Tuesday, 21 September 2010

شفتوا؟ ادي اخرة العالم الافتراضي

الا بقى الكمبورورر ده طلع وبال علينا، والله، مش كفاية جنن الشوباب وخلاهم يعيشوا بشخصيات وهمية، البلد كلها تحولت لعالم افتراضي
اتاري بقى الفوتوشوب ده شغال من زمان قوي
ما داهية يطلع مافيش رئيس في الدنيا اسمه حسني مبارك اساسا، وتطلع دي كلها فوتوشوباية وعايشين فيها بقالنا تلاتين سنة
غالبا كده على فكرة.. لانه اعتاد ما يردش علينا، يبقى مش موجود، ودي صورة مرسومة، والسادات ما ماتش اصلا ولابس وش عشان ما يتقتلش تاني 
وابنه جمال ده.. ده جمال السادات اساسا
وعبد الناصر ما شربش فنجان قهوة، عبد الناصر شرب عصير جوافة، ده اذا كان فيه حاجة اسمها عبد الناصر اصلا وما طلعش فوتوشوباية هو راخر
على فكرة الثورة ما قامتش، دي كانت فوتوشوباية وده الملك بيحكمنا من ساعتها، بس لابس لنسز سودا عشان ما نعرفوش من عينيه الخضرا
نهار اسود.. ليطلع مافيش بلد اسمها مصر.. ايه ده؟ القيامة قامت؟ القيامة قامت والناس اتحاسبت واحنا في جهنم وفاكرين نفسنا لسه في الدنيا؟  لا.. ده انا مستنية المهدي وسيدنا عيسى لما ييجوا وربنا يملا الدنيا عدل.. 
طب ممكن نعرف بيضحكوا علينا في ايه تاني؟ الا طلعنا تمانين مليون اهبل يا عيني ومدقوقين على قفانا.. ولا احنا مش تمانين مليون، اه، الشعب كمان فوتوشوب
على فكرة مافيش شعب.. اه، مافيش، ماهو مش ممكن الشعب كله بيتصرف على قلب رجل واحد تصرفات غريبة عجيبة مريبة، اكيد قتلوا الشعب وده هو واحد بس، وعاملين له فوتوشوب عشان يبان انه كتير وانه شعب، وهو اصلا مافيش شعب، هو الواحد ده، وخمسة معارفي، والباقي فوتوشوب، والخمسة معارفي دول اساسا ميزتهم عن الواحد عشان هم مختلفين عنه، انما هو الباقي واحد اصلا، زي صورة سوسو ومودي دول اللي عبارة عن ولد عامل ولد وهو نفسه عامل بنت وبيحب نفسه
اه والنبي.. الشعب كله كده
وطلع مافيش شعب كمان؟ 
طب مافيش ايه؟
انا موجودة طيب؟ ولا انا مت وده الفوتوشوب بتاعي؟
هم ليه طلعوا كلهم بيضحكوا عليا؟ اتاري الواد اللي افتكرته مجنون وقال لي انه العالم كله بيضحك عليه، وان الدين الصحيح اللي مفروض الناس تتبعه دين احمد عدوية وان الناس بتضحك عليه - بما فيهم انا - وبتفهمه اننا في رمضان بينما احنا في يناير واننا مش خريجين اداب وهندسة ده احنا خريجين مباحث ومخابرات طلع معاه حق
عارفين فيلم ميل جيبسون
conispiracy theory 
اللي فضل طول الفيلم يقول كلام مجانين وفي الاخر طلع كلامه كله صح؟
اهو ده بقى فوتوشوب هو راخر.. مافيش انسان اسمه ميل جيبسون اساسا 

24 comments:

kholy said...

دا زي فيلم inception
بس بالمصري :) آخرنا الفوتوشوب

قهوة كتكوت said...

انا اشك اذا انا دبوس
هههههههههههههههه
فكرتينى بكلام ديكارت والله
مش بيقول لك سؤ الظن من حسن الفطن؟
اهو ده اللى ينفع فى زماننا
لا بس حلوة الصور
حاسس ان قفاى احمر فجأة
يكونش الكبير قوى مات واحنا مقضيينها فوتو شوب؟؟

احمد أبو العلا said...

يخرب بيت جنانك
بس أنا عندى سيناريو آخر .. وهو ان مصر الحقيقية موجودة إنما اللى أحنا شايفينه ده هو صورة "تعبيرية" كما صرح اسامة سرايا العباسية

أ / أحمد عبد المنعم said...

