Wednesday, 22 September 2010

اون تي في تمنع ابراهيم عيسى من الظهور في بلدنا بالمصري

ما اعرفش ليه حتى اكثر الناس اشتراكية يقولوا: بس انا باحب ساويرس
ليه؟ تحب ساويرس ليه؟ ايه الفرق بينه وبين اي رجل اعمال تاني؟
الفرق الوحيد ان الاسلاميين بيكرهوه، وطبعا مش بيكرهوه حبا في العدالة الاجتماعية، بيكرهوه عشان مسيحي ومعاه فلوس مما يدل على ان الكنيسة اكلت البلد، مع انهم ربنا كارمهم بكتير تانيين، احمد عز، احمد بهجت، سيد البدوي (ده حتى بيقولوا عليه متدين ومش بيفوت فرض هههه) وصلاح دياب
هم كل دول مش مسلمين؟ 
لا العلمانيين بيحبوا ساويرس عشان الحرية والليبرالية، ولا الاسلاميين بيكرهوه عشان العدالة الاجتماعية، العلمانيين بيحبوه عندا في الاسلاميين، والاسلاميين بيكرهوه عندا في المسيحيين، والمسيحيين بيحبوه عندا في المسلمين، وهو اساسا مالوش في حد فيهم، هو له فلوسه وماله
انا شخصيا ما باحبش اي رجل اعمال في الدنيا، لان البني ادم عشان يبقى ملياردير لازم يبقى حرامي ومصاص دماء وبيتاجر في الانسانية كلها، امال جاب فلوسه دي منين؟ من تعبه وشقاه؟ ماحدش بيتعب اكتر من البنا، ولا الفلاح، ولا العامل اللي بيشتغل اتناشر ساعة، اشمعنى دول مش معاهم مليارات؟
هأ.. بيقولوا لك من عرق جبينه طلع مصاري ها الانسان، طيب كيف هيدا وكيف ملايينه وما مرة شايفينه عرقان
طبعا انا استغليت الفرصة عشان ابث افكاري الاشتراكية المسمومة السوداء، بمناسبة ان النظام المصري مارس ضغوط على نجيب ساويرس عشان يمنع ابراهيم عيسى
انا عارفة الخبر من امبارح، بس استنيت شوية عشان اعرف ملابسات الموضوع، مافيش ملابسات، كلموا ابراهيم قالوا له: متشكرين مش عايزينك تطلع تاني
فقال لهم: العفو.. تعالوا كلوا بسكوت
خلاص كده
الاسباب واضحة، بقاله تلات شهور بس وعمل في بلدنا بالمصري كل ده، ولو ما كانش عمل حاجة ما كانوش منعوه
ربنا يستر على الدستور بقى، بس غالبا مش حيعملوا للدستور حاجة، لان الاغلبية من المصريين بيتفرجوا على التلفزيون ومش بيقروا، فتأثير الفضائيات على ملايين بينما تأثير الجرنال، مهما وسع انتشاره، على الاف، وعادة الناس اللي بتقرا مش بتعمل حاجة، السميعة بس هم اللي بيعملوا حاجات، عشان كده كنت بازن في انه يعمل برنامج يقول فيه اللي بيكتبه في مقالاته
المهم يعني، انا مش باحب المغفلين ولا اللي بيشتغلوا نفسهم وعندهم هلاوس وخيالات
يعني رجل الاعمال رجل اعمال، لا مسيحي ولا مسلم، ورجل الاعمال له مصالح مع النظام، والنظام بيديله بالجزمة القديمة وينسل على راسه القبقاب وقت ما يحب ويسيبه وقت ما يحب واللي متساب متساب بمزاج النظام، ولما النظام بيحس بخطر بياخد اجراءات وصاحي لنا، كل ما كنت اكثر تقعرا، او اقل موهبة، او حاسب بتعمل ايه، النظام ما يخافش منك، او على الاقل بيبقى عارف انت بتوصل لحد فين ويفرملك وقت اللزوم، وكل رجال الاعمال في ام البلد دي تحت سيطرة النظام زي ما النظام بيخدم مصالحهم هم بيحلوا له عيشه وبيظبطوه
يعني ما يطلعليش واحد يقول لي انا باحب نجيب ساويرس اصله مع الحريات وليبرالي ومش عارفة ايه عشان الراجل بيطلع يقول كلمتين حلوين ويبتسم ابتسامة ساحرة، مافيش واحد متقيد بمليارات يفهم في الحريات ولا في العدل، ما يفهمش غير في الفلوس 
وما يطلعليش واحد يقول لي ساويرس الصليبي، لو اكل عيشه يستلزم انه يولع في الكنيسة والاقباط كلهم حيولع.. قصدي اكل كفياره
هو لطيف وشكله حلو ودمه خفيف وبيقول كلام يوري ويبلف، وده بسبب انه اسيوطي مش بسبب انه مختلف عن بقية رجال الاعمال
خلصونا بقى من ليلة بحب واكره دي
البلد مسروقة واللي نقدر نهبشه منهم نهبشه وما نقولش لا، جه لابراهيم فرصة يكلم الناس ويوصل لهم رسالته، قبل الفرصة، لان المال ماله، والبلد بلده، والناس ناسه، والنظام ورجال الاعمال عاملين بينه وبينهم سور ورا سور 
جه النظام ما عرفش يحتويه وابتدى يعمل قلق قالوا لزكي قدرة يدبح فدبح، لان زكي قدرة لا يملك انه ياخد اي قرار، له مصالح ومال ومحتال واللي يقول عليه المعلم نافذ.. عادي ما اتصدمش
لما كلمته لقيته بيضحك عادي، انا اللي قعدت اعيط عشان البرنامج صعب عليا لانه كان حلو ومفيد، بس هو واخد الموضوع بخفة شديدة وشكله كان متوقع وحاسس انه كسب لما سهاهم وقدر يكلم الناس تلات شهور
انا اللي متغاظة ومتضايقة، مش مصدومة اه، بس متضايقة، الشغل كان حلو،
بس نبص للجانب الايجابي ونقول انهم تلات شهور مثمرين والشعرة من دقن النظام المصري مكسب
بس على الله بقى اشوف ساويرس لابس الوش اياه

