Wednesday, 29 September 2010

امال الخناقة كانت على ايه؟

د. العوا بيقول عندي معلومات ان كاميليا لم تسلم ابدا
والبابا شنودة بيقول كاميليا ما اسملتش
خلاص مصدرين موثوقين بالنسبة للطرفين بيأكدوا ان كاميليا يا عيني عليها لم تسلم
امال الخناقة كانت على ايه؟
الخناقة شخصية، بين العوا والبابا
طب واحنا مالنا؟ خبطوا في بعض هم الاتنين
طب واحنا ذنبنا ايه؟ 
نعزمهم على الغدا ونصلح بينهم
بس انا كاميليا دي صعبانة عليا.. متجوزة راجل واضح انه حاجة صعب خالص، والدليل رد فعله على غيابها، قوم مظاهرات، اللي يجنن بلد مش حيعرف يجنن مراته
راحت يا قلب امها اخدت في وشها وقعدت عند قريبتها
قام قالوا لها انت طفشانك من البيت عمل فتنة طائفية وفيه مظاهرات في الكنيسة
قامت رجعت 
قام قامت مظاهرات تاني لما رجعت
قام قالوا لها رجوعك للبيت عمل فتنة طائفية، طلعي شريط خليهم يسكتوا
قامت يا قلب امها طلعت شريط عشان يسكتوا
قام عملوا مظاهرات تالت
بس كله خير يا كاميليا، كله خير يا حبيبتي، شوفي ربنا عمل كده عشان يرضيك بعيشتك، انت طفشتي من جوزك عشان مجنون، قام ربنا عمل ده كله عشان يثبت لك ان البلد كلها مجنونة.. ما تزعليش بقى، هو ده الصنف المطروح في الاسواق ارضي بقى بنصيبك يا بنتي وربي ابنك,,, حنعمل ايه؟ ادي الله وادي حكمته
يعني جوزها المجنون ده، ما كانش عارف يتصل بقرايبها قبل ما يقدم بلاغ ويقول المسلمين خطفوا مراتي؟ ما كانش عارف حتى يلف عليهم في البيوت بدل ما يعمل مصيبة؟ والبنية يا قلبي اتبهدلت، وناس قعدت تمقق في صورها، وفي وشها وبقت فضيحة بجلاجل
معلش يا بنتي، معلش يا حبيبتي.. نصيبك.. ومش نصيبك لوحدك، ده نصيبنا كلنا
دلوقت الخناقة شخصية ما بين البابا والدكتور العوا
لا البابا عايز يعترف ان مظاهرات الكنيسة غلط بينما متضايق من مظاهرات الجوامع
ولا العوا عايز يعترف انه مالوش حق يقول الكنيسة فيها سلاح
ومتضايقين من بعض، طب احنا مالناش صالح بالخناقة دي
صلوا ع النبي بقى انتوا الاتنين، موسى نبي عيسى نبي محمد نبي، او اتخانقوا، بس احنا مالناش فيه
فين بقى ابو يحيى وابو محمد اللي طلعوا زي الخوازيق دول؟ حد يقبض عليهم ويعلقهم من ودانهم
الغريبة ان د. العوا والبابا شنودة متفقين في الآتي:
حوار الاديان لا يكون في الصحافة، والهدف منه التفاهم لا اشعال الفتن
يجب على الطرفين احترام عقيدة الاخر
والعوا قال باللفظ: لا المسيحي يقول لي انكار الصلب ضد عقيدتي ولا المسلم يفضل يكرر على المسيحي انجيلك محرف انجيلك محرف
كاميليا ما اسلمتش
ما فيش داعي للغط اللي حصل
المسلمين والمسيحيين يجب ان يتعايشوا ومافيش عندهم خيار تاني
العيش واحد حاجة والدين في القلب
طيب متخانقين على ايه؟ لما متفقين في كل النقاط دي؟ متخانقين على ايه؟ 
متخانقييييين على ايييييييييييييييييييييييييييييييييييه؟
واحنا ذنبنا ايه؟  

18 comments:

محمود المصرى said...

بسم الله الرحمن الرحيم

الاختلاف على امرين :
اولهما فى مدى التزام الطرفين بهذه النقاط
وثانيهما فيما لم تتناوله النقاط بالتنظيم .

