Thursday, 23 September 2010

سلاح الكنيسة/ ابراهيم عيسى واون تي في

الشق الاول:
اللي عنده دليل مادي يقدر يتقدم به للنيابة ان الكنيسة عندها سلاح، يتفضل يقدمه، ولو النيابة تجاهلته او غطت على الكنيسة انا مستعدة انشرهوله
انما ان الناس تدور تتهم الناس بالباطل ومن غير دليل بالطريقة دي، ده قرف، وما بقاش هزار، الاول الواحد كان بيتعامل مع الاقاويل دي على انها مضحكة زيها زي اشاعة الاسود اللي في البدروم والسحر اللي بيرميه المسيحيين للمسلمين على العتب والتفة اللي بيتفها القسيس في عجينة القربان، لكن دلوقت الموضوع اخد منحنى خطر.. هدئ السرعة
يمين بالله اللي حيهلفط في موضوع السلاح ده لابلغ فيه البوليس، البينة على من ادعى واليمين على من انكر، يا ناس يا مؤمنة يا مسلمة يا محترمة، قول الزور، قول الزور، قول الزور، اللي ما عندوش دليل وما شافش بعينه يبقى بيشهد شهادة زور، اتقوا الله، اتقوا الله، قول الزور جاي مع الشرك بالله، مش كل ما بشوي يهلوس الناس تقول السلاح اللي في الكنيسة، بشوي ده واحد فرحان بالشهرة وكل ما يخرف تخاريفه الناس تنشر له كلامه، فلقى ان التخاريف بتشهره، وعمال يتكلم على الشورت اللي بتلبسه جويس ماير والسجاير اللي بتدخنها والبروتستانت اللي بيغروا الشباب الارثوذوكس بحمامات السباحة المشتركة ههههههههههههههههههههههههههههههههه ووتر جتة الصايعة بتاعة الشوبان، الراجل ده مش معقول، مش معقول مش معقول مش معقول
والله لولا ان البلد مش مستحملة كنت انا رحت بنفسي وقعدت اسلي روحي بكلامه واضحك، فيه رجل دين يخوض في اعراض الناس؟ هههههههههههه عسل والله عسل
بس مش طالبة العسل الاسود في الظرف اللي احنا فيه، ودي مش اول مرة يهلفط، قبل كده في مكتبة الاسكندرية حضرت له محاضرة قال فيها كلام لوز لوز لوز، بس ما كانش الاحتقان واصل للمستوى ده، والدستور ما فهموش هو بيقول ايه راحوا ناقلين كلامه غلط، بس لما نقلوا كلامه غلط خلوه كلام يعقل شوية، لان اللي هو قاله في المحاضرة عن الكاثوليك كان يخلي الواحد يقع ويرفس على الارض من الضحك، ومالوش معنى، فالصحفي حاول يعمل معنى للكلام 
بس في الظرف اللي احنا فيه ده، لا طالبة نكت بشوي، ولا طالبة نكت السلاح وتفة القسيس في القربان، والا حاشتغل لكوا الباز افندي واقدم بلاغات للنائب العام فيكوا كلكوا
--------------
 الشق التاني:
بالنسبة لابراهيم عيسى، اون تي في بتقول ان ابراهيم انشغل بالدستور فعشان كده مشوه
ده على اساس انه قبل كده كان عاطل وكانوا بيشغلوه كنوع من انواع مساعدة الشباب العاطل وايجاد فرص عمل لهم ولما جواب القوى العاملة جاله قالوا له كفاية بقى ندي فرصة لشاب غيرك؟
ماهو طول عمره رئيس تحرير الدستور، من ساعة ما ربنا خلقه وهو رئيس تحرير الدستور، وبرج العقرب، يعني يشتغل تلتميت شغلانة لحد ما يقع من طوله، ده العادي بتاعه، وطول عمره كده، وربنا ما يعيدها ايام لما كانوا بيقفلوا له الجرايد وكان قاعد من غير شغل، مافيش برج عقرب بيقعد من غير شغل الا ويتجنن ويجنن اللي حواليه، وكان كل تلات ايام يطلع جرنال ويقفلوا له الجرنال، وكل تلات ايام: الو نوارة احنا حنطلع جرنال، يالا اكتبي مقال.. الو نوارة احنا حنطلع جرنال
- امال الجرنال اللي من تلات ايام راح فين
- لا ده قفلوه
وهكذا.. ويكتب اسم مستعار، كان باين بيحط اسم: شادي، ويحط صورته هههههههههههه
بس مع وجود الفضائيات والناس اتلهت فيها لقوا ان مافيش مانع الدستور يطلع لان الناس حتفضل تسمع وتشوف على انها تقرا
مش يحترموا ذكاءنا شوية؟ طبعا مش حيقولوا لنا: احنا كنا فاكرين اننا نعرف نلمه لما ندي له برنامج لقيناه ضرب لنا كرسي في الكلوب
بس على الاقل يقولوا اي عذر تاني، يقولوا احنا بنعمل تطويرات في القناة وان شاء الله لما نخلص حنستدعيه تاني
يقولوا خلافات مالية
يقولوا خلافات بينه وبين المخرج
يقولوا البرنامج مش مناسب لخطة القناة الجديدة
اي كلام.. اي هطرسة من اللي الناس مش بتاكل منها بس تحس برضه ان اللي بيكلمها عامل لها حساب
ثم تجديدات ايه اللي في الدستور؟ يادي سيد البدوي، سيد البدوي يمتلك عشرة في المية من الاسهم ومافيش حاجة اتغيرت في الدستور من ساعتها، ايه التطويرات اللي حيعملها في الدستور؟ كان بيشغل الدستور بالمنافلة وحيركب له مولد؟ كان توك توك وحيقلبه ميكروباظ بالنفر؟ حيركب له اكوالايزر؟ مش يحترمونا شوية؟
مش ممكن قلة الاحترام للناس دي، كده خطر على عقلهم الباطن، والله العظيم كل حالة الجنان اللي صايبة الناس دي سببها احساسهم ان ماحدش عاد بيحترمهم ولا مهتم يضحك عليهم باحترام شوية ولا عامل لهم حساب
عشان كده طايحين عشان يفهموا النظام ودلاديله انهم ناس محترمة ولهم وجود يعني ما ينفعش يطنشونا كده