16 comments:

Haytham Alsayes said...

ساريرس زي غيره
دي ملهاش دعوة بالدين العالم متعرفش في الدنيا الا الدولار والجنية والنفوذ والفساد
والقنوات اللي عملينها سبوبة وبيزنس وواجهة اجتماعية وغيره

وابراهيم ان شاء الله عيوصل صوته غصب عن الجميع
وفعلا انا خايف علي الدستور خاصة بعد السيد البدوى ما اشتراها ممكن يحصل حاجة

ربنا يستر

mido said...

المواقع مجبتش يرة الضغوط الامنية و نشروا البيان بتاع القناة

اليوم السابع

مصراوى


---------

بس مقلب صعب اوى

لانه كان عامل ثقل و شعبية للقناة
--
متعرفيش حيسيب الاشراف عن القناة كمان؟؟

mido said...

صحيح بتشتمى ساويرس ليه؟

طب الراجل يعمل ايه يا نوارة فى الموقف ده؟

هو مبعش عيسى

الكلام انه فى ضغوط كتير كانت على ساويريس من زمااان

و زادت مع الوقت

و الامن استغل فرصة توقف البرنامج فى رمضان و عطل رجوعه بعد العيد

لحد مأجهز عليه تماما

عشان كده بقولك الراجل مبعش عيسى و لا عمل زى بهجت اللى بيهزأ اللى شغالين معاه على الهوا و انت عارفة الموقف ده

برده السؤال :

المفروض ساويريس يعمل ايه؟

مواطن مصري said...

فكرتك لية عن رجال الأعمال وحشة

انا شايف ان فية رجال أعمال مش مشهورين

و مش من الحرمية

يعني ابسط مثال أي اب أو أي واحد منا على سبيل المثال


مثلا عندة شركة


او شغال في الشركة

او بيتاجر في الأراضي

او العربيات على سبيل المثال

بيطلع عينة و عين الي جاابوة

و بيشتغل من 8 الصبح ل 11 بليل

عشان يعرف يعيش في وضع كويس

و بيت كويس و غير كدة

بيبقى مع الفقراء

و العمال و الفلاحين و


الموظفين الغلابة و مش مع جمال مبارك

دة على سبيل المثال نظرتك ل أي حد

غني بيجتهد عشان يعيشش في وضع كويس

من غير تعالي ولا يسرق ولا يضرب قرض

لازم تتغير


غير كدة فية مليارديرات حرامية كثير


بس فية ناس برضو بيطلع عينهم عشان

تعرف تعيش كويس في البلد دي و مع

الفلاحين و الموظفين و عمال الفواعلية

الجــــيرة والعشــــرة said...

التغير دة واكب بيع الدستور للسيد البدوي، لية مايكنش هو دة السبب؟؟

السبب المعلن حتى الآن هو لكي يتفرغ إبراهيم عيسى للدستور.

لكن السبب الخفي قد يكون هو تحجيم ظهور إبراهيم عيسى على أون تي في بدعوى ضرورة تفرغه للدستور وتطويرها.

أبو هاجر said...