المهدى said...

نوارة من جهة متخانقين أه الإثنين متخانقين لكن العوا على مواقفه كلها من الأول للأخر و سبب خناقته زى ما قلنا هو محاولة الكنيسة إستغلال ضعف الدولة للحصول على إمتيازات سيدفع ثمنها المسيحى قبل المسلم فى عصر آخر ودولة أخرى ( يعنى خايف على بقايا دولة ) وده اللى خلاه يقول على السفهاء سفهاء وعلى التظاهرات من الطرفين قلة أدب أما موضوع السلاح فده موجه للدولة كيف يمر خبر بهذه الخطورة دون تحقيقات ودون تكذيب واضح أو محاكمة واضحة
أما البابا فيمارس نفس الإستعلاء منع التظاهر ..يبقى نبتدى من الجمعة الجاية الإعتذار... أنا لم أعتذر حتى بيشوى لم يمسه بكلمة واحدة
يا شيخة ده حتى فى ما قبل رفض أن يتصدى لسفالات زكريا بطرس طالما محمد عمارة يقول ما يقوله
نوارة البابا يملك أن يسكت السفهاء ولكن لا يتدخل حتى لقول أنهم أخطأوا بينما العوا لا يملك أن يحكم على شارعهم فما بالك بالشارع المصرى بكل جنونه ومع ذلك يصف جبهة العلماء بالسفهاء
والنبى ركزى من مع الدولة ومن مع هدمها بلاش مين مع مبارك ومين معارض شريف بلاش مين يملك الكنيسة والشارع القبطى و الكرسى الباباوى المرقصى ومين اللى لا يملك إلا مجموعة نخب والباقين يتهمونه حتى فى عقيدته

جبهة التهييس الشعبية said...

ولا العوا اعتذر عن انه اتهم الناس بامتلاك سلاح

فضوها سيرة بقى خنقتونا
مين اللي خايف على بقايا الدولة

ماحدش خايف على البلد خالص
خالص

مافيش غير فهمي هويدي وسمير مرقص بس اللي خايفين على البلد

فضوها سيرة بقى

انتوا للدرجة دي شعب مرفه وفاضي وما عندوش اي مشاكل؟

محمود(باحث عن حب) said...

يا هههههههههههه
انا شوفت اللقائين لشنوده
مع المناوى ومع الحياه الحمرا
والاتنين زى بعضهم
وقوم ايه يتسأل الراجل
الازهر متقبل اعتذارك قال انا مقولتش اعتذار ومعتذرتش
طيب انت جاى تقول ايه
بيشوى بيخبط فى القرأن
وتلوقتى مش عاوز تعتذر سيبك من ده
اقولك حاجه تانيه
احنا مش متخانقين خالص احنا بس عاوزين
نقول
ان الحقيقه فين
انا باثق فى العوا بجد وبحترم كلامه خالص وانتقاده للبابا مع منى بصراحه
وبصراحه اكتر مفيش حد عارف يحاول البابا ده
ولا بتاع سويرس ولا قطاع الاخبار ولا الحمراء خالص الراجل ده

ربنا يتكفل بيه

جبهة التهييس الشعبية said...

يا نهار اسود ومنيل؟

الواد منصور.. ما بيجمعش

طب ابحث عن الحب اسهل لك ولو لقيته................... ابقى تف في وشي

المهدى said...