29 comments:

Ramy said...

انا لسه قايل رأى فى موضوع الأسلحة دى فى مدونة تانى


لان لازم الناس بالعقل كدة لو فيه أسلحة

و الناس دى حطاها فى الكنايس كان موضوع الكشح اتلم

و لا موضوع نجع حمادى اتلم

ولا ولا ولا

و كانت هتكون فى مجازر

على فكرة انا مسيحى

انا عارف دة ميهمش حد بس قلته

على فكرة دة مش دفاع الكنيسة اكتر من انى بقول مش كل حاجة تتصدق

كفاية كدب علشان خاطر ربنا

قهوة كتكوت said...

نوارة يا ست الكل
موضوع السلاح جه من خبر الشروق والواد اللى اتمنع من السفر وبعدين الموضوع اتطرمخ عليه وماحدش جاب سيرته؟؟
وعرف التكذيب نزل فين؟؟ فى الاخبار والاهرام بتاعة التعبيرى
هو لو بمب وصواريخ الواد يتمسك ويتمنع من السفر ليه؟؟
فيه رد رسمى طلع واحنا ما نعرفوش؟؟
لو تعرفى رد هاتيهولنا
ولما بشوى مجنون يانوارة بقية الكنيسة مش بينفوا كلامه ليه؟؟؟؟؟
اغلب المصريين الغير سلفيين وهما اغلبية مش بيكرهوا المسيحيين
لكن بيكرهوا ادارة الكنيسة الحالية
وبيتهيألى معاهم حق
.......
بالنسبة للحكومة وموضوع ابراهيم عيسى النظام ماشى الايام دى بمبدأ انسف حمامك القديم
اشتم كل رموز النظام الحالى بما فيهم مبارك وابنه علشان لما تيجى الواجهة الجديدة للنظام الناس تثق فيها
ده سبب الحرية الغير مبررة الايام دى
فيه جهة واحدة بس ممنوع نقضها واللى بيتكلم عنها بيروح ورا الشمس
علشان الريس القادم جاى منها
حد قال الجيش؟؟

أبو هاجر said...