إلى النجمة بنت النجم ألف تحية من الجزائر :
هذا الرجل عامل أشياء في الجزائر لا تخطر على البال .نصب حقيقي علما ان الجزائر ؟اعطته امتيازات لم تخطر على باله. بدون شك كان فيه تواطؤ مع لصوص الجزائر . هذاموضوع آخر. أما بخصوص إبراهيم عيسى يبدو أن الأستاذ ابراهيم ،وأنت معه أيضا، أخذكم اللعب وما سمعتوش الجرس ونسيتم أن وقت اللعب و الاستراحة قد انتهى .و الآن لازم الجميع يعود للصف ،و حضرة الناظر ماسك العصى لأنه وقت الجد الآن ،وقت الانتخابات التشريعية و الرئاسية يعني ماتنغصوش على العريس اللي جاي بكلامكو اللي يسمم البدن.
وبصراحة يا نوارة أنتم المصريين تستاهلوا لأنكم جميعا شهدتم الزور ذات يوم وقلتم أن زواج فؤادة من عتريس باطل، مع العلم أن الجماهير العربية من المحيط إلى الخليج كانت شاهدة على الزواج اللي كان شرعي وزغردوا ليلةالدخلة وشافوا العريس وهو خارج ومعه عفة فؤادة .و الأن فؤادة رايحة تتزوج تاني، لكن لازواج شرعي و لا زواج عرفي و لازواج متعة ولا زواج مسيار ولا زواج فراند ولاحتى زواج سياحي .أسمحيلي يا نوارة الف مرة على الكلام اللي جاي، لأن فؤادة رايحة تتزوج زواج جماعي. يعني أيه جماعي؟ يعني سيدخلون إلى غرفتها كل زناة الليل ويصوروها في فيلم بورنو .هذاهو هدف جيل كامب دافيد اللي رايح يستلم السلطة في مصر . .

شمس العصارى said...

نجيب : انا مش بكرهه
يمكن علشان بلدياتى
هههههههههههه
وعلى فكرة هو من سوهاج مش من اسيوط
بهجت : محترم عنهم لان بدايته معروفة
اى نعم الكل مشى مع هوجة الراسمالية
بس على الاقل بهجت ونجيب مصدر ثرواتهم معلوم
بعد كلامى الحلو عنهم ده يمكن حد يشغلنى فى شركاته اراسكوم او دريم
هههههههههههههههههه
المهم يعنى حنرجع تانى ونحاول نكون طبقة البرجوازية الكبيرة
طيب ماهو معروف ومفهوم من زمان ان مصر تحت حكم بلوتقراطى
... والانظمة الاليجاركية صعب تغييرها كمان
( ياه انا كنت نسيت المسميات دى ههههههههه)
الا مين ابراهيم عيسى ده

Nicholas Urfe said...

استاذ ابراهيم عيسى لن يعدم وسيلة .

لكن تعليقي بخصوص رجال الأعمال هو أن الفساد والسرقة ليست أحد المكونات الضرورية لنشاط رجل الأعمال ،

لست يميني ولا متنكر للفقراء ولأصحاب الآلام

لكن من العدل أن نذكر أن أي رجل أعمال أو مستثمر هو شخص نشيط ومبادر ومغامر ويريد أن يكون دوره في الحياة الإقتصادية اكبر من مجرد عامل أو موظف.

الجزء الأكبر من ثروة رجل الأعمال هي قدرته على الإدارة والتنظيم والخبرة في مجال ما وكذلك تحمل المخاطرة التي لا يتحملها من يعمل كموظف .

بنمو نشاط رجل الأعمال تنمو شبكة اتصالاته وتواجده وتتضاعف قدرته على استغلال الفرص الاستثمارية المتاحة أكثر واكثر.

العيب ليس في رجل الأعمال ولكن في سوء توزيع الفرص وغياب الرقابة.

رايي الشخصي الذي اتمنى أن يثبت لي أحد خطأه هو أنه لا يمكن للدولة أن تدير الاستثمار بكفاءة لأنها في النهاية دولة وموظفين والمال مال عام بينما رجل الأعمال يغار على ماله وتعبه ويحركه الطموح والطمع البشري.

dr.lecter said...

تصدقي بالله كان قلبي حاسس بس قلت ساويرس هيطلع جدع وهيقف جنب ابراهيم
اصل لا يمكن ابراهيم يقول ده كله ويعمل ده كله ويطلع ناس النظام بيجيله هسس منهم
عمال اقول ساويرس راجل جدع \عمال اقول اون تي في احسن قناه في التلفزيون وفككم من العاشره مساء والقاهره امبارح

خساره مافيش حاجه حلوه بتكمل في البلد دي

اهو كتر خيره ادانا طاقه لتفريغ اللبي جوانا الفتره اللي فاتت

عم مينا said...