موقف فهمى هويدى وطارق البشرى هو نفس موقف سليم العوا ولو مش مصدقة أهو إنت صحفية ومشهورة روحى إسأليهم مش عايز أقلك أقريلهم
أما العظيم سمير مرقص فراجعى حواره وستجدى أن موقفه يبتعد عن البابا ويتفق تماما مع العوا
يا نوارة فيه طرف قادر على حشد الناس وقادر على الضغط على الدولة وقادر على محاكمة المجانين وقادر على درأ أى فتنة وممتنع بل ماضى فى طريق على إعتبار أن كل هذه العناصر بما فيها أقباط المهجر أسلحة لا يريد أن يخسرها حتى خطيئة التوريث لم يترفع عن الخوض فيها
وطرف أخر لا يملك شئ من هذا كله ولدينا كل أدبياته ضد التفرقة وضد الفتنة ومع دولة القانون ( لو لديك للعوا شئ مخالف سأكون سعيد به ) ولا يمتنع عن تسفيه السفيه أى ما كانت قوته أو جماهيريته
لو الخناقة بين بيشوى وحسان أو الحوينى أو حتى عمرو خالد كنت حأبصم على كلامك بالعشرة الأثنين مجانين ربنا يهنيهم ببعض
ولو الخناقة بين البابا والشعراوى أو كنت برضه حأبصملك بالعشرة لهم جماهيرهم ومصالحهم وحكومتهم وتوريثهم وبرضه ربنا يهنيهم ببعض
لكن العوا ... ما ينفعش يا نوارة وبعدين موضوع السلاح مش تهمة موجهة للمسيحين ولا للكنيسة السلاح خبر إتكتب (سمحوا ليه يتكتب ) وتم التكتم عليه يا إما خطأ فلابد من نفيه وتكذيبه ومحاكمة من سربه ومن نشره يا إما حقيقى وتبقى الكارثة كارثتين سلاح فى الكنيسة ودولة تتستر ده كل اللى قاله سليم العوا فهل يستحق الإعتذار

مواطن مصري said...

كل الخناقة دي عشان واحدة


اخس يا بيشوي و يا عوا طلعتو شباب سيس


بس لما الخناقة تيجيي على الشيعة يا


ريت تقوليلي يا نوارة انا بحب

الكلام الي من نوعية روافض و مجوس

و عبد النار و الصفوية انا بحب

الخناقة دي لما نجهز اللب و السوداني

مواطن مصري said...
This comment has been removed by the author.
جبهة التهييس الشعبية said...

انما يعرف الرجال بالحق ولا يعرف الحق بالرجال يا مهدي

هههههههههههههه

هو كل الناصريين كده؟

مش الاشخاص اللي تحدد الموقف صح ولا غلط

الموقف هو اللي يحدد نفسه

مواطن مصري said...
This comment has been removed by the author.
المهدى said...

يمكن فعلا كل الناصريين كدة .. بس أنا دلوقت مستعد أصدق أى حاجة فى أى حد عشان كدة قلتلك بصى للموضوع كله من منطلق أن العوا ...وبالمناسبة هويدى والبشرى لهم نفس الرأى هدم الدولة أخطر على المسيحى قبل المسلم وعلى الضعيف قبل القوى ثم إن الراجل مدخلش فى الهوجة بتاعة كاميليا من الأول إنما هو والأخرين لديهم تخوف ( على الدولة من موضوع كاميليا ) وإقرار حق للكنيسة يفوق حقوق المواطنة ولديهم نفس الخوف من الأخ سيدهم الإنعزالى والأخ بيشوى المجنون هم دول الفتنة التى يستطيع البابا أن يقضى عليها لو أراد
بلاش تاريخ الرجل خلينا فى حاضره أى مصلحة للعوا فى أن يتخلى عن كل أدبياته ويشعل الفتنة صفقة مع الدولة حياخد منها إيه يا بنتى ده إحنا أيام حرب لبنان كنا بندور على واحد محترم فى أم البلد دى بالعافية
سوى شيخ ولا معارض
يا نوارة الموضوع أوضح من كل الكلام اللى إحنا بنقوله صفقات البابا مع الدولةوقدراته كسياسى أمام سلطة تفكر بقدميها وتحلم بالتوريث عن طريق أمريكا إسرائيل إنشاالله العفريت
مش عارف إزاى إنت تحديدا مش عارفة تشوفيه ماهو يا العيب فية عشان ناصرى يا العيب فيكى عشان فاجومية

قهوة كتكوت said...

مش عارف ليه بتعندى يا نوارة؟
البابا طلع اعتذر رغم انه ولا هو غلطان ولا بيشوى غلط( والصحفيين هما اللى غلطوا فى حديثه عن الضيوف وهو اكيد ما قالش كده....والكلام بتاع تحريف القرأن كان كلام داخلى والصحفيين
هما برضه اللى غلطانين
والمسيحيين ما بيتظاهروش فى الكاتدرائية بقلة ادب عكس المسلمين وهو مالهوش سيطرة على مظاهرات الكنيسة!!!!!
يعنى من الاخر بيقول انا باعتذر علشان انا الكبير وباخدكوا على قد عقلكوا

بصى احنا ناخد حقنا من الصحفيين اللى طلعوا هما السبب
ههههههههههههههههه

eslameslamoo666 said...