عزيزتي نوارة أنااليوم قاعدلك في البيت ومتفرغلك و راسي براسك وكلمة بكلمة
أنا علقت على أخينا بشوي واخينا إبراهيم عيسى
اما البدوي وكحاية عشرة بالمية فأنا لي قراءة لما قال
كلام البدوي يانوارة رسالة واضحة العنوان موجه لإبراهيم عيسى شخصيا
فهو لما قال انا املك عشرة بالمية من الدستور، فهو أراد ان يقول ياإبراهيم يا عيسى لقد ضغطوا علي الجماعة و انا قلتلهم ليس لي سيطرة على الدستور لأني املك عشرة بالمية ولهذا يا أبراهيم يا عيسى خفف شوي لأن الجماعة مستهدفينك وانا داخل في انتخابات
مش عايز دوشة ووجع دماغ .

karim said...

الحمد لله علي سلامتك

ايوة كدة ارجعي للكتابة بعقل زي زمان وعلي رأي الست حكيمة العصر "ما فيش حاجة تيجي كدة اهدى حبيبي كدة وارجع زي زمان" الف الف سلامة

بالنسبة للجدع اللي نازل شوي او اللي بيشوي نافوخنا معاه فانا اتفق مع اخونا من العزيز من الجزائر فاننا نخليه يتكلم زي ما هوا عايز عشان يعك اكتر ويبقى شكله هوزوء اكتر.

واما ابراهيم عيسى فاللي حصل ده شهادة تقدير وتأكيد مصداقية المفروض انه يفتخر بيها عشان ميجيش حد يقولك اصله تبعهم عشان كده سايبينه زي عماد الدين اديب وعمرو اديب

وعلى فكرة ده يؤكد عضويته في نادي المحترمين امثال الموقرة الاستاذة سكينة فؤاد والاستاذة صافي ناز كاظم والاستاذ حمدي قنديل

عقبالك يا نصيبة (انا قاصد اكتبها بالنون) بس لما تعقلي شوية

جبهة التهييس الشعبية said...

هو انت مش عايز تطلع من دماغي.. صح؟

مهما اشرح انت ما بتفهمش

انت بتكلم نفسك.. واضح؟ عاجبك انك عايش في دور المنظر عيش

بس عمرو غربية مرة قال لي شوفي بتعملي ايه عشان يجذب لك الناس اللي عايشة في الخيال كده

أبو هاجر said...

شوفي يا نوارة أنا بدأت أقتنع أن أبو النجوم، الله يطول في عمره ،جده السابع أو العاشر أصله جزائري .لهذا طلعت نوارة عنيفة .الرجل قال كلام فيه الكثير من الود و شوية عتاب رقيق و أنت تردي عليه بقسوة ، ما تفهمش ، الله يسامحك
لماذا يتهموننا ويقولون الجزائرييين عنيفين .

karim said...

