــــــــ
اه نسيت اقول كمسلم لا اخفى - ولن يستطيع احد ان يمنعنى - تعاطفى مع اخى فى العقيدة سواء فى الفلبين او روندا او هنا فى مصر واحزن حينما اراه مظلوما ولا يجد من ينصره لانه ربما لو هناك من ينصره لقل التأسى
ولا يضرنى ولا ينهرنى من يختلف عنى فى روسيا او بلغاريا او اسبانا او هولندا طالما انه لا يسعى لضررى
نهاياتا : ادعوكى وكل المعلقين ان تقرأوا فصل واحد من كتاب " معالم على الطريق " لسيد قطب
وطالما الناس بتقرى عن الديانات بدون اراء مسبقة .. ما تقرا لسيد قطب بدون اراء مسبقة
الفصل بعنوان " الحاكمية لله " والى يقرا الكتاب كله يبقى كويس
الفصل يتحدث عن الاطار الاخلاقى والقيمى والقانونى للمجتمع المسلم الذى يستوعب داخله المختلفين عنه فى الدين .... او كيف ينبغى ان يكون
ـــــــــــــــــــــ
انا ماشى لوحدى .... مش مستنى كروت

حسن مدني said...

يانوارة

انت فاهمة الموضوع غلط تماما.

ما أثاره العوا أساساً كله يدور حول استقواء مؤسسة على الدولة ذاتها.
لما الكنيسة تحتجز إنسان، أيا كان، بغير رضاه. فهذه جريمة خطف. بالقانون والشرع والأعراف والاتفاقيات الدولية. تظل جريمة خطف.
لما الكنيسة تقول إنها لن تسمح للدولة بتفتيش الكنائس، فده خروج على الدولة.
لا يستطيع أحد أن يقول لا يجوز تفتيش الأزهر أو تفتيش المساجد. ما نرفضه هو الإساءة أثناء هذا التفتيش.
لا يستطيع أحد في أي دولة في العالم أن يعلن أنه لن ينف أحكام القضاء، وإلا يستحق الحبس بتهمة عدم تنفيذ احكام القضاء.
هناك شعور عام عند المسلمين باستقواء الكنيسة على الدولة، وعلى المسلمين. وهذا إحساس خطر على المسيحيين في مصر. لأن الناس إذا انفجرت، ستنفجر على الغلابة مش على بيشوي ولا على شنودة.
قصة سفينة السلاح، مثال على مايحدث من انحياز إعلامي. والسؤال الذي يجب أن يطرح، وأن يجاب عليه هو، هذا السلاح كان رايح لمين؟
ولما يكون وراه عبارة نحن نرفض التفتيش، ومستعدون للاستشهاد. لا بد أن يأتي هذا التساؤل. السلاح كان رايح لمين؟ وايه المقصود بالاستشهاد؟ وما أبعاد هذا الكلام؟
ده كلام واحد كان وكيل نيابة، ويعرف كيف ينبغي أن تطرح الأسئلة. ويعرف المخاطر التي تهدد البلد. ويعرف أبعاد أن تعلن جهة داخل البلد خروجها على الدولة.
نحن لا نتلكم عن أقوال مسيحيين، نحن نتلكم عن تصرفات مؤسسة، يجب أن تكون خاضعة لقوانين الدولة التي تتواجد فيها.
موضوع وفاء قسطنطين، ليس مجرد قضة امرأة دخلت الإسلام، وإنما امرأة دخلت الإسلام، واحتمت بسلطة مسلمة، وقامت هذه السلطة ولأول مرة في التاريخ بتسليم هذه المرأة إلى مؤسسة ليس لها أي ولاية على هذه المرأة.
هذا التسليم في حد ذاته مخالف للقانون وللشريعة الإسلامية.
--
أما تصريحات بيشوي بشأن القرآن، فأنا أعلم أن عقيدته تحتم عليه رقض قدسية القرآن. أما الكلام عن قسطنطين، فهو كلامهم هم عن كتابهم، وليس كلام المسلمين.
أخيرا، أنا عموماً أرفض الإساءة إلى أديان الناس. وأرفض أن يجاملني مسيحي بادعاء أنه يصدق بنبوة محمد صلى الله عليه وسلم، أو ادعاء قدسية القرآن، ولكن لا أحب أن يسيء إلى القرآن أو الإسلام في حضوري.

تحياتي

شمس العصارى said...

أ/ حسن مدنى
تحياتى
كلام معقول ويبدوا واضحا جليا لمن يقرأ الموقف كما هو واضح لا كما ينبغى للقارئ ان يعتقد ويحلل
عجبتنى جدا مقولتك " وهذا إحساس خطر على المسيحيين في مصر. لأن الناس إذا انفجرت، ستنفجر على الغلابة مش على بيشوي ولا على شنودة."
وانا كنت اقول دوما ان المسيحيين البسطاء هم اكثر الناس تضررا من صفقات الكنيسة والنظام
وكلامك عن وفاء قسطنطين سليم جدا بعكس ما يقوله البعض ويروج به من سخافات بان تلك الاعتراضات والمظاهرات من اجل امراة والبعض يصفها " بالمزة "
اتمنى من الذين يسخرون من تأثرنا وانفعال البعض لهذه الاحداث اتمنى لهم ان يفهموا كلامك ويعوه

عبد الله السلفى said...

متن العقيدة الطحاوية متن من متون العقيدة لاهل السنة والجماعة وهى عقائد الايمان بالله وكتبه ورسله والملائكة والقدر وهذا معلوم ومعروف لكل المتابعين للدروس والخطب