يا استاذه نواره ياريت تفهمى الموضوع صح كاميليا مخطوفة والى ظهرت مش هيا كاميليا الحقيقية وكمان شيلى صورة الزفت حسن نصر الله لانه سب الصحابى معاوية رضى الله عنه

karim said...

أختي العزيزة السلام عليكم
(على فكرة انا اتصالحت انا ونوارة عشان ميخشش حد رزل ويرمي كلمة كدة ولا كدة)

ولو بتقولي جوز كاميليا ده مضيع عشان البيه مكلفش خاطره يدور عليها عند قرايبها فأنا عايز اقولك ان الشعب المصري كله مضيع لأني حصل معايا نفس الموقف

وأنا في الكلية جارتنا هربت من البيت عشان أبوها مبهدلها والافندي اتصل بأبويا وقالوا اني خطفت بنته

ولما ابويا قاله اني مسافر الراجل قاله يبقى ده اكبر دليل

وفي الاخر طلعت هربانة عند خالتها

احنا للاسف شعب نعشق نلاقي جنازة نشبع فيها لطم عشان معندناش القدرة على المواجهة

زمان كنا كويسين بس دلوقتي ربنا يهدينا

أبو عمر - الصارم الحاسم said...

هههههههههههههههه

البابا شنودة: لم أعتذر وإنما أسفت لضيق وحزن إخواننا المسلمين

http://www.masrawy.com/News/Egypt/Politics/2010/september/29/pope.aspx


ههههههههههههههههههههههههه

هههههههههههههههههه

ههههههههههههههههههههههههههههه

محمود(باحث عن حب) said...

نوراه
ليه كده
س
انا شوفت لاقائك مع ابراهيم عيسى
ومن متاعى المدونه تااعتك ومقالاتك كمان



معلش

مش عرف اجمع عادى
المهم انى اتكلم
واطلع اللى جوايا

وعدم ادراك اللى قدامى

دى مشكلته\

وشكرا

وبرضوا
هتابعك

عبد الله السلفى said...

الخناقة كانت على واحدة اتخطفت من الكنيسة بعد ما اسلمت وجابوا دوبلير ليها وعملوا فيديوا لهذا الدوبلير عشان يهدوا الشارع و الغضب الشعبى ولو عايزة تعرفى التفاصيل بجريدة المصريون

ابراهيم الدسوقي said...

بداية والله أنا حزين لما آل إليه الأمر في الدستور لان أحب ابراهيم جدا واحترمه قد اختلف معه في منطلقاته ولكن في النهاية يظل إنسان محترم قد تختلف وتتفق معه ولكن يظل الود والاحترام قائم ولكن المشكله اني رأيت البعض منهم يسب أيمن شرف ومن عشرتي مع أيمن شرف منذ اكثر من عشرين عاما سواء في العمل سويا في مصر أو في الامارات هذا الايمن مشكلته انه ماينفعش حد يشتمه اصلا فعلا فانا اعرفه جيدا جد جدا واعرف انه شخص ماينفعش حد يشتمه اصلا لانه لايترك للاخرين فرصه شتمه او سبه لانه كما يقول معاوية بن ابو سفيان بين وبين المسلمين شعره ان تركوها جذبتها وان جذبوها تركتها ،ثانيا لقد سمعت ابراهيم في لقاء مع الاي ار تي قال أن ( ايمن شرف هو زعيمي السياسي ) وكلاهما من نفس مدرسة الوطنيه وكلاهما لايمكن المزايده على أدبه وثقافته واحترامه لمهنته فلماذا الكلام على أيمن شرف والله ليس دفاعا عن ايمن ولكن لاني فعلا اعرف عنه هذا لايمكن أن يكره احد أيمن شرف اصلا ولايمكن ان يسبه أحد هو هكذا وشكرا لكم
ابراهيم الدسوقي
صحفي بوكالة أنباء الشرق الأوسط