بسم الله الرحمن الرحيم

الأخت الفاضلة : نوارة

يبدو أن زيارتى لك جاءت فى وقت غير مناسب تماما

يبدو أن لديك غسيلا اليوم

غسيل لأفكار تتناوبك من فترة وقد انفجرت غسالتها أمس
( أكيد بهزر متحوليش انفجارك على(

أختى

هونى على نفسك وعلينا كى نستطيع أن نفهم قضيتك بشكل عملى

هل تريدين أن تقولى :إن التغيير لا يكون بالكلام بل بالفعل؟

هل باب النقاش ما زال مفتوحا كى نستكمل الحديث معك ؟

لماذا لم تجيبى على سؤالى فى المقال السابق؟

ابنة أى الشعراء أنت ؟

لماذا طالبت بالكف عن الدخول إلى النت وكتبت مقالا جديدا قبل أن تمر عشر ساعات ؟

حيرتينى يانوارة ودى كانت أول زيارة

sal said...

مش كل اللى تسمعه تصدقه
ومش كل اللى تشوفه تصدقه

Ramy said...

يمكن علشان كدة

مرضوش يعرضوا أجزاء فيلم

ماتريكس

علشان منكتشفش الحقيقة

(:

karim said...

shofty Matrix? akeed, tayeb shofty The Arrivals?

انتي حزمة من الهلاوس بس للأسف صحيحة

Nicholas Urfe said...

loooooooooool

لا حول ولاقوة الا بالله !

اللهم انا لا نسألك رد القضاء!

بالصدفة البحتة كنت مع شاب صغير من الجيل الجديد في العيلة والولد قعد يحاول يقنعني ان الماسونيين بيحكموا العالم وانهم سبب بركان ايسلاند وتاسونامي وزلزال تشيلي وماسورة الميا اللي ضربت في التجمع الخامس مؤخراً.

وعندي قريبتي أخصائية نظم معلومات اتطلقت بعد بهدلة وشحططة من جوزها بقت تتخانق مع اي محضر و يجيلها البيت ومع الناس في الشارع وتقولهم انا عارفة ان جمال مبارك باعتك وهوه مراقبني هو وشلته باقمار صناعية خاصة في حتة مجهولة في الصحرا عشان يشوه سمعة أطفالي

اول ما تهدا تروق وتبقى كويسة وعادية !

ايه اللي بيحصل ؟؟ انتو مين ؟

Nicholas Urfe said...

loooooooooool

لا حول ولاقوة الا بالله !

اللهم انا لا نسألك رد القضاء!

بالصدفة البحتة كنت مع شاب صغير من الجيل الجديد في العيلة والولد قعد يحاول يقنعني ان الماسونيين بيحكموا العالم وانهم سبب بركان ايسلاند وتاسونامي وزلزال تشيلي وماسورة الميا اللي ضربت في التجمع الخامس مؤخراً.

وعندي قريبتي أخصائية نظم معلومات اتطلقت بعد بهدلة وشحططة من جوزها بقت تتخانق مع اي محضر و يجيلها البيت ومع الناس في الشارع وتقولهم انا عارفة ان جمال مبارك باعتك وهوه مراقبني هو وشلته باقمار صناعية خاصة في حتة مجهولة في الصحرا عشان يشوه سمعة أطفالي

اول ما تهدا تروق وتبقى كويسة وعادية !

ايه اللي بيحصل ؟؟ انتو مين ؟

7amada said...

يا استاذة نوارة الفوتوشوب بتاعتك بقالها يومين بتكتب كلام غريب
متسيبهاش كده
عشان خاطر مصر
خللي بالك عليها
واللي ملوش خير في نوارة ملوش خير في مصر
احلى حاجة ان الناس مصدقتش انها ممكن تدخل يوم على جبهة التهييس ومتلقيش كلام جديد
الحمد لله الذي عافانا مما ابتلى به كثيرا من عباده المؤمنين

wahat_alshohada said...

يا لهوى يا نوارة انتى ضربتى خالص يا بنتى خديلك راحة شهر من النت و تعالى نطلع نسترخى فى العريش يومين. انا نسخة الفوتوشوب بتاعة ايمان :)

Fahd said...

بس حلوة طلع و بال علينا دي

مش هو لوحدة اللي بال علينا

ربنا يسترها

utopia said...

http://www.masrawy.com/News/Egypt/Politics/2010/september/21/barad3y_photos.aspx
الحزب الوطني يفصل العضو الذى فبرك صوراً مسيئة لعائلة ''البرادعي''

لازم نغير اسم مصر الى جمهورية مصر الفوتوشوبية ههههههه
الاستخدام اللى جاى هيبقى صور ضرب متظاهرين عابدين للشرطة
فوتوشوب برده

أبو أمك said...