اطلع من دماغك؟ مابفهمش؟ الف شكر يا ست الكل على ذوقك بس ده معناه انك مستوعبتيش اي حاجة من اللي قولتهالك

وبعدين انا بنظر؟ انا بقود عشرات الفراد وشبعت من التنظير وعديت مرحلة الإحداث دي من زمان

اما بخصوص الاخ اللي بيقولك دوري على ايه اللي بيشد الناس ليكي فالرد واضح وهو ان الناس بتتوسم فيكي الخير لكن انتي بارعة في خسارة اللي حواليكي ومتفتكريش اني مجرد واحد افتراضي وخسرتيه وخلاص، لأ، ده من الواضح انه سلوك عندك وحتخسري ناس كتير لو مغيرتيهوش، وعلى فكرة اسلوب الاستغناء بتاعك عن الغير ده بيدل على عدم امتلاكك قدرة للتواصل مع الغير او حتى الحفاظ على علاقات سوية مش زي ما انتي فاكرة ان ده دليل قوة شخصية او استقلالية

انا غلطان واستاهل

جبهة التهييس الشعبية said...

ابو هاجر

اللي مزنوق في حد يربيه يروح يتجوز ويخلف ويربي له عيل، ما يجيش يقرفني انا

وبعدين لو جدي جزائري دي حاجة تشرفني

:)

بس هو عربي

karim said...

انا متجوز وعندي تلات بنات

ربنا يوفقك
انا مش حاجي هنا تاني

أبو هاجر said...

إلى الغالية نوارة
لعلمك اول مرة منذ ان دخلت بيتك وهي طبعاالمدونة تردي علي هكذا مباشرة وهذااسعدني كثيرا
وإن كان لم أفهم بالضبط القصد .لكن ما يجب ان تعلميه جيدا وتحفظيه بصم أنا أسعى جاهدا وبكل ما املك أن أكسبك صديقة عزيزة. لكن لا أجرؤ ولن أجرؤ ان اخاطبك يا نونو مثل صديفك الإسلامي أو يا جميل مثل صديقك الشيوعي . وحتى إذا رفضت هذه الصداقة سأظل أحاول لأنك يا نوارة وجه مصري الجديد النقي الصافي اللامع ولن تستطيعي ان تكوني إلا كذلك لأنك محصنة من الجهتين
وهذه المرة أول ما أنزل بمصر وأنا جاي حتما سأتعرف عليك عندها تعرفين أنني لست كائنا افتراصيا بل أنسانا واقعي
ولك أجمل التحيات ياأجمل نوارة

السلام عليكم said...

بص يا رامى هو بالفعل ممكن يكون مافيش اسلحه ولا حاجه

لكن قولى ايه السبب فى تصعيد نبره ان المسلميين ضيوف والكلام على القران فى الوقت اللى ابناء الكنيسه كل ما واحده تختفى يقوموا الدنيا ويتظاهروا ثم تظهر والكنيسه تحبسها وتقول ما حدش له دعوى بيها كل الكلام ده لا يثير الشبهات طيب يا جماعه بتتظاهروا ليه ووتتهموا المسلميين بخطفها ثم تظهر وتحبسوها انتم بلغوا البوليس زى اى مسلم
حد بيختفى من عنده
وليه بشوى شادد حيله علينا قوى وبيجر شكلنا هو المسلميين كانوا يعرفوا كاميليا دى اصلا الا لما اتهمتموهم بخطفها

وبعديين استدلالك بالنسبه لوجود الاسلحه فى الكنائس ممكن يكون صح وان فعلا مافيش سلاح وممكن يكون التوقيت غلط يعنى الكنيسه فيها اسلحه ولكن لم يان الاوان بعد لظهورها حتى لا يستعد كل المسلميين فى احداث فرديه يعنى لو الناس بتوع الكنيسه استخدموا سلاحههم فى احداث الكشح او نجع حمادى فى الصعيد اللى اغلبيته مسلميين وصعايده ومسلحين كانوا ابيدوا عن بكره ابيهم

الجوامع بتتنفض مش بتتفتش فلمادا لا تعامل الكنائس بالمثل عادى يعنى ده حتى علشان تكمل المواطنه والا احنا احسن منكم والامن بيفتشنا باموال دافعى الضرائب اللى هم مسلميين ومسيحيين مش يشتغلوا شويه عليكم بفلوسكم

جبهة التهييس الشعبية said...

