Friday, 24 September 2010

جبت التايهة يا نعيم يا قاسم

الا صحيح، الناس كلها ماسكة في خناق بعض فجأتن وكأنها.. وكأنها.. كحة شيطان.. مشيها كحة
السنة والشيعة اتخانقوا في الكويت عشان عيل اهبل شتم السيدة عائشة
المسلمين والمسيحيين اتخانقوا في مصر عشان راجل اهبل بلغ ان المسلمين خطفوا مراته
المسلمين والمسيحيين اتخانقوا حتى في امريكا عشان معتوه اهبل قال حاحرق القرآن
كل الحاجات دي فجأتن كده وفي نفس التوقيت؟ 
الشيخ نعيم قاسم من حزب الله قايل كلام لوز هنا واخر براجراف بقى جايب التايهة، كل الناس ماسكة في خناق بعض وعملية بيع فلسطين بتتم على قدم وساق وماحدش واخد باله
صحيح.. ما جاتش في بال حد دي يا عيال، اوعى حد يقول نظرية مؤامرة، اذا ما كانوش يتآمروا عشان مشروع حياتهم، وطوق النجاة لشعبية اوباما، وتسليم اخر مفتاح من مفاتيح فلسطين لاسرائيل، وكمان بيخططوا للبنان وسوريا عشان يقفلوها خالص، ونتانياهو قال مانيش قايم قبل ما تشوفوا لي حل في سوريا ولبنان ونخلص ليلتهم بقى خلينا نفضى لايران (سوريا.. ها؟ سوريا اللي فجأة اكتشفتوا ان فيها معتقلات، ما المعتقلات دي من ايام الملك خشبة) ولو تلاحظوا مافيش حس للصهاينة خالص في الليلة دي، الخناقة كلها ما بين المسلمين وبعض، ومابين المسلمين والمسيحيين، الا ما شمينا ريحة يهودي في الموضوع، ايوة باقول يهودي بما ان الخناقات كلها دينية ومذهبية، ده حتى بشوي ما سابش طايفة مسيحية الا ومسح بيها البلاط وما جابش سيرة اليهود خالص، الا الراجل مدام مهبوش كده وبيقول البت ووتر جتة الصايعة بتاعة الشوبان والكاتوليك المشركين الكفار، ده كلامه عن المسلمين الطف كلام يعني، ما فاتش بالمرة على اليهود ليه؟ اشمعنى دول وقعوا من قفته مدام ماشي يهبش يمين وشمال؟ والعوا عمال يتكلم عن سلاح الكنيسة والناس رايحة تقفل كل حاجة عن سلاح المقاومة، ومبارك سايبنا نولع بجاز وسخ، عشان ابنه طبعا، الا احنا مش متعودين ان مبارك بيرفع سماعة التليفون ويقول اسكتوا يا عيال قوم العيال يسكتوا؟ مش هو اللي قفل على موضوع وفاء قسطنطين وقال الموضوع ده ما يتفتحش تاني قام اتقفل؟ اشمعنى المرة دي سايبنا مطرح ما نحط راسنا نحط رجلينا
في كل الهلولة دي حد عارف ايه اللي حصل في المفاوضات؟ 
انا بقى اقول لكوا ايه اللي حصل في المفاوضات، عباس قال مستعد اعترف بيهودية الدولة لو حيعملوا لنا دولة فلسطينية
ونوفوستي بتقول صفقة جمال مبارك تمت خلاص
والواد اوباما حيموت وينجز الليلة دي لانه على حافة الهاوية وهو عايز يترشح تاني
اوعى وشك بقى
خليكوا في ياسر الحبيب ودقن كاميليا، وعلى رأي مبارك، الولعة دي مش عندنا احنا بس، ده في كل العالم، ودايما ابطالها مسلمين، واليهود مختفيين من الصورة، ليه بقى؟ ده حتى اليهود متعودين على الشتيمة وكل الناس طالعين شاتمينهم نازلين شاتمينهم يا قلبي.. اشمعنى المرة دي ماسكين في بعض وناسيينهم؟

6 comments:

لورنس العرب said...