معلش يا نوارة أنا فيه حتة مش فاهمها في القصة دي.. ليه ابراهيم عيسي مابيتكلمش؟
يعني ليه سايبهم يقولوا انه مشي علشان يتفرغ للدستور والكلام الفارغ ده؟

khalil said...

لأ يا نوارة احنا شعب ، بس كل واحد فينا حاسس انه ولا حاجة . ماهو لوحدة ، وعارف كويس ان النظام إيده طارشة . ودي الحاجة الوحيدة اللي النظام شاطر فيها : يضرب السايب زى ابرهيم عيسى ، عشان" المربوط" اللي همه عموم الخلق المظلومين الموكوسين ومش عارفين ياخدوا حق ولا باطل يتعلموا درس يربيهم، ويعرفوا اللي حيجرالهم . مش أهو كبارهم المشهورين زى ابرهيم عيسى اللي كلمته بتدي أمل للناس اتشال برنامجه ، عشان يعرف الناس ان الله حق . ويغرقوا اكتر ويلبسوا"طاقية الاخفا" وكأنهم مش موجودين ..

من سنين سواق تاكسي قاللى وكناعند نقابة الصحفيين والامن محاصرها.كنت بقول له:"اضرب المربوط يخاف السايب" قاللي":لا اضرب السايب يخاف المربوط "انتوا الكبار لماتحاولوا تعملوا حاجة …يضربوكوا جامد عشان احنا نخاف، يعني اضرب السايب يخاف المربوط .. ده اللي حصل لابراهيم عيسي وده اللي بيحصل للشباب اللي عاوزين يعملوا حاجة ،لازم نتعلم طول النفس مافيش حاجة صح بتتعمل بتروح بلاش، ولازم هوه والشباب اللي بيتضرب قدام عنينا يعرفوا اننا بيتخزن جوانا غضب حيتقلب على النظام ..ابراهيم عيسي قيمة كبيرة عند ناس اكتر مما
يتخيل هو نفسة .
خالتك،وخليل بوسطجى

the magnificent ninja said...

انا اسلامي و بأكره ساويرس مش عشان مسيحي ولا حاجة أنا بكرهه لعدة أسباب الأول انه رجل أعمال غير شريف
الثاني لأن العلمانيين بيحبوه و أنا بكره العلمانيين كره العمى
الثالث لأني فودافون
 ده غير انه بني آدم لزج و دمه ثقيل و شتم في المحجبات قبل كدة
و أنا ماليش دعوة بكونه مسيحي أو حتى بوذي "لكم دينكم و لي دين"و أتمنى ان مصر ماتتحولش الى لبنان أخرى و مايطلعلناش سمير جعجع و وليد جنبلاط و ميشيل عون تانيين

جبهة التهييس الشعبية said...

يا مينا ابراهيم يتكلم يقول ايه؟ مشوني ياما؟ اذا كانوا هم نفسهم ما قالوش حاجة غير بالسلامة يا شربات

وهو متعود على كده، هي دي اول مرة يمشوه؟ ده كل ما يشفوه في حتة يمشوه

المفروض اون تي في اللي تشرح لنا ابراهيم مشي ليه

جبهة التهييس الشعبية said...

واتفضل يا عم

اون تي في جابتها فيه وقالوا احنا متفهمين لانشغاله

ههههههههههه
انشغاله في ايه؟ جات له وظيفة جديدة؟ ما طول عمره رئيس تحرير الدستور واشتغل في البرنامج

ايه اللي شغله دلوقت زيادة؟ تو ما عرفوا ان وراه شغل؟ يعني هو قبل كده كان عواطلي وقاعد على القهوة وهم كانوا بيشغلوه عشان يوفروا فرص عمل للشباب ولما القوى العاملة بعتت له الجواب قالوا له ادي فرصة لغيرك؟

عم مينا said...

ما هو ده قصدي يا نوارة.. البيان تقريبا بيقول ان ابراهيم عيسي هو اللي مشي علشان مشغول في الدستور
فأقل حاجة انه ممكن يطلع يقول ان مامشيش و لا حاجة.. وبكده يبقي احرجهم

يعني أنا رغم اني مش بطيق البني ادم اللي اسمه عمرو اديب.. بس وقت موضوع بلال فضل أما جابوا حلقتين و قالوله ماتجيش تاني طلع قال ان فيه جهة عليا اتصلت و قالت بلال فضل لا

عبد الله السلفى said...

اكيد ابراهيم عيسى قال حاجة زعلتهم عشان كده خد استماره سته