انا ما ردتش عليك قبل كده؟

لا مش معقول
تلاقيني بس ما كتبتش ابو هاجر فحضرتك ما تصورتش ان الكلام لك

معنى التعليق كنت بارد على حضرتك لما بتقول لي على الاخ اللي عامل لي ابلة فضيلة ده وداخل يربيني

ده ايه الغرور والتكبر ده كله بتاع الاستاذ الضيف؟ هو على اي اساس بيربيني يعني؟ على اساس اكبر مني بتلاتين سنة، ولا عشان انا ست ناقصة عقل وهو راجل كامل العقل

وانا سايباه لاني باتفهم بعض المعلقين اللي بيدخلوا يسيبوا البوست والموضوع بتاعه

وغالبا ولا حتى بيقروه

وبعدين ينفسوا عن رغباتهم المكبوتة

لكن خدته الجلالة وعامل لي ابلة الناظرة

حضرتك شايفه بيتكلم "بعتاب رقيق" عشان حضرتك راجل زيه ههههههههههههههههه مش شايفين ان الستات يتعاملوا احسن من كده

وبعدين حسب مزاجي

طلبت معايا اربيه انا كمان زي ما تخيل انه داخل يربيني واعرفه يتكلم ازاي مع الناس

جبهة التهييس الشعبية said...

هو انا فعلا مش عارفة بشوي ده مطلوق كده ليه؟
وايه سبب تصعيد النبرة
وايه لزوم تحمير العين بالطريقة دي

ومش عايز يسكت ليه؟ مش عايز يسكت ليه؟ هو بالع راديو؟ ماله انفجر في وش البلد كلها كده؟ هم مش عارفين انه كل ما بيتكلم بيهلوس؟

ده الكلام اللي بيقوله للمسلمين اظرف كلام ممكن انسان يقوله لحد، ده بيقول في الكاتوليك والبروتسنات ما في الخمر، لو قال على المسلمين ربع اللي بيقوله على الطوايف التانية من المسيحيين كان اتقطع ستين حتة

حد يلمه بجد

جبهة التهييس الشعبية said...

لا الكنايس ما تتفتش

تتفتش بمناسبة ايه؟

ايه البلطجة دي؟
لما حد يبقى معاه دليل عقد صفقة سلاح مثلا وموثق ويقدمه ولا لما حد يشهد امام النائب العام انه شاف بعينيه اسلحة في الكنيسة الفلانية في المكان الفلاني ويبقى مستعد يعرض نفسه للمسائلة القانونية لما كلامه يطلع غلط يبقى ساعتها تتفتش باذن نيابة

لكن الناس تتفتش عشان شائعات وهلاوس في دماغ ناس مريضة؟

ايه البلطجة دي بجد يعني؟

جبهة التهييس الشعبية said...

وبخصوص الجوامع اللي بتتنفض

هم مالهم؟

هم ذنبهم ايه يعني ان الجوام بتتنفض وانتوا ساكتين ومش بتعترضوا؟ يتعاقبوا ليه على حاجة هم مالهمش ذنب ولا يد فيها؟

وبعدين الجوامع اتفتشت عشان كان فيه جماعات اسلامية بتعمل عمليات مسلحة، وبرضه انا معترضة على تفتيش الجوامع، فين الجماعات المسيحية المسلحة؟

لما يبقى يبان للمسيحيين سلاح ولا نشوف لهم جماعات مسلحة ابقوا فتشوا الكنايس

انتوا حتعملوا زي امريكا وتقبضوا على الناس عشان

suspect terrorist


بالشبهة كده ومن غير دليل واحد ولا مسوغ واحد غير ان واحد مجنون بيخرف الناس تتفتش وتتهان واماكن عبادتها تداس؟

وبعدين هو عشان الاسرائيليين مثلا بيدخلوا اماكن عبادة مسلمة يبقى لازم احنا نعمل في المسيحيين نفس اللي بيتعمل فينا؟

ده منطق؟ بدل ما نحس بالناس وما نرضاش نعمل في الناس اللي اتعمل فينا نعمل زي الاطفال اللي امهاتهم بيضربوهم فبيمسكوا القطة يعذبوها؟

لا كده بقت امراض فعلا

Ramy said...