طول عمر كل البلاد داخلها مشاكل
لكن المشاكل الداخليه للبلاد لن تجعلها تنسى فلسطين
يعني من امتى ومصر لميكون بها مشاكل لكي تنسى فلسطين؟
حتى لو المشاكل انتهت ستجدي مشكلة التراس الاهلي والزمالك على السطح- هل هذا معناه ان الناس نسيت فلسطين؟

اما بخصوص الاخ صاحب التقيه نعيم قاسم
فأحب اقول له ان كلام ياسر الحبيب موجود في اصل عقيدتك ولو لم تكن مثله فانت لست بشيعي
فلا تقول كلاما امام اناس لتبين لهم انك رجل لا تهاجم احدا وتحب العيش في سلام وبعدها تتحدث بأي شيء تريده مع أصحابك من ابناء مذهبك الذي انت عليه لأن هذا أسمه نفاق
وهذه هي التقيه
وعلى هذا الاساس هو يتحدث بهذا الحديث ومعه الأخ محمد الامين الذي صدع دماغنا على قناة المستقله طول شهر رمضان

واللي عاوز يصدق بيصدق لأن له مزاج يصدق زي حضرتك كده

السلام عليكم said...

هو كلامه كويس ويهدى فعلا بين السنه والشيعه

بس يا يعنى الخطه اكبر من كده الولعه اللى بين الناس دى جزء من خطه الفوضى الخلاقه ودى مش نظريه مؤامره هو اصلا فيه مؤامره وكلمه نظريه المؤامره جزء منها بس الحلو بقى ان اللى بيصحى لها يقوموا اصحاب المؤامره يثبتوه

اصل يعنى يشغل الناس عن المفاوضات ليه على اساس ان الناس هميمها قوى ده حتى الضرب كان شغال على الهواء فى لبنان وفى غزه العام اللى بعديه والناس بتتفرج كانها فى ماتش لاوصور العيال المتقطعه ولا هزت فينا شعره وفيه ناس كانت بتلقى اللوم على حزب الله وعلى حماس على اساس انهم هم اللى استفزوا اسرائيل واللى يعاكس القطه تخربشه

وبعديين الخناقه مش بس سنه وشيعه ولا مسلميين ومسيحيين لا ده بين مصر والجزائر ومصر والكويت ومصر ومش عارف ايه تانى عمالميين نشتم فى بعض وكل الجرائد اللى هى معارضه فاتحه ابوب التعليق على الاخر علشان الناس تشتم بعض

Ramy said...

تصدقى

كلامه صح بس يا رب الناس تفهم كده

و تحكم عقلها

علشان ربنا يرضى عالينا

قهوة كتكوت said...

مش عارف اقول ايه فى غبائنا ده
يعنى علم عليه من النيل للفرات
وكاتبانها على الكنيست
وعاملين خطة تقسيم للدول العربية
على اساس طائفى ونفذوا نصها!!
ولسة بنقول نظرية المؤامرة!!!!!!
سلميلى على الترماى
بيسخنوا الناس على الشيعة فى الخليج علشان دور ايران وسوريا قرب
وبعدها مصر وحياتك
ده شغل اليهود من زمان
فاكرة لما سخنوا الانصار فى المدينة ايام الرسول على بعض وكانوا هايقطعوا بعض خلاص...لولا الرسول لمها؟
البركة فى اعلامنا ماشى على الاجندة صح

أبوبشر said...

هوة لورنس العرب مابيظهرش الا مع حزب الله ولا ايه؟
عموما من اسمك ..انت عاوز تنفذ نفس الدور القديم بغباء(لورنس العرب الاصلي كان ظابط مخابرات انجليزي كان ليه دور رئيسي في ايقاع القتنة بين العرب والخلافة العثمانية وكل ده لمصلحة الانجليز طبعا)بس المرة دي فتنة مذهبية بين الشيعة والسنة

طب غير اسمك يا جدع!!!

عبد الله السلفى said...

فلسطين مشكلتها ان اهلها مش عارفين ازاى يرجعوها والحل بسيط الرجوع للاسلام كما كان عليه صلاح الدين