يا خوفي
يا خوفي يطلع كمان مافيش فوتوشوب

بـسة .. و شهرته عم بسة said...

هو انا عارف كويس من زمااااااان ان لقاءات الرئيس دي وهمية لاثبات انه عايش و ده بيحصل في كوريا الشمالية و مصر بس مكنتش متأكد بالدليل القاطع و الصور كده و عارف ان الاهرام و الاخبار بينزلوا نفس الاخبار و نفس الصور كل يوم - دي جربتها فترة قريتهم كام يوم ورا بعض و لقيت انهم فعلا بينزلوا نفس الاخبار - و الناس بتقراها برضه و عارف كمان ان الماسونيين بيحكموا العالم و يتحكموا بس مش عارف همه الاشرار ولا الطيبين ! و ده غير الكيميتريل اللي امريكا بتستخدمه لاحداث كوارث بيئية سيول و جفاف و فيضانات ! و عارف ان السادات قتل عبد الناصر و مبارك قتل السادات و كله مع المخابرات الامريكية و ان عمر سليمان اقوى رئيس مخابرات في العالم - حتى اقوى من الامريكان - و عارف اني لازم اقفل النت شوية بس مش نافع لاني لو قفلته يبقى : صفارة و علم و هانزل اقف في اي اشارة مرور
@ أ. أحمد عبد المنعم
صاحبة المدونة دي نوارة احمد فؤاد نجم / و اذا كانت بهية نزلت في الشوارع بعد يونيو 67 تهتف هنحارب هنحارب فاوقات كتير باحس ان نوارة نجم هي مصر اللي اتولدت بعد حرب اكتوبر وهاتنزل تهتف في 2011 باكرهكوا يا مجانين يا ولاد المجنونة ضيعتوا البلد اللي حيلتي !!

karim said...

انا متنيل مكتئب وحاسس اني عايز ارجًع

من ساعة كنت قاعد مع واحد من المقربين من الطرطور الاكبر وللاسف كالمعتاد بحب انخور فقعدت انكشه في الكلام وماستفدتش غير المزيد من الاحباط والاكتئاب وحسيت ان مفيش فايدة، كلام يخنق حسبي الله ونعم الوكيل

يا رب اموت شهيد وارتاح
يا رب طلعنا منها علي خير
يا رب

مغربية said...

أضحك الله سنك هههه

dr.lecter said...

الحزب الوطني عمل لنا انسيبتشن في دماغنا

حد منكم راح مظاهره التوريث؟

on said...

ده كلام فاضى الدنيا حلوه ومفيش اى نكد ولا غلاء

Bell said...

لا لا لا لا
انا شفت الفيلم ده قبل كده
ههههههههههه

ده فيلم Simone
بتاع al pacino
هوه بالملي و حيطلع في الاخر مفيش سيمون قصدي حسني
ودي شخصيه افتراضيه برضك

هههههه

أبو هاجر said...

إلى الأستاذ المحترم أحمد عبد المنعم تحياتي الصادقة من الجزائر
أنا أقلك مين هي ومين اللي خلفوها
أسمها نوارة الإنتصار من مواليد 73 خريجة أدب انجليزي من جامعة عين شمس تعمل مترجمة وصحفية أمها الكاتبةالمحترمة صافيناز كاظم متخرجة من أمريكا وهي استاذة جامعية ولها مؤلفات وحاليا تسهم في الصحافةالعربية و لها عمود أسبوعي بجريدة الشرق الأوسط أما ابوها فهذه حكاية طويلة جدا يتعذر تلخبصها لأنه جزء من تاريخ مصر الثقافي والسياسي لقد ملأ الدنيا وشغل الناس من محيط العرب إلى خليجهم إنه الشاعر احمد فؤاد نجم رفيق درب الراحل الشيخ إمام .وهذه النوارة التي إبتلاناالله بحبها اخذت من امها قوة الشخصية و من أبيها قوة الكلمة

مواطن مصري said...

شفتي دعيتي و حصلت فتنة كرويية

حرب اهلية بين الجمهور الأهلي و الالتراس

الزمالكاوي العظيم

شفتي جيش و مليشيات الزمالك العظيمة

http://twitpic.com/2qucvl

http://twitpic.com/2qudsk

hala said...

لحد متى الإعلام رح يضل يستخف بعقولنا مش عيب جريدة مثل الأهرام تهين وتعمل قراءها مسخرة

ما كنت أعرف إنو رؤساء تحرير جريدة الأهرام إنهم أطفال

أنا من زمان بقرأ المدونة وحابة أكون من المشاركات

عبد الله السلفى said...

كل كذب فى كذب ده حال مجتمعنا