الأستاذ السلامو عليكو او الأستاذة معرفش

طب مسألتش حضرت ليه الجوامع بتتفتش

و انت فاكر اننا مبسوط قوى يعنى باللى بيهبهب بيه الأنبا بيشوى

ولا حابب انا لما اكلم حد و اقوله ليه اللى حصل فى نجع حمادى

يقولى اللى بتعملوه فينا فى الشيشان
شوف الجابة المنطقية انتو

احنا روحنا الشيشان
و موتنا الشيشانين

جبروت بقا مش مكفينا جبروت اللى المتجبرين بيه على مصر

روحنا الشيشان

انا مش عاوز اتكلم كتير و اتشعب كتير

و صدقنى مبحبش اقول دول عملوا و دول هببوا علشان الكل ملتوط

أبو هاجر said...

حضرتك شايفه بيتكلم "بعتاب رقيق" عشان حضرتك راجل زيه ههههههههههههههههه مش شايفين ان الستات يتعاملوا احسن من كده.
ما أروعك ،و ما أروع عنادك وإصرارك شوفي يا نوارة: و الله العظيم، و الله العظيم و الله العظيم، و أنا لست مجبرا على القسم، وحتى إذا زعلت مني ، أنت تتحبي بالمعنى الإنساني العميق
لكن يا نوارة صدقيني إذا قلت لك أن ذكائك الحاد وقوة شخصيتك لا تقبل في هذه المجتمعات الذكورية وربما ستعيشين تعسة بسبب ذلك

karim said...

هوا انتي فاكرة انك كده ربتيني؟ ده انتي بجد غلبانة وتعبانة في دماغك، ربنا يشفيكي

انا دخلت تاني عشان كنت متوقع عجرفتك وطولة لسانك وواضح اوي انك اتربيتي صح بما يتناسب مع عصر الصيع اللي احنا عايشين فيه

وفيه مثل بيقول الزبالة ملهاش غير الشارع

جبهة التهييس الشعبية said...

هو انت ايه اللي جابك تاني؟

انت مش قلت انا مش جاي هنا تاني؟

مش تخليك راجل كده وقد كلمتك؟

جبهة التهييس الشعبية said...

ابو هاجر

ده كل الناس عايشة تعيسة

الظاهر الغاز المصيب بالاكتئاب اسرائيل نفخته هنا في مصر ولا ايه.. الناس كلها متكتئبة ههههههههههه

قهوة كتكوت said...

رامى:
هو فيه مشكلة ان انت وكتير نوارة بتتكلموا عن السلفيين كأنهم كل مسلمين مصر....دول مش سلفيين وشوية ناس عقلهم صغير ومضحوك عليهم لانهم بيتلقنوا دينهم من ناس مشبوهة مش بيتعلموه....
ماحدش بتهم المصريين المسيحيين غيرهم وتحدى
انما برضه بلاش غزوات الحكومة وافتراه عليكم تجيبوه على كل المسلمين
حد قالك ان الحكومة دى ليها دين؟؟
دول سورى فى الكلمة مطلعين دين المسلمين قبل الاقباط...واكيد عارف ان فى نجع حمادى الحكومة كان ليها يد فى الموضوع
ما الكنايس قدامنا طول عمرنا
اشمعنى دلوقت
والنبى بس حد يشوف حل لبتوع الكنيسة
هايولعوها دى بقت قلة ادب

أبو هاجر said...

لا يا نوارة الواقع المر الذي نعيشه في هذاالوطن العربي من فساد واستبداد و غبن و فقر وحرمان وإذلال وامتهان للكرامة أكبر من أي غاز لقد ادى الواقع المر الشباب العربي ليس للاكتئاب إنما للانتحار و الارتماء في احضان سمك القرش .

