Sunday, 12 September 2010

ما احنا عارفينا يا ايما.. ما عندكوش مستشفيات؟

طب نعمل لكوا ايه؟ مجنون بيتعالج على قفانا يعني؟ على الله يموت لكوا واحد منكوا عشان تدخلوه المصحة، هو فيه حاجة اسمها مجنون مطلوق كده على مخاليق ربنا؟ ما عندكوش مستشفيات؟ ابعتوه علينا واحنا ندخله مستشفى العباسية لما حيبقى عبرة لكل من يعتبر، ده احنا اسم الله العاقل بيعدي من جنب المستشفى دي يتجنن
مدام مطلوق كده يبقى السلطات الامريكية مش شايفة انه عيان لهذه الدرجة، طبعا، لانه لحد دلوقت مش جاي غير على الحيطة المايلة، لكن لما ان شاء الله يدور بسكينة ويجيب بطونكوا واحد واحد ساعتها تعرفوا ان الله حق وتدخلوه مستشفى
وبعدين ايه حكاية الناس اللي ربنا بيكلمها كتير في امريكا دي؟ بوش ربنا بيكلمه، وتيري جونز ربنا بيكلمه
استغفر الله العظيم، حرام دي امراض، الحمد لله الذي عافانا.. يا جماعة خلوا بالكوا بقى، ربنا ما بيكلمش حد كده، اللي يسمع صوت يعرف انه مش ربنا ويروح لدكتور، دي نصيحة اخت، وبعد كده يعملوا حملة توعية في امريكا مدام الموضوع ده منتشر عندهم، حاجة كده زي وقفة مصرية عندنا: "لو سمعت صوت ربنا.. اتصل بالمستشفى عندنا" ويعملوا خط ساخن للناس اللي بتسمع اصوات ويتهيالها ان ده ربنا
او يكون دي بسم الله الرحمن الرحيم؟ يمسحوا امريكا بعرق حلاوة ومية وملح ويشغلوا سورة البقرة في مكبرات الصوت لمدة شهر حتنضف من كل اللبس والاعمال واي حاجة وتبقى زي الفل
او يمكن تكون دي ارواح الناس الكتير اللي قتلوهم، ايشي يابان على فيتنامايين على اكوادوريين على عرب على افغان اسم الله مش عاتقين، اكيد عفاريتهم حضرت عندهم
قال ابويا مجنون قال... هي كمان عايزانا نتعاطف معاه؟ ده ايه البجاحة دي؟ مش مجنون طول ماهو برة المستشفى، لما تدخلوه المستشفى ساعتها يبقى مجنون
وبعدين هو مجنون
فوكس نيوز اللي عملوا له الدعاية والهيصة والبوليكة كمان مجانين؟ الاعلام الامريكي اللي حوله لواحد اشهر من بيل جيتس كمان مجانين؟ اوباما اللي اتصل بيه واداله اهمية مجنون؟ الناس اللي سمعت كلامه وماشية وراه كلهم مجانين؟ هي الحدوتة دي كلها ايه غير صناعة اعلام امريكي عشان تتسلوا علينا، وكل ما تتزنقوا في حد تهزأوه ما تلاقوش غيرنا

6 comments:

Ramy said...

ههه
(:

تقريبا و الله أعلم هى خدت كوررس عندنا
ما الحكومه كل ما جريمة تحصل

يقولوا دا مجنون

مجنون برضه

(:(:

سواح في ملك الله- said...
This comment has been removed by the author.
تحت الكوبري said...

el-link elly enty 7attah meh shaghaal :-)

قهوة كتكوت said...

انتى عارفة؟؟
انا حاسس اليومين دول انى باتفرج على مسرحية والمؤلف بيحاول يقنع الناس ان دى الحقيقة
الله يحرق الاعلام على الدعاية على اللى اخترعهم.....خلاص لحسوا عقلنا
حسبى الله ونعم الوكيل

قهوة كتكوت said...

http://www.youm7.com/News.asp?NewsID=276837
الظاهر الامريكان كلهم ملبوسين
والله أغبى شعب شفته فى حياتى بياخد على قفاه ويتضحك عليه وهو مبسوط ومنشكح

أبو هاجر said...

ألم يقولوا عن سليمان خاطر مجنون