Ramy said...

قهوت كتكوت

صدقنى الشخص دة

مثقف مش سلفى و قالها ع الهوا
(:

على فكرة انا عارف ان الحكومة مطلعة دينا كلنا

مش حد معين

و لما فى منطقة مفهاش مية عليا و عليك

مفهاش صرف صحى عليا و عليك

و لما الأجنبى يجى يركبنا فى بلدنا عليا و عليك

عارف مين دة حضرتك

الأستاذ حمدى قنديل هو طبعا مكنش موضوع نجع حمادى كان الكشح

كان الحديث فى برنامج رئيس التحرير فى حلقة انا شفتها مش حد جه قالى شفت حصل اية

يا أستاذى انا قلبى مكسور اكتر منك بكتيييييييييير

علشان اللى وصلنالوا دة

انا كل ما بسمع حد بيتكلم كدة

هتجن علشان مش عارف اعمل حاجة

هتجن لما كنا مستحملين الفساد

و خلاص مش قادرين ع الحمار هنقدر على بعض

و الله تعبت من الكلاااام

صدقنى

انا اسف لأى حد ممكن اكون ضايقته من الكلام

و الأسف مش ضعف علشان الناس اختلطت عليها المفاهيم

اسف

السلام عليكم said...

يا نواره انا لسه شايف الحلقه بتاعه السيده سكينه فؤاد واللى عرضت فيها التجربه بتاعه القمح بتاع سينا ماشاء الله حاجه تفرح بس ياريت مشاريع زى دى لا يعلن عن موقعها اللى فهمته انها جمعيه اهليه ومشروع داتى لا دخل للحكومه بيه احسن الحكومه تقفلها

انا باتكلم جد الناس دى مكريه علينا

اما بالنسبه لرامى يا اخى لما حد يقولك الشيشان ابقى قوله وانا مالى ولا تدر وازره وزر اخرى كلمه بطريقته يمكن يفهمك ويحل عنك

على فكره المسلميين دول غلابه واى كلمه طيبه بتفرق معاهم ويمكن موضوع جنوب السودان واللى كان بيحصل فى نيجريا وكمان لما المسيحيين يتجمعوا علشان واحده ويقولوا المسلميين خطفوهايعنى بيتهموا المسلميين بالباطل وكمان يجى واحد يقول ان المسلميين ضيوف كل ده لازم يكون فى رد فعل

طيب اقولك دليلى ايه ان لما الحادثه بتاعه البنات اللى كانوا فى رحله وغرقوا شوف التعليقات فى كل الصحف ايه كلها عزاء والناس حزنت بجد علشانهم مسلميين ومسيحيين

simplymoi said...

I wish that MY ONLY daughter(who is 2 years old) one day have half of your personality. Keep on the good work. أنت تتحبي بالمعنى الإنساني العميق

قهوة كتكوت said...

رامى افيش اسف وحمدى قنديل مذيع
ورفع الحرج عن ثلاثة والمذيع هو الرابع
بيحبوا يحطوا بهارات وقنديل بيحب الفرقعة شوية...
انما بص على زمايلك وجيرانك وانت تعرف
عارف العيب فى مين؟؟
العيب فى النظام زى ماقال برايز
:))

Ramy said...

ماشى يا عم كتكوت

(:(:

و انا صدقنى هو اللى مصبر الواحد ايه غير اصحابه و جيرانه

بس يارب تخلص الدنيا على خير

سوررى يا أستاذة نوارة ان احنا استخدمنا المونة زى الشات

هى جت كدة بقى

انا اسف

hala said...

انا مش عارفة همة ليش حاطين نقرهم من نقر هالزلمة يمكن عشان فاشش قلبي و بموتني من الضحك وبعدين همة الاقباط مش مصريين برضة

عبد الله السلفى said...

الكنائس لازم تتفتش عشان فيها سلاح يا استاذه نواره لكن الجوامع لا لانها اصلا مراقبة